يا دريمز إعتذارك مقبول قبل ما نسمعه،،وياناس الخرطوم سلام

نسمة في عز الصيف مرت وأبت قبل ما تغادر أن ترد إحتفائكم بها بدعوة لتناول العشاء والفرح والحوار يوم الجمعة في حديقة الطفل بدءآ من السابعة وحتى الحادية عشر مساءآ والدعوة موصولة للذين شاركوا يوم الإثنين الفات عندنا والذين إعتذروا والذين رغبوا وما طالوا ولا نالوا
يرجى التنسيق مع ناجي الزبير وعاصم الحزين و أنا


ويادريمز طبعآ حا نقبل إعتذارك وما تجتهدي في صياغته

يرجى الحرص على الحضور في تمام السابعة وسوف نترك لدى البوابة معلومات عن مكان تواجدنا داخل الحديقة

ناجي الزبير
يرجى الإفادة عن العدد المتوقع حضوره لأغراض التجهيز والتموين
انا على الجوال 0911132458

ناجى لما عزمنى عندكم امس

قال لى ابوساندرا مسافر بكره

قلت له خلاص لمن يسافر بجيكم


هو انت لسه فى؟ العيد ما عندك لكن


ااى " بتعتذرى "

Quote: لا مرة حاسبتك على عنف الهطول ..لا مرة حاكمتك على طول الفصول المجدبة

يادريمز ولله مشتافين كميات ..

ابوساندرا ..
انت تاني ماجاي السودان ولاشنو عايز تكمل الورا والقدام ..

وبالجد الإجازة عندكم

خائن خائن ياابوساندرا

دريمز:

لمن يسافر بجيكم ،
مش قلنا ليك ما تجتهدي في الأعذار ،غايتو المرة دي كان عملتيها ، تاني أصلو ما بنسألك

ملكة سبأ:
والله انا العندي كتير ما الإجازة فقطن بلغة ألسناجك أهلك ، وانتي أظنك سايرة في طريق النايرة ، شايف سجلتي ليك فرد إعتذار ، واحد لكنه قاتل خاصة لمن عرفنا إنك كنت قريبة مننا في الزهور ، وماكان فيها حاجة لو طليتي دقائق نغيظ بها ودقاسم لكن صحوبيتك مع الشليقة بت عم عبدون ضيعتنا!

المهندس:
نحن لو قلنا السبب الحمانا نوجه لك الدعوة حا نحرجك قدام الناس وهذا لا يليق بعمدة بورداب الخرطوم ، معقول يا هندسة ، طوالي { خارج الشبكة }


وإتصالات من أساتذة أفاضل تؤكد رغبتها في الحضور يوم الجمعة في حديقة الطفل الواقعة خلف عفراء مول جنوبآ في تمام الساعة السابعة مساءآ وشكرآ ل :
-كانتونا { كباشي}
الذي تلقينا منه هاتف حميم ونتشوق لي يوم لقاءه ، وفي الإتصال سألني ، هل انا ابوساندرا القادي البورداب بسيرة رشيدة والرسالة الخاصة التي تتحرش بالعام ،وأمطروها قصائد في يوم ميلادها ،وما كان مني إلا حولته لرشيدة وأظنه سوف يكتب البوست القادم عنها نيابة عني ، وذلك يوم 2/9 وانا ما عارفو قال ليها شنو لكن سامع ضحكات صادرة من القلب ، بيكون حكى ليها نكتة يا ربي؟!
-مامون عجيمي ،
الشاعر والأديب المؤدب ، كنا نرمقه بإعجاب مشوب بالحسد وبنات القاهرة الجميلات متحلقات حوله وهو مكتمل الوسامة وممتليء الجيب بالأخضر البلومي إذ هو قادم من الامارات محمل ومكمل ومجمل ، ومش بنات القاهرة الأوغلن بعيدآ في الشتات وإستوعبتهن المنافيء الباردة وفقآ {لسكلبة} رقية وراق ، بل وحتى ناس محمد محمد خير كانو ينتظرون مامون بفارغ الصبر والجيوب
إني أخشى حضور مامون يوم الجمعة فهو منافس خطير ، ويا ماو ماتجي إلا طابق زوجتك معاك ،لو جيت براك ،أهو ده العذاب إتحملوا ، بنطردك عديييييل.
-الإستاذ سيف عثمان : صاحب الصوت الجميل والقدرة العالية على التطريب الصافي
-الإستاذ قرشي منصور: رفيق أفراحنا ، رحلات وجلسات إستماع وسهرات وحفلات والذي وعد ان يغني لي يوم عرسي القادم ، وعد كذلك ان يحمل عوده ويدلف به على الساحات الخضراء الممتدة في حديقة الطفل

بالمناسبة سوف نستغل دعوة الكريمة منى لتكون الدعوة بمثابة وداعية للمحتفية بنا ، منى وللأخ عادل عثمان ولحضرتنا حيث سوف أعود لمنفاي الإختياري بعد يومين ، وإنشاالله ناس ود قاسم يكفوا حسدهم عننا

وغابت دريمز كالعادة وهذه المرة بدون أي إعتذار { مقبول}

- أول الحاضرين منى عوض خوجلي وآخر { المارقين} طلال عفيفي وما بينهما فواصل من الحكايات والغناء ومنافسة جمال
وراجعين بالتفاصيل

أخوات الشهداء:
___________________
عواطف ميرغني طه شقيقة الشهيد العقيد عصمت ميرغني
منى ومنال عوض خوجلي ، شقيقات الشهيد النقيب مصطفى

وأخوانهم نحن :
_______________
- السفيرجمال محمد إبراهيم ، البلوماسي المتمكن والكاتب القدير في سودانيات
-الدكتور مرتضى الغالي ،الصحافي صاحب العمود الجريء المقرؤ
-الإستاذ ابوبكر الأمين صاحب عمود سكناب ،والصحفي المبادر في الميدان والحرية
-المهندس عثمان أحمد عبدالله ، عراب بورداب الخرطوم الخطري
-الوجيه كباشي { صافي النور }
- الولد حسين ملاسي وسيارته الفارهة
-المهندس إسماعيل ميرغني : مساعد تدريس في الجامعة
-الدكتور السراج الذي شارك بست الودع ونافسني
-عبدالغني محمد الحاج

الفنانين الشرفاء
___________
-سيف الجامعة ، الذي غنى من القلب لأجمل منى { عوض خوجلي }
-قرشي منصور ، المشارك الحميم وفاصل من غناء طاعم وجميل
-سيف عثمان ، الذي رفض أن يغني في حضرة سيف الجامعة

والشعراء المعذبين
_________________
-عبدالله الزين ونص موغل في العذوبة
-ميرغني الماحي ،صاحب شكرآ لعاطف أنيس ، والذي شارك بصمت الحملان
-دكتور السراج وست الوداع

و أخوات شقيقات الشهداء
_______________________
- السيدة حياة زوجة السفير صاحبة الحضور المميز والحس المرهف
- مولانا رشيدة ، تيتا التي كانت وراء مشاعر دكتور السراج المنسابة شعرآ


و نواصل

حتى بعد التلفون ده كلامك برضو؟


عشان كده ولا زول فكر يجينى يوم الخميس!!


الله يسامحكم

المرة دي حاسبتينا على حرارة وعنف اللوم، والخرطوم بدونك ، إرتباك عام

ومن هـذا البوست

أكرر شكري لبورداب الخرطوم الرائعين

والشكر, مرة أخرى, للاستاذة منى عوض خوجلي, على الدعوة الكريمة

وللاستاذة غادة نصـر على ترتيب حضوري

وللسيد أبو ساندرا وأسرتـه وكل البورداب الحضور عشية الجمعة على طيب استقبالي


كما أكرر اعتذاري لضيق الوقت , ليلتـها


وتحياتي


أحمد الشايقي

Quote: وآخر {المارقين} طلال عفيفي

_______

دريمز:
مقلنا الإعتذار لازم يكون مقبول ، إنت قايلة نفسك خميتيني بتلفونك المقنع داك !
35 يوم في الخطوم وما تعبرينا وتعبري باب بيتنا ،
صيف العبور في الخرطوم.

احمد الشايقي:
بعد مارجعنا البيت ليل الجمعة جلسنا نستعيد في اليوم حتى طل السبت وبدأنا في تستيف الشنطة وتجهيز الفسيخ وبخور رشيدة الأخير ويا عين يا عينية ثم نهارآ إلى المطار والعودة للدوحة وأوجاع الغابات ، وهذا ما حرمنا متعة دعوتك لبيتنا وتوريطك في ملحنا وملاحنا والإحتفاء بك كما ينبغي ، وواضح إنو غادة نصر المتآمرة أخفتك مننا.

حسين ملاسي:
صديقنا أتاتورك البيرقش ، أبولمعة ، نرجوك ما تبوظ لينا علاقتنا مع أبوالنسب طلال باقي انا حاجز بتو لي ولدي في الرضاع قرمبوز

الخرطوم عندك
الله يصبرك يا رشيدة ..

الأخ الكريم (عمو) أبو ساندرا

Quote: احمد الشايقي: بعد مارجعنا البيت ليل الجمعة جلسنا نستعيد في اليوم حتى طل السبت وبدأنا في تستيف الشنطة وتجهيز الفسيخ وبخور رشيدة الأخير ويا عين يا عينية ثم نهارآ إلى المطار والعودة للدوحة وأوجاع الغابات ، وهذا ما حرمنا متعة دعوتك لبيتنا وتوريطك في ملحنا وملاحنا والإحتفاء بك كما ينبغي ، وواضح إنو غادة نصر المتآمرة أخفتك مننا]

ملحكم وملاحكم (زاد الأكرمين) وشرف صحبتكم أمنيتي

الأخت غادة نصر قامت مشكورة بترتيب حضوري, لكني - للأسف - لم أحظى بمقابلتها, مما ينفي عنها صفة التآمر

تحياتي