مذكرات حنكوشة.......1
حنكوشة دي بت وطبعا ما أنا, مع اني برضو حنكوشة كلنا في الحنكشة أخوة ويا ريت لي قدرة أكتب ذكريات حنكشتي مباشرة حنكوشة ككل الحناكيش وتعرفون من هم الحناكيش سمعت عن الزير في حكايات قبل النوم, وتعتقد ان الرقشة نوع من الحشرات قريبة الشبه بالفراشة,الغنماية عندها بيضاء مشعرة والخروف اسود معضم وماالفرق مش كلهم بيجيبوا لينا اللبن؟ الداندرمة كورة محلية الصنع ماشاء الله اطفال السودان مبدعين...!! والبوش ده شنو كمان يمكن ماركة حاجة تستخدم في الصناعة, ورنيش؟؟ ياي سوسو قالت لي الناس في السودان بيشربوا موية لونها ابيض ما زي حقتنا وكمان ليها طعم؟يع....جورج قرداحي حقوا ينزل في سؤال المليون عرف القرقريبة؟ والله مايكسب زول الفكرة كانت في راسي زمن وكثر تأجيلها للتعديل والاضافة لاكن ليس أجمل من العفوية في الكتابة وهذا ما سأنتهجه ما قصة ولا خاطرة ولا الكلام الكبير بتاع الناس المشاهير ده دي خربشتي وحبيت أشرككم فيها فهاكم اياها مع الوعد بالاستمرار اسبوعيا الساعة 10 بالليل ومافي حس فس البيت حمودي و هبة ناموا ما عارفة في شفع الزمن ده يرقدوا حسي؟ ما عارفة ما قادرين يكتشفوا حل لمشكلة الشخير ده ليه مسكينة يا ماما ناس خالد بره كالعادة ما جوه الدنيا صانة ومافي غير ميشو في المستقبل ينطط ومسلسل آخر معاد في المصرية الواحدة في البلد دي كان زهجت تعمل شنو يا ربي امشي انوم زي النايمين؟ لأ أمشي أشوف منو الفي المسنجر. بس ناس منكوش وحيران عندهم الدنيا صباح بكونوا لسة نايمين مافي طريقة اضرب لمنى , حسي لو كان عندها موبايل ماكان احسن البت دي طايقة حياتهم كيف, انا بي ده كلوا مافي زول بيسألني ما كفاية المدرسة؟ أحييي أنا دي سيرة حسي ابلة فايزة بكرة توقفني تاني أحل ليهم المسألة هي ما عندها غيري قال قال عشان بتحبني ولا فطوم ومريوم منتظرين بكرة البراشيم في امتحان الفيزيا حسي ديل ما يزاكروا مذاكرة تنفعهم بس فالحين في الغش حفلة آخر السنة قربت وما عرفتا حاحضر هدايا شنو أخيرا الواحدة حتقلع المريول الكحلى وتلبس موضة وابقى في الجامعة يا سلااااام بابا لسة ما كلمني حنعمل شنو في حكاية الجامعة دي قالوا النتيجة الأول وبعدين نشوف حسي الثانوية دي حتفرق شنو من كل مرة؟ 98 وناقصة بس قي العربي والدين وزنقة حبة تكمل 99 لاكن انا شاغلة نفسي بالموضوع ده ليه معقول ما يقبلوني في الجامعة هنا؟ لا اهلي ما حيغلبوا واسطة أكيد, شوفي هم ليهم في البلد دي كم سنة ده منو البيدقدق ده؟ بسم الله!!! ده التلفزيون حسي القلب على القناة دي منو الناس صورهم نضيفة في التلفزيونات كلها وكان جابوا شحات بيلبسوه هدوم نضيفة بس يصبغوها اسود الناس في تلفزيون السودان ده كيف يجيبوا زول بيسفنجة سوري مع..... ومشققة وكمان بيتكلم بسرعة انا زاتي ما فاهماه. حسي كان صاحباتي في المدرسة شافوها يقولوا شنو ما كفاية اليوم داك نهلة العويرة تسألني في الساحة ببلاهة: انتوا عندكم عمارات في السودان؟ طبعا من الغيظ رديت عليها : لا بينوموا في خيم حاجة تغيظ مافي حاجة سمحة واحدة بيعرفوها عننا لا ميس فايزة بتحبنا وقالت أشطر بنات عندها السودانيات بس لاكن سارة دي فاضحانا برضو السودانية الوحيدة في المدرسة العايدة السنة غير اللبس والاغاني ما عندها شي كل همها العرس العويرة هم القروا لاقينوا زاتوا ...................... ...................... يتبع مع حنكوشة في الحلقة القادمة حنكوشة في المدرسة (عدل بواسطة zola123 on 11-15-2002, 02:46 PM) (عدل بواسطة zola123 on 11-16-2002, 08:52 PM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]