|
Re: المغترب السوداني بي القديم وبي الجديد.. (Re: عمر الفاروق)
|
الجيل الجديد من المغتربين معظمهم يغترب بحسابات معينة وفي الفترة الحالية إغتراب الخليج بقا ما نافع معاهم واعرف الكتير من الشباب يرفض الإغتراب ويصر على التواجد في السودان لحسابات وتخطيط معين .. في حين إنو الجيل السابق كان يرفس نعمته بيده في السودان متعلل بالظروف السياسية والأوضاع المعيشية والمشكلة إنو الواحد منهم بيكون في السودان عندو وضعو ويجي للغربة بوضع أقل وإن كان فيهو كسب مادي لحظي.. الجيل الجديد من المغتربين معظمهم يخطط للغربة وإستفاد من تجارب وحكاوي كنا نسمعها عن المصريين وإنو المصري بيجي وعارف روحو قاعد كم سنة وعايز شنو وهاهم مغتربو الجيل الجديد يسقفون فترة الإغتراب ويبدأون فعلياً في تنفيذ ما يريدونه بعكس مغتربين الجيل القديم الواحد يقول ليكم حا أقعد سنتين وأرجع فإذا به يقعد عشرين سنة ودون تحقيق المطلوب.. وهنا نشيد بفكر مغتربي الجيل الجديد بالشجاعة في إتخاذ قرار العودة في حال لم يستفيد منها ولم ينجز .. ودي كانت مشكلة مغتربي الجيل القديم ..الواحد منهم يقعد عشرين سنة وما يرجع بسبب إنو ما عمل شي وما أنجز شي وما بنا البيت وما عرس وما وما وما فلا يلم في بلح شام السودان ولا عنب يمن الغربة .. مغتربي الجيل الجديد متواصلون مع السودان ولا تمر سنة أو سنتين إلا ويكون في إجازة وسط الأهل والأحباب فلا ينقطع عن أبناء جيله ولا ينقطع عن اجواء السودان .. أما الجيل السابق فحدث ولا حرج !!! ده ما رجع من زمن عبود وداك ما شاف السودان من ايام نميري وده من الانقاذ مسكت ما مشى وداك بتّو دخلت الجامعة وهو لمن سافر كانت بترضع ويكفي أن نحكي نكتة المرا اللي ضربت لي راجلا وقالت ليهو محمد ولدك طلّع السنون .. قال ليها والله انا خايفو يطلّع الجواز ويجيني هنا وانا اكون لسة ما شفتو جيل المغتربين الجديد وخصوصاً في الخليج فهم تماماً أهمية إنك تطلع بي مهنة في الفيزا تتطابق ومؤهلاتك الجامعية والدراسية بعد ما كان مقتنع بفهم الجيل الأول المادي البحت وهو يقول لهم : أحسن ليك نرسل ليك فيزا بتاعت راعي عشان الضرايب .. ياخ تعال بي فيزا طباخ عشان الزكاة .. رسلنا ليك فيزا سائق خاص عشان قروشا رخيصة .. والملاحظ للوضع ده بيجد إنو ضحايا الفيز الهامشية يعانون حتى الان ويدفعون مبالغ تساوي أضعاف ما كانوا سيدفعونه للزكاة والضريبة فذها يعدل مهنته بي عشرة الف ريال وذاك يستقدم زوجته بعشرين الف واخر يمنع من زيارة لوالديه و و و و و
نواصل كان الله مدّ في العمر..
|
|
|
|
|
|
|
العنوان |
الكاتب |
Date |
المغترب السوداني بي القديم وبي الجديد.. | عمر الفاروق | 11-05-07, 11:00 AM |
Re: المغترب السوداني بي القديم وبي الجديد.. | walid taha | 11-05-07, 11:12 AM |
Re: المغترب السوداني بي القديم وبي الجديد.. | ابو عثمان | 11-05-07, 11:24 AM |
Re: المغترب السوداني بي القديم وبي الجديد.. | عمر الفاروق | 11-05-07, 04:25 PM |
Re: المغترب السوداني بي القديم وبي الجديد.. | عمر الفاروق | 11-06-07, 07:46 AM |
Re: المغترب السوداني بي القديم وبي الجديد.. | شهاب الفاتح عثمان | 11-06-07, 07:54 AM |
Re: المغترب السوداني بي القديم وبي الجديد.. | عمر الفاروق | 11-06-07, 08:20 AM |
Re: المغترب السوداني بي القديم وبي الجديد.. | Hisham Ibrahim | 11-06-07, 10:08 AM |
Re: المغترب السوداني بي القديم وبي الجديد.. | نادية عثمان | 11-07-07, 11:44 AM |
Re: المغترب السوداني بي القديم وبي الجديد.. | Hisham Ibrahim | 11-07-07, 12:28 PM |
Re: المغترب السوداني بي القديم وبي الجديد.. | عمر الفاروق | 11-07-07, 03:09 PM |
Re: المغترب السوداني بي القديم وبي الجديد.. | خالد حاكم | 11-07-07, 04:27 PM |
Re: المغترب السوداني بي القديم وبي الجديد.. | خالد حاكم | 11-07-07, 06:27 PM |
|
|
|