التحية لوجيهة السعودية

Quote: الله يا تمبس كلامك ده ملان أخرام انت المشكلة بتتكلم عن نظام اجتماعي و ظروف خاصة و أنا شايف انه الظروف دي أصلا ما المفروض تكون عاملة كدة.. يعني خصوصيتها دي ذاتها قايمة على غلط يعني يا تمبس البخلي المرة محتاجة لحماية شنو غير انه الناس دايما مبيتة نية التربص بيها

اندنوسية .. يا فلبينيه علشان تمشي تجيب ليها حاجاته ( الخاصة جدا ) ورضيانه بالوضع دا تمام الرضا .. لاحظ لو قالت لي الاندنوسية دي امشي سوقي الجيب دا جيبي لي الحاجات دي وعبي لي معاك الجيب دا بنزين من محطة التسهيلات .. ممكن تقول ليها:
(ماما أنا مافي روح بعدين ممكن في نفر موت أنـا وأنا في بزوره واجد .. ليش مافي روح إنت ؟؟) ودي هنا الخيارات الفردية البتفق فيها انا معاك ، يعني مافي حاجة استاندرد هنا علشان تستعمله مصوغ رصمي إنت أو غيرك .. نفس الزولة دي زاته بي الراتب حقها البتحوشو من مافي روح انا في موت .. ممكن يكون عندها حــافلة يا موطـر .. يا رقشة سايقاها بي نفس وبتوصل بيها ركاب كمان في الوسط الاجتماعي حقها .. في بلده هناك.
وده بيرجعنا تاني لي مسالة الوضع الاجتماعي والوسط العايشين فيهو الما بنفصل بي نقرة كيبورد منك أو مني أنـا دا أو يكون فيهو أخرام زي اخرامي دي ..

Quote: يعني يا تمبس البخلي المرة محتاجة لحماية شنو غير انه الناس دايما مبيتة نية التربص بيها و انها لو ماشة براها معناتها ما كويسة و لو قلعت عبايتها معناها ممكن تديك و المطوع مفروض بمحطها ليك لمن تعرف الله واحد..

.. بعدين يا فاضلابي في كتير من نواحي الدنيا المرأة ليها قوانين لحمايته كوضعية خاصة وكتير من السيدات بيطالبن بي حقوق الحماية والحقوق الأخرى .. يعني المسالة ما محصورة في نظرتك بتاعت التربص وطلعت عبايته وشحدوهـا أو ساقت ليها واحد من الشارع بي محض ارادته ..
أمسك الإمارات وهي دولة مجاورة للسعودية وفي دول مجلس التعاون الخليجي البيناتم اتفاقيات مشتركة في اشياء كتيرة .. يللا تعال يا فاضلابي سوق ليك ليموزين هنا وراكبه فيهو زولة بي وراء .. قوم اضبط المراية الداخليه بتاعتك في وشها ( وأغمز ) ليها بي تقليدية .. يا قول ليها يا سيدتي الجميلة يا ( تتي ) أوديك وين .. تعرف دي لو وقفت ليها بوليص .. حتى لو كان بوليص مطافي وقالت ليهو فاضلابي دا قال لي كدا .. في لحظته بيرشك بي خرطوش الموية دا اول حاجة لحدي ما يفضي فيك الفنطاز دا كلو ويقول ليك (حريقة) فيك وبخموك بودوك بلدك أول حاجة حتين بعدين يقولو ليك الحاصل شنـو .. خليك من مسالة يا ( تتي ) دي .. لو خشمك عندك واحده بس اتبلت عليك في شارع ضيق مشيتك ما عجبته في الشارع ممكن تروح في ستين داهية .. ودا هنها قانون حماية برضو متوفر للمرأة العندها عربيته دي وسايقاها وبتمشي تجيب بيها اغراضه ( وحاجاته الخاصة جدا ) من غر ما تستعين بي (صديق) أو (صديقه)..
بعدين الناحية الدينية العايز تزج بيها دي يا فاضلابي بتاعت يمحطه لمن تعرف الله واحد دي .. اثبتته ليك في (الخرم) بتاعك الما شايفو دا السيدة وجيهة بي نفسها

Quote: وجيهة دي قالت المسالة بتاعت منع القيادة ما تمت نتاج لي قرار سياسي أو ديني .. لكن لي مبرر اجتماعي ..

.. وإنت مصر إنك تاخد المسالة من منظور غير كدا.
من ناحية تانية مسالة مماحكة الكتيرين هنا الما عارفين حاجة عن (الناس البتمحط دي لحدي ما الواحده تعرف الله واحد ) أرجو أن اصحح ليك مساراتك إنو الوضع اختلف تماما حسب التغيرات الحاصلة هنا .. يعني بعض المسميات الكانت زمان والسلوكيات اختلفت وماشه في تدرج لي وضعيه احسن .. وما كان يمارس في (تمانينات أو تسعينات) الماضي اختلفت في (الفيات) الحالي ودي حاجة برضو ما بتحس بيها إنت أو الكثيرين غيرك الما خدين الحاجة دي في قالب محدد..

Quote: و هسي بتشفط ليك عااااااااادي بعد العرس هسي يا تمبس ده شنو عليك الله؟ يعني لي شنو نحن بنخلط الاحترام بي جنس ده يعني حركة انها تجليك دي بتلغي الكان بيناتكم زمان؟ نفرض انها كانت حبيبتك و بوستها زمان.. اها يعني شنو؟

دا واقع إنت بعيد عنو . ومنو القال ليك دا احترام ..؟ دا ما احترام دي افتراضيه تماشي مع الوضع اللهي فيهو الاختارتو بي محض ارادته وبي محض ارادة زوجـه ورضت بيهو والبتشوف فيهو انو بيضمن ليها الكثير من حرية وجوده هنا دا .. بعدين يا فاضلابي ما يكون كلامك دا فضفاض ساكت .. صدقني ( مستنيرين ) لمن مولعين وعن تجربة الواحد فيهم بيمارس الطقوس دي هنا دا إنت زاتك مش حسع بتتكلم معاي في المسالة دي .. كدي اشوفك هنا لو ما جليتني في الشارع عادي .. انا ما تمبس ..

Quote: ولي شنو الود الشفت بسوط الدنيا و في النهاية يقول خلاص نستقر و يشوف ليه واحدة أهم شي انه لم يمسسها انس قبله ولا جان.. ما هو يا نسوط كلنا و الحكاية تكون عاااادي

.. الزانة بتاعتك دي اعمل حساب انها ما تتكسر لما تنط بيها عالي كدا .. المسالة إنت ماسكة بشكل غريب ما ليهو علاقة بي شفتنه واللا بي زول زمان كان بيفتح زرار القميص لحدي ( صرتو ) ولابس سلسل وبكفكف بنطلون الجينز من تحت، افترض المسالة العمرية في المسالة دي والكنت بتعملو زمان ليهو حد بينتهي فيهو يعني الواحد والواحده بيشيلو الكوته المفروضة ليهو في الدنيا دي وفي النهاية في عقل بيعملو علشان يستخدمو بي طريقة سليمة .. يعني بي نفس فهمك دا ممكن تكون واحده زمان كانت ( شكش ) وفاتحه ليها ( بيت ) بتاع اي حاجة .. أيه البمنع انها حسع دي تبقى زولة سوية وعندها اسرة واطفال وبيت وزوج بتحافظ عليهو وربما كان زمان بجيها في نفس البيت داك .. ( شايف خرمك الكبير دا .. واللا احفـر ليك حفرة لاخيك ) ..؟

Quote: يا تمبس ده اضطهاد و غلط و انا و انت عارفين انه الود كان اكل.. شفت و البت كان اكلت.. بايظةو ده سببه ببساطة الحتة الخاتنها فيها و فكرة الجنس الجنس المالية الراس طوااااااالي دي يعني حماية المرة البتقولها دي كلها هي حمايتها من شنو غير الجنس؟

.. هي ممكن تكون محمية ضد مفهوم الجنس لو اصلو كان في زيك يا فاضلابي بيحصر المسالة دي بالمفهوم دا وبيسقط امور كتيرة جدا .. ولو كان بيخاطب البعض منهن بي مفهوم انهت بيبحثن عن حمايتن ضد الجنس في المقام الأول .. ولو وجيهة دي جات هنا ممكن تطلع ليك كلامك دا ( الأوزون ) عديل وبتقول ليك لا يا ود امي المسالة ما بي شوفك دا .. عندنا ليها شوف تاني.
في كتير من البلدان البتعرفه إنت حسب رؤيتك لحقوق المرأة المضهدة دي .. والاصبح فيها الجنس دا متاح تعاطيه حتى في داخل عربية مكشوفة في اي بلدة نائية بي محض ارادة الطرفين وعين الناس بتشوف .. يعني بي صراحة اتجاوزت فوبيا الجنس البتتكلم عنها دي .. هل بتضمن لي أنو مافي حقوق خاصة بالمرأة بتكافح عنها وفي قوانين صممت خاصة ليها ... وبالمقابل هل سلمت المرأة دي نفسها من امتهانها جنسيا من غير رغبته وتحت قوة السلاح .. أو بي اي وسيلة أخرى وبالرغم من كل الضوابط دي ؟ بعد تمنطاشر سنـة الواحدة ممكن تعمل اي حاجة والقانون بيتيح ليها وفي شنطته ممكن تلقى ديوريكس وبنعتبر دا جنس منظم .. طمنطاشر سنة إلا نص ساعة (هبشتها) بي محض راداته وقام شافك الكلب بتاعه وما عجبو الوضع دا وقعد ( يهوهو ) وجا ابوها لقاك يا اخوها وعمل ليك محضر اثبات تعدي وجنس في غير ( زمن الحصاد ) إنت برضو بتروح فيها وفق قوانين حماية صارمة جدا بتتعلق بالجنس .. ويبقى دا (كيس) جنسي .. اهـا ديل برضو مش مفتحين وأي حاجة . ليه ما بتحاكمم جنسيا حسب وجهة نظرك دي.. لو اصلو عايز تربط لي المسالة دي ربط (جنسي)؟

(عدل بواسطة tmbis on 03-13-2008, 12:04 PM)
(عدل بواسطة tmbis on 03-13-2008, 12:46 PM)