|
|
 نــداء لذوي القلوب الرحيــمة...حالة تقطّع القلــب
|
في زول في المنبر دا هنا..... اول حرف من اسمو....باء... باء بقر
وما بجيب اسمو
خايف البوبار يفسمو
زعل واتحرق في شان انا قلت موقع سودانيزونلاين فعلا يستحق يرشحوهو لجائزة حريات النشر في البوسطي الكاتبو ابو هريرة زين العابدين
باللوال قبل علي في صمة خشمي وقال لي يا سفيه..... قلت معليش اخليهو لي الله العارف السفيه منو فينا.... تاني وصفني بالمغفل قلت معليش يمكن يكون قايل نفسو تفتيحة وانا عارف هو يخربو لا تفتيحة ولا شيتين.... بقي لي في تولاتي قدر ما انضم تخفس علي ويشتمني... بشتيمة ماها في.... اخر حاجة بهتني وقال لي" امي"..... دي دخلت علي وحات الله... وحات الله انا لا امي ولا حاجة... هوي ها.... عاين جاي .. ما تشوفني كدي... والله الانقليسي العندي انت ما عندك... ولا كلكم القاعدين في امريكا ديل عندكم.... وحات الله داك الليلة لميت لي في خواجة امريكاني ضهبان بالسوق العربي وشبكتو ليك انقليسي ونضم كبار خليتو فاتح خشمو يعاين لي ساكت... حتى نورالدائم ود دفع الله كان ماشي معاي حلف علي علا اخلي الزول قال الخواجة حننو وحات الله لو ما حلف علي دفع الله كنت لي حسي قاعد انضم فوق الخواجة داك... اتاريهم الامريكان ديل يخربن ما بيعرفو انقليسي ...نحن خايفين منهم ساكت..... الواحد قدر ما يتواضع تجبروهو وتمرقوهو من طورو تخلوهو يتبوبر..في رمضان دا.... اها النقولك قوله انا لي حسي من كنت بقرا في الاوسطى ما دقوني في الاسبلينق غير ستة مرات بس.. انت دقوك كم مرة؟.... انت تلقاك في حصة الاسبلينق كنت تمسك حنكك وتقول ضرسي متاورني وتشيل دفتر العيادة وتزوق من الحصة.. انت قايل اللمور دي نحن ما عارفنها؟....وقالو انت حسعتية في امريكا دي وقت تمشي المطعم عشان تاكل ما بتعرف تقول شنو بالانقليسي.... كان جيعان ومشيت وداير جداد تاكلو ..تطلع فوق الطربيزة وتقعد تبطبط بايديك وتقبل علي الجرسون وتقول لو.. " كوككووووووك" يعني داير جداد....النوريك ليها عملن لي الله اسمها chicken......chicken.....اها شفتا الكومبوظيشن دا كيف؟....عشان تامن.....وبعدين تعال هنا.. مالك يا جنا بتطلع فوق الطربيزة وتبطبط؟؟؟......ما تبطبط في وطاة الله دي.......
بكري دايرين لنا انتحان كومبوظيشن انا وزولي حرف الباء دا كل يوم اتنين... فشان نشوف البجي اللول منو فينا؟ والله كان ما جا الطيش ما تديني ايدك......
موضوع البوسطي الاساسي
نداء لذوي القلوب الرحيمة:-
النضم دا ما ليهو علاقة بالموضوع..... يا اخوانا.... كل ما اقوم من الصباح القى حواجبيني نازلات لي تحت...وقربن ينزلن تحت العوينات.... والنصيبة الليمات دي انا قايم لي في فلهمة ..قاعد انضم واقعد ارفع حواجبي... خفت ان نزلن تحت العوينات انضم كيفن وارفعن كيفن؟.....غايتو الله يكفينا شر الما نقدرا..... داير يلم فيني عولاق اخر العمر يا ربي...؟؟؟...دحين يا جماعة كان فيكم دكتور اخصائي حواجبين صبي وعاجباهو روحو اليقول لي رايو....وانا من تالا قروش تب ما بقصر معاهو قدر العندي الملمها واديها ليهو واقعد اباطي والنجم.....عاد اخير حواجبيني يضيعن ساكت؟
وكان في زول في لندن اليسفرني لندن... وما يهمو... من الميطار يطلقني... وانا بجيه نفسي.. والله عندي انقليسي يحير ناس لندن ديل جت......
|
|
 
|
|
|
|
|
| العنوان |
الكاتب |
Date |
| نــداء لذوي القلوب الرحيــمة...حالة تقطّع القلــب | سجيمان | 09-18-07, 06:35 PM |
 Re: نــداء لذوي القلوب الرحيــمة...حالة تقطّع القلــب | سجيمان | 09-18-07, 07:23 PM |
| Re: نــداء لذوي القلوب الرحيــمة...حالة تقطّع القلــب | عبد المنعم سليمان | 09-18-07, 07:43 PM |
| Re: نــداء لذوي القلوب الرحيــمة...حالة تقطّع القلــب | سجيمان | 09-18-07, 08:47 PM |
| Re: نــداء لذوي القلوب الرحيــمة...حالة تقطّع القلــب | اساسي | 09-18-07, 09:07 PM |
| Re: نــداء لذوي القلوب الرحيــمة...حالة تقطّع القلــب | amin siddig | 09-18-07, 09:27 PM |
| Re: نــداء لذوي القلوب الرحيــمة...حالة تقطّع القلــب | amin siddig | 09-18-07, 09:36 PM |
| Re: نــداء لذوي القلوب الرحيــمة...حالة تقطّع القلــب | Muna Khugali | 09-18-07, 09:44 PM |
| Re: نــداء لذوي القلوب الرحيــمة...حالة تقطّع القلــب | amin siddig | 09-18-07, 09:58 PM |
| Re: نــداء لذوي القلوب الرحيــمة...حالة تقطّع القلــب | سجيمان | 09-19-07, 03:58 PM |
| Re: نــداء لذوي القلوب الرحيــمة...حالة تقطّع القلــب | سجيمان | 09-19-07, 02:47 PM |
| Re: نــداء لذوي القلوب الرحيــمة...حالة تقطّع القلــب | سجيمان | 09-19-07, 10:28 AM |
| Re: نــداء لذوي القلوب الرحيــمة...حالة تقطّع القلــب | Ali Alhalawi | 09-19-07, 12:04 PM |
| Re: نــداء لذوي القلوب الرحيــمة...حالة تقطّع القلــب | amin siddig | 09-19-07, 12:18 PM |
|
| |
سجيمان
فيس بوك
تويتر
انستقرام
يوتيوب
بنتيريست