|
|
 عبير الماضى
|
.
عبير الماضي
كانت زهرة فواحة
يسري عبيرا في الآفاق
لي عاشق الوطن ترياق
تشيلو نسيمه سوَّاحة
وتورق في حجا الاطفال
حلم يتهادى بي الاشراق
وتلمسو بي حنان قلبك
ويسكر من رحيقا مذاق
قصاد عينيك مهاد نيلين
على بهو الجمال في عناق
خطوط تسحر من الإبداع
وتفتح للرسم آفاق
مفاوز للشعر إيراق
تغازل فكره لمَّاحة
و كل حرارة الأشواق
إطار فى لوحة نضـَّاحة
تشوف ألوانا زي عشاق
جمع بيناتم التاريخ
لماهم خدَّر الساحة
نقول غنواتنا بى حُـرية
في وطنية لي أحزانا سراحة
وكانت غنوة صداحة
مزيج الهام خواطر الناس
وكانت للكمال مقياس
تخاطب فينا بى إحساس
مشـاعر هايمة مرتاحة
ولون راياتنا مجتمعة
ترفرف بامتزاج ألوان
وتظهر للعيان راية
تترجم طلسم آمالنا
ولي أحلامنا شراحة
وكانت قمه تضوي منار
أهازيج للفرح غـّنت
تناغم دوزن الاوتار
وتعزف في احاسيس ناس
دوام الافه بيناتم
ورافعين السماحة شعار
وتجري البهجة في دروبم
تشق أنهار
وتضوي نفوسم الطيبة
بتسري خطانا في ضياها
علي بصمة أمل وافراح
وماشه تكمل المشوار
نردد في نغم حادينا
بي صوتاً قوي وهدار
وكنا نغني في اصرار
نفرِّح فيكي يا عزة
وبنرتق كل اوجاع الصديق والجار
وكان تنساب خواطر الناس
أهازيج روعة الاشعار
وضلنا من سحاب أمجادنا شايل الخير
ونازله العزة في كل الدروب أمطار
ونشوة عميقه تسرح في الفيافي تطوف
تعم أنوارا في كل دار
ومن أعماقنا
كان فرحتنا .. كان ضحكتنا
كل غنواتنا .. كل نماتنا .. والمسدار
وعمانا الِصِدقْ بوشاحو
نابت في الدروب أزهار
وكنا خيار
وكانت عزة لينا خيار
شربنا نداها وطنية
عزاز في حماها
عشنا شعادة في ضل غيمه وردية
شذاك يا عزة عم الكون
معتق بي الاصاله الفيك
سنين تنعشنا نفحاتو
مع النسمة الصباحية
وكانت ملحمة بنيان
مؤاسس روح جماعية
نشوف اعجابنا عند الناس
تشيلنا الهوشه ثورية
يزغردن البنات لينا
و بنعرض فى الصقيرية
نخطط في حلم باكر
تقيد في عزمنا طورية
نشق للموية تجري تسيل
تبل ريق البكيرية
تشوف نوارا حد ماتشوف
وآمال فيهو متكية
ونملا جروفنا بي الامال
عيون بتشابي للقمة
صروح بي العزة مبنية
مصانع بي عرق عمال
تدور ليلا ونهارية
ونحصد من أرض كانت
دوام بي العزة مسقية
نسامر يوم ندق العيش
على ضو ليلة قمرية
فرح أولادنا لي دروسم
نشاط قامو الفجيرية
نضاف متشنطين ماشيين
علي المكتب أفندية
طلق لي بخورو سيد كنتين
صدح دعوات صباحية
نجيمات سامرت ذاكرين
وغابت في الدغيشية
وكيف اصبحتو يا الحبان
حنين في صوت قميرية
وطلة جاره من نفاج
وشايلة القهوة بكريَّة
صباحات تبهرك إشـراق
تزيد في الالفة حنية
أماسى إتسـتــّفت ابداع
وهبة نفحة نيلية
مشاعر تعزف الالحان
تطوف بخيالك الاركان
تحس بي نشوة الفنان
وتكشف سر جمال ذاتك
وإشراقة صباح باهي
ومنور بي لقا الاحباب
وجوهاً فيها بصماتك
حاضناكم ضلوع النيل
وعايشين في جسد واحد
تحس في دموا نبضاتك
وتصعد في النفس إيقاع
عليهو بتمشي خطواتك
وكنا جميعنا نتكاتف
نتورب في نفوسنا الطيبة
نتوالف
وتورق بى لما الاحباب
وتزهر وردة فواحة
يسري عبيرا في الافاق
تشيلو نسيمة سواحة
.
|
|
 
|
|
|
|
طه حسن عبدالله
omar_ragab
فيس بوك
تويتر
انستقرام
يوتيوب
بنتيريست