|
شلاقة محمد حسن الخمجانة الودتو لي خالد المحرب في البطانة
|
اتشالق محمد حسن وقال يعمل زي المغتربين العندهم عوائل ويسافر اجازة للسودان بالعربية او ( السيارة بلغة نجد) ونتجاوز كل العمليات من استخراج اوراق التربدق ولحد ما مرق من سواكن ( لانه أي واحد من المغتربين اندق بالتريبدق كتب تجربته في الصحف السيارة او الاسفيرية فما عيزين نكرر وفقا لتعاليم بكري سيد الحوش وفكرة محمد بالسفر برا انه يزور صديقه ابو شنب وشيخ العرب خالد ابو حريرة . المهم امتطى محمد دابته متوجها غربا من سواكن ، والعيال مبسوطين ومشغلين شريط شخبط شخابيط ولخبط لخابيط والمدام في ابهى حلتها من حنن وزينة معدنية والمعنويات عالية ، ولما العيال ياخدو دقسة تشغل المدام شريط خنان بلوبلو وما عاجباها الا اغنية سجل لي يا الريدة سجل لي عرباتك سجل لي شركاتك ومحمد حسن يقول بي سره آمين تبقى عندي شركات وعربات . وبدا ان هذه الرحلة ستكون ممتعة واحس محمد بهدوء اعصابه وسكينة انه في وطنه
وفجاة بدأت تظهر في الطريق لافتات كبيرة
( انت في البطانة )
(خفف السرعة )
ولان الظلام بدأ يتسلل بدات تظهر فلاشات
( نقطة تفتيش على بعد 2كلم ) هدأ محمد حسن السرعة الى ان وصل النقطة نزل القزاز جاءه عسكري - ماشي وين يا اللخو - والله داخلين البطانة زيارة لي خالد - خالد منو - خالد المحرب ( ابو حريرة) - اها شيخ العرب .. انتو اهلو - لا والله نحن اصدقاءه - معاكم تسريح زيارة؟ - تسريح زيارة؟ - ايوة - ليه هو في المستشفى والا حصل ليه حادث ؟ - مستشفى شنو يا زول المحرب نصيح ما عنده عوجة - طيب والتسريح ليه؟ - التسريح عشان تدخل البطانة في هذه اللحظة يظهر ضابط بي دبورتين عاجباهو روحو - في شنو يا عسكري - مافي حاجة يا جنابو بس الزول ده عايز يدخل البطانة وما عنده تسريح - انت يا زول ما معاك تصريح ليه - والله في الحقيقة انا جيت السودان وقلت ادخل البطانة اسلم على خالد المحرب واقعد معاه يوم يومين وامشي اهلي - والبطانة دي بتدخلها ساي ؟ انت ما بتقرا جرايد - والله في الحقيقة الواحد الشغل ما مديه نفس يقرا روشتة ، البركة في بكري على الاقل الواحد بلقى فرقة يقرا حاجة - وبكري ده منو - ده زول فايق قعد قدام الكومبيوتر وفتح ليه حوش وقال للناس ( من اراد ان تثكله امه فليدخل هذا الحوش) وطبعا هو راجل مسالم لكن اجارك الله من الناس الفي حوش بكري - يا زول بطل النضمي الكتير ، معاك تصريح والا نتخذ اجراءتنا - والله طال عمرك المعلومة دي جديدة علي - اسمع طال عمرك دي بهناك بعد تقطع البحر هنا جنابو وبس فاهم - فاهم جنابو ، بس وريني السالفة عشان افهم - سفة شنو يا زول انت شارب حاجة - ايوة جنابك شارب لبن المراعي عشان ابتسامة الرضى ( وابتسم محمد ابتسامة كلها رضى) - انت زول غريب والله ، على كل لابد من وجود تصريح لزيارة البطانة - طيب كويس وهسة المطلوب مني شنو - المطلوب انك ترسل لي خالد ابو حريرة وتقول ليه انا عايز ازورك وتنده لي رسولك وهو يقوم يرسل ليك زيارة بي صورة منها لينا هنا - كويس ، طيب بس لو سمحت اديني تلفونه ما دام انتو كلكم اهل زي ما قال خالد - قال ليك شنو - قال لي بس انت اصل البطانة وقول خالد المحرب أي شافع يجيبك لي او يديك رقمي - والله كلامو صاح بس نحن جاتنا تعليمات - تعليمات شنو؟ - انو أي زول ما من ناس البطانة ما نديهو ارقام ناس البطانة
ونواصل بعد الفاصل
|
|
|
|
|
|
|
العنوان |
الكاتب |
Date |
شلاقة محمد حسن الخمجانة الودتو لي خالد المحرب في البطانة | د.محمد حسن | 08-14-07, 08:13 AM |
Re: شلاقة محمد حسن الخمجانة الودتو لي خالد المحرب في البطانة | ahmed haneen | 08-14-07, 10:19 AM |
Re: شلاقة محمد حسن الخمجانة الودتو لي خالد المحرب في البطانة | ebrahim_ali | 08-14-07, 10:57 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-15-07, 06:53 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-15-07, 06:47 AM |
Re: شلاقة محمد حسن الخمجانة الودتو لي خالد المحرب في البطانة | حمزاوي | 08-14-07, 10:43 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-15-07, 06:58 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-14-07, 01:46 PM |
Re: شلاقة محمد حسن الخمجانة الودتو لي خالد المحرب في البطانة | مهدى الصادق السيد | 08-14-07, 05:56 PM |
Re: شلاقة محمد حسن الخمجانة الودتو لي خالد المحرب في البطانة | عفاف أبو حريرة | 08-14-07, 06:45 PM |
Re: شلاقة محمد حسن الخمجانة الودتو لي خالد المحرب في البطانة | علاء الدين حيموره | 08-14-07, 07:15 PM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-16-07, 07:17 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-15-07, 07:06 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-15-07, 07:02 AM |
Re: شلاقة محمد حسن الخمجانة الودتو لي خالد المحرب في البطانة | خالد المحرب | 08-15-07, 08:54 AM |
Re: شلاقة محمد حسن الخمجانة الودتو لي خالد المحرب في البطانة | salma subhi | 08-15-07, 09:26 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-16-07, 07:22 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-16-07, 07:19 AM |
Re: شلاقة محمد حسن الخمجانة الودتو لي خالد المحرب في البطانة | بشير حسـن بشـير | 08-16-07, 08:53 AM |
Re: شلاقة محمد حسن الخمجانة الودتو لي خالد المحرب في البطانة | د.محمد حسن | 08-16-07, 09:50 AM |
Re: شلاقة محمد حسن الخمجانة الودتو لي خالد المحرب في البطانة | سمية الحسن طلحة | 09-13-07, 01:47 PM |
Re: شلاقة محمد حسن الخمجانة الودتو لي خالد المحرب في البطانة | Khalid Saeed | 09-13-07, 02:37 PM |
|
|
|