|
|
|
 Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
القدر دائما بيلعب أدوار عجيبة في الحتات دي !!
في الوكت الكان سيف وصاحبو بيتكلمو في موضوع ال ك ل ب .. حسن أخو علي الصغير جا راجع من المدرسة .. في الطريق سمع نباح جريوات من بيت ما مكتمل وساكن فيهو غفير معروف في الحي .. حسن الصغير مشى للغفير وطلب منو يديهو جريو يربيهو في البيت .. الغفير أدى حسن جريو صغير ومدغلب وماااكن مقابل خمسة جنيهات .. حسن شال الجريو وهو فرحان ووداهو البيت ..
إتخيلو الكلام دا حصل في أثناء سيف وعلي أخو حسن الإشترى الجريو بيتفاكروا حول البحث عن جريو ولسع علي ما رجع البيت ..!!
مش قلت ليكم القدر دا مرات بيكتل ليهو زول ..!!
بجي بعدين أوريكم الجريو دا عمل شنو في الحلة وفي الجماعة الأصحاب ديل ..
| |
 
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
زي الساعة عشرة كدة ..حسن الصغير بتاع الجريو طلع من البيت يجيب لبن للجريو من الدكان لكن نسى الباب فاتح .. ويقوم الجريو يطلع من الباب .. طبعا الجريوات لمن تستكشف حتة ما بتزح منها كتير .. الجريوى بقى يدور ويشمشم قدام البيت وحول السور .. في اللحظة دي تحديدا علي جا راجع من صحبو سيف الدين .. علي إتفاجأ لمن سمع نباح الجريو الولوف .. الجريو حا لحدي كرعين علي وبقى يتمسح فيهو .. علي إتلفت يمين وشمال من الحيرة .. هو عارف إنهم ما عندهم جريو في البيت وعارف إنو الحلة ما فيها ######ة والدة طيب الجريو جا من وين ؟!!
علي قرب يسجد سجدتين شكراً لله وإعتقد في نفسو عدييل وظن نفسو واحد من أولياء الله الصالحين وإنو الحصل دا كرامة لا تتكرر وفرصة يخدم بيها صحبو سيف .. طوالي علي إتصل بي سيف وقال ليهو لقيت ليك جريو .. تعال شيلو .. سيف ما صدق طوالي جا جاري ولقى الجريو النضيف السمين الحبوب الهوهوتو ما (هو .. هو) هوهوتو (هيو ..هيو) يعني بيهوهو بالسلم السباعي ..
بدون إضاعة وكت وأسئلة كتيرة سيف شكر صحبو علي وشال معاهو الجريو ومشى على البيت .. ختى الجريو في الحوش وطلع الدكان يجيب لبن ليهو .. في الدكان إتقابلو سيف وحسن اخو علي .. سلمو على بعض وإشتروا لبن مع بعض وجو راجعين وإتفارقوا بعد داك كل زول على بيتو !!
مش قلت ليكم القدر دا يوم بيكتل ليهو زول ..!!
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: elnawrani margan)
|
حسن رجع البيت شايل اللبن ... قدر ما فتش وبحت ما لقى الجريو بتاعو !! سأل ناس البيت كلهم قالوا ما شافوهو .. أخوهو علي مشى نام طوالي وما لحق يسألو ..!! حسن طلع الشارع ومن جاي لي جاي يفتش ويسأل عن الجريو الخسران فيهو خمسة جنيهات وما لقى زول يوريهو الحاصل شنو ..!! في النهاية لمن تعب والواطة فللت وقنع من الفتيش .. فتح اللبن الجابو للجريو وشربو هو ورقد نام ..!!
الصباح حسن مشى للغفير على أمل الجريو يكون رجع هناك !! سأل الغفير عن الجريو الغفير قال ليهو الجريو ما ظهر عندي .. حسن طلع ورقة بي خمسة جنيهات للغفير يديهو واحد تاني بدل فاقد الغفير قال داير خمسطاشر ألف !! حسن زعل قال ليهو ليه خمسطاشر ألف !! أصلو الجريو بتاعك دا ضاني ولا عجالي !! الغفير قال ليهو أسعار الجريوات زادت !! داير تشيلو شيلو ما داير خليهو وامش فتش لي الروحتو داك ..!!
حسن زعل جدا وما شال الجريو ورجع البيت ..!!
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: ناذر محمد الخليفة)
|
كدي يا شباب نرتاح شوية ونشوف الرسائل في الإيميل حول الموضوع دا :
دي من واحد أخونا كدة :
Quote: ذكرتني زمان في نيالا أخوي الصغير عمره زي 13 سنة كدة ... مفلس والدنيا إجازة ... صاحبك مشى شال ليه جريوات كانن في بيت مهجور وأمهن مشت تفتش ليها أكل .... قام ختاهن في قفة منتهية الصلاحية لقاها مجدوعة في الكوشة ... بعد شوية لقى ليهو كدايس صغار برضو مجدوعات ... قام لماهن مع الجريوات ومشى للحي المجاورلينا وبأعلى صوته قعد ينادي : جريوات كدايس ..... جرايوات كدايس ... عيال الحلة إتلموا وهاك يا بيع : بعشرة قروش بخمسة قروش ... صاحبك صرف البضاعة في نص ساعة ورجع جيبه مليان ....الظاهر الجريوات دي قصصها دايماً تفوق الخيال .. مش في مثل بيقول : مرزّق تقول جريو؟
واصل يا صاحب ... متابعين معاك
|
وكان الرد :
Quote: هههههههههههههه
مبالغة أخوك دا يا خالد ..
يا خي الشفع بيحبوا ليك الجريوات والكدايس بطريقة مبالغة ...
عندي ود أخوي عمل عملية تانية إتخيل باع شنو لي أولاد الحلة وأصحابو ؟
باح ليهم سلاحف ..1 أي والله ابان قدحة عديل ..
أخوي الكبير مرضان بتاع صيد .. كل جمعة بيمشي جبل أولياء هو وجماعتو عشان يصطادو سمك .. طبعا الجبل فيهو كمية من السلاحف الصغيرة ومرات مرات بتجي مع الشبكة بيقوموا يخلصوها من الشبكة ويرجعوها البحر تاني ..
ود أخوي دا يوم مشى معاهم لمن طلع مع الشبكة أبو القدح قال لي أبوهو ما ترجعوا أنا دايرو .. جاب ليهو جردل كدة وخت فيهو أبو القدح الصغير دا .. يعني ممكن تقول عليهو جريو أبو القدح ..
بعد شوية طلعو واحد تاني برضو شالو ختاهو مع داك .. رجعوا البيت ملا الشجر موية وفكاهم فيهو .. تاني يوم نادى أصحابو عشان يتفرجو علىيهم وفي ناس من أصحابو أول مرة يشوفوا أبو القدح على الطبيعة .. المهم في إتنين إتشبكوا فيهم باعم ليهم أظن الواحد بي تلتين جنيه .. الجمعة البعدا ما كضب شال معاهو من البيت جردلين وقعد حارس مع أبوهو .. ناس أبوهو يرمو الشبك ويقولوا يا الله سمك .. هو بي وراهم قااانص وبيقول يالله أبو قدح ههههههه
غايتو من حظو اليوم داك طلعوا قريب الستة دفسم في الجرادل وجا البيت فتح الحرطوش وفكاهم تحت الشدر ..
تاني يوم يا خالد لمن اصحابو جو الشغلة ما قعدت معاو أكتر من ربع ساعة تشاهم كلهم زي الترتيب والمرات البعديها بقى كمان ياخد منهم مقدم نص القيمة حتين يجيب ليهم ..
|
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: elnawrani margan)
|
النوراني يا متشنج ..!!
Quote: ناذر مامعقولة جهجهتنا وجهجهت الاب توب معانا حايمن بيه من الصالة للاوضة وبالعكس.
|
ما إنت كمان عارف ظروفي .. والسجانة لو شلت معاي اللاب توب هناك بيخش فيهو جبص أو تنكشح فيهو بوهية ..
لكن أقول ليك حاجة ..
أنا أمبارح ما كتبت حاجة بالليل لأني مشيت النادي بتاع الشباب أشوف أخر الأخبار شنو ..!! لقيت الشغل طبعا إتعطل في النادي والشباب قاعدين في البرش راسم مقطوع (يسفوا ويتفو .. يسفوا ويتفوا) في الصعوط .. سيف حردان ما جا النادي من يوم الشكلة حسن ما ظاهر .. علي ما ظاهر .. الجريو ما ظاهر ...
دا الموقف لحدي امبارح بالليل ..
| |
|
|
|
|
|
|
|
|
 Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: زهير الزناتي)
|
أها يا جماعة وقفنا وين ؟؟؟!!!
أيوة ...
قلنا إنو أولاد الحلة بتاعين النادي جو قدام بيت حسن عشان يزرزروهو في موضوع الشتيمة الجاتم في الموبايل .. حامد أخو حسن وعلي رجل الأعمال المشهور سمع الكركبة وجاهم طالع .. الجماعة كلهم أول ما شافوهو سكتو ودنقروا روسينم .. حامد زول مهيب ورجل أعمال معروف بالإضافة إنو بيدعم أي مشروع في الحلة .. لمن أولاد الحلة بدو في تسوير النادي حامد إتبرع ليهم بي حديد السور .. لمن إنتهوا من السور دفع ليهم 3 مليون عشان يدخلوا الكهرباء والموية وغير كدا جاب ليهم اللمبات بتاعت الإضاءة ..
سأل الجماعة الحاصل شنو وروهو النظرية وانو في زول نبذم في التلفون وإنهم شاكين إنو دا أخوهو الصغير حسن .. الحوار دار كالتالي :
حامد : يا ولد إنت نبذت الجماعة ديل في التلفون ؟
حسن : يعدم أولادي ما حصل (مع ملاحظة إنو حسن دا طالب ثانوي لسع وما عندو لا أولاد لا بطيخ وبالرغم من دا حامد مشى الحليفة) ..
حامد : الود حلف قال دا ما هو يا أخوانا ؟ إنتو متأكدين من كلامكم دا ؟!
قبل ما ديلك يفتحو خشمهم في الوكت دا محمد حسين أبو حسن ناداهو من جوة .. وحسن ما صدق دخل البيت طوالي لانو كان في حاجة لا زم يعملا ..!
حسن إنتهى من أبوهو وطوالي دخل الحمام .. طلع الشريحة الخاتيها لليوم الأسود .. كسرا وهرسا ورماها جوة الحمام وجر الموية .. سرعة سرعة طلع تلفونو ومسح كل الهستري بتاع المكالمات وجاهم طالع بي كل براءة وفوق راسو بتدور الأربعة عصافير الصغار ديلاك دليل البراءة ..
حامد سأل سؤال تاني : هو أساسا المشكلة في شنو ؟
حسن : المشكلة إني جبت لي جريو .. إشتريتو بي قروشي وقام علي أداهو لي سيف .. وسيف دا ما داير يديني ليهو وبيماطل فيني ..!!
سيف : أنا ما داير أديك ليهو ؟ يا خي إنت براك الماداير تصبر وكل دقيقة والتانية ضارب لي تلفون ..!
حسن : والله إنت ما داير تديني ليهو .. وكمان أخر مرة قلت لي قد مني وقلت لي ديـ... وديـ ... الجريو .
سيف خجل خجلة ما عادية لأنو في الحلة مركب مكنة زول محترم ولأنو حامد دا ما بيلعب في سب الدين والحاجات دي ..
حامد : قلت ليهو كدة يا سيف ؟!
سيف : الولد دا كضاب يا حامد أصلو ما قلت ليهو حاجة زي دي ..!
حسن : قال لي كدة وبالمناسبة أنا مسجل المكالمة .. اسمعا ليكم هسي ؟!
سيف رقد سلطة وقعد يتمتم ويرترت ..
تاني حامد سألو : يا سيف إنت قلت لي حسن دا كلام زي دا ؟!
سيف وشو بقى احمااااااااار وصغييييييييييير : والله يا حامد بكون قلتها ليهو في لحظة غضب لكن ما بالصيغة دي ؟!
حامد حاكيها مع سيف للطيش : بي ياتو صيغة يعني ؟! أفتح يا حسن الموبايل وسمعنا التسجيل ..
سيف رقد سلطة وما داير زول يسمع حاجة : يا خي ما في داعي نسمع إساءة للدين .. لو قلتها بكون قلتها في ساعة غضب وأنا زاتي لمن رجعت البيت صليت العشا وإستغفرت ربنا ..!
(إتضح فيما بعد إنو بعد الزرزرة دي كللللللللللها ما في تسجيل ولا حاجة لكن حسن التفتيحة لعب بي أعصاب سيف الدقوسة ونجح في كدة) ..
حامد : هسي خلونا من النقة دي .. أمشي جيب لي حسن دا الجريو بتاعو وننتهي من الموضوع ..!
سيف : لكن انحنا هسي ما جايين عشان موضوع الجريو ؟!
حامد : جايين لي شنو طيب ؟!
سيف : جايين نشوف حكاية الزول النبذنا في الموبايل ..!
حامد : ما أهوندا الزول الإتهمتوهو وقال ما يا هو . أمشوا أفتحوا بلاغ في الرقم النبذكم دا ..!
سيف : دا الحا نعملوا ..
حامد : أها وموضوع الجريو ؟!
سيف : بي صراحة يا حامد حا نفتح بلاغ ولو طلع الزول النبذنا دا ما أخوك حاأديهو ليهو .. ولو طلع هو ما عندو عندي جريو ..!!
في اللحظة دي أولاد الحلة كاسوا للتخارجم .. كيف سيف يتجرأ يقول كلام زي دا لي حامد وحامد هو الكفيل الرئيسي بتاع النادي ..!
حامد : يا سيف دا كلام شنو ..
سيف : دا كلامي كدة ..
يقوم في اللحظة دي وفجأة حامد يقطع ليك في سيف كف لمن نضارتو طارت ..!! سيف ما كضب نطا ليك في كرش حامد والبنية دورت .. ناس الحلة حاجزوهم كدة لحدي ما فكوهم وأقنعوا سيف يمشي البيت ..
سيف لبس نضارتو وهو ماشي قعد يكورك : ما عندكم عندي حاجة .. جريووكم دا تشموهو قدحة بعد دا ..
حامد : أها انا أوريك الرجالة حا أخش ألبس واجي طالع .. بعد ساعة لو ما لقيت الجريو دا قدام البيت بجيك هناك وأدخلك فلم عمرك ما شفتو ولا حا تشوفوا ..
وإتفرقوا علي كدة ...
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: الصادق صديق سلمان)
|
قصة حلوة وسرد تصويري ممتع ......
لحدي ما ناذر يجيكم ....
اقسام الشرطة بلاغات (طريفة - عجيبة - حزينة) جولة في مكتب الشاويش النبطشي
Quote: البلاغ رقم (1)
شكلة في حمامة رقاصة
شكلة ليها ضل بين اتنين شباب كل واحد يدعي ملكية هذه الحمامة ......
المشكلة انو الحمامة ليس لديها (سيريل نمبر ولا رقم شاسي) ............
قومة وقعدة وشهود ووفود تدعم ملكية كل واحد للحمامة ...........
طيب مافي واحد منكم عندوا صورة مع الحمامة دي ممكن نستفيد منها كدليل ..........
طيب ياجماعة اقول ليكم حاجة انا عندي ليكم حل .....................
الحمامة دي تقعد مع كل واحد شهر وبعد الشهر يجيبه القسم نعمل تسليم وتسلم بينو وبين الزول التاني ..... موافقين
موافقين جداً ياجنابو ...............
قبل اكتمال الشهر كنت قد نقلت من ذلك القسم ........... ولا ادري ماذا حدث بعد ذلك
|
Quote: البلاغ رقم (2)
ببغاء بت الملحق العسكري
- قاعد في امان ربي في القسم .........
- يجي داخل واحد خواجة منزعج جداً ومعاهو بتو الطفلة الصغيرة بتبكي ......
- لا حول ولاقوة الا بالله ...... الليلة دي شكلها كبة كبيرة خلاس ......... ربنا يستر ....
- الخواجة طلع الملحق العسكري الفرنسي حسب كلام المترجم ..............
- طيب ياعمك القصة شنو ؟ ورأسي يودي ويجيب واقل حاجة جات في ذهني (اغتصاب)
- والله ياجنابو الجماعة ديل قالوا عندهم ببغاء شرد من القفص !!!
- والببغاء حق الشافعة دي وعشان كده هي متأثرة جداً وابت تمشي المدرسة .........
- طبعاً بعد كلام الخير والايمان قلت ليهم انو شرطة السودان لن يغمض لها جفن قبل ان تعثر على هذا الببغاء وتعيده لكم
- مرقوا بي جاي ونسينا الشغلة بي جاي .............
- الصباااااااااااح بدري عربية السفارة ....... تقيف قدام القسم ........ اهاااااا ان شاء الله لقيتو لينا الببغاء ؟؟؟؟؟؟؟؟
- امك الناس دي جادة شديد في الموضوع ده ...... وزادني المترجم من الشعر بيت بانو سعادة السفير شخصياً متابع البلاغ ده
- ربك رب الخير بعد تلاتة يوم وبالصدفة عثر احد افراد المباحث عي الببغاء لدي احد الاشخاص ........ واحضرهم الى القسم
- كم كان المشهد طريف ومؤثر وسعادة الملحق العسكري وابنته يحتضنون الببغاء ويذرفون دموع الفرح ........
- غايتو عمك اللقينا عندوا الببغاء مرق بمكافأة من سعادة الملحق ..... ونحن نابنا خطاب شكر من السفارة الفرنسية
|
| |
|
|
|
|
|
|
|
|
 Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: omer osman)
|
Quote: الـ جيرو ده يا ناذر ، لحق جرو كليب
اشهر تلاته جيراوت فى التاريخ
المركز الاول))
جرو كليب ... كان من اسباب حرب البسوس
|
اخي الغالي محمد الامين , صديقي المبالغه ناذر
جرو كليب زول عديل كده (: !!.
السبب الرئيسي لحرب البسوس هي ناقه البسوس ,( الجرو هنا براءه من قيام الحرب يا جماعه)..
والبسوس هي عمه القاتل جساس وكانت في حمايه بني بكر ,
ومنع ابن عمهم وصهرهم وهو في ذات الوقت مليكهم ( كليب ) بعض المرعى
واصرت البسوس بحقد وخبث الا ان تطلق ناقتها البسوس كل مره هناك , حتى قتلها الملك كليب ,
فاحس جساس بهوان جواره , فخرج لكليب , ورفض كليبا وهو الفارس و الملك قتاله ,
وذهب عنه , فرماه جساسا برمح في ظهره, فقتل غدرا..
الحاصل جساس هرب , وصار ثار دم الملك كليب في عنق اخوه الفارس ( السكير ) حتى حينها
الفارس الزير سالم , وابنه المقتول اليمامه ذات العشر اعوام انها ترضى الصلح فقط بطلب
بسيط ووحيد ( سهله مش , ابدا.. ) طلبها هو انها تريد اباها كليبا حيا ..!!.
فوقعت اشهر حروب العرب لاستحاله الطلب و رفض كل ديه..
المهم : طيب يا جماعه وين الجرو في الحته دي ؟؟!!.
الجرو كان طفلا في رحم الجليله زوجه كليب المقتول , واخت جساس قاتله ,
اي ان الجرو هو ابن المقتول والقاتل خاله.. ( فليم لكن ..! )
خاتمه الجرو ابن الملك المقتول كليبا عندما يكبر , وقد تربى في كنف خاله ,
يعلم الحقيقه ويقتل خاله جساس قاتل ابيه الملك في مبارزه..
عارف ياناذر حتى قتل القاتل لم يوقف حرب البسوس هذه , واستمرت بعد ذلك.
وانا شايف جروكم دا لو حسن رجعو حربكم دي برضو مابتقيف ,
عفوا للاطاله , التي هي من مقتضيات الحاله , ياخ معاكم مواصلين (:
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: شهاب الفاتح عثمان)
|
تحية طيبة للجميع
الحبيب الصفوى شهاب الفاتح عثمان
طبعا اذا بدينا فى الزير السالم لن ننتهى ، فلهذة القصة التاريخة وقع خاص لدى
انا هنا ما قصدى الجرو بن كليب ، اللى هو الجرو بن وائل بن ربيعة التغلبى
و اللى تربى فى حضن خاله (عمرو) المشهور بجساس و كان خاله يناديه بـ هجرس
و لما كبر قتل خاله انتقاما لابيه
انا قصدى الجرو (صغير الـكـلــب ) و تجد موقعه فى الحكاية هنا
Quote:
وهذه القصة حين فض كليب جموع اليمن في خزازى وهزمهم فاجتمعت عليه معد كلها، وجعلوا له قسم الملك وتاجه وطاعته، وغبر بذلك حيناً من دهره، ثم دخله زهو شديد، وبغى على قومه لما هو فيه من عزة وانقياد معدّ له، حتى بلغ من بغيه أنه كان يحمي مواقع السحاب فلا يرعى حماه، وإذا جلس لا يمر أحد بين يديه إجلالاً له، لا يختبئ أحد في مجلسه غيره، ولا يغير إلا بإذنه، ولا تورد إبل أحد، ولا توقد مع ناره، ولم يكن بكرى ولا تغلبي يجير رجلا ولا بعيراً أو يحمى إلا بأمره، وكان يجبر على الدهر فلا تخفر ذمته، وكان يقول: وحش أرض في جواري، فلا يهاج! وكان هو الذي ينزل القوم منازلهم ويرحلهم، ولا ينزلون ولا يرحلون إلا بأمره، وقد بلغ من عزته وبغيه أنه اتخذ جرو كـلـب، فكان إذا نزل به كلأ قذف ذلك الجرو وفيه فيعوى، فلا يرعى أحد ذلك الكلأ إلا بإذنه، وكان يفعل هذا بحياض الماء فلا يردها أحد إلا بإذنه أو من آذن بحرب، فضرب به المثل في العز فقيل: أعز من كليب وائل، وكان يحمى الصيد فيقول: صيد ناحية كذا وكذا في جواري فلا يصيد أحد منه شيئاً.
|
يعنى تخيل الـ زهو وصل بالزول ده وين ، يعنى اذا انت واقف فى حته بيصلها صوت الجريو بتاعو ده ،عندها لا يحق لك ان ترعى هناك لان هذة المنطقة تصبح تحت حمايتة و تستوجب اذنه، و المشكلة ان الجريو ده قاعد يجرى ، يعنى المنطقة المحمية برضو بتتغير بتغير موقع الجيرو !!! حالة صعبة خلاص 
و بذلك يكون هذا الجريو من اسباب الحرب ، لكن السبب الاساسى و الشرارة الفعلية طبعا هى سراب ناقة البسوس خالة جساس و الجليلة
و معليش يا ناذر ، لكن فى موضوع حرب البسوس ده ، بـ تجينى الحكة كان ما كتبت فوقو
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: هويدا شرف الدين)
|
شهاب ..
Quote:
السبب الرئيسي لحرب البسوس هي ناقه البسوس ,( الجرو هنا براءه من قيام الحرب يا جماعه)..
والبسوس هي عمه القاتل جساس وكانت في حمايه بني بكر ,
ومنع ابن عمهم وصهرهم وهو في ذات الوقت مليكهم ( كليب ) بعض المرعى
واصرت البسوس بحقد وخبث الا ان تطلق ناقتها البسوس كل مره هناك , حتى قتلها الملك كليب ,
فاحس جساس بهوان جواره , فخرج لكليب , ورفض كليبا وهو الفارس و الملك قتاله ,
وذهب عنه , فرماه جساسا برمح في ظهره, فقتل غدرا..
الحاصل جساس هرب , وصار ثار دم الملك كليب في عنق اخوه الفارس ( السكير ) حتى حينها
الفارس الزير سالم , وابنه المقتول اليمامه ذات العشر اعوام انها ترضى الصلح فقط بطلب
بسيط ووحيد ( سهله مش , ابدا.. ) طلبها هو انها تريد اباها كليبا حيا ..!!.
فوقعت اشهر حروب العرب لاستحاله الطلب و رفض كل ديه..
المهم : طيب يا جماعه وين الجرو في الحته دي ؟؟!!.
الجرو كان طفلا في رحم الجليله زوجه كليب المقتول , واخت جساس قاتله ,
اي ان الجرو هو ابن المقتول والقاتل خاله.. ( فليم لكن ..! )
خاتمه الجرو ابن الملك المقتول كليبا عندما يكبر , وقد تربى في كنف خاله ,
يعلم الحقيقه ويقتل خاله جساس قاتل ابيه الملك في مبارزه..
عارف ياناذر حتى قتل القاتل لم يوقف حرب البسوس هذه , واستمرت بعد ذلك.
|
مذكور على الفذلكة التاريخية والمعلومة دي ..
| Quote: وانا شايف جروكم دا لو حسن رجعو حربكم دي برضو مابتقيف , |
ما وقفت والله يا شهاب فرقت بين أصحاب وعملت عمائل ..!!
| |
|
|
|
|
|
|
|
|
|
Re: قصة عايشتها بنفسي : جِرِيوْ يتسبب في سجن رجل أعمال شهير وتفرقة بين أسرتين وصديقين حميمين . (Re: doma)
|
نواصل وبعد داك نرجع نرد ...
وقفنا ياشباب إنو سيف جا داخل القسم هائج ومعاهو أولاد النادي .. شابك الصالة صريخ : إنتو مش ناس القانون ؟ إنتو مش في خدمة الشعب ؟ مش أنا واحد من الشعب ؟! أنا مظلوم يا ناس ودايركم تنصفوني .. أبوي ما ضربني كف يضربني حامد لييه ؟؟!! عشان عندو قروش يعني ؟!!
المباحثية الحايمين في الصالة مسكوا سيف قايلنو مجنون أو سكران .. شمو خشمو لقوهو ما عندو عوجة .. سألوا أولاد الحلة أولاد الحلة قالوا ليهم .. مشكلة صغيرة في الحلة وما بتستاهل حاجة بس سيف دا زعلان شوية .. الجوطة حصلت وفي ملازم أول قاعد جوة المكتب ..سال في شنو وروهو بالحاصل وإنهم ما قادرين يفهمو حاجة .. قال للمباحثية دخلوا لي الزول الهائج دا والناس المعاو .. سيف دخل ليهو المكتب معاهو الأولاد وسيف يرغي ويزبد ويتنخنخ ..
الضابط : يا زول أهدأ شوية وورينا الحاصل شنو ؟!
سيف : الحاصل يا شيخنا إني مظلوم .. وحقي مهضوم ..
الضابط : شيخنا !! إنت قايل روحك في خلوة ؟! أقيف عديل وإتكلم طوالي عشان ما أرميك برة ..!
سيف هرش ولبد شوية : والله يا جنابو الحصل إنو واحد صحبي جاب لي جريو .. والجريو ما حقو .. حق أخوهو الصغير وأنا يا جنابو خسران في الجريو دا كل يوم لحم ولبن وكرتة .. أخو صحبي مشى كلم أخو الجريو .. هي قصدي أخوهو الكبير .. قام الجريو ..
الضابط : دقيقة دقيقة .. بتقول في شنو إنت ؟! يا جماعة الزول دا نصيح ولا بيتكلم برا راسو ولا مجنون ؟!
أولاد الحلة : لا لا يا جنابو الزول دا كويس والبيحكي ليك فيهو دا يا هو الحاصل ؟!
الضابط بإستغراب : طيب واصل ..
قبل ما يواصل جا داخل المكتب علي صاحب سيف .. طبعا برضو رغم الحصل علي ما داير يخسر سيف وجا القسم يحاول يشوف ليهو طريقة مخارجة .. سيف أول ما شاف علي قعد يكورك : يا هو دا صحبي يا جنابو أقبضو قبل ما يقوم جاري ..!! علي إتخلع والضابط سال سيف : دا الجريو ؟!
سيف : جريو شنو يا مولانا الجريو وس خ ان في البيت .. دا صحبي الاخوهو نبذني وأخوهو الكبير كفتني وخنقني ؟!
الضابط اللئيم : والله لو فاهم حاجة دا يقوم جرجير (أشار لي شنبو طبعاً) .. الدخل الجريو مع الإتشاكلت معاهو مع صحبك دا مع الجماعة ديل شنو ؟!
سيف : يا جنابو القصة طويلة هسي المهم أنا إتشاكلت مع أخو الزول دا وداير حقي منو ..!
الضابط : أخوك إسمو منو يا زول ومالو ضرب الزول دا :
علي : أخوي حامد محمد حسين وهو ضربو ...
الضابط مقاطع : حامد محمد حسين الواحد دا بتاع شركة ..... ومصنع .... وجريدة ....؟!
علي أأي هو زاتو يا جنابو والحصل إنو ...................... (علي حكى القصة للضابط من طقطق لي سلام عليكم مع بعض المقاطعات والهياجات من سيف مرة مرة) ..
الضابط حكى راسو : هسي إنتو متلمين كدة وشكلتكم دي وحامد محمد حسين دا .. كلها بي سبب جريو ؟! عليكم الله إنتو ما بتخجلوا ؟! هسي مضيعين وكت الحكومة ووكت الشرطة في موضوع فارغ زي دا ؟ إنتو قايلين الشرطة دي في خدمتكم ولا شنو ؟!
سيف : يا جنابو أنا مضروب وداير أورنيك تمنية لكن أهم حاجة هسي حامد دا أمكن يهرب برة البلد .. أقبضوهو وجيبوهو أول حاجة ..
علي : دا كلام شنو يا سيف ؟!
سيف : يا علي أطلع منها .. ويا جنابو وكت الشكلة علي دا مسكني لي أخوهو وأخوهو ضربني ..
علي : أنا ؟؟!!
الضابط هاج فيهم : هوي يا بجم إنتو ؟! ما تحترمو الحتة القاعدين فيها دي شنو هايجين لينا كدة زي النعاج ..! هسي أقوم أرميكم في الحراسة لحدي الصباح .. أسكتو ساي خلونا نقدر نتصرف ونفكر ..
الجماعة زنننننننن صنو ..!
بتاع النادي النبذوهو داك سأل الضابط :
يا جنابو ممكن أتكلم ؟!
الضابط : داير تقول شنو ؟!
النبذوهو : أنا داير أفتح بلاغ منفصل ..!
الضابط : في الجريو ؟!
النبذوهو : لا لا ما في الجريو .. في رقم واحد ضرب لي فيهو ونبذني من غير سبب ؟!
الضابط : هسي شايفنا نحن فاضين ليك ؟! ما عندنا موضوع الجريو دا أهم من موضوعك ودايرين نخلصو .. أهم إنت ولا أهم الجريو ؟!
النبذوهو بي سرعة : أهم الجريو يا جنابو .. أهم الجريو ..
الضابط نادى واحد من العساكر : طلع للزول دا أورنيك تمنية وجهز العربية نمشي نجيب حامد دا قبل ما يزوغ ونجيب كل المعروضات ..!
العسكري : يا تو معروضات ؟!
الضابط : الجريو يا بجم .. مش هو سبب المشكلة كلها ..!!
سيف : الجريو دايرين بيهو شنو ؟! لا هو حا يشهد لا حا يتكلم خلوهو محلو ..!
الضابط : إنت داير تورينا شغلنا ولا شنو ؟! أمش طلع الأورنيك وأمشي المستشفى وتعال ..
سيف : لكن الجريو في بيتي يا مولانا والمفتاح عندي ..!
الضابط : خلاص تمشي معانا أول نجيب الجريو ..
سيف : لكن الجريو و س خ ا ن يا جنابو ولازم نحميهو أول ..!
الضابط : وس خ ا ن دايرنو .. بنحميهو هنا بي طريقتنا ..
علي : والجريو دا حا يجي بي صفتو شاهد ولا متهم ولا شنو بالضبط يا جنابو ..!
الضابط إنتبه للنقطة دي والظاهر ما فكر فيها .. حك راسو كدة وقال : أنحن نجيبو أول بعد داك نشوف وضعو شنو ..!
الجماعة جو طالعيين جايين برة وعلي إتخلع من المنظر ..!!!
ناس القسم على حس إنهمم ما شين يجيبو رجل أعمال مشهور ما صدقوا .. برة كان في عربيتين من عربيات الدوريات مستفة عساكر لي عند خشما .. وموترين مدورين فيهم اربعة فرد مباحث دا غير العساكر الما لاقية حتة تركب فيها ..!!
طبعا دا مولد بالنسبة للقسم وإحتمال الشغلة تجيب حاجات تانية ..!!
يا خي الضابط زاتو ما لقى حتة يركب فيها ..!!
علي إتخلع : يا جنابو ديل ماشين وين كلهم ؟!
الضابط : ماشين نجيب أخوك قبل ما يهرب .. حا نكون ماشين وين يعني ؟!
علي : أخوي دا أصلو لو هرب حا يهرب بي دبابة ..! وهسي قول جبتوهو وقبضتوهو .. حا يركب وين مع الزحمة دي ..!
أولاد الحلة بعد شوية إتدخلوا واقنعوا الضابط إنو ما في داعي للتجريدة دي .. وإنو وضع حامد دا حساس في الحلة والمجتمع والموضوع ما بيستحق .. وإنهم حا يتصلو بي حامد يجي براهو ..
طبعا العساكر بيحبو الأكشن .. كلللللللللهم جت إعترضو إنو يجي براهو وإنهم لازم يجيبوهو زيو وزي أي مواطن تاني (القسم كان هادي وما فيهو موضوع اليوم داك الظاهر) ..
المهم علي إتصل بي حامد أخوهو ووراهو النظرية وإنو لا زم يجي القسم عشان العساكر ما يجوهو البيت وتكون فضيحة بي جلاجل .. طبعا الفضيحة ما مشكلة بالنسبة لي حامد .. المشكلة في الجلاجل ..!!
الضابط إقتنع بعدما إتكلم مع حامد بي نفسو .. واحد من العساكر الزهجانين وما راضين عن الوضع سأل الضابط .. هسي نحن نمشي وين يا سعادتك ؟؟!!
الضابط عاين ليهو كدة وقال ليهو : أمشو جيبو الجريو ..!!
طوالي العربات دورت والمواتر دورت وركب معاهم سيف ومشو على الجريو ..
الكان في الوكت داك جعان وعطشان و و س خا ن وشغال يعمل (هيو .. هيو .. هيو) ..!!
| |
|
|
|
|
|
|
| |
ناذر محمد الخليفة
elnawrani margan
Hafiz Bakhit
خالد كدودي
محمد الامين احمد
عبدالكريم أحمد الامين
عزيز عيسى
rani
يحى الشريف
الصادق صديق سلمان
الحاج حمد الحاج
عبد اللطيف السيدح
زهير الزناتي
الشاذلى خيرى عبد الله
سيف الدولة كامل
Abdlaziz Eisa
فيصل نوبي
محمد حيدر المشرف
محمد عبد الماجد الصايم
omer osman
شهاب الفاتح عثمان
Mahjob Abdalla
داليا حافظ
هويدا شرف الدين
الفاتح شلبي
معاذ الهادي
محمد البشرى الخضر
فيصل محمد خليل
doma
فيس بوك
تويتر
انستقرام
يوتيوب
بنتيريست