لى فى المسالمه غزال .. (ناكر) بغنى عليهو .. معقول أقدر اخليكم .. دى معقوله دى وانتم اسباب سعادتى وفرحتى .. يا نورى يا .. يا نارى يا .. والمسالمه اول مدرسة تعلمت فيها حرفا .. وقيها صفوة الفن والجمال والطرب. فيها المرحوم ابراهيم عوض .. وفيها المرحوم (ميرغنى المامون وأحمد حسن حمعه) ماهو عارف (قدمو المفارق) أو ماعارف ليه.. دائما (مقرونين) مع بعض وما ممكن (تفرزهم يا دى جانقو) .. حتى انه قيل بأن احد التلاميذ غضب من زميله من ابناء (ميرغنى المأمون) فكتب على حائط المدرسه (منعول ابو ميرغنى المأمون وأحمد حسن جمعه) .. ودائما بيتكتب اسم (ميرغنى) فى الأول زى (الهلال والمريخ) حتى المرحوم (شاخور) ذاتو لو قالو ليهو انكلم عن (الهلال والمريخ) برضو ح يقولوها (الهلال والمريخ) مع ده كلو .. (البعيوات) اليومين ديل عندهم (عكلتة) فى (الزعامه) و(السيادة) و(حايمين) ليهم بفطعة (دلقان) والزعامه عمرها ما كانت (بالدلقان) والمرحوم (ابو العائله) لو كان حى وموجود كان (قطعها) ليهم فى رأسهم .. (الزعامه) جابوها ناس (زرقان) وود رجب والأمير/ صديق منزول، وناس عامر بشير فوراوى الكان (سكرتير للهلال والمريخ) فى وقت واحد .. وسامى المريخابى .. جار الجماعه ديل بس ناكر.. وخلى يمشى يسال العقيد (م) صديق عبادى (رئيس اتحاد العاب القوى) عن هذه المعلومه (القويه).. فعامر بشير فوراى (خالو)!!
والمسالمه فيها .. عبدالرحمن الريح وفيها سيد عبدالعزيز وفيها عبيد عبدالرحمن (رحله فى طياره).. وفيها (الجابرى) .. (حدى يشعر بالسعاده ويمشى يختار البعاد) .. وفيها (خضر الحاوى) الذى قدم عروضه فى جميع مدارس أم درمان وفيها ابنه (عبداللطيف) .. و(أدينى رضاك قدامى سفر) .. وفيها (الفاتح قميحه) وفيها (عم) حمد (مفتش المدارس الأوليه) كان لمن يقعد فى الكرسى قدام باب الفصل ويتابع الأستاذ يقدم حصه تشعر بأن الأستاذ (عرق وجف).. زى عرق (سليمان عبدالقادر) و(كاوندا) لمن يجيهم يقدل ماشى بالكوره (غزال كسلا) محمد حسين كسلا، ما عارف لو كان (غزال المسالمه) الغنى عليهو الشاعر كان حصل شنو!!
قلنا مباراة وديه يعنى ما فيها (فرتيق حافلن) أو (فرتيق كوره بالكنب) ودى اول حادثه (لفرتقة مباراة) كانت فى دار الرياضة بأم درمان وكالعاده بطلها ( بعيو المسالمه)!! وما زى (فرتقة) سليمان (الشينه) أو (فرتقة) زيكو الأكثر (شنا)!! معقول (زعيم) يعمل حاجه (كاكا) زى دى ؟؟
مباراة ودية .. ما زى (شلاقة) البعيو العايز ينافس فى الزعامه و(الهلال) لا زال يواصل تحقيق الأنتصارات على (ملعبه) حتى انها وصلت 95 مباراة حسب مقياس (ريختر) وده ( حالتو) ريكاردو (يشكو) من سوء الملعب .. اظنو (البرازيلى) ده ناوى ليهو على نية سوداء وشينه .. عشان كده عايز الملعب زى بتاع (ويمبلى) وحبيبنا ما هو عارف قدمو المفارق وانه لو فعلا رحل للأهلى وهذا شرف كبير لنا من حقنا أن نفخر به، فمتى فكر الأهلى فى مدرب من مدربين (البعيو)؟ ما طوالى وبعد كل هزيمه يوجه المدرب وجهه نحو (قبلة) لا نرضاها له!!
المهم انه لو (ريكاردو) أصبح (مرتحل) زى طائر (بازرعه) ماح يصدق انه (الأهلى) زعيم افريقيا كلها وثالث نادى فى العالم ما عندو حتى أستاد فى مستوى (زريبة العبش) و(البعيوات) الجدد .. بشتمو زريبة العيش لأنهم ما عارفين جزء كبير من تاريخ المريخ (مبنى) من هذا (العيش) ومن تلك (الزريبه) زى الزول (البشتم مدرسه) وابوهو شغال فيها (فراش)!!
اها المرحوم (شاخور) يا (بعيوات) آخر الزمن .. الأشترى ليكم (ماجد) ودفع دم قلبو فى اى لاعب لعب للمريخ كان (فراش) فى زريبة العيش .. المشكله نحنا (نلعب) ولا ندرس .. ولا (ندرش)؟ نعود (لشلاقة) البعيوات .. وهم معترفين بأنهم (شلقين) مشوا براهم (هبشوا) وما خلو (للأهلى المصرى) حاجه .. شئ تحنيس .. وشئ عزومات .. وشئ عربات .. وشئ (كنجالات) والغريبه انهم وسطوا (مصطفى يونس) اصلهم بموتوا فى اى زول بموت فى الهلال .. لأنه (مصطفى يونس) .. صاحب (الخطيب) شدييييد .. المهم فى الأمر(البعيوات) عايزين ايه؟؟
قالوا عايزين يلعبوا مباراة وديه بمناسبة احتفالات (الكاف) وما عارف علاقتهم (بالكاف) شنو والأحتفال بيهو (الهلال هل).. (والكاف) زعل ناس .. و(مرض الناس مرض) و(حته قرض) واختار وصنف (الزعيم) افضل ناد سودانى منذ انطلاقة منافساته فى عام 1964 وحتى اليوم .. واختار (جكسا) افضل لاعب سودانى .. (نحنا ساكت) ما عارفين (مقامنا) و(مكانتنا) و(وين عيونك مننا) .. ندخل فى جدل (بيزنطى) مع (الوصفاء) منذ أن (خلقهم الله)!!
الأهلى زعيم مصر .. (الظاهر) فى زول (عكليت) .. قال ليهو الناس ديل مشركين ليكم بى كاس .. لأنهم عندهم (عقده) أسمها كأسات .. وديل ناس (فصيحيين لسان وقليليين احسان) هسه (بالحظ) بى (درمه) .. (بالبونيه) .. (بالشلوت) .. زى ما عملو مع الأسماعيلى فى المباراة والوديه و(الأشانتى) .. بى (تصريجه) من (الزومه) الزعلان من روحو .. اول مرة اشوف لى لاعب كوره زعلان من روحو .. يشيلو الكاس .. يقومو يملوا الدنيا (زيطه وزمبريطه) .. وأنهم غلبوا زعيم افريقيا عشان كده هم احسن منو .. وانهم هزموا ثالث العالم، عشان كده هم (اول العالم) فى السماوات والأرض ..!! ديل ما بعرفو حاجه اسمها (لكل مقام مقال)!!
قاموا ناس الأهلى (التفتيحه) .. قالو ليهم (قاعدين ليه ما تقوموا تروحوا)!! اها الجماعه (لموا كرورهم) .. ومشو براهم هبشو و جابوا ليهم (كوتشينه) رويال بلاستيك اصلى 100% ما (تايوانى) مضروبه .. هسه فى زول جاب سيرة (ديوب) ولا (تانا)؟؟
وقبلوا على افريقيا بلد (دى روكبا) واريتها (دى) ما كانت (ركبه) .. دى كانت (فقره) عديل .. السيف ما يدليها .. وقاموا الجماعه اخدوا (سييييييييك) عديل فى قبولهم أقصد جوه (أستادهم) ومرتين .. اها تانى رجعوا (للخرخره) وسرقة الزعامه وقالوا لا الهلال ما فاز فى 95 مباراة ما برضو انهزم من الأسماعيلى فى مباراة وديه !!!
اجى (يا برى) .. ما اقصد (برى قيت) .. مباراة فيها كاس قدر (الضربه) .. وكاس (شرك) كيفن تبقى (وديه) ؟؟ طيب ليه كاس (دبى) ما كان وديه .. وليه كاس (الشارقه) ما كان وديه .. هم ناس (السييك) ديل ما بركبو طيارات .. ولا ما عندهم (رشاشت) ببقوا ليهم فى (حلقهم)؟؟ الهلال يا (بعيوات) آخر الزمن اقصد (الزعيم) .. (سيد البلد) .. (صاحب المقام الرفيع).. عارف (عزو) ودى مباريات وديه .. اعداديه من اجل (الأحتكاك) زى (احتكاكى) معاكم ده .. هسه ده لو دورى معقول ما اجيب فيهو سيرة (العجب) أو(زولى) التانى البريدو شديد لأنه بحب الهلال زى تمام وامكن أكتر .. لكنه ناكر .. ولو ما بحب (الهلال) ما كان بحب (الأرباب) ولا كيف ؟؟ ده بره وده بره ؟؟
المهم هل (الهلال) مشى جاب ليهو كاس .. وقال ده (كاس محمول جوا) من (نجيلة) الرد كسر.. عابرا الفيافى والمحيطات والمطارات حتى (يرك) فى مقصورة (الرد كسر)، برضو؟؟ شفتو البعيوات ديل .. بحبو(المحموله جوا) دى لى ياتو درجه .. ودى براها قصة .. لكن ما عارف (طياره) ده برضو متين ح (يحمل جوا) .. اول مرة اشوف لى لاعب كلما لعب فى السودان يكون نجم المباراة و(يجضمها) وبعد 3 ايام فقط واول ما تدور الطياره تمسكو (أم هل هلا) و(الملاريا أم برد) و(لوزات) .. (ووجع اضنين) تقول الود أسمه (هيثم) ولا (حماده)، لكن ما مشكله برضو يكسر فيهو (أسهال) ويبقى اشد الناس مرضا فى السودان .. يا ريتو لو حضر زمن المرحوم (ابوالعائله) .. كان (الشلوت) دخلو تحت (عربية) هلمان موديل 62 بغسل فيها واحد (مسكين) من (المهمشين) .. همو كلو متين يكمل الغسيل عشان يلحق يشجع (المريخ) ضد (المورده) والمسكين ما كان عارف انه (المورده) جابت ليها (مصيبه) اسمو (صالح مادونا) واللللليله (جونا) .. (ياالبعيو) .. (صالح) ده قالو (حكايتو حكايه).. الشافو قالوا (بخلى) الكوره وبقعد (يرقص) .. ةوده نوع اللاعب (الدايرنو ليكم من زمان) .. رقصه منو ومع قولة (واااااى) .. عينك ما تشوف الا النور!! نواصل فى هذه المباراة (التكتيكيه) الوديه (الأعداديه) من أجل (الأحتكاك) .. و(فك العضلات) والتى لا تخلو من مفاجاءات .. ابقوا معنا !!!! تخريمه باللون الأحمر:- انا متأكد اول واحد ح يقرأ الكلام ده هو (نادر المرضى) حدى (يشعر بالسعاده ويمشى يختار البعاد)؟؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست