|
|
 فى عشق المطر
|
ازداد عشقى للمطر وقتما عملت مزارعاً بمنطقة سمسم صعيد القضارف , وقد استمتعت كثيراً بالمطر رشاشه ودعاشه , وقمت بتسجيل منازله ( واحدها منزل بفتح الميم و الزاى ) ويسمى المنزل فى بعض مناطق السودان ( عينه بكسر العين وفتح النون ) .و المنازل على التوالى هى الرشاش , الذراع , النتره , الطرفة وتسمى الطرفة ( الطرفة البكاية ) لاستمرارية مطرها و الذى يهطل اربعة وعشرين ساعه متواصله احيانا ولكنه خفيف , ثم منزل الخيرسان . وهنالك مطر ينزل اخر الخريف يسمى مطر البخات , ويكون بخيتاً صاحب الزراعة المتأخرة التى يصادفها مطر البخات لانه قد لا يأتى كل عام . قد تختلف تسمية منازل المطر وترتيبها من منطقة لاخرى فى سوداننا الواسع وهاكم ترانيم عاشق المطر .
نزل الرُشاش
و الدنيا فرحت بالرزاز
هبت فجُر ريحة الدٌُعاش
وغشت ديار ناساً عُزاز
ويعطر النال كل فضاءاتنا
ويدوبى البهمو راز
كم فرهد القش فى الخلا
ومن الفرح
جدّع صفيقاتو الحراز
نمرق زرافات للبلاد
شايلين تواريبنا واملنا
وقريبة موية زرقا
حبيبة زاد
وافراحنا ضُمه مؤجله
لامن يحين وقت الحصاد
ابشر
خريفك ابو السعن صُرفة وجراد
نُودِع تواريبنا الارض
رويانه بى مطر ( الضراع )
ما امانه عندك يا ارض
مافينا زولاً
عرضو باع
حاشاك حاشاك يا ارض
ماكلكم راعٍ
وانتِ الفينا راعْ
النترة جات صاقعه وبرق
ليلاً دُهم
عبادى يتلاصف
أُو وادينا القبيل عطشان غرق
شيتاً كتير ما بتلحق
قبل الشروق قبّل شرق
شوف ام رويق كان شايله
او ( مربط عجيل )
داك الدليل على روعه الطرفه
البتبكى نهار وليل
و الضحوى دافق خير كتير
لامن يسيل
ويتشابى للشمس الخدار
اصبح يطاول المستحيل
مارِوى وقِوى
وصبحت سنابل العيش حِمِلْ
و الخيرسان بيزيد نجاضو
ويكتمل
لَبَنَه وفريك
و الليله ديك
خبتت دلاليكنا وفرِحنا
وطمبرو الطمباره
غنو بناتنا
يمه عريسنا سار
متوشح السيف باليمين
سوط العنج فوق اليسار
بكريتو دُخلة ستنا
وعقباً عقد امنه ومنار
حنتنا
كبريتنا
وضريرتنا
البخور ما خلا دار
عدّى الدرت
شاكرين وحامدين الاله
على نعمتو الظهرت بدت
نحن وعيالنا
وكل حياتنا اتبدلت
جالسين ندوبى
سِعن مندّى
حدانا كورة روب كبيرة
وعنقريب هباب
تحت شجرة تبلدى
حاضنه مويتناف حشاها
وفى الحنايا
معطره ومحلية
ممزوجه بى طعم اللحايه
يا حلاته رَوى وبرود
ودوا ومحايه
يا نجدة الصيف
ويا بلة الريق
يا راوية الضيف
ويا فاكة الضيق
ماانتِ نعمة
وانتِ اية
و حنينه زى نخلة
لو جدعوها بى عود او حجر
نثرت تمر
بتقوّت الجيعان
وتحلى للشبعان
وللصايم اجر
حين يسمع الاذان
وحنينه زى شجرة هشاب
راكزه من كمين سنين
اجوادة لو جرحوها بى فاساً سنين
سالت دموعه ورقرق البلور
بيتراقش لآلى تضوى نور
صمغ ابيض وحيناوى
وكعاكيل السرور
وعم مختار ضحك
بانت نواجزو صُفر
وفاطرو الفضه متروم من كُتُر
ماضحكتو الجلجاله
عدت بالفريق القايلة
واتردد صداها عصر
لبس سكينو واتلفح بتوب بنقالى
علق لى حميرو دخن
عصيدةً حاره فك الريق
مُلاحه لبن
وحبّس بى منعنع شاى
من ايد فاطنه
ريقة عسل
كلامه عجن
واتنحنح
ينصر دين ابوك يا فاطنة
يا طاعمة طعام انتِ
ومعسولة كلام انتِ
وما حلوة منام انتِ
وما عالية مقام انتِ
وتب ما فيك كلام
يا فاطنة خاتية القول
وماك ست البنات
عارفالاصول يا فاطنة
ماسموك على بت الرسول
يــــــــــــــافاطنة
|
|
 
|
|
|
|
محمد فضل الله المكى
فيس بوك
تويتر
انستقرام
يوتيوب
بنتيريست