|
|
 مليون باب
|
بسم الله الرحمن الرحيم
مليون باب
وانا واقف في باب الحق
بطرق طرقة المغبون
اجيني صوت اقولي منو ؟
بقولوا الشعب
وشن داير ؟
بدور الحق
نفسي
اكون مرتاح
من شيل الهم
كدر الغم
بريد أصبح أفندي صغير
في حكومة سكة الغلبان
او عسكر في سلك
الديش او البوليس
أعيش مهموم
أموت مديون
الم لي غلة الشفع
واخر عرق الحلال بالايد
أكون تربال
أكون زبال
أبيع موية
أبيع سكر
ابيع لي لعب أطفال
اعلمهم شنو الانسان
شنو الطيبة
وشنو الاخلاق
منو الصادق في حق الشعب
وكت الدين يكون يافطات
تحارب الدين
تكون كافر ابوك ملعون
اهيم مغبون أشكي لي
حجارة الارض
أشكي منو ؟
أشكي السادة والاحباب
ولا الخلفاء والاحباش
والاوباش
و الشيخان
وناس عرمان
علي الله
البجبركسرة المسكين
يقولوا سلام نقول مرحب
يقولوا حرب نقول مرحب
يقولوا ثوار نقول مرحب
يقولوا الثورة في ابريل
نقول فجر الخلاص
جانا وبقا المخرج
طلع أوهام
وتاني بقينا في
صراع السلطة والانسان
*******************************
خلاص يا ناس
فترنا من كلام الغش
ناس تهتف
(سلم وما بتسلم)
ولا سلم ولا مولانا ذاتوا سلم
(وثورة ليها ماية عام )
والسكة تمد ونحنا نمد
ولا وصلنا لحد البير
ويبقا الحال هو نفس الحال
وكت فرج الخلاص قرب
يجيب الحق
شالوا الحق
خلاص يا هووي
متين يصبح صباح الشعب ؟
متين يبقا شرف البنات مصيون
ومد اليد لحاجة الغير جرم أكبر
متين نكتب خلاص أبييض سواد الليل
متين ننجم من السلطة ومن الأحزاب
والهتيفة والعسكر
متين يصبح عليك أيام
تكون مبسوط
دواك مجان
وشافعك اقرا بالمجان
يكون جيبك ملان بقروش
ولا يسكن في بيتنا الهم
*****************************
فترنا خلاص
فترنا خلاص
من الشحده
من الاخوان
من الديان
من الكهربجي
واللبان
والجزار وسيد العيش
بقا الواحد اكوس لييهوا جناح
عشان يدخلوا لبيتوا عزيز
ولسة السادة والخلفاء
والزملاء والاحباب
وناس عرمان
يتصارعوا في
السلطة
ونحنا زيتنا طلع
خلاص بترول
حرام يا ناس
نبيع اولادنا ضهرية ؟
ولا نتاجر في ممنوعات ؟
واطرق تاني باب الحق
اجيني الصوت
انته لسة في الابواب ؟
اقولوا اكيد
مدام الحال هونفس الحال
أسيب حقي
وحق الناس
أبيع ارضي
أبيع عرضي
مين القال انو الحق
ليو بابين
اكيد للصدق مليون باب
باب الخير
باب الرافة بالمسكين
باب مفتوح
لا بقفل بامر الوالي
ولا العالي
متين يا ناس
يسكن في بيوتنا الود
ويفرش في ظلالنا الوعد
وننسي سكة السجان
والاخوان والشيخان
نكتب في بيوتنا كلام
من التوراة ومن القرآن
نقول يوم الخلاص قرب
ويرجع تاني اسماعيل
يرفع راية استقلال
ونتحرر من الطغيان
والسجان والبمبان
والهتيفة والعسكر
نقولوا سلام
سلام للحق
سلام لعامة السودان
سلام للشرفاء
والطيبيبن
سلام ممتد
سلام ممهور
بدم الشعب
والمسكين
والتربالي
والغناي
سلام للغد
سلام للمد
سلام للنيل
سلام يا طابية امدرمان
سلام بحري
سلام مروي
سلام سنكات
سلام مدني
سلام ملكال
سلام دارفور
سلام لي وحدة السودان
**************************
وتبقي أبواب الحق مفتوحة
ولا سجان ولا عرمان
ولا خلفاء ولا زملاء ولا شيخان
ويبقا الشعب هو الشعب
والحرية مكتوبة
في باب الحق
6-11-2005
محمد أبوالقاسم
|
|
 
|
|
|
|
محمد ابو القاسم
فيس بوك
تويتر
انستقرام
يوتيوب
بنتيريست