كالعادة لا يهمني أن أهدر المدعو باندودثاً فمن أجل الهلال تهدر الدماء.. ولا يهمني التكرار فانا أكتب لأني أود أن أكتب ففي حضرة الهلال نكتب .. تعودنا نحن أهل القبيلة الزرقاء أن نلعب معظم مبارياتنا الأفريقية يوم الأحد .. وكم نخاف يوم السبت هذا فسجلّنا فيه غير مبشر خصوصاً إفريقياً .. منذ يوم الخميس وانا كما الراهب أمارس حياتي بشئ من الحذر والخوف وبين تراتيلي وخشوعي عشت راهب.. توعدت قبل مباريات الهلال المخيفة أن لا أمارس الفرح كثيراً وكان هذا سبب عدم حضوري تجمع بورداب الرياض للمبدعين .. تعودت قبل مباريات الهلال لبس بنطلون معين وقميص معين فتحددت مشاويري.. منذ يوم الخميس وانا في حالة حمّى وغثيان ورجفة لا يعلم بها إلا الله ثم صديقي عباس " زول ساكت" الذي قابلته يوم الجمعة.. وطاااااااااااااااااااااااال إنتظاري ليلة السبت ... وكانت ليلة طويلة جدا جدا جدا تمر دقائقها بطيئة وكيئبة .. وجاء اليوم الموعود .. ونزل الموج الأزرق أمام الاف المشجعين المصريين .. ووسط حضور جالية سودانية راقية وقفت خلف الزعيم حتى نهاية المباراة .. الهلال أنيق في مظهره وفي زيّه وفي لاعبيه .. الهلال أنيق في جماهيره التي وقفت خلف الشاشات البلورية وهي ترفع أكفها للسماء مرددة في صوت واحد " ياااااااااااااااااا رب" بالأمس لعب الهلال كما لعب من قبل " ولن أقول كما لم يلعب من قبل" فالهلال منذ فترة وهو يلعب بهذا المستوى المشرف والثابت .. بالأمس أعاد الهلال شريط الخرطوم مما أكد لي ولأول مرة أن شمال الوادي وجنوب الوادي وجهان لعملة واحدة .. لدي قناعاتي التامة بأننا والأخوة المصريين نردد شعار لا نعمل بهة " إحنا إخوة والفايز وادي النيل" فلا نحن مقتنعون بهذا الكلام ولا المصريون مقتنعون .. بل بالعكس الكرة السودانية المصرية كرة الضد ونفرح لخسارتهم ويفرحون لخسارتنا ومن هنا كانت الشرارة !!!! بالأمس عزف أولادنا السيمفونية التي كتبها لهم الموسيقار والموزع ريكاردو .. فكان المعز محجوب حامي العرين وعازف التانقو وهو يرقص ويقفز وينطط بحركة حرقت جوف المصريين .. بالأمس داواهم المعز بالتي هي الداء وتصرف معمه بنفس حركاتهم التي كانوا يحرقون قلوبنا بها فاستفازاهم وارتمى على الارض واضاع الزمن ونطط ونطط ونطط .. وكان ريتشارد الأسد وإن كان يسأل عن الهدف الأول لغياب العمق وعدم تواجده في خانته ولكنه لعب بمسئولية في معظم فترات المباراة .. وصمد علاء الدين جبريل على الضغط من الجهة اليمنى للزمالك ونجح بإمتياز بضبط سلوكه والتزام خانته .. واجاد نجم المباراة بلا منازع يوسف محمد ولعب بثقة تشعرك بأنه يلعب والهلال متقدم باربعة اهداف فخطط شوراع في القاهرة ما بين السيدة زينب وسيدي الحسين والعتبة والمهندسين والدقي.. حتى خالد جوليت الذي خرج مصاباً ومتأثراً بإصطدام مع الحارس المعز خرج وهو مرفوع الراس بعد الاداء الطيب.. كان البرنس ضابط إيقاع الفرقة (وإن لم يكن في أحسن حالاته) ولكنه أجاد القيادة وهو يوزع إبتسامته للاعبيه وإن كان قد نال إنزار غير مبرر.. حمودة بشير تحرك في كل شبر من الملعب هاجم ودافع ... عمر بخيت كان أقل اللاعبين عطاء ولكنه كان عند الموعد وفي المستوى .. كليتشي لاعب يكفي أن نقول عليه أنه لاعب محترف حقيقي يعرف كيف يحتفظ بالكرة وكيف يراوغ وكان هو حائط الصد الدفاعي الأول.. حتى معتز كبير كان كبيراً يوم الأمس وإن عانده الحظ .. ربما كان علاء الدين يوسف هو الوحيد الذي غرد خارج السرب ولم يكن في المستوى والمسئولية .. وجاء قودوين فقدقد دفاعات الزمالك وواصل ما بدأه يوسف محمد في عملية التخطيط .. وداريو الذي(كان) عاد رغم ابتعاده عن حساسية المباريات الدولية .. وقلب مهند الطاهر الطاولة على الزمالكاوية فعادت النزعة الهجومية لفرقة الهلال بصورة واضحة وإن بدا ان مهند في البداية اكثر من تمرير الخاطئ.. بالأمس إكتمل الهلال بدراً ... لن أقول بالأمس كسر الهلال العقدة المصرية وأرجو من الجميع أن يغير هذه المقولة ويعكسها تماماً وتصبح : الكرة السودانية هي عقدة الكرة المصرية " وكل الدلائل تشير لذلك وهاكم الحسابات يا هؤلاء حتى لا تكرروا ما تقولوه عن عقدة الكرة المصرية بالنسبة للهلال !!!! الهلال لعب في الفترة الأخيرة 8 مباريات مع الفرق المصرية .. الهلال لم يخسر أي مباراة في هذه الثمانية مباريات لا في القاهرة ولا في الخرطوم فأين العقدة !!!! الهلال في هذه ال8 مباريات لعب مع الأهلي ففاز عليه في القاهرة وتعادل في الخرطوم.. الهلال لعب مع الزمالك ففاز عليه 2 في الخرطوم وتعادل معه 2-2 في القاهرة .. الهلال فاز على حرس الحدودو1-صفر وتعادل معه في القاهرة 0-0 الهلال لعب مع الاسماعيلي وديا وفاز عليه 3-1 الهلال تعادل مع إيمبي في الخرطوم وديا(لا أذكر نتيجتها بالضبط).. من الإحصائيات أعلاه نلاحظ أن الهلال أحرز 9 أهداف مقابل ثلاثة أهداف دخلت مرماه!!!! فأين العقدة ومن عقدة من ؟؟؟؟؟ إن كان التاريخ السابق يقول ان الكرة المصرية عقدة السودانية فإن التاريخ الحاضر يقول العكس.. إن كان التاريخ السابق يقول أننا نخسر رايح جاي فغن التاريخ الحالي قول ان الهلال كسب الأهلي في داخل ملعبه ووسط جماهيره.. إن كان التاريخ السابق يقول أن الهلال أستقبلت شباكه اربعة اهداف من الزمالك فإن التاريخ الحالي يقول ان الهلال اودع اربعة اهداف في الزمالك .. إن كان التاريخ السابق يقول أن لابعونا بلا لياقة بعد ان يقضوها في المراقص والفنادق فالتاريخ الحالي يقول ان لاعبونا قمة الإنضباط واللياقة .. إن كان التاريخ السابق يقول اننا نخاف الارض والجمهور فالتاريخ الحالي يقول اننا نلعب وسط 100 الف متفرج في القاهرة وكأننا نلعب في قلعة طلعت فريد
هذا هو التاريخ يا من تودون تدوينه .. هذا هو التاريخ يا من ستؤرخون .. هذا هو التاريخ يا من ستكتبون الكتب.. ولا تنسوا وأنتم تكتبون وتؤرخون ان تكتبوا كيف انتهت اسطورة التحكيم عندنا.. فلايهمنا ان يحتسب الحكم هدف من تسلل .. ولا يهمنا ان يحتسب الحكم علينا تسللات من الخيال.. ولا يهمنا ان يحتسب الحكم فاولات ضدنا متى ما احتكينا بالخصم .. ولا يهمنا ان يرفض الحكم ان يحتسب فاولات لصالحنا وإنا ضربونا بالعكاز .. ولا تنسوا يا من تؤرخون وتكتبون ان تضيفوا ملحوظة مفادها: انتهى زمن إستفزاز اللاعب السوداني!!! فمهما فعلتوا وانتم تتصرفون نيابة عن الحكم وتأخذون لاعباً مصاباً وتقومون بدور عربة الإسعاف ويقوم اللاعب منكم بدردقة لاعب الهلال وإخراجه بصورة مستفزة لن تجدي.. ولن يجدي أن يكتفي الحكم فقط بإشهار البطاقة الصفراء على لاعب من المفروض ناه قام بالاعتداء على اللاعب بدون كرة .. وشكراً لك يا حمودة وبالرغم من اننا ندين مثل هذه التصرفات ولكن كان لابد من رد الصاع صاعين والعين الحمرا ولو في القاهرة .. وشكراً لك يا معز وأنت تهدر الوقت منططاً ومتزحلقاً ومحتضناً وواقعاً .. وشكراً كثيراً وجميلاً لهذا العبقري المدعو ريكاردو فهو نجم المباراة .. وشكراً بكري عبد الجليل.. وشكراً فوزي المرضي.. وشكراً يا إدارة .. وشكراً أروع يا جمهور السودان بالقاهرة وانتم ترددون لهم في عقر دارهم : " عايزين إييييييييييه ما تؤموا تروحوا.."
أحزنني جداً أن يكمل كليتشي المباراة بشعار الهلال وهو ممزق وكان لابد أن يكون هناك زي إحتياطي للفريق وكل لاعب يجب ان يكون لديه 3 فانيلات على الأقل في الأحتياطي!!! فشعار الهلال علينا إحترامه ورفعة شأنه فالهلال عظيم والعظمة لله ..
03-18-2007, 01:39 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
أكرر ما حكيته عن حبوبة زميلتنا: حبوبة زميلتنا مشاكلة ومخاصمة معظم نسوان الحلة .. لمن جات ماشة الحج النسوان جوها في المطار عشان يودعوها ويطلبوا العفو في العافية .. والحاجة سااااااامعا بي موت الحجيج ووقوع الكباري وووو فبتسلم على الواحد منهم وبقتول ليها: كان متّ هناك العفو والعافية يا بتي وكان كمان جيت راجعة فبالله الحال فيييييي حالو ما تعملي فيها صالحتيني
وعليه فإن الحال في حالو يا مريخاب وبالله ما تشبكونا ونشبكم الفوز للسودان والذي منو !!!!!! لا إنتو فرحانين بي فوزنا ولا نحن فرحانين بي فوزكم .. وإن كان فوزكم كان على فريق بوزن القطن وصعودنا كان على حساب فريق بوزن الذهب.. فاتني أن أذكر الأخوة المريخاب بحقيقة مرة بطعم العلقم !!! المريخ بات هو الفريق الوحيد الذي يفضحنا مع الأخوة المصريين .. والمريخ هو الفريق الوحيد الذي سبّب لنا مقولة عقدة الكرة المصرية .. فالمريخ هو الفريق الوحيد من بين الفرق السودانية الثلاثة الذي لم يستطع إقصاء أي فريق مصري طيلة مشواره الكروي !! تعالوا جيبوا لينا التاريخ يا ناس عبده قابل وورونا المريخ اخر مرة أخرج ليهو فريق مصري من بطولة بتين (إن وجد)؟؟؟ الموردة لديها في سجلها إقصاء فريق الزمالك .. طبعاً زعيم الأمة نادي الهلال أقصى كل انواع الفرق المصرية من أهلي وزمالك وإسماعيلي وحرس حدود والذي منو ..
ما قلنا ليكم الزعيم هو الوحيد البيشرفكم ما صدقتونا وشبكتونا الخمسات والستات والكاسات والجو والمطر وبدر وأمل... ده الهلااااااااااااااااااااااااااااااال لا ناس الهلاااااااااااااااااااااااااااااااااااااااااااااااال... عرفتو العقدة وين ؟؟؟؟؟؟ هاكم النفش ده
03-20-2007, 05:56 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8610
يا أيها الغفاري أبوذر: يا منتكتب وحيداً ولكن يقرأ لك الكثيرون .. تعرف كورتنا دي بي خيباتها وكوجينها لكن بنحبها ساااااااااااي لله والرسول .. وما اظن حا يجي اليوم الواحد يقوم يخليها مهما وصلت ومهما تطور العالم من حولنا ..تقول لي ليه حا أقول ليك والله ما عارف بس كده .. يوم الهلال يكون لاعب انا ما بكون فارز مين بيلاعب مين وبمسح مان يونايتد من راسي وبشيل الريال من دماغي وبرشلونة ده ما بتذكروا .. اليوم داك من الصباح بيكون حرمان علي أي شي في الدنيا وبس بكون قاعد منتظر الكورة وانا في حالة وضوء وصلاة طول اليوم لحدي ما الحكم يصفر.. في مباراة الهلال الأخيرة مع الزمالك سجدت أكثر من أي يوم أخر ففي العادة انا أسجد شكراً لله مع كل لعبة جميلة يلعبها اولاد الهلال ومع أي هدف .. ما تعودت أن اسجد كثيراً والهلال يلعب خارج أرضه فنادراً ما تكون مبارياتنا الخارجية ممتعة .. لكن بالأمس سجدت كثيراً وكثيراً جداً فالهلال احرز هدفين (ديل اربعة سجدات) وضيع 5 اهداف شبه انفراد كامل ديل خمسة سجدات تاني (الفرصة الضايعة بسجد سجدة واحدة) حمدت الله كثيراً على نعمة أن تكون هلالابي وحمدته أكثر وهو يكرمنا بهذا الفوز العظيم .. ونحن الهلال بنريدو غير علّة .. أهلاً بيهو الهلال هلّ
03-20-2007, 06:47 AM
ASAAD IBRAHIM ASAAD IBRAHIM
تاريخ التسجيل: 11-26-2003
مجموع المشاركات: 3920
الخنساء تماضر: بدلاً من رثاء صخر رأيك شنو تدينا حاجة في مدح الهلال .. ياخ الجنس اللطيف ده كلللللو بيشجع الهلال (بختك حبوبة وحسبناك مع الجنس اللطيف).. انا ما لقيت لي جنس لطيف بيشجع العجب أصلو ..عاد هيثم مصطفى ده يشجعوا منو ؟ سامي عبد الوهاب ولا كيجا (عووووووووووووووع )
03-20-2007, 06:59 AM
تماضر الخنساء حمزه تماضر الخنساء حمزه
تاريخ التسجيل: 10-13-2006
مجموع المشاركات: 5215
هنا يا عمر الفاروق في هذا البوست تكتمل فرحتي بنصر الهلال الكبير على فريق بوزن الذهب مع كل شيء ففريق الهلال هو الفريق السوداني الوحيد الذي يقع مع الكبار ويضرب الكبار في عقر دارهم وبين أهلهم وزوجاتهم وأبنائهم وأمهاتهم وآبائهم.
سنفرح لهذا النصر كما لم ننتصر من قبل وهذه أكبر من انتصار الهلال على الأهلي المصري في عقر داره
لك الحمد والشكر يا الله
أبوفتحية
03-20-2007, 07:00 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الصادق يا خليفة : هي كانت 96 دقيقة ولا 98 ؟؟ عمك الحبشي اداها 6 دقايق من حيث لا ندري وال6 زااااااااااااتا اداها 2 ولو ما الهلال كان متعادل الكورة دي تكون لحدي اسة شغالة .. يا الحبيب ابشرك الجيل القايم ده كلو قايم هلالابي لأنو ما شايف غير الهلال .. ياخ حتى في اليوم الكان ممكن يشوف المريخ للأسف طلع الهلال لاعب في نفس الوقت .. وبراك سيد العارفين الأولوية للزعيم وكده ..
03-20-2007, 07:07 AM
doma doma
تاريخ التسجيل: 02-04-2002
مجموع المشاركات: 15970
تصدق يا عمر ولدي انا بشجع الهلال دا من زمن جكسا وعلي قاقرين والله العظيم الوقت داك حبوبتك دومه ماشه موضه ساكت ن ورثنا حب الهلال من الوالده كانت هلالابيه علي السكين
03-20-2007, 07:09 AM
محجوب البيلي محجوب البيلي
تاريخ التسجيل: 04-19-2005
مجموع المشاركات: 2016
لكين والله يا فاروق من شدة الخيبات والعوارة فى كورتنا
نسيته تماما...
كلنا ذلك الرجل ... ولكن ليس لدرجة
Quote: ... لو قلت لى قول لى إسم لاعب واحد ما بعرفه
أعرف:صديق منزول (والكسرو إسمو القرّود) جكسا (وأعرف إنو إسمو "نصر الدين عباس"). سبت دودو الدحيش ---------------- عارف يا عمر الفاروق: 1 ـ الكلام ـ أعلاه ـ أنا جاد فيه 100%. وخشيت أن أضيف أسماء أخرى يطلعوا مريخاب... ولاّ كتّاب ولاّ أي شيء... آب 2 ـ الأسماء أعلاه ربما تكون للاعيبن منقرضين (ولا يعني ذلك بالضرورة أنني منقرض كذلك) وإنما كنت أسمع هذه الأسماء لدى اخوتي الكبار ومجايليهم. 3 ـ لم أدخل في حياتي دارا للرياضة. أسمع بأستاد الهلال وأستاد المريخ، وأمر عليها في أمدرمان وأنا أعتلي ظهر اللوري متجها إلى الشمالية. 4 ـ المرة الوحيدة التي دخلت فيها ملعبا ورأيت فيها مباراة "لايف" كانت بأحد ملاعب مدينة الدار البيضاء في المغرب (لعله مركب محمد الخامس) عام 1977، في لقاء جمع المريخ بالوداد البيضاوي، وانتصر فيه المريخ بحصة لم أعد أذكرها. وأذكر أن بعض السودانيين الذين سبقونا في المغرب، كانوا يشجعون الوداد، وهو ما أثار استهجاننا، ورأينا فيه ما يشبه الخيانة العظمى.
احمد يا ريّح: ما ان اعلن الحكم صافرة النهاية إلا وإتصلت على السودان للمباركة لي ناس البيت .. تصدق يا ابوحميد ما لقيت زول من الأولاد (ما عندهم علاقة بي الكورة) ورغما عن ذلك تحركوا إلى إستاد الهلال .. حينها فقط تذكرت شارع العرضة وتيييت تيييت تييييت .. تذكرت شارع الأربعين والوقوف على حديد كبري أبو عنجة نهنئ الماشي والجاي.. تذكرت شارع الاربعين والنسوة أكثر من الرجال والبيوت الفاتحة على الشارع مفتوحة للكل والمياه توزع للناس.. بل وتذكرت إنتصار المريخ بكأس مانديلا والمرحوم عبد الحميد الضو حجوج يذبح الأبل في منتصف شارع الأربعين ويقول: أي زول يجيب سكّينتو ويقطع الدايرو .. ياااااااااااااااااه كم هو جميل ان نحتفل بإنتصار الهلال في السودان .. وكم هي رائعة تلك الاجواء في استاد الهلال الذي اضاءت كشافاته حتّى الصباح .. وكم هي رائعة نغمة تيييييييت تييييييييييت تييييييييييت .. مداخلتك يا ود الريح يالرغم من انها صغيرة جداً إلا أنها أطول مداخلة ... وتييييييييت تيييييييييييييت تييييييييييييييت ..
03-20-2007, 08:55 AM
Nasruddin Al Basheer Nasruddin Al Basheer
تاريخ التسجيل: 12-09-2005
مجموع المشاركات: 4083
مبروك يا عمر الفاروق ولجميع الهلالاب هذه المباراة لا تنسى.. في كل مباريات الهلال أكون ثابتاً ومتفائلاً إلا في هذه المباراة فقد كنت متشائماً وأرجف من يوم الجمعة.. وكل خوفي من التحكيم خاصة أن الزمالك كان مهزوماً في أم درمان 0/2 لكن الأولاد ما قصروا تب ولقنوا الزمالك درساً لا ينسى.. أعجبني الكلام الذي عبرت به عما في دواخلك والهلال ده بعلم الناس الشعر والنثر وكل الأشياء الجميلة.. وفي ليلة السبت كنت حأكون ندمان جداً لو ما كنت هلالابي ولكن الحمد لله أن هدانا لتشجيع الهلال.. وكما ذكرت الهلال لم يعد يشعر بعقدة الكرة المصرية بل الفرق المصرية أصبح لديها عقدة من ملاقاة الهلال السوداني واحصائياتك صحيحة وتؤكد ذلك..
03-20-2007, 09:00 AM
Nasruddin Al Basheer Nasruddin Al Basheer
تاريخ التسجيل: 12-09-2005
مجموع المشاركات: 4083
Quote: سيطرة .. راجل الـ .. .. حلوة حلا !! الرجفة حلوه .. صدقوني .. الدنيا حلوه .. أسالوني .. سيطرة .. راجل ( الحلبة ) ده حلو حلا .. رجفّنا ما بننكر !! ما كنا خائفين ولا كنا غافلين ولا حتي ما واثقين .. رجفنا من عشقنا من حبنا من صوفيتنا من خوفنا علي هذا الازرق العاتي حتي من النسيم .. يا عظيم ..
الرجفة حلوه .. انا انا بردان .. من وهجي الفيني .. لا تغطيني .. ما كنا بردانين ولا خائفين كنا بنرجف من وهجاً فينا .. الرجفة حلوه .. تعرف وانت بترجف قبل كورة الهلال بتحس بالحب بالابوة بالغيرة بالقشعريرة .. بترجف وانت بتعرف الهلال غالب .. ترجف وانت عارف انو الزمالك هالك .. ترجف وانت واثق في كل شيء واي شيء وكلتشي شيء اي شيء !! وبرضو ترجف .. الرجفة حلوه .. تمسك الريموت وانت بترجف .. تجيب القناة المصرية تلقي روحك مشيت المنار .. هي يا حسن نصر الله يحفظك الله !! ده وقتو !! ترجع تاني للمصرية تلقي كمال حامد تقول الزول ده الجابو هنا منو؟ مباراة المريخ والقطن دي منقولة في المصرية ولا شنو ؟ ترجف انت ودفاع الهلال ثابت ودفاع الزمالك برجف ده حب ولا موت .. ويا محمود الحقني بموت .. الدنيا حلوه .. حلوة حلوه .. مش الدنيا دي فيها ازرق وابيض .. حلوه حلوه .. سكر ولبن ونيل وسماء وانتماء .. حلوة حلوة .. الله عليك يا هلال الله عليك .. الدنيا حلوه .. شفتو اجمل من حموده ! ايوه شفنا .. شفتو جلابية مهند طالعة موضه !! ايوه شفنا .. شفتو المقاس .. شفتو مهند يا ناس !! شفتو كيف عبد الواحد ما بشيل واحد !! يا اتنين يا مادايرين .. في جنوب الوادي شال اتنين وفي شمال الوادي شال اتنين .. ده حالتو يوم السبت وهنا يوم الاحد .. تجي يوم الاتنين ! وتاني بتجي .. التوبة .. تجي ولا نجي في مطار ابوظبي !! دنيا حلوه .. شتفو هنري ميشيل .. بعد قوون كلتشي بقي بتكلم عربي .. ما مشكلة !! المشكلة انو محمود سعد بقي بتكلم فرنسي .. محمود سعد زعل من هزيمة الهلال لما كان مع اولاد عمنا مشي مصر .. الهلال لما غلب الزمالك قال (عايزني اروح فين يا هيثم .. انتو مستقصدني ولا ايه) وايييه .. ايييه .. غلبنا الزمالك يا ولدي في الخرطوم اتنين .. اييييه والاتنين دي قونين مش منطقة اسمها الخرطوم اتنين .. ايييه وانا بكره اسرائيل وبحب قودويييين .. ايييه ايييه .. اييييه ويا شعبولا ايييييه .. الدنيا حلوه .. عايزين نصور .. لقطة لقطة وحته حته وبالبطيء .. عيدوا لينا .. تشوف عينينا .. اي شيء .. لقطة القون البجي من عكسية الولد الذكي ولا ( لوب ) قودوين الما بنحكي .. نعيد ليكم ون تو البرنس ومهند ولا قوون كلتشي .. اي شيء .. انتو انتو شفتو شيء ! كسرة حمودة في الشمال ولا عكسية ( هوت ) في اليمين نعيد مرة تانية احلي قون يا قودوين !! ومصر ام الدنيا .. ما الدنيا حلوه .. الجرسة حلوه .. الكورة كانت يوم الاحد جبناها ليهم يوم السبت مش قالوا ليك الهلال برتجف من اي جمهور ان شاء الله لو كان في عقد !! الجرسة حلوه ما قلنا الشيراتون غالي عليك .. ناس الزمالك ما جابو شيك .. ممنوع دخول الاهلة خليكم بره ..بره بره نحن اسياد المضره .. بكرة لمن الزمالك يجي بندفع الشيك في استاد القاهرة غسيل وكي .. وتاني بتجي؟ التوبة الاهلي بجي؟ التوبة حرس الحدود بجي؟ التوبة الاسماعيلي بجي ؟ التوبة الزمالك بجي؟ التوبة بمناسبةالعلاقات الودية مع اولاد عمنا اليومين ديل واحد ثقيل قال لي ممكن نلعب ليهم بحكم التخصص مع انبي !! برضو الجرسة حلوه ومصر ام الدنيا والدنيا حلوه .. الزمالك يا مدرسة لعب وفن وهندسة .. نحن بنحب المظاهرات .. قفلوا المدرسة .. قفلوا الهندسة .. نحن اسياد الفلسفة .. مش رئيسنا كمال شداد .. شقلبة .. قلب الموسم ده حلو حلا .. القطن مغلوب والموسم مقلوب .. يعني لو الموسم ما مقلوب يا مزمل تغلبو كم .. يا نهاد شاخور انتو بتناهدوا من القطن .. يعني لما يجيكم السخن تعملوا شنو؟ سيطرة .. الهلال ده حلو حلا .. سيطرة كاملة .. داخليا وخارجيا .. التالتة واقعة .. سوبر سبورت وكورة الرد .. بدون سبب طلعنا من دور التمانية.. اورلاندو بايرتس .. انتصرنا بتلاتة وبرضو طلعنا من دور التمانية لدوري الابطال .. اوليمبك خريبكة .. كنا علي اعتاب التأهل لدور الثمانية في الكونفدرالية ولكننا انتبهنا بعد فوات الآن .. والآن من الآن تعالو نستعد للنيجيري الخطير .. اوعه تقول لي غلبنا شمال الوادي بنغلب غرب افريقيا ولا تقول الناس الما بعرفوا عربي ديل بنغلبهم بسهولة .. وكورة الرد في ارضنا ونحن من ارضنا اصلو ما اتأهلنا قبل كده .. الكونفدرالية وصلنا لدور التمانية من غانا امام الحرية الغاني .. والبطولة العربية اتأهلنا لنصف النهائي من المغرب امام الوداد .. والبطولة العربية في تونس اتأهلنا من السعودية .. واتأهلنا في هذه البطولة بالفوز خارج ارضنا امام البوليس الزنزباري والتعادل مع الزمالك .. خلوكم واعين من هسه يا فوزي .. سافرو بدري .. من بكرة اتجه لي نيجيريا .. الناس ديل ناس كجور وانت زول شيوخ .. اعملوا حساب محمد عثمان الطيب ده .. ما يقوم يقنعكم بواحد من محترفنو !! لاعبين في نيجيريا وعندنا تلاتة نيجيرين ورابع مصاب وخامس سوداني موزمبيقي .. نحن اهلك يا شدائد نحن اسياد افريقيا .. حكام العرب .. عملنا مؤتمر القمة الافريقي هنا ومؤتمر القمة العربي .. امريكا قالت ما نبقي رؤساء افريقيا .. الهلال غصبا عن عين امريكا حيبقي بطل افريقيا ويلعب في كاس العالم .. الله ... نلعب في كاس العالم .. يا عالم .. اليوم الهلال وسانتوس البرازيلي .. ونحن لعبنا مع الجماعة ديل من زمن بيليه .. غدا الهلال وليفربول .. وبرضو الجماعة ديل زارونا ايام الرياضة الجماهيرية شفناهم في الخرطوم .. عزمهم نميري يا بلولة مش كده ؟ الهلال يفتتح مبارياته في بطولة العالم امام الهلال السعودي .. ديل مش الجماعة الغلبناهم ايام المرحوم والي الدين .. اذكرتهم ايوه .. الهلال في مواجهة صعبة مع شلسي الانجليزي .. انجليزي ده يا مرسي .. يا جماعة نحن بقينا صعبين خلاص .. يعني كورة كورتين ونكون قريبين من كاس العالم .. يا عالم لو مشينا كاس العالم للاندية اعلان سودانيير ده ما عايزينو يا صلاح ادريس .. شوف الخطوط البريطانية .. فرانس اير .. لوفت هانزا .. وطبعا في كاس العالم للاندية .. اريبا دي ما ممكن تكون هي الراعي الرسمي .. حنتعامل مع فودا فون .. وسوداني ايوه سوداني برضو ما حتمشي معانا العالم التاني .. تمشوا عالم كاس العالم للاندية .. عندنا رحلات مخفضة بالموتر ! واحد قال مدرب القطن كان كاتب في الموتر قبل مباراة المريخ الاولي .. بكره يا قلبي الحزين تلقي السعادة .. وكتب بعد المباراة الاولي .. نجمة نجمة الليل نعدو .. وكتب بعد مباراة الرد .. ما تهتمو للايام ظروف بتعدي .. واحد مصري قال .. الهلال ده ما سوداني .. ما ممكن فريق سوداني يلعب كده .. يا اخوانا الناس ديل ما من السوداني .. والله الهلال ده ما ( سوداني ) واحد ثقيل قال ليهو كلامك صاح .. الهلال ده ما سوداني الهلال ده (اريبا). بعد الطبع أهو انبى طار ومشي الجزائر وان شاء الله ما حد طاير!
العمود أعلاه كتبه أمس خالد عز الدين بجريدة الكابتن وهو ذو صلة بما سطره أخونا عمر الفاروق.. فالتحية لهما... والانحناءة للهلال..
03-20-2007, 09:25 AM
غباشي غباشي
تاريخ التسجيل: 01-19-2007
مجموع المشاركات: 1729
Quote: وعليه فإن الحال في حالو يا مريخاب وبالله ما تشبكونا ونشبكم الفوز للسودان والذي منو !!!!!!لا إنتو فرحانين بي فوزنا ولا نحن فرحانين بي فوزكم ..
Quote: وإن كان فوزكم كان على فريق بوزن القطن وصعودنا كان على حساب فريق بوزن الذهب..فاتني أن أذكر الأخوة المريخاب بحقيقة مرة بطعم العلقم !!!
Quote: المريخ بات هو الفريق الوحيد الذي يفضحنا مع الأخوة المصريين ..والمريخ هو الفريق الوحيد الذي سبّب لنا مقولة عقدة الكرة المصرية .. فالمريخ هو الفريق الوحيد من بين الفرق السودانية الثلاثة الذي لم يستطع إقصاء أي فريق مصري طيلة مشواره الكروي
لكن ياعمر الفاروق لقيتك قلبك اسود من البازنجان سيد الاسم وفيك نار غل بحجم شوال من الفحم الاسود برضو ...... ياخ والله انا فرحت للهلال اكتر من المريخ مع اني مريخابي .... مش لانو الهلال احسن من المريخ لكن لانو الزمالك احسن من الفريق المسمى بالقطن ..... وانت لو عاوز ترجع للتاريخ ياسيدي فانت ليس لك سجل فوز باي بطولة قارية او اقليمية .... وخليك في دوريك المتاز ده وتواليك اللا نهائي محليا .... حلال عليك .... وبتنمى الهلال يواصل المسيرة ويشيل الكاس ان شاء الله ..... بس في حال لاقدر الله وصل النهائي وما شال الكاس .... عليك الله ما تقدنا بالموشح بتاع تاني افريقيا للمرة التالته .... افسدت فرحةالانتصار ... وفتحت باب التعصب الاعمى مرة اخرى ..... كان الله في عون هلال الملايين الانت محسوب تبعهم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
أبوذر بابكر
الصادق خليفة
ASAAD IBRAHIM
doma
الصادق صديق سلمان
محجوب البيلي
Nasruddin Al Basheer
غباشي
فيس بوك
تويتر
انستقرام
يوتيوب
بنتيريست