|
|
 أنامل بشير عباس .. أيسكنها الجن أم هي تنتمي لـ ذات واديهم ؟!
|
كتبنا قبلا عن دهاقنة واساطين العود في السودان .. سيطرتهم على الألة وتطويعهم لأوتارها وخشبها قسرا وتجبرا لصالح أناملهم وعفقات أصابعهم لتخرج لنا من جميل الألحان والاصوات .. تحملنا لاجواء شهدت صناعة وبداية سلطنة هذه الألة على الاذن السودانية والوجدان السوداني منذ أمد ودهر بعيد .. ألة رغم بساطة صنعها وتركيبتها ـ وما هي الا بضعة أخشاب وأوتار ـ ألا أن من نجحوا في تطويعها وصنعها وجعلوها تنقاد لهم طائعة مختارة على مدى تاريخنا الموسيقي والغنائي في السودان ليسوا بكثيرين رغم محبوبية هذه الالة وشعبيتها ، وتفضيل الوجدان السوداني لسماع روائع الغناء بمصاحبتها .. وهذا ان دل انما يدل على ان الاذن السودانية لا زالت بخير والحمد لله رغم محاولة السمكرجية وسارقوا الالحان وممتهني القطع والرقع ملئها بالصديد والغث والبغاث ..!
|
|
 
|
|
|
|
|
|
|
 Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
وقبل أن أدلف للموضوع الاساسي اردت فقط التعليق على ظاهرة حميدة لشد أن أسعدتني وأسرت قلبي وهي اتجاه الكثير من الفنانين الشباب لتعلم الة العود برغبة قوية في اكتساب مهاراتها واسرارها وسبر غور سلالمها واوتارها ، لمست هذه الظاهرة في عدة اماكن .. مراكز الشباب .. معلمي الة العود .. كلية الموسيقي والدراما والكثير من المراكز المتخصصة لتعليم الموسيقي وتكنيك العزف على الآلات . ولا شك أن هذه ظاهرة تستحق التشجيع والمؤازرة من قبل كل حريص ومشفق على نظافة أجواء الساحة الغنائية من الشوائب التي ألمت بها بفعل ظاهرة الأورغنات التي أساء بعض ضعاف الموهبة استخدامها فصارت وبالا على ليالي الخرطوم والسودان ، وملئت الساحة فحيحا ونعيقا وصهيلا دونما توافر الحد الأدنى من الموهبة لدي العازف والمغني على حد سواء ، فصار كل من يمتلك جهاز أورغ حديث هو عازف متمكن له أحقية العبث بأذواق الناس وارثهم الغنائي - الذي ثبته الاقدمون عبر النحت في الصخر رغم محاربة المجتمع لهم ووصمهم بالكثير من الصفات المعيبة في ذلك الزمان - في لياليهم الهادئة دونما أدنى ضوابط أو رقيب أو حسيب رغم أنف قوانين اتحاد المهن الموسيقية التي لا تجد من ينفذها وينزلها على ارض الواقع ..
ولعل اقبال هؤلاء الشباب على تعلم الة العود يعود لمعايشتهم بأنفسهم وفي مختلف المناسبات التي حضروها وشاركوا فيها ان الوجدان السوداني سئم ومل محاولات البعض التكسب باسم الفن عبر الاستهبال على اذانهم باستخدام ضجيج الة الاورغ غير الموظفة بالطريقة العلمية المثلي التي صنعت لاجلها ، ووقفوا بأنفسهم على أن ألة العود هي المحك وهي الفيصل لفرز الفنان من (المتفنن) !! والمطرب من (المضطرب) !!.. لذلك أجد نفسي من السعيدين لذلك الاتجاه الذي سيفرز لنا الكيمان في الساحة والتي يبدو أن شعارها القادم هو (العواد يرمي شبكتو) ..!!
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
نعود لموضوع هذا المقال وهو عن حالة فريدة قل أن يجود الزمان بمثلها في الجيل الواحد وهي حالة موسيقارنا العبقري بشير عباس وتطويعه لأوتار مزهره بأصابع وأنامل واحساس في العزف لا يتوافر لها مثيل في عالمنا المرئي ، لكانما هي انامل من وادي غير منظور لعالمنا .. وبما ان الشعراء يزعمون بوجود وادي يلهمهم الشعر وعسول الكلمات من الجن والمردة ، فأنا أزعم أن هنالك وادي مواز يلهم بشير عباس وقلة من العازفين لهذه الألة يعدون على اصابع اليد اسرار ومفاتيح وعوالم مخفية غير منظورة وغير مكتشفة عن ألة العود .. فتهبها لاناملهم العافقة فتخرج لنا جميل الألحان وسلاسة الانغام .. لا بل وأبعد من ذلك يسكنون هذه الأنامل ويحركونها فتخرج لنا من بين خشب ووتر ما لا أذن سمعت ..!
الملاحظ والمتتبع لتكنيك وعزف بشير عباس على الة العود أن له اسلوب متفرد غاية في البساطة لمن يراقبه حين يعزف ولكنه شديد التعقيد والتطريب في أن لدي خروج النغمات .. عزف الموسيقار العبقري بشير عباس له وقع خاص في الاذن وبصمة مميزة وكثير منا عندما يسمع فقط عزف الألة يستطيع وبكل سهولة أن ينسب اللحن والعزف لبشير عباس ، وكثير ما كتبنا أن ألة العود بما لها من سحر وامكانيات هائلة قادرة أن تمنح بصمة مختلفة واحساس مغاير لألوف من عازفيها لأنها الة تعتمد على الأحساس والتفاعل الوجداني وليس مجرد ألة صماء تستجيب بألية تلقائية برمجية لمستخدمها ، ولهذا السبب كتبنا كثيرا انه قل ان يوجد اثنان من عازفي العود في السودان من الفنانين أو الموسيقيين يتشابهون في طريقة عزفهم للالة لاختلاف الأحساس والمزاج الذي يعزفونه بها وأيضا اختلاف قوالب الألحان التي يصيغها كل منهم ، وبالطبع هذه القوالب في ذات نفسها تختلف من فنان لأخر ..
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
بشير عباس الذي تسكن أنامله المردة والجنون العبقري ، تسكن مخيلته أيضا أجمل الألحان المتميزة التي جادت بها عبقريته الموسيقية من الهام عوده وأوتاره .. فرفد الساحة الفنية منذ زمان بعيد بأجمل وأعذب الألحان وأكتشف لنا ثلاثية نادرة عقمت أمنا الموسيقية السودانية أن تجود لنا بمثلها عبر اربعة عقود فائتة ألا وهي البلابل .. بنات طلسم (هادية ـ حياة ـ آمال) واللائي ساهمن – ولا زالن - في وضع ملامح لما قد تكون عليه الساحة الموسيقية المستقبلية ونوعية الغناء الذي يجب أن يسود .. واعتقد أنهن بقيادة الربان الماهر بشير عباس قد ارسين سفينة الغناء النسائي الى بر الأمان ولا زلنا ننتظر من يمتطيها من مطرباتنا لمواصلة المشوار والعطاء عبر الاجيال ..
ربما يكون الدرس الذي وجب على عازفي العود من شباب ومبدعين وحتى فنانين كبار ومخضرمين تعلمه من بشير عباس .. ان تطويع الأله وقهرها واخضاعها لا يتم عبر التشنج في عزفها وادخال تحليات وعفقات لا لزوم لها وليست من صميم اللحن الأساسي فقط لمجرد التباهي امام الجمهور .. وقد لا يكون اضافة وتر سادس (فا) للعود هو الطريق للتمكن وتجويد العزف .. فكثير ما قابلني عازفون للعود أعتبرهم في بداية طريقهم اضافوا اوتارا لعودهم الخماسي وعند العزف فضحهم هذا الوتر وأظهر عدم تمكنهم من استخدامه بشكل صحيح وحتى عند محاولتهم تجاهله لم يسنطيعوا ذلك لأصطدام ريشتهم به في غير ما يتطلبه اللحن فأظهر نشاذا واضحا تنفر منه الآذان ..!
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
وقد أتحدث في مقال لاحق عن مطربنا الكبير عبد الكريم الكابلي والذي يعزف العود باسلوب يغلب عليه الهدوء وعدم الجنوح لسرعة تحريك الاصابع وتنقلها عبر المسطرة لدرجة أن الناظر والمستمع للكابلي حين يعزف قد تقفذ لمخيلته برود وعدم احساس الكابلي بما حوله ، وبالرغم من ذلك الأنطباع فان بساطة الكابلي في العزف تلك أخرجت لنا لونية تميز بها الكابلي وعانته في رفد الساحة السودانية بجميل الكلمات واللحن .. ويبدو أن لمردة الأوتار سكنا لها ايضا في أنامل مطربنا الكابلي كما اتخذت سكنا لها قبلا عند بشير عباس !! ..
أرجو أن تدعو معي بعاجل الشفاء للأستاذين الكبيرين بشير عباس وعبد الكريم الكابلي ..!
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ابو جهينة)
|
يا سلااااام يا المعز ادريس ...
Quote: سلم يراعك ناذر
لي يومين أفكر فيه و أتأمل، أي بشير عباس.. توارد خواطر!
حا أتابع البوست مع أن اللحظة لم تسمح لي بقراءة كل ما كتبت
فأنا عاشق لأفكار بشير عباس اللحنية و "إحساسه" زي ما بقولوا
الموسيقيين، و البلابل كن محظوظات بيهو كما نحن محظوظين بهن
أجيب ليك من آخر الخاطر: أمس كنت بستمع للمقطوعة دي لعدد من
المرات و سأظل!
مودتي و امتناني بهذا البوست الجميل. |
المقطوعة الجبتها دي شوف كيف جمالا وبساطتا وفي نفس الوقت شوف التعقيد في التوزيع وفي مخارج النغمات ...
دا بالضبط هو الأسميو (التعقيد السلس ) في عزف بشير عباس للعود وتأليفو للألحان والمقطوعات ..
لاحظ للعود والصولة العملا في الاول . هي بالضبط بتشبهنا نحنا كسودانيين ..
تشبه نيلنا ووجداننا .. تشبه عثمان حسين وتشبه نخلنا وتمرنا ...
شبه وردي والكاشف والبلابل وابو داؤود ومحمود عبد العزيز ..
بتشبه أي بيت سوداني بسيط .. اللحن يندمج مع البيوت دي ويتسربلا ويتشبع مع الوجدان ..
لحن ما ممكن النفس ترفضو وتلفظو من الرضيع الى الشيخ الهرم .
ودي هي العبقرية المجنونة البتتجلى في الحان بشير عباس ..
مشكور يا المعز ...
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
عزيزنا أستاذ ناذر الخليفة
سلامات
نعم أنامل مسكونة بي سر عجيب
ودي محبة ربك لعبدو . مقدرة علي التطويع فوق الحد .
بشير عباس يا ناذر كان جبتلو دكشنري ممكن يلحنو ومن ال A لي ال Z .
تابع يا ناذر فركو للعود في المقطع البقول ( كان لا أقلو نتلاقا ) هنا وفي الحتة دي أي مستمع ممكن يعرف أنو
العود جاب الزيت .
ياخ أنشاءالله زي ما ربك أداهو الموهبة دي كمان يديهو قدرها عافية .
تحياتي
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: Osman Musa)
|
| Quote: ولهذا السبب كتبنا كثيرا انه قل ان يوجد اثنان من عازفي العود في السودان من الفنانين أو الموسيقيين يتشابهون في طريقة عزفهم للالة لاختلاف الأحساس والمزاج الذي يعزفونه بها وأيضا اختلاف قوالب الألحان التي يصيغها كل منهم ، وبالطبع هذه القوالب في ذات نفسها تختلف من فنان لأخر .. |
منور يا ناذر الخليفة
شكرا علي هذه اللوحة الموسيقية المدروسة. بشير عباس خت حجر ساس في تاريخ الغناء السودانى.
أنا ما بعرف أعزف أعود لكن بسمع وبقرأ..
سمعت عن مهرجان لآلة العود في السودان قبل شهر ونصف وتقريبا وشاهدت عدت لقاءت حول سحر ومقدرات هذه الآلة المفصلة علي منطقة جغرافية محددة، لحسن الحظ السودان واقع في حدودها وله العديد من أساطينها.
الكابلي متعه الله بالعافية
محمد الامين متعه الله بالعافية
عندي غرام خاص لطريقة الاستاذ عوض أحمودي
تسلم يا ناذر
والتحية للجميع
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: سيف اليزل سعد عمر)
|
هلا حبيبنا عثمان موسى ..
Quote: تابع يا ناذر فركو للعود في المقطع البقول ( كان لا أقلو نتلاقا ) هنا وفي الحتة دي أي مستمع ممكن يعرف أنو
العود جاب الزيت .
ياخ أنشاءالله زي ما ربك أداهو الموهبة دي كمان يديهو قدرها عافية .
تحياتي |
يا سلام عليك يا عثمان .. والحتة دي هي البتشبهنا وتخلي جلدنا يقوم شوك ونصل لي قمة الطرب والانفعال ..
تحس بيها زي البتهبش كل زول فينا في حتة مختلفة وكل زول بيتهبش علي ليلاه ..!
ربنا يديها قدرو عافية ياااارب ..
تسلم يا عثمان ..
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: سيف اليزل سعد عمر)
|
سلام سيف اليزل
منور بوجودك والله ..
Quote: سمعت عن مهرجان لآلة العود في السودان قبل شهر ونصف وتقريبا وشاهدت عدت لقاءت حول سحر ومقدرات هذه الآلة المفصلة علي منطقة جغرافية محددة، لحسن الحظ السودان واقع في حدودها وله العديد من أساطينها.
الكابلي متعه الله بالعافية
محمد الامين متعه الله بالعافية
|
طبعا هنالك شعوب حوالينا في المنطقة العربية سبقتنا بمراحل عدة وأجيال كثيرة في العزف على ألة العود وتطويعها وطرق صناعتها .. حيث أن بلاد الشام والجزيرة العربية ونواحي اليمن سبقتنا منذ زمان بعيد في ادخال هذه الالة لمجتمعاتهم واستخدامها .. توارثوها جميعا منذ عهد الدولة العباسية ومغنييها اسحق الموصلي وغيرهم .. ولهذا السبب ولتاريخ الالة الطويل الضارب في جذور التاريخ في مناطقهم نجدهم قد تفوقوا على من سبقوهم في العزف عليها وتطويرها وتطوير صناعتها واكتشاف امكانياتها ومقاماتها التي تتلائم مع تراث والحان بيئاتهم التي ينتمون اليها ...
أما لدينا في السودان فإن تاريخ ألة العود ربما لا يتجاوز المائة وخمسون عاما حيث يحدثنا التاريخ أن موظفا سوريا بحكومة محمد علي باشا (التركية السابقة )هو من جاء بألة العود للسودان وكان يعمل في احدى مصالح الحكومة وقد تعلمها السودانيون منذ ذلك الحين .. ولا يعلم على وجه الدقة من هو أول سوداني تعلم العود على ايدي هذا الموظف وامتلك وصنع ألة عود خاصة به .. ولكن ذلك لا ينفي أن تلك الفترة برغم بساطنها أنجبت لنا عباقرة في ألة العود ساذكر ابرزهم لاحقا ..
أما الاستاذ القدير الحريف عوض أحمودي فادعوك لقراءة هذا المقال الذي كتبته عنه قبل ثمانية أعوام من المكتبة :
عوض أحمودي !! عَلِمَنَا كيف نجعل اعوادنا تغني وتبكي وتجادل !! [ 1 2 3 ]
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: المعز ادريس)
|
أهنئك يا ناذر لأنك وجدت الكلمات التي ساعدتك على التعبير هذه الأنامل الفاتنة الجمال... كثيرا ما أقول لنفسي: الجبن عار! وأهم بالكتابة عن أنامل بشير عباس ووداللمين وبرعي ومحمدية وعوض احمودي ولكن الكلمات تخزلني وتجعل مني "كقابض على الماء خانته فروج الأصابع"...
أهلنا المغاربة الصحراويون عثروا على مقطوعة من كنوز بشير عباس وجعلوها مقدمة لبرنامج إذاعي ليلي استمر لسنوات في إذاعة العيون عاصمة الصحراء المغربية... كنا نستمع إليها ونمتلئ فخرا لأننا صدرنا وجداننا من النيل إلى المحيط.
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: محمد الأمين موسى)
|
تحية
جادك الغيث يا ناذر وامطر عليك الحسن فيضا من فيوض الجمال...
حروفكم المدوذنة عن الفنان العبقري بشير عباس هي حسن اضاء لنا كيف نري الااشياء في رونقها البديع..
عبقرية بشير هي عبقرية المكان حين يصوغ بشير من ذرات كيميائيه الحان والحان..هي الحان صادحة بالجمال في تنوعها والوان زهورها وعطورها..
انت كفنان قادر علي استجلاء الاسرار اللحنية وكيف اجاد بشير وتجلي في سبر اغوار العود مقدما المعزوفات في الوان طيفها الساحر
يديك العافية اخي ناذر الفنان..
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: Elmoiz Abunura)
|
مرحب المعز ..
وأنا سعيد أن اعز الله هذه البوست ليس بأحد المعزين فحسب ..
بل بكليهما :
المعز ادريس والمعز أبو نورة ... مرحب بيكم
المعز ادريس ..
Quote: قارن بين الكيبورد "المحترم" للعازف المخضرم سعد الطيب، في المقدمة
و بين كم الآم الموسيقية التي يعزبنا بيها كم عازفي الكيبورد المنتشرين
في القنوات السودانية! |
فعلا يا معز .. سعد الدين الطيب طبعا عازف وموسيقار بي امكانيات احترافية وبيعرف كيف يستخدم الأورغ ويوظفو التوظيف الأمثل ..
طبعا لو داير تختبر اي واحد من الشباب العازفين والبيعتمدو بنسبة 90 في المية على امكانيات الاورغ مش على موهبتهم الذاتية .. بس جيب ليهم بيانو أو أي أورغن من غير امكانيات زي الاورغنات الزمان الكانوا بيغنو بيها ناس حنان النيل وفرقة ألوان الطيف ..
دا هنا اسمو المحك .. ودا الاختبار الحقيقي لي مقدراتم لمن يلقو قدامم اورغ ما بيشتغل بي فلاش ميموري ولا بيتبرمج عشان يشتغل ليك براهو في حتات معينة لمن انت تدوس واحدة من الازرار ..
وشوف حا تلقى الصاقطين في الاختبار دا أكتر من الناجحين ... !!
وبمناسبة عشة صغيرة هاك اسمع عوض احمودي وهو بيعزفا بالعود ..
عوض دا الجن ما ساكن أصابعينو ..
عوض كلو في نفسو علي بعضو كدة بالكامل ساكن مع الجن في واحدة من الأودية القال عليها بلة الغائب لمن سألوهو من الطيارة الماليزية ..!!
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: Elmoiz Abunura)
|
سلام دكتور محمد الأمين موسى ..
| Quote: هنئك يا ناذر لأنك وجدت الكلمات التي ساعدتك على التعبير هذه الأنامل الفاتنة الجمال... كثيرا ما أقول لنفسي: الجبن عار! وأهم بالكتابة عن أنامل بشير عباس ووداللمين وبرعي ومحمدية وعوض احمودي ولكن الكلمات تخزلني وتجعل مني "كقابض على الماء خانته فروج الأصابع"... |
والله يا دكتور الكتابة المرتبة مشكلة .. أنا لي أكتر من اسبوعين بحاول أكتب عن بشير عباس لكن قدر ما اقول اكتب بنشغل وما بلقى البداية المناسبة لكن بعد كم يوم بتلقاها جات وانكتبت براها ... كان عندي مواعيد مع زول شراني وقال حا يتأخر ساعتين . قلت النحاول نكتب المقال دا داب ما يجي والحمد لله ربنا وفقني .. مرات كتير الزول بيحس انو في عباقرة حوالينا وعليهم دين علينا مفروض نسددو بالكتابة عنهم .. مش لينا .. للأجيال القادمة الحا يكون ارشيف المنبر دا محفوظ ليهم انشاء الله عشان يعرفو شكل وطبيعة وتطور الحراك الثقافي والفني كان ماشي كيف ..
هسي لو في العشرينات والتلتينات لو كان في وسائل توثيقية وتكنلوجية زي دي باقيلك نحن في الجيل دا كنا حا نعاني لمن نجي نفتش لي معلومة صغيرة في تاريخنا االقريب دا !!
| Quote: أهلنا المغاربة الصحراويون عثروا على مقطوعة من كنوز بشير عباس وجعلوها مقدمة لبرنامج إذاعي ليلي استمر لسنوات في إذاعة العيون عاصمة الصحراء المغربية... كنا نستمع إليها ونمتلئ فخرا لأننا صدرنا وجداننا من النيل إلى المحيط. |
يا سلااام .. دي حاجة جميلة ومفخرة لينا في حالة واحدة بس ..
انو يكونوا موثقين وحافظين الحق الادبي بتاع موسيقارنا الكبير وذاكرنو بالاسم وذاكرين اسم بلدو السودان ..
قبل كم سنة يا دكتور جيت اثيوبيا وانا دايما بحب أتنزه في احياء البلد الشعبية مشيت على الحي الصومالي في اديس سمعت كمال ترباس بيغني في واحدة من محلات بيع الكاسيت .. دخلت لقيت صايدين كاملين من المحل عبارة عن شرائط كاسيت سودانية ..
طلبت شريط ترباس .. أداني الشريط لمن أداني البيت بتاعو لقيتو لي البوم بتاع عبد الكريم أبو طالب !! قلت ليو دا ما تبع الشريط .. !! فتش فتش جاب لي بيت شريط تاني بتاع البوم لي محمود عبد العزيز .. وكمان بيغالط !! قلت ليهو أنا سوداني وبعرف الفنانين .. شرايطك دي مقلبة وما مرتبة ..
الزول فرح لمن قلت ليو أنا سوداني دخلني جوة المحل عشان افتش براي .. والغريبة لقيت شرائط شبه ماستر ومغلفة وبرضو تلقى الشريط الجوة في حتة وبيت الشريط في حتة تانية .. ما كان عندي موضوع قلت ليهو نزل لي شرايطك دي كلها ارتبا ليك .. الراجل فرح جدا جدا وجاب لي قزازة حاجة باردة وسندوتش زغني !! ونزل لي الشرائط وأنا اشيل وأرتب .. المحل دا من كترة الشرائط السودانية الفيهو تحلف تقول فيهو جميع الفنانين السودانيين ..
جاوزت ليهو الشرائط ورتبتها ليو وطلعت ليهو كم شريط وكم بيت شريط بايظ !! يعني ما بيلفقوا مع بعض وكل فردة من بلد ...!!
الاثيوبيين متابعيننا كويس في المجال الفني وأنا قريت في حتة تانية انو محمد وردي لمن جا يجيز اغنية خلاص كبرتي رفضوها ليو لأنو المقطع الأصلي بيقول (خلاص كبرتي وليك سبعطاشر سنة) .. ناس اللجان أبو يجيزوا ليهو الاغنية بحجة انو الفتاة في العمر دا قاصر !! ومنها تم تعديلا لي خلاص كبرتي وليك تسعطاشر سنة (يعني خلاها بلغت بالرجالة) !! وقبل فترة لمن جا المغني الاثيوبي العالمي تيدي افرو للخرطوم غنا في تأبين وردي في المسرح القومي الأغنية دي بي عمر البت الاصلي سبعطاشر سنة !!
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: Elmoiz Abunura)
|
يا سلام يا محمد الكامل ..
Quote: تحية
جادك الغيث يا ناذر وامطر عليك الحسن فيضا من فيوض الجمال...
حروفكم المدوذنة عن الفنان العبقري بشير عباس هي حسن اضاء لنا كيف نري الااشياء في رونقها البديع..
عبقرية بشير هي عبقرية المكان حين يصوغ بشير من ذرات كيميائيه الحان والحان..هي الحان صادحة بالجمال في تنوعها والوان زهورها وعطورها..
انت كفنان قادر علي استجلاء الاسرار اللحنية وكيف اجاد بشير وتجلي في سبر اغوار العود مقدما المعزوفات في الوان طيفها الساحر
يديك العافية اخي ناذر الفنان.. |
وأنا سعيد لي كلماتك وحروفك والتي بالتأكيد شهادة تصب في خانة الوفاء والتقدير لموسيقارنا بشير عباس ..!
| Quote: انت كفنان قادر علي استجلاء الاسرار اللحنية وكيف اجاد بشير وتجلي في سبر اغوار العود مقدما المعزوفات في الوان طيفها الساحر |
تعرف يا محمد ..
نحن كشعب سوداني دمنا حار حبتين ودايما عجولين .. وتركيبتنا دي خلتنا كدة عموم الا من رحم ربي ما عندنا شغف ولا صبر ولا حب للموسيقى البحتة .. الناس اتعودت واتربت انها تسمع غنا ودا هو البيهبش حاجاتا .. لكن موسيقي بحتة قدامنا زمن طويل عشان نغير حسنا الموسيقي دا ...
وحتى في الساحة عدد المؤلفين الموسيقيين للمقطوعات الموسيقية لا يتجاوزون اصابع اليد الواحدة . وديل هم النجحوا بصبر وثبات ونحت على الحجر انو يوصلوا موسيقاهم ومقطوعاتم البحتة لي طبقة معينة من المستمعين .. أعتقد انو موسيقارنا الكبير حافظ عبد الرحمن قدر من خلال مؤلفاتو على الة الفلوت انو يحقق نجاح معقول داخليا وبالمقابل نجاح كبير جدا عالميا وأقام حفلات كثيرة في دول أوروبا وغيرها ..
مقطوعات بشير عباس دخلت قلوب الشعب السوداني من خلال الاذاعة والتلفزيون وأنا نفسي اعرف علاقة مقطوعات بشير عباس ناس الاذاعة والتلفزيون ما تحلى ليهم يبثوها الا في رمضان وكمان العصر ..!
وطبعا ما انسى الموسيقار الكبير الفاتح حسين عبر فرقة السمندل وفرقته الحاية كل لهم دوره في محاولة نشر ثقافة المقطوعات البحتة وربنا يلهمم الصبر على تحمل الوجدان السوداني ويلهم الوجدان السوداني الصبر لسماع المقطوعات والاعتياد عليها ..
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: سيف اليزل سعد عمر)
|
الصديق ناذر
تحية طيبة
شكرا لتناولك لأمر العود، والذي ظل يشغل خرطوم الخمسينات بحسن عطية،
وصولا إلى جيل أحمودي..ثم من؟ نحنا بعيدين من بلد البنت والولد..و...
وعلى كل حال آمل أن نستفيد من تجربتك المتسلسلة بهدوئك الرزين في الكتابة الفنية الواعية
بسلسلة مقالات مثبتة وموضوعية وهادئة وغنية بالمعلومات خصوصا
وأن هناك شحا في الكتابة الفنية الواعية، ولعل هذا دوركم أنتم.
أما موضوع بشير عباس وعوده وكذا صفارته، فهو حري بالتأمل.
والعود في السودان، تاريخا، وأداء، وصناعة، ودورا، في ضخ الألحان، ومدارس، وتوظيفا في الصولو موضوع كتاب
وأرشحك وأنت قد رفدتنا بموضوع عود احمودي من قبل أن تجعل من هذا البوست تجميعا لكل ما يتعلق بالعود وفي المستقبل يمكن صياغة هذه المعلومات في كتاب فريد عن (العود في السودان)
ولعل شهود العصر الآن موجودون في السودان
وفي عصر التسجيل الرقمي ما عليك إلا أن تأخذ شهادات الله جابو، والفاتح الطاهر، وعبدالله عربي، وحسن بابكر
وربما يفتح موضوع العود الشهية لتأريخ الكمنجة، والجيتار..
عموما..
بشير عباس ملحن باهر وعواد ماهر..وهو مدرسة في مقابل مدرسة برعي..وهما أفضل الملحنين المحترفين الذين وظفوا العود. وأضافوا كثيرا في تراث الموسيقى البحتة. محمد الأمين مدرسة مختلفة في العزف على العود..وأبو عركي له طريقة مميزة في العزف. على السقيد بارع في الحليات.. وشاويش متمكن في التون، وحريص عيه بأكثر من حرصه على التنويعات..العميري كذلك كان يجيد العزف في العود والحرص على التطابق بين نغمة صوته والعود، وريشته امتازت بالخفة. أرى في عثمان الأطرش إجادة تامة للعود برغم ضعف الألحان. الوافر شيخ الدين ينهض كمدرسة متميزة في طريقة العزف، وأتمنى أن أرى له ألبوم خاص بالعود، ذلك لأن إحساسه ملائكي.
أما الكابلي فهو مدرسة متميزة في اللحن والعزف..الكابلي متميز جدا..وربما لو أدركه البعض في طريقة تعامله مع العود في الجلسات الخاصة وبعض البروفات فإنهم سيرون العجب العجاب.
هذا البوست من أفضالك الأخرى وأنت تقف مع بشير عباس والكابلي في هذه اللحظة الحرجة من تاريخ بلادنا. إذ لا يجد المبدع مثل أحدهما إلا التجاهل.
شكرا لك يا صديق وإلى أين وصلت تجريباتك اللحنية والعزفية مع العود؟.
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
تعرف يا ناذر قبل سنة تقريبا، وأنا أبحث في اليوتيوب، وجدت تسجيلا لعاصم البنا لأغنية نسايم الليل، ولم أكن قبلها أعرف أنه هذا الفنان الرائع يعزف العود فامتلأت طربا لدرجة الفيضان! تفاجأت بمهارته في العزف وطبعا بصوته الذي يوهمك بأنه شرب من الفردوس الأعلى! سمعت عزفه وهو يدخل نفسه في مطبات صعبة ذكرتني بالخواجات المستكشفين وهم يخوضون أوحال إفريقيا بسيارات التايوتا البافلو، وتذكرت سائقي اللواري في زماننا وهو يستعدون لخوض رمال قوز جمل بين النهود وغبيش حيث تكرم شركتا فورد (بسيارتها التيمس) ونيسان (بسيارتها النيسان) أو تهانا خلال ساعة كاملة من المعافرة بالترس الثقيل!
ولفت نظري أن العود الذي يعزف عليه من الأعواد الممتازة التي تمنيتها لعوض أحمودي.
أرجوك يا ناذر دق صدرك وقبل على ود اللمين وعوده الثمين... لدي إحساس قوي أن هذا البني آدم لديه علم من كتاب العود...
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: محمد الأمين موسى)
|
سلام استاذي صلاح شعيب ..
Quote: شكرا لتناولك لأمر العود، والذي ظل يشغل خرطوم الخمسينات بحسن عطية،
وصولا إلى جيل أحمودي..ثم من؟ نحنا بعيدين من بلد البنت والولد..و...
وعلى كل حال آمل أن نستفيد من تجربتك المتسلسلة بهدوئك الرزين في الكتابة الفنية الواعية
بسلسلة مقالات مثبتة وموضوعية وهادئة وغنية بالمعلومات خصوصا
وأن هناك شحا في الكتابة الفنية الواعية، ولعل هذا دوركم أنتم. |
شكرا استاذي وعندما اقول لستاذي فأنا اعني الكلمة حرفيا .. فأنت من شجعتني قبل سنوات عدة على دخول عالم الصحافة والولوج للكتابة للشح الاكاديمي التخصصي لدي الصحفيين في الصفحات الفنية .. وبفضلك تقدمت لنيل شهادة القيد الصحفي بمساعدة وتوجيه من الاستاذ عبد الواحد ابراهيم ومن ثم بدأت الكتابة المنتظمة في صحيفة الاحداث ولا يفوتني أن اشكر كل من منحوني الفرصة واعانوني بتوجيهاتهم خلال عملي بالصحيفة .
وقد ذكرتك هنا في هذا المقطع في ندوة عن سودانيز اون لاين :
لك الشكر أجله .
Quote: والعود في السودان، تاريخا، وأداء، وصناعة، ودورا، في ضخ الألحان، ومدارس، وتوظيفا في الصولو موضوع كتاب
وأرشحك وأنت قد رفدتنا بموضوع عود احمودي من قبل أن تجعل من هذا البوست تجميعا لكل ما يتعلق بالعود وفي المستقبل يمكن صياغة هذه المعلومات في كتاب فريد عن (العود في السودان)
ولعل شهود العصر الآن موجودون في السودان
وفي عصر التسجيل الرقمي ما عليك إلا أن تأخذ شهادات الله جابو، والفاتح الطاهر، وعبدالله عربي، وحسن بابكر
وربما يفتح موضوع العود الشهية لتأريخ الكمنجة، والجيتار..
عموما.. |
فعلا العود في السودان تاريخ يجب أن يوثق .. خاصة انه لم يفوت الكثير على اللحاق بهذه العجلة وهي ادخال كل من يهمهم الامر وكل ما يتعلق بعزف ومعايشة وصنعة هذه الالة في زمرة التوثيق .. الحقيقة أن الكثيرين كتبوا عن هذه الالة وسحرها وروادها وصانعوها .. ولكل اجتهاده ونصيبه من البحث ولكن كما قلت الامر يستوجب تجميع كل هذه الكتابات وما علق في الارشيف في سفر كبير يكون نبراسا للأجيال القادمة ..
للدكتور الماحي سليمان بحث ممتاز عن الة العود نال به درجة الدكتوراة وموجود في مكتبة كلية الموسيقى والدراما .. للاكاديميين ومن يريد الاستفادة والاستذادة ..
Quote: شير عباس ملحن باهر وعواد ماهر..وهو مدرسة في مقابل مدرسة برعي..وهما أفضل الملحنين المحترفين الذين وظفوا العود. وأضافوا كثيرا في تراث الموسيقى البحتة. محمد الأمين مدرسة مختلفة في العزف على العود..وأبو عركي له طريقة مميزة في العزف. على السقيد بارع في الحليات.. وشاويش متمكن في التون، وحريص عيه بأكثر من حرصه على التنويعات..العميري كذلك كان يجيد العزف في العود والحرص على التطابق بين نغمة صوته والعود، وريشته امتازت بالخفة. أرى في عثمان الأطرش إجادة تامة للعود برغم ضعف الألحان. الوافر شيخ الدين ينهض كمدرسة متميزة في طريقة العزف، وأتمنى أن أرى له ألبوم خاص بالعود، ذلك لأن إحساسه ملائكي.
أما الكابلي فهو مدرسة متميزة في اللحن والعزف..الكابلي متميز جدا..وربما لو أدركه البعض في طريقة تعامله مع العود في الجلسات الخاصة وبعض البروفات فإنهم سيرون العجب العجاب. |
من ذكرتهم اعلاه هم من ارسى اسس وقواعد عزف الالة في لأنهم ينتمون لمختلف المدارس في طريقة وتكنيك العزف .. ولقد ذكرت اعلاه ان أي شخص يعزف عود هو بمثابة مدرسة مكتملة الجوانب والاركان لاختلاف الاحاسيس وقوالب الكلمات والألحان .. وقبل ان ننسى لا بد لنا ان نمر على رائدات العزف على العود في السودان ولعل ابرزهم المغفور لها السيدة جداوية والدة الأستاذ عادل حربي الأستاذ بقسم الدرما .. إذ يذكر أنها أول من عزفت واجادت العزف على العود .. ولا ادري ان كان لها تسجيل في ارشيف التلفزيون أم لا .. وأيضا الملحنة البارعة السيدة اسماء حمزة وايضا الاستاذة حنان النيل اعتقد ان لها باعاً في العزف على العود ...
أما ونحن في هذا المنبر المتنوع فيسعدني أن احدى العضوات هنا من يحسنن العزف على العود بصورة ممتازة الا وهي الاستاذ الفنانة المبدعة عبير خيري .. اتمنى أن تمر على هذا البوست لتحكي تجربتها مع الة العود ..
| Quote: شكرا لك يا صديق وإلى أين وصلت تجريباتك اللحنية والعزفية مع العود؟. |
شغلتنا أموالنا وأهلونا عن ذلك يا استاذي صلاح .. وقل النشاط سوى بعض الليالي والأمسيات المتناثرة هنا وهناك ..
| |
|
|
|
|
|
|
|
|
|
Re: أنامل بشير عباس .. أيسكنها الجن أم هي تنتمي لـ ذات واديهم ؟! (Re: ناذر محمد الخليفة)
|
دكتور محمد الامين ..
Quote: عرف يا ناذر قبل سنة تقريبا، وأنا أبحث في اليوتيوب، وجدت تسجيلا لعاصم البنا لأغنية نسايم الليل، ولم أكن قبلها أعرف أنه هذا الفنان الرائع يعزف العود فامتلأت طربا لدرجة الفيضان! تفاجأت بمهارته في العزف وطبعا بصوته الذي يوهمك بأنه شرب من الفردوس الأعلى! سمعت عزفه وهو يدخل نفسه في مطبات صعبة ذكرتني بالخواجات المستكشفين وهم يخوضون أوحال إفريقيا بسيارات التايوتا البافلو، وتذكرت سائقي اللواري في زماننا وهو يستعدون لخوض رمال قوز جمل بين النهود وغبيش حيث تكرم شركتا فورد (بسيارتها التيمس) ونيسان (بسيارتها النيسان) أو تهانا خلال ساعة كاملة من المعافرة بالترس الثقيل!
ولفت نظري أن العود الذي يعزف عليه من الأعواد الممتازة التي تمنيتها لعوض أحمودي. |
ههههههههههههه مشكور لي التشبيه بي معافرة العربات .. في فنانين كتار بيوحلو ويحرنو تب لمن يصلوا لي أماكن بي اصواتم هم ما متدربين عليها أو ما خبروها .. هنا بتحصل الفرقة ويظهر النشاذ ..
السواق الماهر في قيزان الحبال الصوتية هو الراحل محمود عبد العزيز عليه الرحمة .. كان بيسوق صوتو في اقسى التضاريس مهما كانت صعوبة الأغنية وكان بيطلع منها زي الشعرة من العجين وحبالو أبدا ما احتاجت (صاجات) للطلوع من المطبات .. وأكاد أجزم أنو ما واجه قيزان طوال مسيرتو ..
عندي بوست عن أهمية التوثيق مع الاخذ بتجربة محمود عبد العزيز ونادر خضر كأمثلة .. حا انزلو بعد البوست دا انشاء الله ..
ويا دكتور ما دام جبت سيرة عاصم البنا ونسايم الليل .. حرم ما ترجع ساكت وليك مني هدية صوتية اغنية نسايم الليل بي صوت عاصم البنا والمجموعة والعزف بي انامل عوض أحمودي وتأمل روعة المشهد ..
| |
|
|
|
|
|
|
| |
ناذر محمد الخليفة
المعز ادريس
ابو جهينة
Osman Musa
سيف اليزل سعد عمر
محمد الأمين موسى
Elmoiz Abunura
صلاح شعيب
محمد عكاشة
فيس بوك
تويتر
انستقرام
يوتيوب
بنتيريست