|
Re: من بكره ... تاني مافي كهرباء بتقطع في الخرطوم إن شاءالله (Re: عبدالله كع)
|
Quote: حسب ماعلمت يبدو أن كمية الكهرباء التي وردتنا من سد مروي كانت أكبر من أن تتحملها موزعات الخرطوم مما أحدث بعض الأعطاب الفنيه . حالياً نحنا مشكلتنا إنو الكهرباء بقت أكتر من اللازم |
لكن يا محمد فرح، نقول ليك شنو؟؟؟
حيرتنا بس،
يعنى دة كلام هندسة و لا ونسة ساكت،،،
و بعدين أخشى ما أخشى، جرعة التفاؤل الزيادة دى، لما ما تكون مدروسة، بتؤدى إلى عكس رد الفعل المتوقع،،
أحسن حاجة، كل زول يشتغل شغلو من سكات، لعل و عسى،،،
نلقاها من الكهربا المافى، و لا من الشمس المسلطة علينا دى، و درجة الحرارة الف،،،،
____________________________________ تحت تحت كدة، أخبار جرعات السحائى شنو؟؟؟؟
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Tabaldina)
|
الإخوه الكرام عبدالعزيز عيسى صلاح الدين نادر نذار حسين صلاح ليون ودالصايم نيازي عبدالله كتو احمد عبدالله عزالدين جعفر هشام الطيب انعام عبدالحفيظ العوض الطيب اسامه الكرور اشرف مصطفى محمد ابوالعزائم حسين نوباتيا تبلدينا
تحيه قلبيه صادقه شاكراً إهتمامكم بموضوع كهرباء السودان التي هي وبلا شك ركيزه أساسيه لإنطلاق التنميه المستدامه ولخق واقع جديد واقع أفضل إستبشرت مثلكم بوصول كهرباء السد للولايه وبناءً على معلومات من أحد المهندسين الذي أكد لي أن هذا الصيف سينزل برداً وسلاماً على مواطني الولايه وستنعدم القطوعات تماماً بعد وصول كهرباء السد لكن للأسف لاحظت والجميع إستمرار وجود قطوعات هنا وهناك وبالرغم من أنها لاتقارن بالسنين الفائته إلا أن طموحاتنا كانت ترنو لأكثر من ذلك حيث كنا نحلم بأن لاقطوعات بعد اليوم إطلاقاً لكن أنا أريد وانت تريد والله يفعل مايريد . توربيني السد الذان تم تدشين وصول أنتاجهما للولايه قبل أيام عند محطتي المرخيات والكباشي يولدان 250 ميغاواط وهذه الكميه كافيه جداً لحل نقص الكهرباء بالولايه . فمحطة كهرباء المرخيات تبلغ سعتها 600 ميقافولت امبير وتعمل علي تغذية الشبكة القومية باربعة مخارج في مستوي جهد 220 كيلوفولت. وتقع محطة الكباشي الفرعية شمال بحري وتحوي محولين بسعة 300 ميقا فولت امبير وتغذي الشبكة القومية باربعة مخارج في مستوي جهد 220 كيلوفولت . ماأنجز بدون شك كبير ، ضخم وجدير بالإشاده حالياً محليات مروي ، دنقلا والدبه جاهزه تماماً لإستقبال الكهرباء القادمه من السد بعد إكتمال تركيب الشبكات الداخليه كما تم التوقيع على عقود لمد محليتي البرقيق وحلفا وهذا بدون شك سيسهم إسمهاماً كبيراً جداً في تطوير الزراعه والصناعه . وأكرر سادتي أن ماتم إنجازه هائل جداً وهو نتاج جهد وعرق آلاف الشباب السوداني وغيرهم من خبرات إخوتنا الصينيين وآخرين وبكل تأكيد لايمكن التقليل من إنجاز كهذا أو تبخيسه بأي شكل من الاشكال . مره أخرى أشكر إهتمامكم بهذا المجال الحيوي والهام وإلى أن نلتقي في بوستات أخرى السلام عليكم ورحمة الله وبركاته
للجميع مؤونة عشرة أعوام من الود
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: nazar hussien)
|
Quote: مره أخرى أشكر إهتمامكم بهذا المجال الحيوي والهام |
والله انت المشكور على تعريفنا بأن هذا المجال حيوي وهام ونزيدك كمان .. الكتابة في هذا المجال مهمة ولازم تكون علمية ودقيقة ..
Quote: للأسف لاحظت والجميع إستمرار وجود قطوعات هنا وهناك |
كتر خيرك انك لاحظتها لكن الأسف على شنو.. انت مطالب بأنك تجي تتأسف على العنوان بتاعك المثير ده.. وما ظنيتك بتعملها
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: nazar hussien)
|
Quote: صلاح الدين نادر يا مسطول...والله انا بضحك نص ساعة.. انت ونزار حسين مجرد ما تمشوا السودان ناس الادارة حايعتقلوكم.. والعجب كان عرفوكم ساكنين وين !! الا كل شهر ترسلوا لناس البيت شرائط رتاين..
قريبي محمد فرح ده جننتوه جن والخوف يركب يمشي مروي براه يعمل للسد تنفس صناعي!!
|
حسين نوباتيا....يا مفخرة...(ناس الادارة يعتقلونا بالبطارية؟؟ وبعدين نحن مرحلة الرتاين زاتا ما وصلناها (لمبة ام صويت بس) صلاح الدين نادر ما بعرفوا وصل الرتاين والله لا...
اما قريبك فقد نفس الموضوع من اساسه...
وقال: انا اريد وانت تريد والمهندس يريد والله يفعل ما يريد وأدانا مصحف هدية...(نحن كلام الله ما بناباه لكن الفيه اتعرفت)
بلاي شوف: زول يكضب عليك عديل ويجي يقول ليك (الله يفعل ما يريد) هسي الله يفعل ما يريد دي...مش تزيّد ساكت...في زول مسلم ما عارف الله يفعل ما يريد؟
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: صلاح ليون)
|
الكهرباء: خروج (سد مروي) سبب القطوعات الخرطوم الرأى العام
عزت الهيئة القومية للكهرباء قطوعات التيار في الأيام الماضية لخروج وحدتي كهرباء سد مروي اللتين تغذيان الشبكة القومية بـ (250) ميقاواط من الشبكة القومية الأحد الماضي. وأكدت الهيئة في بيان صحفى امس تكثيف جهودها لسد العجز بتشغيل وحدات التوليد المتاحة كافة بطاقتها القصوى، إضافة لفصل مدن بورتسودان، دنقلا، الدبة وكريمة عن الشبكة القومية وتغذيتها من محطات التوليد المحلية. وقالت الهيئة إنها ستقوم بتوزيع المتاح من الطاقة الكهربائية بصورة عادلة وناشدت المواطنين بترشيد الاستهلاك.
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: نيازي عبدالله مرحوم احمد)
|
بعد التأكيد على كذبك منذ بداية الأمر وانك ما عايز تجي وتعتذر نجي نحلل ليك كلام الطير الفي الباقير أدناه:
Quote: عزت الهيئة القومية للكهرباء قطوعات التيار في الأيام الماضية لخروج وحدتي كهرباء سد مروي اللتين تغذيان الشبكة القومية بـ (250) ميقاواط من الشبكة القومية الأحد الماضي. وأكدت الهيئة في بيان صحفى امس تكثيف جهودها لسد العجز بتشغيل وحدات التوليد المتاحة كافة بطاقتها القصوى، إضافة لفصل مدن بورتسودان، دنقلا، الدبة وكريمة عن الشبكة القومية وتغذيتها من محطات التوليد المحلية. وقالت الهيئة إنها ستقوم بتوزيع المتاح من الطاقة الكهربائية بصورة عادلة وناشدت المواطنين بترشيد الاستهلاك. |
اولاً : ما عارف كلامك الجايبو من الجريدة ده إنو الجريدة ذاتها جايباهو من وين ثانياً: لفظة خروج دي لا تقال عندنا في مجال الكهرباء وبعدين هي متين دخلت يازول عشان تخرج سريع كده ياخي ده الظاهر كضبك انت الهنا في سودانيز ده هين الدور والباقي على الدراب الكبير البيفكوهو للناس البسطاء ثالثاً: وناشدت بالترشيد .. هي ذاتا في عضمه وينا..
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: GamarBoBa)
|
Quote: تعبنا والله من مكتب البلاغات لكن انا حدي معاكم الصفحة الرابعة .. |
ليون ..
بالشايفو دة البوست دة ببقى زى بوست مجزرة كجبار...
خصوصاُ قالوا العطل في الخزان ( التوربينات اتركبت غلط - ماموزونة مع بعضها)
عاملة خلل فى انتاج الكهرباء ....
لحدى مايجى زول متخصص يشرح لينا الكلام دة ويؤكدو او ينفيه ... نكون وصلنا صفحة خرتمية كدة :)
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: نوفل عبد الرحيم حسن)
|
اخوي محمد فرح
تحية طيبة
ياخ الناس ديل لوايييييق ساي وما عندهم موضوع وخاصة ابو الريش وصلاح ليون دا .....
ما تشتغل بالحنك دا وقول ليهم لما يجي بكرة القاصدو انا بكلمكم .....
الكهرباء دي زاتا نوع من الترف ساي وبتكمل القروش ...
اهلنا زمان شغالين بالفوانيس والرتاين ... والنسى قديمو تاه ..
ارجعو للرتينة والفانوس والمشلعيب لحفظ الطعام .. الثلاجات استفيدو منها في حاجة تانية .. دواليب مثلا ..
ولو اشتهيتو تشوفو انوار مولعة امشو مطار الخرطوم اتفرجو شوية وارجعو ....
بلاش كهرباء وبلاش بوبار معاكم ...
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: علاء الدين حيموره)
|
علاء الدين حيمورة ليه كده ياخي !!!
Quote: ياخ الناس ديل لوايييييق ساي وما عندهم موضوع وخاصة ابو الريش وصلاح ليون دا ..... ما تشتغل بالحنك دا وقول ليهم لما يجي بكرة القاصدو انا بكلمكم ..... الكهرباء دي زاتا نوع من الترف ساي وبتكمل القروش ... |
ياخي نحنا مشينا دقينا الباب لي ود فرح ده وقلنا ليهو تعال ادينا كهرباء من بكره وما تقطع كلو كلو ...
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: اينانا)
|
Quote: ياخي نحنا مشينا دقينا الباب لي ود فرح ده وقلنا ليهو تعال ادينا كهرباء من بكره وما تقطع كلو كلو ... |
يا صلاح اخوي اخونا محمد فرح دا بعتمد على كلام ناس الحكومة ... ودا عيب الحكومة ما عيب محمد فرح .. الحكومة تقول ليه قول ويقوم يقول .. يعني الناطق الرسمي للحكومة في المنبر دا .. وزي ما عودتنا انو بتخزل شعبها فمحمد واحد من شعبها ..
هسي بكرة حا يجي بخبر بانشاء مصنع سكر في مروي ومصنع طيارات في رهيد البردي ومعمل لانتاج الطاقة الننوية ويبشر باننا حا نصنع القنبلة الذرية خلال 3 شهور .. وامريكا وروسيا قد دنا عذابها ..
خليكم في الحاجات المهمة دي وانسو الحاجات الهامشية زي الكهرباء والموية والصحة والتعليم ..
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: اينانا)
|
ايمان ..
وحات الله جيتك دى ماتمرقى منها ساى ...
اهديك ..
ضحكك شرح قلب السماء رطب الصحراء و لمس عصب الجبل دوزن الحزن المهاجر فى المقل صحى انوار المداين و غازل النيل و السهل ضحكك وصول حزمة رسائل من اهل
اضحكى تضحك الدنيا ..و تفيض
اضحكى تصحى الكهارب فى الشوارع ينكسر سور الموانع و تبدا اعراس المزارع و المصانع
و توصل الناس
الروائع
يا روائع اضحكى
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: علاء الدين حيموره)
|
الباشمهندسة هالة:
Quote: حيرتنا بس، يعنى دة كلام هندسة و لا ونسة ساكت،،، |
معليش على الرد المتأخر .. ما شفته مداخلتك إلا هسه ده.. والله الزول ده شغالين معاهو ونسة ساكت من أولها.. يعني لما قال إنو الكهرباء يادوووب جات ما حبينا ندخل معاهو في تفاصيل علمية زي (No Load) وما شابه ذلك فالناس قعدت تضحك فيهو وبسطت الموضوع لدرجة في ناس قالو إنو الكهرباء جاية شايلنها في الكونتينرات ... وناس اقترحت حكاية الوكي توكي وحول وافتح وقرض على كده
وتاني جا قال شنو كده وشنو كده وغايتو كلو ممشينو ليهو لانو الغرض عندنا حاجة واحدة بس ومنتظرين النتائج ... عايزين الكهرباء
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: الزبير صالح الزبير)
|
يا الزبير: دي ياها زاتا ادوني ناسي النلقطم من ضو وامشي علي أهلي
جدنا بلة في مجلس صلح بين قريتين ناسا متشاكلين تكل عكازو وراجي نتيجة النقاش عشان حقن الدماء لما الاجاويد شبكوا الناس خطب زي خطبتك الطويلة دي قال لهم....انا قال الله وقال الرسول آآآ بعرفو ادوني ناسي النلقطم من ضو وامشي علي اهلي..
دحين كلامك دا انا ما قريتو لكن كان ما فيه زنقة لمحمد كهرباء ما فيه فايدة
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: الزبير صالح الزبير)
|
ايييك يا الزبير صالح ياخي ما قدر ده مداخلتك دي كان حصلنا بيها الصفة الرابعة برااحة
نرد ليك بالقطاعي:Quote: يا جماعة الراجل بيكتب وبسند كلامة بلغة علمية ميغا فولت ومخارج اربعة وقال ليكم كمان تم تدشين وصول الانتاج للخرطوم وبعد دة واحد نط لية في حلقة ويقول لية بيتنا في كاب الجداد كهربتة قاطعة من الصباح ما تقطع المشكلة شنو الناس في شنو وانتو في شنو البلد ناس الحكومة ديل عندهم مشاكل اكبر من الحاجات التافهة دي كهرباء وموية وعيش ومواصلات يا اخوانا الحكومة عندها مشاكل اكبر انهيار الاقتصاد العالمي خلي قروشهم الفي ماليزيا في مهب الريح ويمكن تضيع عاوزنهم يشوفوا مصالحهم ولا بفتشو ليكم كهرباء ما اهو عملوا العليهم غرقوا المناصير وبنو ليكم سد ووصلوا ليكم الكهرباء لغاية الكباشي اها بعد دة يعملوا ليكم شنو العاوز كهرباء يشيل لية جركانة ولا شوال يمشي يشيل لية الكهرباء البتكفية ويمشي يعني الحكومة تجيبها ليكم لغاية بيوتكم كمان والله غريبة فعلا شعب كسلان . |
لا تعليق..
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Salahaldeen Nadir)
|
كامل الشماتة في ناس بري مربع 5 صوت جنريتر مقسم سوداتل يصدح ب أغنية وييييييييين حبيبي فاكرك معايا و يهديها للهيئة القومية للكهرباء, وعمو مكاوي وخالو إسامة وجميع الأهل بالرتينة زهجت من جنس ده زاتو
إقتراح للأخ محمد فرح تجيب صورة المهندس الاداك البشريات دي وبالفوتوشوب تعمل ليه نخرة طويييلة زي بينوكيو لما يقول بشريات ضاربة
----------------------------------------------------------- بشراكم ياشباب لكأني والله بالصفحة الرابعة وان ريحها قد بان طيبه
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Salahaldeen Nadir)
|
الفقرة البعدها يا الزبير صالح:
Quote: بعدين تعالوا هنا ما الحكومة دي بتكضب عليكم من عشرين سنة فاتت وحاتكضب إلي أن يلطف بنا الله الحصل شنو متو ما هندا عايشين حصل ليكم شنو كم نفر ماتو في مروي ويعني شنو ما عشان نجيب ليكم الكهرباء انتو دايرنها كدة ساكت بدون تضحيات انتو ما سمعتو بالجزائر الماتو فيها مليون شهيد عشان تتحرر من الاستعمار ما الحكومة لقت انو الازهري رحمة الله جاب ليكم الاستقلال زي الصحن الصيني لا فية شق ولا طق بدون شهادة ولا حرابة قلنا ما ممكن احنا لازم نكون احسن من الجزائر واحسن كمان من جنوب افريقيا لازم كم نفر كدة يموتوا عشان السد وكم مائة الف كمان يموتوا في الجنوب ومثلهم بالملاريا وزيهم مرتين ثلاثة كدة يموتوا كمدا وغمامن الحاجات التانية القارفة الناس عشان نحس بالمسئولية ونشعر بلذة التضحيات. |
برضو لا تعليق.. . .. ... .... صلاح الدين مراسلنا من ناكورا وبري برجع بعد شوية..
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: صلاح ليون)
|
هاكم شوية بشريات
Quote: عزت الهيئة القومية للكهرباء لجوءها لبرمجة قطوعات الامداد بالشبكة القومية لخروج وحدتي التوليد بمحطة كهرباء سد مروي من الشبكة القومية منذ الخامسة من مساء الاحد الماضي علما بأن الوحدتين كانتا تمدان الشبكة القومية ب(250) ميقاواط، واكدت الهيئة ان جميع وحداتها تعمل بطاقتها القصوي. واكدت الهيئة في توضيح صحفي تلقت «الصحافة» نسخة منه انها لجأت الي فصل قطاعات بورتسودان ، دنقلا ، كريمة والدبة من الشبكة القومية وتغذيتها من محطات التوليد المحلية وذلك لتوفير اكبر قدر للمشتركين بالشبكة القومية، مؤكدة انها ستقوم بتوزيع المتاح من الطاقة بصورة عادلة . تشير «الصحافة» الي ان توربينتي التوليد بمحطة سد مروي لا زالتا في مرحلة الاداء التجريبي. بله علي عمر :الصحافة |
المصدر
Quote: شكا مواطنو كسلا وبورتسودان من قطوعات متكررة في الإمداد الكهربائي متزامنة مع شح حاد في المياه ،عما ارجاء المدينتين والمحلات التجارية . وعزا المدير العام لوزارة التخطيط العمراني بولاية البحر الأحمر، بالإنابة المهندس أحمد حسن عبد الماجد، القطوعات إلى العمل في تجديد الشبكة الداخلية للمدينة لاستيعاب الكهرباء القادمة من سد مروي، والتي وصل منها حتى الآن إلى المدينة 60 ميغاواط، على أن تتم إضافة الحصة المقررة للمدينة من كهرباء السد في الفترة القادمة وفقاً لما هو مخطط له، وطالب عبد الماجد، المواطنين بالتحلي بالصبر إلى حين اكتمال فترة تجديد الشبكة، مؤكدا أن انتظارالمواطنين لن يطول ،وأضاف أنه بدخول الحصة الكلية من كهرباء مروي ستودع بورتسودان قطوعات الكهرباء دون رجعة . وفي ذات الإطار، تشهد مدينة كسلا انقطاعا للتيارالكهربائي استمر زهاء الشهر دون أن تلوح أية بارقة أمل للمعالجة، إلى جانب تذبذب في الإمداد المائي بالمدينة . واقر وزير الثقافة والإعلام، الناطق الرسمي باسم حكومة كسلا، بالمشكلتين ولم يذكر الأسباب التي خلفتهما . وعبر عدد من مواطني المدينتين عن سخطهم من تلك القطوعات، وطالبوا المسؤولين بالإسراع بالحل. محمد عثمان :الصحافة |
المصدر
صحيفة الرأي العام
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: GamarBoBa)
|
Quote: طلعوا دنقلا وحلفا وكسلا ديل ناس هامش قضيتهم مختلفة ونحن ناس المركز لازم ننعم بهوا بارد اقلاها. |
ياموسي امش نوم في هامشنا هنااااك وتعال بكرة الصباح دغش بالطيارة .. دي مشكلة ؟؟ ما قالو اهلنا هناااك بقو اخر بهجة بالنور البيسمعو بيهو بس هسع ما قادريين يشوفو لانو العشي الليلي وصل قبل النور ...
امل وبصدق ان يتقي من ولي فيناوعلينا - عنوة او رضاء سكوتي -الله في بلادنا واهلنا ويجيد عمله بس .. يجيد عمله ....بس .. يعني حاكم يعرف عمله ومهندس يجيد عمله وهكذا والكهربا ملحوقة ....
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: GamarBoBa)
|
الرفيق المناتل صلاح ليون
تعرف: أنا شكلي بقيت ما متكيف من أخونا ود البشرى عشاااااااان إسمو ده
نحن كهربتنا قطعت لمدة ربع ساعة لغاية ما إكتشفنا إنو السبب إنو فيوز البيت الرئيس ما إستحمل الكهرباء الطوووووووول اليوم دي, ف مسكين طرشق, قمنا جبنا واحد جديد من ماركة( ولا تصهرون) البتستوردو شركة (يستوردون).
نحن غايتو منظرين صورة المهندس البشرياتي الخدع محمد فرح وضحك علية ب بشريات مضللة
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: ناذر محمد الخليفة)
|
Quote: أرفع التمام يا كهربائي منكـ لوه: |
الشهادة لله امس موبايلاتنا جرت هوا عديل شغالة (جيجاد) لكن من الصباح ما قطعت وننعم بها ايتها نعمة لكن بكرة ما بعرف ما وكته هسة...نرفع ليك تمام بكرة
بمناسبة ما وكته يا عمك واحد بلدياتنا جابوا ليه ساعة من السعودية وعمك ما قدر يفهما ليك كلو كلو علموه بعد تعب شوكة وربع ونص والا ربع المهم واحد من المرجفين المناتلين سأله الساعة كم وهي تقترب من النص الا خمسة قال ليه مش وكته خاااالص...أسأل بعد شوية بجاوب ليك واتلفت لزول تاني قاليه ناس ياخي ما بعرفوا يسألو متين
اظن حكيتها قبل كدة
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: GamarBoBa)
|
Quote: واحد بلدياتنا جابوا ليه ساعة من السعودية وعمك ما قدر يفهما ليك كلو كلو علموه بعد تعب شوكة وربع ونص والا ربع المهم واحد من المرجفين المناتلين سأله الساعة كم وهي تقترب من النص الا خمسة قال ليه مش وكته خاااالص...أسأل بعد شوية بجاوب ليك واتلفت لزول تاني قاليه ناس ياخي ما بعرفوا يسألو متين |
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: اينانا)
|
ايها الاعزاء .. بالله خلونا من الكهربا دي ملحوقة مش في جاز ولمض وموبيلات شغالة (فيها ام ام اس وتي في ) خلاص ما ضروري بس الهاميني كتير اهلنا بعد السد شمالا الي بكان اسرتي الممتدة في وادي حلفا .. اها الموية الورا السد دي طالما ما بتطلع كهربا بتسوي شنو في واطتنا واهلنا ؟؟ المكان مهم والخرتوم التطيير اصلها ما كانت موجودة في الخرطة قبل ميتيين سنة ...بعدين ياناس الخرتوم ما تركبو ركشات وتلفو في سياحة داخلية يعني انتو اصلا كنتو بتنومو متيين ما البعوضة شغالة دوام كامل واللا انتو بس شاطرين علي الكهربا ....ما تولعو ياااخ خليكم مضلميين .. احسن ليكم بشان الحرامية مايسرقو التحت المخدة .....ايه رايك يا قمربوبا تسافر الي اهلنا هناك وتشوف الكهربا وصلتم كمان واللا لسه وممكن تسافر بطيارة من مطار مروي العالمي ..شوف ليك طيارة رش من حلفا الجديدة هناك في طيارات كتار مقرشة من زمااااان ...بس شيل معاك جالون بنزيين ..
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: كتو)
|
الموضوع ما بس كهرباء بتقطع
الموضوع قصة واحد مهندس (مندس) قام بتسريب بشريات ضاربة للأخ محمد فرح
ونحن تضامنا مع محمد فرح ح نعتصم بالبوست ده لغاية ما يجيب لينا صورة ذلك البشرياتي المندس
أو
محمد فرح يجي يقول خلاص السماح و اعفو للمهندس (داك) لأنو قال تاني ما بيعمل كده
------------------------------------------ ناس الشجرة: قبلكم قبلكم قبلكم
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: كتو)
|
يا كتو ياخ نحن لو ما الأخوان ديل ما كانت حالتنا تكون سعبة خلاس
و عشان يعرفو إننا ما بس شعب نقناق و لا مناتل ولا مرجف بل بالعكس, نحن جننا وجن البيكضب علينا وعلى جماهيرنا
فنحن بصدد تشكيل جمعية لتذكير الأخ محمد فرح بضرورة فضح ذلك البشرياتي المندس
وعليه ح نقوم بنقل رابط هذا البوست لكل بوست بشرياتي يفترعو الأخ محمد فرح مستقبلا
أو
يجي يقول أنا عفييييييييت الكضااااااب إنتو كمان أعفو ليه وهو قال تاني ما بيعمل كده
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Salahaldeen Nadir)
|
Quote: بشراكم ياشباب لكأني والله بالصفحة الرابعة وان ريحها قد بان طيبه |
صلاح الدين ... نحن معاك والله لو داير الرابعة، ولو داير بعدها..
لكن دي:Quote: ونحن تضامنا مع محمد فرح ح نعتصم بالبوست ده لغاية ما يجيب لينا صورة ذلك البشرياتي المندس |
صعبة شديد ... محمد فرح زاتو تاني ما بجي ... يقوم يجيب ليك صورة المهندس كمان؟
____ أطفي الشاشة دي .... مش قالوا ليكم ترشيد؟
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: GamarBoBa)
|
Quote: غايتو بري الليلة بيسحرووووها
ماشاء الله, لا حول ولا قوة إلا بالله بسم الله الذي لا يضر بأسمه شيئ
|
دا شنو يا صلاح الدين عينك لكن لقيتها حااااارة تاني غايتو الواحد يقول مع عينك دي ( محمد معانا ما تغشانا)ههههههههه
قمر بوبا!!!
Quote: ماخدة اجازة سبت ونحن شغالين قطعوا ليها الكهربا وتستاهل
حنضطر نرسل ليها هوا بارد في ساخن بارد ونرسل ليها بطارية لابتوب مشحونة لانها حتقطع كمان دقايق |
لقيتك حاسد حسادة لكن هههههههه انتو خلوني انا ما تشوفوا محمد فرح دا ساكن وين وأحسدوهو عشان كهربتهم تقطع زي ما قطعنا نحنا تحسدوا فيني انا المسيكينة دي
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: GamarBoBa)
|
منطقة شمبات يلهج لسانها بالثناء والشكر والتقدير للاخ محمد فرح ومن وراءه رجال الهيئة القومية للكهرباء على جهدهم الكبير المنقطع النظير من اجل تقليل القطوعات وجعلها فقط من الثامنة صباحاً وحتى السادسة مساء وتبشيرهم لنا بان القطوعات مستمرة حتى رمضان المبارك الذي نسال الله ان يكون باردا كغير العادة . محمد فرح عليك الله خليك في زيارة اوباما احسن
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: صلاح ليون)
|
كدي معليش بجد سؤال
أنا مفروض أفهم شنو لما زول يفتح بوست ويسيبو ساي كده, ومايرجع ليه إلا مرة أو اتنين ما إنو وللإمانة البوست مانزل الصفحة التانية إلا مرة ولا اتنين كان بالغ يعني الموضوع لسة سخن, وأهو ناس الشجرة و (المناطق الغلط) من بري قاطعيييييين
السؤال ليك يا محمد فرح مرفق مؤونة إسبوع إستفهامات
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Salahaldeen Nadir)
|
Quote: وقالت الهيئة إنها ستقوم بتوزيع المتاح من الطاقة الكهربائية بصورة عادلة وناشدت المواطنين بترشيد الاستهلاك. |
الترشيد التهليل التكبير و مافي تغييييييييييييييير الله غالب عشان كده نحن مسلمين امرنا لله لانو الانسان مسير و الحمدلله انت فهمت دي ان الله يفعل ما يريد و انك ما عندك اراده مع ارادته لذلك ما دايرين نسمع كلمة السد هي الرد, والله فعلا اقام العباد فيما اراد............ز
لطفي
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Abu Eltayeb)
|
يا جماعة انا والله بجد شايف انو تعابير زي (قطع كرهباء) أو (أنقطاع التيار) دي زي شوية حادة
وأسوة بعمل الاخوان في وزارة الصحة ف أنا بأقترح تعبير إعسار كهربي ليكون الاخ غير الشقيق
لتعبير إسهال مائي
لأنو الكهرباء في الحقيقة ما بتكون قاطعة بقدر ما بيكون في تعثر وإعسار في توصيلها للكل في نفس الوقت
ف باللاي تاني ما تقولو الكهرباء قاطعة, قولو في إعسار كهربي طفيف في حلتنا
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: محمد أبوالعزائم أبوالريش)
|
لا لا ياخ فجوة دي ماااا رسالية
بعدين أقول ليك ليه أعسار؟
الإعسار:
Quote: هو حالة المدين الذي تزيد ديونه على حقوقه ، أي تربو ديونه على أمواله. |
والكهرباء نحن بنشتريها prepaid يعني ديييييييين على الهيئة الغومية للكهرباء NEC
Quote: عنْ أبي هُرَيْرَةَ - رَضِيَ اللَّهُ عَنْهُ -عَنْ النَّبِيِّ -صَلَّى اللَّهُ عَلَيْهِ وَسَلَّمَ- قَالَ: "كَانَ تَاجِرٌ يُدَايِنُ النَّاسَ فَإِذَا رَأَى مُعْسِرًا قَالَ لِفِتْيَانِهِ تَجَاوَزُوا عَنْهُ لَعَلَّ اللَّهَ أَنْ يَتَجَاوَزَ عَنَّا فَتَجَاوَزَ اللَّهُ عَنْهُ" وفي رواية لمسلم: "قال اللَّهُ -عَزَّ وَجَلَّ- نَحْنُ أَحَقُّ بِذَلِكَ مِنْهُ تَجَاوَزُوا عَنْهُ". (رواه البخاري ومسلم). |
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: انعام عبد الحفيظ)
|
Quote: الكذب
وهو: مخالفة القول للواقع . وهو من أبشع العيوب والجرائم، ومصدر الآثام الشرور، وداعية الفضيحة والسقوط. لذلك حرمته الشريعة الإسلامية، ونعت على المتصفين به، توعدتهم في الكتاب والسنة:
قال تعالى :((إن الله لا يهدي من هو مسرف كذاب))(غافر: 28).
وقال تعالى: ((ويل لكل أفاك أثيم))(الجاثية:7).
وقال تعالى: ((إنما يفتري الكذب الذين لا يؤمنون بآيات الله، وأولئك هم الكاذبون ))(النحل: 105).
وقال الباقر (عليه السلام): (إن الله جعل للشر أقفالا، وجعل تلك الأقفال الشراب، والكذب شر من الشراب)(1الكافي).
وقال (عليه السلام): (كان علي بن الحسين يقول لولده: اتقوا الكذب، الصغير منه والكبير، في كل جد وهزل، فإن الرجل إذا كذب في الصغير، اجترأ على الكبير، أما علمتم أن رسول الله (صلى الله عليه وآله) قال: ما يزال العبد يصدق حتى يكتبه الله صديقا، وما يزال العبد يكذب حتى يكتبه الله كذابا)(1 الكافي).
وقال الباقر (عليه السلام): (إن الكذب هو خراب الإيمان)(2 الكافي).
وقال أمير المؤمنين (عليه السلام): ( اعتياد الكذب يورث الفقر)(3 الخصال للصدوق).
وقال عيسى بن مريم(عليه السلام): (من كثر كذبه ذهب بهاؤه)(4 الكافي).
وقال رسول الله (صلى الله عليه وآله) في حجة الوداع: (قد كثرت علي الكذابة وستكثر،فمن كذب علي متعمدا، فليتبوأ مقعده من النار، فإذا أتاكم الحديث فاعرضوه على كتاب الله وسنتي، فما وافق كتاب الله فخذوا به، وما خالف كتاب الله وسنتي فلا تأخذوا به)(5 احتجاج الطبرسي) |
المصدر
!
| |
|
|
|
|
|
|
Re: من بكره ... تاني مافي كهرباء بتقطع في الخرطوم إن شاءالله (Re: Salahaldeen Nadir)
|
بدت كده
Quote: من بكره ... تاني مافي كهرباء بتقطع في الخرطوم إن شاءالله المره دي مازي سابقاتها المره دي الجواب نهائي وتاني الولايه حتستمتع بتيار مستمر بدون تردد أو إنقطاع إن شاءالله
|
Quote: هذه بشارة مفرحة وستتواصل بشائر النصر بعون الله |
Quote: انا زاتي هنا الكهرباء قطعت زي 10 دقائق وجات بس بإذن الله من بكره حتستمتع وكل سكان الولايه بإمداد كهربائي مستمر بعون الله
|
وبرغم التقارير
Quote: من بكره تاني التيار مستمرررررر إلى مالانهايه دي الاكيده ياحبيب من بكره حتشتهوا قطعة الكهرباء بالليل ولمة الحوش بالبطاطير والشاي البالقرقوش
|
وبرغم مزيد من التقارير
Quote: شايف الاغلبيه مامصدقه إنو الحلم خلاص إتحقق وإنو تاني قطوعات مافي زمن إنقطاع الكهرباء خلاص ببح ، إنتهى ده وعد قطعتو الإنقاذ وهاهو الآن تحقق وأصبح واقعاً في هذه اللحظات يتم الإحتفال بوصول كهرباء مروي للخرطوم الحمد لله الذي جعلني أشهد هذا اليوم أي زول حالياً موجود في الخرطوم والكهرباء قاطعه عندو يكتب إسم المنطقه اللي هو متواجد فيها وتحدي لو تاني الكهرباء قطعت
|
وبعد ضغط شديد و لياقة
Quote: لاأدري إن كان حسن طالع أم سوء المهم أنا واثق إنو من بكره تحديداً تاني مافي كهرباء بتقطع ولمن يريدون تبخيس هذا الإنجاز عليهم أن يقارنوا واقعنا الحالي بواقعنا السابق عندما كانت الكهرباء تقطع بالتلاته والاربعه يوم
|
اها قام جا واحد شاكلنا ليك
Quote: أها ياجماعة الكهرباء بت (قطع)
والماسورة بت(نقط)
المطلوب اثباته شنو؟
غايتو اهو كلو مناتله ؛بس الكيزان قاعدين .
شوفوا لينا حاجة عليها القيمة ؛نشيل بيها الجماعة ديل ؛بدل الملاوه دي.
نشكر كل مراسلي الولايات لمدهم لنا بتقارير الامداد الكهربائي بمناطقهم.
وناس الكهرباء طلعوا كضابين ؛
اها البعدو
|
و ف الأخر طلع السبب
Quote: حسب ماعلمت يبدو أن كمية الكهرباء التي وردتنا من سد مروي كانت أكبر من أن تتحملها موزعات الخرطوم مما أحدث بعض الأعطاب الفنيه . حالياً نحنا مشكلتنا إنو الكهرباء بقت أكتر من اللازم
|
!
| |
|
|
|
|
|
|
|