خيــيمة الحــردلو - العمارات

ود سنجة اللّصمْ شيخ الضعاين المادّة
سيد الشوقرت والفي المشارع هادّة
ود شنتير متل منيوش بديقةً حادّة
ضبحن قلبو عِصرات الهموم القادّة

عقيد الروقلن بالصي خريف، سنجاوي
مقْنع عازة ركّازة الضعيف، سنجاوي
دارو العامرة ما بيغشاها صيف، سنجاوي
حمّر بحرو ما بعتّرلو قيف، سنجاوي

حافظ جارو صاحبو بتمّو كيف، سنجاوي
ما ذمّوهو قالوا طردلو ضيف، سنجاوي
ود شنتير بدور زولو العفيف، سنجاوي
يغسل همّو في الضل الوريف، سنجاوي

سيد اللّدْرَتَنْ ليهن عِريف، سنجاوي
دلاهن على الدندر لفيف، سنجاوي
أبيض قلبو زي شاشاً نضيف، سنجاوي
طالب زادو مابْقول ليهو اقيف، سنجاوي

عَقود السَّمْ وزايل الهمْ، أخوي سنجاوي
ساعة الحارّة زي توراً كَرَف للدمْ، أخوي سنجاوي
فاق القبْلو في ربقي وفصاحة ونَمْ، أخوي سنجاوي
باهْل الخير متل مطر السواري العمْ، أخوي سنجاوي

ود شنتير مقامك عندو يا سنجاوي
مسمار قلبو في الغربة وجمُرْها الكاوي
ياكَ جبنتو من بكريها لا التلتاوي
في وداعة الله يا صاحبي الونستو تداوي