بحري طراوة... ويا ناس بحري .. قالوا بتحبوا يلا حبونا..

Quote: هياا يوسف ووب علي انا ما تقوم يا ولدي ما شلهتني معاك الشمس وصلت لي نص الحوش وانت لسه مندمس النوم الكتير دا شنو يا ولدي وجعتا كبدتي معاك قوم الله يرضى عليك. ااااخ اعرفكم بنفسي انا يوسف ودي امي اسمها ام سهمين الظاهر انو حبوبتي كانت على درايه انو كلمة الاسهم ح تجي في يوم وتكون عندها قيمه الله يرحمها لو كانت لسه عايشه امكن كانوا كرموها في قناة اقتصاديه او اتخيلوا انها كانت اشتغلت في البورصة مرة فكرتا ليه امي ما تضارب بي سهمينها ديل في وول ستريت خلاص قايم يا حجووا قمتا خلاص ما تلكزي ياحجه. -يا ولدي نان النوم دا اخرتو وين ما تقوم امش شوف ليك شي تعملو وحيات سيدي مافي شي مطرطشك الا بت السرة ماياكا طول الليل شايل الهناي الصغيروني دا ونازل دووو دووو معاها بتقول ليها في شنو حسا دي بتعرف تتكلم النخناخه دي والله مسخرة فارغه لكن الغلط ما منها من امها الطالقاها لينا لي انصاص الليل تتكلم وشن طعمها المسيخه تاني كدي تعال قول لي داير لي كرت هو اتاريهو الكروت دي ليها اسمع يا ولد هوي وحيات الله ما باخدوها ليك كان تنطيق سما الله على ارضو بلا كلام فاضي معاك داير تجيب لي السرة الفقر دي ياهو دا الفضل عشنا وشفنا اير تشلهلتني اخر عمري كدي فك يدي يا ولد. -ياحجه عليك الله ما تقعدي تهرجي من الصباح حسا اصحى عشان اسمع كلامك يا والدة نحن مجرد اصدقاء وبس البت فهمها تاني ما بتفكر فيني وبي زولها يعني انا نهي بالنسبه ليها. -.سجم امي يا ولد اصدقاء دا كمان شنو اوعك تجيب لي جرسه يا ولد اسمع هنا السترة والفضيحه متباريات والله خالها الزين كان يقطعك ويرميك للكلاب شوفي يا بت امي ناس اصدقاء ديل قوم يا ولد طممتا لي بطني وهي وكت عندها زول مالك انتا بتتونس معايها الليل الليل بتكوس في شنو يا ولد تدنقر نصك تحت السرير ما بتخاف تجي داقي الدلجه. -يا حجه باجيب سفنجتي من تحت السرير وعلبة التمباك عارف ح تقولي لي وليه كدي شوفي يا ام سهمين السفجه ممكن تتسرق هم بيسرقوا سفنجات الناس في الجامع والصعوت دا اسعد ولدك كل ما يشوفو يسفو لي حجوجه يا يما يا ام سهمين يا بت الشيخ يا احلا ام في الدنيا يا عسل رايق مصفاا يا امي يا نبع الحنان ياا.......... -هوي يا ولد عايز شنو قمتا تتمحلس لي بعرفك يا ابو لسان قروش ما عندي كان قعتدتا تعمل لي في جنس بت الشيخ ولا بت الولي ما عندي ليك قرش احمر عدمانه نفاخ النار ما عندي جنيه يوحد سيدو قوم شوف ليك شغله بدل نوم الضحا وقعدت اللستك في الحله. -شنو يا والدة فاهماني غلط الواحد ما يدلع امو ولاهو حرام كدي نمشي نغسل وشي ونجي نعمل معاك اجتماع قمه ونشوف ليه سياسه الضغط الاقتصاديه دي عارفه يا امي انتي لو كانوا شغلوك في البنك الدولي كانت قامت الحرب العالميه التاسعه من زمان يما كبي لي شاي لغايت ما اجي ناخد لينا حمام ابو سريع نفس الكلام يا جماعه نفس الحوار نفس كل شي حتى طقطقت ضهري يا ها زاتها اطق الجنبه اليمين لما اقبل اشوف المزيره والاربعه ازيار ولما اطق الجنبه الشمال اشوف برندة خالتي التايه ودي براها حكايه مرا صعبه ما بتخلي شي يمر الا تعلق عليهو حكامه ما بقدر واحد من عيالها يقرر شي الا يرجع ليها بالمناسبه خالتي دي ارمله حسا تلقي راجلها المرحوم مرتاح من نقتها مفروض كان يتعمل ليهو تكريم انو استحملهالما كنتا في المتوسط وادونا كلمه بلاك ويدو زي خنفسانه لونها احمر منقط بي اسود انا ما ناسي الكلمه دي لاني ربطتها بي خالتي التايه ما علينا. - صباح الخير ياحجة التايه . - تحج في راس بيتكم مالك يا ولد بتصبح لي واذان الضهر قرب اجي يا ولدي دا كلو من دلع امك ليك حسا القدرك منو وقاعد في وسط النسوان اجي يا بت امي كان صباح الخير ما بعرف قبلك وحدك يا ولد اطرشنا بي الوليدات البنومو لي نص النهار بشتنه ومسخرة عليكم الله انا ما بحجيب الهوا البارد لي نفسي حسا ليه صبحتا عليها صدقتوني لسانها منشار والحاله الليله كديستها رايقه الحمد لله الما كانت امي كنتا اول واحد يطالب باللجوء هربا من اضهاد امو وكنتا طلعتا لي في كم قناه وقشرتا وروقتا ياخي باب الحمام دامكسور ليهو شهر داير ليهو طريقة والا ح يقع بس امي تستاهل جايزة نوبل ركبت لينا ملايه خلت ايمن اخوي يدقها ليها بالمسامير يعني نحن فاميلي كلااس لانو عندنا ستارة حتى في حمامنا يااي على قول الحناكيش تعالو هم سموهم حناكيش ليه ومنو اول حنكوش في البلد دي يااا حاجوووو يا دين النبي انتو بتاكلو الصابون دا ولا شنو عارف ولدك ايمن بيكون كملها لي وتجي تقولي لي دا اخوك وبيمشي الجامعه ما كلنا كنا في الجامعه لكن ما كنا بنكمل صابون العالم . -يا ولد خلاس ما تعمل لينا عواا اقيف اجيب ليك صابونه من خلوصه. - بالمناسبه خلوصه دي بتخالتي التايه على نياتها فاتها قطار اي حاجه هي اكبر مني بي كتير لكن عامله نفسها لسه اقل من العشرين وقادانا بي غنية وردي تسعتاشر سنه طيبه لكن حظها قليل ما تمت قرايتها خالتي التايه ما خلتها عشان القرايه بتخرب البت وبتبور راسا والف جزمه خالتي التايه انو البنات البمشو الجامعه ديل بيضيعوا في وقتكم لانو اخرتها المرا لي البيت خالتي دي لو لموا ليكم فيها جماعه الجندر كانوا اتخصصو فيها. - خلوصه دي من ما كنتا في الابتدائي ياهو دا شكلها ما بتتغير بتقسم شعرها كعكتين واحدة في بدايت راسها والتانيه صغيرونه لي وراء وطول اليوم تدعك في سفنجتها ورجليها بحجر الرجلين وتلتخ وشها بالكريمات انا ما بتزكر لون وشها الطبيعي شنو وقاعدة حارسه العريس القدرها اولادهم ممتحنين وهي قاعدة راجيه الري .. يا ام سهمين اشيل من ياتو باقه مويه الحمام بقا كلو براميل وجرنات ملانه مويه وجرادل يعني الواحد ا يبني لهو حمام تاني واحد للمويه واحد يستحمي فيهو يا حجاا وين الصابونه مالك اتاخرتي حسا بكمل ليكم المويه دي. -ياولدي اصبر خلوصه قالت ليك ما تكمل ليها الصابونه عشان دي صابونة كبريت لي وشها وما تشيل من الجركانه الكبيرة عشان المويه دي انا دايرة ابل بيها الزُريعه. - يا ام سهمين ُزريعه شنو الناس لسا ما مشوا قدموا للحج رمضان دا بعد حداشر شهر انتي من حسا عايزة تِزرعي الابري دا بيعتت. -هيا ولدي ما لقيت العيش رخيس قلتا دي فرصه وتعال هنا منو القال ليك ابري ام سهمين بيعتت هووي مقدرة يمين ابريني لو قعد سنين ودنين ما بتجيهو الهبشه حسا امرق لي من الحمام دا مالك حتلتا يا ولد الشاي برد تاني نفس البرنامح الشاي في صاينة امي الطلس المطرقشه كان في باقي لون وردة اخضر هي ما باينه وفي بقيت الهلال بي لون اصفر والسكر مشتت في الصينيه ومعلقه واحدة وعشرة ضبانات يا حجه عليك الله رغيفه اشرب بيها بيها الشاي اوو خلوصه هنا شكرا يا ذووق على صابونة الكبريت لكن يا خلوصه قومي من جنب النار عشان ما تبق مع ا لكبريت هههههاياااا - يابايخ يا سقيل تاني تعال قول لي داير ليك صابونة ليه قلة القيمه دي انا عملتا ليك شنو يا خالتي اخر مرة تجي تشيلي مني شي للكريه دا ولا انا ما زي ناس هنايه البتتكلم معاهم ولسانك زي السكر صحي مافي نبي بيكرم في قومو ... - ولد دا خلوصه شنو الكلام الكبير ومافي نبي بيكوم في قومه اتقطعتي فيها عديل شنو الثقافه والعبارات الكبيرة دي ولد داا خطيرة يا خلوصه لكن تاثير العولمه ظهر عليكي .. - - هوي يا يوسف ليه انتا قايلني جاهلة ولا ما بعرف شي والا اكون بقرا في مامون حميدة ولا في الاحفاد انا لو ما كانت امي قعدتني في البيت كنتتا اكون خريجه السنه دي امشي كدا باللاي دا شنو ده سقيل لكن. -سوري يا خلوصه انا ما كان قصدي ولا تزعلي حقك علينا يا ام الخلوص عندنا كم خلوصه نحنا. -يا خالتي شوفي ولدك دا بيقول لي ام الخواليص بينبز فوقي والله بس تجي التايه وبراك وبتشوف شغلك معاها النا استاهل البيتكلم مع واحد زيك من يوم الليله لسانك ما يخاطب لساني وانا الله يريحني من البيت دا والله تاني ما امر بي الشارع الله كريم والله فقر حلاص الولد ده. - يا ولدبطل قلت حيا وقوم من هنا معليش يا اخلاص يوسف دا ما اخوكي الصغير وما بيقصد هو بيهزر معاكي... - يا خالتي اخوي الصغير شنو حسا لو سمعك زول اقول انا عمري كم يوسف دا اكبر مني لما كان بجي بياع الترمس وامشي اشتري منو ناس يوسف ديل كبار بيكونا راجعين من الكورة ود ي ما قضيتنا انا تاني لا يهازرني ولا يحزنون. - خلاص يا خلوصه حقك على ولا تزعلي لما كنتي في الروضه انا كنتا ممتحن كدا بيريحك وبعدين انا قلتا ليك على النار عشان الفيس الجميل دا ما يتحرق يعني برضو لي مصلحتلك لكن ما حبيت منك تخوفيني بي التايه باشا انا ما بخاف الا من الله وياستي بنات مامون حميدة ولا بنات الاحفاد الشينات ديل يجو وين جنبك انتي مسختي علينا الحلوين مدي لي الرغيفه يا خلوصه وتكبري تنسي - يا ولد هوي مالك عليها البت ناكشها لينا حسا تمشي تقعد جنب الغنم وتبكي تاني البيسدها لينا شنو انت ما عارفها بتدوخ وتغمر لينا نبقا في جنس ودوها الاسبتاليه وتعتلوها بعدين تمش هناك تجيها نفسيات لامن تشوف الدكتورات يا ولدي مالك على من صباح الله دا اريتني كنتا سبتك الشمس تاكل جلدك قوم من هنا شوف ليك شغله..