تلاتة شخصيات بتلقاها في اي حتة .. في المدرسة في الحلّة في الشغل ومرات في البيت .. شخصيات ممتعة جداً خصوصاً لو إنت عارف إنو كضاب او خرخار أو غلاط .. لحملة الشهادة العربية نشرح معنى خرخار وهي الزول الما بيرضى الهزيمة وبيتحجج بي حجج واهية للتهرب مستخدماً كل الوسائل الشرعية والغير شرعية وما تسألوني التسمية دي جات من وين لأنو انا زاتي محتار فيها والغريبة الكلمة دي بتستخدم في اكتر من غرض ووصف .. يقولوا ليك عاين الولد ده كرعينو مخرخرة كيف والعجل لمن تمشي لي بيت فيهو شفع وتلقى المرتبة مشرورة في الشمس وواحد يقول ليك عاين ديل بالله مراتبهم مخرخرة كيف .. ماف زول ما بيستمتع بي العيش في وصت مجتمع بيكون فيهو التلاتة شخصيات ديل وما اعتقد زول يكون ما عندو حكاية أو نادرة مع الشخصيات دي .. الذ شخصية البتكون موجودة معاك في الحلة وتكون مشهورة بي واحدة من الحاجات دي والأجمل لمن الزول يكون عارف روحو لكن ما شغال بيكم الشغلة .. استمتع جداً بي سماع القصص عن الشخصيات دي وعندي إحساس إنو اي زول في البورد ده بيكون عندو حكاية عن واحدة من الشخصيات دي وحصل ليهو معاها موقف فبالله ما تبخلوا علي بي القصص دي .. عن نفسي مشهور بي إني اكبر خرخار في الحلة وما حصل خليت تمرين الكورة ينتهي بي سلام يا قلعت القناية ولا جدعت الحجار ولا طيرت الكورة ..
11-15-2006, 03:17 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
نموذج للخرخرة في حلتنا : عندنا جماعة عجايز بيلعبو كوتشينة (ويست) في بيت واحد ..وطبعاً لعب العجايز جميل جداً وونستهم سمحة خلاص .. في واحد فيهم ملك الخرخرة وكل ما ورقو يجي كعب يرمي الورق متحجج بي حجة واهية مرة يقول لالالالا فلان ده غمز لي زميلو ومرة يقول ليهم لالالا انتو اتكلمتو مع بعض ومرة يقول ليهم انتو كشفتو التسميات .. اها الجماعة اتفقوا قالوا عشان الزول ده تاني ما يجقلب أصلو ماف زول يفتح خشمو في الكوتشينة دي .. وزعوا الورق والناس صااااااااااااااااااانة وبتلعب ماف زول قال بغم ..وزولنا ده ورقو كعب لمن علط وما لاقي فرصة والجماعة يشيلو ويجلدوا ليهو في ورقو وزولنا ما لاقي فرقة .. فجأة جا داخل الولد الصغيير (ولد سيد البيت ) وقال لي أبوهو : يابا أمي بتناديك .. فما كان من زولنا المعصور إلا ان رمى الورق في التربيزة وقال ليهم : حيييييييييييييييييييييييييييينا قال ليهو يابا ..
11-15-2006, 03:21 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
نموذج للكضاب : واحد بيحكي للجماعة وبيقول ليهم والله زمان شارع الغابة ده كان فيهو الغزلان تتجاري ساي .. وقال ليهم انا احكي ليكم حكايتي مع غزالة .. فقال ليهم : قبل كده انا جيت بي شارع الغابة وفجأة شفت لي غزالة وفوووووووو جريت وراها تزوغ بي جاي اجيها بي جاي تمشي بي جاي اجيها بي جاي هي جارية وانا جاري وراها ..خشت قاعة الصداقة خشيت وراها طلعت منها طلعت وراها ..قطعت شارع الظلط قطعت ليك وراها .. خشت توتي وانا خشيت وراها .. واحد وقفو وقال ليهو : ياخ انت مش بين قاعة الصداقة وتوتي في بحر ؟؟؟؟؟ زولنا قال ليهو : والله مرق من بالي
تخريمة : يا ناذر ما تجي تقول لي اديك ليها بي رواية تانية ..
11-15-2006, 03:23 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: فجأة جا داخل الولد الصغيير (ولد سيد البيت ) وقال لي أبوهو : يابا أمي بتناديك .. فما كان من زولنا المعصور إلا ان رمى الورق في التربيزة وقال ليهم : حيييييييييييييييييييييييييييينا قال ليهو يابا ..
لووووووووووووووووووووووووول!!!
إنت عارف يا عمر يا اخوي...
دي الخَرْخَرَة الأُمها بت أعَم أبوها...
قال .. قال ليهو يابا ... قال!!!
كميات مودتي...
أبو الحســـــــــــــــين...
11-15-2006, 03:46 AM
فيصل نوبي فيصل نوبي
تاريخ التسجيل: 09-16-2005
مجموع المشاركات: 14194
( ده و احد غلبو يكون واحد من ديل " الخرخار ..و الكضّاب .. والغالاط..")
عندنا واحد من أهلنا الحلفاويين ( دي قصة حقيقية ) قاعد لاعب مع واحد راس حريق و صاحبنا يشيل و يجر ليك فيو بي دو شيريا زي خمسة مرات ورا بعض ( حظ غريب ) و صاحبنا اتعقد من دو الشيريا شديد قام براحة سرق دو الشيريا الجوز و قعد الاسكورات كانت 28 للجميع اها صاحبك ورقو قفل و محتاج للورق المعاو براحة طلع واحد من دوهات الشيريا و جدعو قال ليك هاك افتـــ قبل ما يتمها التاني جراو ليكــ جرة الف صاحبنا دفق الكوتشينة و قام بي زعل شديد قال : يحرق ..... دو شيريا ده و لا بنطون الباوقة كل ما يجي ناطط فيه .. (طبعا كان فيها شوية مماأشتهر به أهلنا "دي حاول انك تتخيلها براك" )
11-15-2006, 03:56 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
فيصل يا نوبي: انا ما عارف حكاية الدوهات دي شنو !!!! عندنا واحد جا عمرة وزوغة قام تكّل ليك مع اخوهو في البيت لا شغل لا مشغلة بس اكل ونوم وبالليل كوتشينة .. اخوهو خلااااااااااص قفلت معاهو وما قادر يكلموا ويقول ليهو شوف ليك شغلانة ولا ارجع السودان .. يوم لاعبين هو اخوهو راس في حريق اعا الاخو العاطل جدع لي التناي " دو ديناري " وقال ليهو هاك الدو ده ما نافع : اخوهو شالو ونزل بيهو وقال ليهو : والله الدو الجدعتو ده أخير منك أهو طلع شغال ..
الاخ عمر فعلا الشخصيات ده متوفرة في مجتمعنا السوداني في داخل الوطن وخارجه وانا حا ابد ليك قصة عن خارجه كنت في السعودية وكنا ساكنين مجموعة المهم .... بحكم اننا ماشالله كنا كتار كمان اصحابنا كانو كتار فكان عندنا واحد صاحبنا كضاب جدا جدا وكلنا عارفينو كويس خالص خالص لكن هو كان بصر على انو يكذب بس كنا بنقول انو كذبو ما بضر زول يعني ما بتكلم في شخص كل قصصو عن نفسو وبس ما تحكي ليك قصة الا يحكي ليك قصة مشابه ليها وفيها مبالغة شوية وحصلت ليهو .............. بقينا نتفق لمن يجينا الراجل ده نحاول نخترع قصص من الخيال وصعب حدوثها مرة واحدة في العمر ولكن كان بصر انو حصلت ليهو بي صورة اكثر مبالغة... وفي النهاية نقعد بس نضحك ونكلمه اننا كذبنا في القصة الفاتت ده .... وعادي جدا ياخد الموضوع ويتكرر نفس الشي في كل زيارة يجي فيها لينا
11-15-2006, 11:02 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الأخ عمر الفاروق تحياتي .. ووالله عجبتني فكرة البوست صاحبك الخرخار بتاع الكوتشينة ذكرني في حينا في نادي معروف بإسم "نادي العجايز" وطبعاً أحسن مجال للخرخرة هي الكوتشينة المهم في واحد من العجايز ديل في نفس الوقت هو شيخ الحلة خرخار لا يشق له غبار .. بيلعب في تربيزة الكونكان كالعادة كان ورقو شين .. بس ما عندو حجة (يدُك) وضمن ورقو كان في دوهين هارت (دبل) إتحجج بيهم ورمى ورقو الجماعة ما قدروا يقولوا ليهو شي (مش هو شيخ الحلة؟) ومن وقتها في النادي ده أصبح دوهين الهارت بيدوا صاحبهم حق الدك يعني بقى قانون عديل
11-15-2006, 05:04 AM
Mohamed E. Seliaman Mohamed E. Seliaman
تاريخ التسجيل: 08-15-2005
مجموع المشاركات: 17863
Quote: المهم في واحد من العجايز ديل في نفس الوقت هو شيخ الحلة خرخار لا يشق له غبار .. بيلعب في تربيزة الكونكان كالعادة كان ورقو شين .. بس ما عندو حجة (يدُك) وضمن ورقو كان في دوهين هارت (دبل) إتحجج بيهم ورمى ورقو الجماعة ما قدروا يقولوا ليهو شي (مش هو شيخ الحلة؟) ومن وقتها في النادي ده أصبح دوهين الهارت بيدوا صاحبهم حق الدك يعني بقى قانون عديل
تعرف ناس علاء الدين تمبس ديل عندهم كوتش إسمو علي بحلجة زول دقنو لي صرتو لكن خرخار خرخرة السنين .. يوم عاملين تحدي في الموردة بي بيبسي وقالوا التمرين بينتهي لمن المؤزن بتاع الجامع الجمب الميدان يأذن للمغرب .. المهم فريق بحلجة ده غالب لحدي المغرب كده بي فارق قون لكن فريقو معصور للطيش .. فجأة كده والكورة هجمة خطيرة جداً للفريق التاني في اذان بعييييييييييييييييد بدا يأذن .. يا زول فجأة كده علي بحلجة ده نط ليك في الكورة بي ومسكها بي يدو وقعد يكورك : نطق الحق ..نطق الحق ..نطق الحق .. شفت الخرخرة دي كيف؟
11-15-2006, 09:14 AM
حمد فتح الرحمن حمد فتح الرحمن
تاريخ التسجيل: 06-01-2005
مجموع المشاركات: 1996
عندنا عمك من النوع اللازم يحكي ليك قصة زي قصتك مهما كانت اسمو حريحر مولود و متربي في الابيض لما جا الشمالية جاها عجوز قاعدين بليل في الرملة الشباب يحكو عن قصص التماسيح عمك لازم يحكي قصة عن التماسيح قال تعرفو مرة في الابيض قاعد بليل جانا تمساح ... قبل ما يتمها واحد قال ليه دقيقة يا حريحر التمساح دا جا خاشي الابيض بي البص و لا جاكم نازل مع موية المطر
اها عندنا واحد برضو كان في العراق النوع الحارب مع صدام و اتاسر في ايران برضو من النوع العندو قصة تشبه قصتك و احسن منها كمان اول ايامو الفكوهو من الاسر شابكنا ليك قصص كدا عن العراق و ايران قرب يمرق راسنا شوية اكتشفوهو ليك 82 و منا جرت تسميتو بي ايتي تو مرة ايتي تو قاعد في الونسة قام واحد حكي انه قرا خبر في مجلة بقول ( المطر صبت ضفادع في فرنسا ) قبل ما صاحبنا يكمل سبب نزول الضفادع من السما زولك ايتي تو نط في الونسة قال ليهم مرة عندنا في العراق المطرة صبت جريوات
بي مناسبة خرخارين الكشتينة اعمامك اخوان اتنين لاعبين اربعطاشر ضد بعض واحد اصابع يدو اليمين الاربعة مقطوعين قاعد يمين اخوهو الخرخار اها قام ورقو اصلح بقي يرجي بايظ اخو و هو خاتي يدو اليمين قريب الكوم اخوهو الخرخار بقي يتلكا و ياخر البايظ شوية في النهاية رمي كرت فاكي لي عمك تيكتين صاحبك رجع يدو من جم الكوم و نزل بي الكرت الخرخار قال ليهو لا الكلام دا ما بنفع انت لمست الكوم قال ليهو ما لمست انا خاتي يدي كدا بس قال ليهو طيب لو اصابعينك ما كانو مقطوعين كوتا لمست الكوم
11-18-2006, 04:20 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
حمد ابو الفتوح : ياخ البركة في محمد السني دفع الله الخلاك تجينا زاير في بوستاتنا ياخ لكن الخرخرة مااااااااااااا عندكم .. تعرف يا مان انت زاتك شكلك من النوع الخرخار والبيتمها حليفة بي ربنا ..
نحن عندنا واحد قريبنا ياخ ده كضبو لذيذ جداً .. استايلو من النوع البيخليك تصدقو .. تعرف ده إستايلو شنو ؟؟؟ إستايلو في الكضب إنو بيحاول يديك أرقام يختاها هو بدقة وبتكون شترة عشان يوريك كيف إنو هو زول صادق .. يعني مثلاً بيقول ليك : والله يا حمد انا سنة 90 كان عندي 473 مليون جنيه و264 الف دولار و123 الف يورو.. أو يقول ليك انا قبل كده مشيت كداري حكاية بتاعت 12 كيلو و238 متر .. أو يقول ليك انا كان عندي 98 بنطلون و106 قميص ... ياخ ده زول تحفة ..
Quote: ياخ البركة في محمد السني دفع الله الخلاك تجينا زاير في بوستاتنا
طيب يا عمر ولا طالبنب حليفة حفلة محمد السني ما عندها علاقة بي المداخلة دي عشان اثبت ليك مرة كان عندك بوست بتاع اغاني الحقيبة اها جهزت ليك غنية قايد الاسطول بي صوت محمود و رفعتها في النت الكلام دا بي الظبط يوم الخميس 24/ 8 / 2006 الساعة 11.33 بليل قام الشباب ضربو لي تلفون مستعجلين تحت ماشين مشوار في نفس اللحظة النت بقا بطئ و يقطع اها قتا ارجع بعدين انزل الغنية في البوست وحياة الله نسيتا غير اسه تاني ما اتذكرت الموضوع دا .
رايك شنو في المغالطة دي
11-18-2006, 12:19 PM
Abureesh Abureesh
تاريخ التسجيل: 09-22-2003
مجموع المشاركات: 30182
Quote: عندنا واحد من أهلنا الحلفاويين ( دي قصة حقيقية ) قاعد لاعب مع واحد راس حريق و صاحبنا يشيل و يجر ليك فيو بي دو شيريا زي خمسة مرات ورا بعض ( حظ غريب ) و صاحبنا اتعقد من دو الشيريا شديد قام براحة سرق دو الشيريا الجوز و قعد الاسكورات كانت 28 للجميع اها صاحبك ورقو قفل و محتاج للورق المعاو براحة طلع واحد من دوهات الشيريا و جدعو قال ليك هاك افتـــ قبل ما يتمها التاني جراو ليكــ جرة الف صاحبنا دفق الكوتشينة و قام بي زعل شديد قال : يحرق ..... دو شيريا ده و لا بنطون الباوقة كل ما يجي ناطط فيه .. (طبعا كان فيها شوية مماأشتهر به أهلنا "دي حاول انك تتخيلها براك" )
الأخ فيصل النـوبى،
كلامك الفوق دا واللا تفســرو واللا تعتـذر عنـو..
11-18-2006, 01:32 PM
مهند مامون مهند مامون
تاريخ التسجيل: 09-14-2006
مجموع المشاركات: 1001
المكرم الفاروق قد نحتاج لنستمع لتعريف للغالاط و(الخرخار) وشوية أمثلة ونماذج أما الكضب والكضابين والتزوير والمزورين والدجل والدجالين والنجر والنجارين والمؤلف والمؤلفين والفتل والفتالين فإنهم يسودون الساحة ويملأون المساحة لا يخجلون ولا يتقون ولا يستحون ... بل يضحكون ويرقصون ويتغامزون لست أدري أيضحكون على فشلهم أم خيبتهم أم سقوطهم أو إفلاسهم الحياة قيمة عظيمة وحديقة غناء ومحطة فاصلة فقط لو نوقن ونتيقن من حكمة خلق الله للإنسان وتكريمه وجعله كائنا مستقلا ما أسوأ الكذب أيا كان مصدره وهدفه ودافعه ومبرره
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
أبو الحسين
فيصل نوبي
محمد أبوالعزائم أبوالريش
Mohamed E. Seliaman
حمد فتح الرحمن
Abureesh
مهند مامون
فيس بوك
تويتر
انستقرام
يوتيوب
بنتيريست