|
|
 Re: مساهمه اولى... ديون الشعر والفم/ومدّاح نبات الليل (Re: محمد عبيد الفاضلابى)
|
يا حوا بتزيدي الحطب
شأن تكوي بالنار الرماد يا حوا بتزيدي الحطب
شأن تكوي بالنار الجمر
يا حوا يا بت الضليل
شن خبرك بيه الهجير
والحر بيعمل بالعرق
قطرة بتسيل..
شاقاها أرصفة الأنوف
بتصارع الخد الندي
شأن تسد الفلجة
في وسط السنون
عابراها ما بتقطع
تذاكر للسان
والطعم جان
لم عسل الدنيا
أتربع علي طعم العرق
شفتيه كيف عرق الغلابة
البمسحوها الدنيا
بي بسمة وخريف
يا حوا أية بتعرفي
عن بلادا
أصلو ما مطريه وين
كايسلها أنا
من سنين
واللأ أوصف لك
طريقا ومشيتا
أمشي الجنوب
تلقيها في نصف المهوقني
لا بسالا ..
توب بابأي
مطرز بالحرير
واللأ أقولك
خليها في حر الجنوب
امشيلا عن موز الشرق
تلقيها تشرب
قهوة البن
المضللة بالجبال
واشربي ما تخجلي
قهوتك مدفوع حسابا
من رصيد توتيل
ملايين الدراهم
والدنانير الحلال
واللا امشيلا
الشمال
تلقيها في الرطب
المكتف ايدو
لا من ولدو عيسي
ومستعد أحميها
ست الناس
إذا ما الناس
تعدو واستعدو وفجأة
قالوه المقال
واللا امشيلا الغرب
يمكن تتوهي عن الدرب
لكن مع الدهباية
ما أظن تلقي خوف
وغوصيها أمواج الرمال
وبرضو ما أظن تلقي ريحتي معاها يا بت الحلال
يا حواء يا بت المواعيد الغلط
يا حوا يا بت
المواعيد البتنزف
دم عبيد الرق
حفيانه
وكتين السياط
مشتاقة لي
وسط الضهير هيمانه
العايمه في نص النهير
نشوانة
القاطعة لي حبل
القلب
الواصلو ديما
هوي الضهير وهوانا
ما بتخجلي ...
ما بتخجلي...
قاطعاه مصراني
الملتق من لحم عضم
النفايات المعتقة
من شهور
وقاعد بفتش
في مثلث خوف كبير
كل البراهين
العرفتها اشتكت مني
استحقت فيني
حق الأمر
يا نص السراب
والعمل
اعمل شنو
قالتلي بي صوتا
خفيض
خت نقطتين
فوق بعض
سك الدروب
عضيها عض
ولما يلفحك البرق
امشيلو ما تخشي
الرعد
وشكرا علي كل
النصيحة الفاضلة
والشاربة من نوحي
وغناي
بس للأسف سافرت
فيك
وقطعت مليون تذكرة
ما فارقه يا ست المواعيد
القبيل لا من
سألتك عن بلادا
اصلو ما مطريه وين
في الحق نسيت آخر وصف
يمكن يساعدك في الزحام
والالتحام
شوفيها في الطير المهاجر
كان تطرز للحبيب أجمل حرير
يا حوا ودعتك الله عليك الله احمدي الله الفارقك قولي وغنائي
وآخر المطاف والانصراف الحق بقولا وبختما
ما بتشبهين ولاني شايف فيك سر سري
المصافح لي حشاي
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست