|
|
 اخوانا المغتربين نرجو النصيحة والافادة
|
اخونا المغتربين الذين يتعاملون مع جهاز المغتربين نرجو نصحكم وافادتكم
عندي نية زيارة قصيرة اسبوع او عشرة يوم للسودان، وسوف تكون محكومة بمدة الاجازة من الشغل وحجز الطيران فهل هذه الفترة كافية لكى ادفع العوائد والضرائب والزكاة والمساهمة واستخراج بطاقة مغترب واستخراج خلو طرف وعمل تاشيرة خروج واعفاء الخدمة بحيث انه تنتهي هذه الاجراءات في اسبوع؟ وهل الوكلالات قادرة على الموضوع دا وفي هذه الفترة القصيرة ام انه ما اجازف وانتظر اجازتي العادية؟
نرجوكم النصيحة وخصوصا ممن قدموا من السودان في الفترة القصيرة الماضية وخصوصا انه نازلين معاى ناس ضيوف اجانب عندهم عمل وارتباطات ولا ديل براهم مشكلة ؟
|
|
 
|
|
|
|
|
|
|
|
Re: اخوانا المغتربين نرجو النصيحة والافادة (Re: محمد عمر الفكي)
|
الأخ محمد عمر
لك التحية
ياخى انت بتبالغ عدييييييييييييل كده
ده كله فى اسبوع
يعنى تقضى الاسبوع جرى بس وتنسى غرضك الماشى عشانه
لكن اطمئنك
هنالك وكالات خدمات ( رغم انها حاتضبحك ) تقدم لها اوراقك وهم يقوموا بكل الباقى
يعنى هنالك ايضا حلول
موفق يا سيدى واتمنى لك اسبوعا حافلا فى ربوع الوطن الجميل
| |
|
|
|
|
|
|
|
|
|
Re: اخوانا المغتربين نرجو النصيحة والافادة (Re: محمد عمر الفكي)
|
يا ود عمر
سلام
الموضوع بسيط بالرغم من الروتين القاتل .
ولك تجرتبي قبل أربعة أسابيع
سافرت للسودان في إجازة قصيرة (10 أيام)
وكان وصولي عند الثامنة صباحا لمطار الخرطوم وعند العاشرة بمنزل خالي ونسبة لسفري للأقاليم توجهت عند الحادية عشر ظهراً للجهاز ومن صف لآخر بما فيه إجراءات التجنيد كان جوازي عليه تأشيرة العودة وذلك عند الثانية ظهرا ( إجمالي الوقت 3 ساعات) ولاحظ إننا كنا في موسم إجازات .
يا زول أنت طيارة في خلال ساعة بتخلص ( طبعاً موسم العودة إنتهت) .
بس مشكلتنا ليه بندفع وليه نأشر!!!! متى سنصبح مثل خلق الله وباقي الشعوب ؟؟؟
| |
|
|
|
|
|
|
|
|
|
Re: اخوانا المغتربين نرجو النصيحة والافادة (Re: محمد عمر الفكي)
|
الأخ / محمد عمر الفكى ، تحياتى
أنا كنت فى السودان الإسبوع الفات ولمدة 7 أيام ، أبتداء من 24 أغسطس حتى 31 أغسطس
مشيت جهاز المغتربين يوم الخميس 30 أغسطس قبل سفرى من السودان بيوم فقط ، دخلت جهاز المغتربين الساعه الثامنه وعشره دقائق صباحا ودفعت المستحقات وراجعت ناس الزكاه وعملت بطاقة الخدمه الإلزاميه وعملت تأشيرة الخروج وطلعت من جهاز المغتربين الساعه التاسعه والنصف و 5 دقائق صباح نفس اليوم أى قضيت زهاء ساعه و 25 دقيقه فى عمل كل الإجراءات التى طلبت منى .
الإجراءات ما صعبه ولا حاجه ولكنى لم تكن على أى متأخرات ولله الحمد
| |
|
|
|
|
|
|
|
|
|
Re: اخوانا المغتربين نرجو النصيحة والافادة (Re: بشير حسـن بشـير)
|
الاخ محمد عمر
الله يعينك على اكبر مصدر للنكد فى زيارتك للسودان
اولا احرص على ان لا تقوم بدرى فالجماعة ديل ممهولين يعنى تسعة ونص كويسة
لازم يكون معاك - اخ عاطل - عشان يكون واقف ليك فى الصف اثناء ما انت بتعمل
فى حاجة تانية (تصوير اواستجداء تأجيل عند المديرة بتاعت الضرائب)
ناس الوكالات باعد منهم ولما تشوفهم ح تفهم ليه
ناس الالزامية احرص تخلصهم قبل الفطور لان قصة الفطور دى مسالة حياة او موت للقوى العاملة فى السودان ولو لاقدر الله فى حاجة عصلجت معاك بسبب مثلا (السيستم داون ولا الجماعة الموظفين جاهم خبر موت حار كدة) وقعدت لحدى صلاة الظهر فأنسى اليوم داك
المشرق فى الموضوع انه تقدير الزكاة والضرائب بقى كله فى صف واحد بدل تلاتة صفوف قبل كدة
وبرضوا من الاشياء الجميلة بقوا يقبلوا العملة السودانية
نصيحة اخيرة احرص على الهدوء وعدم ازعاج اى من موظفى الجهاز بالتعبير عن الاستياء امامه او الاعتراض على سلحفايئة الاجراءات او ان تشجب توقفه بعض المرات للتحدث مع بعض الزملاء والزميلات
وبعدين يااخى الاجانب ديل مافى ليهم داعى اليومين دى وبلاش فضائح ح تسكنهم وين يعنى ..الهلتون ...... صوت الضفادع من المغرب سمع اضانى دى
وبتمنى ليك اجازة سعيدة ومفيدة
| |
|
|
|
|
|
|
|
|
|
Re: اخوانا المغتربين نرجو النصيحة والافادة (Re: بشير حسـن بشـير)
|
الأخ محمد عمر الفكي ..
بعد التحية ..
تعرف الموضوع فعلا مسألة حظ .. يعني ممكن ذي ما قالو ليك الأخوان تقنع من يوم وتخلص كل إجراءاتك فيه .. وممكن تتعرقل الأمور لأبسط سبب تكلفك 3 يوم من الجري المتواصل .. وطبعا ظروف موسم الإجازات ليها دور كبير في الزحمة الحاصلة .. وكمان مهم جدا تكون مأكد حجز العودة .. واليك تجربتي :
المعاناة الأولى :
انا سافرت في بداية شهر أغسطس في إجازة قصيرة لمدة 9 يوم لمناسبة عائلية .. أولا صادف هطول أمطار متواصلة لعدة أيام مما عرقل تحركي بعض الشيء..
الأيام الأربعة الأولى قضيتها مواصلة أهل وبعض الزيارات الواجبة (عزاءات وكده) وكمان قضيت المناسبة العائلية .. ومن ثم قررت تاني يوم أمشي أعمل إجراءات التأشيرة ..
ويمكن أنا إجراءاتي اقل منك شوية لأني عندي خلو طرف من الخدمة الإلزامية ..
المهم .. وصلت جهاز المغتربين حوالي الساعة 11 صباحا .. وشرعت في الإجراءات .. مرت كل المراحل سريعا - الكويس إنهم جمعوا كل الشبابيك الخاصة بالضرائب والزكاة والخدمات في شباك واحد إسمو (الإلتزامات المالية) وإستلمت ال Print ..
ثم جاءت مرحلة الحسابات لدفع الإلتزامات ورسوم التأشيرة .. وما أدراك ما الحسابات .. صفوف طويلة ومملة .. وبطء من المحاسبين/ات .. ده لو ما الواحدة قامت فجأة بدون مراعاة للبشر الواقفين أمامها عشان ماشة تفطر ..
المهم خلصت المرحلة دي .. ومشيت صف آخر أكثر طولا ومللاً .. وهو صف التأشيرة .. بعد زحف وانتظار وصلت الشباك .. وكنت سعيد بأني خلاص على وشك الإنتهاء من هذا الهاجس .. إستلم الضابط جوازي وجواز زوجتي .. وخلال دقائق معدودة سلمني جواز زوجتي وعليه التأشيرة (الحق يقال انهم سهلوا هذه الخطوة جدا) .. لكن فاجئني الضابط بأن جوازي باقي عليه (شهرين) وينتهي ولازم أطلع (جواز جديد) .. حاولت أقنعوا بأني في زيارة فصيرة جدا وحا أرجع أطلع الجواز من السفارة .. لكن أقنعني بأن السستم لا يقبل أي جواز باقي عليه (6شهور أو أقل) .. ويا فرجة ما تمت 
وفعلا لقيت معاي عدد كبير في نفس حالتي (تتراوح الفترات المتبقية على جوازاتهم من 6 شهور إلى شهر) ..
بديت من البداية إجراءات الجواز الجديد .. بدءأ من الأورنيك والصور (وطبعا ما كانت متوفرة معاي) .. وصفوف طويلة من جديد للفحص والتصديق .. الحمد لله خلصت من كل هذه المراحل في نفس اليوم وتبقى لي دفع رسوم الجواز .. لكن وللحظ السيئ كانت الساعة الثالثة والنصف ظهراً والخزنة قفلت وما كان هناك مفر غير إني أجي أواصل تاني يوم .. (الكلام ده كان يوم الإثنين)
فجر اليوم التالي هطلت أمطار غزيرة جدا من حوالي الرابعة صباحا وحتى السابعة .. مما عرقل خروجي المبكر من المنزل ,, وصلت حوالي الساعة 12 ونص .. لما خلصت من دفع الرسوم كانت الساعة واحدة وربع وبالتالي لازم أجي بكرة عشان أستلم الجواز ... ده كان يوم الثلاثاء ..
يوم الأربعاء (برضو هطلت أمطار في نفس الموعد)  .. وصلت المغتربين ولحظي لقيت الجواز الجديد جاهز .. مشيت مباشرة لشباك التأشيرة إياه ... وبعد طول إنتطار وزحمة وصلت الشباك .. ويا ريتني ما وصلت .. فاجئتي الضابط مرة أخرة بأن خطاب القوائم لازم يجدد (ده خطاب بخصوص تشابه الأسماء) .. وتتصور ده بيستخرج من وين ؟ من مكتب القوائم في رئاسة الجوازات في الخرطوم
الساعة كانت 11 ونص .. أسرعت بالذهاب لمكتب القوائم .. رغم زحمة الحركة ومياه الأمطار المغطية الشوارع .. وبرضو لقيت هناك كمية من البشر منتظرين .. استخرجت الخطاب ورجعت جهاز المغتربين .. المهم بعد كل هذه المعاناة خلصت واستلمت جوازي مؤشر .. رغم تخوفي من مفاجأة جديدة ..
المعاناة الثانية:
أنا كنت عامل حجز العودة من مكتب سودانير في جدة يوم الجمعة .. وانا راجع من جهاز المغتربين مريت على مكتب الخطوط في المطار عشان أراجع الحجز .. وإذا بي أصدم بمفاجأة جديدة .. الحجز معمول خطأ !!!!! بدل ما يعملوه الخرطوم /جدة معمول جدة /الخرطوم .. تصور؟ .. المهم الموظف قال لي مافي مشكلة راجعنا بكرة الخميس انشاء الله بتتحل ..
الخميس الساعة 11 كنت في الخطوط .. طلبوا من الناس الما عندهم حجز ينتظروا بعد الساعة 12 .. وانتظرنا .. وكان العدد كبير .. وبعد محاولة وإتنين وثلاتة والموظف يراجع السستم ويقول لينا مافي مقاعد فاضية .. الظاهر رحلة الخميس اتلغت وأدمجت مع رحلة الجمعة عشان كده الحجز Full ...
والحل؟ انا يوم الجمعة آخر يوم لي في الإجازة .. دوام يوم السبت .. حاولت أشوف رحلة السبت أو الأحد .. لكن للأسف مافي حجز مؤكد إلا السبت اللي بعده
أخيرا ما كان في حل إلا نحول التذكرة من عادية إلى First Class وندفع الفرق عشان نقدر نسافر يوم الجمعة .. وقد كان .. وعلى رأي واحد من الأخوة نحن ما حاجزين First Class وجاهة وإنما مضطرين ..
تصور إنه نص أيام الإجازة القصيرة أصلا ضاعت بين المغتربين والخطوط السودانية .. والحمد لله على شوفة الأهل ..
آسف جدا للإطالة .. بس انا فعلا كنت محتاج أحكي تجربتي دي .. وإنشاء الله الظروف ما تضطرني أسافر تاني في مواسم الخريف والإجازات
ودمت ..
| |
|
|
|
|
|
|
|
|
|
Re: اخوانا المغتربين نرجو النصيحة والافادة (Re: ابراهيم محمد الحسن)
|
محمد عمر سلام وربنا يكتب لك سلامة الوصول إنشاء الله
زي ما قالوا ليك الأخوان الموضوع ساهل جدا لغاية الحتة بتاعة التأشيرة هنا يقف حمار الشيخ في الشبكة
أنا من أول يوم و خلال نصف ساعة خلصت التقديرات و دفعت ما تيسر و أجلت ما تأجل المصيبة بقت في التأشيرة , لقيت صف الأورنيك بس تقول صف كورة للهلال , ليه يا جماعة قالوا الشبكة طاشة تخيل شبكة وزارة الداخلية المحترمة طاشة زيها زي طفل عمره أربعة سنوات يرتدي فانيلة مخططة و ردا ناصل على من يعثر عليها الإتصال بذويها.
عشان أكسب يومي مشيت للوكالات و كلمت البنت المسؤولة إنو أنا خلصت أي حاجة باقي لي التأشيرة فقط فما حا أدفع الرسوم كاملة و هي أربعين ألف للجواز الواحد , المهم إتفقنا على خمسين ألف للتلاتة جوازات, تاني يوم إتصلت على الوكالة ولا زالت الشبكة طاشة
اليوم التالت و الحمد لله جمعت الشبكة و إستلمت التأشيرة
أتمنى ليك حظ أوفر و شبكة مجمعة
| |
|
|
|
|
|
|
|
|
|
Re: اخوانا المغتربين نرجو النصيحة والافادة (Re: محمد عمر الفكي)
|
محمد عمر
أمشي المغتربين ... أقيف متحير كدة!!! يجبك واحد ناطي بقول ليك "أبو سريع كيف يا معلم" قول ليه أوكي بشيل منك الورق ونص ساعة بجيب ليك الورق مؤشر ومقشر وبتدفع ليه 10000 جنيه كدة يعني حاجة حقت جري... وكان الله يحب المحسنين... طبعا دي رسوم الخدمة المستعجلة على الرغم من إنها ما حكومية لكن كلو بياكل وأخير تديها لي ضهب ده أكل عيشو مما تدفع حتى ضرايب وما تعرفها بتمشي وين...
والخيارات السابقة كلها ممكن وزي ما قال واحد من الأخوان الإجراء في حد ذاتو ما مشكلة لكن ببقى لي أدفع ووينو البدفعو من 100 سنة!!
الله يسهلها عليك.
أمير
| |
|
|
|
|
|
|
| |
محمد عمر الفكي
قرشـــو
الطاهر عثمان
ولياب
ismeil abbas
بشير حسـن بشـير
احمد التجانى احمد
ابراهيم محمد الحسن
محمد البشرى الخضر
فيس بوك
تويتر
انستقرام
يوتيوب
بنتيريست