|
عايـز .. أشوفك فـوق ..
|
إن ظننته الأبنودي ، فقد ذهبت شمالا متجاوزا (دغيم) وما جاورها .. فإن تماهيت مع حميّد فكأنما يممت وجهك جنوبا ً .. فرجاء قف عند هذه المحطة فقط .. فهو الشاعر الكبير صلاح دهب فضل .. ولعلها من المرات القلائل التي يكتب فيها ( بالعامية ) فأشتهر بلغته الفصحى الجزلة القوية .. كما أن له الكثير من الكتابات النوبية ( التي لا أفهمها ) .. فهنا الهم واحد إنه الوطن وسؤله الكبير .. من المسؤول ؟؟؟
أشـــــــوفــك فــــــوق
حبيت أشوفك فوق بين الندادة بروق ضيَّك هلال أب طوق . قدام أحد وأقيس والقاكَ ما مسبوق حدِّيتْ شمال وجنوب دقيت لك البابين وين انت يا المحبوب في الميس وخط الروق ترمح بميدانــك
حبيت أشوفك فوق نسر الفضاية أم قوس ليك الجناح طيّارْ مَدَّد فضاكَ مسارْ عَلّم سماه طقوس . حبيت أشوفك نور الفرع رامي ضرور النخلة طارحة تمور ما ضانّة سعفة وخوص
بس السؤال محبوس ليه لسة نعسانين والخلق ما نايمين صدر الخلايق مالك غايب بفتيانك كوم البطاين فوق فوق ليك وجدعانك
لو كنا جدعانين أنحن لو واعين لو كنا بنايين بدل الخبوب والطين قصر المعارف شانك
لو كنا ما غافلين درب العمل ساسقين زي الرجال واقفين ما كان سكيكنا ملام ما حردة جارّة كلام الراي تلف في كام ما كان دمومنا تسيل توِّارة ما بتخيل ما كان جنوب وشمال ما البندق البشَّــال ما الغش بلحية وشال عينك ويـا تـاجر تسولَب الاحـلام والجا بِمحارينا قام فينا شيخ وإمام
ما كان ولسه الكان ليه الدمومة تسيل "بلكن" رخاص يا نيل حقرونا ناس شايلين بدل القلم سكين ولدك هو المكتول مكشوف ضهر مسكين من أصلو ما محصون محروم حقوق إنسان مهدور دِمَا ومطلول ما فيش حساب معمول والكان حيبقى امكان
لو كنا آه من كنا قوَّمْنا ركن السنة سوّينا شي وكرَّبنا فد حاجة واحدة عملنا ساس الثقافة حفرنا مدماك وطوبة ولبنة كان البلد دي بلدنا موعودة ليها الجنة بس ليه وليه ما عملنا ليه القضية خسرنا شان بدري ما أنجزنا
واللَهْ السؤال محنَّا مين ؟ مين هو المسئول ؟ أول ، صراحة أقـول أنا ده أنا المسئول وأَتَنيِّ هو المسئول تالتنا انت وانت سيد الشهادة الدكتر بروز وعلقها منظر وانسلَّ قال أنا مالي
ديل السبب يا بلدنا نحن السبب يا بلدنا الرّيَّسُوا الدبابة مرات تلاتة قُرابة ما شادوا ليكَ مهابة عرفة وثقافة وطابة ما عرفوا صحرا وغابة إلا القبيلة ويابة وخلونا نحلم وبس كيفن نَحِِتْ دي خرابة نبني الثقافة صُحابة لنهوض حقيق بصلابة
حبيت أشوفك فوق حبيت أشوفك قسماً وربي
صــلاح دهب فضل مسقـــــــط
|
|
|
|
|
|
|
|
|