روضة الحاج لون بشرتها شعرا __ مظهر المراة السودانية أمر مهم جدا

Quote: استخدمت كريم وجه يعني خلاص أتنكرت لعروبة السودان ؟؟ طيب البيض ديل جلوسهم تحت الشمس لساعات طويلة او استخدامهم لمستحضرات تجميل بجعل منهم بتنكروا من شنو؟؟؟؟ ياخ روضة الحاج بعد ظهورها فى وسائل الإعلام المختلفة شكلها أصبح جميل ودا شئ لابد منه المظهر دا مهم جدا لاي شخصية عامة وبالعكس بنطالب بيهو كمان. تستخدم كريم تبيض تعمل تجميل فى مراكز متخصصة على كيفها مش هي بس أي سودانية ياريت تهتم بمظهرها وبأي وسيلة بترى انها مناسبة الناس ما تقعد تحاكم فيهم سااي. غايتو الرجال ديل عليهم جنس حركات عجيبة خلاص ازدواجية بشكل رهيب خلاص. العجيب فى الموضوع انو مظهر المرأة بترك وقع وإحساس جميل لديهم خاصة المرأة البتهتم بشكلها ومظهرها. اللف والدوران دا لزومه شنو؟ وبالمناسبة فى مواهب سودنية كتيرة جدا المظهر كان سبب فى عدم انتشارهم انا مبسوط جدا من هاجر كباشي فى الفترة الاخيرة بدأت فعلا تهتم بمظهرها واذا واصلت واهتمت بالناحية دي حتاخد وضعها الطبيعي من الاهتمام والشهرة اكثر من ندوية لانو بالجد إمكانيتها الفنية أفضل منها بكتير.لكن كمان الحق يقال ندوية اهتمامها بمظهرها ممتاز جدا ودي نقطة تحسب لصالحها أتمنى كل السودانيات وخاصة البظهرو فى وسائل الاعلام المختلفة فنانات مذيعات اعلاميات ...الخ ينتبهوا لمسألة المظهر دي. وعندكم قناة النيل الازرق وتلفزيون السودان الفرق واضح ما محتاج ليهو توضيح اعتقد. روضة الحاج بتكتب شعر جميل جدا لديها موهبة أكثر من رائعة. و من زمان أول ما ظهرت على التلفاز كنت بمني نفسي كل يوم انها تبدأ تشتغل على مظهرها و الحمدلله بدأت وانتبهت والنتيجة رائعة بمثل روعة شعرها وأصبحت زي العسل.+ التحية ليها كامرأة وشاعرة و ان شاءالله دائما جميلة وجذابة واصلوا واتصالحوا يا بنات بلدي مع مستحضرات التجميل كلكم عشان في تقنيات رائعة بتجعل لمساتكم محترفة وزي الورد لمن تصالحوا معها وافتحوا للرجال ديل. فى النهاية بجو جارين جري دي نفخة بتشتت مع اول ابتسامة رأئعة على شاشة فضية. السنجــــك