|
|
 ثقالات خالد عزالدين
|
اعيد نشر عمود الاخ خالد بعد استئذانه لانه ثقالاته تستاهل القراية:
مئوية الهلال وجرسة المريخ !
انا زول ثقيل .. اقر واعترف بذلك .. لكن الثقالة ذاتها ما فنون .. انت لازم تكون لماح وبتقرأ المستقبل حتي ولو جابت ليك القراية دي المشاكل ! امبارح انا كتبت هنا عن مساندة اهل المريخ بقيادة جمال الوالي للهلال البتشبه مساندة الدول العربية للفلسطينيين ! وقلت الناس ما تتغشي بكلمات جمال القالها في التلفزيون واعلن بيها مساندتو للهلال لان المساندة الحقيقية للهلال في الانسحاب .. وجمال ما ممكن يقول لينا الهلال عندو قضية ونحن معاكم وفريقوا متمرن ومستعد للمباراة الثانية !! طبعا الجماعة قالوا خالد ده ثقيل يعني الراجل وقف معانا بدل ما يشكروا يقوم يقول ليهو وقفتك زي عدمها !! لكن ربك رب الخير الموضوع ما مر علي خير !! 24 ساعة والحقيقة انكشفت و(ابو الثقالة) الله نصرو !! كل الوسط الرياضي بقيادة الوزير كان مبسوط من انتهاء الازمة الا مجلس المريخ !! معقولة بس يا والي ! تقيف معانا في التلفزيون وتقيق ضدنا في الراديو !!
المريخ الواقف مع الهلال زعلان عشان الهلال رجع للممتاز !! مش قلت ليكم انسحاب الهلال ده ما بستفيد منو الا المريخ !! وجع وجع الهلال رجع .. الجماعة قالو كييييف الوزير يتدخل ؟ وهو ما كان الوزراء بتدخلوا جمال الوالي ده ببقي رئيس المريخ !!
الناس ديل طبعا من الله خلقهم بحاكوا الهلال في الكلام الكبار كبار ده !! قالو كيف الوزير يطلع بيان والاتحاد يطلع بيان والهلال كمان يطلع بيان ونحن مانطلع بيان !! نادي خريجين وحركة وطنية .. شن جاب لي جاب !! قاموا طلعوا بيان .. قالوا نحن بنهدد بالانسحاب ! يا سلام ! وما تنسحبوا شنو يعني ؟ انتو قايلين اي فريق بنسحب خلاص الدنيا بتقوم والحكومة ما بتنوم !! اقول ليكم حاجة انسحبو وسوقوا معاكم نيل الحصاحيصا !!
واحد ثقيل قال لي انا مختلف معاك في قصة استفادة المريخ من انسحاب الهلال في الممتاز .. قلت ليهو كيف ؟ قال لي الهلال لو انسحب الدوري بتشيلو الموردة ؟
قالوا لو اعادوا كورة النيل حيكون عندنا موقف ! وين ؟ مع المواقف الجديدة في الخرطوم ولا في ابوجنزير .. خلي بالك يا (همد) من تجميل العاصمة .. شوفوا ليكم موقف مخطط !!
محتجين علي تلاتة نقاط .. نحن معاكم لحدي سبعة !
الناس ديل قايلين المشاكل دي ساهلة كده !
والله شداد ده مع زهجتو دي تجوها منسحبين الا تاني تلعبوا في الصين !
اديكم فكرة .. انسحبوا واعملوا منتخبات بين وعلاء الزهراء !
اربعة بيانات في يوم واحد .. الفلوجة يا بعيد
عايزين تضعوا علينا المية !!
من ما سمعت بي انسحاب الهلال وانا ضدو لاسباب كثيرة اهمها هذه المئوية .. انجازنا الذي انتظرناه طويلا ! معقولة يا ارباب فريق ماشي علي الرقم مية تنسحبوا !! يعني خلاص الود سحاب .. ما تخلينا نتم الحساب !! اكتر زول فرحان بي رجعة الهلال انا .. قاعدين نعد لينا كم سنة .. عشرين مباراة ما انهزمنا .. تلاتين اربعين .. الاهلي القاهري مرتين ..الترجي التونسي مرتين تلاتة.. الزمالك المصري .. الاثيوبيين .. ناس جنوب افريقيا.. الرينجرز النيجيري والنجم الساحلي والرجاء والوداد ولمبيك خريبكة المغاربة .. ناس زعيط ومعيط .. حمام ميت وحمام حي .. فريق كبير وفريق صغير ..دوري ممتاز .. ابطال افريقيا .. كونفدرالية .. كاس سودان !! كلهم ما هزمونا في استادنا الهلال وعين الحسود فيها عود والله يكفينا شرك يا خرطوم .. مية مباراة رسمية بدون هزيمة .. رقم قياسي لا يمكن الوصول اليه حاليا ولا مستقبلا !!
قال شنو .. قال بهدد بالانسحاب .. لا ياخي
|
|
 
|
|
|
|
abdulgafar mohd saeed
فيس بوك
تويتر
انستقرام
يوتيوب
بنتيريست