|
الصوفية عند الغالبية قشرة ..يا سلااااام الزول ده صوفي!!
|
الفنّان تلقاهو الليل كلّو يسكر ويغنّي ويجبجب ولمن تعمل معاهو لقاء يقول ليك : تشبّعت بروح الصفوية ومعظم ألحاني مستمدّ من ترتيل المصحف وانا صوفي بالميلاد.. الرسّام تلقاهو اليوم كلّو يتكلم عن ماركس وعن الشيوعية وعن الإشتراكية يقوم يعمل ليهو معرض لوحات يقوم المزيع يقول ليهو لاحظنا إنو معظم لوحاتك يكسوها اللون الأحمر والأخضر ؟ توووووشك زولنا يقول ليهو طبعاً ده نتاج طبيعي لأني نشأت في بيئة صوفية فغلبت على معظم لوحاتي ألوان الصوفية الأحمر والأخضر والصوفية علّمتنا دراسة الطبيعة والتمعن في معانيها وأسرارها وأبونا الشيخ الله يرحمو كان بيقول لينا ونحن صغار اااااااا ولد الدنيا فانيا والحي الله .. الشاعر لا يخلّي ليهو خصر لا يخلّي ليهو ردف لا يخلّي ليهو نهد لا يترك رقبة ولا عيون لا خدود لا شفايف ويجو الجماعة يقولوا ليك شاعرنا تشبّع بروح الصفوية وتربية الخلاوي وكتابة اللوح وحتّى مفرادته يختارها بعناية من سور القرءان الكريم .. في الحِلّة تلاقي أبو الشباب مسطول للكتاش وجنّو بنقو والنهارية كلّها ما بين الند وبخور التيمان ودخان الفيل وبالليل يدرع السبحة ويلبس الجلّابية ويا حمد النيل جاك زول وسبحان الله الشكل ده بيترك إنطباع ممتاز في نفوس الأخرين يصل حد الإحترام ويقولوا ليك يا سلاااااااام فلان بالرغم من إنو بتاع بنقو لكن زول متصوّف .. المديح الأيامات دي طالع موضة الفنان بالنهار يمدح وبالليل يغني ولمن تسألوا يقول ليك حب النبي مزروع فينا والمديح نقاء ونحن إخترناهو عن قناعة وتهذيب للنفوس .. الشباب تلقاهو جنو مشاغلات وتتكيل في الشجر وجكس لأبعد الحدود ولمن يجيبو مدحة في التلفزيون يقول ليك يا سلااااااااااااام حيييييييييييي بنحبك يا رسول الله ومدد يا شيخي مدد حييييييييييييييييييي وحدوووووووووووووووه.. صراحة تصرف زي ده بيترك إنطباع كويس جداً في نفوس الأخرين لأنو نحن بي طبعنا محبين لي رسول الله بي الفطرة لكن يبدو إنو أخرين ضربو في الوتر الحساس ده وبقو عاملنو زي إستايل كده .. وحدووووووووووووووووووووووووووووووووووووووووووووووووووووووه
|
|
|
|
|
|