السر شنو البيخلى الجماعه البيقعدوا فى الحدائق اتنين اتين... يقطعوا ويمعطوا... فى النجيله كده

Quote: يمكن يا استاذة ناهد عشان متل السيناريو دة النجايل بتتمعط هو: ازيك ما لك اتاخرتي كده؟ هي: كدي الأول خليني اتوهط في النجيلة الساقطة دي وبعدان تجلس في النجيلة تاخد ليها نفس عميييق وتاخد ليه معيطة من النجيلة هي: أنت يا حمودي عملت شنو في الكلام القالوا ليك ابوي؟ هو: مستعبطا الكلام ياتو هو ما قال لي كلام كتير ياتو فيهم؟وياخد لية معيطة من النجيلة. هي: يعني ما تهظر هو قال ليك كلام واحد.موضوع تحديد يوم العرس يا حبيبي احنا لينا تلاتاشر سنة مخطوبين من زمن شعرك الكتييير داك تتذكروا؟ ياخد لية معيطة من النجيلة بيدوا الشمال بينما يتحسس بايدو اليمين صلعتو التي تنعكس عليها لمبة العمود. هو: يعني انا اعمل شنو في الاول الموضوع كان ماشي كويس وكلة تمام لغاية الكشف الثقيل داك الشالوني فية للصالح العام بعد داك انتي عارفة الحصل شنو. هي: طيب شغلانة عم اللمين في الدلالة مالك خليتها؟ بعد ان اخد لية مديدة علي جنبة الأيمن بجوارها قال حمودي وهو يمد يدة وياخد لية معيطة من النجيلة المسكينة الجنبو ايوة وكانت كويسة اول يوم مشينا الدلالة بتاعت العربات يوم الجمعة وبعنا بوكس وركشة طلعت منهم بنور طويل وقلت خلاص فرجت بس الحصل بعد داك خلاني ما اقرب الدلالة بعد داك. هي: كدي الأول وريني نور طويل يعني شنو؟ هو: نور طويل يعني مائة الف وبعد ما صلينا المغرب في الدلالة مشيت قلت اركب لي امجاد (ما قابض نور طويل) بس مشيت علي الظلط لقيت ليك البوكس البعناة زاتو واقف سالت صاحبو مالك يا زول انشاء الله خير بس ما كملت الكلام لقيت نفسي في المستشفي اتاري البوكس كان بيحتضر ادوة درب عشان يبيعوة وما مشي لية كيلومتر دربة كمل سلم الروح .دة كان ماشي بالجلالة وانا قاعد احلف وقت بيعة بوكس جديد زي الحديد اخواتو ما سمعوا بية والله بيعو بالخسارة وكدة .يعني لقيت ليكي الموضوع كلة كضب ونصب وبعد داك دايراني اروح الدلالة دي تاني. هي: اها وزراعتك القلت ماشي تزرعها في البلد مالك خليتها؟ اه بالله ما تذكرينا الايام النحسة ديك ما انتي عارفة قالها وهو يمعط في النجيلة ما دة الجنن بوبي ذاتو؟ هي: كيفن يعني؟ قالتها وهي تمعط في النجيلة الجنب حمودي بعد ما كملت النجايل الحوليها هي هو: ما مشيت قابلت أعمامي وحكيت ليهم انو محتاج لأرض أبوي الله يرحمه وقلت ليهم انا فصلوني للصالح العام وعاوز أجي ازرع قام قالوا لي ارض أبوك براها شوف الأرض الحولها ديك كلها إن قدرت ازرعها ومافي زول داير منك حاجة.قمت شمرت وطلعت البنطلون ولبست العراقي ومشيت البنك شلت لي منهم كم مليون كدة عشان التقاوي والكديب والذي منو وهاك يا زراعة والله بالطورية زرعت ليك حداشر فدان نصهم خضار ونصهم بصل بس جا وقت الحصاد القي الناس أبات إيصالات ديك شالوا التلت قلنا مافي مشكلة الباقي أودية الخرطوم بغطي معانا.المهم خلاص لمن بعتة وجيت احسبها لقيت يا دوب غطي معاي حق اللوري من البلد للخرطوم ،اها جيت البلد قلت اللغير زراعتي وازرع قمح لقيت ليك ناس البنك ومعاهم البوليس منتظرني ومن هناك علي السجن عديل لغاية ناس البلد الفي السعودية عملوا لي كشف وطلعوني. وفجاءة خطرت لحمودي خاطرة وقال مخاطبا خطيبتة وهو يمعط في النجيلة بغيظ شديد انت يا هناية ناس السعودية ديل لو عملو لي الكشف دة من الاول يعني مما فصلوني من الشغل هسي ما كان عندنا ولد ولا بت عندها عشر سنوات. انه المتزوجين عكس ذلك تماما ....تلقى كل واحد مدى ضهرو للتانى ... اها للكود التاني دة بجيكي راجع B]