|
|
 نقطة ضعف السودانيين عند التقديم للوظائف
|
بفتكر انو لو تابع الطلب بتاعه زى البشحد المخدم ..
كرامته ما بتسمح ليهو انو يدنى نفسه...
مستحيل يمشى لمكتب الشركة التى قدم فيها طلبه ويطالب بمقابلة المسئول عن التعيين..
بعض الوظائف (المتوسطة و الدنيا) تحتاج احيانا لقرقرة اذن المدير
حتى يامن بانو الزول فعلا داير الوظيفة وانه ميت فيها موت ..
(دى تجربة شخصية وقناعات خاصة ..ما يجينى زول يقول لى شن عرفك)
|
|
 
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
كلامك سمح بالحيل واحتمال يكون كلام منطقي يفسر ان السوداني او السودانية ما بيلقى وظيفة بسرعة
لكن الحاجة المحيراني ان الواحدة فينا تدخل معاينة وتفاجأ ان هناك سؤال بيقول: نقطة ضعفك شنو؟ يعني معقولة اقول ليهم نقطة ضعفي وبعد داك أمر في المعاينة؟
يعني ممكن اقول نقاط الضعف الكاتبها انت هنا ولا شنو؟؟ عاوزين واحد من اعضاء المنبر يكون عضو في لجنة معاينة ويدينا فكرة عن نقاط الضعف الممكن نشير ليها في المعاينات
والله يديك العافية والله يديكم العافية
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: اميرة السيد)
|
سلام يا النصري
عندنا أكتر من نقطة ضعف يا النصري (و حديثي هنا عن الغرب و بالتحديد أمريكا الشمالية). الأولى هي أننا نحاول التعامل بثقافتنا في محيط لا يفهمها يعني حكاية التواضع الاتربينا عليها و عدم تضخيم الذات و الإنجازات دي ما بتنفع هنا. المعاينة هنا عبارة عن مناسبة للاستعراض. نقطة الضعف التانية هي عدم إعطاء المعاينة حقها... المعاينة و التعامل معها علم فيه كتب و مؤلفات و محاضرات. أقل ما يمكن أن يفعله الواحد أو الواحدة هو قراءة كتاب حول الأمر و كيفية الرد على الأسئلة المتوقعة. دا طبعا بالإضافة لما ذكرته من عدم متابعتنا و التعامل بعقلية أنا عملت العلي بعد دا كان دايرني اليضربو هم.
سلام يا سناء مثل هذا السؤال و هو من الأسئلة الشائعة جدا في المعاينات يجب التعامل معه بحذر. إذا رد الإنسان بما معناه أنه لا يملك نقطة ضعف فهذا يفسر على أنه لا يعرف نفسه و ليس له مقدرة على تحديد المشاكل و علاجها. يفضل أن تختاري نقطة ضعف ليست متعلقة بطبيعة العمل يعني إذا كانت الوظيفة متعلقة بالتعامل مع الزبائن يتجنب الواحد أن يقول إن نقطة ضعفه أو ضعفها هي الخجل أو التوتر عند التعامل مع من لا يعرفهم. أيضا يفضل اختيار نقطة ضعف يمكن علاجها يعني ما تكون حاجة من طبيعة الشخصية و لا يمكن تغييرها. نقطة أخرى مهمة و هي أن تذكري أنك قد بدأت في علاج هذا الضعف و حققت بعض النجاح في ذلك. مثلا إذا ما كان العمل الأساسي المطلوب هو الطباعة ممكن تقولي إنه نقطة ضعفك إنك لما تستعملي الكيبورد بتحتاجي تعايني ليه و شعرت إنك محتاجة تتدربي على الطباعة بدون النظر للكيبورد و فعلا نزلتي ليك برنامج من الإنترنت و بديتي تتدربي عليه و شاعرة بتحسن في الناحية دي لكن لسع محتاجة تشتغلي عليها.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
شكرا يا النصري على البوست.
انا مرات كتيرة بعمل معاينات لموطفين جدد( مهندسين) ...ما حصل عملتا لزول سودانى. لكن السبب الرئيسي فى رفض الناس عندنا هو ان الوظف الجديد ما بيسال. استايل المعاينات عندنا انى بحكى للموطف الجديد عن شغلى (عشان الطف الجوء و اديه زمن to relax) بعد كده بساله: عندك اسئلة لى?. و من الاسئلة بعرف اذا كان الزول ده مهتم بالشغل ده و فعلا عنده فيه رغبة? اذا كان الزول كان مركز معاى و عرف يسال الاسئلة الصحيحة?
غير حكاية ان الخجل من استعراض القدرات, عندنا كسودانيين (و دى اتعلمناها من العرب .....اظن) انك عيب تعاين لزول فى عيونه لمدة طويلة. و دى الامركان بيعبروها عدم ثقة فى النفس. فى شاب صغير (بداية العشيرنات) كانوا ح يرفضوا يعينوه فى مكتبنا لانه ما عمل eye contact. و احتجت انى اشرح للناس ان ده موضوع تربية و ثقافة مختلفة و انى شخصيا (الى بعاين ليكم فى عينوكم الان و انا بقول فى كلامى ده ليكم) تعبت جدا قبل معاينتى عشان اعود روحى على الحركة دى. و تم تعيين الولد و الان من اشطر المهندسين عندنا.
عن السؤال عن نقاط الضعف رد اخونا العوض ده هو بالضبط الرد الصحيح. بتذكر انى فى معاينتى انى قلت ليهم نقطة ضعفى انى Over work روحى. يعنى بشتغل اكتر من اللازم....وده كعب ليه ? لانى فى النهاية بكون كمن يحرق شمعة من الطرفين (كنت فعلا كده ايام الجامعة). لكن انا الان عرفت ان الحاجه دى ما كويسه و الزول مفروض يوازن بين حياته الشخصية و شغله.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: اميرة السيد)
|
شكرا يا سمارت على المعلومات. جميل جدا إنه الواحد يسمع من الزول البكون في الجانب التاني من التربيزة.
العفو يا أميرة. إذا كنت مقدمة على إنترفيو في كتب كتيرة مفيدة جدا. شخصيا في كتاب اسمه (Knock ´em Dead) لمارتن ييت أفادني جدا جدا. بتناول كل التفاصيل من اللبس و المعلومات المفروض تجمعيها عن الجهة الحتقابليها و ما يجب أن يقال و ما يجب ألا يقال و الأسئلة المفروض تسأليها لو أتيحت ليك الفرصة. و زي ما قالت اسمارت فوق ممكن الأسئلة دي تحدد النتيجة أكتر من الإجابات على أسئلتهم هم. الواحد لو دخل الإنترفيو ما مستعد دا بقلل فرصه مهما كانت مؤهلاته و خبرته و الوظيفة ممكن تمشي لشخص أقل خبرة و مؤهلات لكن جهز نفسه كويس. و في حاجات تانية ما تنسيها بعد الإنترفيو و هي إرسال خطابات شكر و تأكيد للرغبة في الوظيفة و إذا كان في شوية طبيز في الإنترفيو تحاولي تصلحيه بصورة دبلوماسية (دي منطقة حساسة و الحذر في التعامل معاها مهم جدا). و في حالة لا قدر الله ما شالوك للوظيفة برضه ترسلي خطاب شكر و تعبري فيه عن إنك كنت مؤملة في الوظيفة و عن رغبتك في إنه الجهة دي تحتفظ بأوراقك و تضعك في الاعتبار في المستقبل و عن كيف إنها جهة مثالية للعمل فيها.
معليش يا جماعة على البري لكن الواحد في البلد دي اتخصص في موضوع البحث عن عمل دا.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
شكرا يا العوض
وأرجو أن يكون هذا الخيط سانحة
لتبادل الخبرات حول هذا الأمر الهام والمؤثر في حيواتنا
وتجدني أحوج الناس هذه الأيام لمثل هذا البوست
لأني ولأول مرة في حياتي أبحث عن وظيفة
ففي كل وظائفي السابقة كانت الوظيفة تأتيني حبوا
ودخلت معاينة مرتين فقط
أرجو أن أدخل معاينتي الثالثة وأنا مسلح ببعض ما يرد هنا
من مهارات وملاحظات
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: جعفر محي الدين)
|
سلام سيد البيت والضيوف
كل سنة وانتو طيبين
موضوع مهم جدا شكرا
ويا استاذ جعفر عن تجارب سابقة
ما تكتفي بما يذكر هنا
المقابلات دي علم عدي خش وقوقل ليك كم موضوع
وذاكر كويس
وركز على الجوانب كلها
مهنيا شكليا سيكولوجيا
وغيره
من يفوز بالوظيفة هو من استعد لها اكثر وليس الاكثر كفاءة
من تجاربي
دخلت اكتر من سبعة معاينات قبل كدة
وكل مرة انا متاكدة اني كنت الافضل
لكن لسبب ما لم اكن ادركه
لم يتم اختياري
فاستعنت بصديقة
وفعلا استفدت منها
واول نصائحها الاستعداد الجيد
والتركيز على TOR في الاستعداد
والسلوك الشخصي الزي الابتسامة - الزي والابتسامة ما مقصود بيها اي ابعاد جندرية بس هي انعكاس لشخصيتك ومدى ثقتك وتنفي تهمة التوتر عنك
خاصة لو طبيعة الشغل فيه تعامل مع جمهور
او او
و الارتياح وعدم التوتر
عموما هو مافي وصفة جاهزة
لكل وظيفة طريقة استعداد واعداد
ذاكر ان تذاكر تنجح
هذه الاعدادات بافتراض توفر المعرفة افنية او التقنية للوظيفة المعنية
برضو التركيز العالي
ومخاطبة ناس الانترفيو باسماهم/هن
كلها بتخش في اتقييم
المهم بعد ما ذاكرت
اخدت وظيفة
اعلى مرات ومرات من الوظائف الي ما كنت بذاكر ليها
حكمة ربنا رب ضارة نافعة
نتمنى ليك التوفيق
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: جعفر محي الدين)
|
والابتسامة برضو مهمة
وتذاكر كويس جدا جدا عن المؤسسة البتقدم ليها، شوف الويب سايت حقهم، أو حتى تتصل تسألهم من وين ممكن أجيب
معلومات عن الشركة ما فيها أي حاجة
شيل معاك فولدر فيهو السي في ونسخ من الشهادات وأي حاجة عملتها في حياتك ، أول ما تخش أديها ليهم قول دا البورتفوليو
حقي ممكن تطلعوا عليهو
لما يسألوا في النهاية هل في أي أسئلة أخرى أنا قلت : ممكن تصف لي اليوم الروتيني بيكون شكلو كيف؟
أو هل في فرص تدريب قاعدة توفرها المؤسسة
نقطة الضعف،أنا كان قلت إني انقطعت عن الشغل ل4 سنوات عشان اسرتي، لكن افتكر دا بالعكس حيزيدني حماسة للوظيفة
توجد دراسات كتيرة بتؤكد إنو الأمهات الراجعات للشغل بيكونوا حريصات على اثبات روحهم واثبات جدارتهم (ما عارفة جبتها من
وين لول)
المهم أنا جغمست كتير في المعاينة لكن ولا مرة اتخليت عن ابتسامتي
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
تسلمى يا اميرة و بالتوفيق. لو بتفتشي فى شغل الايام دى اهم حاجه الCover letter .احنا بنفتح وظيفة واحده و بتجينا حوالى 500 او 600 سيرة ذاتية. و عشان ما نقضي عمرنا كلو فى قراية الورق ده, من قولة تيت بنرمى اى واحده ما معاها Cover letter. بالجد و الله. اهتمى بيه و اكتبيه بصورة كويسه.
الحاجه المهمة التانية اكتبى كم نسخة من السيرة الذاتية. يعنى لما تقدمى لوظيفة معينة اقرى عاوزين شنو و افهمه كويس. اعيدى كتابة السيرة الذاتية باستخدام نفس اللغة المستعملة فى الاعلان عن الوظيفة. ما قلنا تكذبي. لكن كلنا عارفين ان ممكن تكتبى نفس الشغل العملتيه فى الوظيفة السابقة بكم طريقة. و استخدام نفس الكلمات بيساعد الكومبيوتر انه يختارك من ضمن مئات (و مرات الالف) للوظيفة او على الاقل فى Short list .
انا حقيقي فى حياتى عملت انترفيو واحد بس و اتعينت فى شغلى ده *. لكن فى الشركة دى لما يجوا يعينو زول الانترفيو بيكون من 8 صباحا لحدى 5 مساء. بتلاقى زول جديد كل نص ساعة او 45 دقيقة. و بتمشي غداء من 3 او 4 مختلفين من الناس اللى لاقيتهم. و الفكرة انك لو كنت بتمثل انك زول روحك طويلة و صبور و متعاون اكيد بعد 8 او 9 ساعات (مع التعب و الارهاق ) ح تجيب اخرك. الطريقة دى انا ما سمعت بيها فى اى مكان تانى غير شركتنا دى!!.
و على كده انا حاسبه روحى عملتا 12 انترفيو عشان اشتغل مع الناس ديل.
و كنت فى الجانب السائل من الطربيزة كتير جدا...احتمال من اول شهر لى فى الشركة...و ما عشان انا مدير كبير او اى حاجه ** لكن عشان الزول الجديد ده يتكلم ويلاقى ناس من مختلف المستويات و نشوفه بيتعامل معاهم كيف. يعنى ممكن انا اللى عندى 7 سنوات خبرة اعمل انترفيو لزول عندو 30 سنة خبرة و امشي فى الاجتماع نهاية اليوم و اقول ما عاوزنه...ما بينفع معانا....شكله (مثلا) اخلاقه ضيقة.
____________________________________
*فى السودان عملت ذى مليون انترفيو كده...و ما فى زول هببنى غير ناس هجليج للبترول بعد ما اشتغلت عندهم متدربة لمدة 6 شهور (ملح) و ههددتهم فى نهايتها انى ماشه اقعد فى البيت لو ما دونى قروش
**عشان متولى صاحب النصري ما يقول عاوزه اطلع بيكم الجو
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: smart_ana2001)
|
و عليكم السلام أستاذ جعفر و أسأل الله أن يفتح لك من أبواب الرزق الحلال فتحا يليق بغناه و فضله عاجلا. زي ما قالت الأخت صفية فعلا ما يذكر هنا مجرد مداخل لكن لا بد من إعداد جيد. إذا كانت الجهة التي ستدخل إنترفيو معها تتبع ما يعرف بالإنترفيو السلوكي (Behavioral Interview) فكل الأسئلة مهما تعددت صور طرحها تهدف لتحديد رد فعلك لما يواجهك في العمل من خلال سلوكك مع المواقف السابقة. يعني لما يقولوا ليك أحكي عن موقف صعب واجهك في حياتك العملية لازم لمن تحكي الموقف دا تركز على صعوبة الموقف و كيف تعاملت معاه بنجاح و خت مليون خط تحت بنجاح دي. و عشان تقدر تجاوب على أسئلة زي دي لازم تكون مجهز القصة و طريقة روايتها و إلا حتكون في موقف صعب. و زي ما قالت سمارت الواحد صاح ما يكذب لكن لا بأس بالكثير و الكثير جدا من التجمل... زي قصة الراجل المشى لكاتب العرضحالات و حكى ليه مشكلته لمن قرا الكلام الكتبه الراجل قعد يبكي الراجل قال ليه مالك؟ قال ليه والله أصلي ما كنت عارف نفسي مظلوم قدر دا. مرات الموضوع ما بكون في القصة لكن كيف تتحكي و نحن كسودانيين موضوع الاختصار و التبسيط دا مرات بضرنا. في شغلي الهسع دا جاري طوالي واحد كندي. مرة مسئول جا ماري و من ناحية ظرافة و كدا بقوم بسأل الواحد أها و إنت بتعمل شنو؟ أنا لو سألوني ممكن ألخص شغلنا كله في دقيقة ولا دقيقتين. جاري دا قعد يتكلم لمن أنا ذاتي قربت أبكي و أقول بالله نحن بنعمل الشغل دا كله؟ طبعا الفرق الأساسي نحن الواحد إمكن أول مرة يعمل ليه بريزنتيشن كان لمشروع التخرج و هم أول بريزينتيشن يعملوه في الروضة و على هذا فقس.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
يا سلام يا سلام ياسلام
والله مداخلات مبالغة عديل
ولازم اجيها راجع ...مداخلة مداخلة..
حرف حرف
لكن يا اسمارت الجملة دى ضحكتنى لمن شرقت
| Quote: **عشان متولى صاحب النصري ما يقول عاوزه اطلع بيكم الجو |
كبداية...
فى الوظيفة البعمل فيها الان سالنى فريق الانترفيو لماذا تريد العمل فى شركتنا ABC ؟
طبعا السبب الحقيقى هو انو قروشهم كتيرة وشغلهم ساهل ومعاشهم مكرب
لو قلت ليهم الاسباب دى معناها kiss the job opportunity goodbye
الاجابة كانت
It is an honour to work for ABC
(يشرفنى ان افعل فى شركتكم)
واضفت من زمان وانا احلم بالعمل فى شركتكم الرائدة
وقد سمعت ان العاملين فيها يتمتعو بمناخ لصحى جيد ...واظن اننى ساكون
اضافة مفيدة لفريق العاملين...
حرم ناس الانترفيو امنو عديل بالاجابة الرهيبة ...قربو يقول لى امشى حسى لشئون العاملين
وامل فورمات التعييين وابدا شغل بعد 20 دقيقة...
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
الناس الفي الغرب ركزو على كلام اسمارت وابتسامة ميسون ما بتجيكم عوجة!
رغم انو هنا موضوع الابتسامة بين الـ
Worker والـ Client
بتكون ابتسامة عدي من وشك وابتسامة صفراء عديل
مافيها اي طعم او رائحة ... خاصة لمن تفتح الخشم وتوريك السنون وتقول ليك
Can I help you
تحس بي المساخة وطعم السعف جوه حلقك !!
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: خالد العبيد)
|
اما في الدول العربية وعندي تجربة هناك
السودانيين مؤهلون جدا لكنهم لايعرفوا ان يسوقوا انفسهم
ممكن جدا سوداني عندو ماستر وشاطر
يزحلقو لبناني او مصري او سوري ...
مش بي شهادات او مؤهلات ... لا ابدا
بس بي لبسة جميلة كاملة .. بدلة وكرافتة ودبوس وحذاء لامع وتسريحة متقنة
ومفتاح السيارة في اليد يتهوزز قدام عين الكفيل
اما السوداني المؤهل العندو ماستر وخبرة ... وما تزعلو
ممكن جدا يلفح منطلون وقميص من الشماعة
ويخش في اقرب شبط حتى لو بتاع صاحبو
ويسقط زي الترتيب في الانترفيو من اول نظرة !!
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: خالد العبيد)
|
شكـرا يا النصرى على هـذا البوست المهم جدا.
حسب تجربتى الشخصيـة فإن فموظف المقابلة لا تهمـه الأجوبة بقدر ما يهمه الatitude بتاع المقدم للوظيفة
وطريقة ردوده.. لأنه على علم مسبق بمؤهلاته فى الريزومى التى اطلع عليها قبل المقابلة.
أحكى معاينتين مررت بهما، وأخرى كنت انا السائل:
الأولى، وكنت حديث المجيئ الى امريكا.. أقل من ثلاثة اشهـر.. وكنت أسكن فى بروكلين، أقرأ عدد السبت من
جريدة ديلى نيوز، وفى صفحـة إعلانات مبوبة Classifieds وجدت وظيفـة مصمم نظم رقميـة digital designer والشروط
كانت وكأنما فصلت على.. فقررت الإتصال بهم، ووجدت سخرية ما بعدها سخرية من الأخوة السودانيين الذين
تعرفت عليهم، وقالوا (ما تضيع زمنك مافى زول لقى ليهو وظيفة من الجرايد).. المهم اتصلت بهم، وعملت مواعيد
للمقابلة فى يوم الخميس (مثلا... لا اذكر اليوم بالضبط)..
ذهبت للمقابلة يوم الثلاثاء (يومين قبل المواعيد) بعد أن كتبت السيرة الذاتية بقلم بك على ورقة فلسكاب
وطبقتها مرتين وختيتها فى الجيب.. مسؤولة الإستقبال كارول (كارولين) قدر ما فتشت اسمى فى قائمة الثلاثاء
ما لقته.. بعد فترة سألتنى متأكد مواعيدك الليلة؟ فقلت لها لا، فى الحقيقة مواعيدى الخميس، لكن مافى
مشكلة ممكن أعمل المقابلة الليلة.. ما عرفت تستغرب واللا تضحك ولكن المؤكد أنها صعقت للإجابة وسط حيرتى
من سكاتها لعدة ثوانى وهى تنظر الى.. وهى فى دهشتها خرج أحد المديرين من الشركة وسال ماذا يجرى
وعندما سمع منها القصـة نظر الى ثم قال.. ممكن أشوف السيرة الذاتية؟ فأخرجتها من جيبى وسلمتها له
لم يقرأها وإنما قلبها فى يده أولا، ثم قرأ قليلا.. وسألنى هل هـذه هى السيرة الذاتية؟ فأكدت له ذلك،
مسك الورقة وسلمها لكارول، ثم طلب منى اتبعه للمعاينة.. هـذا الرجل صرف النظر عن إجراءات المعاينة التقليدية
وأعتقد انه تأكد من عدم جدواها فى حالتى هـذه، ولكنه أخذنى الى المعمل مباشـرة، وأشـار الى الة ميكانيكية
بالكامل مصممة منذ الخمسينات.. كلها تروس وسولينويدات...الخ.. سالنى هل تستطيع إعادة تصميم هـذه الالة بنفس
الوظائف والمظهر الخارجى لتكون الكترونية بتحكم المعالج الصغير؟ تفحصت الالة ثم أجبته فورا بنعم، وبدأت العمل
فى اليوم الثانى.
يقينى ان هذا لا يمكن ان يحدث فى خارج الولايات المتحدة.. فهؤلاء القوم يهتمون ب (عضـم) الأمور أكثر من شكلها.
الإنترفيو الثانى كان مع ناس IBM حيث عملت فى وظيفـة مهندس ضبط جودة QA engineer وكان الإنترفيو مع رئيس
الفريق الذى كان فى النمسا وعمل الإنترفيو من هناك بالتلفون.. المقابلة لم تستغرق أكثر من عشر دقائق، بعدها
أتصلت بى شركة التوظيف أنه تم قبولى وعلى السفـر الى فلوريدا.. كانت الإسئلة محددة عن تكنولوجيا معينة
وكلها كانت اسئلة فنية بحتة.. لا نقطة ضعف لا نقطة قوة..
القاعدة الذهبية فى الإنترفيو:
تأكد أنك متمكن من متطلبات الوظيفة المعلن عنها، ثم قل ما شئت. أهم شئ أن تكون أنت حين ترد على الأسئلة.
.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Abureesh)
|
بوست جميل..
بالنسبة لسؤال الاخت اميرة السيد عن نقاط الضعف الاجابة الاكثر قبولا هي انك تكوني صادقة وتقولي نقاط ضعفك الحقيقية طبعا ما المفروض تكون عائق لاداء الوظيفة يعني ما ممكن تقولي
انك لا تجدين اليبع في وظيفة مبيعات لكن مثلا من نقاط الضعف الحقيقية والمقبولة هي الـ time management -- لكن ذكر نقاط ضعف من قبل workaholic اصبحت من الاخطاء الشايعة
لانها استعملت وانهكت وصارت غير مقبولة (حتى لو كانت حقيقية) كما انها تعطي الـ interviewer احساس انك تحاول مداراة نقاط ضعفك الحقيقية..
اتفق مع اسمارت انا ان الاسئلة مهمة جدا لانها تعكس رغبة بالعمل المقدم له...
المعروف ان انجح الانترفيهات لا تكشف سوى عن 70 % من شخصية المتقدم لذا اتفق مع ابو الريش بشدة ان عكس good attitude هي المهمة الاولي لاي متقدم لعمل..
كما ان الــ follow up مع الــ interviewer يعكس رغبة اكيدة للعمل حتى بعد معرفة متطلبات العمل من المقابلة ..
الــ Behavioral interviewing التى تحدث عنها اخونا عوض بالاضافة لما يعرف بــ targeted selection هي احدث السبل المتعبة من قبل الشركات الكبرى لاختيار
موظفيها - الفرق هو ان هذه الطرق لا تعتمد على الاسئلة المباشرة مثل نقاط ضعفك الخ بل تتطلب من المتقدم ذكر مواقف بعينها مرت به في مختلف حالات العمل وكيف كانت
ردت فعله فيها وقد يكون بها نظام تقييم رقمي لردود الافعال ومن ثم التقييم النهائي..
اي شخص متقدم لوظفية المفروض يحاول ان يثقف نفسه عن متطلبات الوظيفة ومعلومات اضافية عن الشركة ووضعها - تخصصها -- تفردها -- اماكن تواجدها -- اهدافها المعلنة الخ
وبالتوفيق..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
Quote: بفتكر انو لو تابع الطلب بتاعه زى البشحد المخدم ..
كرامته ما بتسمح ليهو انو يدنى نفسه...
مستحيل يمشى لمكتب الشركة التى قدم فيها طلبه ويطالب بمقابلة المسئول عن التعيين..
بعض الوظائف (المتوسطة و الدنيا) تحتاج احيانا لقرقرة اذن المدير
حتى يامن بانو الزول فعلا داير الوظيفة وانه ميت فيها موت ..
|
الاخ/ النصري الامين
سلام
التواضع..
المسكنة..
البساطة..
صفات من تركيبة السوداني وبتكون ملازمة ليهو في الاماكن التي يفترض ان يقلل منها خالص..
وما بالضرورة بفهم انه مدعي!!
لكن في التقديم للوظيفة فعلا نفتقد الجرأة والشوو للمقدرات الحقيقية..
والأسوأ هو التعامل الحمقي برد الفعل لشئ بسيط يمكن يكون جزء من اختبارات صاحب العمل..
البوست راقي وبيتطرق لمشكلات حقيقية عندنا كسودانيين الا ما ندر..
تحياتي
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Abdlaziz Eisa)
|
لا حولا ,,,
والله البوست اتحول لكرنفال
الله اعلم اقدر ارد على كل زول...
سبب البوست ..
قبل فترة كنت احتاج لمساعدة فى بعض الاعمال ...اتصل بى احد الشباب
مبدى رغبته فى العمل معى.... اخبرته ان الشغل بطئ هذه الايام لكن خلال اسبوع
حيفتح ...قال لى انا جاهز اى وقت ...
فعلا بعد اسبوع احتجت له لكن عدم متابعته للموضوع وعدم اتصاله لمتابعة الامر
ادانى احساس انه غير جاد وغير متحمس وفعلا صرفت عنه النظر ,,,ووجدت بدائل اخرى.....
لو كان هذا الشخص من جنسية تانية لكان التصرف مختلف ...
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Abdlaziz Eisa)
|
اختنا العزيزة شبكة سلامات..
Quote:
في المعاينات دائما في سؤال عن الراتب المتوقع
|
الاجابة على هذا السؤال تعتمد على عدة اشياء
اذا كان لك المام بنوعية الرواتب المدفوعة في الشركة يجب ان لا تتخوفي من طلب راتب في الحدود العليا لنوعية الوظيفة..
ثانيا بناء خبرتك وراتبك في عمك القديم بالذات اذا هو معروف للــinterviewer يجب ان يكون الراتب المطلوب اعلى ..
النقطة المهمة هنا انك اذا كنت الشخص المناسب للعمل لن يتم استبعادك من الوظيفة بناءا على طلبك لراتب عالي حتى ولو كان خارج
حدود الرواتب المدفوعة لهذه الوظيفة ولكن الشركة ستقدم لك counter offer باعلى راتب مسموح به للوظيفة الشاغرة
ومن ثم تكون الكرة في ملعبك بالقبول والرفض..
تحياتي ..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
سلام يا شبكة... دا من الأسئلة الحساسة جدا و الإجابة الخاطئة قد تؤدي إلى واحد من نتيجتين كل منهما أسوأ من الأخرى إما أن تفقدي الوظيفة أو تقيمي نفسك تقييما منخفضا و تفقدي شهريا مبلغا كان المخدم على استعداد لدفعه لك. أقدم لك اجتهادي هنا و أرجو أن يصوبني المشاركون و يقدموا إجابات أفضل. هناك إجابة مختصرة لكنها قد تجعل السائل يحاصرك و يصر على إجابة محددة و هي (كم تعتقد أن شخصا بمؤهلاتي و خبرتي يستحق؟). الإجابة الأفضل تأتي بعمل بحث جيد عن متوسط المرتبات للوظيفة المقدم لها و مرتبات الجهة المخدمة و مراعاة مرتبك الحالي و المرتب الذي تطمحين إليه. إذا استطعت بهذا البحث الوصول إلى رقم معقول من الممكن أن تكون إجابتك على النحو التالي (متوسط المرتبات لهذه الوظيفة في المنطقة يتراوح بين عشرة و خمسة عشر ألف ريال مثلا و بالنظر إلى مؤهلاتي و خبرتي بالإضافة إلى حرصي على نيل فرصة العمل في شركتكم التي أعتقد أنها توفر لي مزايا أخرى بجانب الراتب أعتقد أن ثلاثة عشر ألف تشكل بداية مناسبة و أنا على ثقة بأنني سأثبت في فترة قصيرة مقدرتي على أداء واجبات الوظيفة على أكمل وجه و أكون مستحقة لنيل الحد الأعلى للمرتب المناسب للوظيفة).
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
الاخ العوض
| Quote: خبرتي بالإضافة إلى حرصي على نيل فرصة العمل في شركتكم التي أعتقد أنها توفر لي مزايا أخرى بجانب الراتب أعتقد أن ثلاثة عشر ألف تشكل بداية مناسبة و أنا على ثقة بأنني سأثبت في فترة قصيرة مقدرتي على أداء واجبات الوظيفة على أكمل وجه و أكون مستحقة لنيل الحد الأعلى للمرتب المناسب للوظيفة). |
يعني تكون الاجابة دبلوماسية قدر الامكان
شاكرة لك المساعدة في حل هذا اللغز
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
سلام لصاحب البوست والمشاركين
في نقطة مهمة انه عندنا انه الشخص لما يدخل المعاينة بيكون داخل مضطرب وخايف من فكرة المعاينة وانه حيقبلوه أم لأ وتركيزه كلو بيكون في الحتة دي اكتر من تركيزه انه يؤدي بطريقة جيدة تعكس قدراته بشكل كويس
وبعد داك الكاتبه ربنا بيحصل فبتكوت في ربكة وعيون ما مركزة وبلع ريق ونفس قايم وتكرار للسؤال والاجابة
ما عارفة لكن عموما في ثقافة السودانيين والعالم العربي بشكل عام انه المعاينة معناها فيلم رعب قصير ترعب فيهو المقدم للوظيفة وتوتر اعصابه
يمكن جزء من المعاينة يكون مطلوب معرفة انه كيف الواحد حيتصرف او يقدر يسيطر على اعصابه والموقف ككل
كما قال الاخ ابو الريش المهم هو ال attitude للشخص المقدم وما مهم فحوى الاجابة ، فمهم القدرة على الكلام بشكل واضح وواثق وعيون مركزة وثبات دي بتدي صورة جيدة للاجابة
الثقة والثبات مهمين وللاسف شوية كسودانيين المسالة دي ما عندنا كتير
في نقطة تانية مهمة المظهر العام ، السودانيين معظمهم المسالة دي ما في حسابهم يعني ممكن جدا يجي المعاينة باي مظهر والمسالة دي بتكون خصم على مؤهلاته حتى لو جايب شهادات من وكالة ناسا
عشان كدا بيتفوق علينا اللبنانيين مثلا او الجنسيات التانية البتهتم بمظهرهاجدا ، يعني ممكن الواحد يكون ما عندو اي مؤهل لكن بطريقة الكلام الواثق والمظهر يدي احساس انه زول نابغة
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
استاذي حسن
اشكرك على سرعة الاجابة
لكن
Quote: النقطة المهمة هنا انك اذا كنت الشخص المناسب للعمل لن يتم استبعادك من الوظيفة بناءا على طلبك لراتب عالي حتى ولو كان خارج
حدود الرواتب المدفوعة لهذه الوظيفة ولكن الشركة ستقدم لك counter offer باعلى راتب مسموح به للوظيفة الشاغرة
|
ما بضمن ابدا ان لا يتم استبعادي نظرا لطلبي لراتب اعلى من المفروض للوظيفة المعنية
دي حاجة
غير كدا هنا نظرا لوجود اجراءات من فحص طبي وبعده حسن السير والسلوك والاجراءات الامنية والتي استغرقت 3 اشهر بالنسبة لي حتى بعدها
تم عرض Offer
وهنا الامور ما بتكون بمساواة شديدة يعني انا مثلا كان في مصري في الموارد البشرية وهو المتابع لاجراءات تعييني، حاول انو يعطيني اقل اوفر للوظيفة ورفضت التوقيع الا انه تم الضغط عليه من الادارة المفروض اني حاشتغل فيها حتى وافق على الاوفر الاعلى (مع العلم انه لكل وظيفة في مؤسستنا تلاتة مستويات للراتب)
يعني دائما هناك مصري ضد سوداني
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: محمد أبوالعزائم أبوالريش)
|
سلام يا شبكة
Quote:
ما بضمن ابدا ان لا يتم استبعادي نظرا لطلبي لراتب اعلى من المفروض للوظيفة المعنية
دي حاجة
|
بالنسبة للشركات المحترمة ايجاد الموظف المناسب او perfect fit لاي وظيفة هو غاية ما يسعى له اصحاب العمل -
في سبيل تعيّن هذا الموظف بهون على صاحب العمل دفع راتب في الحدود العليا للوظفية
بدل شخص بمؤهلات اقل وراتب اقل وذلك لعدة اسباب :
بدفع راتب عالي منافس تضمن الشركة الاحتفاظ بالشخص المناسب لاطول فترة ممكنة ..
استقرار العمل والخدمات والحفاظ على الزبائن وضمان الانتاج الخ..
لكل وظيفة حد اعلى ومتوسط وادنى ستجد ان العديد من شاغلي نفس هذه الوظيفة لهم رواتب مختلفة وهم غالبا بنفس الكفاءة
الفرق الوحيد بينهم ان بعضهم طلب راتب اعلى عند التعين او ساوم بذكاء ونحج في الحصول على راتب اعلى من زملاءه في نفس
الوظفية وهكذا..
اما الشركات التى تحاول استغلال حوجة المتقدمين للعمل وتدفع لهم رواتب اقل من سعر السوق فهذه شركات تغامر
باهم مقومات نجاحها وهي القوة البشرية ودي اخير تختيها..
وطبعا اذا صاحب القرار يميل لجنسية معينة والمقياس ليس الكفاءة فهنا تختلف الموازين وما بكون في وصفة محددة لانك حتى لو طلبتي راتب اقل ممكن يقول
انك غير مؤهلة وانا هناك سر لقبولك بهذا الراتب الضيف - كلامي كان عن شركات ذات مصداقية تبحث عن كفاءات بغض النظر عن الاشياء الاخرى..
سلام
_______________________
Quote:
(((متوسط المرتبات لهذه الوظيفة في المنطقة يتراوح بين عشرة و خمسة عشر ألف ريال مثلا و بالنظر إلى مؤهلاتي و خبرتي بالإضافة إلى حرصي على نيل فرصة العمل في شركتكم التي أعتقد أنها توفر لي مزايا أخرى بجانب الراتب أعتقد أن ثلاثة عشر ألف تشكل بداية مناسبة و أنا على ثقة بأنني سأثبت في فترة قصيرة مقدرتي على أداء واجبات الوظيفة على أكمل وجه و أكون مستحقة لنيل الحد الأعلى للمرتب المناسب للوظيفة).))
|
اشهد ان هذه اجابة نموذجية..
والله يا عوض ما شاء الله عليك معلوماتك في غاية الدقة والعقلانية والمهنية..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: ابوعبيدة حسن محمد)
|
الهندام والمظهر العام من أهم الاشياء التي يراها المسؤول من المقابلة..
نوع الوظيفة المتقدم لها يقتضي الالمام ببعض فنيات اللعبة..
فالتدريس والعلاقات العامة وخدمات الجمهور يقتضي الحضور الذهني, طولة البال والالمام جيدا بالتخصص..
فصاحب العمل ربما يستخدم جمل اختبارية لا تظهر كجزء من المعاينة..
صديق لي ذهب لمعاينة تدريس جلس وخلف رجله أمام الرجل.. فاذا بالمسؤول يبادره: نزل رجلك.. ده عدم احترام ولا ايه؟ و و
صاحبنا زعل وطلع بلا رجعة!! وفقد الوظيفة..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Abdlaziz Eisa)
|
سنة 1988 تقدمت لوظيفة محاسب فى الهلال الاحمر السودانى(كانت منظمة محترمة وقتها)
ذهبت للمعاينة وكان ادائئ ممتاز جدا جدا وقد شعرت ان الوظيفة مضمونة
فى نهاية المقابلة قالو لى ان هناك متقدمين اخرين وسنتصل بك حال الفراغ من
مقابلتهم جميعا ..
قلت ليهم خير ..
لانو طبعا انا نفسى عزيزة جدا اتجنبت اتصل بيهم تانى ...كنت مفتكر انو اتصالى
بيهم معناتو انى زول رخيص و Desperate واحتمال افقد الوظيفة لو اتصلت بيهم ..
وقعدت منتظر ..
ومنتظر ..
منتظر ..
ومنتظر ....
اسبوع اتنين ..تلاته ..شهر
فى الاخر قنعت وصرفت النظر ...
وقدمت لشركة اخرى واشتغلت معاهو .....
بعد شهور قريب لى كان يعمل فى الهلال الاحمر قابلنى مرة بالصدفة
وقال لى انو ناس الهلال الاحمر اختاروك للوظيفة وما عرفو يتصلو بيك
والله العظيم لحسى خشمى ملح من الحادثة دى ......
واظن انها غيرت مسرى حياتى بالكامل ...
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
علي ذكر ( قرقرة الاضان ) وسك الوظيفه احكي ليكم الطرفه دي
واحد مشي يسأل عن وظيفة في احدي الشركات .. اخبروه انه مافي فرصه شاغره
بقي كل كم يوم يجيهم .. اها الجديد شنو ؟ لسه مافي فرصه ؟ يقولوا ليهو مافي
واستمر بالحال دا لفتره طويله جدا .. مره جاهم وسألهم السؤال المعتاد .. اها الجديد شنو ؟
قال ليهو مافي جديد والمدير ذاتو مات الله يرحمو .. قال ليهم بس دي فرصه كويسه والله يرحم المدير
قال ليهو نعينك مدير يعني ؟ قال ليهم لا .. بس انتوا ( اتارروا ) يعني نائب المدير يبقي المدير والبعدو يبقي نائب
وبالطريقه دي كلم تتارروا فوق وانا اتعين محل آخر موظف تحت بعد يترقي هههههههههه
بوست مفيد .. تحياتي للجميع
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: نوفل عبد الرحيم حسن)
|
سلامات اخونا حسن يوتوبيا و كل سنة و انت طيب
Quote: اشهد ان هذه اجابة نموذجية..
والله يا عوض ما شاء الله عليك معلوماتك في غاية الدقة والعقلانية والمهنية.. |
اوافق بشدة....ما شاء الله على العوض.
خاصة ان الاجابة دى مناسبة لكل سوق.
Quote: بالنسبة للشركات المحترمة ايجاد الموظف المناسب او perfect fit لاي وظيفة هو غاية ما يسعى له اصحاب العمل -
في سبيل تعيّن هذا الموظف بهون على صاحب العمل دفع راتب في الحدود العليا للوظفية |
اتفق معاك تماما. لكن (معليش مقدما على النقة الكتيرة فى موضوع السوق الايام دى) لكن وضع السوق الان صعب جدا. و ناس كتير ممكن يكونوا perfect fit مثلى و مقدمين للوظيفة. فى السوق بتاعتنا انا اشتغلت قبل 7 سنوات ....هل تصدق انه قبل اسبوع اعطوا زول اتعين فى نفص وظيقتى الزمان ديل نفس الماهية اللى ادونى ليها قبل 7 سنوات؟؟؟؟ و كمان بفوائد خدمة اقل!!! و السبب ان فى ناس (فى الوضع الاقتصادى الحالى) ممكن ترضى باى ماهية فى سبيل الحصول على وظيفة و الاستقرار المادى
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: smart_ana2001)
|
الأخ العزيز حسين شكرا لمجاملتك الرقيقة و يبدو أن لك خبرة قيمة في هذا المجال أرجو أن تفيدنا بها. بالجد نحن كسودانيين محتاجين لدعم كبير في هذا المجال و نحتاج فيه لتغيير بعض المفاهيم. من الحاجات البرضه نحن بنشوفها عيب الكلام في القروش و المطالبة بما نظن أننا نستحقه. احتمال في الغرب دي ما تكون مشكلة كبيرة و زي ما إنت قلت برضه في التعامل مع الشركات المحترمة قد ما تكون مشكلة كبيرة لكن اتخيل لي في كل الأحوال الناس البنتعامل معاهم ما حيقموا الواحد أكتر من تقييمه لنفسه.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
عارف يا النصري الموضوع الحصل ليك مع ناس الهلال الأحمر دا حار جدا و درس الواحد يستفيد منه. لكن أنا عندي نظرية في الحاجت دي... إذا كنت عملت كل البتقدر عليه و ما شاعر في تقصير من جانبك و حصلت حاجة زي دي فثق تماما إنه ربنا صرف الموضوع دا لخير. أحيانا بتشوف الخير دا قدامك و أحيانا ما بتشوفه لكن خلي عندك يقين إنه لخير إن شاء الله. عندي قصة حأرجع أحكيها إن شاء الله حصلت لي في السنوات الأخيرة دي.
معليش يا جماعة شعرت إني بريتكم لكن الموضوع زي ما بقولوا مس العصب الحي.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
السلام عليكم جميعا والتحية لصاحب البوست
اسمحوا لى بان ادلى بدلوى بما لدى من خبرة واسعة فى هذا المجال وفى الحقيقة هذا العمل جزء كبير من عملى منذ اكثر من ثمان عشر عاماعملت واعمل فيه كمدير للموارد البشرية فى كبريات الشركات العالمية والاقليمية .
صراحة ما ادلى به المتداخلون والمتداخلات من اراء وتساؤلات جد ثرة ومفيدة ممزوجة بتجارب حقيقية وكلها مفيدة جدا مما يجعل من هذا البوست مرجعا للبعض . وما اود ان اضيفه هنا كالتالى :
1- بالنسبة لنقطة ضعف السودانيين النابع من الثقافة والبيئة السودانية ليس بغريب اذ ان لدى الجنسيات الاخرى نقاط ضعف لا يكتشفها الا من يجرون الكثير من المعاينات لمختلف الجنسيات ولكن من المهم ان ندرك اننا كسودانيين يمكننا ان نتغلب على هذه النقاط ببذل المجهود وندرب انفسنا على تلافيه وهنا اريد ان اشجع ممن يبحثون عن الوظائف من السودانيين ان يخوضوا الكثير من المعاينات ولا يياسوا من عدم قبولهم لان مجرد خوض المعاينات تقوى هذه النقاط الضعيفة اذا وجدت.
2-لابد من الانتباه الى نوع المعاينة او الاخذ فى الحسبان الانواع المتعددة من اشكال المعاينات اذ ان المعاينة التى تنعقد لمندوب المبيعات ليست هى نفسها للمدير المالى ...وهكذا نجد ان هناك معاينات نمطية من نوع تحدث عن نفسك او اظهر عيوبك او نقاط قوتك , بالتاكيد يمكن الاستفادة من نتائج مثل هذه المعاينات ولكن من السهل المرور فيها من قبل المتقدم للوظيفة ولا يمكننا الاكتفاء بمثل هذه المعاينات فى كل الاحوال فهناك الاختبارات للسلوك عبر اسئلة محددة كما ذكر بعض الاخوان .
3- لقد ذكر احد المتداخلين وليعذرنى اذا لم اذكر اسمه ( معليش نسيت) ان تكون نفسك فى كل مراحل الانترفيو وان تكون نحو البوينت وان تاخذ كل الاسئلة الموجهة اليك فى سياقها الصحيح ولا تفسرها بانها شخصى وهنا سوف يكشفك المحاور مما يضعف فرصة قبولك وخاصة اذا كان المنصب المطلوب يتطلب العمل فيه مع الجمهور او كا الموظفين بالشركة.
4- انا من اللذين يسالون عن نقاط الضعف ولكن بطريقة اخرى مثلا اسال الانترفييووووى عن اسم مديره المباشر وعليه اساله او اسالها اذا طلبنا من مديرك المباشر ان ينتقدك بشكل سلبى ..ماذا سيقول ؟
طبعا فى ناس عندها نقاط ضعف ولاتدرى بان لديهم نقاط ضعف
وفى ناس عندها نقاط ضعف وهم يدرون بذلك ولكنهم لا يسعون جهدا لتقويتها
وفى ناس عندها نقاط ضعف وتدرى بذلك ويعملون على تقويتها
لا اود الطالة ولكن لابد من عودة
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حامد محمد حامد)
|
برضو فى عام 1988 عملت معاينة لوظيفة كاربة فى منظمة رعاية الطفل الامريكية
save the childen fun
فى شارع كم كده فى حى العمارات......
دولارات تقيلة ..
كنت خريج جديد وايضا كنت يادوب حصلت على دبلوم لنج فى الادارة من جامعة ايرلندية
المعاينة كانت مع رئيس الحسابات السودانى وشخص امريكى ....
المعاينة بالانجليزى ..
وانا زى الصاروخ ..قمة التالق ...اجوبة فى السلك
تمكن ومتابعة وثقة بالنفس مبالغ فيها ...
السودانى يسال والامريكى يراقب ...
المعاينة فى نهائتها وانا لسه طاير بين طيات السحاب..
فجاة سالونى سؤال غريب جدا لخبت كل شئ..
ايه رائك فى تطبيق الشريعة فى السودان؟
طوالى زى 50% من تركيزى راح يودى ويجيب ..
هو انا مقدم لوظيفة محاسب ولا CIA
ال 50% الفضلت من ذهنى بدات تكابس القى لى اجابة معقولة من السؤال الورطة ده ....
بديت اقول ان البلد ما مستعدة لتطبيق الشريعة ..والقوانين ظالمة..
لكن نحن مسلمين وقوانينا بستمد من روح الاسلام..
والشنو شنو (ياخ انا خريج محاسبة مش قانون)
غايتو طربقت وكوجنت وعرقت
وطلعت من المعاينة نفسياتى فى الواطة...
تفتكرو اتصل بى؟
عييك ..
لليلة ..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
منو فيكم دخل mock interview (معاينة افتراضية او تطبيقية او تمثيلية)
انا دخلت 2 منهم وفى كل مرة بطلع بفائدة وملاحظات مهمة ....لغاية ما وصلت مرحلة بقيت اخش
اى انترفيو وبكون عارف بالظبط البقولو والبعملو ...
mock interview هو انترفيو يفترض فيه ان يكون مطابق للانترفيو الحقيقى لدرجة كبيرة..
البعمل انترفيو واحد من المتخصصين فى شئون العاملين.....
اذا فى واحد جاهز ممكن نعمل معاهو معاينات mock interview على الهواء (على شرط الردود تكون خلال ثوان من كتابة الاسئلة)
شكرا ياسر
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
بوست هام ومفيد وفيه تبادل معرفة وخبرات ثرة
أنا جلست على جانبى الأنترفيو أما مقدماُ لعمل أو معايناً لمقدم لعمل
معظم المرات التى تقدمت فيها لعمل كنت أعتبر الإنترفيو مثل الإمتحان
أستعد له واراجع معلوماتى، وأفترض أن دورى ينحصر فى الإجابات الصحيحة
وإظهار معرفتى وشطارتى للحصول على الوظيفة .. إختلف الأمر عنما تقدمت
للأنترفيو مع الشركة الحالية، رغم أن الوظيفة نالت إهتمامى إلا أننى
دخلت الأنترفيو بمفهوم أنه أنترفيو متبادل، كنت حريصاً ان أتعرف ما أمكن
وأقيم المدراء فى العمل .. خبراتهم ومحاولاً أن أستشف هل يمكننى التعامل
معهم أم لا .. لأتخذ قرارى بالإنضمام للعمل معهم. المدير والمدير العام
مروا معاينتى فقررت قبول عرض العمل. تحققت من نظرتى فيهم كانت سليمة
بعد أن عملت معهم ولكن ما لم أعمل حسابه أن الشركة بعد ستة أشهر قامت
بتعديل فى الهيكل الوظيفى، وكان ضحيته المدير والمدير العام الذين عاينتهم ..!!!
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: نادر الفضلى)
|
بخصوص الراتب هو سؤال فى الغالب يسأل إذا كان الأنترفيو مشى تمام وأصبح
هنالك رغبة فى التعيين ... صعوبة الإجابة على كم تطلب مرتباً ليست تعود فقط
لضمان التعيين، ولكن إذا طلبت مبلغ أقل، فقد حددت سعرك، وبعد التعيين فى
الأحوال العادية ستنال زيادات روتينية طفيفة، وأجياناً لا زيادة نسبة للأحوال
الإقتصادية. فالمطالبة براتب قليل سلاح ذو حدين. بعض الخبراء ينصحون بأن تطلب
أقصى راتب متاح للوظيفة بناء على خبراتك ومؤهلاتك، وعندما يقدم عرض هنالك فرصة
لمناقشته.
المعاينة إيضاً قد تكون فيها أحياناً براعة قيادة النقاش لنقاط معرفتك بها قوية
ترمى كلام طعم وتتوقع أن يفتح باب لأسئلة .. وتتفسح
أيضاً من المهم ان تسأل متفهماً طبيعة الوظيفة، وما هو المتوقع منك أدائه
وأن تعلق وتبين بإمكانك عمله، فالمخدم يهمه شخص مؤهلاته وخبراته وإهتمامه
مناسب لشغل الوظيفة المعينة.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: نادر الفضلى)
|
Quote: صعوبة الإجابة على كم تطلب مرتباً ليست تعود فقط
لضمان التعيين، ولكن إذا طلبت مبلغ أقل، فقد حددت سعرك، وبعد التعيين فى
الأحوال العادية ستنال زيادات روتينية طفيفة، وأجياناً لا زيادة نسبة للأحوال
الإقتصادية. فالمطالبة براتب قليل سلاح ذو حدين. بعض الخبراء ينصحون بأن تطلب
أقصى راتب متاح للوظيفة بناء على خبراتك ومؤهلاتك، وعندما يقدم عرض هنالك فرصة
لمناقشته. ] |
دا كلام مظبوط يا نادر..
فانا اذا وجدت شخص مناسب للوظفية وطلب راتب اقل من الراتب المرصود للوظفية المعينة احاول ان ارشده بطريقة مباشرة او غير مباشرة
انه يمكن ان ينال راتب اعلى بقليل من طلبه لنفس السبب الذكرته من ضعف الزيادات السنوية ولانه عندما يستلم الوظفية سيبدا في التململ عندما يعرف ان راتبه اقل من اقرانه
ويبدا في البحث عن بدائل او يبذل مجهود قليل في عمله لعلمه ان راتبه غير موازي لمجهوده هذا من ناحية ومن ناحية اخرى لان الشركة لا تحبذ وجود تفاوت كبير في معدل الرواتب
وما يسببه هذا من inequality اما اذا طلب راتب اعلى من المرصود فمباشرة اقلل من توقعاته واقدم له counter offer باعلى راتب مسموح به للوظيفة
واحدثه عن الـ benefits الاخرى لكي لا يحس انه قدم تنازلات - فانا مهمتي تكمن في التاكد من انه الانسب للوظفية ولكن تسعير مهاراته هذه مهمة مشتركة بيننا..
- يمكن ان اعمل ليهو guidance بسيط لينال راتب معقول لكني لا يمكن ان احدد طموحه..
مسالة طلب الراتب مهمة لانها تعكس مهارات المتقدم للعمل فاذا استطاع ان "يسوق" نفسه بشكل ذكي فهذا هو المطلوب والا كيف سيستطيع تسويق منتجات- او خدمات
الشركة عندما يفشل في تسويق نفسه!!
نجي لحالة الخوف من فقدان الوظيفة لسبب طلب رواتب اعلى من تقييم الوظيفة- في البداية لازم نتفق ان المتقدم لوظيفة عليه بذل مجهود في معرفة الرواتب السارية في حدودها العليا
والمتوسطة ثم الدنيا - ثانيا يجب معرفة ان ملء الشاغر هي حوجة مشتركة بين المتقدم والعارض - ثالثا يجب ان يعرف المتقدم مستوى مهاراته مقابل متطلبات الوظيفة ومن ثم يثمن
هذه المهارات مقابل حدود الراتب العليا والدنيا ويحدد الراتب المرضي له مقابل هذه المقاييس واذا كان واثق من كل هذه المعلومات يجب ان لا يخاف من طلب راتبه المتوقع ويكون
واثق من نفسه (طبعا الكلام دا في الحالات الطبيعة) بعيدا عن العوامل الاخرى من حوجة وندرة الفرص وخلافه..
وبنظرة اخرى نجد ان هذا ما حصل في حالة اختنا شبكة رغم بتاع الـ HR الذي حاول لاسباب لا علاقة لها بمتطلبات الوظفية ان يعطيها راتب اقل فتم الضغط عليه من قبل الادراة
التى ستعمل بها لحوجتهم لمهاراتها ونالت راتبها التى تستحق لكن اذا طلبت راتب اقل فربما كانت تسيير الامور بشكل سلس او ربما حاول بتاع الـ HR مرة اخرى لتنزيل راتبها
وحتى اذا كانت طلبت راتب اعلى من المرصود ( فربما حسب الشركة) نفس الضغط كان ستم من ادارتها لعمل كاونتر افور باعلي راتب مسموح به للوظيفة..
وهكذا..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: الفاتح عبد الله طه)
|
الموضوع مهم شكرا النصرى
مشكلة الاستعداد للمعاينة الاولى تختلف من دولة لاخرى باختلاف الثقافات
عندنا فى الخليج الانطباع الاول الذى يؤخذ مع او ضد المتقدم
السودانى كان معروف بعدم الاهتمام بالمظهر العام فى المقابلات او اثناء العمل ( اشى الذى بداء يتغير الان حتى فى السودان )
العصبية الزائده عن اللزوم والنرفزة لاتفه الاسباب
فى بداية غربتى فى نهاية السبعينيات كنت متأكد بان المسئول السودانى لا يساعد ابناء وطنه فى موضوع الوظائف والعمل
حتى ولو كانت تربطه به صلة
وكنا نستعجب لهذا التصرف حينما نجد الجنسيات الاخرى متكاتفة وتساعدبعضها
وبعد 30 عام غربة استوعبت لماذا لا يحرج المسئول نفسه ,,, اذ يتوقع الطرف الاخر ان يذلل له كل الصعاب ويتجاوز النظم المعمول بها فى مكان العمل ويتغاضى عن الاخطاء ويمنحه اكثر من حقه, بحكم انه سودانى مثله ... مما يحرجه امام الادارة ان هو فعل ,,, وفى السودان اذا رفض ... وهذه المشاكل التى تواجهنا يوميا مع الشباب فى شركات القطاع الخاص ...
من النكات القديمة التى تحكى عنا هنا
اعلن عن الوظيفة فى احدى الشركات المالية
فتقدم اردنى , مصرى وسودانى وكانت المعاينة فى نفس اليوم والسؤال
جنسيتك , ما اسم امك , 1 زائد 1 فى 15 كام
الاردنى : اردنى من اكبر عشيرة اصيلة , الوالدة (شومة) وهى فى العمرة الان لو تحب ارسل لها اسمك بالكامل لتدعو لك فى الحرم
السؤال التالت : انت بايع ولا مشترى طال عمرك
المصرى . مصر ام الدنيا يا بيه ,,, فهيمة يابيه ومرسله لك احلى فطير مشلتت ,, قل لى انت عيايزها كام وما بنختلف
السودانى : وده سؤال بالله ما سودانى ,, ومكتوب على وشى سودانى
شنو ,, امى ليه جاى اشتغل انا ولا هى ,,,
1 زائد 1 ... انت قايلنى جاى من الكتاب ولا شنو
ياخى مافى داعى تضيع وقتى ووقتك فى الفاضى , انتو اصلو الوظيفه دى حاجزنها لزولكم بس الاعلان ده حركات لف ودوران منكم ,,
واخذ علبة السيجارة البنسون والولاعة التى وضعها على مكتب المسئول عند دخوله وحشر رجله اليمين فى المركوب بعد ان كان خلعه ليخلف رجل على رجل عند دخوله استعدادا للمقابلة ,, ,, وخرج ,,,
وفى الاسانسير ,, نظر الى المرآة وبداء يعدل فى ياقة القميص
(عدل بواسطة حيدر امين on 09-09-2011, 08:40 AM)
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
شكرا يا النصري
فعلا عزة النفس عند كثير من الناس بتمنعهم انه يمشو يطلبو مساعدة من الموظفين او المدراء او غيره
في بلاد الغربة لابـد من المتابعة لانه الحياة بتختلف
اما في السودان .. فالامور بتكون واضح و الناس بتقدر تتفاهم من اول لحظة
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: احمد محمد بشير)
|
المتداخلين أعلاه ... ازيكم واحد واحد ...
انا مريت بي تجربة زي دي لمن مشيت اعمل training في السودان ..... المهم موضوع عدا على خير ... لكن اكتشفتا فيما بعد انو الشكل و طريقة الكلام بتعلب دور كبير .... يعني تلبس كويس و تتكلم بي ثقة و ال body language بتلعب دور كبير ...
لكن يا جماعة سين سؤال ... انا حامر بي تجربة زي دي تاني في ظرف ال 4 شهور الجاية .. لو ال interviewer طلب منك briefing عن التخصص بتاعك ..,, و انت شرحتا ليهو , و هو لسة ما قدر يفهم >> تعمل شنو في الحالة دي ..؟؟؟ انا حصلت لي بالمناسبة
| |
|
|
|
|
|
|
|
|
 Re: نقطة ضعف السودانيين عند التقديم للوظائف (Re: sari_alail)
|
من سلبيات المجتمع السوداني اخذنا الموضوع حكي وقصص وانا زمان ودراما قديمة
الموضوع خطير ومهم جدا جدا
ممكن يكون عنوان رسالة لماجستير او دكتوراة
من الافضل الردود تكون في شكل نقاط محددة ومختصرة ومفيدة
بعد ذلك صاحب البوست يحق له تجميع تلك المعلومات وتنقيحها من التكرار ووضعها حسب الاهمية
كسودانيين ابدا ما استفدنا من تجاربنا وغربتنا وخبراتنا اي شيئ يذكر
نحن حياتنا ماشي جوديه ساكت بدون اي تخطيط
اتحدى اي واحد فيكم يقول لي انا عامل برنامج للشهر القادم سيبك من الاسبوع القادم او يوم غدا
يعني عايرة ومدينها صوت
نبداء اول حاجة واهم حاجة موضوع السيرة الذاتية كيف تتم كتابتها ؟؟؟
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: علوبه)
|
عملت في فترات كتيرة في عمل انترفيو للموظفين الجدد منهم الدكتور ومنهم المهندس ومنهم الموظف والمحاسب والسكرتير
دائما سؤالي يتركز في ::
آخر وظيف عملت بها
ولماذا تركت
وكيف عرفت عن وظيفتنا
وهل لديك مرجع للاستفسار عنك
كم آخر راتب وكم تتوقع
في هذا الاثناء نرسم صورة عن المتقدم ل########فة
وللفائدة نرجو اتباع الآتي:
- اللبس الانيق الغير مكلف - يعني ما تلبس بدلة جديدة لا تليق مع جسمك
- المظهر - يعني حلاقة الشعر والذقن ومسح بعض اللوشن
- الجلوس امام لجنة المعاينة - يعني تكون معتدلا والنظر في عين السائل للدلالة على عدم الخوف....... ولا تفرك اصابعك ولا تفرك باطن يدك ..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حامد محمد حامد)
|
Quote: اما في الدول العربية وعندي تجربة هناك
السودانيين مؤهلون جدا لكنهم لايعرفوا ان يسوقوا انفسهم
ممكن جدا سوداني عندو ماستر وشاطر
يزحلقو لبناني او مصري او سوري ...
مش بي شهادات او مؤهلات ... لا ابدا
بس بي لبسة جميلة كاملة .. بدلة وكرافتة ودبوس وحذاء لامع وتسريحة متقنة
ومفتاح السيارة في اليد يتهوزز قدام عين الكفيل
اما السوداني المؤهل العندو ماستر وخبرة ... وما تزعلو
ممكن جدا يلفح منطلون وقميص من الشماعة
ويخش في اقرب شبط حتى لو بتاع صاحبو
ويسقط زي الترتيب في الانترفيو من اول نظرة !! |
تحياتي لسيد البوست
والتحية للزميل خالد العبيد صاحب المشاركة المقتبسة أعلاه
وبها يكمن الكثير من حالات عدم حصول السودانيين على الوظيفة المطلوبة على الرغم من أحقيتهم بها .
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Zomrawi Alweli)
|
موضوع مهم شديد
بناتي قبيل التخرج الكلية عملت ليهم تدريب للمقابلات وجابت زول خبير علمهم كيف يكتبو السيرة الذاتية
وكيف يجاوبوا على الاسئلة الفكرة عجبتني جدا ياريت يتعمل تدريب لكل الخريجين..
اهم حاجة انه الزول يكون لطيف وعارف بعمل في شنو ومهذب في شكلو
اصلا الشهادات ما بتفيد لانه الناس كلها بتكون عندها نفس الشهادات
ولذلك السوفت سكيلس مهمة جدا
من حسن تصرف ولباقة وتهذيب وعدم غرور وشخصية انا الحويت العلم البايخة ديك تجي ناطة
كمان الترتيب الشخصي والنظافة
من حلاقة واظافر مقلمة وحذاء نظيف ومرتب..
وتكون شايل شهاداتك في فايل مرتبة على حسب السيرة الذاتية..دا نظام كويس جداوبدي انطباع حسن
ولابس لبس فورمال وانيق
وللبنات اللبس الفورمال المحتشم المحترم وعدم المكياج التقيل ذي بتاع الحفلات داك
بخلي الناس ترتاح ليك وتاخد عنك انطباع حسن.
في سؤال جهجه دكتور شاطر جدا جدا
وهو البخلينا ناخدك انت ونفضلك عل المقدمين شنو
فقط هز كتفينه وقال ما عارف ..
مع انه كان ممكن يتكلم عن التدريب الاتلقاه بعد التخرج ويتكلم لباكر عن هذا الموضوع
ويوري هو افضل ليه .. برضو ممكن تنوع التجارب يكون اجابة ممتازة لهذا السؤال..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: د.نجاة محمود)
|
Quote:
نبداء اول حاجة واهم حاجة موضوع السيرة الذاتية كيف تتم كتابتها ؟ |
مقال جميل في تناول موضوع السيرة الذاتية.. سارجع للتعليق عليه لاحقا...
10 Boilerplate Phrases That Kill Resumes by: Liz Ryan The 2009 job market is very different from job markets of the past. If you haven't job-hunted in a while, the changes in the landscape can throw you for a loop. One of the biggest changes is the shift in what constitutes a strong resume. Years ago, we could dig into the Resume Boilerplate grab-bag and pull out a phrase to fill out a sentence or bullet point on our resume. Everybody used the same boilerplate phrases, so we knew we couldn't go wrong choosing one of them -- or many -- to throw into your resume. Things have changed. Stodgy boilerplate phrases in your resume today mark you as uncreative and "vocabulary challenged." You can make your resume more compelling and human-sounding by rooting out and replacing the boring corporate-speak phrases that litter it, and replacing them with human language -- things that people like you or I would actually say. Here are the worst 10 boilerplate phrases -- the ones to seek out and destroy in your resume as soon as possible: * Results-oriented professional * Cross-functional teams * More than [ x] years of progressively responsible experience * Superior (or excellent) communication skills * Strong work ethic * Met or exceeded expectations * Proven track record of success * Works well with all levels of staff * Team player * Bottom-line orientation You can do better. What about adding a human voice to your resume? Here's an example: "I'm a Marketing Researcher who's driven by curiosity about why people buy what they do. At XYZ Industries, I used consumer surveys and online-forum analysis to uncover the reasons why consumers chose our competitors over us; our sales grew twenty percent over the next six months as a result. I'm equally at home on sales calls or analyzing data in seclusion, and up to speed on traditional and new-millennium research tools and approaches. I'm fanatical about understanding our marketplace better every day, week and month -- and have helped my employers' brands grow dramatically as a result." You don't have to write resumes that sound like robots wrote them. A human-voiced resume is the new black -- try it! Liz Ryan is a 25-year HR veteran, former Fortune 500 VP and an internationally recognized expert on careers and the new millennium workplace. Contact Liz at [email protected] or join the Ask Liz Ryan online community at www.asklizryan/group. The opinions expressed in this column are solely the author's. http://hotjobs.yahoo.com/career-experts-10_bo...that_kill_resumes-97[ Email]
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
Quote: مش بي شهادات او مؤهلات ... لا ابدا
بس بي لبسة جميلة كاملة .. بدلة وكرافتة ودبوس وحذاء لامع وتسريحة متقنة
ومفتاح السيارة في اليد يتهوزز قدام عين الكفيل
اما السوداني المؤهل العندو ماستر وخبرة ... وما تزعلو
ممكن جدا يلفح منطلون وقميص من الشماعة
ويخش في اقرب شبط حتى لو بتاع صاحبو
ويسقط زي الترتيب في الانترفيو من اول نظرة !! |
<<<<<<<<<<<<<<<<<<<<<<<<<<<<<<<<<<<<<<<<<<<<<<
والله يا خالد اظنو كلامك ده صحيح تمام وعشان كده كتير من السودانيين اتنفضوا في العاينات الأخيرة
وبكلامك ده مفروض نصرف كثير في اللبس والهندام قبل المعاينات
والله يديك العافية
وبعدين نطلب من الخبراء التركيز على السؤال الصعب: الراتب المتوقع؟ لأن هذا السؤال من أصعب الأسئلة في المعاينات
وكتر خيركم كلكم والله يديكم العافية
ومشكور النصري على هذا الموضوع الهام والمفيد
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: اميرة السيد)
|
Quote:
لكن يا جماعة سين سؤال ... انا حامر بي تجربة زي دي تاني في ظرف ال 4 شهور الجاية .. لو ال interviewer طلب منك briefing عن التخصص بتاعك ..,, و انت شرحتا ليهو , و هو لسة ما قدر يفهم >> تعمل شنو في الحالة دي ..؟؟؟ انا حصلت لي بالمناسبة |
ساري الليل سلامات ,,
سؤالك دا اجابته فيها تلاتة احتمالات..
انك قدمت للوظيفة الخطا
او استخدمت اللغة الخطا
او انك تحدثت عن تخصص لا علاقة له بمتطلبات الوظيفة..
عندما يطلب منك الــinterviewer التحدث عن تخصصك عليك ان تلتزم او تختار ما يناسب العمل المعروض بعيدا عن مهاراتك الاخرى لانها ستسبب تشويش له وربما تفهمه ان مجالك بعيد عن
متطلبات الوظيفة المعروضة لذلك يجب عليك تعمل zoom in لمهاراتك ذات الصلة بالوظفية المعروضة وتقوم بتلميعها وتضخيمها وتبتعد عن التخصصات الاخرى .. من الاخطاء الشائعة ايضا
ان يسهب المتقدم في التحدث عن طريقة او نظام عمل الشركة السابقة او الحالية التى يعمل بها وهذه اشارة سالبة ان المتقدم جامد ارتباطه وثيق بالروتين وقد يلاقي صعوبة في تبني انظمة جديدة لانه لا يحبذ
التغيير لذا الافضل التحدث عن المهارات والمهام الذي ينجزها هو بعيدا عن system الشركة السابقة ما لم يسئل عنه..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
والله يا حسين الليلة امنا عديل....
شغل نضيف ...
احكى ليكم عن اسوأ انترفيو عملتو فى حياتى مع شركة اتمنى ان تشطب
اسمى من فايلاتها ...
2006 رحلت من مقاطعة انتاريو الكندية الى مقاطعة البرتا الغنية بالبترول..
ذهبت الى ادمنتون ونزلت مع جماعة اصحابى جاوو لنفس الغرض (خليت اولادى فى اونتاريو)
كنت مرنك لشركة معينة فى مدينة هى عاصمة صناعة النفط هى فورت مكميرى Fort McMurray
فى اقصى شمال الولاية (حوالى اربع ساعات بالعربية)
بعد فترة جانى المكالمة السعيدة وطلبو منى الحضور للمعاينة فى عنوان الشركة حاجة زى
11414 78 Ave NW ...
طوالى قلت لعاصم ...تمشى فورت مكميرى؟ قال ليك طوالى وبرضو خالد ابدو رغبته فى زيارة المدينة
العجيبة ...
تانى يوم مشيت الميكانيكى وغيرت الزيت والبلكات وظبطت العربية ,,,
الصباح بدرى اتحركنا نحو الشمال ..
وصلنا بعد اربعة ساعات وبدينا نفتش العنوان ...
لقينا المدينة عبارة عن شارعين فقط ....
صغيرة جدا وليس هناك وجود للشارع رقم 78
هنا فقط اكتشفت ان هناك خطا جسيم ....
وان العنوان فى ادمنتون وليس فورت مكميرى ...
اتصلت بالشركة حيث ان مواعيد الانترفيو قربت ...
شرحت ليهم ماحدث ..
شعرت بالصدمة والاستغراب فى صوتهم (ومعاها شوية تعاطف)
عرضو على ان يقومو بعمل الانترفيو فى التلفون
لكن انا كنت خجلان شديد من الخطا الشنيع .....
ليه الناس ديل يعينو ليهم زول فى وظيفة Network Administrator وهو
لايهتم باهم التفاصيل ....
المهم زى ماقال العوض ..
خيرها فى غيرها ...
اتخارجت من ادمنتون
وجيت كالقرى والامور سلكت ..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
الاجابة على موضوع السيرة الذاتية بالاشارة لمقال الاستاذة Liz:
قبل الاشارة للمقال خلينا نعمل توطئة مهمة وهي:-
كما ذكرت اختنا اسمارت انا ان اي وظيفة يكون المتقدمين لها اعداد كبيرة خصوصا في سوق العمل اليوم فكيف للمتقدم ان stand out او ان
يكون مميزا لتتم دعوته لمقابلة - هذه الفرصة لا تتاتى ما لم تكون السيرة الذاتية مميزة وجاذبة للشخص الذي يفرز السير الذاتية فماهو السبل لذلك -
يجب الاعتراف انه لا توجد وصفة واحدة سحرية لتنال التمييز فباب الابتكار مفتوح فالبعض وصل مرحلة عمل animation او صياغة سيرهم الذاتية
على شكل رسوم متحركة تحكي عن مهاراتهم بصورة مرحة وجذابة وفيها الكثير من "الانسنة" مما يجعلها more humane بالذات اذا كانت الوظيفة
عندها علاقة بالــ IT ....لكن هذا لا يمنع من وجود قواعد وارشادات عامة يجب على المتقدمين اتباعها ...
من اهم هذه القواعد هي ان على المتقدمين الابتعاد عن القوالب الجاهزة التى استهلكت حتى عادة منفرة مثلا ذكر اشياء من قبيل انك:
Result oriented او انك تهتم و تسعي لانجاز نتائج عالية ..
Team player or hard worker etc. او انك تعمل بشكل جيد مع او ضمن اي مجموعة من الموظفين او انك تعمل بتفاني الخ
X Number of years experience in this field او كذا سنة خبرة في هذا المجال
details oriented او انك تهتم بالتفاصيل
flexible - punctual -dependable etc او انك مرن ومنضبط ويعتمد عليك الخ
اظن ان الفكرة وضحت ... كل هذه المعلومات هلامية لا تعني اي شئ غير ان الاف الناس تجترها باستمرار لذا فقدت قيمتها -- الاسلوب الامثل هو
ان تحكي عن مهاراتك بامثلة حية من واقع عملك بللغة مبسطة وواضحة دون تكلف - والحكي يجب ان يتضمن ثلاثة نقاط وهي المعضلة وكيف
تعاملت معها والمحصلة كمثال تقول انه في فترة من الفترات (تسميها كان موسم او شهور بعينها) ارتفعت شكواي العملاء من الخدمة المقدمة من قبل
الشركة (تسميها برضو) وانك لمجابهة هذه المشكلة قمت بخطة فحواها انك عملت دورة تدريبة للموظفين قوامها كذا وكذا ومن ثم الزمت الموظفين
سؤال كل عميل عن مستوى الخدمة التى تلقاها منه كما انك بداءت تتصل بالعملاء الذين استخدموا خدمة الشركة بشكل عشوائي وتسالهم عن مستوى
راضاءهم عن الخدمة التى قدمت لهم عند اخر معاملة لهم بالشركة مع علم الموظفين بهذه الاتصالات العشوائية والتى قد تكون لعملاءهم
- وانه نتيجة لهذا المجهود قلت الشكاوي بنسبة 80% - طبعا هذه الطريقة تهدف لعرض سلوك المتقدم وقد تعكس بشكل حي كل او بعض المهارات التي كان يسعي
لشرحها عن طريق القوالب المجترة اعلاه والتى يذكرها كل خلق الله المتقدمين للوظيفة المعينة..ويمكنه ان يحكي عن المهارات الاخرى بقصص اخرى وهكذا..
طبعا دا مثال مبسّط في مجال خدمي لكن المعضلة ممكن تكون في مشروع تقني او مبيعات او طبي او تدريس او خلافه..
حتى اختيار المعضلة يجب ان يكون فيه ذكاء ومعرفة لنوعية المعضلات التى يعاني منها المجال الذي تسعي للعمل به..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
سلامات لصاحب البوست وضيوفه الكرام
وحقيقة بوست مفيد جدا, وبه عدد كبير من الخبراء
نقطة اعتقد اساسية وهي انو لازم تكون جزء من ال system مثلا للتوظيف في السودان توجد مجموعة من الطرق التي يمكن ان تجد بها فرصة العمل:
الواسطة, المعرفة المهنية, المهارات, اللغة مؤخرا فعليك الاجتهاد في جميع هذه الجوانب
فالبحث عن واسطة خصوصا اذا كنت مؤهل للوظيفة لا يقلل من قيمتك لانك ان لم تجدها فربما تفقد فرصة انت مؤهل لها اكثر من غيرك.
المعرفة المهنية وهي امر تراكمي لكن يجب ايضا استذكار ومراجعة معرفتك المهنية بمتطلبات الوظيفة.
المهارات يجب ان تكون جاهزا بقدر الامكان وان تبحث عن كل الاسئلة المتوقعة وتجهيز الاجابات المناسبة لها ومذاكرتها جيدا.
الامر الاخر ابداء اهتمامك بالمعاينة فمن لا يهتم باموره لا يهتم بالعمل ومن لا يستعد لها مؤكد انه لا يكون مستعدا لاداء عمله.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Ammar Elyas Babiker Hassan)
|
سلام
بوست يستحق ان يشارك فيه كل ذوي الخبرات من المعاينين والمُعاين لهم :(
المشاركون في البوست غطوا الجوانب المهمة
أحب أضيف ليها واحدة
إذا قالوا ليك قدم طلبك إلكترونياً وأدوك السايت البتقدمي أو تقدم فيه إياك إياك أن تطبع نفس المعلومات وترسلها بالبريد
ده طوالي بدي الانطباع بتاع أن المتقدم يا ما بفهم أو مشاكس ما عايز يتبع المعلومات أو بقول لينا إنتو ما بتعرفوا الطريقة الكويسة.
حاجة تانية ما تخلي شخصيتك تضيع وسط محاولات الابتسام والظرافة، الابتسام في غير محله ما كويس. مافي مانع تخلي ال sense of humor يظهر لكن إذا ما عندك
خليك على طبيعتك الجادة
أذكر عبارة حكتها صديقة عن ما حدث في مكان عملها "أهلنا ما علمونا الكلام الحلو ولا أكل الفواكه"
العبارة قيلت عندما تقدمت سودانية مؤهلة من كل النواحي لكن الوظيفة ذهبت لمن هي أقل تأهيلاً.
قال سوداني يعمل فى ذلك المكان لعقود طويلة في وظيفة عامل "لكن يا بناتي أنتن صارات طوالى وأحسن إجابه عندكن "كويس" ديل الواحدة يقولوا ليها أي حاجة تقول "م العين دي للعين دي"
أنتهى الأمر بأننا ما علمونا الكلام الحلو ولا أكل الفواكه
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: malik_aljack)
|
شكرا يا شباب على الاضافات
مستحيل طبعا اقدر اعلق على كل المداخلات...
لكن بالنسبة لناس IT عندى ليهم نصيحة او تجربة قد تكون مفيدة...
قبل سنوات طويلة حصلت على شهادات معقولة فى الكمبيوتر والشبكات و سيسكو
استنذفت منى كثير من الجهد والمال والوقت ....
شعرت اننى بحاجة للتوقف عن التحصيل والبحث عن وظيفةحتى اخرج من الضائقة المعيشية
بسبب الدراسة ....
سنة ..سنتين .... تلاته ..شغال فى غير مجالى وابحث عن وظيفة فى تخصصى .....
كل يوم بمر عبارة عن خطوة للوراء .....
بعد فترة استطعت الحصول على وظيفة مكتبية فى احدى الشركات الكبيرة
ومن الداخل بدات السعى للتحويل لقسم ال IT
جندت كل مدراء اقسامى للهدف ده..
تعرفت على مدراء الشئون الادارية ...
اصبحت قريب جدا من الهدف .....
فى النهاية استطعت الوصول الى المدير التنفيذى فى ادارة شئون الموظفين
بتوصية من مديرى المباشر ...
فى اجتماعى معه اوضح لى ان عالم التكنلوجيا يتغير كل يوم وان شهاداتى
قديمة
قلت ليهم : دى عمرها 3 او 4 سنوات
قال : 3 او 4 سنوات كتيرة جدا ....نحن بنعين خريجين جداد على علم بكل
مستحدثات التكنلوجيا ....
قلت ليهو : يعنى حسى انا اعمل شنو
قال لى : احسن خيار ان ترجع للدراسة وتكون update
ووعدنى حال الانتهاء منها ان يراجع طلبى من جديد ....
الداير اصل ليهو ...
اذا كانت عندك شهادة فى الIT عمرها اكتر من سنتين تلاته ولم يصاحبها
خبرة عملية فى نفس المجال ..فانت فى حرب خاسرة والزمن ما فى صالحك....
كل يوم بمر ...تتقلص الفرص
الحل ان تواصل التحصيل (والشهادات) ولا تتوقف
والا ستمر بتجربتى
حيث طلقت ال IT منذ زمن طويل بعد خسارة اكثر من 20الف دولار
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
يا النصري السيد مايكل يتفق معك تماما فيما يخص بقرقرة راس الشخص المعني بالتعين راجع البند رقم 6
يعني عدم الاكتفاء بخطاب الشكر بل مزيد من المتابعة والتذكير لتكون حاضر في ذاكرة صاحب القرار
هذا غير ان في الشركات الكبيرة تكون اليات القرار ممتدة بين الـ interviewer والـ HR recruiter وعملاء الـ background check وربما الـ Finance
لذا قد يكون الروتين عامل مضاد لسرعة اتخاذ القرار مع استمرارية المقابلات واحتمال ظهور متقدمين اكثر كفاءة لذلك بمقدور الـ interviewer تحريك عجلة التعين
بمراجعة الوحدات اعلاه- ومن خلال تجربة شخصية استمرارية المتابعة تصل لصاحب القرار في اوقات مختلفة واحوال مختلفة قد تصادف حوجة ماسة او حتى مزاج صافي او همة زائدة
فتكون السبب في الاسراع باجراءات التعين..
Six Interview Mistakes
By Michael Neece, Monster Contributing Writer
It's tough to avoid typical interview traps if you're unsure what they are. Here are six to watch out for.
1. Confusing an Interview with an Interrogation
Most candidates expect to be interrogated. An interrogation occurs when one person asks all the questions and the other gives the answers. An interview is a business conversation in which both people ask and respond to questions. Candidates who expect to be interrogated avoid asking questions, leaving the interviewer in the role of reluctant interrogator.
2. Making a So-Called Weakness Seem Positive
Interviewers frequently ask candidates, "What are your weaknesses?" Conventional interview wisdom dictates that you highlight a weakness like "I'm a perfectionist," and turn it into a positive. Interviewers are not impressed, because they've probably heard the same answer a hundred times. If you are asked this question, highlight a skill that you wish to improve upon and describe what you are doing to enhance your skill in this area. Interviewers don't care what your weaknesses are. They want to see how you handle the question and what your answer indicates about you.
3. Failing to Ask Questions
Every interview concludes with the interviewer asking if you have any questions. The worst thing to say is that you have no questions. Having no questions prepared indicates you are not interested and not prepared. Interviewers are more impressed by the questions you ask than the selling points you try to make. Before each interview, make a list of five questions you will ask. "I think a good question is, ‘Can you tell me about your career?'" says Kent Kirch, director of global recruiting at Deloitte. "Everybody likes to talk about themselves, so you're probably pretty safe asking that question."
4. Researching the Company But Not Yourself
Candidates intellectually prepare by researching the company. Most job seekers do not research themselves by taking inventory of their experience, knowledge and skills. Formulating a list of accomplishments prepares you to immediately respond to any question about your experience. You must be prepared to discuss any part of your background. Creating your talent inventory #######es your memory and helps you immediately remember experiences you would otherwise have forgotten during the interview.
5. Leaving Your Cellphone On
We may live in a wired, always-available society, but a ringing cellphone is not appropriate for an interview. Turn it off before you enter the company.
6. Waiting for a Call
Time is your enemy after the interview. After you send a thank-you letter to every interviewer, follow up a couple of days later with either a question or additional information. Try to contact the person who can hire you, and assume that everyone you met with has some say in the process. Additional information can be details about your talents, a recent competitor's press release or industry trends. Your intention is to keep everyone's memory of you fresh.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
عجبتنى جدا قائمة الاخطاء الستة فى المعاينات خاصة السبب رقم واحد وهو معاملة
المعاينة بانها تحقيق او استجواب
والله العظيم انا نفسى ولسنين طويلة كنت بخش الانترفيو زى ماشى استجواب فى قسم
البوليس ....
الانترفيو حسب تقرير السيد مايكل مقابلة او لقاء عمل يتبادل فيها الاطراف الاسئلة
والاجوبة ...
الخطا الثانى
اظهار نقاط الضعف وكانها مكامن قوة...
حرم دى بتكون طيرت منى زى 20 وظيفة ...
زمن طويل فاهمين انو لو سالوك "ماهى نقاط ضعفك" ان تجاوب وتحول النقاط دى لنقاط قوة
يعنى انا كنت بقول اننى بشتغل اكتر من اللازم واخلص اكتر من المطلوب واننى بحاول اعمل
سيطرة على الحاجة دى ....
السيد مايكل بقول ما فى داعى للف والدوران ....موظف التعيين لايهمه نقاط ضعفك ..هو فقط
يريد ان يعرف كيف تجاوب على الاسئلة ....
الخطا الثالث
الفشل فى القاء الاسئلة اثناء المعاينة
الخطا الرابع
تعمل بحث متكامل عن الشركة وتفشل تعمل بحث عن نفسك وامكانياتك
الخطا الخامس
الجوال مفتوح اثناء المعاينة
الخطا السادس
انتظار مكالمة بخصوص نتيجة المعاينة
تقريبا دى كلنا بنشترك فيها وهى سبب البوست
ارسال جواب شكر بعد الانترفيو ..بعدها بيومين الاتصال والاستفسار
والسعى لمعرفة المسئول عن اتخاذ قرار التعيين ..وان تفترض انو كل
الاشخاص الذين تعرفت عليهم فى الشركة ليهم دور فى عملية التعيين..
معاودة الاتصال ومد الشركة باى جديد(دورات تدريبة..جوائز او اى مهارات تعلمهم بها)
المهم تخليهم يختوك فى بالهم طول الوقت (سهر الجداد ولا نومه)
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
سلامات للجميع
ذى ما قلت ..بالرغم من انى فى سوق العمل من حوالى 7 سنوات..لكن عملت انترفيو واحد بس.
كل الاسئلة بتاعة نفاط الضعف و نقاط القوة و بتعمل شنو لما تكون تحت ضغط كانت بالتلفون مع ناس شؤن الموظفين. و بعد كده حولونى لاحد مكاتب الشركة اللى كانوا شافوا سيرتى الذاتية و قرروا انى ممكن انفع معاهم. و منها رسلوا لى تزكرة طيارة و اجروا لى عربية و فندق عشان اجى الانترفيو ليوم واحد. فى اليوم ده (اللى حكيت عنه فى مداخلة سابقة ) ابو 12 مقابلة من 8 صباحا لحدى 5 مساء ما فى زول سالنى اسئلة من النوع ده. و كل الناس اللى اتكلمت معاهم كانوا مهندسين. كل الكلام كان عن بحثى بتاع التخرج. و كانوا بيحكوا عن شغلهم و بيسالونى لو عندى اسئلة. و طبعا سالتهم سؤال منكر و نكير. الزول الوحدي اللى شعرنى فى النص انى ما ح اتعين مع الناس ديل.سالنى ليه اخترت هندسة المياه. قمت قلت ليه لانى فى بلد فى اطوال نهر فى العالم و مياه متوفرة جدا لكن الناس على بعد اقل من ميل من النهر ما لاقية موية تشربها ...و العبرة خنقتنى و لقيت الراجل بيمد لى فى صندوق المناديل. الكلام ده يوم الجمعة. رجعت البيت يوم السبت الصباح. مديرهم قبل ما امشى قال لى ح يجتمع الناس اللى لاقوكى عشان يقرروا بتنفعى معنا ام لا. لو زول زواااحد بس قال ما عاوزنك ..ما بنقدر نعينك. الاجتماع يوم التلاتا. يوم الاتنين رسلت جوا ب شكر للجماعة اللى لاقونى شكرتهم على زمنهم و لطافتهم. يو م الاربعاء مشيت الجم ...لما جيت راجعة البيت لقيت رسالة فى الانسر مشين (كنت طالبة غلبانة و ما عندى موبايل) ان الشركة ادتنى افر. المدير شخصيا فى التلفون.و فى نص الكلام قال لى و فى حافز عشان تشترى بيه هدوم تنزلى بيها الشغل ...و قبل ما عقلى يودى و يجيب فى انو هدومى ما كانت سمحة اللى مشيت بيها الانترفيو...قال : دى ما معناها انك ما كنتى لابسه سمح...بس انا عارف ان الطلبة الواحد بيصرف كل قروشه على لبسة الانترفيو و بيكون حالتوا صعب.
انا كتبت:| Quote: بتذكر انى فى معاينتى انى قلت ليهم نقطة ضعفى انى Over work روحى. يعنى بشتغل اكتر من اللازم....وده كعب ليه ? لانى فى النهاية بكون كمن يحرق شمعة من الطرفين (كنت فعلا كده ايام الجامعة). لكن انا الان عرفت ان الحاجه دى ما كويسه و الزول مفروض يوازن بين حياته الشخصية و شغله. |
اتكرر فى اكتر من مرة فى البوست ان الكلام من نوع (انا بشتغل كتير و انا حمار شغل ) مخسر فى الانترفيو. و ده كلام صاح. نوع الكلام ده مخسر. لكن انا لما قلت فى الانترفيو بتاعى انى بشتغل اكتر من الازم...كنت شايلة الدليل فى ايدى.
فى احد السمسترات كنت شايلة اربعة كورسات درسات عليا و كلها كورسات كبيرة جدا بالاضافة لانى كنت شغالة فى البحث بتاعى و جبت فى كل الكورسات A+ ( فى البحث برضو) و اول ما قلت الكلام ده قلت للزولة بتاعة شؤن الموظفين شوفى نتيجتى بتاعة التفاصيل و انتى ح تعرفى انا قصدى شنو.
الان ان بفكر اسيب القطاع الخاص و اششوف شغل فى الحكومة...و بفكر فى اجوبة الاسئلة السخيفة دى (من الان).
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: SHIBKA)
|
عندنا برضو مشكلة مظهر .. او بالبلدي كدا ما بنعرف نلبس زي باقي الجنسيات التانية
مع اننا انضف شعب ( داخليا ) .. ودا بحكم سكنتي عزابي مع مصريين واردنيين ولبنانيين ..
الواحد فيهم بخت البشكير من الصباح في كتفو ويجلبط شعرو السمح داك بالموية مع الجل ويتشنط التشنيطة الما خمج ومع جردل الريحة ويبقى مارق .. من برة هللا هللا ومن جوة يعلم الله .. عكسنا نحنا بنقعد في الحمام ساعة من الصباح .. لكن ما بنعرف نلبس
في الخليج هنا بالتحديد انا بقيت مقتنع تماما انو المظهر العام بيمثل 80% على الاقل من المقابلة و10% لسان حلو ..
مرة واحد من الشباب كان ماشي معاينة وطلبت منو انو يربط ليو على الاقل كرفتة يدخل بيها
ردو لي كان : ياخي الكرفتة دي بتحسسني اني عامل زي الغنماية المربوطة بحبل ..
وهو ما كان عارف انو هو فعلا غنامية بكلامو دا بس من غير حبل .
واخيرا .. مرو علي مدراء اردنيين وخلافو ما بيعرفو سجم خشمم وبياخدو رواتب عالية جدا
وسودانيين مكملين الفهم وراوتبم ضعيفة جدا وفي اقسام مدفونة .. ودايما كنت بسال نفسي السؤال دا :
لي نحنا ما بعاملونا معاملة اللبنانيين مثلا ..
ولسان حالنا بيحكي دايما في كل المواقع .. السوداني واضح من بعيد جايي كاشي وتشنيطو واقعة بالجمبة
( المظهر .. والمظهر .. ثم المظهر ) في المقام الاول والباقي سي في
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: مازن الجمّال)
|
شكرا ليكم يا شباب
لولاكم لما وصل البوست ل 4 الف نقرة فى اقل من اسبوع
وصلتنى بالايميل رسالة مثيرة انقلها بضبانتها
Quote: السلام عليكم استاذنا
وممتن عى كل ماقدمته والأخوة من حقائق ونصائح وبالجد الواحد بيفخر بأمثالكم
رغم الواقع المر الموجود هنا فى السودان
اخي بس للأسف كل ماذكرتموه يكاد لا ينطبق فى السودان حيث ان معظم الشركات او
بالاحرى لجان النعاينة فى تلك الشركات ليست على دراية بتكنيك المعاينات
واحكى لك هذا الموقف فى معاينة بشركة ذات رأس مال يصل لمليار دولار: حيث
دخل الشاب للمعاينه وفى غمرتها اذا باحد اعضاء اللجنة يسأله ، من اى مدينه
انت فأجاب من القطينة فما كان من السائل الا ان قال له "يازول ناس القطينه
ديل قالو بغتصبو(هذه الكلمة قيلت بالدااارجي) الحمير اوعى تكون بتعمل كدا
انتا"صاحبنا نطّر عيونو وعرق وماعرف يقول شنو
طبع....فهل بالله دا مستوى
معليش لصك أذنك بالفاظ نابيه لكن دا واقعنــــــــــــــــــــــــــا
شئ تانى اردت الاستفسار عنه وهو كيف يمكنني معرفة الاسباب التى جعلت لجنة
المعاينة ترفضنى .. هل فى الغرب يُتاح لى ان اعرف السبب حيث ان هذا الموضوع
فى السودان غاية السرية الا ان تكون لك واسطه كبيره
شكرا ليك ولزملاءك
|
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
يا النصري والله بتاع القطينة دا بالغ عديل كدا :) كان يقول ليهو قوم اطلع من هنا بدل سؤالو التعسفي دا..
اما عن سؤاله عن ذكر اسباب الرفض فكل الشركات تقريبا في الغرب تستعمل ديباجة واحدة
وهي في شكل خطاب او ايميل تقول للمتقدم انها اَسفة ان الاختيار لم يقع عليه لهذه الوظيفة بالذات لانها
وجدت شخص اخر بكافاءات انسب للوظيفة وانها تتنمى منه مواصلة بحثة لوظائف اخرى بنفس الشركة
وفي بعض الاحيان تخطره انها ستحتفظ بمعلوماته لمدة معينة الخ..
وسبب عدم التفصيل في الرفض مرده محاذير قانونية قد توقع الشركة في ورطة اذا استطاع المرفوض
اثبات ان الشخص المعيّن يعاني من نفس المشكلة التى بسببها رفض هو..
لنفس هذا السبب يخضع الاشخاص الذين يقومون بعمل المعاينات في الغرب وفي الشركات الكبيرة
بالذات لتدريبات مكثفة لتجنب الاسئلة ذات العواقب القانونية والتى قد يلجاء اليها المرفوض حتى
ولو لم تكن هي سبب رفضه لمقاضاة الشركة ما لم يتبرع بالاجابة عليها دون سؤال او عن طريق سؤال
غير مباشر .. مثلا غير مسموح بالسؤل عن الحالة الاجتماعية هل انت متزوج وهل لديك اطفال
وهي تعاني من اعاقة وكذلك السؤال عن البلد والدين والعرق كلها اسئلة محرمة
وحتى سؤال بسيط مثل هل لديك سيارة قد يوقع الشركة في مشاكل ما لم تساله لكل المتقدمين على حد السواء
او في حالة ان الوظيفة تتطلب سيارة خاصة للقيام بها ..لكن كل هذه الاسئلة ممكن ان تسال بطرق غير مباشرة
معا عدا المحرمات الدين والبلد* والجنس** والعمر والاعاقة ا(مالم تقف عائق لاداء المهمة) الخ .. لانها غير مهمة اصلا..
وكل ما استلم سيرة ذاتية لاحد قادم حديثا من الشرق الاوسط بقعد بتململ لانو بكون راصي كل المحرمات في الوش
تاريخ الميلاد والجنسية والديانة "مسلم" ومتزوج ولدي طفلين ودا بكون سبب كبير لاستبعادهم من البداية لانها
غير الابعاد القانونية تعكس ان الشخص خارج "الشبكة" وتكلفة دخوله الشبكة ستكون مكلفة للشركة ..
هذا ما لم يكون الشخص المعيّن عالم بخلفية المتقدم ...
___________
*اذا سالت شخص في انتفيو انت من ياتو بلد احسن تعيّنو من سكات لانو كان بقا لئيم بياخد ليهو راتب سنة سنتين
من غير شغل او يجبر الشركة انها تعينو لكن ممكن تسال اذا كان المتقدم يتحدث لغات اخرى اذا لم تكن موجودة في فورمة التعين..
مش زي صاحبنا الخلا القطينة وبقى يسال من حميرها:)
** نعم اقصد بالجنس النوع ذكر ولا انثى ممكن تكون قاعد مع شخص ساعة كاملة تململ في كرسيك تسالوا سؤال منكر ونكير عن مهاراته
لكن ما تقدر تقول ليهو انت راجل ولا مرة لانو كان لحقتا سالتو وما عينتو بجرس شركتك جرسة شديدة:)
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
تامينا لكلامك يا حسين ..قبل فترة كنت اتونس مع زميل لى فى العمل ليهو
اكتر من 30 سنة شغال ....سالته كيف تم تعيينه ..
قال لى زمان كان فى معاينات لكن بتختلف من معاينات الزمن ده ...
اضاف كان فى معاينة سايكلوجية يسالون فيها اسئلة مثل هل تحب
امك وهل لديك مشكلة مع ابوك ...
قال لى ضاحكا ...واحد صاحبه دخل المعاينة دى وفشل ولم يتم تعيينه
وانو الان بجر عربية بتاعت تسوق (يعنى مشرد)
نحن زاتنا فى عملية تعييينا اتعرضنا لاسئلة مشابهة لكن بذكاء
تم عرض فيديو يظهر فيه شابين يداعبو فى بعض و يكلكلو فى بعض لكن
فى هدوء وبدون ان يتسببو فى اذعاج للباقين ....تظهر سيدة غاضبة وتقول
لى دى قلة ادب اطلب البوليس للشابين الداعرين ديل..
تعمل شنو ؟
هناك تلاته اجابات:
تامن على كلام السيدة وتنهر الاولاد
تنهر السيدة وتقول ليها ده ما شغلك
تقول للسيدة انك تعلم ما يحدث وان الامر تحت الكنترول
الاجابة الصحيحة هى الثالثة...
طبعا يا حسين الغرب هنا بختلف عن عالمنا العربى والافريقى
احكى ليك
لمن جيت من سوريا قبل شهور ..قابلنا فريق من ضباط الهجرة فى مخرج الطيارة
وطبعا لانى زول صحراوى طوالى قبلو على ...ادينا الجواز ..اديتهم الجواز
دايرين الرخصة ..اديتهم الرخصة ...قال لى انت من كالقرى ؟
قلت نعم ..اعمل واسكن هناك ...
قال لى انت حسى ماشى وين؟
ياريتو ما سالنى السؤال ده ....
قلت ليهو ده ما شغلك ..
امشى محل ما امشى ..دى سؤال شخصى ولا يحق لك سؤاله
اتراجع وبدا يقول لى ...بس لانك فى اونتاريو وكده
واصلت ده سؤال شخصى و انا حر امشى اى حته ولا يهم ان تعرف
طوالى ادانى الجواز وقال لى شكرا
اخدت الجواز بنرفزة وغضب....
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
Quote: امشى محل ما امشى ..دى سؤال شخصى ولا يحق لك سؤاله
اتراجع وبدا يقول لى ...بس لانك فى اونتاريو وكده
واصلت ده سؤال شخصى و انا حر امشى اى حته ولا يهم ان تعرف
طوالى ادانى الجواز وقال لى شكرا
اخدت الجواز بنرفزة وغضب.... |
و الله يا سودانيين تغيتوا و اتفلهمتوا....الله يرحم
تعرف انا المدير سالنى.."عندك قرين كارد؟؟"لكن ما سالنى من اى بلد انا. قلت ليه "لا". قال لى :"ما مشكلة عندنا كم واحد ذيك كده. بنطلع ليك قرين قارد اهسى اشتغلى بفيزة الطلبة و بعد شهر بنطلع ليك فيزة الشغل.... لو عجبتينا بنطلع ليك قرين كارد بعد شوية." اعمل شنو حايمة بالجواز السودانى و لحدى ما الشركة طلعت لى القرين كارد كنت كلفتهم حوالى 12 الف دولار بالتمام و الكمال.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: smart_ana2001)
|
نعمل شنو يا اسمارت..
البلد هنا ماشة بالقانون ولازم نمشى زيها...
الغريب قبل كم سنة مشيت السودان زيارة ومعاى سودانى صاحبى شديد
فى المطار وقفنا فى صف الاجانب بحكم الجواز وكده...
ظابط الجوازات مسك جواز صاحبى وقال لىهو اسم الاسرة فى الجواز مالو كدى!!
انت سودانى؟ ...صاحبى قال ليهو ايوة سودانى ..ليه ؟
الضابط قال لانو الاسم شوية غريب ..وما اسم سودانيين وبدا يردد فى الاسم...
صاحبى بدا يتضايق وبدا يقول ليهو ايوة سودانى وجد جدى سودانى و مولود فى السودان
بعدين ده جواز كندى ...
الضابط لسه بتلايق ويتعاور فى حكاية الاسم دى
وانا الاستغراب والدهشة دايرة تكتلنى...
ما مصدق البحصل قدامى ده ....
معقول تجى من ضابط سودانى قاعد فى واجهة البلد ...
قصة تانية:
مارق من مطار دمشق فى طريقى لكندا ..وقفنى ضابط الهجرة وسالنى معاك قروش
قلت ايوة 800 دولار...
قال انت عارف ممنوع تطلع بالقروش دى..
طوالى نهرتو قلت ليهو دى قروشى جيت بيها ...صرفت الصرفتو وده الباقى
ومن حقى اطلع بيها ...
قال لى خلاص ادفع حاجة
قلت ليهو لا ما حادفع ..
قال انتظر هنا ....
وبدا يمرر فى الناس
انا احمر ليهو وهو يحمر ليه
اقتنع فى الاخر انو مافينى كده
قال لى اتفضل امشى...
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: SHIBKA)
|
Quote:
انك قدمت للوظيفة الخطا
او استخدمت اللغة الخطا
او انك تحدثت عن تخصص لا علاقة له بمتطلبات الوظيفة.. |
استاذ حسن نوباتيا .... انا كان مشيت اعمل training مغ Mobile communications service provider في السودان ... ما في داعي لذكر اسم الشركة .... لكن بالجد لمن تكون انت بتقرا تخصص جديد .. بتبقى مشكلة ....
هسع انا تخصصي Mobile Computing >>اها الحل شنو ؟؟؟
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: sari_alail)
|
اها كمان كتير من الوظائف بكون معاها امتحان قدرات ...
ودى انا عندى معاها قصص و قصص ...
لمن كنت فى ادمنتون ...قدمت لشركة بتاعت اتصالات ...
نادونى للمعاينة الاولى ..اجتزتها بمزاج...
المعاينة التانية وكانت مع المدير ....
الزول لمن امن وتبادلنا التهانى وقال لى مبروك لقد تم اختيارك
ومرحب بيك فى شركتنا ..لكن فى امتحان صغيرونى ...الغرض منو نعرف امكانيات
كل زول وبساعدنا نوزع الناس للاقسام البتناسبهم....
دخلت الامتحان (الصغيرونى)
لقيتو 3 ساعات ...
شى فيديوهات وشى لوغريثمات وشى مكالمات..
شى فيديو ..شى رسوم متحركة ....
لمن قالو رفعت الاقلام الزمن انتهى
انا كنت فى السؤال التالث ....
سقطتا بمزاج وامتياز....
قالو لى معليش ..
اتخارج ..
الله معاك .....
قال صغيرونى قال ...
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
قبل سنوات ظهرت وظائف مؤقته فى قسم التعداد السكانى الكندى...
كانو عايزين عدادين ...
الوظيفة بسيطة ...تملا بيانات وارقام ..
الامتحان كان بسيط ..طرح وجمع وقسمة وضرب..
دخلت الامتحان ونافخ صدرى
الود عنده خمسماية شهادة ...
عملت الامتحان والنتيجة بعد يومين ...
فعلا بعد يومين اتصلو تلفونيا وظهر اسمهم فى شاشة التلفون
قلت : هالو
قال : ممكن اكلم سهير..
قلت : هى مافى دلوقت ..اى رسالة؟
قال : نحن قسم الاحصاء ونريدها ان تتصل بنا
قلت ليهو وانا؟
قال لى اسمك منو ....قلت ليهم اسمى..
قال لى نحن نتصل بالناس الاجتازو الامتحان فقط .....
والله العظيم عندى نفسيات لشهور طويلة بعد المكالمة ديك
جانى احساس انى
I lost my touch
اى زول يقدم لوظيفة اقل من مقدراته لازم يحترمها ويديها
قدرها ..الافتراء والبوبار ما بنفع .....
طالما عمل شريف لازم تديهو حقو وتحترمو وتقدرو حتى لو كانت
اقل من امكانياتك بسنين ضوئية..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
Quote:
الاخ / حسين
ما شاء الله عليك طلعت موهوب في حاجات كتيرة عيني باردة |
الاخت شبكة شكرا على الاطراء...
يا ريت لو الموضوع موهبة بل خبرة اكتسبتها من عملي اليومي بالــ Retail banking وبعد ان خضعت لتدريبات مكثفة
لاختيار الموظفين الاكفاء ومن ثم الـ on-boarding ثم الــ training الخ حتي صرت مسؤول التعين للقطاع الذي اعمل به
من خلاله اقوم باختيار مدراء الفروع ومساعدي المدراء والموظفين والصرافين .. فالشركات الامريكية الكبرى ترصد ميزانيات ضخمة
لتدريب موظفيها بالذات فيما يتعلق بالــ recruiting لعلمها ان اختيار موظف خطا (ونحن نتحدث عن موظف في الـ entry level )
يكلف الشركة ما يعادل 107,000$ في حالة ان الموظف ترك الوظيفة خلال ثلاثة شهور لانها لا تلائمه اوعجز عن القيام بمهامها
وهذه القيمة محسبوب فيها الوقت الضائع في المقابلات - فنادق - تزاكر طيران - ترحيل - تدريب - رواتب الخ..
لذا تخضع الشركات مسؤولي التعين لتدريبات مركبة وامتحانات للتاكد من مقدرتهم للقيام بالمهمة على اكمل وجه ..
وبعد هذه التدريبات لا تتركنا في حال سبيلنا بل تخضعنا لما يعرف staffing turnover rate وهو ان لا نفقد اكثر من 2% من عدد
المعينين لكل قطاع خلال عام من تاريخ التعين -
المعروف عن الشركات الكبري انها ما بتديك قروش في يدك لكنها ممكن تصرف عليك عشرات الالاف من الدولارات في التدريب
لان عائد التدريب يعود لها في المقام الاول..
اها بعد مشروع السيرة الذاتية الفوق دا ممكن تشوفي لينا شغل في الدوحة:)
Quote:
استاذ حسن نوباتيا .... انا كان مشيت اعمل training مغ Mobile communications service provider في السودان ... ما في داعي لذكر اسم الشركة .... لكن بالجد لمن تكون انت بتقرا تخصص جديد .. بتبقى مشكلة ....
هسع انا تخصصي Mobile Computing >>اها الحل شنو ؟؟؟ |
اخونا ساري الليل سلامات..
اذا كان لديك رغبة اكيدة في العمل بالسودان وفي حال عدم وصول صناعة telecommunication لتقنية الـ mobile computing فعليك ان تقوم بالتنازل
عن التخصص والرجوع لعموميات هندسة الموبايل حتى تنال الوظيفة في الاول ومن ثم عليك بالمثابرة لاقناع مخدميك باستحداث هذا التخصص الجديد ويكون ذلك
بعمل دراسة جدوى توضح الفوائد التقنية وما تعكسه من ريادة في هذا المجال وعليك بالتركيز على الناحية الاقتصادية في دراستك والاسهاب في العوائد المادية
لان متخذي القرار دائما ينظرون للعائد قبل كل شيئ وبالتوفيق..
نصحية اخرى ان تواصل الدراسة والاطلاع والمواكبة فيما يخص تخصصك لانه عاجلا او اجلا سياتي التخصص للسودان وبذلك تضمن لنفسك المواكبة والريادة
في هذا المجال ولا تضيع سنين دراستك وجهدك دون مقابل..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
اصريت ما اكتب مداخله الا اقرأ البوست دا كلمه كلمه .. وحقيقي كلام مليان يديكم العافيه
واقع الحال في السودان انو الوظيفه هنا بتعتمد على ركائز معلقه في الهوا
وفي نظريات عجيبه للتوظيف
اولا اذا انت مرأه متزوجه دا بيضعف فرصتك للصفر ناهيك عن يكون عندك اولاد
اذا انت شاب ... لا هم دايرين شابه لانها بتقبل باي مرتب لانها ما عليها التزامات (هكذا يخيل لهم)
اذا انت قريب زول في الشركه او المؤسسه ما بعينوك .. واذا انت ما قريب زول ما بعينوك
المظهر مهم والشكل الى هو خلقة الله اهم .. وبعض فورمات التقديم فيها (ماهي قبيلتك)
الشغل في السودان بيعتمد اعتماد شبه كلي على الواسطات حتى في اتفه الشغلات , وما قاصده اتفه زول بس حتى لو كمساري لازم يجيبه زول عشان يشتغل في حافله
حتت بسيطه جداً بكون فيها معايير موضوعيه وكلامكم دا بطبق فيها .. كالشركات الاجنبيه (الكبرى)
مع انو واحد زميلي مشى قدم في الـ(الديار القطريه) وعمل المعاينه مع (مصري ) جابو مخصوص للمهمه دي والاخير ابدأ اعجابه بزميلي وبمؤهلاته وخبرته الطويله في مجال المبيعات , اتصلوا عليه بعد اسبوعين قالوا ليه عندك معاينه تانيه .. وبعد طول انتظار (لطعه) قريب ساعتين لقى واحد (سوداني) قال ليه معليش نحنا دايرين زول يكون اشتغل في مجال مبيعات العقارات حتى لو كان مهندس
بس اكيد كلامكم دا مفيد جدا خاصه وانه كميه مقدره من الكفاءات في السودان قاعده تسافر للخارج لرداءه الوضع حقيقي هنا .
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Dalal Ezzaldin)
|
سلام عليكم اخت دلال
السودان فى كوكب مختلف عن الارض
مقاييس الجوده و الكفاءة محكومة بقوانيين محلية واعراف وتقاليد...
ياريت لو الخبرات البنشوفها هنا ترجع وتقود البلد فى حركة اصلاحية شاملة...
حسى زى حسين نوباتيا مش مفروض يكون على راس اكبر هيئة للموارد البشرية ....
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
سلام يا جماعة
طبعا الكلام عن إنه السودان دا وضعه مختلف جدا صحيح إلى درجة كبيرة. لكن كانت أكبر مفاجأة لي أن أكتشف إنه موضوع الواسطة و المعارف دا موجود في كل مكان بطريقة أو أخرى. مرة في واحد من الكورسات البعملوها للتأهيل في كيفية البحث عن عمل المتحدثة قالت (It is not what you know. It is who you know) والله الكلام دا صدمني صدمة لكن هو صاح إلى حد بعيد جدا. طبعا الكورسات دي يا النصري احتمال تكون مريت عليها. رغم إنها مفيدة لكن مرات بكون فيها كلام بجيب الضغط و الواحد بغلبه يسكت عليه. مرة في واحد من الكورسات دي كنا مجموعة من المهاجرين معظمهم هنود و باكستانيين و من تخصصات مختلفة و أصحاب خبرات. فالمتحدثة قالت لينا إنتو كلكم مؤهلين أكاديميا و عندكم خبرات و رغم كدا ما لاقيين شغل معناها عندكم حاجة غلط فلازم كل واحد يحدد الحاجة دي شنو و يعالجها. طبعا نظريا كلامها صحيح و قد يكون مفيد لكن برضه فيهو جانب غير صحيح. فقمت قلت ليها أنا بختلف معاك قالت لي كيف؟ قلت ليها نحن ما عندنا حاجة غلط لأنه الناس بنفس مؤهلاتنا دي بشتغلوا و ما تفتكري بس في بلدهم في بلاد المتطلبات الوظيفية مشابهة لكندا و ضربت مثل قلت ليها عندي زملاء كتيرين جدا مشوا الولايات المتحدة في نفس الوقت الأنا جيت فيه كندا و عملوا نفس العملته و هو مواصلة دراستهم العليا و حصلوا على ماجستيرات و بمجرد الانتهاء منها حصلوا على وظائف في مجالات تخصصهم. قالت لي طيب في رأيك الغلط وين؟ قلت ليها الغلط في النظام الكندي. بتمشوا برة كندا تقولوا دايرين ناس مؤهلين و لما نقدم للهجرة لازم نثبت مؤهلاتنا و ندفع مئات الدولارات للتجمعات الأكاديمية الكندية عشان بس تكتب خطاب تقول فيه إنه ما نلناه من شهادات يؤهلنا للعمل في كندا في الوظيفة الفلانية و نجي نكتشف إنه الوظيفة الفلانية دي مجرد نخش معاينة ليها حلم بعيد المنال. كل الدايرنه مننا إنه نجي نملا ليكم الوظائف الما محتاجة لدا كله. و مافي شي غلط في الوظائف دي لكن من البداية لو كلمتوا الناس إنه دا كل المحتاجين الواحد بتخذ قراره بالهجرة أو عدمها بناء على المعطيات دي. طبعا الواحد في الزمن داك بكون زعلان من عدم الشغل و الزعل بفجر طاقات التنظير. أرجو إنه كلامي دا ما يحبط أي زول مفكر في الهجرة لكندا فالزمن تغير إلى حد بعيد و التجارب بتختلف من شخص إلى آخر.
و الله فعلا زي ما قال النصري ما شاء الله يا حسين خبرة و معرفة مشرفة لكل سوداني. أسأل الله لك التوفيق في كل خطواتك.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
سلامات يا حسن يوتبيا...و ما شاء الله. ربنا يوفقك و يزيدك من علموا.
| Quote: مرة في واحد من الكورسات البعملوها للتأهيل في كيفية البحث عن عمل المتحدثة قالت (It is not what you know. It is who you know) والله الكلام دا صدمني صدمة لكن هو صاح إلى حد بعيد جدا |
اى مرة سمعت فيها للجملة اعلاها كانت تحت شعار : مهم جدا تعمل networking ...يعنى تعمل علاقات مع زملائك فى الشغل...مع المدراء. تسجل فى الجمعيات فى مجالك و لما تمشي الاجتماعات تبادل الناس كرتك بتاع العمل و تتكلم معاهم عن شغلك و عن امكانياتك. لو بتتعامل مع عملاء برضوا حاول اعرفهم و خليهم يعرفوك. الناس لما تحتاج لزول بمواصفاتك ح تفكر فيك على طول. او لو كان عميل و اشتغلت ليه شغل كويس و اتكيف منك...ممكن جدا هو اللى يطرح عليك وظيفة.
حصلت مرات ان فى زول عيناه لان ابوه زول مهم جدا.....لكن الولد (كان خريج جديد) كان متحسس من الموضوع و كان كاسر رقبته عشان يثبت انه برضوا شاطر.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: smart_ana2001)
|
بتفق معاك يا سمارت في إنه (Who you know) ما بالضرورة زي الواسطة بتاعتنا بالضبط و ممكن يدخل فيها التشبيك المهني (لو صحت الترجمة). لكن برضه زي عندنا المعرفة على المستوى الاجتماعي بتلعب دور كبير. و طبعا دا شي مفهوم إلى حد. لكن برضها بتقلل فرصنا بدرجة كبيرة فشبكاتنا مهما تعبنا في بنائها تظل دوائرها أقل من دوائر أبناء البلاد الأصليين أو في الحقيقة مش الأصليين بل الأبواتهم جوها قبالنا.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: Elawad)
|
والله يا النصري بالقصص الطريفة الكتيرة القريناها منك هنا عرفت ان اهم حاجة هي الاهتمام بالتفاصيل الصغيرة النحن بنعتبرها ما مهمة وكذلك ما نستخف بأي وظيفة ونقول انها ما قدر المقام وما نديها اهمية في الانترفيو.. وبصراحة البوست جذب كثير من الخبراء في هذا الشأن واستفدنا منهم كثير ومشكورين كثير .. والله يديكم العافية فردا فردا
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: اميرة السيد)
|
سلام اميرة
اهم حاجة الواحد يعترف بعيوبه الشخصية البتسبب عدم حصوله على الوظيفة ....
انا مثلا من قمت عارف روحى زول خجول وما عندى شجاعة ادبية وكنت بتكبب لاى سبب
وللان لا استطيع مخاطبة اكثر من 10 انفار بارتياح شديد .....
قررت منذ سنوات طويلة انو الطبيعة دى لازم تختفى وباى طريقة وباى ثمن لانها مدمرة
وبتودى الزول التوج فى الزمن الصعب بتاع القلع ده ....
المهم بعد سنوات طويلة من مصارعة المشكلة ..ترمينى وارميها ...وصلت لمستوى مقبول
وفضيت الشكلة وبقينا حبايب (انا والمشكلة)
فى ناس بكونو مؤهلين لكن الوظائف تتطلب زول تفتيحة ومنضمة وبتاع حنك والحاجات
دى كلها ما عنده ..
امامه خيارين يا يستستلم ويرفع الراية البيضاء ويخلى التزمر والشكية والشكوى
انو سوق العمل ظالم ....
الخيار التانى انو يواجه المشكلة ... ويصارعها ويختو قرض معاها
الخصال والصفات التى يفتقدها يجيبها من مافى يشتريها ..يستوردها ...يسرقها ....
المهم يجيبها مهما كان التمن ومهما طال الزمن ...
عندى واحد صاحبى صارى اليوم كلو فشل نهائئ يستقر فى وظيفه لغاية فى النهاية لقى وظيفة
ما بقابل اى زول وما عنده مشرف ولا مدير فى راسو
بالرغم من انو الوظيفة ما فى مجاله الا انه مستمتع بيها جدا و مجودها خالص خالص
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: النصرى أمين)
|
شكرا ياالعوض لان مدخلاتك بتفتح افاق جديدة للنقاش ممكن يسفيد منها الناس...
نبدا بما قالته المتحدثة بان العمل يتم عن طريق it's not what you know, but it's who you know
طبعا انا برجح ما قالته اسمارت انا لانها اذا كانت تقصد ابحث عن الواسطة وليس الخبرة فان هذا يهزم مشروع
التدريب الذي تقوم به .. طيب نجي لواقع العمل اليوم والطرق المثلي للبحث عن الوظائف وهنا يجب ان نقسّم الباحثين عن
عمل لقسمين الاول هم العاطلين تماما ويبحثون عن عمل والقسم الاخر الذين يشغلون مناصب اقل من طموحاتهم ويبحثون عن فرص افضل..
للاسف الاوفر حظا هم القسم الثاني.. لاسباب كثيرة منها انهم ليس مرغمين للقبول بوظائف لا تناسبهم تحت وطء الحوجة ولان فرص
الــ networking تكون اكبر .. ولانهم متواجدين في الــ work force .. ولوجود active work history ..وامكانية وجود referral
والسبب الاهم هو في حال اتقانهم لعملهم الحالي بغض النظر عن اقتناعهم به يفتح لهم ابواب كثيرة ساتطرق لها هنا ومنها ان
“People know you for what you've done, not for what you plan to do
مما يساعد بقدر كبير في اجتياز الـ Behavioral interview المعمول به في معظم الشركات الان..
وقد اثبتت احصائيات كثيرة ان فرص العمل الجيدة على قلتها تذهب للـ active work force
فانا مثلا املا بعض الشواغر العندي الفي القطاع اثناء تجوالي لقضاء حوائجي اليومية
وفي مرات كثيرة اذهب لمناطق بعينها للبحث عن كفاءات محددة (كزبون عادي)
واعلم ان كثير غيري من مسؤولي التوظيف يفعلون نفس الشئ..
الـهدف من هذا الكلام ان الطامحين في وظائف افضل عليهم الاجتهاد والتفاني في اعمالهم الحالية لانك
you never know who you're dealing with كما عليهم التحلي بروح متفائلة ومرحة اثناء قيامهم باعمالهم
وهنا ياتي كلام ابو الريش القبيل عن الـ good attitude وال ـ positive energy
لانها نقطة الجذب الاولي للعملاء العاديين والمستترين..( ولي هنا قصص كثيرة لا يسع المجال لذكرها)
نجي للعاطلين عن العمل تماما ..ونفس الاقتراحات هنا تسري على الطامحين لوظائف افضل..
والكلام هنا لايشمل الباحثين عن وظائف في بلدان اخرى بل للباحثين عن التوظيف المحلي..
طبعا الناس كلها عارفة البديهيات من تتبع اعلانات الشواغر في وسائل الاعلام المختلفة الخ
وتتبع شركات بعينها بزيارة مواقعها وملء فورمات التعين اون لاين وارسال سير ذاتية مميزة الخ
وهنا ينقسم الباحثين لنوعين الـ proactive job seekers او الباحثين باجتهاد والــ laid back" seekers "
وهؤلاء هم الذين يكتفون بملء فورمات التعين وينتظرون النتائج.. من الطبيعي ان نقول ان الباحثين باجتهاد بعد القيام بكل
الخطوات الصحيحة التى ذكرت سابقا هم الاوفر حظا ...الاجتهاد يكمن في ان تتواجد في كل الاماكن الصحيحة اهمها واولاها
الــ job fairs لانك في الغالب الاعم تحظي بمقابلة او انترفيو من قبل الشركة التى تسعي للعمل بها .. هناك انواع كثيرة للجوب فير
منها التى تقوم بها الـ recruiting companies او شركات التوظيف او التى تقوم به الــ cities او الـ municipalities
وتدعو فيه كل الشركات العاملة في المنطقة المعنية والاهم منها جميعا هو الجوب فير الذي تقوم به الشركات بنفسها لملء شواغرها
وطبعا حجز مكان في الجوب فير لا يتم دون تنسيق مع الــ HR للشركة المعنية او منظمي الــ event ..هذه الجوب فيرس تتم فيها
القرارات بسرعة وتنجز اجراءات التعين بشكل جماعي لوجود كل الاطراف المعنية بالتعين في مكان واحد ووقت واحد..
وايضا من اساليب الـباحثين باجتهاد عن عمل هو الاتصال بمكان الوظيفة والتحدث مع متخذ القرار بشكل مباشر واعلامه انك فعلا
ترغب في الوظيفة المعروضة وانك قمت بكل الاجراءات المطلوبة من تقديم وخلافه وان نهاية امانيك تتلخص في اعطاءك فرصة
مقابلة وانك متاكد من اجتيازها وتستعرض مهاراتك اذا اعطيت الفرصة واذا شعرت ان الوقت غير مناسب تتطلب موافقته على اعادتك
الاتصال في وقت اخر وتسال ان كان هناك وقت انسب..وحسب نوعية الشركة التى ترغب في العمل بها يمكنك عمل زيارة لها وتتحسس
الوقت المناسب للحديث لمتخذ القرار الخ ( هذا الخيار يناسب القطاع الخدمي مثل البنوك -شركات التامين- الاتصالات الخ )
ويحبذ لو انك عميل للشركة لتسير الامور بسلاسة وياتي الامر كا by the way etc..
الشكر اجزله لك يا النصري لحسن ظنك بي وكذلك للمهذب العوض والاخت اسمارت انا...لو لاتحفّيذكم لي بمداخلاتكم الذكية والرصينة
لما تداخلت وتفاعلت مع هذا البوست من الاساس.. فانتم من افترعوا البوست واجزلتم فيه العطاء واتت مشاركاتي مكملة لمشاركاتكم..
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
الاخ حسين
Quote: اها بعد مشروع السيرة الذاتية الفوق دا ممكن تشوفي لينا شغل في الدوحة:)
|
عندنا قريبنا جاب ورقو عشان يشتغل هنا
وهو مهندس من سنة 1968
المهم قدموا ليهو في شركة بتاعة مقاولات
لما المدير قرا الورق بتاعو قال والله الزول دا الا اقوم ليهو من كرسيي دا
لكن دا مؤهلات اكتر من شركتي زاتها وبقى ليهو سبب
لي هسة ما لاقي وظيفة في قطر
اها انت بالسيرة الذاتية دي الا اقوم ليك زول كبيييييييير م محلو
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: SHIBKA)
|
بوست مفيد..شكرا النصرى أمين
حسين نوباتيا
ما شاء الله..خبرة عملية و أفق واسع
smart_ana2001
مداخلات مفيدة
بالتاكيد سوف يستفيد عدد كبير من متابعي البوست من مداخلات الاخوة و التي أثرت البوست..ارجو من الاخ بكري أن يقوم برفع البوست للفائدة العامة.
Quote: فى الوظيفة البعمل فيها الان سالنى فريق الانترفيو لماذا تريد العمل فى شركتنا ABC ؟
طبعا السبب الحقيقى هو انو قروشهم كتيرة وشغلهم ساهل ومعاشهم مكرب
لو قلت ليهم الاسباب دى معناها kiss the job opportunity goodbye
الاجابة كانت
It is an honour to work for ABC |
واحد مقدم لكلية الشرطة سألوهو في المعاينة قدمت لييه قال : شايف الامن في البلد ما مستتب قلت يمكن اساهم..طبعا كم لواء في المعاينة عاينو لي بعض و لو في طريقة كانوا قاموا ضربوهو.
أول معاينة لي في السودان بعد التخرج كانت في شركة كبيرة تملك مجموعة شركات ، اتصلوا بي و طلبوا مني الحضور عند الساعة العاشرة صباحا و فعلا حضرت في الموعد المحدد و طلبت مني السكرتيرة الانتظار في الاستقبال و فعلا جلست و بعد الجلوس لمدة ساعتين اخبرتني المديرة ان المدير بيقول ليك هو مشغول و تعال بكرة الساعة عشرة و فعلا حضرت اليوم الثاني و تم تعييني في الشركة ، بعد سنوات كنت في لجنة مع نفس المدير لاجراء معاينات و ذكرني بانه عندما اجرى المعاينة لي طلب مني في اليوم بعد ان جلست لمدة ساعتين الحضور في اليوم التاني ليختبر مدى صبري و مدى حوجتي للوظيفة.
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: الحاج حمد الحاج)
|
Quote:
عندنا قريبنا جاب ورقو عشان يشتغل هنا
وهو مهندس من سنة 1968
المهم قدموا ليهو في شركة بتاعة مقاولات
لما المدير قرا الورق بتاعو قال والله الزول دا الا اقوم ليهو من كرسيي دا
لكن دا مؤهلات اكتر من شركتي زاتها وبقى ليهو سبب
لي هسة ما لاقي وظيفة في قطر
|
تعرفي يا شبكة مشكلة قريبك دا وكثيرين مثله تكمن في عدم التقييم الصحيح عند التقديم لمتطلبات الوظيفة وحجم الشركة
فالسيرة الذاتية يجب ان تفصل على مقاس الوظيفة المعروضة .. اعلم ان هناك خطا شائع يقول بتضخيم السيرة الذاتية لتبدو
جاذبة ومبهرة ولكن عمل كهذا دون التحري عن متطلبات الوظيقة وحجم الشركة يودي لنتائج عكسية لان الـــ candidate يعتبر
over qualified فيستبعد من الوظيفة .. لازم يكون في تناسب في الكفاءة ومتطلبات العمل ولا باس لو كانت كفاءة المتقدم
اقل بقليل من متطلبات الوظيفة يعني يكون العمل challenging بصورة او باخرى لانها ستجعل المعيّن engaged
وتتيح له room for improvement او مجال لتطوير نفسه.... لانه في حال ان مقدراته اعلى بكثير من متطلبات العمل
تاكدي انه لن يبقي في هذه الوظيفة لمدة طويلة او كهذا يظن خبراء الــ HR
استاذنا الحاج حمد سلامات وشرفت بوست اخونا النصري
Quote:
واحد مقدم لكلية الشرطة سألوهو في المعاينة قدمت لييه قال : شايف الامن في البلد ما مستتب قلت يمكن اساهم..
طبعا كم لواء في المعاينة عاينو لي بعض و لو في طريقة كانوا قاموا ضربوهو. |
الزول دا بدل يحمرو ليهو كان يسالوهو عن مقترحاته لتطوير الامن واذا اعطا اقتراحات ذكية وعلمية وعملية كان ممكن النقاش يتوسع لافاق ارحب.
من الاشياء التي يسعى لمعرفتها الـــ interviewers هي مدى تحفّز الــcandidate للقيام باعباء العمل وحدود طموحاته في الشركة كلما زادت
صبت في مصلحته اثناء المقابلة..
اذكر في مرة سالت متقدم لملء شاغر صراف باحد الافرع لماذا اختاره دون غيره لملء الشاغر لمعرفة امكانية تسويقه لنفسه فقال انه يعلم انه
سوف يرتقي بخدمات الفرع فسالته ان كان يظن ان مستوى الخدمات في الفرع المعني ركيك (وهو زبون في نفس الفرع) ( وهو سؤال مفخخ بطبيعة الحال )
فقال انها ليست بركيكة لكنها دون المستوى المطلوب فشرحت له الاعباء المركبة التى يقوم بها الصرافين في الفرع المعني وهو فرع مزدحم للغاية ومتطلبات
الــ multitasking "وصعبتها ليهو شديد " لمعرفة مدى جاهزيته واستعداده للقيام بالمهام المبالغ فيها التى ذكرتها .. سكت برهة وقال لي هل هناك
من يقوم بكل هذه الاعباء ومع هذا يقدمون خدمات عالية للعملاء فاجبته بنعم ... فقال لي اذن ان الامر غير مستحيل وانه سيكون من هذه الشريحة بل افضل شخص فيها..
وبقراءة لغة جسده والــ positive energy الذي ملا به المكتب سالته عدة اسئلة اخرى وقمت بتعينه وكان هذا الكلام قبل تلاثة سنين ..
هذا الشخص الان مدير الصرافين بجدارة بنفس الفرع..
طرح روح التحدي من قبل المتقدمين اثناء المقابلات بشكل ذكي ودون اسفاف بالضرورة يصب في مصلحتهم (في الحالات المحايدة) لانها من الاشياء التى يتحراها خبير التعين..
ام "لطع" المتقدم ساعتين دون مقابلة في البلد دي بتجيب لينا الهوا:)
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: حسين نوباتيا)
|
فى حكاية ال over qualified دى عندى قصة كلما اتزكرها اشعر بمغصة..
اثناء عملى فى تلك الشركة المشهورة فى وظيفتى المكتبية ظهرت وظيفة فى
مجال تخصصى باسم فنى كمبيوتر ..
انا من الفرحة قدمت طوالى وبنفس السيرة الذاتية المكربة والمدنكلة....
الوظيفة كانت فى مدينة قريبة من تورنتو وتبعد عننا بالعربية حوالى ساعة..
عمل لى المعاينة اتنين من مهندسى الكمبيوتر وكان واضح عليهم انهم ما من
قسم الموارد البشرية ...هم فقط دايرين زول للوظيفة ...وصلت للمعلومة دى
من طريقة ادارة المعاينة ووضوح عدم خبرتهم فى الشغلانه ....
فى اثناء المعاينة وضح لى اننى قريب جدا جدا من الحصول عليها من ناحية الكفاءة
والخبرة والشهادات لكن المشكلة انو المهندسين بدو يقولو لى انو الوظيفة اقل من امكانياتى
وانها متعبة وفيها عتالة وتراب (ازكر انه زكر كلمة dust بالتحديد) قلت ليهو ياخ دايرها وانى
بحب العمل الشاق ....شكله ما اقتنع ..
بدا يقول لى برضو انت ساكن بعيد والوظيفة ما بتستاهل تسافر ساعة كل يوم
قعدت اقول ليهو حارحل لسكن قريب ..
فى الاخر قال لى لازم يكون عندك تامين خاص فى عربيتك لانك "حتعتل" كمبيوترات الشركة من فرع لفرع ..
قلت ليهو حاعمل التامين ده ..
فى الاخر شعرت بانهم غير متحمسين لتوظيفى والسبب السيرة الذاتية ..
لو كنت من البداية عدلتها لتناسب الوظيفة لما دخلت فى الدوامة...
بعد الحادثة ديك بقى عندى مجموعة من السير الذاتية تناسب اى وظيفة فى الدنيا....
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: اميرة السيد)
|
مـرة فى أوهايو.. مدينة اسمها هاملتون (هاملةٌ) كما يسميها احد الأخوة.. ذهبت لمعاينة لوظيفة دعم فنى
technical support.. وكان السؤال الأخير: لو اتصل واحد وقال ليك عندو يد واحدة، التانية مقطوعة، وداير
يعمل ساندوتش مربة وزبدة فول سودانى.. تقول ليه شنو..
الإجابة كانت قريبة من اخليه يضرب لناس المطافئ لأن عملى هو دعم مشاكل الأجهزة التابعـة للشركـة وليس
مساعـدة الناس لعمل ساندوتشـات..
ما إتصلوا بى تانى ما عارف ليه.
.
| |
|
|
|
|
|
|
|
|
 Re: نقطة ضعف السودانيين عند التقديم للوظائف (Re: Abureesh)
|
*** شكرا مقدر لصاحب المبادرة ولكل المتداخلين لما عمه البوست من جملة فوائد .
*** كانت عضويتى فى لجان إختيار الموظفين جزء من مهامى فى آخر وظيفة عملت بها.
لذلك ملاحظاتى فى هذا الصدد أعتقد أنها قد تفيد .
سوف أحاول استعراض الأهم منها لكثرتهاوسوف استعرض أهم محاورى فى المقابلات :
أذكر أننى كنت العضو (المرجح) أى صاحب الرأى النهائي فى حال اختلاف رأى العضوين الآخرين
وكانت الوظيفة (مستشار تنمية اجتماعية) وكان عدد المتقدمين 3 وكلهم كانت مستوياتهم
المهنية والشكلية متقاربة جدا رغم اختلاف جنسياتهم، واختلف العضوين الذين كانا معى على تحديد
المرشح الأفضل ، وقبل أن أحدد رأيى اقترحت على العضوين أن نقابل المرشحين مره أخرى ونطرح
عليهم السؤال التالى : كلكم مناسبين للوظيفة ولكن ما هو ما يميزك عن الآخرين لشغل الوظيفة ؟
بالفعل تم ذلك وجاءت إجاباتهم على النحو التالى :
الأول: رأى أنه الأجدر لأنه الأكثر خبرة ، وكان على صواب .
الثانى : رأى أنه الأجدر لأنه عمل فى المجال الأكاديمى كمحاضر فى نفس المجال . وكان على صواب .
الثالث : قال بالحرف الواحد أنه انسان بسيط جدا جدا جدا جدا جدا جدا وبحب النكته جدا وبيألف
نكات كمان .
فقطع علينا ذلك الجو الرتيب و المحير بأن قمنا باختياره بالإجماع وكان ومازال محل إضافة قيمة
حقيقية لتلك المنظمة .
*** أما أهم الأسئلة التى كانت إجاباتها تمثل فى نظري حجر زاوية المقابلة فهي :
* هل لديك أى معلومات عن نشاط هذه المنظمة أوالمؤسسة ولماذا تقدمت لهذه الوظيفة .
* هل لديك أى سؤال ؟
* هل كنت تتوقع سؤلا ولم نسألك له وما هو ؟
* هل حصل أن مررت بمشكلة بعملك السابق وكيف تجاوزتها ؟
* ما هى أسباب تركك لعملك السابق ؟
( هذا طبعا بالإضافة الى جملة أسئلة المقابلة )
* كذلك السؤال المرتبط بالمسائل العقائدية و التقاليد ، فقد سبق أن سألت إحدى المتقدمات
عن رأيها فى ترك الحجاب إذا لزم الأمر وهو كان أحد المتطلبات فى منظمتنا رغم أنه لم يكن مفعلا .
فرفضت المتقدمة الوظيفة فى الحال رغم شرحى لها الأمر وإبداء إعجابى لها بتمسكها بقناعتها.
*** أما طبيعة إجابات هذه الأسئلة :
بالطبع هناك أجابات نموذجية لبعض هذه الأسئلة وهناك ما هو منطقى تقتضية ظروف الحال . على سبيل
المثال إجابة السؤال الأول ممكن تكون : عن من هو رئيسى المباشر إذا تم قبولى لهذه الوظيفة ؟
وهى الإجابة المثلى فى تقديري . أو عن أسس تقييم الأداء فى المنظمة أوعن فرص التدريب فيها.
وتصبح أهمية هذا السؤال مضاعفة إذا لم يسأل المرشح عن الدرجة الوظيفية فى حال لم تكن
لم تكن معلنة .
أما أهمية السؤال الثانى فهى تمكن فى ما تمثله لنا الإجابة As feed back
*** كذلك يجب على المرشح الإهتمام كثيرا بأسئلة أقل أعضاء لجنة المقابلة حديثا ،
فدائما ما كنت آخر المتسائلين وأظل أراقب
كيفية أجابة المرشح لأسئلة زملائي من حيث الشكل و المضمون بمعنى مراقبة مدى إلمام المرشح بالجوانب
التقنية للوظيفة ومراقبة سلوكه منذ دخوله علينا ومظهرة ومدى تمكنة أثناء الإجابة .
*** ملاحظة مهمة وهي :
أنه كلما كثرة الأسئلة على المرشح فهي دلالة إيجابية فى كثير من
الأحيان على نية المنظمة فى ضم المرشح . وبالطبع العكس غير صحيح .
*** أكرر شكرى مرة أخرى لصاحب المبادرة متمنيا أن أكون قد أضـفت ما يفيد .
| |
|
|
|
|
|
|
|
|
|
Re: نقطة ضعف السودانيين عند التقديم للوظائف (Re: الطيب عثمان يوسف)
|
شكرا الطيب على الاضافة الدسمة....
للاسف نحن ما عندنا اى خبرة فى الجانب الاخر من تربيزة المعاينة عشان
كده اى اضافة بتجى من بهناك فهى مفيدة جدا جدا .....
فعلا الشخص الذى يتحدث قليلا فى المعاينة هو اكثرهم خطورة لانه بكون مركز
على الجوانب السلوكية وال behavioral ...
فى رسالة حمير القطينة ...قعدت افكر فيها لفترة طويلة وحاولت ابتعد
عن الاطباق الجاهزة للقضية ....
ليه ما يكون السؤال العجيب ده اختبار حقيقى للمتقدم لمعرفة مقدرته على
مواجهة الاستفذاذ و المواقف العجيبة ....السؤال مفاجئ وغريب ..
اكيدالمتقدم للوظيفة رجع للحظات قليلة لسجيته الاولى وتعرى تماما اما المعاينين
وهى فرصة ممتازة للحكم عليه خاصة من المعاين الساكت الصامت ...
لو تعامل مع السؤال بحكمة وصبر واستطاع امتصاص هول الصدمة فهو بحق يستحق تلك
الوظيفة ..اما اذا اتبلم وكضم فتلك دلالة انه ربما لايستطيع مقابلة احتياجات الوظيفة
من صبر وطولة بال و هدوء ..
طبعا ده كله بافتراض انو الوظيفة تتطلب التعامل مع الجمهور بصورة يومية ولساعات طويلة
| |
|
|
|
|
|
|
| |
Elawad
smart_ana2001
جعفر محي الدين
Balla Musa
Safia Mohamed
خالد العبيد
Abureesh
حسين نوباتيا
SHIBKA
Abdlaziz Eisa
محمد أبوالعزائم أبوالريش
ابوعبيدة حسن محمد
نوفل عبد الرحيم حسن
حيدر امين
احمد محمد بشير
sari_alail
علوبه
Zomrawi Alweli
البشير دفع الله
Ammar Elyas Babiker Hassan
Asma Abdel Halim
keiga2000
Siddig A. Omer
malik_aljack
مازن الجمّال
Dalal Ezzaldin
الحاج حمد الحاج
الطيب عثمان يوسف
فيس بوك
تويتر
انستقرام
يوتيوب
بنتيريست