|
الحبان بكرى ابوبكر واعضاء وزوار هذا المنبر الجميل 0000وساعة الزمن المستحيلة
|
انت التى فى خاطرى انت اول انت ثانى انت ثالث انت رابع 00000 نافرة زى صيد الخلا وساقبة زى نبع المنابع 00هذه انت وهذا انا طيف مسكون بالحب والرجاء والالق 00التقيك بجمر الضلوع لاصنع منك ترنيمة من الغناء والشعر المهذب الجميل لعاشق مجنون يأتيك من ذاكرة قصية وانت قبس من البهج المريح 00سوسنة تتفتح على نداوة الطل وحكاية اثيره ووثيره 00موشوشةومؤنسة تطوف على المدارات الساكنة والمتحركة 00طلح نضيد يجلب الدفء والطمأنينة والسكون على امسيات العاشقين والمبتردين 000انت ما احلاك تخرجين بكل الزهو والخيلاء والتفرد والتمرد تخرجين من عام الى عام تكملين الاول الندى00للثانى الغض00للثالث االنضر 00للرابع العطر وهو رقم القوة ومكمن الشدة والجبرة والبأس 00وعامك الثالث يتثاءب نستميحك عذرا ونستأذن محبيك وعشاقك الكثر ان نخطو بك على بوابته العتيقة وناصيته الركيزة عبارة للذكرى تتضمن اعترافا وانعطافا نحو القلب 00محبة ندوزنها 00ونقفيها00ونجملها 00ونغنيها سجعا وتطريبا 000ننمغها باحلى الكلام ونوشيها بعطر الفؤاد ونزينها بسحر الحروف00سماحة00 وزيادة00 وريادة 0000 ندسها لك بين الجلد والمسام لتنامين عليها حتى اطلالة عامك القادم بالفرح والجمال والبهاء تزفك الانفس الولهى !!!! وانا بيكى مالينى الكلام 00حركت بيك عصب السكون 00لا السكة بيك بتنتهى ولا معاك مليت طواف 0000 ايها العزيز بكرى سيد الدار عالى المقدار كل عام وانت بالف الف خير فلولاك لما كان هذا ممكنا 0000 كل عام وانت بالف الف خير احبتى سادة الزمن الجميل 0000 كل عام وانت بالف خير اعضاء وعشاق وزوار هذا الصرح العالى 000000 كل عام وتاء التأنيث ونون النسوة التى تشاركنا هذا الموقع الراقى بالف الف خير00000 كل عام وجمع المذكر السالم بهذا الموقع السامى بالف الف خير0000
همسة:0000000000 فقط امنحونا ساعة اخرى خارج مدار الزمن الماسخ ولتكن بعد نهاية هذا العام وقبل بداية العام القادم0000 اقتطعوها من اى مكان او اى زمان ساعة فقط 00 بين عامين غير منقوصة من هذا او مضافة لذاك 000ساعة من سنين العمر الندية فى اطلالتها العذبة لننشر فى المكان كل تلاوين الفرح وننثر عليه قصائد عذبة آسرة تنداح عبرها رمزية البوح المستحيل 000000000
نحن نقول بصوت واحد كل عام وانتم بخير يلا نقول بصوت واحد كل عام وانتم بخير والســــــــــــــــــــــــــــــودان بالف الف الف الف الف الف الف الف خيـــر
الخرطوم عصام الدين محمد الحسن ابو وضــــــــــــاح
|
|
|
|
|
|
|
|
Re: الحبان بكرى ابوبكر واعضاء وزوار هذا المنبر الجميل 0000وساعة الزمن المست (Re: essam&amal)
|
الغالى ابو ساندرا
اتمنى ان يتسكع ابو ساندرا الغالى معى فى شوارع الخرطوم وما احلاه من تسكع معه الاحساس بالراحة والانتماء ونتنفس الهواء النقى ما رأيك يا ابا ساندرا . سؤال والاجابة بأمانة شارع الديوم الشرقية ده ما أحلى من أى شارع فى العالم؟ طيب مدام ده ردك يا حبيب ما تجى نتسكع سوا ومعانا ناس ساندرا وماهيتاب وشيماء . وكل عام وانت بالف الف خير00
العزيزة ام وضاح
كل عام وانت بالف الف خير ايدى على ايدك للاستقرار على ارض الخير والعزة بلادى . ودمت يا الغالية
عصام الدين ابو وضاح
| |
|
|
|
|
|
|
Re: الحبان بكرى ابوبكر واعضاء وزوار هذا المنبر الجميل 0000وساعة الزمن المست (Re: essam&amal)
|
سلام
ابو وضاح ده لو سألناه يسأل ابو ساندرا سؤال ويجاوب على السؤال براه ويقول لى ابوساندرا مدام ده ردك تعال اتسكع معاى امكن ابوساندرا ما عاجباه شوارع الديم . يا ابو وضاح كيف عرفت اجابة ابو ساندرا ؟ لكن ما عليك دى اجابة اى سودانى فى الغربة.
الاخ ابو ساندرا ابو وضاح حتلقاه فى مارس وابريل و و و و لحدى ديسمبر لأنه من شدة كراهيته للغربة والسفر رفض ان يرجع الامارات عشان يلغى الاقامة ويأخد مستحقاته رسل لى الجواز لاجراء اللازم واللحاق بالركب فى بلد الخير . وكان لى اولادى يا ابو ساندرا عندهم مرض اسمه السودان ما بحبوا الغربة ابدا الله يديهم العافية ويديك العافية انت والاسرة الكريمة ونعيش كلنا فى بلدنا الحلوه .
امال ام وضاح
| |
|
|
|
|
|
|
Re: الحبان بكرى ابوبكر واعضاء وزوار هذا المنبر الجميل 0000وساعة الزمن المست (Re: essam&amal)
|
اخواتى واخوانى لكم التحايا
ابو ساندرا 0000 سيطول التسكع الى ما شاء الله كما اخبرتك ام وضاح وما احلاه انا فى انتظارك .
المهندس 00000 الراقى ابو شنب مهندس ( بفتح الدال طبعا ) ورودك راقية زيك بس عطرك ارقى منها لنا لقاء.
ايهاب الحبيب وانت بالف افل الف خير وعلى امانيك باذن الله .
بكرى سيد الدار لك التحايا والود يا الحبيب والله يقدرك علينا ويديك العافية وشكرا على الهدية يا راقى . تحياتى للاسرة الكريمة .
بلقيس ملكة سبأ وملكتنا كلنا لك التحايا ياغالية ولنا لقاء عن قريب
احلام كل عام وانت بالف الف الف خير ولك التحايا مع امنياتى بعام خير وبركة .
ام وضاح هنيئا لك ولى بهذه الكوكبة الراقية من الصديقات والاصدقاء والله يلم الشمل يا عزيزتى 0000
عصام الدين ابو وضاح
| |
|
|
|
|
|
|
Re: الحبان بكرى ابوبكر واعضاء وزوار هذا المنبر الجميل 0000وساعة الزمن المست (Re: essam&amal)
|
الاخ الفاضل ابو ساندرا
والله نتمنى العودة جميعا والقرار اكتر من ساهل يلا نقوى قلبنا ونتذكر بلدنا السمحة ونشد الرحال وانا مستعدة رسل لى الجواز واخلص ليك الاجراءات لو كانت فى السماء الاحمر المهم ترجع للاسرة الكريمة تامى ولامى .
الحبيبة رجاء لك التحايا وكل عام وانت بالف خير يعنى انت غربتك اخف مننا عشان المصريين ديل اهلنا وجزء مننا وبلدنا سمحة وحلوة وعزيزة وغالية . يلا مع بشائر السلام نشد الرحال0 لك الود
امال ام وضاح
| |
|
|
|
|
|
|
|