حدث هذا ظهيرة هذا اليوم .. كنت في طريقي لصلاة الجمعة وفي احدى التقاطعات مر موكب من عدة سيارات وشاحنات .. سألت أحد الواقفين فقال لي أن اليوم هو افتتاح مهرجان الألبان أو ما شابه برعاية وزارة الثروة الحيوانية ..
يعني زي إستعراض وكدة ..
انتظرت حتى يمر الموكب .. من ضمن العربات كان في شاحنة كبيرة تحمل كمية من البقر .. المهم واحد جمبي (جادي جدا) .. شابك البقر (الله أكبر ولله الحمد) ..(لا اله الا الله) .. والاغرب من كدة كان بيعاين للبقر في عيونن ويقول ليهن (تكبير ... تهليل) .. طبعا البقر ما شغال بيهو وبيلوك في لبانتو وأظن في سرو بيقول : الطيرة دا بيقول في شنو ..!!!
أنا طبعا مندهش جدا .. كنت مفتكر الزول دا ما جادي ..! لكن لقيتو جادي جدا .. والله دا من شدة ما جادي لمن كان بيقول للبقر: تهليل ؟! شفت وقريت في عيونو أنو راجي البقر يقول ليه : لا اله الا الله ..!
03-02-2012, 05:40 PM
الامين موسى البشاري الامين موسى البشاري
تاريخ التسجيل: 08-09-2009
مجموع المشاركات: 15391
Quote: شابك البقر (الله أكبر ولله الحمد) ..(لا اله الا الله) .. والاغرب من كدة كان بيعاين للبقر في عيونن ويقول ليهن (تكبير ... تهليل) .. طبعا البقر ما شغال بيهو وبيلوك في لبانتو وأظن في سرو بيقول : الطيرة دا بيقول في شنو ..!!
ههههههههههه يا ناذر ما تظلم الزول ياخ وبعدين أنت متأكد انهن بقـــر؟ مش يمكن شُـــبه له؟
03-02-2012, 05:48 PM
سيف النصر محي الدين سيف النصر محي الدين
تاريخ التسجيل: 04-12-2011
مجموع المشاركات: 8995
Quote: ههههههههههه يا ناذر ما تظلم الزول ياخ وبعدين أنت متأكد انهن بقـــر؟ مش يمكن شُـــبه له؟
غايتو المتأكد منو انو القدامي كانوا بقر ..
المامتأكد منو هل هو شبه له البقر ديل في شكل جنود ولا الحاصل شنو ؟!
غايتو أستغفر الله .. لكن في صلاة الجمعة ما قدرت اركز كلو كلو في الخطبة أو في الصلاة ... ساااااارح برعى في بقر ابليس .. هي قصدي غنم أبليس وبقول يا ربي ديلاك كانوا بقر ولا جنود الدايرنهم يهللوا ويكبروا ديل ..!!
03-02-2012, 06:09 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
غايتو انا عندي تلاتة قصص عن البقر حا أحكيها في البوست دا بالتقسيط المريح ..
هاك دي واحدة :
مرة جايين من رحلة من مزرعة في سوبا .. راكبين عربة صالون العربية معاي فيها شخصيات اشتهرت بالظرف وسرعة البديهة .. العربية سايقا واحد فيهم ضخم الجثة قاعدين نتونس في مواضيع مختلفة .. جينا داخلين في شارع لقينا زي 20 بقرة او أكتر قافلة الشارع .. الزول السايق العربية وقف وأنحنا ما انتبهنا هو داير يعمل شنو .. بعد شوية انتبهنا أنو بيكنتك للبقر بي نور العربية .. أي والله بيكنتك ليهم بدل ما يستعمل البوري ..!!
الجماعة سألوهو .. بتعمل شنو يا فلان ؟! رد قال ليهم .. منتظر البقر يفوت .. التاني قال ليهو : يفوت كيفن ؟ ما تضرب ليهو البوري بدل تكنتك ليهو كدة ؟ زولك اصر .. لا لا ما داير أعمل ازعاج في الحلة .. هسي البقر بيفوت ..!
وطبعا البقر ما شغال بيهو وبيعاين للكنتكة بتاعت نور العربية واظن في سرو بيقول : سواق العربية دا طيرة ولا شنو ؟!
الحكاية طالت والبقر ما زحا.. زولنا الأول عاين للسواق وقال ليهو : أنت مجنون ولا شنو ؟ اضرب البوري دا ؟ السواق قال ليهو : أصبر شوية أهنديك بقرة فهمت الأنا بعملو وأهي طلعت والباقين هسي بيطلعوا ؟! داك قال ليهو وأنت شن خبرك بيطلعوا ؟! الزول التاني عاين للسواق السمين من تحت وفوق وقال لي الأول بي سخرية : خلو بي راحتو .. قالوا البقر بخبرن بعضن ...!
غايتو أنا ضحكت يا سيف والله لا من استفرغت ودموعي جرت هميلة .. والباقين بالم طويل وقالوا الا ينتظروا نهاية الحركة دي .. والبقرات بقوا يتسحبوا واحدة واحدة .. بعد نص ساعة أو أكتر أخر بقرة أنسحبت من الشارع .. السواق عاين لينا كدة وقال لينا بي فرح ولغة إنتصار : .. أها ما قلت ليكم البقر دا بيفهم ؟!..
زولي التاني عاين لينا كدة وقال : وأنا ما قلت ليكم البقر بيخبرن بعضن ..!!
Quote: أكيد البقر طابور خامس يا ناذر ولا يكون إسرائيلي.
والله يا العوض خايف أنا الاكون طابور خامس ..!!
لأني عاينت للزول دا بي إستنكار شديد للبيعمل فيهو .. وبعد شوية هو إنتبه وعاين لي بي نظرة استنكار برضو (انا عارف أستنكاري كان في شنو لكن ما عرفت استنكارو لي استنكاري كان في شنو) ..!
03-02-2012, 06:36 PM
فيصل محمد خليل فيصل محمد خليل
تاريخ التسجيل: 12-15-2005
مجموع المشاركات: 26041
يا ناذر إتا بس أظنك عايز تحكي قصة الكنتكة للبقر دي ساي مسألة التكبير بتاعت الزول دي عادية ما بتستاهل .. الزول لما تعجبو حاجة بقول الله أكبر ولو ما عجبتو حاجة برضو بقول الله أكبر .. زولك دا الظاهر عجبو البقر وكبر أما مسألة تهليل دي فأظنو راجي الناس المعاهو يقولوا وراهو .. ما اظن فيها حاجة زي ما قلت إتا . تحياتي .
03-02-2012, 07:07 PM
Marouf Sanad Marouf Sanad
تاريخ التسجيل: 12-02-2004
مجموع المشاركات: 4835
Quote: المهم واحد جمبي (جادي جدا) .. شابك البقر (الله أكبر ولله الحمد) ..(لا اله الا الله) .. والاغرب من كدة كان بيعاين للبقر في عيونن ويقول ليهن (تكبير ... تهليل) .. طبعا البقر ما شغال بيهو وبيلوك في لبانتو وأظن في سرو بيقول : الطيرة دا بيقول في شنو ..!!!
يا ناذر سلام ياخ البلد حالته متاخرة جدا
03-03-2012, 02:26 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: ياناذر اخوي ماتنسي انو حتي الحجر والشجر والجماد يسبح ويحمد الله داير نديك ايات من القران ? فالشغله سنه حسنه يعني فالحيوان يكبر ويهلل كما الانسان
غايتو ما عارف ..! لكن عندي راي ..!
أظنو زولي دا قرا البوست بتاع المصري الفنطوط البيقولوا فيهو انو في الجنة بيشيلوا العدة وكدة .. وهو زي المصري كان قافل على الحور العين ولمن اقتنع انو ما في عدة بي هناك والشغلة حسية ساي قال يلحق الـ في الدنيا ..
يعني بدل حور عين .. بقرات سمينات ..!!
وزي ما بيقولوا نار مضمونة ولا جنة مجهجهة ..!!
غايتو البوست دا والبوست داك حا يكفرنا عدييل نسأل الله السلامة ..!!
ياناذر الصحة والأخبار -------------------------------------- ماكلموك بي بقر اسامة داوود البقر لما جاء الميناء عقموها ورشوها بي المبيدات وفي موسم الحج الي بيت الله لاتعقيم ميناء لاموية شراب للحجاج وقالوا البقرة مكلفةعشرة الف دولار وبتحلب 80 رطل أنتو قايل البقر هين
03-03-2012, 09:13 PM
عمر صديق عمر صديق
تاريخ التسجيل: 06-06-2008
مجموع المشاركات: 14776
Quote: ماكلموك بي بقر اسامة داوود البقر لما جاء الميناء عقموها ورشوها بي المبيدات وفي موسم الحج الي بيت الله لاتعقيم ميناء لاموية شراب للحجاج وقالوا البقرة مكلفةعشرة الف دولار وبتحلب 80 رطل أنتو قايل البقر هين
اها زي البقرة ام 10 الف دولار وتمنين رطل ومرشوشة ومعقمة كان مفروض يعلموها غصبا عنها لمن يقولوا ليها تهليل تهلل .. وتكبير تكبر .. !!
بعد الدلع دا كلو غايتو لو طلعت متبومة ومتطهمة ومتقهمة وما بتقول غير موووو أخير يفرتقوها كوارع وشية جمر ..!!
10 ألف دولار ....!! نسأل الله السلامة .. إنتوا رطل اللبن بي كم دولار اليومين دي ؟؟!!
03-04-2012, 09:08 AM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
مرة في واحدة من مناوشات أخونا ابراهيم بقال قال داير يبقى جعلي قلت ليهو تسوي سوات قريبنا عمر ود التومة عشان نعتمدك معانا ولمن حكيت ليهو قريبنا عمل شنو بقال غير رايو وعمل ما قرا الكلام ..
وعمر ود التومة جا من البلد وسكن الحلة الجديدة .. يوم جا قاطع الزلط في موتر طقاو .. أنجرح في كراعو جرحة صغيرة وعفى بتاع الموتر .. لكن قريبو الساكن معاو حلف يوديهو الحوادث ..!! ود التومة قال الموضوع ما بيستاهل .. قريبو قال : افو !! ترجع البلد والناس تعرف يقولوا هملتك وما عالجتك ؟!!
المهم مشو الحوادث دخل عملوا فحوصات قالوا ليهو أنتظر برة نجيك نربط ليك الجرح وننضفوا ليك .. أنتظروا برة والفترة طالت ود التومة سأل الدكتور ..: يا اللخو ..!! يا باش مهندس !! الحاصل شنو ؟ الواطـة دي ما ليلت فوقنا خلاص ..! بندور نمشي أهلنا ؟! الدكتور قال ليهو : الأولوية عندنا للحالات الحارة الخطيرة وأنت حالتك باردة أنتظر شوية ..!!
ود التومة زعل قال ليهو قلت كدي ..!! وقام فرتلب طلع سكينتو من ضراعو غزاها في نص بطنو ضبحا ضبح لا من مصارينو أتدلدلن .. الدكتور إتخلع قال ليهو : دا شنو يا زول العملتو في نفسك دا ؟ ود التومة قال لو : سيب الكلام الكتير أهو حالتي بقت طارئة أرح رجعلنا مصارينا دي واربطلنا الكراع دي خلنا النمشي ..!!
03-05-2012, 12:14 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
إتعلم من منو ؟؟؟! عمر ود التومة دا غبيان وانتي أظنك غبيانة متلو ..!!
انت عارفة أنا مثلي منو ؟!
أنا مثلي علي ود سليمان الجعلي الحر المأصل ؟ عارفة قصتو ؟؟!
في البلد هناك النسوان نزلن البحر يجيبوا الموية .. عاينن كدي شافن عجاجة غبارا للسما .. واحدة قالت .. يا بنات أمي دحن داك مش علي ود سليمان الساكيهو التور ؟! التانية قالت : ايا يا هو زااتو .. التور الماكن اب قرون دا لو لحقو بيلحقوا امات طه .. التالتة قالت : دحن تعالوا نزغرد ليهو نخليهو يركز للتور دا يقبل عليهو يشيلو يضربو الواطة دي ..!!
النسوان خلن عدتن وزغردو لي ود سليمان الكان قرب منهن : أيوووووووويييييي يوووووويي يوووووووووووي ييي يا ود سليمان .. تراكا فارس الحوبة .. إنت الصاقعة كل الناس تقول لا حولا .. السما دي التنقد والبحر دا تشربوا ملوص ابشر بالخير ..!! ايوووووويي يوووووي ..!
الوكت دا ود سليمان جا كاسح قدامن والتور بي وراهو رفع يدو بشرلهن وقال ليهن :
ابشرن تب ..! والله للحول ما يحصلني
تقولي لي عمر ود التومة هههههههيعع عافي منك يا ود سلمان اخوي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ناذر محمد الخليفة
الامين موسى البشاري
سيف النصر محي الدين
Elawad
فيصل محمد خليل
محمود الدقم
طلحة عبدالله
Marouf Sanad
محمد عبد الماجد الصايم
khaleel
خالد العبيد
وضاحة
محمد المسلمي
عمر صديق
محمد الامين احمد
omer osman
Mahmoud Mustafa Mahmoud
فيس بوك
تويتر
انستقرام
يوتيوب
بنتيريست