مدينة جدة ،، الشقة لمغترب سوداني يسكنها مع زوجته و أولاده و بناته ،، شقة واسعة في حى من أحياء جدة القديمة ،، هو محسي من الشمال و هي من بنات الجزيرة ،، الإثنين في منتهى الكرم و الأريحية و الصبر و طول البال ،، يستقبلون المعتمرين في كل المواسم ،، و يستقبلون الحجاج و الحاجات ،، و يستضيفون بقلب قوي شجاع كل الزائغين من الحج و العمرة و العاطلين عن العمل و الهاربين من كفلاءهم ، و الحردانات أزواجهن إلى حين حضور الأجاويد ، كل هؤلاء من أهل الشمال و الجزيرة ،، لذا تجد الشقة خليط من الثرثرة ( باللغة النوبية ) و إنبهال الكلام بلهجة أهل العوض ،، و تأتيك أحيانا زخات من الدوبيت و المسادير منطلقة من الصالون ،، و تنطلق من حين لآخر أغنية باللغة النوبية من مسجل في ركن قصي بنفس الصالون ،، فيختلط حابل ذاك بنابل هذا. أهل العوض يعرفون أن البساط أحمدي ،، لأن ست البيت ( بنتهم و هم أخوالها و أعمامها ) ،، أهلنا المحس ،، ماخدين راحتهم بالكامل ،، فصاحب البيت ( ولدهم و إبن حتتهم ). اللغة النوبية تنطلق دون توقف و هذا ما يزعج أهل العوض و يجعلهم ( يطنطنون تحت تحت : و الله ما فاهمين التَكْتَح ). فيستعملون كلمات لا يعرف أهلنا المحس مغزاها فهي من الدارجة ( العميقة الموغلة في مفردات بيئة أهل العوض ) ، حتى أن واحد من عندنا سمع من واحد من أهل العوض كلمة ( متل أَتَكَنٌو ) فحسبها ماركة ساعة يابانية فحاول أن يسأل عن سعرها و يقتنيها.. ( ها يا زول إنت بي صُحَك ولا بتهظر ؟ ) .
عُمْرة في عز الحر ،، الشقة عامرة بأهل العوض و أهل الزوج المحسي ،، نساء و رجال ،، شيبا و شبابا. الصالة و غرف البيت ،، و السطوح ،، لا مكان يخلو من البشر ، كتل متراصة دون ململة. الصالون جردوه من الطقم و تم فرش المساحة كلها بالسجاجيد و الأبسطة و المخدات و الملايات و البطاطين و الألحفة. العمائم في كل ركن و معلقة خلف الأبواب على المسامير ،، و شالات من كل الأشكال و الأحجام ،، بعض العراريق موضوعة على المخدات لتجف من العرق .. تقبع حفاظة ماء كبيرة بالقرب من الباب و ترقد عدة أكواب بلاستيكية على الغطاء. حقائب من مختلف الأشكال و الأحجام تملأ الأركان. سلال النفايات البلاستيكية عامرة ببقايا الصعوط و قشر الفواكه و التسالي. المكيف الصحراوي لا يتوقف ليل نهار ،، تشفق عليه و أنت تسمع أزيزه فكأنه يشتكي لك من البلل الدائم و نشفان القش و السيور.
الزوجة تقف منذ الصباح الباكر كعادتها كل يوم ،، تطبخ حلة ماكنة من ملاح الويكة ،، ثم ( تلخ ) عجينا لزوم القراصة و آخر لزوم الكسرة. الإبن الأكبر لا يجد كراسة الرياضيات ، فقد أخذها إبن خالة أمه و إقتطع منها عدة ورقات لزوم ( تضريبات المنصرفات ) ثم رمى بالكراسة تحت السرير. حوض الغسيل مسدود و المياه طافحة و سائلة حتى باب غرفة النوم بسبب إستفراغ حاج عبدالله فيه إستفراغا كثيفا بعد إن إلتهم ( خمسة سندويتشات شاورما ) يبدو أنها كانت بايتة و مليئة بالمايونيز المضروب. المسجل الجديد في البيت لم يعد يعمل ، فقد وضعه أحدهم على خط 220 فإحترقتْ فيوزاته. إشتبك ( صالح ) مع ( الخير ) لأن الخير إنطلق ( يدوبي ) بأعلى صوته فإنتهره ( صالح ) : إنت هسع مش جيت من بيت الله ؟ أقرا ليك قرآن ولا حديث يا أخي ،، بعدين صوتك دة مزعج خالص. إنتهى الإشتباك بأن أقنعوا ( الخير ) بالذهاب للسطوح لإفراغ موهبته ، فخرج و هو يهجو ( صالح ) بأبيات من الدوبيت و هو يضغط على مخارج حروفها كمذيع برنامج ( البادية ) حتى لا يلتقط ( صالح ) معانيها. الحاجة بتول تصر على أن تترك ست البيت عملها في المطبخ و تناولها غويشات و ( أحفظ مالك ) و الخواتم التي تخص حفيدتها لتملأ عينيها من الأصفر الرنان. ( إسماعيل ) يحاول جاهدا أن يفهم فئات العملة السعودية ، فهو لا يعرف الفرق بين الفئات الورقية ، فقد إشترى علبة بيبسي و أعطى صاحب البقالة البنغلاديشي ورقة ( أم خمسين ) دون أن ينتظر الباقي و رجع إلى البيت و هو يتجشأ غازات المشروب ( و يصر عينو بعد كل تجشؤ ) .. أحد الجيران المصريين ، يشتكي لصاحب البيت بأن إثنين من الضيوف طرقوا باب شقته منتصف الليل و هم يصرون على أن هذه هي شقة الزول ، حتى و بعد أن أتى المصري بزوجته و عياله و قال لهم : أنا صاحب البيت يا قماعة ، شأتكو التانية اللي في الوش دي ،، حرام عليكو ،، عاوزين ننام بأة .. البنت الصغيرة و هي تبكي لأمها : يمة ،، الراجل أب صلعة داك أكل كيس الشيبس بتاعي كلو. (حمد ) بأعلى صوته من الحمام : يا جماعة صابونة الجن دي قدر ما أدسها ما ألقاها.. و بعدين منو دة البيستعمل بشكيري دة ؟ يرد عليه ( جبريل ) بصوت خفيض و هو يغمز ( لبابكر ) : الصابونة ما بتاخد معاهو غير دعكة واحدة أب جسما زى أبو القنفد دة ،، هو بي نضمو دة عاوز ليهو صابونة شحدة ساي.
( كرار ) و هو يضحك حتى يستلقي على قفاه و هو يشير بأصبعه إلى رأس ( السر ) المحلوقة و قطع من القطن تتناثر في عدة أماكن من رأسه : إنت الزول دة حلق ليك بي أسنانو ولا شنو ؟ جو الصالة يعبق برائحة غريبة ، فقد أشعلتْ الحاجة زينب قطعة من القماش لتستنشق دخانه مقتنعة بأنه علاج للصداع النصفي الذي يلازمها منذ زواجها من ( صابر ) ذو الثلاث زوجات قبلها تحت إلحاح أبيها الطامع في ثروة ( صابر ). لا تبالي بإحتجاجات بقية النساء و تواصل الإستنشاق و هي تقول : ربنا ما يوريكن وجع الشقيقة دة ،، و الله لو قالوا ليكن إتبخرن بي بعر غنم كان ما بتابَنٌو. حاجة ما بتتقابل. و تشد نفسا عميقا حتى تدمع عيناها. ( الرضية ) تدخل خلف ست البيت في غرفة النوم ، و تطلب منها على إستحياء سلفة لأنها ترغب في شراء ( تياب و شباشب ) للمتاجرة بها في الحلة بالسودان. ست البيت و هي محرجة تعتذر لها و تقول : و الله زوجي ليهو شهرين ما أدوهو الراتب ،، بيدوهو على قدر مصاريفنا. فتلوي الرضية بوزها و تخرج و هي تتمتم : تلقاكي خاتاهن رُزَم رزم.
منتصف الليل ، ينطلق شخير ، بدأ منخفضا ، ثم بدأ يعلو شيئا فشيئا من الصالون ،، فينطلق الإحتجاج من سكان الغرفة المجاورة ، سرعان ما هدأتْ الإحتجاجات فقد بدأ صوت شخير آخر بغرفة المحتجين يفوق درجته ذاك الآخر بأكثر من درجة على مقياس ( شِخْتَر ) .. ( الحاجة سكينة ) تتسلل إلى المطبخ لتسكت جوع بطنها ، فهى قد حردتْ العشاء بعد ملاسنتها مع ( الرضية ) بسبب إنتقاد الثانية لها بأن ( توبها ) ما توب واحدة في عمرها. تصطدم بحلة كبيرة على الأرض فيتحدث صوتا إيقظ ست البيت التي جاءت مهرولة إلى المطبخ ،، مما حدا بالحاجة سكينة بأن تتظاهر بأنها تريد أن تشرب الماء ،، فناولتها ست البيت ( جك الماء ) فكرعته كله حتى تنسى الجوع ، و عادت إلى فراشها و هى تلعن الرضية و تلعن المكابرة... ينتهي موسم العمرة .. و تبقى الشقة كميدان معركة إنجلتْ لتوها ... لتستعد لموسم آخر ..
09-03-2007, 01:12 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
Quote: والله كان ما قلت ساكنين جدّه كنت اقول ديل انا ونادر..
حسع يا مريم بتحصل عندكم تداخلات لغوية زى الحصل للجماعة ديل في جدة ؟ نس عربي و ناس رطانة و شي دوبيت و شي شخير بالليل غايتو سكن جدة ما جربتو و لكن حكاية إستضافة كميات من الخلق دي إبتدت شوية شوية تنحسر
09-03-2007, 01:39 PM
عثمان سيد أحمد عثمان سيد أحمد
تاريخ التسجيل: 05-11-2006
مجموع المشاركات: 607
Quote: منتصف الليل ، ينطلق شخير ، بدأ منخفضا ، ثم بدأ يعلو شيئا فشيئا من الصالون ،، فينطلق الإحتجاج من سكان الغرفة المجاورة ، سرعان ما هدأتْ الإحتجاجات فقد بدأ صوت شخير آخر بغرفة المحتجين يفوق درجته ذاك الآخر بأكثر من درجة على مقياس ( شِخْتَر ) ..
الريس أبوجهينة
سرد شيق وجميل ولقد تابعته بدرجة
فاقت مقياس ( شختر ) 0 !!!
مزيدا من الإبداع 00
مع مودتي 000
09-03-2007, 05:07 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
مقياش ( شختر ) إختراع لمعرفة درجة شلهتة الإنسان خلال يومه و يعتمد المقياس على نوع و سرعة و قوة الشخير و بالمناسبة هناك شخير ينطلق دونما وجود لحمية أو مشاكل في الجيوب الأنفية .. و لكن ربما في جيوب الجلابية أو البنطلون.. عندنا كتالوج مفصل عن هذا المقياس للراغبين الإتصال بالدكتور محمد حسن
من لن يقرؤه .. فقد عاشه كواقع .. حتى في السودان .. ما زالت حالة شقة هذا المغترب الممكون تعيشها معظم الأسر .. و هكذا هو السودان و أهله .. حالة فريدة و متفردة لا نجدها في أي بلد على الخارطة الكونية
دمتم عزيزي
09-03-2007, 02:46 PM
د.محمد حسن د.محمد حسن
تاريخ التسجيل: 09-06-2006
مجموع المشاركات: 15194
لم يورد قلمك سيد البيت وهو قادم من العمل مرهقا" ينط فوق الناس النايمة حتى يصل سريره وهو ممسك بنعلاته فى اتجاه غرفة نومه ليصلها بعد كد وتعب ليبدأ مشواره غدا" صباحا" بنفس هذا التعب . دون ان يحضر هذه البنوراما الاجتماعية التى تدور يوميا"
غايتو ناس جدة ديل ليهم الجنة عديل .
بابكر زيكو
09-05-2007, 07:54 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
Quote: لم يورد قلمك سيد البيت وهو قادم من العمل مرهقا" ينط فوق الناس النايمة حتى يصل سريره وهو ممسك بنعلاته فى اتجاه غرفة نومه ليصلها بعد كد وتعب ليبدأ مشواره غدا" صباحا" بنفس هذا التعب . دون ان يحضر هذه البنوراما الاجتماعية التى تدور يوميا"
تخيل يا بابكر الجزئية دي براها عاوزة ثلاثة فصول كاملة ... أنا سلطت الكاميرا بس على الزوار و حالة البيت .. الزوج و الزوجة عاوزين كاميرا براهم
دمت
09-03-2007, 05:49 PM
هاشم أحمد خلف الله هاشم أحمد خلف الله
تاريخ التسجيل: 01-16-2007
مجموع المشاركات: 6449
Quote: نعم إنتهي موسم العمرة وليبداء بعدها موسم الحج وهكذا
الحال , كان الله في عونكم يا اهل جدة ويا اهل مكة , فأنتم تحتملون الكثير إرتفاع الإيجار وغلاء
المعيشة وووووووو .
أنا بتذكر يا هاشم و نحن في عطبرة ... بيتنا كان بيت حكومة .. كبير و واسع و ماهل .. ما حصل يوم بقى بدون ضيوف من أهلنا الحنان الجايين من الشمال للعلاج أو البحث عن عمل في الورش .. تخيل لو جينا ما لقينا ضيف في البيت كنا بنزعل .. كان البيت بيبقى ليهو نكهة خاصة لما يكون في ضيف أو أكثر .. بيدي لزخم البيت طعم تاني .. بس لاحظ الفرق وين .. الفرق في الحالة الإقتصادية حسع و زمان غلاء الشقق و الإيجار تدني الرواتب المسئوليات الجسام ضيق مساحة الشقق
زمان قبال العرس يجوك الناس قبال شهر و يقعدوا لغاية بعد العرس ما يخلص بأسبوع حسع في النادي على طول و يتعشوا و يسمعوا ليهم أغنيتين تلاتة و يتوكلوا على الحي الدائم قبال المواصلات تقيف ..
كان الله في العون
09-04-2007, 01:28 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
السلام عليكم صوت ارتطام جسد ثقيل بالأرض إنطلقوا نحو الحمام خفافاً وثقالاً الطريفي .. إتْ كويس آ زول ؟ الطريفي ... الطريفي ... نَعلْ ما اتعوقت ... صوت أنين ينطلق من الحمام وصوت يسب ويسخط يفتح الطريفي باب الحمام ....ويخرج وهو يسير مترنحاً مغمغماً... الأدبخانة دي كان وهطّوها في الدائمة دي ... مالها؟ يعني الزول كان داير يقطع الجُمار .. زي الداير يبنيلو حيطة .. غايتو تاني عِلِ نندرب مع ناس الكورة حتين نقدر نمرق في ادبخانتكم دي دي بلد شنو اي شيء فيها ما راكب عَدلو ........... أبو جهينة ... شكراً للسرد الجميل
............ وما الناس إلا هالك وأبن هالك *** وذو نسب في الهالكين عريق
09-05-2007, 12:07 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
Quote: صوت ارتطام جسد ثقيل بالأرض إنطلقوا نحو الحمام خفافاً وثقالاً الطريفي .. إتْ كويس آ زول ؟ الطريفي ... الطريفي ... نَعلْ ما اتعوقت ... صوت أنين ينطلق من الحمام وصوت يسب ويسخط يفتح الطريفي باب الحمام ....ويخرج وهو يسير مترنحاً مغمغماً... الأدبخانة دي كان وهطّوها في الدائمة دي ... مالها؟ يعني الزول كان داير يقطع الجُمار .. زي الداير يبنيلو حيطة .. غايتو تاني عِلِ نندرب مع ناس الكورة حتين نقدر نمرق في ادبخانتكم دي دي بلد شنو اي شيء فيها ما راكب عَدلو
و الله يا الزوول رجعتني سنوات طويلة للوراء .. ذكرى تلتصق بجدار العقل في نفس سياق ما أتيت أنت به هنا
دمت
09-05-2007, 08:24 AM
haroon diyab haroon diyab
تاريخ التسجيل: 06-20-2007
مجموع المشاركات: 23215
Quote: عليك الله كمل وورينا الشقة دي في رمضان حالته كيف .
في رمضان بلا شك ( هاديء نهاراً و جايط ليلا حتى السحور ) ... الكويسة إنو ناسنا لو جو عمرة في رمضان بيكونوا طوال النهار مجاورين الكعبة من صلاة الصبح و ما بيرجعوا الشقق إلا بالليل ..
رمضان كريم يا هارون
09-05-2007, 09:55 AM
بشير حسـن بشـير بشير حسـن بشـير
تاريخ التسجيل: 11-26-2004
مجموع المشاركات: 3420
سردك واقعى تماما ، ورغم عن هذه المناكفات والمحارشات ، إلا أنها جميله جميله ، وجايبه معاها البركه وما أدراك ما البركه ، يعنى تلقى الواحد راتبه 2000 ريال وأكل الضيوف فى رمضان بس يكلف أكثر من 3000 أو 4000 ريال ، ولكن هنالك كريم بيتم وبيكمل كل واحده عنده نقيصه فى حق ميسه .
تخريمه : ــ
عندى واحد صاحبى فى جده ، ربنا كارمه بالضيوف دايما ، يعنى ضيوف رمضان بيلاقوا ما بعد الحج طوالى ، وكثيرا ما يجوه ضيفان بيكون بيعرف فيهم واحد بس ، الباقيين بيكونوا معرفة الواحد ده ، وإتعرف عليهم يا دوبه فى الطياره ول فى الباخره ! شفتوا كيف البركه تخلق من العدم !!!!!
بشير حسن بشير ( أبو جومانا )
09-05-2007, 01:21 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22492
Quote: عندى واحد صاحبى فى جده ، ربنا كارمه بالضيوف دايما ، يعنى ضيوف رمضان بيلاقوا ما بعد الحج طوالى ، وكثيرا ما يجوه ضيفان بيكون بيعرف فيهم واحد بس ، الباقيين بيكونوا معرفة الواحد ده ، وإتعرف عليهم يا دوبه فى الطياره ول فى الباخره ! شفتوا كيف البركه تخلق من العدم !!!!!
فعلا الكريم لا يضام ... و لكن يا بشير ياخوي الحاصل لبعض الناس في مثل هذه الشقق فايت حد الكرم بي هناك .. غايتو ما نقدر نقول شي ..
ما نقدر نقول شي دي ذكرتني بي زولنا ال جا أول مرة مكة و شرب موية زمزم و هي حارة و سخنة قام للمعاهو : دي موية زمزم ؟ داك قال ليهو : آآآي فزولنا قال ليهو : غايتو .. ما نقدر نقول شي
دمتم
09-05-2007, 10:29 AM
انعام عبد الحفيظ انعام عبد الحفيظ
تاريخ التسجيل: 12-07-2005
مجموع المشاركات: 8738
Quote: ولكنني أرى ان أكبر مشقة هي تحمل هؤلاء الذين يأتون ضيوفاً عليك دون أن يفكروا هل بإستطاعتك إستضافتهم ام لا !!!
تعرفي يا إنعام .. طبعا أنا قعدت في مصر كتير ... أقصد طبعا القاهرة .. نجد إنو حتى الولد بعد ما يتزوج ما ممكن يجي ياكل وجبة أو يبيت دون سابق موعد ... صحيح بيعزموا عليه لو حاول يطلع في موعد وجبة و لكن نظرا للحالة الإقتصادية بتكون نوع من الكشكرة و عزومة المراكبية. الحال بيختلف في الفلاحين و الصعيد .. هناك لسع في تقاليد القرية و العيب و الأصول .. و هذا ما لاحظته في مناطق محددة مثلا كأسيوط و سوهاج و أسوان و المنصورة و قراها. شوية شوية ما يحدث في القاهرة يحدث الآن في الخرطوم .. بالطبع لسع ما إنتشرت الصفة دي و لكنها في طريقها للزحف غصبا عن كرمنا و أريحيتنا و تقاليدنا.
Quote: ولكننا تعودنا (كسودانيين) ان نعاون بعضنا البعض ولا نتضجر من ضيوفنا عموماً وخصوصاً الأهل منهم لذا كان الله في عون هؤلاء
آمين
دمت
09-05-2007, 10:47 AM
ملكة سبأ ملكة سبأ
تاريخ التسجيل: 06-18-2003
مجموع المشاركات: 3855
Quote: حوض الغسيل مسدود و المياه طافحة و سائلة حتى باب غرفة النوم بسبب إستفراغ حاج عبدالله فيه إستفراغا كثيفا
بصراحة يا أبوجهينة حاج عبد الله بالغ عديل كدا
الله يصبّر ست البيت غايتو
وانت قايل جدة براها؟! نحن هنا في الخرطوم عندنا حاجات قريبة من كدا
بالذات في موسم حش التمر فأهلنا تمارة الصعيد في طريق ذهابهم وإيابهم من وإلى البلد لهم موافق ونوادر قريبة من دي ..
مرة وبعد ان إمتلأ البيت عن آخره بالتمارة بالإضافة لطلاب الجامعات وطبعا الآخرين إقامة شبه دائمة ، حدث في مرة لم يجد أخي الصغير مكان للنوم سوى ان تفرش له امي على الأرض وسط الأسرة المتراصة بالقرب من بعضها.. تذهب أمي لبعض شأنها وتأتي لتجد اخي مازال جالس على كرسي قريب من مكان فراشه كررتها كم مرة وهي تراقب اخي دون ان تسأله ، إلى ان إضطرت في النهايه إلى سؤاله : - انت مانعست ياولد ؟! فكان رده الذي مازال طرفه تُحكى : - والله العظيم نعسان يا أمي لكن خايف انوم زول يبصق فوقي
ومرة تانية وبعد ان توافدت الوفود حضر أخي وقبل مايسلم على زول مشى لأمي وقال ليها : - والله يا امي انا الليلة إلا انوم ليكم في البنبر
وصارت مقولة شائعة وسط الأهل والمعارف
( والله إلا ننوم ليكم في البنبر)
ومثل ما قيل وكعادة السودانيين دائما يظل إكرام الضيف فرض ورغم ماتحمله تلك الفترة من صعوبات وبعض المضايقات إلا اننا نترقبها كفرصة لمقابلة الأهل ومعرفة الأخبار والونسة وزي مابتقول امي السترة والفضيحة متباريات
Quote: بصراحة يا أبوجهينة حاج عبد الله بالغ عديل كدا
الله يصبّر ست البيت غايتو
غصبا عنها تصبر ... و إلا شيل الحال يحصل
Quote: وانت قايل جدة براها؟! نحن هنا في الخرطوم عندنا حاجات قريبة من كدا
بالذات في موسم حش التمر فأهلنا تمارة الصعيد في طريق ذهابهم وإيابهم من وإلى البلد لهم موافق ونوادر قريبة من دي ..
مرة وبعد ان إمتلأ البيت عن آخره بالتمارة بالإضافة لطلاب الجامعات وطبعا الآخرين إقامة شبه دائمة ، حدث في مرة لم يجد أخي الصغير مكان للنوم سوى ان تفرش له امي على الأرض وسط الأسرة المتراصة بالقرب من بعضها.. تذهب أمي لبعض شأنها وتأتي لتجد اخي مازال جالس على كرسي قريب من مكان فراشه كررتها كم مرة وهي تراقب اخي دون ان تسأله ، إلى ان إضطرت في النهايه إلى سؤاله : - انت مانعست ياولد ؟! فكان رده الذي مازال طرفه تُحكى : - والله العظيم نعسان يا أمي لكن خايف انوم زول يبصق فوقي
Quote: ومرة تانية وبعد ان توافدت الوفود حضر أخي وقبل مايسلم على زول مشى لأمي وقال ليها : - والله يا امي انا الليلة إلا انوم ليكم في البنبر
وصارت مقولة شائعة وسط الأهل والمعارف
( والله إلا ننوم ليكم في البنبر
)
دة لو لقى البنبر فاضي
Quote: ومثل ما قيل وكعادة السودانيين دائما يظل إكرام الضيف فرض ورغم ماتحمله تلك الفترة من صعوبات وبعض المضايقات إلا اننا نترقبها كفرصة لمقابلة الأهل ومعرفة الأخبار والونسة وزي مابتقول امي السترة والفضيحة متباريات
بس ربنا يصبرنا على فعايل ناس حاج عبد الله
و الله يا ملكة الزمن دة الناس بقت شوية شوية عينا تبقى قوية و لسان الحال يقول : بلاش سترة بلاش فضيحة .. غايتو نتمنى أن تبقى العادات النافعة فقط .. أما ما يضر الناس فليذهب جفاءا
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابو جهينة
مريم بنت الحسين
مجدي عبدالرحيم فضل
عثمان سيد أحمد
Osama Siddig
يوسف السماني يوسف
الطاهر عثمان
د.محمد حسن
هاشم أحمد خلف الله
الزوول
haroon diyab
بشير حسـن بشـير
انعام عبد الحفيظ
ملكة سبأ
فيس بوك
تويتر
انستقرام
يوتيوب
بنتيريست