|
معتز القريش ، بقال ، النصرى ، ملكة سبأ ........ ألحقووووووووووووووووووووو...
|
أها جيتو جارين كدا لحدى ما نفسكم طالع ان شاء الله تبقى فيكم فايدة وتمدونا برابط لهذه الأغنية التراثية ... وأسمي الفنان و المؤلف................. عاجل يا جماعة .... مستعجل!!!! قولوا لى خلاص ماشى وين ان شاء الله .... والله بس سمعت الأغنية فى الإذاعة شيطانى ركب قلت إلا ألحق حدها ... أغنية من الطراز التربوى الإجتماعى ........ اها دى الأغنية :
بنيتي حسابك الله والنبي لـ كلام راجل تسمعا بنيتي حسابك لـ كلام راجل أسمعا حسابك يا بنيتي كلامي لا تابا كلامي كم أبيتيه تكوسيه ما تلقا * * * هي لا تخليه ينقنق لـ كلامو تسفها لا تقوّي راسك ، بكرة يقولوا طلقا فجر كم ولا عندو لـ عشيّا أمهلا بلا إذنو لا تمشي لـ محل ما جرا *** وراجل كم ما ناداك لا تمشي تلحقا وكم غبّت منك نادي أسألا قشي بيتك بدري وعيشك أطحنا الما وساخة ، في خشم بيت لا تكشحا *** وكم عاطت فوقك لا تدقيه تفلعا إنتي أشكيه لـ الله لـ حقك يخلسا انتي بنيتي كم لـ كلامي تسمعا الله والنبي لـ كلام راجل تسمعا الله والنبي لـ كلام راجل أسمعا *** حتّي عجاج بيتك ، عنقريبو فرشيه وكورة أم قعر تحت سريرو جيبيه ختّيه توبك المجنقر دا ب إبرة أمسكيه رجلينك المشقق دا أدرشيه حننيه *** وشعرك المشمبل دا لميه مشطيه المدونكت من قعارو فرتقيه أوطوي أوقاي لـ ألمي أردي جيبيه عجينة كم تعوسيه لـ دوكي أتّقيه *** وكسرة كم تلت عقابو لميه شريه ب طلحاي ب دروتاي حفرتك ولعيه جيبي مخبرك لـ بطن بيتك بخريه كم كملتي خدمتك لـ نارك أكتليه *** كم فتّي بطن حلّه ، لـ بيتك طليه شيفيه كلام كم تخاف لو من بيت لا تمرقيه وقالوا وقلنا في لسانك لا تجيبيه جارتك المهوهوة دا لا بيتك بخرجيه *** نصيحتي كم سمعتيه لـ بيتك أمسكيه الله والنبي لـ كلام راجل تسمعا
وبعدين النشوف فلاحتكم........ما تبقى لى أكل خميس تويرا وقراصة خمسة بوصة وإسكلوبانية وفول بالجبنة ...... ألحقوا عمكم سريع .....
|
|
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: العوض المسلمي)
|
العوض يا خوى قول بسم الله ... إنت ما نمت للحين.... داير تضبحلك هيونداى تتعشابا ولا شنو؟؟؟؟ .... كدى قول لى يا العوض اخوى ... وبينى وبينك الزول يكون نزيه.... انا ذاتى المصحينى للحين شنو .... انا ذاتى موعارف ؟؟؟؟ أيييييييييي اتذكرت ... نحنا مو جيران..... كيف حالك اخى العوض انشاء الله امورك كلهاتمام ...
تحياتى الحارة وطالبين المروّه فى النصيبة الراقدة فوق دى ..... وان شاء الله عندك ليها حل ...مع (( حل وأربط )) دى تكون فكرت ياربى الصامولة الكورية بتكون فى كينيا بكم بزنس يا مان ... انا قاصد الأغنية مو الصامولة...
| |
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: الرشيد البصيلى)
|
البصيلي
كيف حالك
هاك دي نبذه عن المطرب لحدي مايجوك الجماعه ديل
المطرب الشاب فتحي الماحي .. فنان دارفور القادم
الفنان الشاب فتحي الماحي واحد من الفنانين الذين
وجدوا الرواج وسط محبي الغناء في دارفور لتميزه
بطرح غنائي متميز استلهم فيه التراث الدارفوري
الثري بالمفردات والتعابير المحلية المتفردة .
وقد برز مشروعه الغنائي جليا في اشرطة كاسيته
التى صدرت تباعا في الفترة الاخيرة حيث راج شريطه
الموسوم بـ: «بنيتي حسابك» الذي اظهر فيه امكانياته
الصوتية بشكل طيب . وفي أغنية «بنيتي حسابك»
التي تصدرت الكاسيت قصة طريفة توصي فيها أم ابنتها
بطاعة زوجها والامتثال لأمره وعمل كذا له في موعده
وتوصيها ايضا الا تستمع لكلام النسوان وقطيعتهن
وما الى ذلك من أمور النساء . يتميز الماحي
بصوت قوي وجميل وذي امكانيات تعبيرية كبيرة
تستطيع توصيل المفردة الدارفورية البسيطة
الى كثير من محبي الغناء الذين يفتقدون الاغنية
الدارفورية في ساحة الغناء الدارفوري .
الفنان فتحي الماحي وبما يمتلك من امكانيات فنية
وابداعية هائلة في التطريب والتعامل مع المفردة
ذات الخصوصية يمكن ان يكون فنان دارفور القادم.
....
| |
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: خضر الطيب)
|
دا الكلام ....ممتاز ورائع .... أخى خضر الطيب ... والكلام انتهى ... وقلبت التربيزة ( الطاولة) فى الجماعة .... ياربى يكونوا شافوا البوست وعملوا مطنشين ولا يكونو مشغولين فى مشاغل الدينا الكتيرة دى ؟؟؟...... لكن برضوا الزول يكون نزيه مع نفسو.... وما يظلم الناس .... هو قول لى البوست دا انتا كتبتوا متين ....نان خليتو يبرد.... ... وشكرا متصل لك ...أخى خضر .. على المعلومات الضافية ... وإتصلت حاليا على الخرطوم عشان نشوف كورنتو معكوسة وين فى السوق العربى ....ولك التحية مرات ومرات أخى خضر الطيب.... ونشوف بقية الجماعة بشدو حيلهم ولا بتفزروا....
| |
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: الرشيد البصيلى)
|
ودا كلام بقال في بوست مشابه , يعني هو ذاتو بفتش ليها , وعند ود القريش الله اعلم
تلقاها
Quote: والله الاغنية التراثية الدارفورية دي عاجباني شديد خلاص وكان عندي شريط مسجل ولكن للاسف اديتها لزول قام ضيعها لي
ملكة سبأ بما انك متخصصة في الاغاني التراثية الدارفورية اطلب منك
** جيب لي اغنية الله والني لكلام راجل اسمعا وياريت لو نزلت لي لينك للحفظ المباشر في الجهاز
** وجيب معاك اي اغنية تراثية دارفورية
مع خالص ودي وتقديري
في انتظارك يا ملكة ؟؟؟؟؟؟؟؟ |
.
| |
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: الرشيد البصيلى)
|
البصيلي تحياتي
هذه الاغنيه الو مرة اسمعها هنا نشرت من قبل في بوست لكن لا اذكر اسمه.
السؤال: بعد الحروب و الثورة و الاغنية التي تتوضح ماساة نساء دارفور وكل الهامش السوداني حيث التفكير في ارضاء الرجل ونمط العلاقة بتاع (سي السيد ده) من يعتقد بان هذا سيكون هو الحال بعد الآن؟؟؟؟
في آخر مؤتمر للحوار مع شباب دارفورين نبهتهم لن رفع قيم مثل قسمة الثروة و السلطة ورفض التهميش هذه القيم ستتسرب للبيت الدارفوري اي التغيير قادم لا محالة وتهميش الناس و استغلالهن في انماط هذه العلاقات لن يستمر فلايسعد الثوار للتغير الذي سيحدث في بيوتهم واتمنى وقتها الا يستعتينوا بجاحفل يمين الجلابة الاكثر مقدرة في ترويض نسائهن باكاذيب كثيرة مرة باسم الدين ومرة باسم القيم الرأسماليه وتصوير نمط (السيدة الهانم الكل همها المحافظة على جمالها ورشاقتها لامتاع سي السيد) نموذج القنوات الفضائيه العربيه.
| |
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: Tragie Mustafa)
|
Quote: السؤال: بعد الحروب و الثورة و الاغنية التي تتوضح ماساة نساء دارفور وكل الهامش السوداني حيث التفكير في ارضاء الرجل ونمط العلاقة بتاع (سي السيد ده) من يعتقد بان هذا سيكون هو الحال بعد الآن؟؟؟؟ |
الإستاذة تراجى .... مع فائق مودتى وتقديرى ... أنا إحترم وجهة نظرك ... ويقنيى إنك كذلك تحترمين وجهة نظرى ...الأغنية حسنة السيرة ... لا تعبر بالضرورة فيما ذهبتى إليه ...وإذا كانت فقط كذلك ... لم يبقى أمامى إلا رفع الراية البيضاء ... وعلى سبيل المثال انا نشأت فى أسرة لا يرتاح بالى إلا عندما ارى كل ضيوفى وأحبابى من العائلة مرتاحين حولى .... وجبلت على خدمتهم ووجدت راحتى فى ذلك . وهكذا كان الرسول عليه الصلاة والسلام يوصى ....وكان يقوم على خدمة نفسه وغيره ...... وهنا تكمن التضحية من أجل الآخر غير مجبرا عليها من يقوم بها وهذه درجة أولى .... هناك أيضا تضحية من أجل القيام بالواجبات على الوجة الأكمل وهذه درجة .... وتصنيف هذه الواجبات مطلوب وتتفقين معى فى ذلك ... والصدق مع النفس ومراقبة الله تعالى فى انزال الحقوق على أصحابها بمختلف ألوانهم مطلوبة ويدخل فى إطار ذلك الأبن و الزوجة والإبنة وبقية مكونات المجتمع .
أردت بهذه المقدمة إيجاد توطئة لما يعرف بإنزال حقوق الطرفين الزوج والزوجة فى أطار الوجدان الإنسانى المشترك بينهما من ود وحب وعشق وغرام وهيام وما إلى ذلك من المسميّات ...ومن تحبه ستخدمه ولو حبوا على البطن .وفى إطار جدلية الثقافات كل مجتمع له مفرداته التى يقوم عليها ... ومن أهم المفردات فى دارفور هو الحفاظ على عش الزوجية لما لذلك من قداسة ....ولهذا هذه الأغنية لم يقصد منها ما ذهبتى الى السؤال بصدده .... بل بإعتبارها بلسما يضع الإطار النظرى للحفاظ على هذا العش دون تراخى أو فتور.....
وتحضرنى قصة سردها لى صديق بفرنسا ... عندما سالت الفرنسية جارتهم زوجته عن عملها؟؟؟ ... فردت إنها لا تعمل .... وسالتها على مصوغاتها الذهبية والأكسسوارات التى تلبسها من أين تحصل عليها ؟؟؟ فردت بأن زوجها يدفع كل هذه الفاتورة ...وأخبرتها بأنها ليس لديها حساب فى بنك ...بل زوجها يقوم بكل هذه المتطلبات .... حينها سألتها الفرنسية ما إذا كانت وضعيتهم هذه مجرد حالة عابرة .... فردت بان هذه ثقافة الإسلام بان على الزوج ان ينفق وعلى الزوجة ان تربى البنين مع كفالة كافة حقوقها الأخرى فى التعلم والعمل .... ويبقى هذا أختيارا .... حينها قالت الفرنسية انها بحق وحقيقة تبحث عن من يتزوجها لترتاح مثل صاحبتها ... وعليه فان الإغنية لا تدعو الى أكثر من تجميل جهة الزوجة فى نظر زوجها الذى يقوم بالأعباء الأخرى ......
وأنا عارفك حتقولى لى الراجل قاعد تحت الشجرة ومعاهو حصانو والنسوان يزرعن وهو بعاين ليهن بس يأكل ويشرب ودى حالة نادرة جدا ولا يصلح ان تكون عينةsample تمثل مجتمع دارفور خير تمثيل..
لهذا يا أستاذة تراجى مصطفى حفظك الله .... لا يمكن الوقف فى مثل الحقوق والواجبات على حافتى نقيض فهناك وسط مرن للتعامل تراضيا لا إستغلالا ولا حتى ديننا ينادى بذلك .... لكن تغيير الثقافات كثيرا ما تلحقه تبعات تمثلت فى الإنحدارات نحو المادية فأفقدت الحياة نكهتها سواء بالنسبة للرجل أو المرأة لكن تبقى العلاقات بين الطرفين ( على قرار الفطرة )By defult
الأنفس نفسها تختلف من إنسان لآخر .... فهناك الكثير من النساء اللائى يرين فى الحرية التى يتحدث عنها الغرب بأنها هى السبب الرئيس فى انتهاك حقوق وقدسية المرأة حتى أصبحت المرأة رخيصة جدا تستغل كما الدواب .... ولنقارن اى حياة زوجية لشخصين مسلمين يرتبانها على حسب ما جاء فى دينناالإسلامى دون اى تزييف أو تحريف مع إى حياة أخرى لزوجين فى الغرب ....ستجدين فارقا كبيرا....
وبعد دا كلو رافع ليك الراية البيضاء ........ وتقديرى لك
| |
|
|
|
|
|
|
Re: معتز القريش ، بقال ، النصرى ، ملكة سبأ ........ ألحقووووووووووووووووووووو... (Re: الرشيد البصيلى)
|
تراجي كيف حالك
Quote: (السيدة الهانم الكل همها المحافظة على جمالها ورشاقتها لامتاع سي السيد) |
والله بنياتنا ديل لو سمعن كلامك اولادنا حيتزوجوا ضكور عديل كده
يعني المشكله شنو لما الواحده تهتم بي زوجها وتسمع كلاموا ؟
دا معناها بنقص شئ من قدرها ؟ والمانع شنو انها تهتم بي زوجها
ولما النسوان كانوا ملتزمين بي كلمات الاغنية دي ماسمعنا بي طلاقات
ذي البنسمع بيها هسي دي
ياتراجي المرا مرا والراجل راجل
العلاقه بين الراجل والمرا مامحتاجه توصيه
| |
|
|
|
|
|
|
|