اين تسهر هذا المساء !
طبعا يا جماعة المنبر دا فيهو سهرات وفيهو ضحويات وفيهو ناس بتقيل وفيهو ناس كدا عابر طريق نام فى العيون ارتاح وكدا ... كل بحسب مزاجو ونفسيتو وفروق الوقت .. ودى مسالة بديهية ... ..المهم الظاهر الومين دى الافلام الشغالة فى صالة عرض المنبر حتكون فى ثلاثة مدارس الاولى قصة تحالف الامة والشعبى وباقى ناسى قريعتى راحت الفى تحالف القوى الوطنية وطبعا التحليلات تقوم وتقع والمسعلة زى ما بقول الزين ود الريح جارنا فيها حسابات عديل وحسابات كيرى ، والغريبة التجمع دا من قولة تيت بدا بشكله وامس المحامى على السيد ختا قرض مع ناس الحزب الشيوعى لانهم رفضوا (شطب ) اربعة احزاب من التجمع - فرع الداخل - ناس الناصرى والبعث وشنو كدا ما عارف تانى وديل طبعا يا اخوانا ناس الشيوعى قالو ما يشطبوهم وعلى السيد قال ينشطبو والشكلة قامت اشطب ما تشطب والمسالة جاطت والاجتماعات تقوم وتقع تقول شطبوا فاروق جبره من المريخ ! اها فى الفيلم التانى برضو القصة تحالف لكن المرة دى بين الحكومة والتجمع والحركة وطبعا مولانا الميرغنى وطه عندهم مباراة قمة قريب وراها طوالى عمك (يبصم ) مع الانقاذ والحركة الشعبية ويخش ميس الحكومة الجديدة وفى كلام كمان تحت تحت انو التلاتة ربطو المسالة ومضوها وجهزوها باتفاق تانى فيهو قسمة زى السكر مع ناس التجمع و(تلتو ) ولا كتلتو بين البشير وقرنق . اها اما الفيلم التالت فدا قصة فتح التحقيق فى مسائل دارفور ودا بالعربى كده معناه انو اللستة بتاعة كرام المواطنين ديك يمكن لحقت امات طه وكلمة تحقيق معناه تانى تجى فرق وفتش وشوف ودور والمدعى العام بتاع المحكمة الدولية يوم هنا ويوم هناك وما معروف اليحصل شنو لكن فى النهاية واضح برضو انو فى شغل كتير تم وربيط حصل وصفقات تمت ودا معناه انو كلو حيكون فى صورة جديدة يعنى ممكن التحقيق دا يخلص لنتيجة انو الحاصل دا ما فيهو بينات كافية ضد قوائم ويحزنون وبالمناسبة المدعى العام ممكن يدك الورق او يقفلها عمياء قبال ما تنزل (البلاطة ) و فى جماعة الضحك شرطهم غايتو ! ويمكن القصة برضو بالمقابل تجر والقائمة ام خمسين دى تبقى (ربطة ) وبكتة ورق وكلو جائز . اها يا القارئ الكريم انت شوف مزاجك ورقداك وين وخش وقزقز وتمنى وحلل مع الناس اصلو كلنا سياسيين ومقطعنها وناس التحالف الوطنى يقولو ليك نحن اسياد كفر السياسة فى البلد دى وناس التجمع يقولو ليك نحن مقددنها وناس الحكومة يقولو ليك نحن المفتحين وبتاعين التلاتة ورقات مع امريكا زاتها مش تقول لى احزابنا دى وناس الحركة شابكين ليك الناس ادوها صنة يمين تامنو وتقتنعو واما ناس ثورة دارفور ديل خلهم ساى يقولو ليك الشعب الامركيى 80 % فيهو عاوزين واشنطن تعمل وهمة عشان تنصرهم وطبعا دى قنبلة ودردموها كبيرة خلاص هو ياخ الناس البتمشى الانتخابات عديييييييييييييل عشان تجيب الرئيس هناك ما بيصلو النسبة دى يصلوها عشان السودان ياخ فى امريكان بلدنا دى وين زاتها ما عارفينها ... يعنى الامريكى دا والله كان كدا مواطن كويس وبنى ادم حلو شايلين ساى نحن حالهم فى الجوامع والمظاهرات لانهم والله فيهم الخير خلو عيالهم يموتو فى بغداد ومتغربين فى كوريا وافغانستان والدنيا دى الزرقاوى يصقع والظواهرى يخمش والبرد والزيفة وعيالهم يوماتى جايبنهم فى صناديق خلو دا كلو عشان يمرقو ويمشو يشاركو فى استطلاع عن السودان ومشكلة فيهو ... والله حنان ... والمهم سيبو كلامى دا وشوف يا جماعة مزاجكم وين وخشو لكن البوستات ما بتطلع من الزون بتاع التلاتة حتات دى ... (عدل بواسطة محمد حامد جمعه on 06-06-2005, 01:25 PM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]