نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 خلووو طرف ومقص الرقيب (عضو جديد لنج).... شكري بكري
|
في البدء كامل السعاده بالانضمام الي ركبكم الميمون اهل سودانيزاون لاين وشكرا بكري
لا ادري ماذا دهي الرقيب الصحفي حتي يحذف هذه الماده من صحيفة الاحداث لانها وبكل بساطه تجربتي الشخصيه في الخدمه الوطنيه (نسبة لعدم وجود واسطه مبدئيا وعدم الرغبه في الواسطه نهائيا) فقد قمت باداء الخدمه (كاكي وكلاش), قمت هنا فقط بسرد اخر يوم فيها, يوم خلو الطرف
لكن يبدو انها لم توافق (مزاجا) طيب لدي الرقيب
خلو طرف
المكان : منتصف المسافه اسفل الشمس تماما
الذمان : 42 درجه فهرنهايت تحت الغبار
أاستوقفني ذلك الجندي ذو الثياب العسكريه الرثه , خارطة العالم شغلت مكانا بارزا علي صدر القميص, تلك الثياب التي تحتفظ زاكرتي برائحتها عن صدر انف,كانت فرشي وغطائي ملبسي ودثاري لفتره حزينه علي قلبي (اليس غريبا ان لهذا الكاكي نفس الرائحه علي أي جسد...؟)
استوقفني باستغراب من كان يتوقع وفاتي قبل عام.... تأملته مضطرا... تحتفظ (صلعته) ببعض اشلاء مرقده مع الكثير من حبات الرمل التي صنع العرق منها خطوطا متعرجه كتلك التي يصنعها شاطئ النيل المتسخ عادة... عيناه محمرتان.... (خشمه ناااااشف) ... عموما كان شكله يجعلك تشعر ان (الواطه ليل).. و... (السماء نهار)
_ عندي اجراءات خلو طرف ...... (تفوهتها باستجداء مقيت جعلني اكره نفسي زاااااااااتو)
_ وانا واقف هنا أم العروس...؟ ما (تفتح خشمك دا)..
_ (فتحت خشمي ببلاها).. ولم اتفوه بكلمه... (أسوي شنو انا يا جماعه.؟)
_ انت يا زول مجنون..؟
_ لأ
_ خش .. الباب الاول علي يمينك ... تالت شباك علي ايدك ال.............
وبداء يصف مكانا احفظه عن ظهر غيظ
...................................................................................
شباب من مختلف الاعمار ..والسحنات... واللهجات.. تتسمر اعينهم علي الفراغ وتطارد اشكالا وهميه من نسج خيال الانتظار المثخن بزاكرة الكلاش (والاحوال هادئه)... المصابين بالانفصام والتوحد في نفس الوقت... تعبث ايديهم بمجموعة اوراق تبدو متشابها ومهترئه بشكل مريح وهي مذدانه بذلك الصقر العجوز... زاكرتهم مقسمه الي قسمين... يشغل (الكاكي) القسم الاول كثابت... ويتحرك القسم الثاني مابين (الحواشه....الجامعه... الكارو... الطبليه... الخطيبه... الخطيئه... العرقي... العطاله... البنقو... المجهول... بنات الهوي... الفراغ... الخوف... (واشياء اخري مفيده)
.......................................................
المكان : صاله تعاني جدرانها من الحميميه المفرطه... تكاد تنطبق علي من عليها نشوة وازدراء , تطل عليها مجموعه من الشبابيك , احزر عند دخولك اليها ,, (قد تصيبك بالذهلله)..
الذمان : (سبعه درجات ونصف الدرجه) علي مقياس (المغسه)..
بين الحين والاخر يرتفع صوت احد العساكر من الشباك المجاور لمكتب (الاجراءات) ... يرتفع متجاوزا حد السماع ليدخل في (خانة) الازعاج... صائحا باسم من حلت عليه (رحمات) هذه الدار ونال (خلوووووو طرف)
........................................
(عبد الله ادم تيه)
ينهض متهالكا.. يحاول ان يتصنع مشية عسكريه تخرج علي استحياء يختتمها بابتسامه (برتقاليه)... يتلقف ورقه بيضاء في حجم كفة اليد , تنهال عليه عبارات (مبروك.... مبروك.... مبروك) , يكتفي بالرد عليها ناظرا بابتسامة بلها
وتبداء الهمهمات في تلك الصاله المذدحمه برائحة البشر
_ سنتين ساكي خلو الطرف
_ والله قالوا مشي لفكي عديل مانفع
_ ياخي الزول ده اهلوا من ربك عندو ود عمه شغال في طبليه في السوق الشعبي وساكن في سوبا الحله... قاموا حولوا السوق الشعبي وكسروا ليهم بيتهم في سوبا, والله هم زاااتم حظهم (كج) خلاس
_انت بتعرفوا من وين..؟
_نحن قبضونا في نفس الكشه..
..........................................
(عصام الدين عبد الخالق عمر)
انيق بما يسمح به هذا المكان... حذين بما يكفي لينال خلو الطرف... عدل من وضع نظارته (قعر كبايه).. أدخل الورقه في مظروف من الحجم الكبير.. لعله لايفضل سماع (مبروك)..
وتوالت الهمهمات................
_ ده خريج هندسه
_ ايوه .. كهرباء كمان
_ خدمتو قضاها في بسط امن شامل جمبنا في السادسه
_ شكلو (بتسطل)..صاح..؟
_ يا عمك الزول ده قالوا كان اول دفعتو... مسكييييييييييين.. في الخدمه اتعلم ليك البنقو ... بقا طوااالي (راكب الفيل)..
.......................................................
..... وبدأت ابحث لي عن مكان
_ يا جدماعه الصف ده نهايتو وين...؟
_هناااك جمب الزول الشايل (نبض الكاريكاتير) داك... عليك الله قول ليه قالوا ليك الجريده دي (فكها) راجنها بجاي
شققت طريقي بتعثر مسطنع.. اظهار التعب في مثل هذه الاماكن ضروره من ضروريات الاستجداء..... (للحقوق).
_ السلام عليكم
_ ااااي ده الصف اقعد ساكت
لم استغرب للرد... جاذبية هذا المكان تقوم بالتشويش علي مدارات التفكير الطبيعي ... لا تستطيع معرفة ان الصف يتحرك لكن انت تستمر في مكانك.... ام انك تتحرك بينما الصف (واااقف في حتته)...؟ لا شيئ يسير بصوره طبيعيه هنا... هذه المنطقه لا تتقيد بالجازبيه الارضيه ولا خطوط الطول .. (لم يتم تحديد ماهية علاقتها بخطوط العرض حتي كتابة هذه السطور)
.........................................
(تامر حسن حسين)
نهض وهو يكاد يترك بعضا منه علي المقعد... يسير بزهو فتيات الثانوي العالي... يبدو انعم مما يجب ان يكون عليه (خاصه في مثل هذا اليوم)... لعل خصل شعره المرتبه لا تتناغم مع ايقاع (الصلعه) التي يذدان بها معظم الموجودين,,, او لعل شيئ اخر يجعله (مشاتر)..
وبداء الخبثاء يتهامسون................
_ علي الحرام الزول ده (لا قضا خدمه لا حاجتين)
_ يكون قضا (حاجه) واحده
_ ها... ها... ها
_ طلقانه ام ضفاير الزول ده كان شاف كلاش بعينه ولا خشا معسكر..
_ طلاق شنو يا اخينا (هداك الله) من اراد ان يقسم فاليقسم بالله او ليصمت
_ ده مالو كمان...؟
_والله يا جماعه انا ما قاعد (اتكلم ساكت)... الزول ده دفعتنا وأول ما اتخرجنا سافر... وتاني ما شفتو الا الليله... اها يكون (قضاها سفير) مثلا..؟؟
_ ياخي احسن الظن باخاك
_ اخاك في عينك زاتو هويي الخوخه... ده مالو ده ياخي...!!!
...................................................
انتو يا جماعه الصف ده مابمشي ولا شنو...؟ نهض احدهم كمن استيقظ مذعورا نسبة لضياع احدي المواعدات العاطفيه
_ عليك الله اقعد ما تجيب لينا هواء ... جنابو ده لو زهج ولا جات صلاة الضهر تقنع
_ الزهج عرفناه الصلاه البقنع فيها شنو يعني..؟
_ جنابو ده عنده جزء بقراهو بعد صلاة الضهر ولما يكملو بكون ذمن الشغل زاااتو انتهي.
_طيب ما يقراهو في البيت..؟
_ والله _فكره)... لما تصل الشباك كلمه بيها... مكسب...؟
...................................................
(بيتر مينق شول اكول)
نهض كمن داهمه كابوس... تلفت يمنة ويسره علي خطي الذهول... مسح عرق وهمي من علي جبهته ... ما ان تناول الورقه حتي ظهرت أقسي معاني خيبة الامل علي وجهه النحيف... كان كمن سيشرع في التقيؤ (وبطنه فاااضيه)
_ (أسماء يا... اسم دا فيو قلط.... اسم بتاء أنا ما كدا ياكي)..
_ خلاص جيبو... خلو الطرف ده ما حقك
_ (لأ بتاء انا... نمرا اسكريا دا بتاء انا ... لكن أبو بتاء انا ,اسم بتأؤ دينق... وانا داي مكتوب مينق)..
_ خلاص امشي جيب اشهار شرعي مشفوع باليمين انو اسم ابوك ما كده... وقدم طلب تعديل في (مكتب الانزال) بعد تقطع الايصال.. وجيب معاك استماره الحاسوب
_ وادفاء قروش تاني..؟
_ لا ادفع الباب.... (رد المنسق ببرود لا يتناسب مع الطقس)
_ واستنا تاااني أشره يوم ...؟ ده ما كلط بتأء اناء.. ياكي..!!
_ ونعمل ليكم شنو نحن...؟ ما يسموكم اسم واضح...
_ اسم داء وادح لينا.... بأدين انت قاصد شنو..؟
_ انت داير(تتجرجر) معانا ولا شنو يا مجند... ماقلنا ليك امشي قدم طلب , نحن ما عندنا غيرك ولا شنو...؟
وتوالت الهمهمات.................
_ انا لي اكتر من شهر بجي هنا... دي المره السابعه تقريبا او التاسعه تقريبا (برضو) .. يغلطوا في اسمو.... ومره اسم ابوه.... ومره اسم جدو... مره بكتبوا (حاجه) ما ممكن تكون اسم اي (حاجه) زاتو....
-انتهي من الخدمه من سنه ونص ما قادر يمسك خلو الطرف
- شوف الزول ده جازف ليهم العربي خشا بيه الجامعه.. ما قادرين يجازفوا ليه اسمو (شان يتخارج),..,؟
- اعجمي فالعب به.
- تلعب كراعك ... انت تسكت سنه ولما تفتح خشمك ده (تقوم تتف)..؟
.................................................
لا ادري كيف وصلت الي الشباك... ولا متي... كان الامر كصخره فاجأت شلال انتظاري السخيف.. ضابط حاد النظرات... (صاري صره).. كتفه مذدان بربع دسته من النجوم الذهبيه...
_ورقك ده ناقص....
-ناقص شنو سعادتك؟
- انتو قريتو جامعات لكن ما استفدتوا حاجه..
- ورقي ده ناقص (فايده) ولا شنو.؟ همهمت في اقصي زقاقات قلبي ... واجبت... نعم سعادتك..
- يسد نفسك... وين (أخر صرفيه).؟
_ انا اصلا ما صرفت... (لا ادري لما قلتها بحياءوتوتر) ..
_ اصلا...!!!! بتتفلسف علينا..؟ اصلا قال..!! وليه ما صرفت يا مجند يا طيره.؟
_ والله ما عارف سعادتك... من بديت الخدمه ما ادوني قروش.. (وحسع) انتهيت ليا سبعه شهور وجيت اطلع خلو الطرف.. ما داير اي قروش.. عفيتا للخدمه.
_ والقال ليك منو الخدمه دايره منك عفو.؟.. قبيح..!
_ لا يا سعادتك ما القصد والله... بس انا محتاج لخلو الطرف.
_ وانا ما حا اديك ليه
_ ليه سعادتك.؟
_ ورقك ناقص..
_ لكن سعأ..
_ البعدو.
.........................
تنحيت عن الشباك... تسمرت في زهول.. واستمر (المد البشري) في التوافد علي (شباك الخلوووو............)
..................................
_ ورقك ناقص... قريتوا جامعات لكن ما استفدتوا حاجه... وين (الافاده الطبيه).
_ أهو دي سعادتك
_ وليه ما مختومه.؟
_ مختومه سعادتك.
_ طيب ما تعال اقعد مكاني واشتغل الشغل ده انت..!!!
_ العفو سعادتك.
_ العفنه التكتلك... قول امين
_ امين سعادتك
_ اقول ليك ما مختومه... تقول لي مختومه..؟
_ اسف سعادتك
_ أسف..!!!!!! انتوا كلكم فلاسفه..؟؟ أااه.!
_ بس ما فاهم الناقص شنو سعادتك.؟
_ناقص ختم تاني.
_ ياتو ختم سعادتك.؟
_ ما تسالني..
_أسال منو سعادتك.؟
_ انت مجند طيره.؟ ما تسالني.. شوف ليك اي زول تاني.. قبيح.. البعدو.... البعدو.
........................................................
_ انتوا ... قريتوا جامعات لكن ما استفدتوا حاجه... امشي اشتري فايل.. خت فيه ورقك ده, بنبيع تسالي نحن.؟
_الفايل معاي سعادتك ... بس اتشرط .. انا لي شهر كل يوم بجي هنا... بنطلوني اتشرط سعادتك. خليه الفايل
_ البعدو..
_ سعادتك انا...
_ قلت ليك جيب فايل... البعدو... البعدو
.......................................................................
_انتو ... قريتوا جامعات لكن ما استفدتوا حاجه... انت ادربت وين..؟
_ادربنا في معسكر المرخيات يا جنابو... (واضعا( كوعه) علي شباك المنسق زااااااااااتو... اتصور.!!!)
_ ومالك (متكل) علي الشباك كده.؟ عيان.؟
_ عندي ملاريا جنابو.
_ فحصتها متين.؟
_ مافحصتها يا جنابو..
_ وعرفتها ملاريا كيف.... انت دكتور.؟
_ لا يا جنابو.. ما كده... انا....
_ (مقاطعا).. معناها كذاب... وورقك ده ناقص شهادة تدريب... البعدو
_ لا لا نحن ما عندنا شهادت تدريب سعادتك انا (حالات خاصه) عيانين كنا..
البعدو البعدو قلت ليك.. الله
................................................
_ ورقك تامي.
_ الحمد لله....
_ (مقاطعا)... لكن..
_ شنو سعادتك.؟
_ الشغل بعد الصلاه
نعيم علي
ليلة (الاحتفال) باستلام خلو الطرف
27/ 05/2005
ملحوظه: الاخطاء الاملائيه نسبة لغيابي من (حصة الاملاء) باستمرار
|
|
 
|
|
|
|
|
|
|
|
Re: خلووو طرف ومقص الرقيب (عضو جديد لنج).... شكري بكري (Re: naeem ali)
|
مرحب حبابك يا النعيم في المنبر
| Quote: لا ادري ماذا دهي الرقيب الصحفي حتي يحذف هذه الماده من صحيفة الاحداث |
الطاهر ساتي زاتو سأل نفس السؤال دة قبل يومين هنا ...
والان المهم اخونا بكري نشر ليك الموضوع ... يعني الما بتنشروه هناك لقيتوليكم باب جديدهنا
ممكن نسميوه
(عمود من لا عمود له)
| |
|
|
|
|
|
|
|
|
|
Re: خلووو طرف ومقص الرقيب (عضو جديد لنج).... شكري بكري (Re: naeem ali)
|
سلامات يا النعيم وبالطبع القاعدين في البيت من زمن هم الاولي بالترحيب بك ....وشاكرين لبكري ابوبكر لهذه الاستضافة التي مؤكد ستكون اضافة
اها يا النعيم اخوي بعد ده راجيك جنس شغل
طبعا انا ذاتي لو ما عارف فهم ناس الامن كان دهشتي حاتكون عجيبة بشيلة القصة بتاعتك
بالمناسبة الشال المادة دي زول اسمو محمد عثمان وما ادراكما محمد عثمان انا اصلا وعدتو بنشر هذا الغسيل وقتما تنتهي الرقابة
مرحب بيك تاني
| |
|
|
|
|
|
|
|
|
|
Re: خلووو طرف ومقص الرقيب (عضو جديد لنج).... شكري بكري (Re: Elawad Eltayeb)
|
مرحب بيك يا نعيم نورت الحوش الكبير ، اكتب كما تشاء و أملا البورد كتابات ممتعة ومن واقع معانتنا المعاشة يوميا و ستجد الاف القصص المشابهة لقصتك و في اماكن معاناة اخري ومن هسة انا حاجزة احكي ليكم قصتي مع ناس التأمينات الاجتماعية ، واصل يا نعيم و ما تشيل هم الاخطاء الاملائية والله البورد دا فيهو جنس عجايب عينك ما تشوف الا النور صدقني حتلاقي نفسك احسن الخطائيين 
مرحب بيك مرة تانية و متابعين معاك
| |
|
|
|
|
|
|
|
|
|
Re: خلووو طرف ومقص الرقيب (عضو جديد لنج).... شكري بكري (Re: heba Elmahi)
|
هبه......... انت اول انثي ترحب بي اخوك في البورد ده
من قبيل رجال رجال رجال (انا قلت دي قصه ولا بيت عزابه) اها يادوب الموضوع ده نور
(لانو النثي يا جماعه هي الثيرموميتر الذي لا يخطي في قياس الاحاسيس) وان بداء لنا احيانا غير ذلك
شاكرك بصوره مخيفه
وختيت ليك طوبه في موضوع التامينات (والطوب هي اداة الحجز في الصف لمن فاته شرف الشرشحه في صفوف العيش)
اخوك يا هبه ما شايل هم الاخطاء , بس حبيت اكون واضح (شان ما يجي زول يقول لي "هسا دي بكتبوها كده؟ ولا ديك بكتبوها كداك) بس
| |
|
|
|
|
|
|
|
|
|
Re: خلووو طرف ومقص الرقيب (عضو جديد لنج).... شكري بكري (Re: naeem ali)
|
ولكي اكون منصفا فلقد تعرفت خلال تلك الفتره (الخدمه الوطنيه)علي (ناس) جداد... منهم من قضي نحبه (خبريا) وانقطع تماما ومنهم من ينتظر
الشايقي... والولد المهذب خريج الاسلاميه... ابراهيم ود نيالا المتيم ببنت الخاله (انشاء الله يكونوا اتزوجوا) ... ناس مناوبة المساء... وبوكس المرور... دفتر التمام...ريحة السجاير جوه العلبه (لما تخمس السجاره مع نفسك) وحليمه ست الشاي امنا كلنا (يديها العافيه)
| |
|
|
|
|
|
|
| |
naeem ali
عبود عبد الرحيم
Mohammed Ibrahim Othman
Alsa7afa_30
محمد عبد الماجد الصايم
محمد مكى محمد
Elawad Eltayeb
heba Elmahi
fadlabi
شهاب الفاتح عثمان
عبدالله كع
البشير دفع الله
Amjed
عمرو كمال ابراهيم
طارق جبريل
محمد صباحى
يوسف الولى
فيس بوك
تويتر
انستقرام
يوتيوب
بنتيريست