بي صراحة يا جماعة والله أنا قايل نفسي أكتر واحد بحب الهلال في الدنيا لكن شلال المشاعر الانهمر في البورد والاسماء الشفتها فجأءة تكتب في الكورة: زي أسماء الجنيد (سومة) وزي خالد عويس الرجل المفكر( كتب بوستين أو موضوعين عشان أبوساندرا ما يجي ناطي لي) وحتي فيصل نوبى العكليتة خلي تراجي في حالا وكتب عن الهلال واسماء كتيييرة تانية من الخلايا النائمة المعطونة بحب الهلال أثبتو لي انهم أكثر حبا(وأقوم قيلا) لهم الحب جميعا وهم يثبتون لي أننا كلنا في الحب زرق(في ضمه هنا بالله) ... زول تاني لقيتو بحب الهلال أكتر ... أخونا نصرالدين البشير الزول ده يا جماعة قال يومين يدخل يقرا في البوستات الكتيرة دي و ما قادر يكتب حاجة حب لدرجة البكم في حب يا اخوانا أكتر من كده؟؟؟ والله الزول ده الله مرقو من جلطة يوم مباراة الأهلي في القاهرة الله يسامحك يا حكم يا سنغالي المهم الهلال انتصر والمقصورة ثاااابتة في حتتتا ودخل المباراة 375 مليون بالتمام و الكمال
Quote: تحصلت الصدى على معلومات دقيقة تؤكد بان استاد الهلال مهدد بالانهيار بسبب ان الاعمدة الخرصانية لمقصورة الاستاد لا تتحمل الحمولة الجديدة من الكراسي التي تم تركيبها وقد تحصلت الصحيفة على معلومات تؤكد ان المدرجات تم صبها في ارتفاع مستمر مع الانتقال من مدرج لاخر حتى وصل الارتفاع الى ما يقارب المترين وهو ما يشكل ضغطاً كبيراً على المقصورة.. وقد اكتنف الغموض ملف تأهيل استاد الهلال بعد ان تعاقد المجلس مع شركة محددة لتنفيذ هذا العمل وهي الشركة المسئولة قانوناً عن التنفيذ ولكنها لا علاقة لها بالعمل الميداني والذي تتولاه شركة اخرى تعمل بالباطن في تنفيذ الكراسي بسبب ان المهندس المسئول تربطه علاقة مع أحد قادة نادي الهلال.. وظهر المهندس عصام مسكين عضو لجنة المنشآت السابق بنادي المريخ من جديد في سطح الاحداث وكشف للصدى عن تفاصيل جديدة للعمل الذي يتم في استاد الهلال وقال ان اي عمل معماري يحتاج لتصريح بناء لا يمكن استخراجه الا بعد دراسة هندسية من اصحاب الشأن واضاف: حسب المعلومات التي وصلتني هناك زيادة تمت في المدرجات بارتفاع 40سم والزيادة التي صبها على المدرجات ستربط عليها الكراسي وهذه الزيادة تعتبر كبيرة جداً ولا تتناسب مع العمل
الشفيف اللطيف اخوى القرضابى الهلالابى الهلال قرض الناس قرض ومرض الترجى مرض يوم امس تدفقت المشاعر من كل صوب وعبت كبابينا شربات فرح بلون اقواس قزح الله يديهم العافيه ويفرحهم ديمه اسرة الهلال من ادريين ولعيبه وجمهور الجمهور ده اكتر واحد يستحق التحيه والتقدير
متاوقة بى فوق للحيطه ... قلت لى المقصرة ما وقعت ؟؟؟ الجال الخبر ده حقو يكوا ليه خشيموا من الشمار الما حار شكلك مش طاير من الفرح بس يا قرضابى .. لدرجة انك نسيت تكتب بى اللون الازرق زى ما وعدتنا مبروووووووك يا يابا والفرحه لسه فاتحا بابا شكرا القرضابى هدفين وفرحتين
07-09-2007, 07:29 PM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
. مبروك ألف يا القرضابي المقصورة لم تنهار ، ولكن ( آمال ) بعض الحاقدين هي التي انهارت يا رب تتواصل الانتصارات .. وصولا للتتويج الذي نستحقه
- شكلك كده ناوي فعلا ( تقرض ) لينااللون الأزرق ما تقول كمان بكري مستهلكو وبيستخدمو في العناوين الكبيرة يا زول ما تنسى انو المشوار لسة طويل وبنحتاج ليهو
ســـــــــــوما وحياة ( ابتساماتك ) فاتتك امبارح صينيتين ( بسبوسة ) شغل العبد لله من النوع البيقولوا عليها : بتاكلي صوابعك وراها ..بعد الهلال أحرز الهدف الأول .. وأطمأنيت بقى بالي كلو مع ( ميزانيتي ) الشهرية لاني وعدت الشباب : ( صينية ) بسبوسة مقابل كل ( هدف ) غايتو لو جات أهداف الشوط الأول الضاعت ديك شكلي كده كنت حأختفي من الرباط كم يوم لغاية ما ينسوا كويس البقت على هدفين .. صينيتين مقدور عليهم (( انا ما ضقت البسبوسة لانو عندي سكري .. بس بفرحتي ديك تخيلت انها كانت لذيذة)) مبروووووووووووووووووووك الانتصار المستحق وعقبال المباريات الجاية .
07-10-2007, 03:40 PM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
يا قرضابي ويا هلالاب يا فرد (في كسرة في الفاء دي بالله)
يعني أكتر من مما يجلب لنا هلال الملايين الفرح الموفق من عند الله ماذا يفعل وبعد أن اقنع ناس قناة الـ ART وخلاهم يقولوا انو أحسن رؤوس حربة في الدورة كلها هما رؤوس حربة نادي الهلال السوداني طيب يا شباب مزمل ابوالقاسم تاني حا يكتب شنو
غايتو أنا أوكد ليكم انو مزمل ابوالقاسم ما عاوز الهلال يشيل كاس البطولة دي لأنو لو الهلال شال الكاس تاني نحن السودان حا نقعد فيهو برانا حتى لو فريق مزمل ابوالقاسم جاب كاس الكونفدرالية ولا وكاس اللوفر زاتو
عندما يلعب الهلال تصمت كل البقية وإنشاء الله البقية تأتي
أبوفتحية
07-11-2007, 11:15 AM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
سلامات يا قرضابي: تعرف يا قرضابي قصه انو الهلال ده عشق الملايين حتي من ناس ما بتوقعهم وقعت لي لمن الهلال عسكر في الدوحه وكنا نحن في لجنه المعسكر ناس في الدوحه دي انا كنت فاكرهم ما كورنجيه خالص لقيتم مسكونين بحب الهلال
اجمل ما في هذا الفوز هو الاحترام الكبير الذي نحدث به محللي "ارت" وخاصه خالد بيومي كامثله
1/الهلال انتصر باقل مجهود 2/ الهلال لعب ب75% من قدراته 3/ راسي حربه الهلال هم الاحسن في الدوره 4/ الانديه العربيه التي تبحث علي محترفين عليها بلاعبي الهلال
والكثير
07-12-2007, 04:48 AM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
الهلال لعب وانتصر بي حقو حقو دا يعني استادو جمهورو لعيبتو مدربو ادارتو في بطولة حقتو برضو حقتو يعني هو الممثل المشرف الوحيد للسودان مع الابطال اما ناس قريعتي راحت ديل خليهم ساي قال الاستاد ينهار قال، انا متاكد انو الاستاد حتي لو كان ح ينهار كان ح ينهار بعد المبارة بي زمن لانو المدرجات كانت ببتفرج علي اولادنا ومن الفرحة تماسكت الجماعة عجبهم الهلال شديييييييد ولما ما لقو ضعف او عيب فيهو ابت انفسهم ان يعترفو بالتفوق فقالو : النجيلة مقرمة ياخ قوووووووووووووومووااااااااااااااااا مزمل غلبتو الكتابة وكبر خط العمود راكوبة قال سرقنا بيت الشعر بتاع من غيرنا يعطي..... فقدوا المنطق وخافوا مبروك للهلال وليك ولينا ولكل الاهلة
07-10-2007, 10:28 AM
Nasruddin Al Basheer Nasruddin Al Basheer
تاريخ التسجيل: 12-09-2005
مجموع المشاركات: 4083
Quote: بي صراحة يا جماعة والله أنا قايل نفسي أكتر واحد بحب الهلال في الدنيا لكن شلال المشاعر الانهمر في البورد والاسماء الشفتها فجأءة تكتب في الكورة: زي أسماء الجنيد (سومة) وزي خالد عويس الرجل المفكر( كتب بوستين أو موضوعين عشان أبوساندرا ما يجي ناطي لي) وحتي فيصل نوبى العكليتة خلي تراجي في حالا وكتب عن الهلال واسماء كتيييرة تانية من الخلايا النائمة المعطونة بحب الهلال أثبتو لي انهم أكثر حبا(وأقوم قيلا) لهم الحب جميعا وهم يثبتون لي أننا كلنا في الحب زرق(في ضمه هنا بالله) ... زول تاني لقيتو بحب الهلال أكتر ... أخونا نصرالدين البشير الزول ده يا جماعة قال يومين يدخل يقرا في البوستات الكتيرة دي و ما قادر يكتب حاجة حب لدرجة البكم في حب يا اخوانا أكتر من كده؟؟؟ والله الزول ده الله مرقو من جلطة يوم مباراة الأهلي في القاهرة الله يسامحك يا حكم يا سنغالي
العزيز القردابي الحمد لله الذي هداك لأن تجد تشخيصاً لحالتي الراهنة فوصفتها بالحب الأبكم، وقد أصبت في ذلك. في مباراة الأهلي السابقة لم أنطق بأي كلمة بل أغلقت التلفزيون ورحت على الفراش ولم أذق طعم النوم. في الصباح المدام قالت لي: البركة الأصبحت كويس ، أمبارح خفت عليك تجيك جلطة، وقد صدقت في كذلك، فحالتي كانت تخوف وتدعو للرثاء. الهلال ده يا حبيب مش مجرد فريق يلعب وبس، الهلال ده كيان لا تصفه أو تنصفه الكلمات، فكما نعتز بسودانيتنا، نتفرد بكوننا هلالاب. كلما أتذكر مآسي السودان بتذكر إنو السلوي في معشوقنا الهلال، وهو كيان يمنحك الأمل لكي تعيش وتنعم بحياة منها نعمة تشجيع الهلال، مرات يساورني شعور غريب بأني بحب السودان عشان فيهو الهلال وليس لأن به أهلي وشعبي والنيل ومحمد وردي. كتير بزعل لهزائم الهلال وأقول خلاص ما حأشجعو تاني لكن قبل أن يرتد إليّ طرفي تجدني أفكر في مباراته القادمة، وهذه حالة عبر عنها الفنان محمد الأمين: ادّعينا وقلنا تاني ما حانشتاق في عمرنا وقبل ما تمر ليلة واحدة بحرارة الشوق غمرنا كم كم لهينا وقلنا يمكن ندفن الحب في سهرنا الحياة صعبت علينا وبأثر فقدك شعرنا شفت كيف حبك حياتنا وكيف بدون حبك نكون؟ وين حانهرب من الهلال وين وين؟ الهلال قدرنا ونحن راضيين بقضاء الله وقدره. بالأمس قرأت كل ما كتب عن الهلال في المنبر، إن كان سلباً أو إيجاباً لكن غلبني أقول أي شيء، لأني خايف كلماتي تكون عاجزة عن التعبير، فآثرت أن أشجع الكلمة الحلوة وأتفرج على الناس وأنا سعيد بهذا البكم وفي خاطري أن ليس كل ما يحس يقال. وبهذه المناسبة أهدي أبياتاً في العشق لسلطان العاشقين ابن الفارض لجماهير الموج الأزرق على امتداد الكرة الأرضية بمناسبة الفوز الغالي: وأضلُعٌ نحِلتْ كادت تقوّمها من الجوى، كبدي الحرّى، من العَوَجِ وأدمعٌ هملتْ لولا التنفّسُ من نار الهوى لم أكد أنجو من اللُّججِ وحبّذا فيكَ أسقامٌ خفيتُ بها عنّي تقومُ بها، عند الهوى حُججي أصبحتُ فيكَ كما أمسيتُ مكتئباً ولم أقلْ جزعاً: يا أزمةُ انفرجي أهفو إلى كلِّ قلبٍ بالغرامِ له شغلٌ وكلِّ لسانٍ بالهوى لهِجِ وكل سمعٍ عنِ اللاحي، به صممٌ وكل جفنٍ إلى الإغفاءِ لم يعِجِ لا كان وجدٌ به الآماقُ جامدةٌ ولا غرامٌ به الأشواقُ لم تهِجِ عذّبْ بما شئتَ غير البعد عنك تجدْ أوفى محبٍّ، بما يرضيك مبتهجِ وخذْ بقيةَ ما أبقيتَ من رمقٍ لا خيرَ في الحبِّ إنْ أبقى على المهجِ.. وفعلاً لا خير في حبنا للهلال إن لم يقتلنا...
07-10-2007, 11:21 AM
بدرالدين يعقوب بدرالدين يعقوب
تاريخ التسجيل: 03-14-2007
مجموع المشاركات: 513
تحيه ود وتقدير الي شخصكم العزيز وانت تسطر وتزين وتشيد بالفوز المستحق
لفتية الهلال الاشاوس بالنصر الذي تحقق لرفعة ونهضة الكورة السودانية في المحافل العربية
والافريقية.
افتكرت انو الاخ عماد ابو الروس هو المهوس بحب الهلال ولكن لقيتك انت ابو الهوس ظاتوووووووووووووو المقصورة لم تنهار واستاد الهلال باذن الله سوف يصبح من اجمل الاستادات في السودان
تحياتي للاسرة الكريمة والاخوان عماد وعصام
07-10-2007, 11:39 AM
abuguta abuguta
تاريخ التسجيل: 04-20-2003
مجموع المشاركات: 8276
Quote: رسالة معبرة من هلالي عظيم.. «فاز الهلال ونزل المطر وبرد الجو».. هكذا اختصر الملحمة وعبَّر عنها، وبما نحب ان نعبر.. ومهما كتبنا فلن نستطيع ان نجاريه في فطانته الفطرية..! * سادتي.. إنه الهلال.. انها الرجالة طاردة الحقارة.. انها صفحة التاريخ التى حجزناها وسطرها فتيتنا بمداد حار بأحرف موغلة بلهيب النار.. فنحن لم نصرع الترجي وحسب وكما يبدو لمن احتل مقعداً على المدرجات، أو تربع القرفصاء على الشاشة البلورية.. بل هزمنا كدأبنا التحكيم.. والتنجيم.. وخطل ادعاءات أهل الحقد من اعلام الدلاقين.. واتحاد شداد الذي كبلنا وقيدنا واراد لنا الوحل الثمين.. ومن قبل ومن بعد الظرف الاهوج اللعين.. يصاب سيدا ويدخل مساوي ليصاب.. وبعد ان طوينا حماقة جبريل نجدها ترفرف باجنحتها في سماء اللقاء.. ثم يظل مهند حبيساً وساكناً مقيماً في محطة الاستهتار.. كورة بدلع ع الآخر.. غلط في غلط يفقع المرارة ويحبط ترقب البشارة ويشعل السلبية بحرارة..! * مهند بات موغلاً في البيات الشتوي.. وكمن لا يهمه كثيراً ان اصاب او اخطأ.. وكمن اجبر على المشاركة.. يريد ان يغني حبيبي أكتب لي وانا اكتب ليك، في زمن يغني فيه نجوم الهلال الملحمة ويرددون والمقل تتطاير شرراً قسماً قسماً لن ننهار طريق النصر فدى الاحرار.. يتناعم مهند في عهد الخشونة ديباجته.. علولو يتمرغ على الارضية وببوذ حذائه يدافر ويدافس ويرفس وصاحبنا يريد ان يعزف بريشة على سلسلة جنازير.. ايه دا يا ولد؟ * ولكننا انتصرنا لان الاستراتيجية كانت مبنية على خطة جهنمية.. والخطة الجهنمية التى وضعها ريكاردو اضفى عليها لمسة نعتبرها وكما اسلفنا ماركة مسجلة.. لمسة خشونة ورجالة.. خضناها برجالة.. التمرير برجالة.. الاحتكاك برجالة.. الاستلام برجالة.. التصدي برجالة.. التمويه برجالة.. والاقوان رجالة وحمرة عين والما مصدق يرجع يشوف كلاتشي عمل شنو وكيف تماها قودوين..! * والساحر ابوبكر شرش صوَّرها.. نقلها بالعدسة حية.. وشرش دا عندو جن بعرفو براه.. وعندو لمسة حنان لقطة.. زي ما عندو لمسة حنان قشطة.. ممكن مرة يجيب ليك صورة لا فيها لاعب ولا فيها كورة بس فنايل بتتصارع في الجو.. ومرة زي المرة دي.. فالود عندو عشق خاص لكليتشي.. مرة جاني داخل في المكتب قال لي انا دايرك تطلق عليّ لقب كلاتشي بتاع المصورين.. قلت ليه طيب جاهوري ح يكون منو؟فرد سريعاً جاهوري بكون «بهاء ملوص» وعباس عزت «ابالو»، وعبد الله يونس «مرق» لانه بشتت اللقطات..! * شرش تابع كلاتشي.. ورصده بالعدسة.. وكأنه شعر بصناعته للهدف الاول لانه بدأ يلتقط له الصور وهو على رأس الخط.. اتاه المدافع فقدم بيمناه الكرة.. ثم رقص بخصره يمنة ويسرة والكرة في مكانها.. ثم مسح بطرف قدمه اليمنى على الكرة وكمن يتجه يميناً، ثم اذا به يسحبها يساراً باتقان فريد.. وبسرعة البرق يتجه نحو الخط والمدافع خلفه محتار.. محتار لأن الاعتراض من الخلف يعني ركلة جزاء وحالة طرد خاصة ان كلاتشي غطى لعبته وكما تتغطى السماء بالسحب الملبدة بالغيوم ولا وميض برقة يشقها متوهجاً..! * وصل كلاتشي الخط وتوقع المدافع ان تقوم قدم كلاتشي اليسرى بعكس الكرة او التسديد على الزاوية الضيقة.. وخاب التوقع لأن الواد الفلتة أتى بالعجب العجاب.. فبالقدم الثابتة والتى كانت سايقة الكورة السواقة الجد وبظهرها لا باطنها «قمة الحرفنة» يسلخها باقتدار فوق الرؤوس.. وقودوين حافظ ومذاكر كويس خالص.. عارف يكون واقف وين.. وببساطة المحترفين، وببرودة المحترفين، وباتقان المحترفين يضعها برأسه في المرمى.. وتووووف هات من جوه يا قون..! * والثاني ما احلاه.. انفراد برجولة.. واحتكاك مع الحارس برجولة.. واقتلاع للكرة برجولة.. وحتى عند لحظة فقده لها رداها برجولة.. ثم قدل نحو المرمى الخالي وأودعها برجولة.. وعندما ذهب إلى الجماهير ليحيها قدم رقصة «عرضة» ولا احلى..! وشن قولكم يا حلوين.. في رجالة كلاتشي وقودوين؟ ابقوا معي..! و.. للشريان ختام..! * راجل يا علولو.. فدائي يا علولو.. ويا علولو انت شجاع وجسور.. ويا وصيف حليلك الحق الحنطور و.. أدردق..! * ريتشارد اسد هصور.. ريتشارد قلب نابض.. ريتشارد عقل ناصح وليبرو فالح ولهجمات الخصوم كابح وجامح..! * وشاهدها محمد عثمان الميرغني.. لا.. لا تذهبوا بعيداً ومن منا من لا يتمنى مولانا على أرض الوطن وما اسعد شعب الهلال ان شرفه حضوراً..! * محمد عثمان الطيب هلالابي يبلغ من العمر سبع سنوات.. يقيم مع والديه بالسعودية.. اصر وشقيقه احمد الذي يكبره بعام على والدهما بحتمية حضورهما إلى السودان لمشاهدة لقاء الترجي..! * والوالد هلالابي موت.. تمنع اولاً وهو راغب.. تمنعه لظروف عمله وارتباط الولدين بالدراسة.. ويبدو ان الرغبة كانت عنده جامحة فتوكل ودفع فرق التذاكر من سنام المصاريف وهاك يا جري نحو السودان..! * الطفل محمد ما شاء الله وتبارك الله هلالابي عجيب.. حيَّر كل المقصورة بفطانته وحلو حديثه وجمال عشقه للهلال.. وعندما انتهت المباراة خفت عليه من الهستيريا وهو يصرخ هلال.. هلال.. هلال فرفعته على كتفي اهدىء من روع فرحته..! * انه سحر الهلال وكفى..! * لم يحدث هبوط للمقصورة، وانما هبطت معنويات من اراد للهلال ومقصورته الهبوط.. حااااحا..! * سيدا اصيب.. مساوي اصيب.. المعز موقوف.. حمودة مصاب.. مهند واطة.. ودرايو اتاه شد عضلي منعه الحركة في الشوط الثاني.. وكرنقو هرب إلى مارنجان.. وبعد دا كلو الهلال كلو جنان..! * يا أسيك سيك سيك.. الهلال معلق فيك..! * اهم درس في هذه المباراة ان نجوم الهلال تجاوزوا مقولة ان الهلال يتأثر بغياب البرنس..! * غاب المعلم ديكو.. وغاب حمودة.. وغاب المعز.. وغاب سيدا.. وغاب مهند حتى بمشاركته، والهلال هو الهلال جبل أشم لا تهزه العواصف وتزيده الظروف الهوج منعة..! * شكراً عصام الشوالي.. شكراً «ايه ار تي».. شكراً لمن انصف الهلال مرتع الجمال..! * وشاعر يريد ان تفصح عنه المشاعر.. ارسل اليَّ ابياتاً ومنعني عن ذكر اسمه.. تابعوا ماذا قال: امسينا بضو الهلال.. واصبحنا بشمس انتصار خدمة يمين وعرق جبين.. صححنا للتاريخ مسار ضوت شوارعنا.. وهطل مطر الفرح يروي الديار بي شوق محصن ببلاد.. اتزح من بيتنا الغبار مين غيرو فارس من جمال.. من نورو ولَّع عزمو نار مين غير هلالنا بيعز وطن.. للمجد حلَّق بيه طار..! * سؤال برىء للغاية ما هي الصفة التى تجعل مالك جعفر يدخل حول الملعب؟ اتمنى ألا يكون الجواب بانه شقيق امين الخزينة وكدا..! * شكراً للجنة الاستاد.. شكراً الاخ عادل الحاج وكتيبته، فلقد قدمتم ما تستحقون الشكر عليه.. وشكر خاص جداً لخلف الله محمد موسى جمل الشيل..! * كتيبة منتدى الهلال أبدعت وهي تلقن الجماهير الامواج الثوانية.. نعم انها ليست المكسيكية، بل بسرعة الثانية.. ناس ضوينا ديل عملوا جمباز اجباري للجمهور.. تقعد تلقاها جاتك تقوم.. الحكاية شنو؟ * وانا ماشي الاسماعيلية رايح جاي عشان اركب الحنطور واتدروش..! * لقاء اسيك والانتصار عليه يعني اننا اوشكنا على الدخول إلى مربع النهائي بحسبان المتوقع من نتائج.. اذن ينبغي ان يكون العمل للمباراة الختامية منذ اليوم..! * وعقب العودة من ساحل العاج سنؤدي الرد امام الاهلي.. يعني اهم لقاء في البطولة.. هل تدرون لماذا؟ تابعونا بس..! * شكراً يا ارباب.. ومن شعر بها ولم يقلها خائن.. ومن شعر بها ولم يكتبها غيران.. ومن لم يشعر بها ليس منّا..! * طبيعي ان يفر كرنقو قبل يوم من اللقاء الى بلدته لانه وجد من يكبر في كومه مثلما ما فعل ذاك الصحافي..! * ألم يجدوا فرصة للنيل من ريكاردو سوى ان يدمغوه بظلم كرنقو؟ * غاب الكبار لأنهم كانوا يترقبون الانهيار.. هزيمة أو مقصورة..! * ونجد العذر لكبير المقام الاخ عبد المجيد منصور والذي لم يعرف له غياباً الا اذا داهمه المرض كحاله اليوم، فتمنياتنا له بالشفاء والعودة لدياره التى احب واحبته برغم اختلاف الاطروحات هنا وهناك..! * وفي ام درمان حنقطع آسيك كيمان وكيمان.. وفي ساحل العاج سنحيلهم الى حملان ونعاج.. والدور والباقي على اخوان الحضري.. مرحباً بكم على مقبرة الخصوم حيث فرك الجضوم..! * تحية لفريق الترجي.. هذا العملاق والذي لا يستحق ان يخرج مبكراً من البطولة..! * التحكيم يلاحقنا حتى في ملعبنا.. الزول دا قطع شك ود خالة الحكم السنغالي.. الغريبة ناس الترجي دايرين يدقوه بعد كل العملوا ليهم؟!؟ * اجر وعافية يا برنس.. وغداً تعود كما تشتهي ونشتهي..! * بطريقتك دي يوم حتقتل ليك وصيف يا علولو.. ولدنا.. حااااحا..! * الاتحاد وباعلان عدم إرفاق مستندات صيتو ارسل وعيداً مبطناً للهلال حتى لا يشركه.. وعندما فاز الهلال وفشل مخططهم عادوا للقول بأن المستندات لا تعيق مشاركته.. لاحظوا التصريح الايجابي بعد الكورة..! * شاهد العصر أمس فكرة جموصية مذهلة.. شكراً عاطف الجمصي المبدع الخلاق..!
تسلم يا القرضابى وحبابك من تانى والله الابتسامات الفى حوش بكرى ده يوم فوز الهلال كان رصوا الفرح الفى الدنيا كان حوش بكرى ده غرق ضحك .. وكنا ملينا الحوش مطامير ابتسامات .. نوزع فيهم لى الحول لكل زول ممكون وصابر
*** متاوقه حاتم اخوى كيفنك انا من يوم عرس الهلال ما لاقيتك ولا حتى حايم ساى بالفريق قلت لى كملتو البسبوسه .. تنفعكم ان شاء الله وتستاهلوها وسلاااااامتك الف سلامه من السكرى يا الحنين والف الف مبروك من هنا لااااااا عندكم للهلال العظيم
**** مشاققة ابو قوته الخرزة والياقوت مبرووووووكه البنيه تربى فى عزكم ان شاء الله اها سميتا شنو ؟ سيموتا؟؟ والله انا اسم سيموتا ده عاجبنى عجب لو كان اسمى سوما بت اب قوتا كان جبت لى بت بسميها سيموتا الف الف مبروك والله اخوى ابقوته البنيه والف حمد الله على سلامة امها والف مبروك فوز هلالنا السمح الهلا لينا اتنين التحية لكل جمهورنا العظيم وربنا يجعل ايامنا كلها افراح وانتصارات
07-11-2007, 05:10 AM
أسامة خلف الله مصطفى أسامة خلف الله مصطفى
تاريخ التسجيل: 12-06-2005
مجموع المشاركات: 7167
وفرحان إنت بالرقم ده .... إن شاء الله يدوك منو 10%.....
اسامة خلف الله سلام ليهو حق يفرح وبنطط ويعمل السبعة وزمتها عارف ليه؟؟ ما عشان 10% من الدخل واحنا كلنا عارفين لمن الغلبة لمن تجي حتت القروش دي يعني واثقين واخر حاجة بنسال منها الدخل يا عمك اما كون انو يفرح ليه؟؟ لانو واحد في المية من الدخل دا بديك احساس بالمشاركة في صنع التاريخ واحد في المية بيؤكد انو: من غيرنا يعطي لهذا الشعب معني ان يعيش وينتصر واحد في المية كاس طويل بنتحملو واعيين، فمابالك بي عشرة مرة واحدة كدا واحد في المية تعني القرب من الزعيم ابوالهل ودي براها تساوي مليارات واحد في المية تعني الوصول لقمة المتعة في المشاهدة والفخر في الانتماء واحد في المية تفسر وبسهولة: انا هلالابي اذن انا حي واحد في المية تعني الكثير المثير والذي لا يمكن حصره في حروف وااااااااااااااااااحد في المية من وااااااااااااااااحد في البلد (سيد البلد) تعني الكثير
فعشان كدا العشرة في المية دي حسابات علينا كتيرة خلينا في واحد حلوة كمية الفرح لازم تكون محسوبة عشان نستوعبا وخلينا في واحد في المية عشان في ناس بخلو البلد لو زادت النسبة دي وزي ما قال تمبس: ....... بعد داك الفورة 10000000000000000
---- من حقنا ان نفرح ومن حقكم علينا ان نفرحكم كما الان
07-11-2007, 12:06 PM
essam&amal essam&amal
تاريخ التسجيل: 11-15-2003
مجموع المشاركات: 2579
انا زعلانة ما تكتبنى ليه ؟؟؟؟ انا هلالابية ابا عن جد عن جد عن جد وحايمة الليل كله مع اولادى فى شوارع ام درمان واشترينا اعلام الهلال بعشرين الف ما لها هينه ولا هينه ؟ لكن اتحدى واحد من الهلالاب كان اروع من عمى حسن . الشارع كله اتعشى من القدرتين بتاعات الفول مجانا وقال لى شالتنى الهاشمية والفرحة واولادى اصبحوا من غير مصاريف . والكلام يا سيدى لفه ودور وكل ام درمان تحكى بفول عمى حسن الوزعوا مجانا الى ان وصل لاحد اقطاب الهلال الميسورين وارسل له كرت تهنئة ومبلغ خمسمائة الف جنيه . قال لى طلعت نصفها دسيتوا عشان اظبط العشاء الجاى بعد اسبوعين .
الف الف الف الف مبرووووووك هلالنا فووووووووووووووووووووووووووق وزى بدر الهلال الهلا ما شفنا ابدا تحياتى يا قرضابى ام وضاح
07-11-2007, 05:01 PM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
العزيزة أم وضاح والله العظيم فقدتك في اليومين الفاتو وغيابك كان مثار تساؤل أما عدم ذكرك فالكلام كان عن الخلايا النايمة المعطونة بحب الهلال عينة سومة وخالد عويس وفيصل نوبي( وديل كلهم كتبو بوستات بعد الفوز) وأنا فرحتا بيهم وانشاالله الهلال دايما منتصر عشان يصحي كل الخلايا النايمة وتحياتي لك و لأولادك ولي عمي حسنِ
07-11-2007, 02:13 PM
جلال ناصر جلال ناصر
تاريخ التسجيل: 09-19-2006
مجموع المشاركات: 376
الحبيب القردابى شقيقى فى حب الهلال والله انا زيك افتقدت نصر الدين البشير وقلت نصر الدين غلب الهلال مايجيببوا الا عندو عوجه شديده وقلت يكون رجع البلد وحضر الكوره فى ضهر الترعه بالراديو انا كنت محظوظ فى عمرى لانى زاملت نصر الدين فى الدراسه لما كنا بنسميهو حمورى وكان احسن من يزبط نص الميدان ولد حريف
وسلامنا وشوقنا الشديد ليهو وامنياتنا للهلال القاعد يفرحنا بالجد بالتوفيق والله السودان لوما فيهو الهلال غايتوا ماكنت حاعرف شكلو حايكون كيف عليك الله بعد الكتبوا فى الهلال ده فى كلام تانى تعال نستمتع مره تانى بما كتب نصر الدين البشير
الهلال ده يا حبيب مش مجرد فريق يلعب وبس، الهلال ده كيان لا تصفه أو تنصفه الكلمات، فكما نعتز بسودانيتنا، نتفرد بكوننا هلالاب. كلما أتذكر مآسي السودان بتذكر إنو السلوي في معشوقنا الهلال، وهو كيان يمنحك الأمل لكي تعيش وتنعم بحياة منها نعمة تشجيع الهلال، مرات يساورني شعور غريب بأني بحب السودان عشان فيهو الهلال وليس لأن به أهلي وشعبي والنيل ومحمد وردي. كتير بزعل لهزائم الهلال وأقول خلاص ما حأشجعو تاني لكن قبل أن يرتد إليّ طرفي تجدني أفكر في مباراته القادمة، وهذه حالة عبر عنها الفنان محمد الأمين: ادّعينا وقلنا تاني ما حانشتاق في عمرنا وقبل ما تمر ليلة واحدة بحرارة الشوق غمرنا كم كم لهينا وقلنا يمكن ندفن الحب في سهرنا الحياة صعبت علينا وبأثر فقدك شعرنا شفت كيف حبك حياتنا وكيف بدون حبك نكون؟ وين حانهرب من الهلال وين وين؟ الهلال قدرنا ونحن راضيين بقضاء الله وقدره. بالأمس قرأت كل ما كتب عن الهلال في المنبر، إن كان سلباً أو إيجاباً لكن غلبني أقول أي شيء، لأني خايف كلماتي تكون عاجزة عن التعبير، فآثرت أن أشجع الكلمة الحلوة وأتفرج على الناس وأنا سعيد بهذا البكم وفي خاطري أن ليس كل ما يحس يقال.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ALGARADABI
ibrahim fadlalla
فيصل نوبي
الصادق صديق سلمان
Omar Bob
Ahmed Mohammed Osman
Nasruddin Al Basheer
بدرالدين يعقوب
abuguta
علاء الدين حيموره
بدرالدين كاجوري
أسامة خلف الله مصطفى
essam&amal
جلال ناصر
فيس بوك
تويتر
انستقرام
يوتيوب
بنتيريست