عذابي معاك حروق من ليل علي صفحة وجع مزمار بتنزل ذي مضارب الشوق تخيم فوق صديري الشيالك زفه من مسدار محابر الإلفة طالت للرقاب غمرت مشاتل الريد والمكان من نار
عذابي معاك شروق من سادره كانت قاصده الدريب والهاله الفريع نديان ولهان عليك سنين دم القليب ساقيه من خمرة الشريان لا ضاق العذاب بعدك عذابي ولا عذابي معاك أنا لاقي ليه مكان أجمع في الحروف واقره أجمع في الحروف من عمق الندي التريان ** عشان أصور من عيونك لوحة مضمونه الهوى المعسول والحكمة في الإنسان لاشافه القدر قبلك ولا شفتو فيه جلا الواحد الديان مصور بي جمال حسنك مجمل بي جمال وصفك معلق في سما الوديان ظلال الغيمة حفاه غيوم الإلفه حضناه بيسبح فيها بحارة الواسعه ليه أمان **
عذابي معاك متين أوصل واغنيلك غناوي الفرحه والمشوار وأشيل الليل معاك بسمه بسمه قمر ضوه والنجوم سمار تحكيلك أطرافي البعيدة تتجاوب رويحتي مع رويحة الدار نبقى أنا والنجوم والقمره ديك واحده من خطوطه أكتب فيك أحلا أشعار
* مأخوذه من أغنية الفنان محمد الأمين ** المعنى مأخوذ من بيت شعر للبروفسر عبدالله الطيب رحيبت بحر إنسان السواد له مد وجزر وفي أعماقه شفق
عزيزي لوي أو يا شباب لو عندكم الأغنية أرجو أن تنزلوها مع خالص ودي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة