|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: اللميرة بت اللمير بركة الجيتي . غايتو موبايلي البفا مضرب مثل . طلق اللفاها سبدو ما لقاها اسرة محمد عبدالقادر تحية واحترام باقي المسانيح |
ابوسن كيفك يا زول كنت كلما أقرأ لك مداخلة معصلج فيها موبايلك بتذكر بطارية حسن ود الحليوة حسن بطاريتو بكون شايلها في الليل وحتى لو القمر ضارب والبطارية طوالي معصلجا معا قصصو كتيرة ود الحليوة ودي طبعاً بتعجب ودالبوش القصص دي بحكيها ليهو
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: كضم دي اتعلمناها من ود الفاضلابي .. |
أها لازم تتعلمي عَمَنْوّل : يعني السنة الفاتت مرة يا بت السيد مرتين من حريم ريفنا إتقابلن في الإزبتاليا ( يعني المستشفى ) أها جات واحدة داخلا سألت والكانت موجودة من أول الحكيم جا ؟ ديك ردت ليها اي جا قام قالت ليها : اها بدو إبار شي ردت ليها : بدو إبقا لي اقطع يدي كان فهمتي شي خلي ودالبوش يشرح ليك
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: قام قالت ليها : اها بدو إبار شي |
اوك آ جرادة ما قلنا يا ود المك الشرح بفطس حديسنا دا مرة واحدة ولكن اكراما لي اميرتنا وكلامك دا زي لا هرجل ولا برجل الفاتولة جاب الواحولة قم كشم كر كتبني يعني الفة سنة اولى جاب الواح ( كراسات ) سنة اولى قمت ضحكت براحة كتبني مهرجل . . اها بدو يعني بدو هههههههههه ابار يعني حقن شي فرمة حديس ساهي يعني قالت الحكيم بدأ اطعن في الحقن ول شئ .... غايتو اتعولقت ساهي هههههههه
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: كنت كلما أقرأ لك مداخلة معصلج فيها موبايلك بتذكر بطارية حسن ود الحليوة حسن بطاريتو بكون شايلها في الليل وحتى لو القمر ضارب والبطارية طوالي معصلجا معا قصصو كتيرة ود الحليوة ودي طبعاً بتعجب ودالبوش القصص دي بحكيها ليهو |
عليك الله احكي مم جنس دا كتير . . ودي عربون لحكايات ود الحليوة دي حكاية حقيقية كنت واقف عليها من طق طق لحدي الحفلة انتهت . . كنا في حفلة رتينتا تسوي جخخخخخخخخخ والبنقز والدربكة اسون ار ار ار .... قادر الله والكتحابة علاتا واقفة في السما اللحمر والحفلة على نهاية واغنية يا حمامة مع السلامة قاربت النهاية والفنان كان مبارك ود الصالح من سرحان بلد الشيخ تاي الله اللم النفيدية راس في طاقية يا زول هوووووووي ما قايل روحي لاسع بحيا وبحكي ليكم الحكاية دي اها خلاص دايرين نشيل اهلنا لكزت ود الليعسر وهو واقف لبط اغمد وافتح يا زول قوم ارح قام اترنح وقال لي خلاس ماش لكن بطاريتي وينا قلت ليهو ما اياها هدي بطارتك في ايديك قال دي ما بطارتي قلت ليهو عرفتها كيف ما بطارتك واشار للغماز الاحمر وقال لي بطارتي قنيـــــط دا ما فيها
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: كضم دي اتعلمناها من ود الفاضلابي .. |
أها لازم تتعلمي عَمَنْوّل : يعني السنة الفاتت مرة يا بت السيد مرتين من حريم ريفنا إتقابلن في الإزبتاليا ( يعني المستشفى ) أها جات واحدة داخلا سألت والكانت موجودة من أول الحكيم جا ؟ ديك ردت ليها اي جا قام قالت ليها : اها بدو إبار شي ردت ليها : بدو إبقا لي اقطع يدي كان فهمتي شي خلي ودالبوش يشرح ليك
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: قال دي ما بطارتي قلت ليهو عرفتها كيف ما بطارتك واشار للغماز الاحمر وقال لي بطارتي قنيـــــط دا ما فيها |
ودالحليوة نعسان وداير ينوم لكن ما باقية الحكاية يمشي ينوم وفي حفلة في الحلة الفنان أسمو عبدالله محمد سعد بشتغل ممرض في مستشفى شندي ... أول ما بدأ يغني غنى أغنية بتقول ( أنا الفي الدنيا ما مرتاح .. وما مرتاح وما مرتاح ) ود الحليوة طلع في كرسيهو وقال لي يا عبدالله ترتاح كيف وأنتَّ حتت ممرض في شندي
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: الطيب شيقوق)
|
Quote: وحياتك زى ما سبق قلت ليك الاغنية دي انا بتولع نيراني بالحيل
برجع ليك بحكي ليك قصتها
والله يا المنسي لما كنت شغال في محكمة السوكي واركب عربيتي قاطع البحر بالغرب متجه محكمة سنجة واصل قرية الرماش دي لازم اخد لي انجمامة تحت شدرة اهل ناس هوندا الغنى فيها العبادي دي اعاين في البيت البسيط و متواضع واتامل في رحلة عمك العبادي وود الرضي وامين نابري وهم يتجولون بالفيات على ضفاف النيل الازرق |
طبعاً يا ودالبوش زولك كان عندو لاندروفر وإترشح في الانتخابات لانو عندو ظهر بأربع ما بيأكل برسيم في البردانة ( اتحادي ديمقراطي ) لكن ماصرح تبع حوش سيدي ولا الاتحاديين الأحرار الماعندهم سيد ههههههههههههه عربتو كانت بتشرب أكتر من البقرة موية ما بقيف جنب هُندا إلا ليسقي اللاندروفر موية قال ذات مرة في قطية هُندا بيضة نعامة كبيرة في القنقنا فوق في القطية
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: السايق الفيات حتي اليوم لو سمعتها الا اتمها الاغنية فد دقة في الوصف وحميمية وصحت اللفة ود شيقوق ألكد ود المنسي دة عاينو الزمن سنار كوستي 115 كيلو كنا بنمشبها في يوم . وركبة السمحة يكون سفنجة شايله طوب ولا عيش . وفي ااخريف علا ايام . هسة فرد ساعة الموبايل داير يخلي ود البوش يداوسني شوف الجنا دة وطلاشتو |
يا أبوسن ركبت القطر ( القطار ) البخاري ؟؟؟ وبتحب اللوري الأبيض ضميرك ولا التيمس ولا السفنجة أم سيرين ههههههه
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
ود المنسي ركبت القطر من كوستي لل حصاحيصا . وركبت البنطون ل رفاعة وغالبا القطر بوصلنا الليل . وبنطون رفاعة حدو عشرة فبنبيت في بوفية المحطة . والبوفية حق جدي مصطفي خال امي . وكل العمال اهلنا . كنت صغير . واحس بالحنين حتي اليوم للقطر والمحطاتفهي تعيدني ل امي عليها رحمة الله
والقطر عالم تاني .كما في قطار الهم .. هاشم صديق وعركي اللواري ركبتها مع الوالد. واهم شي نسافر بالليل واللوري بكون شاحن عيش . رغم فسوة السفر الا ان طعمه كان حلوا
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: مني عمسيب)
|
بمناسبة الشلوخ هههههههههههههههه
عندي قريبتي مشلخة لكن هي ما كبيرة اتخايل لي اخر جيل اتشلخ اها اتعلمت ودخلت جامعة الخرتوم كلية الزراعة واتخرجت اها جاتها بعثة لي انجلترا اول ما وصلت اتلموا فيها الخواجات باكميراتهم وهاك يا تعاطف معاها ههههههههههههه قاموا سالوها قالوا ليها الفي وشك دا حادث ؟ههههههههههههههههههههههههه قالت ليهم في حادث منظم كدا ؟ هههههههههههههههههههههههههههههههههههههههههههههههههه غايتو نحمد الله السلمنا ونجانا من فلم الشلوخ وبعد داك انا البي كلو هين هههههههههههههههههههههههههههههههههههههه .
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: مني عمسيب)
|
Quote: تعرف كان في الزوادة. علبة طحنية سعد ومربي و رغيف .. اي رغيف الرغيف زاتو كان تحلية عندنا فالسفر بياخد يوم كامل .دة لو ما قالو المطرة شالت الشارع وانقطعتو في الخلا غير كدة القطر حياة جديدة ناس جداد بتقعد معاهم تنوم معاهم .. ومن مناطق مختلفة وثقافات مختلفة .. حكاوي وقصص ووونسات بالنسبة لي كان حلو |
زولاً يضرببو المثل من الله خلقو ماضاق السفر طول عمرو يقعد يداير في البقر يعملهن كر من فِلق قروب الشدر لكن وليد ووليد حيد ضرب المدينة وإشتغل دي أُربع سنين وفوقن شهراً من عندو جزلان ما بتصل راقد قفا وقاطع الخبر
المهم نسيت المقدمة بتاعت القصيدة دي ندخل لي المهم مرات يقولها يا ولية الولد ابقى راقد موجعو وأمكن بارى الهواليق كيف انا قلبي علي جناي وقلب جنايا علي حجر
ومن ميسو داك لفا داقش علي كريمي لابسلو مركوبن نصيح وحاقبلو شنطة أللت صفيح لمّى هِدمو من الحبل شكاها فيها كُسر كُسر وسدها بي فقشة جريد عارضا زي كُشر وركب القطر وإتحكر حِكيرة جد وجرا من حَرفو المتمر زين قرم فطر وقطرو دا يسوي توت توت كو نتر وكشح ألمي تب ما خلا جر ( الجر يا بت عمسيب ) الزير وإنفكا يجري جري الرماد بقى في القضيب يشكي العجل وعود السلك دا يسوي زن زن الدغفلي قلبي إنقطع الدغفلي قلبي إنقطع كان لي العجاج يعمي البصر يومين مصنقر في الخشب مانام شخر بي وين ينوم دا قطر كريمة الملان لي عينو ديمة إن جا التمر مكمود كمد والمنقا ديك لآمن تستوي تلقاها للواكي زرب
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: قاااااااااااااادر الله تشاغلوا في النساوين السمحات لما شالتنا الغيرة هههههههههههههههه قلنا كدي نجدع الصورة دي نأمن نشوف البشلخنا هههههههههههههه . يا ربي البشلخني منو اسه ؟ لكن شلوخ شوايقة لا وراء هههههههههههههه . |
ههههههههههههههههههههه السادة لونو خمري ................. تخريمة فيصل خليل زميل المنبر وصاحب أقدم بوست تعالوا شوف وادي حلفا قبل الترحيل طبعاً هو عندو شلوخ فصدات ( بتاعت مرض الرمد ) في المجر سألتو بنت قالت دول شنو قال ليها كنت ماشي في الغابة قابلني أسد ولما تصارعنا خربشني هنا
ومرة سألتو برضو بنت قالت ليه أنت راحة ايديكم وراحة ارجلكم بيضاء مع أنو لون جسمكم اسود قال ليها نحن أساساً نولد لوننا زي لونكم ابيض لكن أهلنا مابحبو اللون الأبيض بجيبو بوهية لونها اسود ويوقفونا ونتكل يدينا علي الحيطة ويرشونا بي البوهية بنبقى سود كل الجسم عدا وكفي اليدين وراحة الارجل
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالحفيظ ابوسن)
|
Quote: قال ليها كنت ماشي في الغابة قابلني أسد ولما تصارعنا خربشني هنا
ومرة سألتو برضو بنت قالت ليه أنت راحة ايديكم وراحة ارجلكم بيضاء مع أنو لون جسمكم اسود قال ليها نحن أساساً نولد لوننا زي لونكم ابيض لكن أهلنا مابحبو اللون الأبيض بجيبو بوهية لونها اسود ويوقفونا ونتكل يدينا علي الحيطة ويرشونا بي البوهية بنبقى سود كل الجسم عدا وكفي اليدين وراحة الارجل [/QUO
هههههههها رطاني مسنوووووووووووووووووووووووح
يا اخوانا هوي
معاي ضيوف مشغول شوية
ابقوا عشرة على بت عمسيب دي اوع تخلوها تطفر منكم
يمكن مرقتي دي القى ليها معاي شلاخة
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: الطيب شيقوق)
|
Quote: البلفة وليست اللفة.
سلآم... |
يا ودالمدير هو أبوسن ما بركة الكتب بالعربي قرأناها لكن مرينا فيها لأننا متأكدين أبوسن متأكد من اللفظ والمعنى ناس البوست عارفين وجعتو وين هسي المسكين تلقى عشان يقنعك أنو عارفها ويقول خطأ مطبعي بكون أخد لي 50 دقيقة كيفك أخي ودالمدير علك عافية درت إمتن رسل لي أي فون
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
يا ودالبوش واحد عزم لي واحد غدا قال لي أرح إتغدا معاي ( رز بي مع جداد ) أها مشوا البيت كورك لي أم العيال ها فقيرة ها جيبي الغدا جابت قدح كبير رز أها الضيف يأكل سأل صاحب البيت الجداد وينو ؟ قال لي : بجي وجابوا ليهم زيادة تاني صحن متروس رز قام قال لي : ها زول ها الجداد وينو قال بجي الناس شبعت تب الضيف تاني سأل إت آزول قلت جداد مع الرز وينو الجداد الراجل كورك لي مرتو قال ليها جيبي الرز المرأة فتحت قفص الجداد وجا الجداد أكل الرز المرمي في الواطا
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
ود المنسي ود حنوت خلاس انت آ المسنوح وحاتك أسج وألج فيها دحين ده ما الواو الضكر انت بدور اسعلك الواو ضكر عرفناهو ,, اها الانتاية ياتها في الحروف صحبي امو امية لكن متابعا دروسو بتفتش كراساتو يوماتي ,,, تشوف الصفحات المكتوبة زادت ولا ياها زاتا ,,, وتعاين للصاحات والغلط ومدرسين زمان يعجبوك علامة الصاح ظاهرة والغلط مرات من ركن الصفحة لي ركنا التحت وقابلني قابلني دي اخير يجلدك هسة , اعصابك تكون بايظة اليوم كلو
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالحفيظ ابوسن)
|
Quote: ود المنسي ود حنوت خلاس انت آ المسنوح وحاتك أسج وألج فيها دحين ده ما الواو الضكر انت بدور اسعلك الواو ضكر عرفناهو ,, اها الانتاية ياتها في الحروف صحبي امو امية لكن متابعا دروسو بتفتش كراساتو يوماتي ,,, تشوف الصفحات المكتوبة زادت ولا ياها زاتا ,,, وتعاين للصاحات والغلط ومدرسين زمان يعجبوك علامة الصاح ظاهرة والغلط مرات من ركن الصفحة لي ركنا التحت وقابلني قابلني دي اخير يجلدك هسة , اعصابك تكون بايظة اليوم كلو |
والله يا أبوسن ضحكتني ضحك فقهتني عديل بي ( قابلني أخير يجلدك هسي ، أعصابك تكون بايظة اليوم كلو ) نحن كنا بنسوي الكركاسة من اللستك الجواني بتاع عجل العربية لكن ما بتفوت علي المدرسين لانو صواتا عالي مع العنجاوي كان معانا واحد أسمو عبداللطيف ود عكر يوم أستاذ محمد علي كتب قابلني
أها استاذ محمد علي بجلد في ... في المكتب ود عكر كل مايدو سوط يقول ( لا إله إلا الله ) استاذ الشيخ زولاً مسكين يعاين ومبسوط من ( لا إله إلا الله دي ) أها يوم حصتنا مع أستاذ الشيخ لما دخل الفصل لقى مكتوب مهرجلين وهو عادة ما بجلدهم بعفيهم اليوم داك لقى فيهم ودعكر قال ليهم اطلعو برا وبدأ بجلد وعكر اليوم ديك ود عكر ثبت أسد بس ماتحرك أدا 3 سيطان وكل مرة ينتظرو لما شافو ثابت قال لي قوم كفاك أنا مابعرف ليك بعرف ليك محمد علي بخليك تشهد وعفى الباقين الواو الضكر عرفتو الإنتاية هي التاء المربوطة وهي فتاة لم تتزوج بعد الهاء إنتاية مضيوق حلوها وجاية إجازة لي عرس أخوها والواو الضكر أسأل منو عطا الله ليه سمو الواو الضكر ههههههههه
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالحفيظ ابوسن)
|
Quote: ركبت القطر من كوستي لل حصاحيصا . وركبت البنطون ل رفاعة وغالبا القطر بوصلنا الليل . وبنطون رفاعة حدو عشرة فبنبيت في بوفية المحطة . والبوفية حق جدي مصطفي خال امي . وكل العمال اهلنا . كنت صغير . واحس بالحنين حتي اليوم للقطر والمحطاتفهي تعيدني ل امي عليها رحمة الله
والقطر عالم تاني .كما في قطار الهم .. هاشم صديق وعركي اللواري ركبتها مع الوالد. واهم شي نسافر بالليل واللوري بكون شاحن عيش . رغم قسوة السفر الا ان طعمه كان حلوا |
ياسلام .. كلامكـ ده يا أبسن ذكرني سفر اللواري .. وحنين صوت الكووز .. ومراقبة الفيافي والمجهول .. والدنيا ليل .. وأنت لاتدري أين انت ؟؟ .. وفي أي حته ؟؟ .. وباقي ليكـ كم من الزمن شان تصل .. تساؤلات تضج بها نفسكـ .. ولا اجابات .. فالكل يا معسل نايم .. يا مقهي معاكـ في نفس المشهد .. اللا مرئي .. كلووو كوم وفرحة الوصول كوم تاني خالص .. تنزل زي التكنكـ كنت معقّل ..
وبرضو ذكرتني بعض حكاويكـ القديمه .. ليتكـ تفتح نفاج لهكذا حكي .. فالمتابعين كُثر .. ويشرفني أن أكون أحدهم .. عارف .. كثيراً ما أفتح رد .. واكتب بعض ما يلح علي من تعليقات .. فاعود والجم نفسي .. مستدركاً .. ربما يكون بها قطع لتداعيكم الجميل ..
غايتو .. ماقصرتو .. وكما توقعنا ... حكي ممتلئ دهشه .. وقبلاً قلت ما لمس الواقع .. دوماً يأتي جميلاً في السرد لا تمله .. وأنتم بحكيكم الجميل هذا .. تلمسون عصب الواقع .. وترسمون بدواخلنا دهشه لا متناهيه ..
توقيع بالحضور ..
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: جمال ود القوز)
|
جمال القوز صاحبي ياخ والله انا بفرح بي جيتك فرح الله الواحد دا عاين جاي كلامك المذكور اعلاه علا كلام استاذ السر في دكان ود البصير وناس ود الضهبان ديل ولا بفرزوهو عشان اصلن ما مسقفين واهلهم ذاتم قروهم قراية بسيييييييييييطة لفككان الحرف بس ما بتشوف ود اب سن اسعل من الواو الضكر والجيم النتاية اتقول داير اعرس ليهو حرف هههههههههههه
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالله ود البوش)
|
Quote: ليتكـ تفتح نفاج لهكذا حكي .. فالمتابعين كُثر .. ويشرفني أن أكون أحدهم .. عارف .. كثيراً ما أفتح رد .. واكتب بعض ما يلح علي من تعليقات .. فاعود والجم نفسي .. مستدركاً .. ربما يكون بها قطع لتداعيكم الجميل .. |
الحبيب جمال ودالقوز لك التحية والتقدير يا أخي البيت فرشت ملايتو ورشت حوشو بت السيد أميرة وهي جوة بتسوي في القهوة والشاي للضيفان نعم هي ذكرت الجزء وأرادت الكل البيت وست البيت كرم وحسن ضيافة الجلسة لمة ننسى فيها همونا أدلي بدلوك يا أخي وماتعاين وراك في اي موضوع ترانا متابعين وحديثك ثمح بالحيل نسيت في اللوري التراب البعلاك من أخمص قدميك لي هامة راسك ويضرسك برميل موية ما ينضفك ههههه يا أخوي جيب من كل شدرة ثمرة وأحكي قول بارك الله فيك
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: هو انا اقدر ما ارد غلا يجيني متلب لي بي كوكاب ولا فرار زولك ده زي التور الشوش بدور الدواس ,,, والدواس دايرلو حنيقة يوم داك انفكيت منو بي كرامة البليلة |
والله براك متحايل ودالبوش لو سمعت صوته في حديث مكالمة هاتفية تتنسم من صوت الضحكة نفس ذاك الأصيل الإتوكرت في بنادر الخليج الرياض والحكمة الولد إتوضأ وصلى وعادة البلد الخلت ما بتتخلّى ونحن كمان طارين الحلة
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
جمال القوز المعروف لدينا ب ود عكر صديقي اللدود الذي لم اره شوف عين ولكني رأيته كاتب مثقف ذو لغة سهلة وقدرة علي الامتاع , تناوشنا قديما قبل سنوات اسفيريا وتداعينا تداعي لم احسيني اجيده تعرف يا ود عكر كتبت رد عن الزوادة حقت السقر ,, وشكلها طشت ولا نزلت ماني خابرها هههه صاح تنزل معقل ومعسم ولكنك فرحا مبسوطا مرة راكب القطر ,,, وقاعد قي الباب والهمبريب ضاربني والدنيا ليل والقطر مضلم إلا ضؤ البطاطير يشبع مرة مرة في يد راكب ولا كمساري ,,, درجة ثالثة ,, الناس جوة مدفوسة دفس وسمحت لي امي بالجلوس علي الباب قريب للزير القناوي حق القطر وانا جالس لا اري سوي الظلام المهيب استدعت ذاكرتي اغنية ل وردي ,, والله سمعتها عديل ,,, سمع حي ,,, سمعتها حتي بأدق تفاصيلها لازالت تلك الذكري تصيبني برعشة مبهمة
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالحفيظ ابوسن)
|
سنو
Quote: النمشهدك الناس دي لامة فيك نببشة ودشيقوق صفتو وود شيقوق نعتو قالو عامل كرفتتك الذي ضناب حمار الفقران |
ههههههههههههههههههههههها حررم مشدتني وضحكتني لامن قربت اتفنقل من الكرسي اوردولوب
ما تسمع كلام سلاقين البيض ديل - ايمين اخوك زردة الكرفتة دي اتعلمها من أيام كان بربّط للنسوان حطب الفزعة في الضهاري
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالحفيظ ابوسن)
|
Quote: جمال القوز صاحبي ياخ والله انا بفرح بي جيتك فرح الله الواحد دا عاين جاي كلامك المذكور اعلاه علا كلام استاذ السر في دكان ود البصير وناس ود الضهبان ديل ولا بفرزوهو عشان اصلن ما مسقفين واهلهم ذاتم قروهم قراية بسيييييييييييطة لفككان الحرف بس ما بتشوف ود اب سن اسعل من الواو الضكر والجيم النتاية اتقول داير اعرس ليهو حرف هههههههههههه
|
ود البوش .. يا حبيب .. تفرح بالعافيه ياأخوي .. وسعيد بكـ أنا كذلكـ .. أسعدني جداً احتفاءكـ بحضوري .. لهذا البوست المترع بحكاوي تعجبني .. حد الدهشه .. كما لازلت أذكر كلامكـ الجميل في ذاكـ البوست .. فيما مضى .. وها أنت والشباب تضيفوا لنا أبعاداً أرحب .. بطرقكم في رحاب بوادي بلادنا .. تستلهمون منها .. حياه أفضل .. وفش غباين البنادر .. وهمومها المتلتله .. وعيشها الزيف .. وجمالها الملطخ بالبودره ..
بعدين الناس ديل كتّابين شديد .. كان ود أبسن الذي أعرف حرفه المتخم بالروعه .. من قبل .. أو المنسي الذي تابعته هاهنا .. فوجدته كله تداعي واجترار لذكريات وحكاوي .. وقفشات وأشعار .. وأشياء وأشياء .. يأخ هنا كثير من الالق والروعه .. وأشياء يصعب حصرها ..
وشاكر مره أخرى لناديات حروفكـ وده من أصلكـ الطيب ...
طبعاً أبسن عارف عادتي في تتبع كل ما يُكتب .. بقعد أفلي الحتات البتعجبني .. زي الزول الماسكـ ليهو في عضم .. عاجبو .. أقعد أكدكد فيهو بي جاي وأقلبو بي جاي .. لامن أشهيهو العافيه .. لا .. وبجي راجع مره ومرتين .. وفي كل مره بكتشف أبعاد أخرى تكمن وراء بعض الحروف .. مرات أقعد أضحكـ براي زي المجنون .. زي حكاية المنسي بتاعة الجداد وحضوره الحي .. في آخر القصه .. ذاكـ الحضور المستفز للضيف .. الكان مطرق سنيناتو لي كد عضم الجداد فضلاً عن اللحم .. لكن ( نأبه طلع على شونه ) .. كما يقول حبايبنا أولاد بمبه ..
آآزول الناس دي هنا ملانه فهم لامن بي غادي .. فواصلوا هذا الحضور الطاغي .. الذي يكسر رتابة الواقع .. ويحيل همها فرحاً ..
بجيكم راجع .. طالما في كنانتي حرف ينبض .. يشتهي البوح .. وبقايا من كدر .. يستفزنا به واقعنا المضني ..
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: جمال ود القوز)
|
Quote: الحبيب جمال ودالقوز لك التحية والتقدير يا أخي البيت فرشت ملايتو ورشت حوشو بت السيد أميرة وهي جوة بتسوي في القهوة والشاي للضيفان نعم هي ذكرت الجزء وأرادت الكل البيت وست البيت كرم وحسن ضيافة الجلسة لمة ننسى فيها همونا أدلي بدلوك يا أخي وماتعاين وراك في اي موضوع ترانا متابعين وحديثك ثمح بالحيل نسيت في اللوري التراب البعلاك من أخمص قدميك لي هامة راسك ويضرسك برميل موية ما ينضفك ههههه يا أخوي جيب من كل شدرة ثمرة وأحكي قول بارك الله فيك |
المنسي يا حبيب .. شاكر شديد .. خلاص تاني بنشتر معاكم بي جاي .. والله صحي .. الواحد بيتلهي من الهموم المتلحانا دي .. ومشكوره بت السيد ست الدار .. الفرشت ملاياتها السمحات ديل .. ومهدت لكل هذا التداعي الجميل ..
طبعاً الغبار البيملا خشم الزول وهو في راس اللوري .. داكـ حكاية براهو .. بعدين كنا بنصل البلد بالليل .. وتكون مكندكـ زي الكنت مدفون .. التراب فرناغه دقااااقه ولايوق .. فيقوموا يملوا ليك الجردل مويه .. ويختوا ليكـ في الحمام صابونه .. ولا ينسوا أن يختووا ليك الفانوس جوه الحمام .. عشان مافي كهرباء ولا دياولو .. بعد داكـ يجيبوا ليك تاكل .. وتنوم نومه كأنكـ لم تنم من قبل .. وتقوم الصباح تطايب الناس .. كان زمن جميل ليته يعود .. تسلم يأخ ..
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: جمال ود القوز)
|
Quote: بجيكم راجع .. طالما في كنانتي حرف ينبض .. يشتهي البوح .. وبقايا من كدر .. يستفزنا به واقعنا المضني .. |
ولي القوز ما نسينا ولي القوز ليس نجهل
كلامك كلــ ـب شعرة جلدي ووقف صوف رأسي يا أخي حديثك ثمح بالحيل زاقيف بدور أرميلي مرباعين وتبقى حمالتي عند سيد الحمالة
الولد البـــدور إتشكّـــــر إبعد رِدّو في بلد العدو وإتوكّر إمَّن جاب رضوة البهم اللِهيجو مسكّر وإما أبـ رسوة فوق ضَلّاعو تيتل وسكّل
الولد البخاف القبيلة تلومو إخلف ساقو فوق تيساً رقيق قدومو إمَّن جاب رضوةالبهم النقّر فُوّمو أما إتكاتحن قدح الرماد حرومّو أبشر بي الخير وهييييييييييع ومحل رهيفة تنقد إن شاء الله يا ودالقوز أرتع بيناتنا وبنريد لهجك وسمح قولك البيت بيتك وحرّم ما بنخد إذن من الأميرة وهي أميرة
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: جمال القوز المعروف لدينا ب ود عكر صديقي اللدود الذي لم اره شوف عين ولكني رأيته كاتب مثقف ذو لغة سهلة وقدرة علي الامتاع , تناوشنا قديما قبل سنوات اسفيريا وتداعينا تداعي لم احسيني اجيده تعرف يا ود عكر كتبت رد عن الزوادة حقت السقر ,, وشكلها طشت ولا نزلت ماني خابرها هههه صاح تنزل معقل ومعسم ولكنك فرحا مبسوطا مرة راكب القطر ,,, وقاعد قي الباب والهمبريب ضاربني والدنيا ليل والقطر مضلم إلا ضؤ البطاطير يشبع مرة مرة في يد راكب ولا كمساري ,,, درجة ثالثة ,, الناس جوة مدفوسة دفس وسمحت لي امي بالجلوس علي الباب قريب للزير القناوي حق القطر وانا جالس لا اري سوي الظلام المهيب استدعت ذاكرتي اغنية ل وردي ,, والله سمعتها عديل ,,, سمع حي ,,, سمعتها حتي بأدق تفاصيلها لازالت تلك الذكري تصيبني برعشة مبهمة |
تسلم ود أبسن يا حبيب .. والله حليل ذاكـ الزمان الخصيب .. كان وكنا .. وكنت .. ولا زلت حرفاً يقطر صدقاً ويفيض عذوبه .. وأظن شهادتي في حرفكـ مجروحه .. لكن ربما وفت بالغرض ..
الزواده طشت منكـ ولا شنو ..
صحي والله مرات النت بيعصلج ويعضي .. فيضيع الكثير من المشاركات التي يصعب اعادتها .. لكن ( بوكس ) سودانيس ده كويس .. لمن ترجع ليهو بتلقى كلامك قاااعد .. لوما كده كان الواحد جن عديل .. .. عارف .. الزواده السمحة لمن تكون جاي من البلد .. بكون فيها الجداد والحمام .. ( مازي جداد المنسي داكـ ) والاطايب كلها .. وحتى لمن نصل الخرطوم .. كنا بنوضبها أحلى توضيب .. وبندسها من ناس البيت الما سافروا .. لكم زوادتكـ وانت ماشي البلد .. مافيها غير الطحنيه والمربه .. لقمة واحدة منها وتنقهم ..
ما أجمل سفر القطر .. ماسافرت بيهو كتير .. مشيت بيهو حلفا مرتين تلاته ..
لكن تداعيكـ في سردك السابق ليتكـ تفرد له مساحه أكثر .. ففيه الكثير من الذكريات الجميله .. التي كما قلت تصيب الزول بالرعشه .. حين يجترها ويسترجع ذاكـ الالق المصاحب .. لذاك الزمن الجميل .. واصل يا حبيب .. فهاهنا روعه وحكي متخم بالجمال ..
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: جمال ود القوز)
|
Quote: المنسي .. مالك على ود شيقوق .. الزول لسه بيشابي ويريد ان يستنطق الجمال ... ماتكبروا ساي .. |
ههههههههههههه ان غايظني بالحيل البدلة المنشحط بيها دي والله كان شفتو عينك عينك كدي بقى مكعكع زي عنقريب العدة القديم حبالو واقعة الغيظة الأكبر بت عمسيب تشيل وترمي في الزهور هي قايلة القبة تحت فقير هي ملسا وممسحة بي جير هييييييييع هسي بجيني ناطي لكن أنا الككو الفجخ الطين وهو العُشر قالوا قام لي شوك
تخريمة يا ودالقوز زمان عندي أغاني كدا كنت أحفظ ابياتها بأبيات أألفها براي كدي مابعجبني البقول في الفنان على سبيل المثال هذه الأغنية بقول أجمل حــ ـمار في السوق أجمل حـ ـمار في السوق عمي إشتراهو وفنجط رماهو وين
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: الطيب شيقوق)
|
عزيزي جمال تعال ديمة. ومساهماتك ما بتكون ابدا قطع لحكيهم الجميل ولكن بالعكس اضافة رائعة ...وزي ما قال ليك ود المنسي انا ذكرت الجزء واردت الكل. ..بالظبط زي ما قال..ويا ضيفنا لو زرتنا في دارنا لوجدتنا نحن الضيوف وانت رب الدار . والله يديك العافية ..وما تغيب ..
انت عارف يا شيقوق ود المنسي بقول ليك انت عجوز و مكركب لشنو.....عشان الاكلات. السريعة. البتاكلها. كل يوم. دي.....في يوم في ماكدونالد ويوم في بيرقركينغ واظنك ما عارف انو الاكلات السريعة دي بتزيد كمية الكولسترول في اادم ...وانت عارف برضه انو عمدة. نيويورك السابق كان قرب يطلع قانون لناس. الماكدونالد عشان يكتبوا في اكلاتهم. السريعة دي انذار زي الفي علب السجاير ويكتبوا:" الساندويتش الذي في يدك ضار بصحتك ..ارمي السندويتش وامشي اكل في البيت"... والله يديك العافية
وين انتي يا بنت عمسيب ..ما تحرميني بالله من طلتك ..واذا كمان جبتينا لينا معاك هين هينين من المناظر الخلابة ديك تكوني ما قصرتي...بس عاوزين منك خدمة يا غالية: فرونا في المدارس ان هولندا سموها الاراضي المنخضة عشان مستوى البحر اعلى من الارض.. عاوزين نفهم كيفن ده. يحصل. ...ومعقولة البحر فوق لبيوتكم..صوري لينا منظر زي ده.. والاسبوع الجاي انا ماشة مامورية شغل. لجنيف...قلت ليهم اقطعوا لي بالهولندية عشان اعمل ترانزيت في امستردام واشوف بلدكم السمحة دي..لكنهم قالوا ما على كيفك لان الادارة بتقطع التذكرة باقرب خط مباشر وارخص خط طيران..والمهم بدل بلدكم الجميلة دي حنشوف النافورة الفي نص البحر في جنيف... والله يديكي العافية
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: اميرة السيد)
|
Quote: ...وانت عارف برضه انو عمدة. نيويورك السابق كان قرب يطلع قانون لناس |
يا أستاذة اميرة ذكرتيني قصة رواها لي احد الأصدقاء السودانيين العاملين في مجال اعلام النفط بالسلطنة
روى لي انه ولما كان يعمل سابقا محررا صحفيا في وكالة السودان للانباء تم ابتعاثه للهند لتغطية مؤتمر صحفي يعقده الرئيس وزراء الهند عن السياسة الخارجية الجديدة للهند بعد توليه منصب رئيس وزرائها وهو في عمر يناهز الثمانين ولكنه كان حيويا وحاضر البديهة
روى لي صديقي هذا ان أسئلة الصحفيين للرئيس الهندي كان محورها مستقبل العلاقة بين الهند وإسرائيل وكذلك علاقات الصين الاقتصادية مع منظومة نمور شرق اسيا
قال لي في النهاية قفزت إعلامية من دولة الاكواتور بسؤال لا علاقة له بالسياسة ولا الاقتصاد وكان سؤال شخصي جدا قالت فيه :
( سيدي الرئيس بعيدا عن السياسة - انت رجل تناهز الثمانين من العمر وتبدو عليك حيوية ونشاط الشباب فهل لنا بمعرفة وجباتك الغذائية ؟)
شكر الرئيس هذه الصحفية على سؤالها وأجاب بالاتي :
( انا يا سيدتي تعودت ان اصحو فجرا واذهب الى الحمام وفنجاني في يدي لصب بعض من ال urine عليه حتى يمتلئي و اقبل على شرابه )
هذه قصة حقيقية ولدى بحثي في قوقل عن صحة فائدة هذا الشيئ صحيا تبين لي حقيقة انه وبرغم ما فيه من سموم ولكنه بلسما لكثير من الامراض
أهلنا العرب يعالجون الكثير من الامراض ببول الابل طبعا
اها يا المنسي قرط على الكلام دا
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: اميرة السيد)
|
Quote: وين انتي يا بنت عمسيب ..ما تحرميني بالله من طلتك ..واذا كمان جبتينا لينا معاك هين هينين من المناظر الخلابة ديك تكوني ما قصرتي...بس عاوزين منك خدمة يا غالية: فرونا في المدارس ان هولندا سموها الاراضي المنخضة عشان مستوى البحر اعلى من الارض.. عاوزين نفهم كيفن ده. يحصل. ...ومعقولة البحر فوق لبيوتكم..صوري لينا منظر زي ده.. والاسبوع الجاي انا ماشة مامورية شغل. لجنيف...قلت ليهم اقطعوا لي بالهولندية عشان اعمل ترانزيت في امستردام واشوف بلدكم السمحة دي..لكنهم قالوا ما على كيفك لان الادارة بتقطع التذكرة باقرب خط مباشر وارخص خط طيران..والمهم بدل بلدكم الجميلة دي حنشوف النافورة الفي نص البحر في جنيف...
|
الليلة مزاجك رايق الحمد الله ليك كم يوم كدي شايلة عبدالقادر ومحزمة بي الجيلاني الناس ديل يا بت السيد ردموا البحر وسكنوا في ونحن لي هسي نحضر شولاتنا عشان نترس البحر ( مجهود فردي لانو قروش مجابهة الكوارث ما كلنها أخوان البنات في كروشهم ) أنا قلت عجوز لانو غايظني بت عمسيب مغشوشة في البدلة المأجرها دي
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: سيدي الرئيس بعيدا عن السياسة - انت رجل تناهز الثمانين من العمر وتبدو عليك حيوية ونشاط الشباب فهل لنا بمعرفة وجباتك الغذائية ؟)
شكر الرئيس هذه الصحفية على سؤالها وأجاب بالاتي :
( انا يا سيدتي تعودت ان اصحو فجرا واذهب الى الحمام وفنجاني في يدي لصب بعض من ال urine عليه حتى يمتلئي و اقبل على شرابه )
هذه قصة حقيقية ولدى بحثي في قوقل عن صحة فائدة هذا الشيئ صحيا تبين لي حقيقة انه وبرغم ما فيه من سموم ولكنه بلسما لكثير من الامراض |
محاولة إقناع ( أنا شباب وحيوية ) لكن محاولة ثعلبية للأقناع خليك صاحي يا جميل لو تخلي النص فاضي احسن من البقى زي عربية الباسطة دا سيك سيك سيك سيك تسكسك ركبو
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
عزيزي ود ابو سن عرفت من البوست الذي سطره ود البوش ان المدام وضعت مولودا وانها بخير والمولود بخير فألف الف مبروك.. ولا اقول ليك خلينا من نضمي البندر ونقول بالدراجي الحمدلله مرتك اتحلت بالسلامة والف الف مبروك ليك وليها ولباقي الاسر’’’ وقريت كلامك كيف الزغاريد ملت جنبات المستشفى والمهنئين جوك بالعشرات وانت قايم فوقم تبشر, بالله شفت السودان سمح كيفن واهل السودان سمحين كيفن!!! في الفرحة تلقى الناس كلها واقفة جنبك وفي الحزن كمان برضه تلقى الناس كلها واقفه معاك.. لكن شوف هنا في الغربة, والله لا وراك ، وخاصة للنسوان البلدن هنا.. تلقاها مشت المستشفى براها هي وراجلها ورقدت ثلاثة ايام احتمال ما تكون شافت غير راجلها وممرضات المستشفى وتطلع من المستشفى واحتمال كمان براها اذا راجلها كان شغال وتركب تكسى وترجع البيت هي ومولودها.. واذا هي محظوظة يمكن واحدة من صاحباتها تضرب ليها تلفون وتقول ليها مبروك .. ووالله والله كنت عاوزة اجيكي لكن محمود ( طبعا محمود هنا زوجها) جاني من الشغل الساعة 12 بالليل .. لكن انا الليلة بسوق سعاد ونجيكم....... لا زغاريد ولا فرحة.... في ولادة الغربة.. وطبعا انا مخصوص ضربت ليك المثل ده عشان احكي النكتة الحكيتها انا في المنبر العام ده اكثر من ثلاثة مرات.. والنكته بتقول ان واحدة عانسة وقطار الزواج قرب يفوتها ... وكل يوم امها بتوديها لفكي عشان يشوف ليها عريس.. وفي يوم مشوا لشيخ مشهور وام البت حكت للشيخ الحظ المايل لبنتها وطلبت من الشيخ يشوف الحاصل شنو... والشيخ بدا يعمل حاجات قدامهن ويعمل محاية ويشربها موية المحاية ويمسك يدينها ويشوف في باطن الكف وفجأة قال للبت : ابشري انت حيجيكي عريسمغترب.. وفجأة البنت بقت تبكي بكى شديد .. قام الشيخ وهو مستغرب قال ليها :" يا بت انا اجيب ليكي الخبر السمح ده تقومي تبكي الحاصل شنو؟ قامت البت قالت ليه :" لا يا سيدنا الشيخ ما في حاجة .. لكني بكيت عشان خايفة من ولادة الغربة!!! والله يديك العافية
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: اميرة السيد)
|
عزيزي ابو سن هذاالمنبر العام في الحوش الكبير الذي فتح بابه الباشمهندس بكري ابوبكر تعلمنا الكثير وتعرفنا على ناس سمحن واصدقاء وصديقات ومرات بشعر وكانه الناس هنا بقا زي الأهل .. استفدت الكثير منذ بداية التحاقي بعضوية المنبر وقد وجدت كل مساعدة من اخوة كرام في بداية التحاقي بعضوية المنبر في كيفية بتكنلوجيا المنبر العام ووجت التشجيع والتقريظ وفي بعض الأحيان النقد الحاد ولكن كل ذلككان في مصلحتي كي اتعلم المزيد والمزيد من التجارب... وقوف الأصدقاء مع بعضهم البعض في هذا المنبر لعام يجعلني اشعر بالفخر والإعتزاز بأن هناك ناس سمحين ف هذه الدنيا وفي هذا الزمن القمئ ..... وهناك امثلة كثيرة للتعاطف والتعاون والمحبة بين زملاء المنبر وهناك امثلة حصلت لي شخصيا ولكن اذكر لكم هنا ثلاثة امثلة فقط..
-- عندما مرض و ضاحة انهالت الدعوات من اعضاء المنبر العام للشفء العاجل لوالدها.وانظروا ماذا كتبت وضاحة اليوم:"
"فانتم حقاً اخوة و اصدقاء رائعين ومميزين جداً تتلاشة وتهرب الاحرف والكلمات منىي حين اريد وصفكم ومهما اكتب من عبارات الشكر والعرفان والتقدير لا استطيع ان اوفيكم حقكم وباسمي وباسم والدى وكل الاسرة اقول لكم ان قلوبنا تجود لكم بالعرفان فلكم منا جزيل الشكر وعظيم الأمتنان و جزاكم الله كل خير ""
- كتب الفنان الموصلي بوست يطمئن فيه معتصم الذي سيحضر من مصر إلى نيويورك لأول مرة...ويريد من احد اعضاء المنبر في نيويورك استقبال هذا الضيف.. وهب محمد خليفة معلا استعاد لاستقباله واستضافته حتى يجد مخرجا.... ( ولله دركم فأنتم السودان وتمثلون السودن
- وفي الفرحة ايضا تجد زملاء المنبر معك .. فعندما اعلن ود البوش ان زوجة ود ابوسن قد وضعت مولودا انهالت التهاني من الجميع يفرحون معه وهذا هو ما يجذبني في هذ المنبر العام.... فوالله قد خففتوا علينا الكثير من مصاعب الغربة.... وبرضه تاني وثالث بقول: مصايب الغربة اكبر من جميع الشفتو واللي سمعته في ايامي الخوالي وحاتكم ضمه ما بقدر على فراق الأهل وكل يوم نحن في حالة طوارئ وهادو يا يمة مما جيت ما انسر بالي
والله يديكم العافية
ومتعكم الله بالصحة والعافية ويا رب ما تشوفو شر.
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: الطيب شيقوق)
|
Quote: ابشري انت حيجيكي عريسمغترب.. وفجأة البنت بقت تبكي بكى شديد .. قام الشيخ وهو مستغرب قال ليها :" يا بت انا اجيب ليكي الخبر السمح ده تقومي تبكي الحاصل شنو؟ قامت البت قالت ليه :" لا يا سيدنا الشيخ ما في حاجة .. لكني بكيت عشان خايفة من ولادة الغربة!!! والله يديك العافية |
وحات الله سيدي انت أنتهيتي كفتاة امريكية وبقيتي مسنوحة سناحة اليابا فضيل هدت فيك سناحة بسمات
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: عبدالحفيظ ابوسن)
|
حبابك ود القوز .
Quote: الجنس الطاعم .. بت السيد .. بت عمسيب .. |
الله يديك العافية والفي مرادك ي ود القوز اهو ربنا عوضنا بيك ههههههه تصدق نحن فاتحين ليهم الصالون ونشكر فيهم مشـــوا الخلا جابوا نسوانها السمحات يشكروا فيهن ونحن نعاين هههههه نحمد الله ربنا بتلف وبخلف ههههههه . سلمت اخي ود القوز والرجاء المداومة وعند الانقطاع هههه .
ولي قدام .
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: الطيب شيقوق)
|
Quote: الله يديك العافية والفي مرادك ي ود القوز اهو ربنا عوضنا بيك ههههههه تصدق نحن فاتحين ليهم الصالون ونشكر فيهم مشـــوا الخلا جابوا نسوانها السمحات يشكروا فيهن ونحن نعاين هههههه نحمد الله ربنا بتلف وبخلف ههههههه . سلمت اخي ود القوز والرجاء المداومة وعند الانقطاع هههه .
ولي قدام . |
ههههههههههههههههه ههههههههههههههههه بت عمسيب إتلومنا لوم اليابا فضيل واللوم بجي بي الغفلات لكن نسوي ليك شنو وانت كنكشتي لي في عنقريب العدة المهلهل دا بتاع النص ( الوسط ) وتشيلي وتجيبي لي في الورد وهو زول أم فتفت وكمونية وعنكوليب وعملتي لينا عمل لابدورك لا بحمل بلاك قلنا نشوف عولنا ومالنا ومال زهور هولندا وحسن طبيعها وزي ما بقولوا البفتش كرورو بلقى زولو مالك بقى عليك المثل دا مابدورو ودا ما بنكوي بي المهم في الأمر لك العذر من هنا لي هولندا ماشي وجاي مليون مرة حتى ترضي عنا
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: جمال ود القوز)
|
Quote: مالك بتكوجن الكلام كدا - ما تحكي لينا عن وضاحة
مش قلت لاقيتا ووصفتها لينا ؟ |
يا أميرة المسنوح دا كما قلت لك بعرفه منذ سنة 2006 لكني لم ألتقيه وجهاً لوجه ليومنا هذا لكني ألتقيت أسرته قابلت أم عبدالله وابناءه وبناته وكان معي في الزيارة برضو صديق عضو المنبر وواحد من نشطاء الإنجمامة ( الأخ المذيع التلفزيوني محي الدين جبريل ) ذهبنا لهم في منزلهم العامر صباحية وحلفت أم عبدالله ناساً جاين وأصاحب الحبيب البتخاف تجيب اسمو حتى الهوى ما يقسمو ( كان قولها مابتمرقو إلا تفطرو معانا ) وأعدت الفطور الماخمج وصوره صغير الأسرة وأرسله لوالده في سلطنة عمان ( أيامها ما كان في وتس أبـ ... كان في وتس ذات في اميل هههههههه ) المسنوح سوا جوطت السواد مع أم عبدالله وقال ليها أنا أرسل وأنت تأكلي في ناس المنسي ومحي الدين هههههههههه الكلام ليك يا المنططا عينيك يا بتاعت زهرة زهرة الليل نعدو المسنوح دا في الباعوضة بدور كُستليتا وما بمرق من يتيماً ممسح دا كلامي قلتو ليك أنا لا بخاف لا مكري ههههههههههه
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: - كتب الفنان الموصلي بوست يطمئن فيه معتصم الذي سيحضر من مصر إلى نيويورك لأول مرة...ويريد من احد اعضاء المنبر في نيويورك |
في نهاية سنة 2009 في يوم 30 ديسمبر وصلت الخرطوم قادم من كوسوفابعجد غياب دام 5 سنوات كان بورداب الخرطوم منظمين أحتفال برأس السنة ( الفنان مصطفى السني ) دعتني الأخت العزيزة اسيا الربيع ( عضو المنبر ) وكنت على تواصل معها عن طريق الإسكايب عندما وصلت الخرطوم أتصلت بها في يوم 31 ديسمبر وأخبرتني بالحفل وأصرت أني لازم أحضر ومع اني دائما بجي ترنزيت الخرتوم إلى شندي قعدت في جمر موقد يومي داك لما حضرت الحفل لكن هون علي الجمر إني ألتقيت كوكبة من أعضاء المنبر أول مرة ألتقي بهم منهم من هم بطعم مضبوط ومنهم من هم سكر زيادة ومافيهم سادة ههههههههه أجمل شئ وأنا داخل لصالة الحفل قابلني الأخ معتز قريش ( بورداب قطر ) يحمل كاميرا كان معي أبن خالي وأخته سألني بعد أن ألقى علي التحية الجميلة سلااام مرحب ومقدم نفسه معتز قريش .. الأخ منــو ؟ رديت له : أخوك سلمى الشيخ سلامـــة ضحك وحلف لي إلا ينزل بوست بهذا العنوان قابلت يومها لكن دقائق معدودة الحبيب محمد المرتضى وأتصورنا مع بعض طبعاً صورة بعد أن تعطرت بي ون مان شو ههههههههههه حتى تفوح رائحة الصورة في مسقط قابلت الجميل القمر بوبا والمسانيح ود أبارو والمسنوحة الكبيرة أميرة الشيخ وقابلت الجميلة أسيا ربيع وأسرتها وبقية الخلق كنت أيامها لا اعرفهم جيداً بنات خوجلي انعام عبدالحفيظ أنعام حيمورة اشراقة حيمورة عوض المسلمي الزول السمح عماد صديق القمر بوبا وطبعاً قابلت محي الدين جبريل اللذي تربطني به علاقة وبعدها تكررت جلسات في شارع النيل شمال بوابة هندسة جامعة الخرتوم كان يحي نغمها الفنانين ابوبكر سيد أحمد .. ياسر تمتام .. الفنان أحمد النعيم وكانت منظمة كل خميس تقريباً وكانت أيام جميلة عرفت فيها أخوة وأخوات عن قرب من هذا المنبر وما أردت قوله أختي أميرة ايوا المنبر سوق أم دفسو فيه الصالح والطالح لكن الصلاح أكبر وفيه ناس والله يملو العين بنات وأولاد معاً ولك الشكر على اثارة هذا الموضوع ورب اخاً لك لم تلده أمك وصدقيني قد تجديه في هذا المنبر
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
Quote: ورب اخاً لك لم تلده أمك وصدقيني قد تجديه في هذا المنبر
|
,,,,,,,,,,,,,,,,,,,,,,, ود المنسي وانا متأكدة من كده...بعد ما سمعت منكم ما يفعله اعضاء المنبر العام من خير وما يفعلونه من روائع وابداعات وكل يوم يورونا بأن الدنيا زال بخير ...
بت عمسيب والحمد لله الجيتي يا غالية يا بت عمسيب,, اختفيتي مدة .. لكن اظن عند حق ما دمت مقيمة في بلد رائع وذو طبيعة خلابة زي هولندا - الأراضي المنخفضة عن البحر- ويوم الجمعة القادم عندي سفرية طارئة شغل وعشان كده ما تطولي الغيبة .. ود ابوسن الولد ما كبر؟ طبعا انشغلت عشان بكون الوليد مساهر بيكم الليل كله كواريك وانتو نائمين النهار كله.. والله يديكم العافية
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: اميرة السيد)
|
Quote: عشاء البايتات و مقنع الكاشفات |
أخي الما حبيب ود شيقوق هذه العبرة كثيراً ما نقولها ونمر فيها مرور الكرام ولانعي ما تحمله من معاني كبيرة وقيمة العبارة الأولى عشا البايتات قوى وهذه واضحة المعاني أنه يشبع من لا تجد قوت لها ولي أولادها
لكن العبارة الثانية هي التي اقصدها كانت جرت العادة إن كان للمرأة غرض تريد أن تقضيه. ومهما كان هذا الغرض صعب تذهب مكان تجمع رجال الحي وتقف وتكشف عن ثوبها في موضع الشعر ( الرأس ) وأخو البنات هو من يقوم ويسترها لكن شرط أن يقضي أمرها وان كلفه الروح وهذه عادة كانت سائد وما إنكشف رأس مرأة وإلا قضوا أمرها لو كلفهم الأرواح لذا نطلق علي أخو البنات مقنع الكاشفات ( وفي هذه المعاني مكانة المرأة عندنا وكيف هي عظيمة )
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
والله يا ود المنسي لمن الناس المتعودين يكتبوا في البوست. يغيبوا وكان الواحدة مننا ناقصها ليها حاجة..وود البوش غايب هنا ولكنه بكتر الطلة في بوستات اخرى ..وتاني ما جبت. لينا اخبار الوليد. شنو وان شاء الله بلغ تمام الصحة والعافية...ومن يوم الجمعة حاغيب عنكم لمدة ما بعرفها بطول قدر شنو...على الاقل تعال لينا وقول لينا مع السلامة وادعو لينا بسلامة العودة... والله يديكم العافية
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: خالد علي محجوب المنسي)
|
والله يا ود المنسي لمن الناس المتعودين يكتبوا في البوست. يغيبوا وكان الواحدة مننا ناقصها ليها حاجة..وود البوش غايب هنا ولكنه بكتر الطلة في بوستات اخرى ..وتاني ما جبت. لينا اخبار الوليد. شنو وان شاء الله بلغ تمام الصحة والعافية...ومن يوم الجمعة حاغيب عنكم لمدة ما بعرفها بطول قدر شنو...على الاقل تعال لينا وقول لينا مع السلامة وادعو لينا بسلامة العودة... والله يديكم العافية
| |
|
|
|
|
|
|
Re: ود ابوسن، ودشيقوق، ود البوش، ود المنسي: انتو ناس سمحين (Re: اميرة السيد)
|
اميرة والقوم الكرام
صباكم زين
منسي
Quote: كانت جرت العادة إن كان للمرأة غرض تريد أن تقضيه. ومهما كان هذا الغرض صعب تذهب مكان تجمع رجال الحي وتقف وتكشف عن ثوبها في موضع الشعر ( الرأس ) وأخو البنات هو من يقوم ويسترها لكن شرط أن يقضي أمرها وان كلفه الروح وهذه عادة كانت سائد وما إنكشف رأس مرأة وإلا قضوا أمرها لو كلفهم الأرواح لذا نطلق علي أخو البنات مقنع الكاشفات ( وفي هذه المعاني مكانة المرأة عندنا وكيف هي عظيمة ) |
والله العلم عندك - كنت فاهما غلط والله
| |
|
|
|
|
|
|
| |