|
Re: شكر (Re: معاوية محمد الحسن)
|
Quote: فشلت المحاولة "الإنغلابية" يابوعلي بسبب عطب خاصية "رد" أسفل الصفحة 36 وبقى طارق ميرغني متمترساً أعلى الصفحة 37 ـ إلى حي
| |
|
|
|
|
|
|
Re: شكر (Re: طارق ميرغني)
|
مما فتحت الصفحة البيش دي وانا احجيب البوست من الصفحبه الثانيه وكل مره ماشي وراكب مواصلات وجايبو .
غايتو في ناس حاقدين بشكل ؟؟؟
وشايف في واحدين حردوه عديل كده.
| |
|
|
|
|
|
|
Re: شكر (Re: طارق ميرغني)
|
طارق وعبدالكريم والحاج شنو تسجلوا فى جمع الشتات السالم.....(وتشتتوا) وينها مواضيعكم بالله يدكم معانا ؟؟؟
ووينكم يالدكاترة وكمال كرار ومعاوية ورزقة وحسن طه وعماد عثمان وعز الدين عثمان
المهم
ده شعار الموقع ....
جمع الشتات السالم
جمع للشتات.. ..جمع للوطن.. بكل معطياته..سليمة الجوهر.مورقة المضامين .. وطنية الهوى .للجميع بمختلف ألوان الطيف..لقامة وطن . .تمكن من صياغة إتفاقه من إختلافه..من واقع تعدديته الدينية
www.shatatt.com .والثقافية والعرقية..الخ..
فليلتئم شملنا هنا..نمتطى صهوة العشق لوطن صهيله .شوق ..وأغنياته وردة على جبين
الشمس .وقمره الفضى يرسم ملامح الإنعتاق والتواثب النبيل نحو فكرة ان نكون وطنا واحدا
| |
|
|
|
|
|
|
Re: شكر (Re: ناهد بشير الطيب)
|
Quote: طارق وعبدالكريم والحاج شنو تسجلوا فى جمع الشتات السالم.....(وتشتتوا) وينها مواضيعكم بالله يدكم معانا ؟؟؟ |
** بت بشير الطيب (أم هبه) ** سجلنا ,, لكن ماقادر أدخل حوشك دا كان للقرايه أو المُشاركه ,, تكونى إتهكرتى قُبال مانعزم بقية ناس الحله.. (ودام الود بين الجميع)
| |
|
|
|
|
|
|
Re: شكر (Re: طارق ميرغني)
|
Quote: الاخ عماد شكرا على المشاركات الدسمة وطالما وصلت الختمية عاوزين المشاركة الجاية تكون عن المزاد ياخي وممكن تبدأ كالاتي : المزاد ذلك الحي الفريد الذى يتوسط مدينة بحرى أسسه العارف باللة عبد الكريم بن أحمد بن الأمين عند قدومه من مدينة الهلالية .......وواصل على كدة |
ابو عوه ** غايتو لما سكنا المزاد كنا رابع بيت ,, وطالما الموضوع جاب ليهو العارف بالله :- بناية القبه بقت عليك وذلك بإقرارك الرسمى فى هذا الموقع - ومابطال مُمكن تشغل القبه دى ,, والدخل تعمل ابو القاسم مع العائله المالكه والتى يُمثلها الباشمهندس / طارق ميرغنى ,, وبكده نكون ضمنا مُستقبل الاولاد- ** بت بشير الطيب موضوع القبه دا ماداخل فى شراكتنا بخصوص الجائزه.. (ودام الود بيننا) (ابو محمد فؤاد)
| |
|
|
|
|
|
|
Re: شكر (Re: عبدالكريم أحمد الامين)
|
Quote: بت بشير الطيب موضوع القبه دا ماداخل فى شراكتنا بخصوص الجائزه.. (ودام الود بيننا)
|
يعنى شنو
يعنى القبة ماحيكون تحتها فكى ؟
ويعنى برضو ولادامت القباب بيننا ؟؟؟
| |
|
|
|
|
|
|
Re: شكر (Re: حسن طه محمد)
|
Quote: حاولت التسجيل ولازمني الفشل للاسف.
|
نحن سجلنا لكن غلبنا نشارك او نبارك لقينا الحته كلها صلايب
| |
|
|
|
|
|
|
Re: شكر (Re: طارق ميرغني)
|
Quote: نحن سجلنا لكن غلبنا نشارك او نبارك لقينا الحته كلها صلايب |
** إبن خالى ** خفت أكتب كلامك الفوق دا ,, الجماعه يقولو دا من السكرى يكون عندو مرتفع ,, دا لو ماجاك معاويه ناطى يقول ليك لا دا زلالى من الصلايب الكتيره دى... (ودام الود بيننا)
| |
|
|
|
|
|
|
Re: شكر (Re: عبدالكريم أحمد الامين)
|
** ود السر كرار ** الغائب الحاضر ,, ماتنسى تنقل لينا الديوان دا من إستاد التحرير لإستاد الحلفايا قبل يوم 31/03 ..
** الصوماليين بطلوا قرصنه ,, كلم القبطان بتاع سفينتك يقرش فى بورسودان وينزل الحاويات فى الميناء الجنوبي ,, كلمت ليك واحد دفعه لواء في الجمارك يظبط ليك موضوع الحاويات دى بإعتبار أنها أثاث منزلي ومعدات مطبخ ,,
** وفي مية وتمانين شاحنه من أبرسى بورسودان بحرى لنقل الحاويات ,,
** دبر حالك مع جبايات الطريق أهو أنا خارجتك من الصوماليين ومن جمارك بورسودان ,, والناس الفى الطريق ديل نظام حقى حقك.... الله معاك.... (ودام الود بيننا)
| |
|
|
|
|
|
|
Re: شكر (Re: عبدالكريم أحمد الامين)
|
** ود السر كرار ** كدى شوف الموضوع التحت دا مع سيد الحوش:- ************************************************** اعلان للجميع:ارشفة المنبر العام الحالى للربع الاول لعام...009 يوم 31 -3- 2009 ] ************************************************************************************
Quote: سلام و تحية الى كل الاعضاء سوف اقوم يوم31 -3- 2009 بارشفة المنبر العام الحالى ...اخى الكريم/ة اذا كان لديك موضوع تريد نقله الى لمنبر الربع الثانى من 2009 المرجو كتابته هنا .سوف يتم نقل موضوع واحد لكل عضو/ة لمنبر الربع الثانى من 2009 من منبر للربع الاول لعام 2009 . كما نرجو من الاعضاء/ات مساعدتنا بتفريز(تحصيص) المواضيع التى كتبوها على المكتبات الموجودة مثل مكتبة المواضيع التوثيقية,ضحايا التعذيب,الفساد,............و مكتباتهم
1-سوف لن يتم نقل اى موضوع عدد صفحاته اكثر من 15 صفحات اى به اكثر من 1000 مداخلة (ننصح بالجزء الثانى منه) لسلامة الموضوع فى حالة تعرض السيرفا الى اى مشكلة فنية والى ما يسببه الموضوع من مشاكل اتصال ب database و استهلاكه الى كمية كبيرة من الباندوث و العمل على بط الموقع...... |
** أها باقى ست الهوى والطراوووووه حيمشى الخووووور رسمى وشعبى...
| |
|
|
|
|
|
|
Re: شكر (Re: عبدالكريم أحمد الامين)
|
Quote: مما فتحت الصفحة البيش دي وانا اجيب البوست من الصفحه الثانيه وكل مره ماشي وراكب مواصلات وجايبو . غايتو في ناس حاقدين بشكل ؟؟؟ وشايف في واحدين حردوه عديل كده... |
** إبن خالي ** بالرُغم من انو الصفحه عامله بيش ,, ** وبالتدقيق الاحصائي لسرعة الطوربينات بصفحات ست الهوى والطراوه فلقد فاقت هذه الصفحه فى سرعتها صفحة بت بشير الطيب ومعاويه(ص.26) ,, ** إذ أنها وفي خلال 40 ساعه وصلت لسرعة 35 عقده واستعملنا العقده:- ** لانو سيد البيت لايزال يُمخر بسفينته أُم كونتينرات عباب البحر لا الصوماليين لحسوها ولاهو عايز يوديها بورسودان.. ## ماعليك سرعة الصفحه غير عاديه ,, بس إتأكد لى من الزيوت ماتكون ناقصه وموية اللديتر تميتا والوقود:- FULL TANK (ودام الود بيننا)
| |
|
|
|
|
|
|
Re: شكر (Re: عبدالكريم أحمد الامين)
|
Quote: سوف لن يتم نقل اى موضوع عدد صفحاته اكثر من 15 صفحات اى به اكثر من 1000 مداخلة (ننصح بالجزء الثانى منه) |
شفت ياعبد الكريم حظ قريبك طارق بمجرد ماالحظ مشي معاهو وبقى يتصدر الصفحات جاء قرار بكري بارشفة المنبر وذهاب البوست للخور
أشك ياطارق بان هناك مؤامرة من كمال حول هذا الموضوع ،خاصة أنه اختفى نهائياً من صفحتك ،وسمعنا تحت تحت أنه ذهب بباخرته لمقابلة بكرى وتحريضه على هذا القرار .
| |
|
|
|
|
|
|
Re: شكر (Re: معاوية محمد الحسن)
|
Quote: بن خالى ** خفت أكتب كلامك الفوق دا ,, الجماعه يقولو دا من السكرى يكون عندو مرتفع ,, دا لو ماجاك معاويه ناطى يقول ليك لا دا زلالى من الصلايب الكتيره دى...
|
الاخ عبد الكريم بمناسبة السكري ،احكى لك هذه الطرفة من أخونا عوض اللة
المعروف عن عوض اللة انه غير مهتم بالسكري وياكل فى الحلويات والنشويات بدون اهتمام ،فقال ان أحد أصدقائه فال ليهو هوي ياعوض اللة أحسن ليك تعمل حسابك واللة لو قطعوا منك حاجة من جسمك تاني حتبقى زى نتيجة الحائط كل يوم حيقطعوا منك .
| |
|
|
|
|
|
|
Re: شكر (Re: معاوية محمد الحسن)
|
و يواصل الأخ عماد عثمان مشاركته و يرسل بقية الصور الخاصة بالمسابقة: رقم (3)
رقم (6)
رقم (9)
رقم (11)
رقم (13)
رقم (16)
رقم (19)
رقم (20)
رقم (21)
رقم (26)
رقم (38)
| |
|
|
|
|
|
|
Re: شكر (Re: الحاج حمد الحاج)
|
و مشاركة شعباوية من الأخ وليد عبد اللطيف:
Quote: زياره وديه :- ياناس بحري الحلوين اخذت اذن من امي الشعبية قلت اغشاكم ازوركم واسلم عليكم بس خافت علي وقالت ياولد ماتمشي براك احسن تاخد معاك اخوانك الكبار ناس حاج حمد وشكوكو وود البوب المستشار.قلت ليها لا .لا. لا . يمه ناس بحري ديل كمان اهلي ودمي واسمهم بعد اسمي وانت نسيت يايمه قبل ما امال عيدابي اخت الكابتن ايمن عيدابي لاعب الهلال صاحبنا تغني لي بحري وتقول بحري سر الهوى وبي عضمت لسانها قالت بتستمتع بيها لما تغنيها لناس بحري الحلوين اسياد الطرب كانوا الناس بغنوا شنو قبلها الليله وين انت ماشي ماتنتظر وداعي وكبري بحري والاشاره اشكرك بحراره ،،، سوق ياسواق وبشارع السوق قوم سريع اجري وحصل الكبري بطريق بحري وشارع السوق والله نسيت المرحوم ميرغني الصبابي وايوب فارس اخو السد العالي والمدرب المتفرد لما كانو بيجلسوا في ربوع بحري ومزرعة ادم سابل الحولوها اسع لبيوت موش غنوا محبوبي سافر الليله ياناس بقطر(11) انا قاعده اذاكر قال لي مسافر قطع التذاكر وقيامو باكر حبيبي جندي تذكارو عندي تذكارو عندي نقلوهو شندي حبيبي ياناس سافر . سافر . بقطر(11) قطارالساعة حداشر ده يايمه قالوا زمان كان ليهو هيبه وعظمه في بحري وكمان حكى لي عم عثمان فنان الحقيبة سابقا ابوالجنرال والموثق الكبير من زمن الجهل عماد عثمان كان الناس لما يكونوا جاين الخرطوم قبل ما يصلوا محطة بحري لازم يستحموا عشان ناس بحري حلوين ومنظمين ونضاف ومشهورين بالصيد الورد في حلة حمد . ولا نسيت جلسات بحري القديمه لما كان يشدو فيها ابن العيلفون جنة عدن والضرابه بسوق بحري مبارك حسن بركات لما يغني ليهم في ربوع بحري لاقيتو بسم حيني حيتو في ربوع بحري لاقيتو وما كان املي القاهو فتح قلبي وسكن فيهو وبخمرة حبو اسقاهو وخليني يايمه احكي ليك شي عن العارفو والما عارفو بتموهوا ليك اولادك ناس شكوكو وحاج حمد وود البوب المستشار ولا اقول ليك عماد عثمان ود ست البنات صاحبتك بقوم بالواجب كده خليني ابدا ليك وما تشتتي افكاري .كده .كده .اصبري اتذكرت شي بمناسبة تشتتي وشتات وشتت قالوا ناس بحري ديل عندهم استاذه فاضله اسمها ناهد (ام هبه) وعملت بوست وسمتو شتات ويتربى في عزها لكن زعلانه من اخوانها في البوست عشان ما جاملوها وشاركوها و حاج حمد طالب منها عموله في حال المشاركه وانا لو في حتتها كنت بقول خوه زي ريحة الحلاقين اول ما تطلع من الصالون تتبخر وكنت وريتهم زمن الخوه بغنوا ليها يا حليله . اخوي فشاش غباين الهم جدري القيح برش بالدم ما الرزين في كامن الطب بحسم للحدي كب كب تمساح كلي اخوي عوام نفش الريش بقع في نتف بعرف للرقاب ضايار مرق الضحى بجيب التار كملونا بالماكسيم ومابهاب المكن والنار هميم ان ندهو بقضى غرض وان عاديتو سقم ومرض ويناهد جري القول وفي خشيم سيدو سمح القول خلو السيره لي اهلا والقصيره ما بتطول بالله يايمه استاذه ناهد تغني ليهم جنس ده ويقصروا معاها.خلاص ياامي عارف نفسي ساهرت بيك بس كده اسمعي الجاي قرب كلامي يكمل في الشي العارفو انا بس . لكن الكلام عن بحري عدد ماموجود في الارض والسماء لم يعطيها حقها. ياولد خلاص انا زهجت .اصبري يمه ديل كان عندهم رابطه بجامعة القاهرة فرع الخرطوم اسمها جنوب بحري وكان ليها هيبة وجبره وتتكون من الاملاك وحي الوابورات وحلة حمد وحلة خوجلي والصبابي و الختمية و الاملاك والمزاد والدناقله والديوم والشعبية وكان ليهم دور فعال في العمل الاجتماعي والثقافي اما في الرياضه لم يفارقوا منصات التتويج والمره الجايه بتكلم ليك عنهم كثير .يظهر يايمه خلاص نمت وتصبحي على خير . كده قربوا اضنينكم عشان ما تزعجوا امي لان الليله يوم عيده اها اقول ليكم بحري :- كبري بحري وسلاح الاشارة وسجن كوبر بحري الجاك عجب كابتن اول فريق قومي والجعيص حارس مرمى الكوكب وسلمان فارس السد العالي والجنرال عماد عثمان الموثق المرتقب بحري البلدية بحري السوق وبحري المحطة الاوسطى بحري حمد وخوجلي وبحري نادي الصبيان ونادي سلاطين ( نادي الاتحاد حاليا ) ونادي استاك (نادي التحرير حاليا ) وبحري الطراوه والنسيم العليل وفي الاخر وداعا اوعوا تنسوني وبطراكم عليكم الله اطروني وانا المشتاق بشيلكم جوه في عيوني .وان شاء الله كانت زياره خفيفه عليكم . ودعناكم الله |
شكرا وليد على المشاركة..و بحري طراوة و الشعبية طحنية.
| |
|
|
|
|
|
|
Re: شكر (Re: الحاج حمد الحاج)
|
شكرا وليد علي المشاركة من الشباك ومشكور حاج حمد علي الطله.
يا معاويه والله موضوع كمال ده ما مفهوم هل قرصنوه الصوماليين ونزلوا كونتينراتو ولا الحاصل شنو لا يرد ولا يسال
لو استمر الحال علي هذا المنوال سنضطر لاعادة محاكمات نورمبيرج وودالبوب وعبد الكريم جاهزين وبس
بس اهم شي الارشفه ولكن يا معاويه المشكله انو لو ارشفوا خمسطاشر صفحه برضو انا مارق منها
جنس حساده
يا اخوانا اختنا ناهد دي ما تورينا كيف نشارك ونبارك
اوع تكون ركبت التونسيه بتاعة سيد الحوش
| |
|
|
|
|
|
|
Re: شكر (Re: الحاج حمد الحاج)
|
Quote: ومابطال مُمكن تشغل القبه دى ,, والدخل تعمل ابو القاسم مع العائله المالكه والتى يُمثلها الباشمهندس / طارق ميرغنى ,, وبكده نكون ضمنا مُستقبل الاولاد |
عبد الكريم دي قبة وإلا كافتيريا . الميدان الواقع شرق مسجد أونسة مكان مناسب لإنشاء قبة الشيخ عبد الكريم الهلالي بركاتك يا شيخ ..
| |
|
|
|
|
|
|
Re: شكر (Re: عبد الرازق سعيد)
|
يا عبد الكريم الحق فريقنا نزل الدرجه الثالثه .
يا اخوانا سيد الحوش ده اعتقلوه ولا شنو ؟؟
با ابو رزقه ما كنت قايل نفسي فقير _ فكي _ كما يتفائل ابن عمتي ...!!
| |
|
|
|
|
|
|
Re: شكر (Re: عبد الرازق سعيد)
|
Quote: الميدان الواقع شرق مسجد أونسة مكان مناسب لإنشاء قبة الشيخ عبد الكريم الهلالي |
عبد الرازق كل حاجة ولا الميدان ده لانو عبدالخالق وايهاب قاسم حيفرتقوا ليكم قبتكم دى من اول يوم
لو عملتوها فى النادى يكون أحسن ،عشان الدخل يذهب لتعمير النادى
| |
|
|
|
|
|
|
Re: شكر (Re: معاوية محمد الحسن)
|
رسالة من الأخ هاشم عبد الفراج:
Brothers Al-Salmo Alaikum First I apologize for not writing in Arabic, and secondly for I don’t know from where to start !!!!!!! Thanks Taifur for adding my forgotten name and dear brother Mustafa Al-Badri (Salatanah Oman), and really a lot of items in the memory about Al-Amiriah; 1, colleagues, teachers and Bahry Aljameelah, Best regards, ABDELFARAG HASHIM NASR TEL :285-3131 FAX : 285-1388 E-MAIL : RMCS CR. CUSTOMER SERVICES GROUP CUSTOMER SVCS UNIT SOUTHERN AREA MAT SVCS DEPT Saudi Aramco /Riyadh Hashim. [email protected]
| |
|
|
|
|
|
|
Re: شكر (Re: طارق ميرغني)
|
** إعلان هام لجماهير بحرى ست الهوى والطراوه ونجمتها الشعبيه** ** اليوم سوف يُعلن وزير التوثيق والسياحه البحراوى الاصيل نتائج أسماء الشخصيات البحراويه.. ** مع كشف الاسماء سوف يُرفق كشف الفائزين.. (ودام الود بيننا)
| |
|
|
|
|
|
|
Re: شكر (Re: طارق ميرغني)
|
** أسماء الشخصيات البحراويه:- ** أعلن اليوم وزير التوثيق والسياحه البحراوى عماد عثمان الاسماء وهى:- ************************************************************************ المشاركة التالية من عماد عثمان أحمد – جدة
Quote: اسماء شخصيات الصور ( الجزء الأول ) والتي تم إنزالها على دفعات بواسطة الاخوة عبد الرازق سعيد والحاج حمد الحاج وناهد بشير الطيب لهم جزيل الشكر والتقدير ومتبقي اربعة أجزاء سيتم إنزالها تباعا إنشاء الله . 1/ الزعيم الديني والسياسي السيد علي الميرغني – حي الميرغنية . 2/ السيد محمد نور الدين , وزير الأشغال في أول حكومة وطنية في العام 1954 م برئاسة الزعيم إسماعيل الأزهري والتي فازالحزب الإتحادي الديمقراطي فيها بالأغلبية - الشعبية شمال . 3/ الصاغ طيار عبد القادر الكدرو , أول الدفعة الخامسة في الكلية الحربية في العام 1955 م وأطلق أكبر شوارع بحري ( المعونة ) على إسمه – الكدرو . 4/ الفنان عبد العزيز محمد داؤود – الدناقلة شمال . 5/ الصاغ بشير حسن بشير كمبال , خريج الكلية الحربية الدفعة الأولي في العام 1950 م تولى رئاسة نادي المريخ لعدة دورات وفي عهده تم تشييد إستاد المريخ في العام 1964 م – حلفاية الملوك . 6/ محمد خوجلي صالحين , وزيرالثقافة والإعلام ومدير الإذاعة السودانية سابقا – المزاد جنوب . 7/ الشيخ علي عبد الرحمن , أول نائب لدائرة بحري في إنتخابات عام 1954 م والتي فاز الحزب الإتحادي الديمقراطي فيها بالأغلبية وكون أول حكومة وطنية برئاسة الرئيس إسماعيل الأزهري وتولى فيها منصب وزارة العدل والنائب العام . 8/ الشاعر مصطفى بطران , كتب دررا من اغنيات الحقيبة مثل : - عقلي إنشغل بهواك . - قوم بينا نلاقي مناظر . - دمعة الشوق . - عزة وصالك . - زمن الربيع حلا وفتح الزهر بسام . - أطرد الاحلام . - ياشادي قول للبي . - الدرة المكنية . - الناعس المكحول ( مجاراة قائد الأسطول ) - طلوع الفجر بسيماتن ( مجاراة ينوح لي حمامتن ) - ليل السعادة ( مجاراة أرحم ياسميري ) - حلة حمد . 9/ البرفسيور محمد هاشم عوض , وزير التعاون في العهد المايوي الأسبق ووالده من مؤسسي حي الدناقلة العريق – الدناقلة جنوب . 10/ الشاعر إدريس جماع – حلفاية الملوك . 11/ اللاعب سليمان فارس , السد العالي – الدناقلة شمال . 12/ المهندس ميرغني على مصطفى , والد الأخ طارق ميرغني – الدناقلة جنوب . 13/ النقابي محمد السيد سلام , أول نقيب لنقابة عمال السودان - حي الوابورات ثم حلة حمد ثم حي الختمية . 14/ السينمائي جاد الله جبارة – حي الدناقلة جنوب وحلة حمد . 15/ الأديب بشير الطيب , والد الأخت ناهد بشير – الصافية . 16/ الشيخ صادق عبد الله عبدالماجد – شمبات . 17/ النقابي عبد الله نصر قناوي , نقيب إتحاد عمال السودان في العهد المايوي وهو خال الدكتور إبراهيم قناوي – الشعبية جنوب ثم شمبات . 18/ الفنان إسماعيل عبد المعين , أول فنان سوداني يدرس علم الموسيقى – حلة خوجلي ثم حي السوق ( شمال سوق الخضار ببحري ) . 19/ الفنان خضر بشير – شمبات . 20/ الأستاذ الفكي عوض الله , رائد المسرح السوداني – الصافية . 21/ المحامي احمد زين العابدين , الأمين العام للحزب الوطني الإتحادي سابقا ومن المقربين للزعيم إسماعيل الأزهري – حي الميرغنية . 22/ الشاعر أبو آمنة حامد – الشعبية شمال ثم الدناقلة شمال . 23/ الصحفي الخال محمد ميرغني , خريج جامعة اكسفورد عمل بصحيفة الأيام وكان مندوب وكالة رويترز في الشرق الوسط في الستينيات – الدناقلة جنوب . 24/ الوزير عمر حضرة , وزير الإسكان في اخر عهد ديمقراطي وعضو الحزب الإتحادي الديمقراطي – شمبات . 25/ الدكتور الشاعر الزين عباس عمارة شاعر أغنيات : - اوعديني للفنان عثمان حسين - عودة قلب ( من زمان ) للفنان عبد العزيز محمد داؤود . - سامحني للفنان أحمد الجابري . 26/ الموسيقار بشير عباس – حلفاية الملوك . 27/ الفنان عبد الكريم الكابلي - الشعبية جنوب ثم الشيخ موسى . 28/ البرفسيور الإعلامي علي شمو , وزير الثقافة والإعلام ومدير الإذاعة السودانية السابق – الصافية . 29/ الشاعر تاج السر الحسن , شاعر أغنية آسيا وافريقيا للفنان عبد الكريم الكابلي – الحاج يوسف . 30/ السيد عمر عبد العاطي , وزير العدل والنائب في حكومة الإنتفاضة 1986 م – حي الوابورات . 31/ الدكتور عوض دكام – حلفاية الملوك . 32/ الصحفي الساخر طلحة الشفيع – الحاج يوسف . 33/ اللاعب شيخ إدريس كباشي – المزاد جنوب . 34/ الفنان إبراهيم أبو دية – المزاد شمال . 35/ الفنان صلاح بن البادية – شمبات . 36/ الإعلامي محمد سليمان , مدير الإذاعة السودانية السابق – حي الوابورات ثم الدناقلة جنوب ثم المزاد شمال . 37/ الفنان خوجلي عثمان – حلفاية الملوك . 38/ الفنان السني الضوي – الختمية ثم شمبات . 39/ اللاعب عبده الشيخ يس – المزاد جنوب . 40/ اللاعب فيصل العجب سيدو – كوبر . - كثير من هذه الشخصيات تم الكتابة عنها في مشاركات سابقة وهنالك مشاركات جاهزة للبقية . . الرحمة والمغفرة لمن إنتقل منهم إلى جوار ربه والأحياء منهم ربنا يعطيهم الصحة والعافية . |
| |
|
|
|
|
|
|
Re: شكر (Re: عبدالكريم أحمد الامين)
|
Quote: أسماء الشخصيات البحراويه:- ** أعلن اليوم وزير التوثيق والسياحه البحراوى عماد عثمان الاسماء وهى:- ************************************************************************ المشاركة التالية من عماد عثمان أحمد – جدة |
بالله دا زول يكوسوا ليهو الباسوورد و الله الباسوورد تكوس ليهو!!!!!!!!!!!
| |
|
|
|
|
|
|
Re: شكر (Re: طارق ميرغني)
|
** جائزة أسماء الشخصيات البحراويه:- ** الاول :- مُشترك بت بشير الطيب (أُم هبه) وابورزقه - لأجـــر الـمـُنـاولـــه.. ** عماد يو شكرك مايجى... (ودام الود بيننا) (ابو محمد فؤاد)
| |
|
|
|
|
|
|
Re: شكر (Re: عبدالكريم أحمد الامين)
|
شباب وشابات وجلاكين بحرى !!
التحية والإحترام والأشواق !!
يومين بحاول أفتح البوست ده ماراضى !
ولمّن يفتح تجينى صفحة لونها كاكى زيتى بتاع عساكر !
قلت أكيد فى إنقلاب !
الحاصل شنو؟
| |
|
|
|
|
|
|
Re: شكر (Re: صلاح أبودية)
|
Quote: ** جائزة أسماء الشخصيات البحراويه:- ** الاول :- مُشترك بت بشير الطيب (أُم هبه) وابورزقه - لأجـــر الـمـُنـاولـــه.. ** عماد يو شكرك مايجى... |
** ورد إلينا تصحيح من الكونترول (وزير التوثيق والسياحه عماد عثمان) بأن جائزة السعفه الذهبيه للمركز الاول مُشاركه بين:- ** بت بشير الطيب. ** ابو رزقه.. ** الحاج حمد... ## تم إعتماد النتيجه ممهوره بخاتمه وتوقيعه اليوم الخميس 26/03/2009 .. (ودام الود بيننا)
| |
|
|
|
|
|
|
Re: شكر (Re: عبدالكريم أحمد الامين)
|
Quote: ** ود السر كرار ** الغائب الحاضر ,, ماتنسى تنقل لينا الديوان دا من إستاد التحرير لإستاد الحلفايا قبل يوم 31/03 .. ** الصوماليين بطلوا قرصنه ,, كلم القبطان بتاع سفينتك يقرش فى بورسودان وينزل الحاويات فى الميناء الجنوبي ,, كلمت ليك واحد دفعه لواء في الجمارك يظبط ليك موضوع الحاويات دى بإعتبار أنها أثاث منزلي ومعدات مطبخ ,, ** وفي مية وتمانين شاحنه من أبرسى بورسودان بحرى لنقل الحاويات ,, ** دبر حالك مع جبايات الطريق أهو أنا خارجتك من الصوماليين ومن جمارك بورسودان ,, والناس الفى الطريق ديل نظام حقى حقك.... الله معاك.... (ودام الود بيننا) |
## ود السر كرار ** قلنا نتفقدك مُشكل غياب من يوم 23/03 - فى إى الباءات أنت؟؟ ** أها قصرنا معاك في شُحنة الكونتينرات.. (ودام الود بيننا)
| |
|
|
|
|
|
|
Re: شكر (Re: عبدالكريم أحمد الامين)
|
أستاذ كمال كرار
نعي لي الناعي آخر ما تبقى لنا من عمات...
العمة المغفور لها بإذن الله عائشة كرار فضل.. حيث لبت نداء ربها مساء أمس الثلاثاء...
ودفنت ليل أمس بمقابر حلة حمد ببحري...
والمرحومة والدة كل من الدكتور/ علي أحمدالطيب.. والأستاذ/عبدالمنعم والأخ/ صفي الدين والأخ/ فيصل..
وأخوات كريمات... نسأل الله أن بلهمهم وأيانا الصبر الجميل ...
أسألكم أخوتي أن تدعو لعمتي بالرحمة وأن ينزلها الله فسيح جناته مع الصديقين والشهداء وحسن أولئك رفيقا
ولا حول ولا قوة إلا بالله...
الآن فقط قرأت هذه المداخلة
وأسأل الله أن يتغمد الفقيدة بواسع رحمته
وأعذرنا على التأخير
وأمسحا لينا في وشنا العفن ده
أحر التعازي للأهل والأحباب
| |
|
|
|
|
|
|
Re: شكر (Re: ابراهيم قناوي)
|
** بت بشير الطيب ** قدر ماحاولت أشتت إى حاجه فى جمع الشتات ,, وجدت شتاتاً فى ذلك ,, حتى قرايه أبو مِلحه ماعايزه تفتح معاى.... ** في كتالوج خاص بجمع الشتات ,, يُرجى إرساله.... (ودام الود بين الجميع)
| |
|
|
|
|
|
|
Re: شكر (Re: عبدالكريم أحمد الامين)
|
Quote: قدر ماحاولت أشتت إى حاجه فى جمع الشتات ,, وجدت شتاتاً فى ذلك |
عبد الكريم جمع الشتات السالم موقع متميز ويحتاج الدخول إليه أجهزة كمبيوتر بمواصفات خاصة شتتوا (حّدثوا) أجهزتكم القديمة وتعالوا بي هناك .. وبدل الجمعة في شمبات شعارنا ليوم غداً الجمعة في الشتات .
Quote: لانو عبدالخالق وايهاب قاسم حيفرتقوا ليكم قبتكم دى من اول يوم لو عملتوها فى النادى يكون أحسن ،عشان الدخل يذهب لتعمير النادى |
معاوية نادي النجمة الآن بصدد إنشاء حوض سباحة أولمبي ومشاريع مصاحبة زي ماكينة صرف آلي وكدة تقول لي قبة ..
| |
|
|
|
|
|
|
Re: شكر (Re: عبد الرازق سعيد)
|
Quote: عبد الكريم جمع الشتات السالم موقع متميز ويحتاج الدخول إليه أجهزة كمبيوتر بمواصفات خاصة شتتوا (حّدثوا) أجهزتكم القديمة وتعالوا بي هناك .. وبدل الجمعة في شمبات شعارنا ليوم غداً الجمعة في الشتات . |
** ابو رزقه ** رسلوا لينا المواصفات القياسيه.. (ودام الود بيننا)
| |
|
|
|
|
|
|
Re: شكر (Re: عبد الرازق سعيد)
|
** ابو رزقه ** الموقع بيرجف زى المطره المعاها هبوب مع الكهربا - ** نزلت مناوله لعماد كامله ,, آخر قصيدتين لى هسه ماعارفهم مشو وين.. ** انتو البهكر الموقع دا كل خميس :- لازم يكون بتاع شربه وصقعه..
| |
|
|
|
|
|
|
Re: شكر (Re: عبدالكريم أحمد الامين)
|
** ومع عماد عثمان نواصل بقية إبداع شاعرنا المرحوم مُصطفى بطران.. ** عماد آسف إنزلت كل القصائد ولكن كانت في موجة هكر عاليه ,, إتلحسوا القصيدتين ديل ,, واصبح هامش الصفحه غير طبيعى ولايزال بالرغم من عدم وجود إى صوره علي البروفايل.. **********************************************************
- لليل السعادة كلمات / مصطفى بطران
Quote: يا ليل السعادة يا نور البصائر جوك جو معطر بدرك ليله ناير يا ليل جات نسايمك حاملات البشاير اصدر لينا طيبن بالأفراح نشاير الكون بالتهاني يتبادل الاشاير ما بين القبائل وأفراد العشاير الغيث بقدومك يا ليل جانا زاير زار الساحة غيمك وأتقطع جزاير الشرد منامي وخلا فكرى حاير يا ليل ديل نجومك أم وز في غداير هاك إعلان سرورنا املابه الدواير بدل لي حرورنا وأيامنا الجواير يا ليل زى نسايمك ناسك ناس اخاير هم للدنيا زينه وللحوبات ذخاير يا ليل لنداك بأرواحنا بنبادر جيلك زيه مافى وحورك حسنه نادر قادل بين عفافه تالى كونه صادر من اطهر سلاله ومن اشرف مصادر يا ليل لي مثالك ترتاح الخواطر كونه سماك صافى وكونه شذاك عاطر طرفي أسباب هواه سيل دمعه قاطر يا ليل كونه سرح ما بين جيد وفاطر يا زهر الحديقة الفى أغصانه زاهر لونك من جماله يخلى الزول يظاهر أما المتلى هايم فيك يا ليل مساهر عارف أسباب هلاكه وبالسر ما بجاهر ( أغنية ليل السعادة مجاراة لأغنية أرحم ياسميري لابوصلاح وسرور ) |
- يا شادي قول كلمات / مصطفى بطران لحن وغناء / كرومه
Quote: ]يا شادي قول للبى زيل ... وأنعش حياة جسمي الهزيل واذكر بعاد لبنى وسعاد ... واهديلهم الشوق الجزيل ****** يا شادي قول قولك جميل... وارويه من زهر الخميل خلى القلوب تخفق تميل .... وخلى العيون تذرى الهميل ****** يا شادي قول نظمك كميل ....صوت [Bالبلابل ليك زميل أشفى الجريح وأسجى الثميل ... وزى ما تميل بى عقولنا ميل ****** يا شادي قول شدوك عديل ... ما بنرضه بى غيرك بديل صوتك رخيم سجعك عديل .... سجع الحمامه مع الهديل ****** يا شادي قول كيف السبيل ...وأروينا من هذا القبيل أخرجنا من دائنا الوبيل ... واندب لنا الزمن القبيل ****** ذكرنا طيب يومنا الظليل .... وأوقات صفانا مع الخليل ارويلو من حالنا القليل ... واسجد هناك خاضع ذليل ******* بلاهي يا شادينا خيل ... كيف حالنا والظرف البخيل عاكسنا حين دخل الدخيل ... وأتلاشى زى ظل النخيل |
| |
|
|
|
|
|
|
Re: شكر (Re: عبدالكريم أحمد الامين)
|
Quote: انتو البهكر الموقع دا كل خميس :- لازم يكون بتاع شربه وصقعه.. |
عبد الكريم أرجو حذف المداخلة التي فتلت البوست وتعديلها بإدخال قصيدة أو قصيدتين لكل مداخلة . يمكن الهركز واحدة من هذه القصائد ما عجبته فحذفها ..
| |
|
|
|
|
|
|
Re: شكر (Re: عبدالكريم أحمد الامين)
|
]** وزير التوثيق والسياحه الليله وبمناسبة الجمعه الجامعه ,, أتحفنا بإبداعات من حقيبة الفن وشاعر بحرى مُـصـطـفـى بـطـران ,, وماأجمل غناء حقيبة الفن ,, وبرنامج حقيبة الفن مع فطور الجمعه وصوت المرحوم الفكى عبدالرحمن فى التقديم ,, ودخلة صوله منفرده للكمانه وجلـسـن شـوف ماحـلاتـن..... ** أها مع فطور الجمعه أستمتعوا بالكلام الجميل دا... ** ولو ماكنت بحراوى لتمنيت أن أكون بحراوى... **********************************************
Quote: المشاركة التالية من عماد عثمان أحمد – جدة استراحة الجمعة – الشاعر مصطفى بطران ]الشاعر البحراوي الكبير مصطفى بطران يعتبر من اساطين شعراء ما يسمى بفترة غناء الحقيبة . ونستريح اليوم مع مجموعة من روائعة الخالدة . . لقب بشاعر الطبيعة ونتلمس ذلك في الكثير من شعره . توفي وهو في ريعان شبابه نتيجة لمرضه بالسل , وفي كل جمعة سوف نستريح مع شاعر من ست الهوى والطراوة |
[B] - دمعة الشوق كلمات / مصطفى بطران الحان / سرور و غناء / كرومة
Quote: دمعة الشوق كبي حكم حبي أرعى نجم الليل ******* نسمة الاسحار ليلي طال ذكري أنا مساهر نومي متخبي أنتحل جسمي والمحال طبي مصدرو الزهرة الفي نواحي سهيل ***** حين قوامو يميل للغصون يسوي وأزدهار محيو للقدور يخفي في جبينو تشوف حكمة الرب زي سواد حظي جوز نواعسو كحيل ****** صدري مزماري والدموع شربي أنطرب كل ما ذكرو يخطر بي مالو جافي نفور ما بدور قربي وأنا مالي دوام لي خيالو أميل ******* يابديع الزي وأزهر اللون يا خفيف الروح يا سما الصون خلقك مولاك زينة للكون حبب الأرواح في هواك يا جميل ******* إنشغال فكري وإبتكار لبي وشحوب لوني كلو من حبي الشغل بالي وأنتزع قلبي أما آمالي طوحت بالبين ******* عهدي بيك يا جميل دأبك الحلمي أما هجرك لي نير الظلمي أنت عارف نوع حبي ليك سلمي شوقي مهما أزداد برضو شايفو قليل
( اغنية دمعة الشوق تعتبر من أجمل اغنيات الحقيبة وكتبها مصطفى بطران وهو على سرير المرض وقام بتلحينها سرور ولم يستطيع غناءها حزنا لوفاة بطران وأهداها لكرومة ) |
- عزه وصالك كلمات / مصطفى بطران الحان وغناء / محمد أحمد سرور
Quote: عــــزه وصالك ما لقيتله مثيل ياللطيفه خصالك كيف يكون المصير درت أحاربه غرامك وأفنى عمري قصير جاني جيش اشواقى حاز على النصير قلت اترك حبك وعن سواك اختصر شفت عقلي التائه في هواك منحصر مهما أقول أسلاك القى قلبي مصر فكرى حار في رجوعه وحار معاه البصير بيك أصبح جوفي جروحه فائقة الحصر ما بفيدنى طبيب لو كان يجئ من مصر في فيافي غرامك قلبي جارى السير كيف أعيش دون قلبي عزه أسير قلت أرسل طرفي لو يراك يسير جاني دامع طرفي وعاد إلى حسير قلت أناجى خيالك صار على عسير ليه لأنه مقيد..... في هواك أسير العلى يا عزه لو قليل أو كثير كان سميتك قبلك جننته كثير عزه حتى جمالك زى غرامي شهير يا سلالة العفه الغانيه عن تشهير يا مثال الناعس طرفي بيك سهير يا بدايع طرفه ويا معاني زهير عزه بهجة حسنك حايزه كل تقدير زى شعاع البدر الطل فوق الغدير لولا طال بى هجرك برضي بيه جدير يا الملكتى فؤادي وليك أصبح دير ليته لي يا عزه جناح أحاكى الطير كنت اقصد حيك لي رباك أطير أجلى ظلمة ليلى يومي يبقى مطير تحيا بيك امالى وجوى يبقى عطير |
** ونواصل ......
| |
|
|
|
|
|
|
Re: شكر (Re: عبدالكريم أحمد الامين)
|
** مع عماد عثمان والشاعر :- مُصطفى بطران ...
-عقلي انشغل بهواك كلمات / مصطفى بطران الحان وغناء / الأمين برهان
Quote: عقلي انشغل بهواك والحكمه عيني - لاجه ومجافيه النوم يا اربعيني ********* هاك بعض حالي البى روقي اسمعيني .... - شاكى الغرام ما لقيت لي من معين لو كان كلام في الطيف مره اسمعيني .... - خليني أصلى النار في هواك دعيني ******* فوق اللجارى على لا تجرديني ..... - ثوب الغرام ودوام عنه انشدينى طايع مريد لقساك باهل يدينى ... - ما اخترت غانيه سواك وحق ديني ******** مهما يلاقى عذاب قلبي السجيني .... - ومهما يزيد ويفيض همي ويجينى لو كان يزور الطيف مره ويجينى ... - تلبس حظوظي السود ثوب اللجين ********* من يوم رماني سنان لحظك سنينى ... - محق على نومي ومحق سنينى أصبحت كل صباح يزداد انينى .... - كالبلبل المفرود يا مي حنيني ****** مهما تكيلي غرامك ما بتفينى .... - فوق ما أطيق في الهجر تكلفيني دائما تزيد علىّ دائي الدفينى ... - لمتين تراعى لحالي وتنصفيني ******* امتحنى قلبي في حبك جربيني ... - وبعدين بناراشواقــــك الهبينى زيدي في جواك وصدودك اتعبينى ... - وحالف عليك بالحب ياجاهله بيني |
- قوم بينا نلاقى مناظر كلمات / مصطفى بطران لحن وغناء / محمد أحمد سرور
Quote: قوم بينا نلاقى مناظر ... تفرح وتسر الناظر وتبرى الأرواح بشوقه خليك يا صاحي محاذر...وافينا وفاء نادر ساعدنا كمان بالروقه تشوف آرام وجآذر ....لا تبقى نفور ومحاذر تصبح أحشاك محروقه حافلات بالمحيا النائر ... جالسات في شكل دوائر لدن القامات ممشوقه تركني موله وحائر .... ماضر لو جيتن زائر بيناتن لىّ معشوقه في حسن الجيل الحاضر .... وعيون الظبي النافر السعد مخيم فوقه مجموعة جوهر نادر ...... أو تحكى زهور في مناظر منتظمه تمثل جوقه من كل مدرع سافر ..... في هدوء الليل الكافر وسط الأقمار في مروقه في ثياب الملك الظافر ..... في عيون الظبي النافر والمزن الحابكه بروقه ضماهن مجلس عامر.... وعفافن ليهن مسامر والقمري حداهن قوقه ودلالن كان الآمر .... أصبح بنفوسن يقامر مرقن الأفكار عن طوقه بساط الروض الطاهر ..... تجلى الحسن الباهر والخلقه السالم ذوقه الشمس شعاعها الظاهر ..... في توب العفه الطاهر دى حياتي ولى مخلوقه ( قوم بينا نلاقي مناظر كان يتغنى بها ايضا الراحل المقيم خضر بشير ) |
- اطرد الأحلام كلمات / مصطفى بطران لحن وغناء / محمد احمد سرور
Quote: اطرد الأحلام يا جميل اصحى قوم نفضى الليل في ضفاف النيل ننشد الفسحه شوف جمال الليل يا جميل واصحى واسمع البلبل ولهجته الفصحى الغصون ما خدات مع النسيم كسحه والطبيعة تخيل توبها كاسى النيل من جمال مسحه غير كلامى معاك يا جميل لمحه وقوم معايا وميل قامتك السمحه كل شئ ميسور والظروف سمحه منظر النوار يغنى عن أنوار للظلام يمحى ديك شواطئ النيل بالسرور طافحه لابسه بدر التم وللنجوم لافحه شتلة الياسمين مايله بصفحه ميلها بشجيك من شذاها يجيك كل حين نفحه شوف وجوه الروض باسمه منطرحه وتضحك الأزهار ميته بالفرحه ليه شجرة الفل ياخى منشرحه الورود بالمر لونها ليه يحمر كأنه منجرحه ديك طيور منظوم روقه زى سبحه طايره كالآمال في الفضاء سابحه في حدانا قريب ظلالها جات شبحه يا ما فايتات أظنهن بايتات وفى الرياض صابحه النسائم لو غاديه أو رايحه بى ندى الأزهار والعبير فايحه الفروع بتميل بالطرب مايحه والسواقى تئن بى نغمة الحن صوتها كالنايحه منظر البدر وبهجته الفاضحه تبدو ليك في النيل كالدرر واضحه الطيور تختال في الغصون صادحه السرور ميل وروقه يتخيل كفته الراجحه ( قيل بأن أغنية اطرد الاحلام كتبها مصطفى بطران على شاطئ بحري " البلدية " حيث الطبيعة والطراوة ) |
** ونواصل مع شعر بطران وعماد عثمان..................
| |
|
|
|
|
|
|
Re: شكر (Re: عبدالكريم أحمد الامين)
|
** مع عماد عثمان والشاعر :- مُصطفى بطران ... *************************************************
- زمن الربيع حلا كلمات / مصطفى بطران لحن وغناء/ محمد أحمد سرور
Quote: زمن الربيع حلا ... فتح الزهربسام بى طيب شذاه الفاح ... يتجول النسام ******** جات البدور تختال ... مجليه سافره لثام لابسه السكينة وشاح ...لابسه الفضيلة وسام ملكت سماء الأفكار.... واتقسمت أقسام كل ما تميل تخطر ... تتمايل الأجسام ****** في دروب وصاله أشوف .....كم دمى ليها انسام كم من فؤاد انصاب........بنبله أو بحسام عزت على الإدراك ..... ضمنت معاني جسام جلت على التصوير..... صعبت على الرسام ********** تلقى العباد تائهين .... مابين مسرح وهام من كان حياته غرور ....مملوءة بالأوهام أنا في شقاي ولهان .... ما واجد الإلهام أقضى الليالي حزين .... عاضض على الإبهام ****** مهما يجينى خيال ........ما بكون لدى إلمام أرسل خيالي يغوص....يرجع لي ماهو تمام اصف المناظر صيد ..... واصف السباته تمام وارجع وأقول دا النيل....... الفيه وز وحمام ******** عكر على هناى ..... واتعب فؤادي غرام شادن يميس ويتيه ....ما بين مها وأرام طرفك سقيم يا صغير ... لا تعوده الإجرام واعلم بان الموت ...... عمدا يعد حرام ******* ما بنسى لحظا كان .....بينه وفؤادي صدام قــــطع الفؤاد نصفين ....وافاه من قدام أنا ما بخاف من شئ... . والقى الصعاب مادام معسول سناه رحيق .... وسهام عيونه مدام ******* جاد الزمان بالخير .... وضاءت لنا الأيام زار العشم أرواحنا ....وهام معاها هيام قامت رجال الدين ..... بواجبها خير قيام قسمو السرور نصفين .... ما بين قصور وخيام ******** نارت نفوسا كانت ....سابق غشاها ظلام وقرانك يا المحجوب .... حقق لها الأحلام دمت النعيم يغشاك .... مع السرور في سلام يدوم بهناك للناس .....وعزة الإسلام |
-الناعس المكحول كلمات/ مصطفى بطران لحن وغناء / محمد احمد سرور
Quote: يا النــاعس المكحــول .....كيف حــالك انت الآن لي ما يقـــارب الحول .....لي يوم لقاك ظمـــآن ياالناعس المكحــول .....ضاق بى كل مكـــــــان مـــانابنى غير نحـــول .......أما الفؤاد هلكان لاقـــوه بى لاحــــول ......صدري يقيد بركـــــان أدور عن غـــــــرامك .....مالقيته في الإمكـــان اوعــــــــدنى لو بمطول ...خليك دوام فكـــران زيد في دلالك وطــــول ....وأصفى لي لو عكـــــران يا البى صباك مسطـــول ....أنا في هواي سكــــران يمكن صدودك يطـــــول ....تنكـــــر هواي نكــران يا سيــــدي مهما أقـول ...معنى وقــــوافي مـتان مـــا أظن أعـيد القــول... في حسنك الفــــــتان من قـــــــولي والمنقول...ليك في الوصف شــــتان زى فاكــــــهة بين حقول ...أو مــوزه في بســـتان يا غـــــاية المـــأمول ....ويا بهجة الأزمـــان زي حسنك المــــــجمول ...حسن ظروفـــي كمــــان زيل عن فؤادي خمـــــول ...في الوصل ما عشمــان دعني برضاك مشمـــــول ....يمكن يطيب لي زمـــان بى عطفــــك المفقـــــول ....وبى طرفك النعسان وبى فـــــــاهك المشغول ....در من درارى حــسان بـــى عنقك المـــــصقــول ...وبى عودك والميسان حــــيرت فينا عقــــول ....واوجمت كل لـــسان طول هجري ماهو أصــــول ....واذكرني لو أحـــيان نومي من جفاك موصــــول ...قلبي بى هواك مـــليان راسمـــمالى والمعقول ..... تفكيرى والهـــذيان هـــــل لي سمـــاك وصول ...لمتين أراك عــــيان
( اغنية الناعس المكحول مجاراة لأغنية قائد الأسطول رائعة سيد عبد العزيز وسرور ) |
| |
|
|
|
|
|
|
Re: شكر (Re: عبدالكريم أحمد الامين)
|
Quote: عبد الكريم أرجو حذف المداخلة التي فتلت البوست وتعديلها بإدخال قصيدة أو قصيدتين لكل مداخلة . يمكن الهركز واحدة من هذه القصائد ما عجبته فحذفها .. |
** ابو رزقه ** كدا كيف ؟؟ ** بما أنك سادى معاى وردية الليل فى مصنع النسيج ,, بالله مرر ورقنا لعمر شاوويش خليهو يسجل لينا الساعات الإضافيه دى.. (ودام الود بيننا)
| |
|
|
|
|
|
|
Re: شكر (Re: عبدالكريم أحمد الامين)
|
Quote: معاويه ** قراصة الفطور لسه مافكت ,, عشان تستلم الرايه...
|
عبد الكريم فطور شنو ياخوي ،الفطور فارقناهو من يوم فارقنا السودن ،عشرين سنة فى قطر دى ماحصل يوم فطرنا القراصة جاية فى الغذاء اتفضلوا معانا (صدقنى وصلت الان وانا اكتب ليك فى هذا البوست )
| |
|
|
|
|
|
|
Re: بحري طراوه خالص (Re: معاوية محمد الحسن)
|
عمتنا خديجه بت محمدين مصطفي الآن تزين بوست بحري .
مبروك النيو لوك يا عبد الكريم.
ياخي وين صاحبك سيد الحوش بقي ما شغال بينا شغله يمشي ويجي وما بشتغل بي زول.
رأي المستشارين ود البوب وعبد الكريم مطلوب من موقفه القديم والجديد ...!!!
| |
|
|
|
|
|
|
بحري طرآوة... (Re: Kamal Karrar)
|
ســـلآم ياناس بحــري...
الشكر لك أخي عبد الكريم علي إطلآلتك ودعوتك لشخصي... بحـري هي محطتي الثانية بعد عطـبرة...
8 سنوآت في حلفاية الملوك... 7سنوات في المخازن والمهمات... كنت أقضي أمسياتي في حلة الضناقلة وحلة حمد وحلة خوجلي والأملآك... الإجازات المدرسية كنت أقضيها فياالشعبية وياماإستمتعت بطعمية الجيزآوية وفول حميدة وقراءة المجلات والكتب مناالكشك الفي المؤسسة... تألمت كثيرا لما حدث للمخازن والمهمات... كانت تحصل لنا طرئف جميلة في زحمة المواصلات ونحن راجعين من بحري للحلفاية..وكثير جدا كنا نمشيها كداري...
لم ولن أنسي أيام قضيتها في بحـــري...
أخوكم...معاوية المدير...عطــبرآوي بحــرآوي...
| |
|
|
|
|
|
|
Re: بحري طرآوة... (Re: معاوية المدير)
|
Quote: أخوكم...معاوية المدير...عطــبرآوي بحــرآوي... |
الاخ معاوية المدير تحياتى ومرحباًبك فى طراوة بحري
لو لم تخنى الذاكرة اعتقد انك من ابناء الحصايا فى عطبرة ،وصديق لابناء عمي ياسر ومحمد على جبريل
عموماً تحياتي لك فى جميع الاحوال ونتمني ان تواصل فى البوست
عبد الكريم ياخي انا سادى خدمة من وقت الغذاء مافى زول حيجي يستلم منى ولاشنو ؟
بوست وسيدو غائب
| |
|
|
|
|
|
|
Re: بحري طرآوة... (Re: معاوية المدير)
|
Quote: ســـلآم ياناس بحــري... الشكر لك أخي عبد الكريم علي إطلآلتك ودعوتك لشخصي... بحـري هي محطتي الثانية بعد عطـبرة... |
** ود المدير ** مرحب بيك فى ست الهوى والطراوه.. ** بيتنا دا بابو فاتح ومافى ضيفاً دخلوا إلا واصبح سيد بيت ,, اها ماتنقطع.. (ودام الود بين الجميع)
| |
|
|
|
|
|
|
سلام (Re: Kamal Karrar)
|
يا جماعة أنا موجود...
كل ما في الأمر حضر أصغر أبنائي خالد من السودان وأستولى على اللاب توب بتاعي..
وفي العمل الأيامات دي ما في طريقة تقرأ إيميلات العمل خليك من تدخل على البوست
وإلى أن أشتري له لاب توب ..فسوف تتقلص طلاتي لبعض الوقت... وإن شاء نجدد للبوست
وبحري فوق
| |
|
|
|
|
|
|
Re: سلام (Re: Kamal Karrar)
|
Quote: يا جماعة أنا موجود... كل ما في الأمر حضر أصغر أبنائي خالد من السودان وأستولى على اللاب توب بتاعي.. |
** ود السر كرار ** حمداً لله علي سلامة الابن خالد.. ** أنا أتنفس إذن أنا موجود - بس عندنا فى ست الهوى والطراوه الوجود بالكيبورد.. ** ياخالد بالله أدى أبوك سحبه فى اللاب توب بتاعو.. ** أها ياكيمو قصرنا معاك.. (ودام الود بيننا)
| |
|
|
|
|
|
|
Re: سلام (Re: عبدالكريم أحمد الامين)
|
Quote: ** ورد إلينا تصحيح من الكونترول (وزير التوثيق والسياحه عماد عثمان) بأن جائزة السعفه الذهبيه للمركز الاول مُشاركه بين:- ** بت بشير الطيب. ** ابو رزقه.. ** الحاج حمد... ## تم إعتماد النتيجه ممهوره بخاتمه وتوقيعه اليوم الخميس 26/03/2009 .. (ودام الود بيننا) |
بس يا عبد الكريم ما تقول عاوز تقاسم..الشكر لك و عبرك لوزير التوثيق و السياحة..
| |
|
|
|
|
|
|
Re: سلام (Re: الحاج حمد الحاج)
|
Quote: كل ما في الأمر حضر أصغر أبنائي خالد من السودان وأستولى على اللاب توب بتاعي..
|
كمال حمد اللة على سلامة الابن خالد
ويبدو ان حديث انت ومالك لابيك ،سيتحول مع ابناء الزمن ده الى أنت ولابتوبك لابنك
| |
|
|
|
|
|
|
Re: سلام (Re: الحاج حمد الحاج)
|
Quote: بس يا عبد الكريم ما تقول عاوز تقاسم..الشكر لك و عبرك لوزير التوثيق و السياحة.. |
**الحاج حمد ** ياخوى أنا نصيبى فى الثروه مُتنازل منو لناس بحرى.. ** نصيبى فى السلطه خليتو علي الشيوع .. (ودام الود بيننا)
| |
|
|
|
|
|
|
Re: سلام (Re: عبدالكريم أحمد الامين)
|
Quote: **الحاج حمد ** ياخوى أنا نصيبى فى الثروه مُتنازل منو لناس بحرى.. ** نصيبى فى السلطه خليتو علي الشيوع .. (ودام الود بيننا) |
أستاذ عبد الكريم
سلامات ياخي ليك
ولي بحري عموم
بالله التشكيل مهم
لأنو نحنا بالنا مشى للغدا
وكيف تعمل السلطة بتاعتو على الشيوع
أصلو دي سلطة قدر كيف ياخي؟؟؟
__________________________
وبحري طراوة
| |
|
|
|
|
|
|
Re: سلام (Re: ابراهيم قناوي)
|
Quote: أستاذ عبد الكريم سلامات ياخي ليك ولي بحري عموم بالله التشكيل مهم |
د. إبراهيم ود قناوى ** إى نوع من التشكيل تطلب :- فناً ,, لغةً ,, أم تشكيل العساكر.. (ودام الود بيننا)
| |
|
|
|
|
|
|
Re: سلام (Re: عبدالكريم أحمد الامين)
|
كدى لحقونى زيت سمسم ....وكوز موية بااااارد http://shatatt.com/
دى حاجة ...الحاجة التانية
طارق وعبدالكريم انتوا اشتركتوا ومسجلين عندى اعضاء ماقادرين تخشوا كيف ؟؟؟ المشكلة وين ... حدثونى بس كدى خلونى انجم حبه هنا ...
ود كرار حمدلله على سلامة خالد ...الفح اللابتوب (لفحة رجل واحد) وسجل هدف فى مرمى الشتات السالم الحاج حمد وينها مواضيعك ؟ انشاءالله بوست الشعبيه ياخ...وان كمان صعب ...انشاءالله حد صيدلية الشعبية ووقف معاوية شنو يعنى انت وحسن طه ماجيتونى ...( باقى اربعة باسويردات ونقفل ) عماد عثمان ورزقة ...باسويردات كااااربة حاارسلها ليكم ...بعدين غيروها ( بقيت بكرى ....هلا )...
| |
|
|
|
|
|
|
Re: سلام (Re: ناهد بشير الطيب)
|
ناهد بشير
Quote: الحاج حمد وينها مواضيعك ؟ انشاءالله بوست الشعبيه ياخ...وان كمان صعب ...انشاءالله حد صيدلية الشعبية ووقف |
شوية شغل بجيك بي هناك..بس بعدين بعد المنبر يتزحم ما نقعد نشحد في الباسووردات زي ما هسع بنعمل عشان نلقى باسوورد لي عماد عثمان..
| |
|
|
|
|
|
|
Re: سلام (Re: الحاج حمد الحاج)
|
Quote: طارق وعبدالكريم انتوا اشتركتوا ومسجلين عندى اعضاء ماقادرين تخشوا كيف ؟؟؟ المشكلة وين ... |
ياناهد صدقيني ماعندهم مشكلة ، لكن بس خائفين من انو اللة يجمع شتاتهم بالجد لانهم عاوزين يعيشوا مشتتين كدة ،ويضربوا هواء الرياض ودبي البارد ده ،الا أن بقضى اللة أمراً كان مفعولاً
كدى حاولى أجمعى شتات كمال كرار ولميهو على وليداتو فى السودان . نحن يادوب جينا من السودان وعشرين سنة ماتميناها كويس عاوزة تجمعى شتاتنا من هسع .
| |
|
|
|
|
|
|
Re: سلام (Re: معاوية محمد الحسن)
|
Quote: نحن يادوب جينا من السودان وعشرين سنة ماتميناها كويس عاوزة تجمعى شتاتنا من هسع . |
** معاويه ** لسه ماتميت العشرين ,, بالله لمن تصل 31 كلمنا ,, هى القعده بتحلى من تتم 18 سنه وبتبقى مرضه ,, ولو عندنا بلد بتحترمنا زى بقيت خلق الله المغتربين البمشوا بلدانهم جتى لو عندوا إجازه اسبوع ,, لاتأشيرة خروج ولاجبايات ولا ضرائب ولا زكاه الخ...... ** بعض الاسر جمعت شتاتا فى القاهره ,, سوريا ,, ماليزيا.. (ودام الود بيننا)
| |
|
|
|
|
|
|
Re: سلام (Re: ناهد بشير الطيب)
|
Quote: طارق وعبدالكريم انتوا اشتركتوا ومسجلين عندى اعضاء ماقادرين تخشوا كيف ؟؟؟ المشكلة وين ... حدثونى بس كدى خلونى انجم حبه هنا ... |
** أُم هبه ** المُشكله مافى إى إيقونه عايزه تفتح معاى عشان أقرأ المواضيع ,, ناهيك عن إنى أشارك بموضوع.. (ودام الود بيننا)
| |
|
|
|
|
|
|
Re: سلام (Re: عبد الرازق سعيد)
|
Quote: ما دام فيها ماليزيا أتمنى للجميع التوفيق والشتات .. |
** ابو رزقه ** غايتو ماليزيا دى لا أنا ولا أنت ولا زول أصيل من بحرى فيها ناسا معروفين وشايلين قروشوم بالشنطه وهم جماعة الهبروا ملوا... هى لله لا للسُلطه ولا للجاه.. (ودام الود بيننا)
| |
|
|
|
|
|
|