الى متى يصمت اهلنا اقباط السودان هذا الصمت العجيب!!؟

Quote: اتفق معاك في ان اهلنا الاقباط ما مطالبين ان يكونوا كيانا سياسيا موحدا ولا احبذ ذلك لانه اتجاه طائفي... وانا عندما تساءلت عن هذا الموقف الغريب لاهلنا الاقباط لم تكن هذه الوضعية منحصرة في الشأن السياسي... بل ايضا بقية مناحي الحياة العامة الثقافية والرياضية والاجتماعية لم يتفاعل اوينفعل بها اهلنا الاقباط وان كانت هنالك امثلة موجبة ستكون قطرة من بحر كبير من السلبية..اي لماذا لا نسمع غناء لهم او نشاهد لعيبة كرة قدم او رسامين او شعراء او او....يا اخي اهلنا الرشايدة رغم تخلف بيئاتهم وحظوظهم العسيرة في التعليم وايضا رغم تواجدهم الحديث في السودان انشاوا رايا سياسيا وحزبا هو الاسود الحرة..!! وبعدين متى تعرض اقباط السودان لاضطهاد اجتماعي يارافت معقولة والله دي فرية كبيرة وعلي قول المذيع محمد سليمان يارررررررراجل!

عزيزى هبانى

ده كلام شـنو يا خوى ؟
إنت جيت من البلد بتين
دى كنا بنقولا فى مدنى لسـواقين اللوارى لما يبدوا فى الفتاوى .
فهمى سـليمان طلع من الهلال وسجل فى المريخ قال عشان المستويات تتعادل . شوف الرشاشة . سـليمان ميلاد كان بلعب فى إتحاد مدنى ولولا دخوله الكلية الحربية كان بقى أشهر من حمورى . يوسف صالح جورج كان حارس مرمى المرخ . مجدى نجيب تادرس كان من حراس المرمى . غيرهم كتير. طبعآ نجوم الباسكت بول فى العصر الذهبى . فريق عباس الخرج منه المريخ والهلال كان بيجتمع فى حوش سـليمان تادرس القمص . لما الإنجليز جابوا الفنايل للرشاشات من لندن حبوبتى مارين تادرس خيطت نجوم المريخ على الفنايل .

صوالين الأدب والشعر إنتشرت فى المسالمة . إنت قايل بت ملوك النيل وظبية المسالمة ديل بنات بشاغلوهم فى الشارع . للأسف أغلب الناس ما عندهم فكرة عن التاريخ ده . والقصائد دى ما كانت حب ووله كانت أدب وأصول . أحكى ليك قصة ملوك النيل كمثال . كانت والدها رحمه الله من الأعيان وصاحب صالون ثقافى . تعرضت لحادث كسر يدها وكانت القصيدة هدية وعودة مرض . وكان رجعت للكلمات كويس تلقاها . وكانت هدية عظيمة من شاعر عظيم فأصابت الغيرة شقيقتها الصغرى والتى كانت بنفسها تخدم زوار الصالون فأرضاها الشاعر بقصيدة سيدة وجمالا فريد وكان إسمها سيدة . أصحابك الكيزان الجهلة قبل فترة كفروا هذه القصيدة وأوقفوها عشان حتة (خلقوها زى ماتريد) والحمير ما عارفين إنو ماتريد واحدة تليانية جميلة زوجة أحد الظباط الإنجليز وهى نفسها الغنوا ليها (بين جناين الشاطى وبين قصور الروم)

عن الثقافة والأدب هل تعلم إنه البازار جامع حقيبة الفن حفيدو الشاعر جورج بنيوتى زميل البورد . لم تسمع بالأديب سامى يوسف غبريال مؤلفاته بتدرس الآن فى جامعة السودان المعهد الفنى سابقآ . ما سمعت بمؤلفات عمك عزيز التوم الشعرية وهسه إبنه نادر والصحفى الأديب الكوستاوى نبيل غالى . لم تقرأ لعبدالله النجيب المحامى التى أدت مقالاته للعصيان المدنى . لم تسمع بموريس سدرة وسعد سليمان تادرس ووديع حبشى ؟

طبعآ ديل العارفم أنا بمعلوماتى الضعيفة لكن كان لما فيك بكرى الصايغ ولا شوقى بدرى تقول الروب .

وبعدين الحتة الحارقاك دى

Quote: وبعدين متى تعرض اقباط السودان لاضطهاد اجتماعي يارافت معقولة والله دي فرية كبيرة

ياخى ما تركز شديد . ده ما إتهام مباشر للمسلمين . دى مـ و ر و ثـ ا ت سـودانية أدت لقوقعة نوعية للأقباط . من ثقافة يا حلبى المرادفة لى يا عب . من ما تشـاكلو تبقى قبطى معفن بتاع صفايح . ولا زى صاحب عبد المنعم سليمان من ما يشوفك يبدأ يهتف لن ترضى بك اليهود والنصارى . يعنى حاجات بتجعل الناس أكثر إنزواء . العيب فيها أحمله للأقباط أيضآ . ما تركز كتير وعشان تتفهم المواضيع أكتر أقرا كلام قريبى الحلفاوى الفوق .

كدة أخدت دامة الأسود
----------------
بالمناسبة كتبت م و ر ث ا ت مفصلة عشان ملصقة ما بتجى