|
هام ..........علامات استفهام ؟؟؟
|
طيب ... وبعد ما النفوس هدت .... وربنا يتم العافية عليها تعالو براحة كدا نقلب المسالة كلها من قولة تيت ... يعنى من نقطة انطلاق عودة الراحل قرنق من منتجع موسفينى الرئاسى لغاية الشى المؤسف الحصل فى الخرطوم وفى بعض المدن التانية ... طيب .. الحادثة بكل تفاصيلها غريبة لكن قطعا الغرابة لا تمنع القدر من النفاذ والمقدور لازم يكون ويا جماعة دى مسالة ما فيها شك و لكن كدى نقول واول الحكى زى ما بتقول بتنا (شيرى ) انو الدكتور قرنق مشى زيارة فهمنا انها غير معلنة الى اوغندا وقد يكون مفهوم لسبب موضوعى او سبب خاص بالحركة الشعبية ان تكون الزيارة بعيدة عن اعين ورصد الحكومة السودانية عشان يمكن قرنق قدر انو زول صاحب حظوة ومعرفة كويسة مع يورى موسفينى وبالتالى اى كلام وتفاهمات تتم بيناهم راس ممكن تكون مفيدة من حيث النتائج واريح فى الاخد والرد لانو هم الاتنين فرد واولاد دفعة وكدا لكن مش غريب انو الزيارة دى و فى نفس الوكت ما كان فيها اى زول تانى من الحركة الشعبية لا فى الصورة ولا فى الرفقة والحضور !!! يعنى وبتوضيح اكتر اذا اصلا قرنق مشى زيارة خارج السودان بيكون من المنطقى والبدهى انو يسوق معاه زول مختص من ناس الحركة بالبلد ولا موضوع الزيارة ... يعنى المفهوم بيكون انو مثلا اذا سافر زعيم من بلد لبلد تانية وعاوز يركز فى الزيارة على مسائل امنية فبيكون الزول المهم هنا بعد الزعيم الشخص الممسك بالملف الامنى او الدفاعى فى التنظيم المعين وعلى دا قس وقارن يعنى اذا المسالة سياسية بيمشو ناس السياسة واذا اقتصادية بيمشو ناس الاقتصاد .. طيب الراحل جون قرنق كان ماشى يوغندا واكيد كان حيناقش مع موسفينى اشياء كتيرة ما ممكن وما منطقى يمشى يناقشها بس بالحرس بتاع الحماية ... وين مسئول مخابرات الحركة ووين المستشار السياسى ... قصة غريبة!!! زيارة بالحجم دا وبالحساسية العالية والتعقيد الكبير لازمات يوغندا فى جنوب السودان من قوات رب واحتياجات مستقبيلة اقتصادية وغيرو يزورها قائد الحركة الشعبية بدون اصطحاب اى من مساعديه .. ولا واحد ... اذن فالزيارة ربما لم تكن مخفية عن الحكومة وحدها ولكنها ايضا ربما كانت غير معلومة لناس الحركة نفسهم ويبدو وبصورة واضحة انو قادة الحركة الشعبية نفسهم فجئو بالزيارة ويمكن عرفو بيها بعد نزول قرنق فى اوغندا وربما بعد تبادل الاتصالات بين موسفينى والسيدة ربييكا ...
نواصل
|
|
|
|
|
|
|
|
|