هل هذا هو رأيك في السودانين الامريكان الذين أستضافوك يا ياسر تمتام ؟

Quote: العزيز ياسر تمام سلامات و البركة فيكم في سمندلاوي كلامك يا ياسر - اسمح لي - غير موفق علي الاطلاق , فيما يخص السودانيين و علاقاتهم التي وصفتها بالفتور لم تكن موفق في قرأة الواقع الحياتي اليومي لسكان العالم الاول ..السوداني الشغال دايما ده يا ياسر تخيل معاي عندو كم اسرة بساعدها غير اسرتو مع واقع السودان الاقتصادي الطاحن و التشريد الحصل لملايين الاسر بفعل سياسات الانقاذ الرعناء . غير كده السستم في امريكا نفسو بفرض عليك طريقتو , مافي طريقة لي إجازة عرضية او ما شابة , الشغل شغل لكن و رغم ده السودانيين تماسكهم بظهر في حضورهم لكل حفلات المطربين السودانيين في الويك إند و تلاقيهم مع بعضهم و مطايبتهم لبعض , ايضا في الاتراح بتلموا .الواقع مختلف يا ياسر عن السودان لكن ده ما لغي العلاقات الانسانية بينهم و بين بعض (إلا إن كنت تقصد خلافات بعينها بين سودانيين و دي طبعا ما ممكن نعممها علي كل السودانيين بأمريكا). فيما يخص الموسيقيين ايضا لم تكن موفق , لم تكن موفق اصلا في التحدث عن كيف يعيلون اسرهم , لم يكن لذلك داع .. حياة الفنان يا ياسر لها حرمتها ولا تخص الصحافة ولا الصحف إلا بإذنه, كان يمكنك التحدث في العموم عن اشواق الموسيقيين للسودان و ممارستهم لنشاطهم الموسيقي هناك ما لم يحملوك رسالة بعينها لتوصيلها للصحافة. او كنت تقول ما قلت و تضيف عليه ان الفنانيين في امريكا (وهم ليسوا اصحاب مواهب فقط يا ياسر , هم محترفين و من اميز الموسيقيين السودانيين) يعملون في وظائف هامشية لانهم خرجوا بعد ان ضيقت الانقاذ الخناق علي الموسيقي السودانية الحقيقية و فتحت الباب علي مصرعية للاسفاف في إطار مشروعها الحضاري الملهم. و كان تختم حديثك بـ انك احترمت الفنانيين السودانيين بامريكا لانهم قبلوا بالاعمال الهامشية علي ان يشاركوا في ما يحدث في الوسط الفني السوداني من جرائم.