|
|
|
Re: تعالوا جميعا لنوثق للسكة الحديد مع الذكريات (Re: بلدى يا حبوب)
|
قطر نيالا الصارقيل
وقف بعد ما هدّ حيلو طول المسير
قطر العيد دبل ونص . غالباً النص بكونوا من حملة التذاكر , وناس اللوج السطّاحة قاعدين إكرامية علي حيل المدعوة هيئة السكّة حديد .
حصّلناهو في كوستي , بعد ما ملتني المحطّة شجون الرحلة الزمااااان .
وساعة , القطر حرن هناك , السبب ؟ قالوا السكة حديد غطّاها تراب الخريف .
صدقوا أهلنا لامن قالوا سفر الخريف , واكل التفاتيف وزواج بت اللفيف كلو منو أقيف ,
ما وقفنا ووقف القطر , طيب والحل ؟ أحفروا السكة قدّام القطر , والمفروض يعمل الحاجة دي منو ؟ عمال الدريسة وديل تعبوا من غلب الماهية وطول الشهر المحصّل طول قطر نيالا في العيد .
بعد وساعة كم قرية في نأت عن القطر المدينة وحفظت بواقي الموية الطالعة من الحفاير بي شق الروح , جركانة الموية يوما كان بي تمن عتود أو عمبلوق , ما عندهم محطة قطر , بنطّوا في تكويعة في السكة بهدن فيها القطر , ما عارف المهندس العمل السكة قصد الحاجة دي ولا هم سكنوا وفق رؤية إستراتيجية بعيدة المدى .
وصلنا تندلتي , أول مدينة بعد طول العطش وحفّير السكة بي إيدينا , وبي الإنتاج بي إيدينا وباقي الشعارات .
منها أم روابة , هناك أكلنا الخرطوميين العيش كمان مرة , العيش المدوّر طارة , أو زي وشيها ام سماح رغم إني ما شفتها لكنها رسمت سماحا في الخاطر ورحلت قسراً زي قطرنا من أم روابة , ديمة اللحظات السعيدة قصيرة
في ام ورابة إتأكدنا من خبر وفاة أحد الركاب , نطّ من ضهر القطر , خبر من أول عربية عبر السطح وصلنا جوة ونطانا لي التالانا والبعد منها , القطر حرق , قطعوا نومتنا ولا حرق القطر عشان نستريح منّو ولا صبر المرحوم علي بصلتو تحرق شان يطلع هو ما غلطان لامن نطّ , بس هو غلطان عشان مرحوم .
الرهد
الرهد أب دكنة , الما شافها ما سكنا
أول تطمين إنو لسة في موية بتكفي ركاب القطر الآفة المتحركة كم سنة , الرهد مسكنا من ركبنا الميمون لو ما الباكم , والباكم هو خرطوش الهواء بتاع الفرامل علي ما أظن , بستخدموهو حريفين القطر كوسيلة إيقاف إضطرارية لامن القطر يفوت واحد رفيق ليهم .
أبو زبد
وصلناها في اليوم الخامس من رحلتنا من كوستي والسادس من لحظة تحركو من الخرطوم تلاتة . وصلناها جيعانين ودي من المرّات النادرة الكان طعم العصيدة فيها شهد ,
فجأة قالوا القطر بدا ينقلب بعد ما طلعت عربية الفرملة من مسارا , أهو عايشين .
بابنوسة المفرق , تلف يمين تاني سكة علي إيدك الشمين تصل واو , ولو لفيت يمين علي إيديك اليسار تصل حد الزهج من طول الإنتظار , بابنوسة شالت زهج الإنتظار وأهدتنا فرصة التسكّع في أرباعها الأربعة وكأّنو في أكتر من أربعة أرباع , بابنوسة جميلة جميلة جميلة .
ركبت في السطح بعد ما سمحوا لي ناس السطح بإعتباري ضيف عليهم في القطر , عالم السطح عالم تاني , فيهم الحافظ السكة حتة حتة وشغّال زي المنبه , في الشايف الدنيا بي عيون مسطولة , كان بلف في باقي السيجارة لامن شال الهوا من البرنسيسة دهبو الأخضر وهاك يا كوم تهكم وشتايم .
مرحباً بكم في دار رزيقات , جيداً جيتوا , الضعين , صباح اليوم السابع كنّا في الضعين , غادرناها صباح اليوم العاشر , عشرة أيام ولساتنا ببعدنا عن نيالا مرمى طلقتين دوشكة ورا بعض , محافظ الضعين قرر ترحيل الطلبة عشان يحصلوا باقي العيد , طلع فوج الترحيل في سبعة لواري محروسة بي عسكر الجيش , ورّونا جماعة في السكة خبر حرايق البرقت , غيّر السوّاق درب الكنفوي رغم الطين والخريف .
تالتة عيد الأضحى اليوم العاشر نهار , نيالا كانت عروس , شباب السد , الخرطوم بالليل , سكر شتت , حي الوادي , حي السينما , و و و, كأنها إتلمت في إستقبال القطر , القطر هناك موسم عيد صادف عيد أضحى , والقطر التاني برضو رسول الضو , بجيهم شايل الفيرنس , ولو عتر قطر الفيرنس لنامت نيالا ما شاء لقطر البضاعة الرحيل إليها هويناً .
بعد الرحلة ديك وقف قطر نيالا , كان سنة 91 , ويا دوب رجع بين الرهد ونيالا .
باقي دارفور شبه مفصول , مافيهو لا سكة حديد ولا سكة خشب , سكة صعبة بس , يا خريف يا نهب مسلح , لو حبيت تقضي حاجتك في خلا لقمت بتقديم طلب تسيير كنفوي معك إلى خلاك , خواف ربّى عيالو
ناس امدرمان محرومين زيّهم بس ديل كان عندهم تروماي ما حضرناهو والمغالط برسّل ليهو شهادة تسنين ومعاها شهادة تثبت صحة شهادة التسنين وإنها ما طالعة بي واسطة أو رشوة , أصلو حتى شهادةالوفاة بقت تطلع بي رشوة ما دام ناس الأراضي دخلوها في قاموس معاملاتهم .
انا ماشي نيالا , أووووواوووه
أبنوسي
(عدل بواسطة tabaldy on 06-19-2004, 00:23 AM)
|
|
 
|
|
|
|
فيس بوك
تويتر
انستقرام
يوتيوب
بنتيريست