|
بيتنا زمان..
|
الحبيبين كيفنكم جيت جري من المدرسة لابس الرداء الكحلي والقميص اللبني... وكتين وصلت مربعنا لقيت قندران ابوي واقف.. قلت في نفسي يا ربي يكون كان شاحنلو فتريتة ولا عيش. باقي الحمام أليلي من امبارح ما رميتلو شيتا ياكلو.. والجداد تراهو ياكل في نوار القش مع الغنم في المراح المن تالا ناس أم النصر.. طلعت في الترلة لقيتلكم الفتريتي مشتتة مالي الدنيا... واااااجيدلي يبقالي مع راس القندران بملالي شوال... يعني سبوعين والحمام أليلي ياكل ويحمد ربه.. جريت سلك الباب ودخلت رميت الخُرتايي في عنقريب في البرندة وشلتلي جردل ومقشاشة وأمي صاقعالي: انت متين جيت لامن داير تمرق تاني قلتلا: ماني مارق شي داير احصل اسقي الغنم واشتت العيش للحمام والجداد... باقي الجدادي البُني تكضكض باقيلي دايري تركض خميت يا الحبان الفتريتي وبقيت امشي وأجي لامن مليتلي شوال وتكلتوا جنب المراح أليل الغنم.. وشلتلي طرادة من أمي ومشيت علي موسى بتاع القش وقلتلو: بي طرادة يا عم موسى لكن شوفلي الفيهو النوار فشان الجداد خليتو يكاكي داير يرمي البيض في الزير المكسور في الركن.. عمنا موسى ضحك وربطلي القش وجيت مخمخمو وماشي أغني.. لاقتني خالتي بثينة قالتلي ما شوفتة جمال يجي يجيب القش للغنم ديل.. قلتلا خليتو يلعب في كورة الشراب جنب المدرسة قالتلي: الله يقلعوا الولد دة من هو يرضع في شطري معذبني.... ضحكت ومشيت خليتها.. بالله الغنم ديل شافني بس بقن يكوركن.... ميع ميع ميع ميع وانا صاقعلهن: أصُبرِن اللملا الجردل موية فشان تشربن وتاكلن.. صنقعت علي الغنمايي السوداء وقلتلا: ان بقيتي ما تقلتي شي الشهر دة ابوي بيمسكك يبيعك لي عبد الجبار الجزار.. وأنا طالع حدرت للتيس الكبير.. دخلتلن المويي وشريتلهن البرسيم وجاء الجداد وسطن يكاكي وياكل في النوار لكن الجداد البنيي ما جات طالعي والديك اللحمر وعندو ريشايتين صُفُور واقفلها في خشم الزير يمد في جناحو مع رجلو اليمين ويكاكي زي صفاقين عثمان اليمني وكتين يهيجوا... قلتلو: اييي الخرابي باقيلي ركضت خلها لا تكسر علينا البيض أمش علي التانيات طلعت لي برج الحمام ومليت الكوريي فتريتة... لقيت الضكر البني علي الرقيطة قاعد فوق الصفيحي وشغال يسوي في «غووووووغ غوووووووووغ غووووغ» قتلو أصبر الزغاليل خلاص كبرن وباقيلي أمي آآآبتفويتن الجمعة دي وبعداك أن بقيت داير تدخل علي مرتك أدخل.. صنقعت علي الحمامة الرمادية لقيت معاها الضكر أليلا يغوغي ويرفع وينزل في جناحو ويزغد فيها باقي ليهن تلاتة ايام من شلنا زغاليلم... قلت كدي شتَتلم الفتريتي بالله جوا ينطايروا من الصفايح زي قِطيع الصبيط في حش التمُر... نزلت مشيت شلتلي جردل ومشيت جنب بيت عمنا مكاوي باقي الايام دي يبيضوا في بيتهم مليت جردلي رملة وجيت داخل الأوضة ألتنا فرشت الرملة تحت عنقريبي وسويتها مدورة... امي جات داخلي قالتلي انت قاعد تصوت في شنو.. قلتلا الجدادي البُنيي ركضت وداير أجيبها هني قالتلي: يا ولدي بتوســـخ علينا الاوضة وأخواتك يقومن ينقنقن... قلتلا: يمة البرد هناك وإن بقيت ما شفتلا بُكانا سخن البيض دة آآآبيفقس شي.. بشوفلي دبارة أربطها بيها في كراع العنقريب مشيت نقلت البيض من تحتها في الزير وجبتو ختيتو في الرملة وقبضت الجدادي جبتها ختيتها في الاوضة وقفلت الباب فشان ألقالي دبارة أربطها بيها... ما لقيت غير تِكي قديمي ألت أبوي جيت مسكتها ربطها مع كراع العنقريب المن تالا مخدتي فشان من تصبح وافتح عيني أقوم أتبنها وأشوف إن بقى فقست البيض... ليلي ونهاري من مراح الغنم لي برج الحمام لي الجدادي الراكضي وبالليل وكتين امي تجي تمسحني بالجلسرين وكتين أقولها ماني داير اتمسح.. تقولي: شوف وشك كله مليان قشروب ورجلينك ديل دمهن والله ما تتمسح اشيل الجدادي دي ارجعها للزير وسط المراح... باقي عارفاني مستني متين تطلع السواسيو... اسكت اتمسح بي جلسرين الجن دة وادنقر راسي من العنقريب واقعد اتونس مع الجدادي: باقيلي ليكي مدة ما شربتي.. امشي أملالي كوز صلصة موية واخته جنب راسها وتقوم كدي تنقدني في اصبعي واقعد أضحك.. .....
|
|
|
|
|
|
|
العنوان |
الكاتب |
Date |
بيتنا زمان.. | طارق جبريل | 10-30-11, 11:52 AM |
Re: بيتنا زمان.. | ادريس خليفة علم الهدي | 10-30-11, 12:16 PM |
Re: بيتنا زمان.. | ابو جهينة | 10-30-11, 12:26 PM |
Re: بيتنا زمان.. | طارق جبريل | 10-30-11, 03:09 PM |
Re: بيتنا زمان.. | طارق جبريل | 10-30-11, 02:59 PM |
Re: بيتنا زمان.. | عبدالله ود البوش | 10-30-11, 12:55 PM |
Re: بيتنا زمان.. | عبدالله ود البوش | 10-30-11, 01:07 PM |
Re: بيتنا زمان.. | ادريس خليفة علم الهدي | 10-30-11, 01:14 PM |
Re: بيتنا زمان.. | عبدالله ود البوش | 10-30-11, 01:57 PM |
Re: بيتنا زمان.. | عبدالله ود البوش | 10-30-11, 02:15 PM |
Re: بيتنا زمان.. | حيدر بشير | 10-30-11, 03:02 PM |
Re: بيتنا زمان.. | نوفل عبد الرحيم حسن | 10-30-11, 03:10 PM |
Re: بيتنا زمان.. | طارق جبريل | 10-30-11, 03:25 PM |
Re: بيتنا زمان.. | طارق جبريل | 10-30-11, 03:24 PM |
Re: بيتنا زمان.. | طارق جبريل | 10-30-11, 03:23 PM |
Re: بيتنا زمان.. | طارق جبريل | 10-30-11, 03:22 PM |
Re: بيتنا زمان.. | طارق جبريل | 10-30-11, 03:20 PM |
Re: بيتنا زمان.. | طارق جبريل | 10-30-11, 03:19 PM |
Re: بيتنا زمان.. | طارق جبريل | 10-30-11, 03:15 PM |
Re: بيتنا زمان.. | نوفل عبد الرحيم حسن | 10-30-11, 03:36 PM |
Re: بيتنا زمان.. | عبدالله ود البوش | 10-30-11, 03:44 PM |
Re: بيتنا زمان.. | ادريس خليفة علم الهدي | 10-30-11, 04:25 PM |
Re: بيتنا زمان.. | عبدالله ود البوش | 10-30-11, 04:43 PM |
Re: بيتنا زمان.. | طارق جبريل | 10-30-11, 05:38 PM |
Re: بيتنا زمان.. | ادريس خليفة علم الهدي | 10-30-11, 08:35 PM |
Re: بيتنا زمان.. | معتز مقبول | 10-30-11, 09:27 PM |
Re: بيتنا زمان.. | طارق جبريل | 10-30-11, 10:28 PM |
Re: بيتنا زمان.. | عبد الدائم سيد أحمد | 10-31-11, 06:30 AM |
Re: بيتنا زمان.. | طارق جبريل | 10-31-11, 10:22 AM |
Re: بيتنا زمان.. | عبدالله ود البوش | 10-31-11, 07:38 AM |
Re: بيتنا زمان.. | محمد أبوالعزائم أبوالريش | 10-31-11, 07:54 AM |
Re: بيتنا زمان.. | علاء الدين يوسف علي محمد | 10-31-11, 08:05 AM |
Re: بيتنا زمان.. | منصور عبد الرازق | 10-31-11, 09:01 AM |
Re: بيتنا زمان.. | خدر | 10-31-11, 10:09 AM |
Re: بيتنا زمان.. | طارق جبريل | 10-31-11, 10:29 AM |
Re: بيتنا زمان.. | طارق جبريل | 10-31-11, 10:27 AM |
Re: بيتنا زمان.. | طارق جبريل | 10-31-11, 10:26 AM |
Re: بيتنا زمان.. | طارق جبريل | 10-31-11, 10:24 AM |
Re: بيتنا زمان.. | بله محمد الفاضل | 10-31-11, 01:09 PM |
Re: بيتنا زمان.. | طارق جبريل | 10-31-11, 11:57 PM |
Re: بيتنا زمان.. | طارق جبريل | 11-01-11, 03:08 PM |
|
|
|