أثار قبل فترة إيقاف إتحاد كرة القدم السوداني للاعب المريخ جبرة ردود فعل عنيفة في الوسط الرياضي خاصة من قبل نادي المريح ومشجعيه، وكان في المنبر هنا نقاش ساخن حول هذه المسألة. واليوم يأتي الرئيس عمر البشير ليرفع العقوبة عن جبرة. السؤال هنا هل حلت كل مشاكل السودان، ولم يتبقى لنا غير مشكلة جبرة. وهل مشكلة جبرة تتطلب قراراً جمهورياً من رئيس الدولة. أم أن عمر البشير "فاضي شغله" آها يا شباب نسمع تعليقكم.
وهذا هو الخبر كما ورد في جريدة الجياة
Quote: الحياة اللندنية – الأحد 14/12/2003م
البشير يتدخل لمصلحة اللاعب "جبرة" واتحاد كرة القدم السوداني يستجيب
الخرطوم - النور أحمد النور – الحياة
استجاب اتحاد كرة القدم السوداني امس الى تدخل الرئيس عمر البشير بإعادة لاعب موقوف الى الملاعب. وخفف عنه العقوبة بعدما دين قبل أربعة اشهر بسوء السلوك اثر اعتدائه على حكم أشهر البطاقة الحمراء في وجهه, واعتبرت الخطوة سابقة في تاريخ الكرة في البلاد.
وزار البشير الأربعاء مقر نادي المريخ لكرة القدم أحد قطبي الكرة في البلاد, وطالبه مشجعو النادي برفع عقوبة الايقاف لمدة عامين عن نجمهم المحبوب (فاروق جبرة), ورددوا هتافات "جبرة جبرة يالبشير... قرار جمهوري يالبشير" ووعد البشير مشجعي النادي خلال مخاطبته لهم بعودة اللاعب جبرة الى الملاعب قريباً, ودعا اتحاد الكرة الى مراجعة عقوبته.
وفي جلسة طارئة لمجلس اتحاد الكرة أمس, قرر تلبية رغبة البشير وخفف عقوبة ايقاف اللاعب الى عام باعتبارها الحد الأدنى لأي لاعب يدان بسوء السلوك, وبإمكان جبرة ممارسة نشاطه بعد ثمانية اشهر.
وكان اللاعب وجه لكمات قاسية الى الحكم طارق عبدالله, وهو محام ايضاً, عندما رفع البطاقة الحمراء في وجهه, وسقط الحكم مغشياً عليه مما دفع اتحاد الكرة الى معاقبة جبرة بحرمانه من النشاط مع ناديه والفريق الوطني السوداني لمدة عامين.
12-15-2003, 04:04 PM
Abureesh Abureesh
تاريخ التسجيل: 09-22-2003
مجموع المشاركات: 30182
هــذه تربيتنا الدكتاتوريـة.. المسكلــة فينا الشعب الســودانى وليست فى المؤسســة العسـكريـة، التى أتت إلى الحكم كل مرة بعـزومـة منا. تأمل فى هـذا الهتاف مرة أخرى: "جبرة جبرة يالبشير... قرار جمهوري يالبشير"... فهـو ينطوى على حقيقـة محـزنـة جـدا، وهى الجنـوح إلى تخطى العـدالـة بإستعمـال قـوة مـا. وهى بذرة الدكتاتوريـة والإنقلابات.. وبالمقابل، فإن العسكــريين لا يرفضـون العزومـات!! وكان الأجـدر بالرئيس البشيــر أن يرفض التدخل معتمــدا على عـدم الإختصـاص، وعـدم التدخل فى سيــر العدالـة، حتى يساهـم فى توعيـة الشـعب بضـرورة إحتـرام القانـون. ولكنـه لم يفعل، كما لم يفعل صبيحـة الجمعــة الثلاثون من يونيو عام 89
12-15-2003, 04:11 PM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
Quote: "جبرة جبرة يالبشير... قرار جمهوري يالبشير"؟!!!!!
وأتفق معك أنها تربية خاطئة، هذه المقولة تحتم علينا زيادة الوعي لدى جماهير الشعب بماهية الديمقراطية. السيد الريس دق صدره وشالتو الجعلية ساكت وقال للجماعة خلاص ما في مشكلة الزول بنرجعوا ليكم، ونسى في نفس الوقت أن إيقاف جبره أتخذ فيه قرار من مؤسسة لها وجودها وشرعيتها، وبفهم الرئيس هذا يزداد الإحباط فينا بأن مشاكلنا تحل بالعاطفة بعيداً عن النظم والقوانين.. وهذا ما أوردنا موارد التهلكة
يبدو فعلا المشاكل كلها انتهت ، بس فضلت مشكلة اللاعب جبرة عشان كده مشاكل السودان تكون اتحلت تماما
ما هي دي المصيبة ، حكام السودان اخر حاجة بيفكروا هي المشاكل الاساسية للشعب الغلبان ، لانه اليوم اللي يفكروا فيهو في مشاكل الشعب بيكونوا بره كرسي الحكم استعطافا لمشاعر الجماهير
12-15-2003, 04:17 PM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
كلام صح يا مايا أختي وأنا المحيرني مسألة إتخاذ القرار في لحظات زمان كان البشير في بداية حكومتو دي كل ما يمشي لمنطقة وبعد أن يرقص على نغمات شنان، يقول لأهلنا الغلبانين أنا تبرعت للمدرسة بخمسين مليون، وتبرعت للمستشفي بسبعين مليون وتبرعت لجمعية المرأة بعشرة مليون.. ولما الجماعة يمشوا ليهو علشان ما يصرفوا المستحقات دي.. يلقوا الرد.. وينكم يا جماعة الصف لسه طويل الرئيس أصلوا أتبرع كتير وعلشان كده جدولنا الموضوع. شفتي كيف إتخاذ القرارات دي، يعني دون الرجوع لوزارة المالية ولا يحزنون.
12-15-2003, 04:29 PM
ترهاقا ترهاقا
تاريخ التسجيل: 07-04-2003
مجموع المشاركات: 8422
غايتو نقول شنو غير إنو من بكرة كل لاعب يشيل عكازه ويخش الميدان ، والحُكام ما ينسوا الدروع الواقية وياريت مسدس 9ملم للدفاع عن النفس عند التعرض من امثال هذا اللاعب. ويا روح ما بعدك روح.
12-15-2003, 04:40 PM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
العزيز ترهاقا أول حاجة أنا عاجباني عمتك البيضاء ومكوية دي تاني حاجة شيل شيلتك ليوم الخميس، والشباب منتظرين الحفل الحدث، والعمة دي شوف ليها طريقة ما اظنها بتساعدك على الشغل ثالث حاجة يا أخوي أصلها الدنيا زندية لو كان الرئيس ده ما صاحي ناس الإتحاد ديل الحصل ليهم شنو أها شوف كلامهم ده يعني الجماعة موافقين موافقين حتى لو الريس بلعهم كلامهم.
12-15-2003, 06:57 PM
بلدى يا حبوب بلدى يا حبوب
تاريخ التسجيل: 05-29-2003
مجموع المشاركات: 9833
عمر البشير...منتهي السخف والاستهتار..لقد تم ايقاف اللاعب بسبب سؤ السلوك ...وتاتئ انت ياعمر بقرار تعيده...في امريكا..عضو الكونقرس يخاف من مخالفه قانون السير..ليس هنالك مقارنه..ضاع الحديث مني وسط هذا السخف..I think we need to teach our leaders how to respect the law
12-16-2003, 02:19 AM
aba aba
تاريخ التسجيل: 03-06-2002
مجموع المشاركات: 1993
تعرف يا إسماعيل في مرة معاي صديق من مورتانية وبنحضر في برنامج فيه نميري (بين جيلين) وطبعا أب عاج مارس هوايتو في الكلام العبيط فقال لي معقول هذا كان حاكمكم 16 سنة..ومرات بحس إنو ربنا غضبان علينا بيبلينا بي نوعية غبية من البشر ..والمصيبة هنا هو بيحاول يرضي المريخاب ويكسب تعاطفهم وعلي حساب التربية والتقويم وكل ما شرعت من أجلو قوانين الرياضة..اللهم لا إعتراض علي حكمك..
12-16-2003, 06:10 AM
الكيك الكيك
تاريخ التسجيل: 11-26-2002
مجموع المشاركات: 21172
كيف لنا ان نضمن ان عمر البشير لن يعدل فى اتفاق السلام المزمع توقيعه كما فعل نميري باتفاق اديس اببا . ويتدخل هذه المرة ايضا ويعدل فقرة لا تعجبه او تعجب حزبه .. القانون قانون لا مجال للعواطف في تطبيقه. علي الدكتور كمال شداد رئيس الاتحاد العام تقديم استقالته فورا وعلنا وهى استقالة مسببة بخرق القانون الذى يجب ان يحترمه الجميع لكى يجد الاحترام مستقبلا والا تحسب عليه فى المستقبل ...واذا قبل هذا الضغط من رئيس الجمهورية هذه المرة فعليه تقبل ضغوطات اخرى مستقبلا استقيل يا دكتور ولا تجعل هذه الفرصة تضيع منك .السودان مقبل علي نظام القانون اما ان يحترم والا فلا داعى
12-16-2003, 09:57 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
الكيك يا أخوي كيف حالك لا توجد أي ضمانات يا حبيب والمسألة بالمزاج شكلها كده. كمال شداد.. أتذكر عندما كنا في الجامعة وكان هو أستاذ بها، قابلته مرة ومعي بعض الأصدقاء بالقرب من القاعة 102 وكان وقتها مشكلته مع شيئ الذكر يوسف عبد الفتاح مسخنة جداً، قلنا له يا دكتور أنت عارف الجماعة ديل عساكر ما بيعرف علم المنطق البدرس فيهو أنت ده، ولا بعرفوا قانون. قال لنا بالحرف الواحد يجب يا أبنائي أن تتعلموا الدفاع عن القانون، فالقانون فوق الجميع.
السؤال لدكتورنا وين القانون بتاعك ده الليله يعني راح شمار في مرقة ساكت غايتو عجايب
12-16-2003, 09:47 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
العزيز خالد كيف حالك أنت عارف حصل لي نفس الموقف بتاعك، عندما كانت جزابيل خوري في لقاء مع الرئيس المشير القائد جعفر نميري، سألني أحد الأخوة العرب.. بالله عليكم كيف هذا الرجل أستطاع أن يحكمكم ستة عشر سنة...
جمعتني الظروف في مناسبة مع مجموعة من مجلس قيادة ثورة مايو. هل تصدق يا خالد عندما سألت أحدهم.. كيف كنتم تحكمون السودان. قال لي ووالله على ما أقوله شهيد.. قال لي أن أغلب القرارات نحن بنتخذها والكأس مدور. ده حال من يحكمون البلد يا خالد.. وربنا يكون في عون البلد
12-16-2003, 09:07 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
العزيز محب ممكن يكون الراجل عايز يشتغل بنظرية عفا الله عما سلف ومسألة قوانين دي غير مهمة بالنسبة له بس يا محب أنا محيرني ناس أخونا كمال شداد ديل على طوال وافقوا وقال ده قرار جمهوري مافي رجعة منو تاني نحيا ونشوف
12-16-2003, 07:57 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
الحبيب مهدي كيف حالك هي ذاتها وين القوانين دي عليك الله يوم واحد سمعت ليك قرار طلع بعد دراسة وتمحيص نعم فليعد فاروق جبره وبعودته ستحل مشكلة الكرة السودانية وبعودته تزداد سرعة وتيرة مفاوضات السلام وبعودته يمكن أن يفتح الله علينا الخيرات والبركات
12-16-2003, 09:01 AM
حمزاوي حمزاوي
تاريخ التسجيل: 10-10-2002
مجموع المشاركات: 11622
أها يا الهلالاب بديتوا الموضوع ما فيه ان المريخاب قدموا استرحام للاتحاد العام وانتوا عارفين رئيس الاتحاد العام (سبب تدهور الكورة السودانية) فعندما لم يجدوا رحمة من الاتحاد العام اتجهوا الي رئيس البلد ولا عايزنهم يمشوا لي مين
12-16-2003, 10:29 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
حمزاوي يا أخوي وينو الإسترحام ده هذا إرتجال وليس إسترحام الرجل شالتو الجعلية ساكت دون وضع إعتبار للقوانين نحن يا حمزاي بنطعن في الفيل الكبير عمر البشير ده أما الفيل الصغير جبره فهو رجل أعتدى على القانون في وضح النهار دون حياء وأتخذ الإتحاد قراره المعروف بأي وجه حق يأتي البشير ويقتل القانون جهاراً نهاراً وبعدين يا حمزاوي مفروض نكون مع إحترام القانون وإحترام المؤسسات. مش نخلي المسألة سايبة ساكت..
12-16-2003, 09:11 AM
أم سهى أم سهى
تاريخ التسجيل: 09-29-2002
مجموع المشاركات: 1435
والله موقف عمر البشير ده ذكرني بموقف الزعيم ازهري وطبعا شتان ما بين الازهري وعمر البشير - بس الموقف ده ذكرني في زيارة للازهري لقرية طابت قال ليهم - والعهدة على الراوي- ان يوم غد عطلة - حينهها هلل الحضور بالتصفيق - راق للازهري هتافهم وحماسهم فقال لهم ويوم غدا ايضا اجازة اعني بان هنالك قرارات تاتي في اللحظة بدون دراسة ولا كراس ولا ورق ولا يحزنون
12-16-2003, 10:22 AM
keiga2000 keiga2000
تاريخ التسجيل: 05-11-2002
مجموع المشاركات: 4119
بسم الله الرحمن الرحيم لما لا تكون هذه البادرة من البشير والمريخ هو ممثل الكرة السودانية الوحيد في الساحة الذي جلب له الكاسات المحمولة جوا (الهلالاب يمتنعون) من التعليق ونعم دي بقت لينا مقولة ثابتة وهي الحقيقة لما لايستجيب الاتحاد المحلي كمان لطلب الرئيس البشير وهو يعلم انو المريخ هو كذلك الفريق الوحيد الرفع اسم السودان وسجل اسمو في كاس الكؤوس الافريقية لما لايستجيب الاتحاد والكل يعرف اخلاق جبره الذي رفض الهلال ولولا رفضة للهلال لكان في خبر كان مثل ابوورقة بلاتيني الصحافة ولو كانت له سوابق اخلاقية لما نادينا برفع العقوبة عنه ولكن هفوة فنان وغيرة على شعار المريخ العظيم وسلام عليكم وفي انتظار الدوري الممتاز
12-16-2003, 10:44 AM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
شوف حكاية خاتين عليهو أمل دي ما بتفق معاك فيها،، ولو الحكاية كده كان من زمان ركبنا معاهو في سرج واحد.. لكن المنطق بقول لابد من التعامل مع الواقع.. يعني أنت شايف ناس التجمع وقعوا إتفاقهم وناس الأمة من زمان وقعوا إتفاقهم وناس الحركة ماشين لشراكة عديل كده.. زكية أم غبية لغاية الآن ما معروف حالها كيف. أظن يا عادل ديل غالبية أهل السودان..
آها ما قلت لي رأيك شنو في زول يتخذ قراره فجأة كده في قضية محسومة من أصلو
12-16-2003, 08:06 PM
Abdel Aati Abdel Aati
تاريخ التسجيل: 06-13-2002
مجموع المشاركات: 33072
انتم يا اخي من تحاولوا ان تضفوا علي البشير شرعية؛ بدأ ذلك عندما اعاد الصادق صياغة مذكرة تجمع الداخل الاولي للبشير؛ وبدأها بعبارة الاخ عمر البشير رئيس الجمهورية ؛ ثم واصلتم في لقاء جيبوتي؛ وانتم الان تتعاملون معه كانه رئيس شرعي؛ بل ويزعم رئيسكم ان اقتسامه للسلطة مع الحركة الشعبية هو خير ... من الدكتاتورية؛ وكان ما بني علي الباطل يمكن ان يكون حقا ..
الذين تحدثت عنهم؛ ليسوا اغلب اهل السودان؛ بل هم اغلب قيادات احزاب السودان؛ وهم كما قال عنهم الشهيد محمود محمد طه؛ اقزام تتصدي لقيادة شعب عملاق؛ وهيهات .. ولو اجمعت كل الاحزاب ؛ ولحسن الحظ هناك من خرج عن اغلبيتكم ؛ علي التعامل مع البشير؛ واعطاؤه شرعية؛ وتوقيع الاتفاقات معه؛ لما وجد له عندنا شرعية؛ ولنما اعترفنا به؛ وسيظل من اعترف به وحاوره وصالحة؛ وهو مسؤول عن دماء الابرياء؛ ذليلا مرفوضا عندنا الي يوم الدين
اعذرني لم افهم ماذا تقصد ب: "ها ما قلت لي رأيك شنو في زول يتخذ قراره فجأة كده في قضية محسومة من أصلو"
عادل
12-16-2003, 11:45 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
الأخ Keiga2000 كيف الحال كدى خلينا من الكاسات المحمولة جواً دي وخلينا من أبو ورقة ولا بلاتيني ولا طارق جاديكا زاتو
رايك شنو في رئيس يتنفخ ويطلع قرار إرتجالي مرة واحدة وبعدين حكاية المريخ البطل والهلال العظيم دي خلونا منها يعني الآن أين موقع الكرة السودانية أفريقياً وعربياً قال كاسات محمولة آل
12-16-2003, 11:10 AM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
أم سهى كيف حالك وكيف الربع عندكم بالشرقية عساهم زينين
المشكلة يا أم سهى نحن ناس عاطفين يعني لما الزعيم ولا الرئيس يقول حاجة دونما نحسبها بطريقة عقلانية نقعد نصفق ونهلل. والله أنا محيراني حكاية إتخاذ القرارت الإرتجالية دي لغاية الآن. ربك يسهل يا زوله.
12-16-2003, 12:29 PM
keiga2000 keiga2000
تاريخ التسجيل: 05-11-2002
مجموع المشاركات: 4119
بسم الله الرحمن الرحيم الاخ اسماعيل حال كورتنا هو حال سودانا قولي موقع السودان بين دول العالم كيف يكون حال الكورة في القمة واللاعبين جعانين والجيوب فاضية لذلك اقول ليك انصلاح حال السودان اولا هو البصلح الكورة وغيرها وبرضوا المريخ صاحب الكاسات المحمولة جوا
ياجماعة الناس ديل متعودين إنهم يتنصروا بواسطة الدبابات ، وحقو حسه مانزعل الجماعة ناس حمزاوي والبقية أكان زعلوا يقوموا يستصدروا أمر جمهوري بلا هلال ولا...... ذكرني موضوع نميري ده بلقاء عملوهو معاهو في التلفزيون في سهرة احتفال المريخاب بكاس السودان وقام صاحبنا يهنئي في لاعبي المريخ ولاعبي العالم ولو ماقطعوهو كان سلم على بلاتر ومشجعي الكورة في ارجاء المعمورة فردا فردا. واها ياأخوانا ونسونا بالمحمولة دي بقت ذي حكاية حبوبتي للمعيزة الهندية لما كنا صغار .
12-16-2003, 03:03 PM
إسماعيل وراق إسماعيل وراق
تاريخ التسجيل: 05-04-2003
مجموع المشاركات: 9391
أخوي على كيف حالك والله ذكرتنا بالرياضية الجماهيرية هي مش نميري فرتق بيها حاجة إسمها كورة كدي عليك الله ذكرني نتيجة الكورة كانت كم أنا عارف الهلال غلب فيها المريخ وعلشان كده نميري زعل ويا حليل ناس جكسا وقاقا والدحيش
كما قلت أخى أبو ريش بان هــذه تربيتنا الدكتاتوريـة.. المسكلــة فينا الشعب الســودانى ومنهم المؤسســة العسـكريـة التى تعنى لدينا التسلط والجبروت.
وهذه الموضوع اعاد لزاكرتى موقف حصل لنا فى عام 1991م وبوجود الرئيس عمر البشير بمطار كراتش الباكستانية ، وهو كان عابر الاجواء الباكستانية ترانسيت للسودان من رحلة لماليزيا ، وكانت تنظيم الاتجاه الاسلامى على راس الاتحاد العام للطلاب السودانين وارادوا ان بستفيدوا من الرحلة اعلاميا" وسياسيا" فى ان يطلبوا من الرئيس بواسطة السفير السماح لهم بتسفير عدد من الطلبة معه فى الطائرة الرئاسية ، وقام السفير بتوصيل الطلب لرئيس المراسم والذى اعترض على تللك الفكرة بحكم انها خرق للبرتكول ، وتم تجاوز مسئول المراسم ومخاطبة الرئيس والذى اعطى اوامره بالموافقة وتم استقلاها من كوادر التنظيم اسوأ استقلال ، فسافر عبر تللك الرحلة كل من له اقامة نظامية والذين يعملون بالتجارة ، بصورة أزهلت السلطات الباكستانية ولخبطت المراسم البرتكولية الموضوعة بالمطار واتاخرت الطائرة الرئاسية بالأمطار اكثر من 4 ساعات للسلامة الامنية ومن المفترض تمكث 1 ساعة للتذود بالوقود ، وصارت نكدة فى الوسط الباكستانى لفترة طويلة .
12-16-2003, 04:42 PM
Abureesh Abureesh
تاريخ التسجيل: 09-22-2003
مجموع المشاركات: 30182
شكــرا يا أخى دموكرسى كان الوحـد يتمنى أن يظل النقاش جـادا، ولكنـه الأن ينقلب إلى هلال/مريـخ.. وأنا شخصيـا لا أشجـع أى منهمـا. ولكن تبركـا بالموقف، أحب أن أدلى بتعليق بسيــط، وهـو إقتـراح أن يشتـرط فى أى ســودانى أو ســودانيـة يترشـح أو تتـرشــح لراســة الجمهــوريـة أن لا يكـون لـه أى تأريخ مشجــع!!.. أقصــد مشجـع فريق كورة، لأن جميـع الرؤســاء ليس لهـم تأريخـا مشجعــا، ولا يحتاجـون إلى شــروط لهــذه الكفاءة المشتــركـة بينهـم! ثم بمناسبــة المصالحـة الوطنيـة، والدعــوة إلى الوحــدة الوطنيـة، فإنى أيضـا أقتـرح أن يتـوحــد فريقا الهلال والمريـخ ويضعــوا وراءهـم خمســين عامـا من الحرب التى راح ضحيتهــا الملايين من الدولارات التى صـرفت والعقـول التى جمـدت.. كما أقتـرح أن يكون إســم الفريق الجـديـد مزيجـا من إسمى الفريقين الحاليين.. ويمكن أن يسمـى مثلا: فريق المرهل! أو فريق الهلامى لدودة القـرم.
الأخ ابو الريش سلامات في البداية يااخوي اصحابنا بدأو وانحنا تميناها.. ودي عادتنا كسودانيون ، ونميري عرف الحكاية دي وبقى يعمل ليناهلال مريخ كل شهر، 15 يوم نستعد ونتحدى و15 نعلق على النتيجة وهكذا . وبعدين الذيك ديل قلال يعني الواحد لو عصرتو ياازرق يا احمر مفر مافي . اما بخصوص الإتحاد ده نحن شعب خلقنا لنتفرق لا لنجتمع وقبل كده ماكانو فريق واحد على ماأظن وكان اسمه تيم عباس وفرتقوهو . وبالمناسبة ليس من باب المزاح لكن كدي لو اقترحنا إنه الرئيس الجاي يكون حزب من واحد فيهم وبكده نضمن المعارضة حزب واحد بس بدل 25 مليون معارض ( ماعارف التعداد الجديد كم ) ده اذا عدونا واحترامي لك
12-17-2003, 12:11 PM
قلقو قلقو
تاريخ التسجيل: 05-13-2003
مجموع المشاركات: 4742
الأخ وراق.. تطلب الأمر تدخل رئيس الجمهورية شخصيا للعفو عن اللاعب فاروق جبرة وهو اللاعب المحلى الموغل فى محليته..ياترى كيف كان سيكون الحال لو كان مستوى هذا الفاروق جبرة فى مستوى زين الدين زيدان او رونالدو مثلا.. هل تتطلب الأمر تدخل مجلس الأمن الدولى ام ماذا ؟ عالم فارغة وما عندها شغلة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
إسماعيل وراق
Abureesh
ترهاقا
بلدى يا حبوب
Mahadi
Muhib
aba
الكيك
أم سهى
keiga2000
Abdel Aati
قلقو
فيس بوك
تويتر
انستقرام
يوتيوب
بنتيريست