|
|
 ذلك البدوىالرائع : محمد طه الــقـــدال
|
محمد طه القدال
قال حميـــد
القدال وما أدراك ما القدال.. وهل أتك حديثه..كثيراً وأنا فى البلد يسألنى الناس عنه وهل هو شايقى وهذا مرده ربحا أن الشايقيه يكثر بينهم هذا النوع من الخلق الشعرى ، أولا لان قصائده جاءتهم ناضجه ومكتمله النمو وذاخرة بالمفردات والصور الشعبية الخضراء فدخلتهم هكذا كالماء ، أما أنا فأقول مافعله القدال في اللغة العامية يفوق مافعلته المشاريع التنمويه الناجحه بأهل القرى ، ومن يوم ما تزوقت طعم قصائده لم تكتم يداي لعاب التصفيق لها ، وتأكيداً لهذه الدلاله كنا فى الليالى الشعرية التىيشترك فيها القدال نأتى اليها وهى على وشك الإنتهاء لعلمنا التام أن القدال سيكون آخر من يقرأ والا وفشلت الليلة وانفض الرواد مبكراً ذلك هو القدال مع ذلك لا أحد يهتم
شملة كنيزة
القدال
الوادى البهل نوارو سجادة..
ومرق فى حوله .. فضلة خير..
اشوف يخب مع نسامو
جقليباً غلبنى قياسو
لا قالتلو تروح فى البلا الياباك..
ولا حنت .. وكت غنت حداها نفوس.
واشوفك فيها .. تمرقى من عرق ريحانها ..
تدحلى في التراب تندسى..
تاخديلك نعاساً حول..
وتطلعي تاني .. زي بهرة شعاع فجراوى..
فوق بادى الودي.. ناموس.
اشوف الروس ..تكربت في البلود الساحقة..
قت : شن لاحقة ؟؟..
ياقلب البلد .. يلقاك..
يا درب المدد .. يلقاني.
وين لاحقة النفس يا خية؟؟
شن غير النفس متماحقة؟؟
لا أرجاها لا ترجانى..
خلها للشجر تنسانى..
غلطان العليها يكوس..
ويبقى عليها ..
يا شملة كنيزة الواسعة
هى تلاتية .. لكن قدها رباعي.
***
نجمات الصبح شهدن على الما صاحي..
ما سلبني كفكيف دمعي يوم قلبني..
في جمرك يهب قداح
وما ترتاحي من تالايا ما ترتاحي..
غلطان البجيك مداحي
قم من نومي شفتك صاحي
ترجعى في الزوامل الهاملة
وقتلك تاني.. غلطان البجيك مداحى
قم من نومي شفتك صاحي
ترجعي في الزوامل الهاملة
دربك ضل..
دربك بالصراط متلاوي..
منها لا بتجيك العدلة..
لا من شك تتداوي..
ندهتك واقعة قناعتنا بين لومك وبين لومي..
حسبت البال..
ميقن عندى من زل العتر متروس
قبضت الايد .. أفتش وين قليبي!!..
الايد محننة .. والقلب متباكي..
من دون النقش مديوس.
نعلت ابليس ..
ندهتك تاني في سري..
ان صح المدد طالت..
بيصبح حسي كيف يغباك!!
ندهتك تاني .. لا تقنعتي لا هماك
زمازمك من صبيب جلدى..
ولهاتي الجلدة .. صبحت قدة من تالاك.
ولا اتقنعتي لا هماك!!
بالقفيتى.. ما رامي الدمع بتاً
ولا رامي الدمع بتاً
أعقبى الليل يطول واقصر
أعقبى البينا ايدينا البقت شمسية
نجمة ليل
أعقبى بلاكى.. شن ببقالي..
فيك المونة.. فيك الصرة مدفونة
وما بين الوحيح وغناي
وما بين الرحيح وجفاك
تضيق الواسعة
تصبح شملة .. هى تلاتية لكن قدها رباعي.
***
جانا منادي غنى معانا
من غبش الليالي الضامرة
ضارب نوبة..
سارب حسو للسدد مسامعه الطين
وضارب الغفلة هباعي.
وكت يا ناس مدن تبلع مدن بحالا.. تهرس ناسا
كرفتى الليل متل غرقان يجابد في النفس
قبلتي .. شفت الشفع البتجارو في عينيك..
رفعت ايدي لقلب السما السابع..
لقت ايديك
وكت يا ناس مدن تبلع مدن بحالا.. تهرس ناسا
عرفنا البينا .. حتحتنا النجم بغنانا
كان الصوت مرق واحدة
قلنا النوق متين دارت تصافع الجرة..
تهرج في الصقع ضراسا
عرفتي البى.. زغاريدك تصلصل
قلنا : كل ما امتداد يمتد .. نبني حواه..
كرتونة وزرايب ناس
ومتل الكان ضحك جواك
جفلت عليك قاصد صدرك اتحوابه
قعقع تاني
كيف يا فقرى تزرب بالعمائر ساج؟؟!!
ومتل الكان ضحك جواك
اقالد فيك تمسكي فى الضلمة ضراعي
يرجع للضلمة غنانا
وين كبر العمائم جملة؟
وين طول العمائر جملة؟
وين أناس.. غناياً للكضب والصاح.. مع غنانا؟!
غنوتك طايرة
شن بسويبا غير ما تبقى جداعي!.
و جانا منادي غنى معانا
من غبش الليالي الضامرة
ضارب نوبة..
سارب حسو للسدد مسامعه الطين
وضارب الغفلة هباعي.
يا شملة كنيزة الواسعة
هى تلاتية .. لكن قدها رباعي.
وأرجو أن نضيف فى هذا البوست من اشراقات هذا المبدع الرائع كما توجد بعض قصائده التى تغنى بها الراحل مصطفى سيد أحمد فى هذه الوصلة
http://www.sudanpoem.com/
|
|
 
|
|
|
|
|
| العنوان |
الكاتب |
Date |
| ذلك البدوىالرائع : محمد طه الــقـــدال | MXB6N | 03-03-02, 04:37 PM |
 Re: ذلك البدوىالرائع : محمد طه الــقـــدال | bunbun | 03-03-02, 04:45 PM |
 Re: ذلك البدوىالرائع : محمد طه الــقـــدال | nuba | 03-03-02, 05:42 PM |
 Re: ذلك البدوىالرائع : محمد طه الــقـــدال | abookyassarra | 03-03-02, 08:52 PM |
| Re: ذلك البدوىالرائع : محمد طه الــقـــدال | MXB6N | 03-04-02, 08:44 PM |
| Re: ذلك البدوىالرائع : محمد طه الــقـــدال | Elkhawad | 03-04-02, 09:10 PM |
| Re: ذلك البدوىالرائع : محمد طه الــقـــدال | banadieha | 03-04-02, 09:23 PM |
| Re: ذلك البدوىالرائع : محمد طه الــقـــدال | Nile | 03-04-02, 09:45 PM |
| Re: ذلك البدوىالرائع : محمد طه الــقـــدال | banadieha | 03-04-02, 09:54 PM |
| أوضعتم تخاجلنا | Ahlalawad | 03-05-02, 07:14 AM |
| Re: أوضعتم تخاجلنا | Nile | 03-05-02, 07:32 AM |
| Re:لووووووول أوضعتم تخاجلنا | MXB6N | 03-06-02, 11:12 PM |
| Re: Re:لووووووول أوضعتم تخاجلنا | bunbun | 03-06-02, 11:39 PM |
| Re: ذلك البدوىالرائع : محمد طه الــقـــدال | moslab | 06-04-02, 10:22 PM |
|
| |
فيس بوك
تويتر
انستقرام
يوتيوب
بنتيريست