|
|
|
 Re: اطرد الاحلام العمده قرشو ، والملا عمر ،، وعمو قرجه (Re: Dafi)
|
يا دافي
اها داير تجنني
نزل لي
وسوي لي لنك
انته قايل تنزيل الاغاني ده ساهل  اييييك دي حكاية طويلة خلاص
تجيب وصله ، وتحنس الجهاز ،،وتعمل شنو ما عارف
اها شفته ليك طنقعه زي دي عرفته امسكك يا طه
المهم انا بنزل ليك وانته اعمل لنكات الحفظ لانو لسه ما ادونا ليها
كان داير اي مساعده ما تتردد عندك مبالغ ماليه محرقه روحك داير تستثمره انا جاهز برضو
اعمل لنكاتك واعمل لي لنكاتي وكلمني حاول حس بي
| |
 
|
|
|
|
|
|
|
 Re: اطرد الاحلام العمده قرشو ، والملا عمر ،، وعمو قرجه (Re: almulaomar)
|
استاذ الملا عمر
صاحب الوجود المميز والاطلالة العذبة
شكرا لتحمل مشاق الرد ،، والوقوف متاملا عند الضفه
انا عادة بكون بالاتجاه العكسي من المورده وبعاين لي قدام وفي روايات أخري تحت الكبري يا مسجد النيلين المكان داك فيهو عصريات ولا في اي مكان في العالم انا متاكد من كده
شكرا ،، شكرا
| |
|
|
|
|
|
|
|
|
 Re: اطرد الاحلام العمده قرشو ، والملا عمر ،، وعمو قرجه (Re: tmbis)
|
الشكر لك أولاً للهدية القيمة ، والشكر لك ثانياً لإعطائي أكثر من ما أستحق من صفات والشكر لك أخيراً لأن الذي لا يشكر الله لا يشكر الناس.
قلت لي تحت الكبري وجمب مسجد النيلين لو الواحد عكس الشارع في إتجاه الإذاعة دحين ما بيصل الجولدنج قيت والريفيرا وأخواتهما أها بالمناسبة دي إتفضلوا كلكم عازمكم سمك وفي الموردة.
-----
سؤال بريء إنت البقعد العصريات تحت الكباري شنو مع حالات الطواري الماشه في البلد.
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: almulaomar)
|
استاذي الملا عمر
الشكر لله اولا واخيرا
ولما كنا سكان الضفة الغربية من النيل مورداب خلقه واخلاق وبالميلادكمان وهذا ظاهر عيانا وبيانا من خلال تجضيمنا للجلده زي ما الله خلقه من تيوة لي كورة شراب لي كاسات والكاسات هنا اقصد بها كاسات الدوري
البريش فينا يحتاج لي تلاتة استوبرات وسيردباكين ده خلاف البكونوا جاريين وراهو من بوابة عبد القيوم والكورة في استاد الخرطوم ولما ينفرد كان بيقرش صوت الرشيد بدوي عبيد اطلع يا يور ،، اطلع يا يور
والرشاشات عارفين الكلام ده والمغربي كان بجيب القوون من نص الميدان مكان يافطت طعم طفلك الكورة تسكن الشباك في التمنيات مكان عش الحدية ،، والحدية نوع من الجوارح تبني اعشاشها في الاعالي
نقبل الدعوة ولي عودة معك استاذي الحديث معك يبل الشوق ويشرح الصدر
في اللحظه دي حاسس بي نفسي حايم هناك
اما ما يخس الكبري أو مسجد النيلين
اكيد انا ما ح اكون مهندس طرق وكباري ولا أمام لمسجد النيلين
ولا ضابط في الجيش
ولا كمان ماسك لي موية وعندي حواشه
لكن لما نتلاقي هناك وننزل البحر
بوريك طبك
شكررررررررررررررررررررن استاذي شكرن
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: tmbis)
|
تمبس وبس
أحسب أن ذات الرشيد البدوي قد قال قولته المشهورة في حق بريشكم هذا فقد صاح صيحة عظيمة قائلاً أصحى يا بريش وإن لم يقل قبلها أطرد الأحلام ، أما الحدية أو الحدأة تلك التي تبني أعشاشها في الأماكن الشاهقة فرأسمالها عندنا سفة تمباك واحده وشوية لحم كيري من أقرب جزارة وشوال فحم فاضي. أما الوصفة السحرية فلن أذيعها ما لم تتعهد لي بحفظ حقوقي في براءة الإختراع هذا.
---
من المؤكد أنك لست هاوياً أو مغرماً بصيد السمك ولا أحسب أنك شاعراً تستمد إلهامك من سليل الفراديس والحال كذلك تبدو أن لديك مآرب أخرى وحتى تفصح عن هذه المآرب صراحة لن أتبلبل لأن الإتبلبل عام زي ما بقولو وأكيد أكيد حا نتقابل.
لك تقديري وإحترامي
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: almulaomar)
|
استاذي الملا عمر
حدأأت من 90 ولي جاي بي "حققم " من علب النيفيا أو كريم 21 يعني سفتك دي" ما بتاكلم" ومتعودين علي اللبع التقيل والعضه النضيفه من إسكلوب بانيه وهوت دوج ولام جوبص وبيرجر والاستيك بي أنواعه كباب ، وأوصال ،،والصقر فيهم "مدوعل" كان داير يرك الا يفضو ليهو مدرج كامل في مطار هيثرو ،، لذلك ربع الكيلو " الكيري "العازم مجازفتو ده إلا تسوي " شرموط " وتعلن عن سر فشل الخلطه السحرية خاصة برآة الإختراع الداير تخم بيها " سمبرنا " خم في شوالات الفحم الفاضيه ، وليك حرية إنك تعمل "جيك" بي نفسك علي أخطر وصفه سحرية خاصه فقط بي محاربي المورده القدامي "والمورداب يا تمرجي" موجوده فقط هذه الوصفه عند محلات سكي للسمك الطازج والذي قد عمت شهرته الآفاق من زمن حفرو البحر حتى تقنت به أحدي الغنايات المشهورات ما عارف كان حواء الطقطاقه ، كان نصره ، كان نوال الزغبي ، كان نانسي عجرم حيث ذكرت بي إيجاز أن أخطر بلطي في الدنيا دي عند سكي ده واسهمت معربه أن ( البلطي ده ...آآآآ يا ، عند سكي ده ...آآآآيا ، هنا ده ...آآآآيا في المورده ...آآآآيا ويا بهية ،،، والـ ( آآآآيااات هنا تسند للكورس أو الحاشية ) واللحن في مجملو مستفز للغاية ومدعاة للكشف ورقصة القرد وإن كان في مصر وبلاد الشام علي إيقاع السيكا وواحده ونص وفي بلاد "الافرنجه والعلج" علي إيقاع " الهيب هوب والروك اندرول " .
أم الخلطه الآكثر سرية وسحرا فهي عند مطعم الحاج للفول حيث يضاف إلي طلب الفول القليل من الشمار الناعم " والله يكفينا شر شمار الايام دي ويحلب فيهو ليمونه " الفول " مع زيت سمسم نخب أول ويمتاز الفول عند مطعم الحاج بسهولة البلع والهضم وما يحتاج لي أي مساعدات يااي من عصير أوبيبسي كولا،،، معدل الفورمولا ثابت فول دايب في بعض من الحنين لي معدة الجعانين ،،، (" القدرة " اكسر لي " القاف " دي لمن تستغرب ) القدرة زي حلة البريستو لكن بيعمل ليها اب ديت كل نص ساعه بي جك موية ،،،وكان عرجته علي مجمع المطاعم علي إمتداد شارع المورده العام إذا أنت من المحظوظين وموعود بوجبه كاربه من الصير من ادريس ترنتي " لزوم القزقزه " مع فحول البصل والشطه بالليمون ماتديك الدرب،،، الكوارع طبعا عند مطعم حيدرومحاسن وإذا كنت أسعد حظا أن يكون النيل في أحمر حالاته وقيل ( دميره ) عندها بإمكانك أن تمسح صدرك بي شوربة قراقير مبالغه تذهب عنك الآم الكحه وصمت الخشم، والقرقور شعارنا بالإضافه للهلب المرسوم في القلب ....
أما ما ذكرته بشأن التبلبل والعوم والمآرب الآخرى ،،فنحن فعلا من أرباب تلكم المآرب حيث كنا في زمن سابق نلحظ ونرصد حركة عوم اسراب الآوز الكندي و تحليق أبو الرقيع وقرين حشاش في فضاءات المكان ومن هنا نشجب وندين ونستنكر بشده محاولات الكجر أو الطاره كما يحلو للشفوت أن ينعتوهم لزعزعة أمن المصطافين علي ضفاف النيل ناشدي الفسحه ،،، وانا "بتلحس "خشية أن أنزلق في الرندوق وأورطك معاي وتستعين بي ترانسليتر أو علوج مارينز للتحرير الزهني وفي الحالتين انت الضايع ..ولي عوده أن عدتم ...
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: Ahlalawad)
|
أهل العوض يا أخوي أهلنا زمان بقولو الشينه منكورة والزمن ده الكبر بضم الكاف ضمة ملؤها الحنان مراعاة لعامل السن يعتبر شينه في حق الرجال وإن كان العرف والعادة أن يكون في حق النساء دون سواهن إلا أنه ومن منطلق مبدأ المساوة بين النساء والرجال يكون موضوع السن شينه في حق الجنسين سواء بسواء ، وقديما قالوا إذا سألت إمرأة عن سنها فأنت شخص غير مهذب إن شئت.
الحمد لله أخي أهل العوض أن زواجي وإسمي قد يظهران غير الحقيقة فالملالي على مستوى القطر السوداني يزوجون أبناءهم وهم في المرحلة المتوسطة والثانوية يعني يكون عندك ولد وبنت وأنت طالب ولمن تتخرج من الجامعة يكون إبنك أو بنتك البكر على مشارف الصف الثالث من مرحلة الأساس وهذا ما يعرف عند العرب المستعربة لا العاربة بتساوي الكتوف وهي قطعاً أفضل حالاً من سلخ السيقان والتي وردت في القول المأثور الشيوخ إداوسو شيخ سلخ ساق شيخ ولا أدري كيف هو حال الصبيان إن كان هذا حال الشيوخ في تلك القرية الظالم أهلها والتي لا تعترف باللعب النظيف ولا ترتدي واقيات السيقان أو الشنكارات كما في كرة القدم والبيسبول وهوكي الجليد.
وبهذا أقبل تعميمك لي ولمن شاء أن يتخذني عماً فأهلاً وسهلاً بكم أما قرشو وعكسو وأبو حراز وأب قرجه وأ ب قجه فيمتنعون.
دمتم ودامت الأفراح
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: Ahlalawad)
|
أخي أهل العوض
المسألة تعتمد على عمر السيد الوالد أمد الله في عمره فكونه قد تزوج وهو يبلغ من العمر سبعة عشر عاماً فهذا لا يؤدي إلى نتيجة أن عمرك قد بلغ خمسة وعشرون عاماً حسب آخر إقفال لداوجونز ومؤشر نيكاي فالعوض عندما تزوج أو عرس كان وقتها دستة البيض خمسة عشر حبة وكلها من إنتاج جداده بلدية واحده وللبقرة أربعة قرون قرن ميلادي واحد وثلاثة قرون وسطى. وحتى لو فرضنا جدلاً أن حرب الخليج الثالثة أو القادمة حتى أثرت سلبا على عمرك فيقيني بأنك أكبر من ربع القرن هذا بكثير ، وفي كل الأحوال أجد إغراء واضح في إرتياد الأسواق ما بقيت هناك تخفيضات موسمية أو شمالية شرقية حتى.
لك الود وفي إنتظار لحن جديد من العزيز تمبس يتماشي وعراقي أهل العوض عفواً وعمر أخي أهل العوض وأقترح عليه أن يسمعك أغنية الناعسات كاحلاتن يا هوي ليله هوي والباقي ما بتسمع لأنو البص بكون دخل الحلة وحجار الراديو بتكون خلاص نامت.
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: almulaomar)
|
بوست اخر طعامة
انتو عارفين المذيع عبدالرحمن عبدالرسول
وقفوهو من اذاعة المباريات ليييييه ؟؟؟
حاولو انقرو بس؟؟
في مباراة هلال مريخ اخوناعبدالرحمن عبدالرسول
متعصب لواحد من الفريقين
فريقو قام جاب قون في اخر دقيقة
صاحبنا قام على حيلو ونسى الجماهير البتستمع لوصفه
وصاح ظووووووووووووط قوووووون
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: tmbis)
|
ياملا عمر .. طيب ما انت عارف الملاواة لزوما شنو ؟ بعدين أنا ما قلت ليك عمري خمسة وعشرين شوكة ، قلنا فوقكا كم شهر ، يعني أديناها كوز
بعدين نرجو من المذكور أن يستمع ويستمتع معانا .. المذكور دي خارج القوس يا ملا واحدن تاني
قرجة .. عبد الرحمن عبد الرسول قالو أخدوه في الجزيرة حسب آخر شمار
| |
|
|
|
|
|
|
|
|
|
اطرد احلام (Re: tmbis)
|
الاخ تمبس
الله يرضىعليك جد هيجت علينا الاشواق والذكريات
حقيقة فعلا ريقى جرى لما ذكرتنى سمك سكى وفول الحاج ذو القوة الثلاثية لكن وجبة فول عند الجاج بتتوزن بكوووووز ليمون من عبدالرحمن حامد يعدل الراس صاح ولا شنووووو رايك يا تمبس كمان ما تنسى سمك شعيب ولا شنو
وكمان ما تنسى شارع المدايد ناس حاجة الروضة وفاطمة اكل مقعد على اصولوووو لا تقول لى هارديسولا كنتاكى
الموردابى
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: ود عقاب)
|
موردابي
طبعا ضحكتني يا فرده ،، أنا ما لسه ما دخلته شارع الفيل أنا في السوق لسه وقفني عمك المحينه وانا ماشي للسلطه الخضراء من عمك صديق والدكوة من حاجه مريم ،، برنامج المدايد ده ما بالليل لكن والا أنته خلاص السفر ده هد حيلك وخرفته وبقيت تجليها ثابته ؟؟؟؟ المهم بعد ما نرجع ان شاء الله انا عازمك قالو بشير المعلم فتح ليهو محل سمك في شارع الفيل
ونشوفك
قرنفل القرنفل
سلام يا زوق
استمتع معانا وما تطول الغيبه
استاذ موصلي
يا انسانك ، وتواضعك ، وجمال طلتك لما نلقاك معانا
شكرا لي أحساسك كلو يا استاذ
ود عقاب
بركه السمعته كان ما سمعته عامر الجوهري ده كان حقك راح ،،،اها اضغط علي إيقونة الحفظ في رد الخواض عشان تثبته في الجهاز وتسمع علي مزاجك
شكرا
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: tmbis)
|
ٍسلام مربع
صحبة الورد
مع انهم لم يحشروني في الموضوع
ولم يدخلوني ولم يهدوني حتى غنيوه، لكني اصلي كده شمشاره
وهتراشه ..فابليس العنه وبالله اسمي
ثم اتفن في نص الاوضه ..واقول
والحق اقول
تمبس جوعتني معاااك وخاصة ان البيت عدمان اللحظة من اسم الجزرايه
وانت تعرف وسيرلانكيتنا التي منشغلة عني هذه الايام بخراف الجيران السبعة التي تنتظر الموت اللي يغمتها بعيون مفتوحه
وقلوب شجاعة .. رغم ان لداحة مايا وجواطه العيال
من حولها .. فهاهي تتمنى ان تنضبح الليلة قبل بكره
وهذه كله وانا مازلت جيعانه جيعانه بمزاج
هل شفت واحده قبل كده جيعانه بمزاج
دعني اشرح ، فلعك باخع نفسك بالشمار ان لم اذهب غريقا في الموضوع
وافسر كثيرا ماقلته ..
غالبا ما اخطط للاكل ، فانا اشتهي الاكل ، ثم اقرر ان اكل
والاشتهاء للاكل يكون مقرون في الغالب باعلان لكيك شكلوا ظريف
في قناة الال بي سي
او دعاية زيت عافيه
اما الدعايات التي من عينة التي نشوفها في التلفزيون السوداني واليمني فهذا ، من عينه الدعايات التي قصد بها ان يطفشوك من الشيء
المهم ..كنت اتحدث عن الاكل والاشتهاء .. وجاءني تلفون من ام مازن
حيث انها ،، قالت خالطه ليها حاجة كده ماحصلت قنقليز بالشطه والدكوةوالليمون .. وكبت عليهم موية عرديب ليها يجي ثلاثة وعشرون يوما .. وان سالتموني استاذي الملا عمر لماذا ثلاثةوعشرون يوما وليس خمسة يوم
اقول والحق اقول
انني ماعارفه . اصلها كده البت ديك كل حاجاتها قاطعاها من راسها
كان تفتح شريط زهرمان وتقيف ليك في نص الاوضه
وتقول ليك اااحيييي انا منها الغنايه دي
لي هسع ماغنت دوان تو يو
او تتصل بيك الساعة 4 صباحا لتقول ليك شفتي شفتي ياشيري ماقلت ليك
عمر البشير قال ياريتو كان عرس المره تانيه من زمان
مع انه لا توجد علاقة او وصلة كلام لما قيل ولم يكن البته هناك لينك بكلامها باي موقع اخر كنا نتجاذب فيه اطراف الحديث
وعموما انا جيعانه ، بمزاج .. نفسي متين الخروف الرابع الواقف مابين الخروف الثالث والسابع يضبحوهو ..عشان شكل ابو دمام بتاعو في السلك ..
عارف الكمونيه ماحلوه لمن تكون متوقعه.. يعني التوقع في مثل هذه الامور يضر كثيرا بمقياس الذبذبات الارشاديه الخاصة
بالنشاط الدماغي عند الانسان العندو طايوق .
عشان كده لو حصل وانت قاعد تحت الكبري بتاع امدرمان ومع اني ماعارفاك ليه بس سايب كل النيل وعلى براحه وقاعد تحت الكبري
جعلتني احسك شجاعا مثل الصحاف او منقاش حينما نقش طائرةالاباتشي
ومع ذلك في لحظة اخرى قلت في نفسي سجمي تمبس جن ولا شنو
بدل مايقطع البحر دا عوم ما كان احس ليهو يطلع من فوق الكبري
ويمشي انشاء الله يدخل القصر الجمهوري .. يطلب من السكرتير الاكاديمي لجريدة الوان ان يدوهو قلم حبر احمر
عشان يراجع امتحان الشهادة السودانيه الكشفوهو الناس ديلك
اهااا انا قلت بري يايمه . مالك علي ود الناس يا دي ..
الولد نصيح وشديد . اظني قاعد ساكت تحت الكبري
عايز يصطاد سمك .. مع انو هو نفسي قال ان في الامر قولات كثيرات
والقولات في بعض الاحيان تكون محصلة للشمار المغربل .. هذا ان صدق حدس المتلقي ولم يخيب طنه
فالملا عمر لم يكن يحسب حسان ان اهل العوض ، قد ترك ابوه يتزوج للمره الثانيه وفي ذلك الوقت كان قادرا على ابدا رأيه
رغم اني اعرف ان الابهات لا يستجيبون للابناء الا كباسط يديه ليضربه في جضومه ضربة تبشتن زينه وشه .. واظنه ابو العوض فعلها مع اهل العوض
حينما حاول الاخير ان يسأله . وهذا الامر يؤكد لنا ان اهل العوض كان في ذلك الوقت قادرا على التمييز
اذن فعمر اهل العوض لا يقل باي حال من الاحوال حينما تزوج ابوه
العوض عن تمام (البجاس)وهذا الرقم بالاوردو او السيرلانكي لست اكيده
شوفوا ياهل العوض وسوف تعرفون عمر اهل العوض الحقيقي
احسني جائعة نوعا ما .. ولست اكيده من انني محتاجه للفطور او الغداء . رغم ان الوقت مازال مبكرا للحكم عن طبيعة الوجبة التي على ان اتناولها ..
فانا في انتظار الخروف دااااااااك
الله يكملوا بعقلوا . قاعد رزين ياكل في قشو بادب
وحينما يفكر جيراننا عن تغيير فكرتهم لجعل هذه الخراف السبعة كلها
كبسه ، فحينها سوف اعزمكم على شيه بالجمره
وليس كمونيه .. لاني بصراحه انا جيعانه ووقت الغداء وماعندي استعداد
انتظر تمبس يجيب السمك من الموردة ولا انتظر اهل العوض يجيب صورة الخروف الذي صبحوه ليهو في سمايتو ..
عشان الملا عمر منتظر يشوف الصورة لو كان الخروف ظاهر فيها بالابيض والاسود فعمر اهل العوض اييييييييييييييييك يكون من عمر جورج واشنطن
اما ان كانت الصورة تظهر الخروف وهو يقف ماشاء الله عليهو
فري كلير والكلر كلها فري لايتز
اذن فالخروف ضبح في العهد الفاروقي اي الحكم الثنائي المصري
وبي كده نكون اثبتنا انو اهل العوض فوق الخمسة وعشرون ببضعة سنين وشوكه وسنكات
وبهذا يكون تدخلي موفقا وان الله ساعدني كثيرا ان احل هذا الغلاط بين سيدي الملا عمر وتاج العارفين اهل العوض
واستطعت ايضا بهذه الهترشه
ان ابين للاخ تمبس
ان رقصة القرد اصبحت من الرقصات البائدة
وويعد الجكس الان انفسهن لتدشين الرقصتين
رقصة المجنون
ورقصة الاعرج
اما رقصة العلوج والطراطير
فهي قيد الاعداد لها في الكواليس
________________
شكتيكم على الله يابوش وبلير وصدام
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: shiry)
|
شيري الرايقه
سلامات
زيدان إبراهيم .. زيدان الواحد ده قالو كانوا شغالين حفله مناسبة بتاعت زواج ،، المهم الزمن كان متاخر وقبل ما يغنوا اختلفوا في مسالة العشاء بعد الفاصل ،،والا قبل الفاصل واحد من العازفين كان مصر انو يتعشوا قبل ما يطلعوا يغنوا وكان مهوي شديد ،،، وكان راي الاغلبية انو العشاء بعد الفاصل الاول والناس طلعت المسرح ، وأجلو مسألة العشاء لي ما بعد الفاصل اها في المسرح زيدان سأل الجماعة " الباقي منو تاني يا شباب الناقص منو تاني ؟؟؟؟ رد عليهو صاحبنا الما اتعشا ده بسرعه وبصورة تلقائية "" باقي بتاع الجداد والباسطة المسكين كان مهوي "" وفقع الجماعة الضحكه .. وانا مقدر جوعتك الشديدة دي الخلتك تنظري لي خروف الجيران بي نظرة ميتافيزيقية اتجاوزت حد اب دمام ،، والكستليته ،،، وزي ما عرفنا أنو مرارة الخروف فقعته مايا قبلما تفقع مرارتك أنتي شخصيا ،، وتبري انتي من كل شر،، وبعدين يا شيري ان شاء الله يوم عزومتك ما يجي ،،،وأصلو انتي ليك حق الفيتو الما لقتو فرنسا وبأمكانك تنحشري في أي مكان بي حنكك ده والويك اند الفات كان عندنا نقارة وبهجة بي عامر الجوهري وعزمناكللمرهفين الجوه ديل والجكس كلو كان بي هناك الا انتي الما جيتي ،، وعزرناك لما عرفنا أنو جيرانكم كان عندهم سماية وكده والنصف كلتش شغالتكم السيريلانيكية معلنة حالة الطواري ولفحة التوب وهاك يا هرجي ،،، ومتاكد أنو مفردات اللغة السنغناوية الخاصة بي ناس حلتم فلتت من قاموس مخها وطارت ليها في راسه بعد جلسات الهترشه المركزة وتلقاها المسكينة بقت تنضم شايقي زي الترتيب ده كان ما خرفت في اقرب مطره ... الجماعة ديل بعد ما يضبحوا امسكي لينا الجلد والراس والاديداس ،،، الجلد عندنا بيهو مشروع ""بنقز"" والراس الباسم دايما مع الاديداس في اكير حلة وكتري ليهو الجزر شان الشورية تتقل .
وعزومتنا بتاعت السمك لسه قايمه بالمناسبة – بعدما دخلت اطباق اضافية علي " المنيو " ما كانت موجوده اصلا عندك مثلا " مديدة الحلبة ، ومديدة التمر " من حاجه " فاطنه " وديل بدل " بند " أم علي مع أنو إلي تاريخ كتابة هذا الرد ما قدرته اعرف علي ده ودخالة ناس منو ..وبيتم فتح علي وين ،،افيدونا افادكم الله ،،،والكاسترد الفاخر من الفاتح الكوتش بالعباسية وده لزوم الترطيبة وتحت تحت كده ،،في شعيرية ...ومع أنو كان في بالي أنو العزومة دي تكون تحت الكبري ومع النسيم العليل ذاد وجدي وانامصر علي مسألة الكبري دي شديد لانو ماسك لي عدد هناك مرتبط ارتباط وثيق بي فواصل الكبري والمسافات الموجودة علي الارضية المرتبطة بي دراستنا لعلم الجيولوجيا في ذاك الزمان ،،وإذا لاحظتي أول ما تكوني في مدخل الكبري من ناحية امدرمان في طريقك لي الخرطوم وانتي داخله خلي الدبابات دي علي يدك اليمين وما تشتغلي بيها كتير دي لزوم ارهاب بس وح نبيعه يوما ما خرده في دلالة السوق الشعبي أو تصنع منها كوانين لي ستات الشاي المناضلات ،، اها نفترض انك راكبه دفار ما ركشة ولاتاكسي طلب ،، أول ما تدخل بتسمعي "" كررو كو" مسافه وسكته صغيرة بعديها تاني "" كررو كو " ودي في مجمله زي تسعه " كررو كووات " تقريبا وتتفاوت شدة الهزة فيها داخل الدفار من 8- 11 درجة بمقياس رختر وده طبعا بتوقف علي لساتك الدفار ومزاجية الملاح ومدي تفاعلو مع شريط الكاسيت الشغال من فرفور لي السلام عليكم ،،وعلي لساتك الدفار ايضا إذا كان فيها كركاسات ام لا وتتوقف ايضا علي وضعك داخل الدفار متشعبطه في الشماعة ونايمة نوم الديك في الحبل ،،يا اما كمان مركلسة في كنبة من كنبات الدفار المنجده بشوالات سكر كنانةبي مهارقه فائقة ،،، الموظفين يوم الجمعه لازم يسمعوا الحركة دي بعد الصلاة وحسب التوقيت المحلي لولاية الخرطوم والعندو شافع زي مايا حبيبتك يكون من المحظوظين والما عندو يسمع قيقم يا شنان خضر ،،، رغم انو اصبت بي احباط شديد لما فطصطي لي رقصة القرد وطلعتيها دقة قديمة وانا اللي اسبوعين بتعلم فيها وبجابد فيها مجابده بعدما شفتها في شريط عرس جاني طازة من السودان علي انغام الست " هاجر كباشي " المهم ذنبك علي جمبك تشوفي لي " الاسبوتنغ " بتاع رقصة الاعرج والمجنون ،، " وكاتلوج " رقصة العلوج والطراطير ..وبذلك نكون مواكبين للوضع الراهن في السودان ،، ومانتدقس كان رجعنا ،، والكان هنا انا مستعمله للتمني يا ربي الملا عمر بيسمح لينا بي ذلك ...
دمتي يا شيري ،، وما تطولي الغيبة
| |
|
|
|
|
|
|
|
|
|
Re: اطرد الاحلام العمده قرشو ، والملا عمر ،، وعمو قرجه (Re: Ahlalawad)
|
سلام مربع
تاج العارفين
اهل العوض
سجمي ياود امي .. متين اثبت انو عمرك
ماخمسة وعشرون بس
انت براك من اثبت للملا عمر انك
ربما تكون تطرقت سرا للخمس وعشرون صيفا ..حيث ان عندكم
في فيافي اهل العوضان والعوضان هذه جمع اهل العوض وان كان التجميع
يجوز فيها فمرحى بدخولي للمجمع اللغوي
بود البشير مثل مايقول الكمساري التفتيحه في ميدان ابو حنزير
مع انني لا اعرف اين تقع ود البشير
لكن اكاد اجزم الربيع لا تحسب به الاعمار في ديار اهل العوضان
وفي هذه لن تغالطني ..لانني سالت السيرلانكيه واجابت بالنفي
انكم وهي لا تعتمدون في حساب السنين على
شهور الربيع فهي لا تخصنا ولا تخصهم في شيء
المهم هذا ماتطلب تنبيهي اياكم
ان الامر لخطير جد
ان لم تذبح الخراف اليوم ..
فمصطفى اراه يعد العدة الخمجاء ومن وراء تشجيع مايا بربطه معلم
تقف بشكة العيال
وقانا الله واياكم شماته الاعداء
ومع ذلك لم ازل في جوعي وسجمي ورمادي وكل ماذكرت على حاله باقي
اشك انني سوف اتناول طعام يشبه جوعي
ارأيت .. ها انت تدخلنا مره اخرى في الصنو الغذائي
الذي يتشابه والاعداد الفيسوبراغنيترتي
ولا اعرف معني الاخيرة غير انني اعني بالقول
ان الشعور بالجوع يتشابه وشكل الانسان لحظة ان يجوع
فانا مثلا عندما اكون جائعة غالبا ما اجلس قبال المرايا وفوق التسريحه
لاراني باهته اللون . او فلنكن اكثر دقه ، لا لون لي
وعلى الفور اعرف ان الجوع اخذ مني كل ماخذ
وعندما افتح احدي عيني مثل الفنجان فاري شكل شهيتي
ويتمثل على الفور مقياس جوعي على شاكلة جوعي
فمثلا عندما ارى في عيني اليمين باميه دون تظهر علىعيني اليسرى
اعرف انني جيعانه نصف نص لاني في الغالب لا احب الباميه
اما ان رأيت حبة كوسه واحده في عيني الاثنين
فاعرف اني جيعانه ولابد ان اكل
اما ان ظهر ملاح الرجله علىعيني فاعرف اانني تجاوزت مرحلة الخطر
فان لم اكل اللحظة وفي الحال فانني سوف اصاب بحمي شديده تؤثر على عضامي وان لم اسارع لترميم هذه العضام فالله يكون في العون
اما ان ظهر الجوع على عيوني على شكل البرتقال
فاعرف انني بدلع لا اكثر ولا اقل
فاهرع الى القهوة واشطف لي ستة فانجين قهوة تركي
من غير سكر واثنين بي سكر مظبوط
ارايت اخي اهل العوض
ان المسألة لها جذور وعلاقة عقيمه
مع الجوع ..
فانا انا احسني جائعة لاني اشتهي ابو دمام ذاك الخراف
الذي غير مكانه ولبت وراء الخروف الثاني والخامس
هي تذكرت اننا طابخين اليوم ملاح خضره بالرز المفلفل
اتفضلوا معاانا
وبعدين ح نرجع لمسألة الخرفاااااان
___________
شكيتكم على الله يااهل العوض
ه
ام
| |
|
|
|
|
|
|
|
|
|
اطرد الاحلام (Re: tmbis)
|
الاخ تيمبس فعلا استعجلت لانو طوالى من الفطوووور نطيت ليك للعشاء طوالى لكن حقيقة ذكرتنى ايام جميلة جدا لمة الناس فى الفطور والناس تطلع الشيرن مع بعض وروح المشاركة رقم تواضع الامكانيات انا ذاك والناس طلبة بتجازف حق العشاء عند الكوتش طبعا بتذكر الكوتش وصحن الفاخر المدنكل .
القرقووور
| |
|
|
|
|
|
|
|
|
|
Re: اطرد الاحلام (Re: ALMURADABI)
|
القراقير اطعم ناس
ومعانا شيري كمان
دي طعامة الريفيرا زاتا
انا ايام طويلة كنت بشجع الموردة
لانه صديقي عزالدين الصبابي كان بيلعب هناك
وكنا بنمشي معاهو المباريات..ولمن نغلب بنجي الموردة وهاك
يا الشغل ده
لكن لما نتغلب طوالي
كبري بحري انت وين
وفي الايام ديك عرفنا انو ناس الفنادق جنهم وجن فريق المورة يعسكر عندهم
عشان اللاعبين كان جنهم يتمسحوا بزيت سمسم كل ليلة
وشكت الملايات حالها لادارة الفندق
فقررت فقط استقطاب لاعبي الهلال الحلوين
الرشاشات
هنضب عندك
| |
|
|
|
|
|
|
|
|
|
Re: اطرد الاحلام (Re: garjah)
|
قالوا يا احباب مرة ناس فريق الموردة كانوا صارفين حافز كبير جدا
قاموا الحرامية اتفقوا انو ينطو عليهم في المعسكر بالليل
الحرامية يازول مشو على المعسكر
واحد فيهم قال ليهم ارفعوني استكشف ليكم الجو
الجماعة رفعوهو
صاحبنا كشششف كداااااااا
لقى ليك الجماعة ممسحين بزيت السمسم يلمعو مجدعين في الحوش
قام قال لجماعتو
نزلوني ده معسكر والا طابونة
| |
|
|
|
|
|
|
| |
tmbis
Dafi
قرشـــو
garjah
almulaomar
Ahlalawad
ALMURADABI
Elmosley
shiry
rummana
AlRa7mabi
فيس بوك
تويتر
انستقرام
يوتيوب
بنتيريست