|
بس.. بلا لقافة معاكم...سيد الصادق راجل..وإبنه برضو راجل..
|
مساهماتي في هذا المنبر العامر.. على تواضعها وقلتها.. يغلب عليها الطابع الفني..شوية تغطيات لمعارض فنية ..رفع لوحات .. أغاني.. مداخلات ومناكفات في طريقة الأداء والغناء... يعني السياسة ما معانا..ولله الحمد..
مسألة انخراط الضابط السوداني الأصيل بشرى الصادق المهدي للعمل بأحد أجهزة الدولة السودانية (قطعاً ليس الموزمبيقية)(جهاز الأمن) هي في المقام الأول والأخير مسألة تعتمد على خيار وإرادة الرجل نفسه...لكن الواحد شايف إنه الناس عايزين يعملوها موضوع كبير جداً..وضربة للسيد الصادق..والأنصار..يا جماعة الخير..لعل الأمر ببساطة شديدة خيار شخصي...ممكن موش؟
يعني مثلاُ...صلاح إدريس رئيس الهلال..لو إبنه قال لازم يلعب في المريخ..يقوم صلاح إدريس يشعر بالحرج ويعلن التنحي؟؟ ما جاية ياخ..
بعدين في ناس هنا طوالي عايزين يصطادوا في الماء العكر...أول حاجة الماء لا عكر ولا حاجة...موش كدا وبس...حاجة يصطادوها زاتو ما في.. أقول ليكم حاجة؟؟ موية زاتو مافي.. الأجواء كالعادة في بيوت الأنصار يسودها الاحترام والمحبة.. الناس ديل شاربين ديمقراطية ومتربيين عليها ..
حتى لا يحتار المهووسين بالتصنيف في إيجاد تصنيف لشخصي الضعيف... أنا لوني السياسي موزايك مزركش على زخارف أفريقية وأكريليك على كانفاس في تكستايل بتاع جلد.. ومردوم مع عشرة بلدي وجالوا برضو وأيقاعات سيرة ومديح الرسول العظيم...
يلا .. قوموا بلا لقافة معاكم..
|
|
|
|
|
|