|
Re: تسنيم عماد عبدالله .. ياخ أنا فرحان بيك (Re: الطيب شيقوق)
|
لى يومين "بنازع" مع الكمبيوتر عشان ..يفتح
وزى ما ربنا نجح تسنيم..اهو نجح المساعى ..
الف مبروك ..يا أبا تسنيم "ابا دى من الجزيرة ايا"
والله نجاح العيال بعجب..وانا عجبنى ليك..ولى بتك الجميلة الشاطرة ..ولى أمها "اهم زول فى القصة دى كلها"
ربنا يزيد النجاحات..ويوصلها لى اعلى القمم فى احلامها وأمنياتها.
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Osama Ahmed)
|
أخوي محمد سيدأحمد .. الله يبارك في أيامك .. و يفرحك بنجاحات عيالك و نجاحاتك ..
Quote: لكن انا بجى قطر عديل كدا وابارك ليكم قول للهادى ادريس هبانى يرسل الزيارة |
و لو ما شلك الراس تشيلك العين .. بس إنت حدد متين و نحنا نفرش ليك البساط الأحمر .. شكرا يا محمد يا قريبي يا جميل تحياتي
عادل فقاد .. الله يديك العافية و يبارك في أيامك .. شاكر ليك إحساسك الحلو .. وكتر خيرك .. تحياتي و مودتي
ياسر الفنان .. شكرا يا شاعر لإحساسك الطيب .. و الله يبارك فيك و في عمرك .. تحياتك وصلت .. و بشكروك عليها كتير إحترامي و الود
تمبس .. يا أصلي مالك يا علاء ؟؟؟؟ الجاك شنو أول حاجة ؟ .. ما تبوظ أعصابنا !!! في شنو ؟؟
Quote: يا اصلي اخوك ( زنقة الفيلة ) ... لما اجي راجع بوريك انا زعلان منك عشان شنو..؟؟ |
و زعلان مني لشنو ؟ و مزنوق في شنو ؟؟؟ بعدين شكرا .. الله يبارك في عمرك يا رب . بس برضو قلقتني . إتكلم .. منتظرك في الماسينجر . تحياتي
عبد الرحمن عزاز ..
Quote: و ألف مبروك أستاذة هميمة المأذون المرقب... |
شكرا يا عبدو ياخ .. على العرس و النجاح .. وكتر خيرك على مشاعرك الحلوة .. يديك العافية
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Emad Abdulla)
|
الجميل جدا إدريس إبراهيم .. يا رجل يا أديب .. كلامك حلو بيشبه كتاباتك .. صلاح عبدالله مجنون .. و هو اللي حول زواجي لمهرجان .. أنا غايتو كنت بس ببشر .. غنى عمار و عامر للصباح .. غنى زي التلاوة .. هسه البنوت كبرن .. ولسه الغنى زي التلاوة . شكرا يا إدريس .. الله دايما يفرحك و يسعد أيامك . مودة و إحترام
صاحبي في السرحان الجميل .. عبدالغني كرم الله .. يا زول يا بديع .. ما بقدر أجاري لغتك .. عشان كده ح أكتفي بعناقك . يديك العافية يا غني .. و يفرح أيامك تسلم يا صديقي الجميل ودي و الإحترام
بكري أبو بكر .. الرجل العمل فينا ما لم تعملو حكوماتنا و الأيام .. ياخي أشكرك و أشكرك .. أول شي على اللمة الإسمها سودانيزأونلاين , البقت بيت و أهل و قبيلة ووطن و عزوة . تانيا على كلماتك و كرتك .. مشكور كتير يا باشمهندس ربنا يفرح عمرك .. تحياتي و إحترامي
هيرو يا بطل .. ما كفاية شكرا على مشاعرك .. لكنها أضعف الإيمان .. و ربنا يبارك في عمرك و أيامك .. كتر خيرك على مشاعرك الحلوة . وكلماتك الطيبة .. يديك العافية تحياتي ليك .. و شكر كبير
هاشم بدر الدين .. قائدي العسكري و معلمي .. وصديقي من الزمن الزاهي . عمودي سلاح لسعادتك .. و إنحناءة تليق بمشاعرك الصادقة .. يديك العافية يا صاحبي و يسعد أيامك و يفرحك و خلاص .. أخوك الظاهر راحت عليهو ودي ليك و تحياتي للعايلة و أخونا أسامة
عبد الجليل و نادوسة .. الناس السمحين .. شكرا يا نادوس .. ربنا يفرح أيامك و يسعدك و تشوف نجاحات عيالك يارب .. شكرا لمشاعركم الصادقة مودتي كاملة ليكم و تحيات الأسرة
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Emad Abdulla)
|
إبراهيم علي .. يا صديقي الحلو .. تسنيم كبرت و كبرت .......... أمها أنا غايتو بررررررره أشكرك على المشاعر الحلوة يا صاحبي و يديك ألف عافية يارب تحياتي ليك و مودة
تيسييييييييييييييييير عوووووووووووووووووضة يا بنية يا رايعة
Quote: تسنيم عماد عبد الله .. ياخ أنا فرحانة ليك ! |
شكر ليك يا تيسير , و لبطاقتك الحلوة و مشاعرك الأحلى .. و ربنا يفرحك دايما و دايما خليكي كده .. تيسير و .. بسس يديكي العافية إحترامي و تحياتي ليك
يا كيك .. يازول يا غالي .. الله يبارك في عمرك
Quote: انا اسع شايل هم شريف ابنى الذى سوف ينتهى من اخر امتحان للشهادة الاماراتية يوم الخميس |
و شريف ناجح إن شا الله .. دعواتنا ليهو تبراهو بالتوفيق .
Quote: ناس الانقاذ جونا وقالو لينا لو اولادكم احرزوا نسبة 100% بنقبلهم ليكم... |
ناس الإنقاذ ح يمشوا بنسبة 10000000% , و المستقبل حق شريف و أخوانه . و البلد حقتنا يا صاحبي .. الإنقاذ طارىء . مودتي ليك و شكر كامل لمشاعرك الحلوة تحياتي للأسرة .. و بوسة في راس شريف من عمو
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Emad Abdulla)
|
حسين حسن حسين .. إنت مصري وللا أجنبي ؟؟؟ صديقي الجميل .. من زمن أجمل .. و حرية و ديمقراطية .. حسين الأديب و الكاتب و الصحفي و سكرتير التحرير و الفنان و الموجع بوطن مسروق .. حسين حسن حسين ..
Quote: كنت أتمنى أن نكون في ظل وطن تعرف فيه تسنيم عمو حسين وأخوها حسن |
لا تعليق يا صديقي و شاكر ليك مشاعرك الحلوة .. ولازلت أحتفظ بصورة لينا في السوداني و تسنيم عمرها شهور .. كبرنا يا صاحبي .. تحياتي لحسن و أم حسن .. و كامل مودتي و إحترامي .. و الحب .
معتصم الطاهر .. الرجل الفنان القامة .. يا صاحبي الشاعر الحلو .. يديك العافية .. و يبارك في عمرك و أيامك و تفرح قدر ما الله أداك .. أشكرك .. و لك في القلب مكان يليق . تحياتي و إحترامي ليك و للأسرة
بهاء الدين بكري يا صديقي الشكر ليك و المودة . أعرف قدر صدق مشاعرك .. ولا أملك إلا شكرا على كل إحساسك الحلو .. تحياتي للأسرة الكريمة مع الود و الإحترام
بدر الدين حلا ..
Quote: أنت سعيد وأنا سعيد والله يفعل ما يريد |
.. تاني تجي ؟؟؟؟ شكرا يا بدر .. يا زول يا براك إنت .. و مبرووووووووووووووووووك لغادة . و أم غادة .. و أبو غادة .. و البنات ديل كبرننا ساكت .. في صمة خشمنا . لكن الله غالب . يديك العافية يا بدر و أحلى سلام و كل إحترامي
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Emad Abdulla)
|
بتى بتى انتى بتى غنوا لك
..... انتى نجحتى وشلتى همى انتى همى شلتى انتى .......
كلهم اتوا خفافا كما النسمة
وغنوا
محجوب شريف وشمت ومى وكلهم ونحن
فى الكنبة الورا يا عماد والف غونى ومستر هارت والباتانونى وكل الصف الورا
مبروك يا حلوم نجاح بتك ومبروك كبيرة يا عماد
يحتاج لها شوق السنين وما حوى بالباب الورا
لم تتاخر هى بل آلياتنا
ومرحبا يا شوق .... اهدى
ويا تسنيم ... اقدلى فاالارض لكى
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: ALGARADABI)
|
..
يا أم تسنيم سلالام وإزيك،.. مبروك علي بنيتك، وربّنا يوديها لقدَّام أكتر وأسمح،.. أهو ما شاء الله مجهوداتك أثمرت، وشايفة حَمّاد "حبيبك" دا، بعد سهرك وشقاك كلو مع البنية وتشجيعك وكفاحك، جايي ينتل الشكرة في جيبو، ويطويها طبقة فخار وفشخرة فوق طبقاتو عمّتو، ويعلي بيها رأسو منفرداً بالتاج والمُلك، لامي ليهو ناس وضكورة زيو، وأررروك وعوووك.. بتي نجحت، وعاينو لي أنا أبو مجتهد وفالح كيف، وشنو وشنو، أحيييي أنا من حركات الرجال الما بتكمل ولا بتنبلع دي،.. يا تسنيم مبروك، وألف مبروك،.. تماضر تسلمي يا أختي علي اللفتة النقابية
التوقيع واحدة سرقت باس ويرد محسن خالد، ..
تنويه مداخلة محسن خالد جاية في الدرب،..
..
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: محسن خالد)
|
من حليمة أم تسنيم إلى السيد/ محسن خالد .. الموقر سلام .. Quote: وشايفة حَمّاد "حبيبك" دا، بعد سهرك وشقاك كلو مع البنية وتشجيعك وكفاحك، جايي ينتل الشكرة في جيبو، ويطويها طبقة فخار وفشخرة فوق طبقاتو عمّتو، ويعلي بيها رأسو منفرداً بالتاج والمُلك، لامي ليهو ناس وضكورة زيو، وأررروك وعوووك.. بتي نجحت، وعاينو لي أنا أبو مجتهد وفالح كيف، وشنو وشنو |
غشاني يا محسن .. و عمل فيها تقدمي ضد الفكر الذكوري .. طلع زول بوري , و نكر جمايلي و طوالي ظبط عدد واحد بوست لزوم تكبير العمة قلت طيب , يمكن الله يهديهو و يتذكر دوري في المعركة دي .. وحاتك عمل نايم , و طبعا نجر لي محاضرة عن بديهية دور الأم و إنه أنا الجندي المجهول ( نصب الجندي المجهول ده زاتو ناس الجبهة كسروه ) .. يعني كلام لا في الشرق لا في الغرب . أسوي شنو , حكم قرقوش . بعدين إنتو يا الرجال أديناكم القدركم ( إنت بررره ) .. فصاحه ساكت و لامن الجد يجد تجدعونا ورا و تتحزموا للشكر .. غايتو , بري منكم . ويعلم الله لامن هو بيجخمس في ورقو و كرورو و ألوانو و كواريكو و نرفزتو , أنا مساهرة أراجع و أذاكر و أأكل و أشرب و ....... الحمدلله ساكت بس . هسه كتر خيرك إنت و تماضر و فضيلي .. والناس البتفهم و تقدر دور الأم و النسوان عموما .. و جندر جندر , أنحنا أخير من الرجال .... بس .. و ح آخد عضوية سودانيزأونلاين عشان أقدر أتحزم و أتلزم ضد الذكورية و فحولة الطرح الورمونا بيها الرجال في كل شي . و الحشاش يملا شبكتو بالمناسبة يا محسن , الزول ده قايل تسنيم نجحت من تانية لتالتة .. سارح في ملكوت ربنا سااااااكت , عاد جنس ده سمعتو بيهو ؟؟؟ شكرا يا أديبنا الرائع , و إن شا الله تفرح بجديدك و جديد و ليداتك .. ........... ملحوظة سغغغغغغغغغغغغغغيرة : لكن و الله يا محسن عماد ده طيب ياخ ..
محسن .. أنا عماد .. أها شفته !!!! .. جبت لروحك الكلام ساي و تورت نفسك , أها دخلوك معانا يا صاحبي .. خُم و صُر .
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: ايوب عبدالرحيم)
|
..
مشتاقييين يا صاحبي عماد، ألف مبروك للبنية وعلي إنجازاتك في رفد ودعم مسيرة الإنسان على الأرض،.. مبروك لبتنا تسنيم، وعقبال تكون بروفيسورة قدر أكسفورد شايف النسوان زعلانات شوية، حول إنو الطفل من يومو بسجلوهو باسم أبو، أها من اليوم داك حق الأم بروح في الكرعين،.. بما أنني أعمل يومياً 8 ساعات في اليوم لا أمانع أبداً تسجيل طفلي باسم أمه، وليها علي أقش البيت وأسوي الملاح وأحرس الشفع، بس التمانية ساعات لهضي رزق ديل يبقن علي ضهر زول تاني،.. دا باعتبار إني ريفي، وبتكلم كشخص ريفي، من النوع المرتو ما بتشتغل بالفطرة، بالتالي برضو ح أصر علي خانتي كرجل ريفي لن يشتغل بالفطرة، يسألوها هي في الشغل.. يا يمة محسنك وينو؟ والله خليتو بلخ في عجين اللقيمات،.. أها يا صاحبي عماد الواجبات المنزلية دي كشفت لي واحدة سرها، يمكن إنجازها في ساعة ونصف، المرجع: (شادية عبد المنعم، الصفحة 18 من مشاجرة ساخنة مع أبو ساندرا، حول غسيل صحون الغداء)
أها من الساعة تمانية ونص صباحا تنقلب عاطل، طوالي تستحمى وتتناول الريموت بتاع الشو تايم، وهاك يا زواعة منزلية، تزهج تقبّل علي المكتبة، تزهج تشوف جار يكون عاطل زيك وتجيبو الشطرنج، شفت النعمة دي كيف يا صاحبي عماد، تصبح مخلوق مفرّغ للحياة، مش للمعايش!.. حَرّم في واحدة صاحبتي بتشتغل معانا هنا دوامين زي –السم الهاري-، قالت لي إنها اكتشفت وتأكّدت مليار في الماية إنو مسألة (المرأة ما تشتغل دي) دا أعدل وأنبل اقتراح قدّمو الرجل منذ وجوده على ظهر الأرض، وإنها ندمانة ندم لمّن دايرة تطرشق علي تاريخ مغالطتها لأصحابها في الجامعة حول حق المرأة في العمل، وإنو (حق تسخير الرجل كحمار عمل) دا أذكى عرض اتقدّم للمرأة منذ تاريخ إنشاء الزواج،.. تاني بتجوا سوق الضُلمّة؟
"تماضر" العنصرية النسوية دي بتوبي منها سنة كم؟
محسن خالد
..
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Ibrahim Algrefwi)
|
فيصل عباس .. يا صاحب الجن .. و النقق الملهمة .. تفرح أيامك .. و يسعد دربك .. و يديك العافيه قدر كلامك السمح يا زول يا سمح .. تحياتي و إحترام
نجلاء التوم .. إزيك .. و إنستري معانا .. البت شبهي و الله .. حتى بالأمارة عندها شنب . الوسامة – كان في - بتكون حقتنا .. ناس أمها طيبين ساكت ... يجبر خاطرك يا زولة يا براك .. و بالمناسبة عاملين حفلة في الديم في بيتنا بمناسبة نجاح تسنيم .. قريب من بيتكم . إتفضلوا قالوا ليكم .. شكرا نجلاء على مشاعرك الحلوة
معتز .. سلام و تحايا الله يبارك في عمرك يا صاحبي كتر خيرك .. و عقبال عيالك
محمد حسين آدم .. تحيات و شكر كتير يا محمد يديك العافية .. وربنا يفرح الناس كلها .. ود ليك و إحترام
صديق الموج .. اما انت فحماد الراوية ختيت الخمسه في الإتنين عشان ما أتفك فيك .. و أمرق جخانينك – بهاء الدين بكري معاي .. أعمل حسابك - أنا حماد الكالو الرماد مع ناس حليمة ديل .. وللا حماد سيد الجقلبه ؟؟ أفرز !!!! يديك العافية يا صديق و يفرحك بالجغبورة و حيدر و أخوانهم .. و سلام تربيع لإنعام .. مودة تبراك ( لصقه ) .
قرضابي .. مش إنت الزول داك العملوه ألفة عشان أكبر زول في الفصل كان هو ؟؟ آآآآآآآآآ .. إتذكرتك ... يديك العافية و يبارك فيك . يا زول من الزمن السمح كتر خيرك .. مودة كتيرة و تحياتي ليك و الأسرة .
سوميتا .. يا عزة الفراق بي طال .. إزيك يا بنية يا فنانة .. وشاكر شاكر حضورك الله يبارك فيك و يسعدك .. مودة ليك و إحترام كتير
طارق الأمين أبوصلعة .. ياخي زغرودتك شرططططططططططط ووصلت تب .. و هزينا فيها و البنوت أدنك الشبال .. يا زول يا سمح ( أنا ما عارف سمح كيف و صاحب صلاح أخوي ؟؟؟ ) يديك العافية يا طارق .. كل الحب
إشراقه حيمورة بت حلتنا .. الزولة سمحة الخلقة و الأخلاق .. يبارك في عمرك و يخلي ليك العيال ويفرحك قدر سبيب راسك شاكر ليك يا إشراقة .. ( أهلنا الدناقلة جنهم و جن إسم إشراقه ده .. يطلعوك مرة أوشراغا .. مره أوشراكه .. مرة أشراكا ) تحياتي ليك و إحترامي الكبير
الطيب شيقوق .. سلام يا صاحبي حضورك شرفنا .. كتر خيرك .. و الله يبارك في عمرك يا رب كل الود و التقدير
تماضرررررررررررررررر شفتي البت عملتها فيني كيف ؟؟ كان في داعي هسه أعمل بوست زي ده ؟؟ أطلع ديناصور يا تماضر ؟ يرضيك كده في أخوك ؟؟ مع إنها دخلناها الإبتدائي سغيييييييييييرة .. زي سنتين كده عمرها كان .. يعني حوالي مممم .. غايتو بيكون عمرها يادووووووب 9 سنه لكن طويله ساكت بس .. شكرا يا طم طم من تسنيم و أمها ومني تقدير كبير و إحترام يليق بيك .. و يا رب يفرح أيامك و بنوتك السمحات ديك . مودتي و تقديري
شروووووووم ريحتني بحكاية يا ولدي دي .. هههههههههههههههههههه مشكور يا صاحبي الجميل يديك العافية و يسعدك كامل التقدير و المودة
أسامة أحمد .. الله يبارك في عمرك و أيامك و شاكر مشاعرك الحلوة كتر خيرك كتير يديك العافية
الإبنة بنت الأحفاد .. أشكرك كتير و كتير وربنا يحقق أمانيك كلها يا رب و يسعد أيامك تقديري و إحترامي وصادق الود .
عصام عبد الحفيظ .. جهز الشيلة بعد ستة سنة كده .. و يكون فيها ذاكرة كبيرة جدا و أصحاب من الزمن السمح و ح أضبح ليك وادي النمل و حديقة القرشي وفوق البيعة نضبح التوم الضلالي .. ياخي واحشني يا عصام و مشتاق ليك .. و مبروك دي ليك إنت .. أنت بقيف فراجي يديك قدر روحك السمحة سلام و تحايا للصبيان .
أيوب عبدالرحيم .. أشكر مشاعرك الحلوة .. و الله يبارك في عمرك ي صاحبي وصلاح عبدالله ما بيعرفك قدري يا .. كيشه . تحياتي الكبيرة ليك و العايلة مع الود
عزاززززززززززززززززززز أول مداخلة لي في سودانيزأونلاين كانت في بوست عنك كتبه حسين حسن حسين لغتك عالية و مليانة .. لغة زول وجدانو ثري و فياض يديك العافية يا عزاز .. و كتر خيرك كتير ربنا يسعد أيامك و يحقق أمانيك يا رب إحترامي و تحياتي
إنعام عبد الحفيظ .. شكرا ليك يا زولة يا راقية .. و ربنا يبارك في عمرك و أيامك .. و يفرحك و يوعدك بالخير كله تحياتي و شكري الكتير ..
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Ibrahim Algrefwi)
|
جريفاوي ..
Quote: ياعين ياعنية ياكافرة يا نصرانية ، عين الحسود فيها عود ، والله اكبر ولله الحمد |
يازول أول شي قول مبروك ... وبعدين .... نتمها ليك : الله اكبر و لله الحمد .. حزب الأمة رمز القوة . قال عين عنية قال .. بالللللللللللللللله شكرا على حضورك يا ... صابيء
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Emad Abdulla)
|
سلامات وعوافي ياعمدة حرم البوست دا الا تسنيم تتخرج حتين نقفلوا النوريك المجاملة الماخمج .. ياسمح يازين .. بعدين موش فرحان وكفاية جضم لينا حفلة بوردابية كدا تكون شاملة العضات المحلية والافرنجية وبالمرة تستثمر خروف ترقيتك العند ناس معاوية دا وبعدين الخروف التاني بتاع صلاح عبدالله عايزنو مشاوي وكدا الجماعة ديل مايخمون بالخرفان الاسفيرية دي عييييييييييييانن بيانن .. ياصلاح ومعاوية همتكم معانا بالخرفان وبعدين اتخايل لي الامير برضو فارض خروفو ..
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: ودرملية)
|
محسن .. يقطع شيطانك .. ياخي شوق ..
طبعا كلامك ده وقع لي في جرح , و فتح نفسي لمناقرة مع الزولة المشوطنة حليمة .. طلعتها ليك هي و صويحباتها الجندر أي كلام .. هههههههها , كلما تحمبك أقول ليها : أها كان مغالتاني , أهو ده كلام الزول المحايد ود الناس ده الإسمو محسن , و طبعا على حس إنك شكرتها تقوم هي تخجل ساكت تسل لسانها فيك ... ألقاها ليك فرصة , أسرح أكتر . ياخي ده برنامج لذيذ خلاص .. غايتو كتر خيرك , زمني ده كلو و أنا جاري واطي و مقطعو في حشاي .. يادوب إنبهلت و جبت آخري . كلامك تمام يا صاحبي .. و يكيف , الكائن القاعد مشارك في البيت ده كائن مستهبل ( المرجع: شادية عبد المنعم، الصفحة 18 من مشاجرة ساخنة مع أبو ساندرا، حول غسيل صحون الغداء) .. و شوف عيني , الشغل كله : مدبلجات مكسكيات / مجلات حنكوشات / مخدرات مصرية في شكل مسلسلات تصيب بالعته و أنيميا الدماغ / شوبينغ !!! / إستقبالات و وداعات و طقوس إجتماعية ما عندها طايووق / مرة مرة غايتو قراية على خفيييييييييف و نت ... و قريب لمواعيد الغدا كده كلفتك كلفتك تتعمل شوية شلنكبات كده ... و بس . تبادل الأدوار معاهن بيكون لذيذ .
Quote: (المرأة ما تشتغل دي) دا أعدل وأنبل اقتراح قدّمو الرجل منذ وجوده على ظهر الأرض، وإنها ندمانة ندم لمّن دايرة تطرشق علي تاريخ مغالطتها لأصحابها في الجامعة حول حق المرأة في العمل، |
عاقلة .. حرم زولة عاقلة و نبيهة كمان . Quote: (حق تسخير الرجل كحمار عمل) دا أذكى عرض اتقدّم للمرأة منذ تاريخ إنشاء الزواج،.. |
لكن إنت تاني كمان ما توريهن الكلام ده .. قرّض على كده خلاص . وده طرفنا من تسجيل الطفل بإسم أبوه , مبروك عليهن المجتمع الأمومي ( نرجع بيوت أبهاتنا خفافا سراعا .. ) .. نشوف ناس تماضر و الجندرية ديل تاني يسلن لسانن في شنو !!! يديك العافية يا محسن ..
و يبارك فيك .. و عقبالك
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Salwa Seyam)
|
الأخ عماد
تصبح, تمسى, تقيل, تنوم على خير
وأظن خيرنا صار رهين أولادنا وبناتنا وهكذا تتألق فوهة أحلامنأ... أو قل أن يصيبنا الواقع بمردوداته الحسام, وهكذا تتسع نطاقاتنا المعنوية ولما يضمحل العمر ويتكأكأ على منحنى ( الغلة الحدية ) صعودا ... فهبوطا... فتسليم.
ربنا يوالي تسنيم بكل سعد ومستطاب, ومزيدا من النجاح ... البر ... والإحسان.
| |
|
|
|
|
|
|
Re: تسنيم عماد عبدالله .. ياخ أنا فرحان بيك (Re: Emad Abdulla)
|
Quote: أيوب عبدالرحيم .. أشكر مشاعرك الحلوة .. و الله يبارك في عمرك ي صاحبي وصلاح عبدالله ما بيعرفك قدري يا .. كيشه . تحياتي الكبيرة ليك و العايلة مع الود |
عماد .... تسلم... ياخال.....
حلوة يا كيشة دي ....
عشان كدة اما قلت ليك ياخال
لانه دايما بسمع منهم الدلع دا خاصة عمر ابدول
تسلم
ودوام النجاح ل ( تسنيم )
| |
|
|
|
|
|
|
|