|
|
 خيمة الضهب الجميل
|
قرررربت اكتب عنوان البوست (خيمة مساطيل الشعر الجميل) وغيرت رأيي لاني الأسبوع الماضي القريب ده،، انفلقت بطوبة فانعوج الجانب الشمالي الجنوبي من الراس،، خفنا على خط الوسط فآثرنا السلامة واخترنا عنوان البوست بطريقة لا تؤذي المتحيلين.
والسبب أن هذا البوست في وادي، والجميع في وادي تاني خالص
في الأحياء الممعنة في الشعبية، تجد ناس الشكل وناس السياسة وناس طالعني الخور الخ الخين تلاتة الخات،، ومع ذلك يفضل المسطول مسطول، لا يمس ثقته في نفسه واطمئنانه المسطول شعرة شكلة واللا مصيبة واحدة
فلما نأتي بمثل هذه الكلامات التي نويت أن انشر (بناء على رغبة صديق يعني البت مهمة وكده) في هذا الزمن الكلو حواجب وشكل،، يبقى في الأمر شبهة سطلة.
وانا اشهد أن هذا النوع من الشعر (الما عارفة حاخلص نقة متين واكتبه) يجعلني اشعر بالسطل الرهيب ولا علاقة لأي (مسمار) بالأمر.
------
سيب دلالك
من أغاني أواخر العشرينات
واعتقد أنها لكرومة
سيب دلالك لقلبي جيب
يا المفدع أمرك عجيب
الفي عمري الأوشك يغيب
زورني في الطيف خوفي الرقيب
تلقى صبا في هواك رغيب
مرة يفصح مرات يغيب
داوي جرحي الما أظن يطيب
غير عصير الشانية طيب
المزمزم عنبه الرطيب
لو ضاقه أبكم يصبح خطيب
(قيل أن للشاعر أحمد الزين بيت شعر يقول
(لو مساهم فم العبير لحلت كل معقود)
وقد نال هذا المعنى إعجاب أدباء وشعراء ذلك الحين، لكن المعنى المذكور وتحته خط قد تفوق على هذا الشعر بمراحل عديدة)
دي ما انا القلت كده ده تعليق قريته كده
(انظروا بالله لهذا الجمال)
بين عوامل النوح والنحيب
واضمحال الجسم الشحيب
أنا شوقي فات الحد يا صحيب
الدلال والتيه الرحيب
بهواي الدايما غشيب
بي حقيل الوجد العشيب
بسناك أب برقا يشيب
قاسي هجرك شيبني شيب
الله الله الله
|
|
 
|
|
|
|
|
|
|
 Re: خيمة الضهب الجميل (Re: بت قضيم)
|
لوووووووووووووووول يا بت قضيم
المساطيل في نعيم
اسمعي البوست دا مالو التقول كاتبه دكين
لوووووووووووووووول
والله بهظر
ما تجيني طوبة هسي
بعدين الخواف ربى عياله ياختي
| |
|
|
|
|
|
|
|
|
|
Re: خيمة الضهب الجميل (Re: الجندرية)
|
قضاضيمو .. شو أخباريتش؟
ممكن استعين بيك في شوية تثقيفات كدي. محسوبك فايتة عليه المصطلحات دي.
كلمة ضهب دي قريتها في البورد ده كتير خلاص .. واتعقدت منها .. لأني والله ما عارف المقصود منها شنو. عدم معرفتي جات متأخرة شوية .. لأني في أول مرة شفتها كنت قايل معنا دهب (ذهب يعني) زي ما أهلي بيسموا الذهب بالـ ضهب .. والذرة يسمونها ضرة .. قياساً على الذال التي تقلب ضاداً في عاميتنا .. زي ضنب . فهو ذنب .. وضيل .. فهو ذيل .. ضكر .. فهو ذكر .. وضبانة .. فهي ذبانة (ذبابة في الحقيقة) .. وهيك. الشيء الذي عقّد خالك شنتير هو هذا الضهب .. لانو ليوم الليلة اهلي بيسمّو الذهب ضهب .. والذرة ضرة .. والقرد ككو أو عبلانج .. والقهوة جبنة .. والقضيم قضيم. أها عليك الله عشان ما أسطح .. أشرحي لي الضهب دي معناها شنو. والله يا بكري فضحتنا فضيحة .. هسع أكان في مسنجر .. كان انزوينا أنا وبت حاج قضيم دي برانا وشرحت لي الضهب الطلّع نخاخيشي ده.
وربنا يقويك .. ويديك طولة اللسان
أخوك الـ ما عارف الضهب
| |
|
|
|
|
|
|
|
|
|
Re: خيمة الضهب الجميل (Re: alfatih)
|
بت قضيم
عاطر التحايا على فتحك لهذه النافذة الجميلة في هذا الزمان الاغبر.
عاوز اقول شنووووووو؟
ايوااااا
دخلت عشان ادعو اخوي صديق الموج للدخول هنا و..اقعد بي مزاااااج اسمع.
وبس.
| |
|
|
|
|
|
|
|
|
|
Re: خيمة الضهب الجميل (Re: سجيمان)
|
سجيمان
ازيك
يعني مسوي نفسك شاطر؟ انا لا عايز صحبتك ولاحاجة..بس في شي عايز اقولو ليك..
لقيت ايميلك وحاضيقك عندي..وين حتهرب؟؟
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
صباحات السعادة
ضهبان ابن الضهبان مرحبا بك
شكرا لحضورك الكريم ونوعدك بانسطالة من النوع ابو كديس
خليك معانا
جندرية يا بتاعت المشاكل
هووووووي أخير ليك
بكتب بوست بقول فيه (أطالب بفصل جندرية لانها اساءت إلى شعوري الجندري ووصفتني بواحد ملحوس اسمه دكين)
إكمني مزعمطة يعني؟؟؟!!! هقارة ده سنو؟
بعدين الطوبة قد تأتي من حيث لا تحتسبين يعني ما تخافي مني انا براي
وما تمشي جنب الكوشة يقال أن قاطنيها الشواطين الصحي شواطين يسكنوا في كوشة كمان سودانية عدمانة حتة العضمة.
صورة زول صاري وزعلان هنا
شنتيروش
الحمد لله من قبل ومن بعد
اخبارشنا بخيرش نشكرشه ونحمدوش (على النفس الطالع ونازل ودي بالسوداني)
الفعل ضهب من ضهبان وهي ليست ضهب من ذهب،، تماما كما الضورار من دولار يعني
(طبعا انا ما مقتنعة انك ما عارف ضهبان يعني شنو لأنه ليس فعل مستحدث بل هو قول موغل في القدم واحنا اتفقنا انك عمو)
يقول الواحد (والله الليلة انا ضهبان) يعني تعبان،، لكنه ليس التعب العادي بتاع الناس ده، بل يرفقه هفتان في الروح ،،وحراق روح،، وطلعة نفس سريع،، او كما قالت بت قضيم الأصلية يوما (واااي انا جسمي خف،، واااي انا راسي لفا،،، واااي انا بلعت السفة)
يحس معاها الواحد أنه قرررررب يلاقي ملك الموت
وهو شعور يقارب شعور صيام يوم في رمضان السودان في عز الصيف الساعة خمسة مساء قبل الاذان بساعة واحدة وبعد رؤية جك الليمون الباااااارد في التلاجة
أو لو لم تجرب ذلك فهو تماما كشعوري عندما استيقظ من النوم اشوف المرايا واكون نسيت اربط شعري بالمنديل بالليل
الله وكيلك الرجل المقصات زاااااتو (بتعرفوا؟؟.)
أظن الشرح مستوفي حقه
بعدين ربنا لو اداني بعد ده كله طولة لسان ما بكون دخلت جينيس من أوسع الأبواب
بتهزر دي طولة لسان وصاية مش أي كلام
منتظرة المشاركة الفعالة يا شنتش
الفاتح
من يوم بوست الشعر الحلمنتيشي (متذكر؟؟) وأنا اقول كل يوم ارسل ليك القصائد التي احفظ سواء في الراس أو الكراس
واقوم انسى الخرف ما ما كويس
إلى أن قفلوا المسنجر فوق راسي ولا شعر حلمنتيشي ولا حتى صحن رز بي لبن نقدر نتبادله مع الجيران
فاعذرناواللوم يقع على الخرف والخرف دي ما من خروف حسب تفسيرات شنتير خليك مصحصح حتى لو كنت مسطول
فتحي الصديق
البوست ده حقكم
فهلموا وانسطلوا بالشعر الجميل
سجيمان
انت دخلت لانك مسطول
بالله اعترف هداكم الله واصلح تلفزيونكم
مايا الصديقة
المهم يكون قونقليز بالشطة
كل ما يخص المساطيل له طعم مميز،، وربما ذلك أكبر دليل على أن لكل وجه سلبي وجه آخر إيجابي
وطبعا انا اتحدث عن سطلة الشعر وليس سطلة شئ آخر بكره يطلعوني حشاشة
خليك معانا
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
يا بت قضيم لو سمحتي بلاي بس اشرح لي صاحبي دا كلمة الضهب دي
واتخارج طوالي...بشرحها ليه بي الكلام البعرفو...
يا شنتيييير
اها الزول الجائي دا ضهب
ود الدينكي بالحسكه وذمامو نتقله
نوّختو ولقيت من قام عليه فتقله
دخلت الضل وجد ناسا يهبو ويقلو
واجب الشخص يأمر بالسلام ويعدلو
ما فضلو الا يقول واجب الشخص يقعد ضهب
فهمتها والله ازيدك...وبعدين للناس التانين عليكم الله الهاءات دي كلها الفي آخر الكلام تقروها تكنها واو.....وواو يا قول الخواجات
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
بت قضيم ازيك...
خيمتك السمحة دى اوع تكون من خيم (المساعدات اللوجستية)
دكين الايام دى بنعمل ليهو (updating )
شايفو حادر ليك..
دمتى يا انيقة
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
والله لو ما الواحد خايف تقولو عليه كيشة كان أقول ليكم والله لسة ما فهمت ضهب يعني شنو؟ لاكين مع كونو كزاليكا ... قال عبيد عبد الرحمن
فصود في خدود يضون
وخدود بدون أمارة
يرسلو نور ملون
أحمر أخضر أصفر
فاتن يا سمارة
حبيبي آه
قلبي تاه
في يوم الزيارة .
المناسبة هي عدم المناسبة .. وأهديها للخطيبة العارفة نفسها ولجميع الأهل .
كلمة فاتن يا سمارة دي من كيس أهل العوض كونو الكلمة الأصلية ما متأكد منها
| |
|
|
|
|
|
|
|
|
|
Re: خيمة الضهب الجميل (Re: Ahlalawad)
|
أهل العوض وشنتير دي حنكشة جات على كبر واللا نعتبروا خرف ما عارفين يعني شنو ضهب؟؟؟
إذا انا المراهقة الحنكوشة دي عارفاها انتوا يا اعمام كيف ما تعرفوا؟؟؟
بعدين بالنسبة للقصيدة خليني انا زاتي اتحنكش واتساءل
خدود بدون أمارة كيف يعني؟؟؟
بعدين
يرسلو نور ملون
أحمر أخضر أصفر
هم إشارة مرور أم هم وجوه إعلانية لأيف سان لوران؟؟؟
ثم قلبي تاه في يوم الزيارة
هي الأخت كانت مريضة؟؟!!
نرجو الإفادة
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
نزار يا ود حسين ، مخييييير مع ناس نيفاشا :
علم الرى ظهر شتلو البموح ومكاتبو
ود الدينكا دخلو وجاهو ربو مفاتقو
الحامينا قلبنا فى العشق ما نعاتبو
سامعين يا جمل قيس ليلى حبها ماتبو
| |
|
|
|
|
|
|
|
|
|
Re: خيمة الضهب الجميل (Re: Ahlalawad)
|
| Quote: هو ضهب ما عرفها حيعرف ذي الهندي بتاعك ده؟؟!!! |
يا بت قضيم...امانه ما يعرفو عرفه....
يا اهل العوض....وكت قلت كدي...والله حقو الزول يشرحها ليك...
ناس ميفاشا...تراهم كل مره يأجلو...وسببهم انهم زاتهم من المناطق المهمشة
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
من أغاني اواخر العشرينات برضو
نظرة يا السمحة أم عجن
لو كان قليل تبري الشجن
أعرف صفا الأيام أفيق
أنظر جمال تلك الوجن
دولات صدودك ما رعن
الآم وبي اتدرعن
أبكي وأصبح متضرعاً
يا ناس دموع عيني ترعاً (طلعت عينه)
واحموني ما رضني الظعن
آمالي جور لي قاطعن
احشائي هديل اتقطعن
بالفرقة نشابك طعن ( ذي يا بعد كبدي بالخليجي)
يا منبع النور والفطن
يا الفقتي يعرب والوطن
في جوفي حبك قطن
يا جاهلة مليون ألف طن (دي الجندرية بتعمل لينا فيها ملاحم)
كيف أسلي عينيك والوجن
يا البسمتك نور الدجن
جمسك حرير ناسجه العجن
ناضر وباللون انعجن
الضاوية زي خديك من
في الدنيا يا نور الزمن
أرواح نسايمك لي رمن
نرجس مزج مسك اليمن
محلاك يا الجيدك شدن
يا العمري فيك ضايع سدن
أنا عندي شوفتك يا اللدن
أفضل من الروح في البدن (مبالغات هندية طبعاً)
يا منبع الذوق آه يا من
حبك غرز في الجوف كمن
يا غالية قط ما ليك تمن
إن هب أو جار الزمن ( هاا ،، كرسي جابر بجيبها)
ليك السلام ما ولعن
خديك بالنور يلمعن (وابور جاز بس)
وعدد النجوم ما يطلعن
يرضيك وبيك لي يجمعن
حاشية
ما تحته خط هو موضع السطل الحقيقي بالنسبة لنا
| |
|
|
|
|
|
|
|
|
 Re: خيمة الضهب الجميل (Re: بت قضيم)
|
في ( ضب ) جا الاول ..ابوهو اشتري ليهو حيطة..
قطامه .. بون جووووووووووووووووووووغ ..
جنك تلمي الناس الحلوين في بوستاتك .. العاملة كيف دي ما عارف..وبعد داك تقومي تاني تخرمي بيهم .. إلي حيث ما شاء الله ..
( الضب ) الفوق داك ..اخو الفار الدقاهو الفيل بتاع المرة الفاتت في الحفلة..
يا بت قضيم ..
ياخ راسنا ده بنخسر عليهو قروش الدنيا والعالمين .. حلاقااات .. وشامبوهات .. وجاز ابيض
خلينا نكون في الصورة .. البوست ده بتاع ضهب .. والا بتاع ناس بتتعاطي ( القشة ) بدلا عن الشوكلاته
تحذير هام جدا ..
النكته الفوق ديك كان لقيتك قاشرة بيهافي بوست .. بشتكيك لي بكري .. انا الايامات دي صعب جدا قايم علي حق اهلي
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
تمبس الكمبيوتر هو المسطول برضو؟؟؟
قالوا المسطول جا نص الليل البيت شال السيجارة بدل المفتاح وبحاول يفتح بيها الباب،، لما ما قدر قال (الباب ده جن واللا مالو؟؟)
عملاتك يا تمبس
وبعدين البوست ده بتاع كلو تقدر تعتبروا القطر قام، لكن الأولوية لمساطيل الشعر النضيف
النكتة سنقشر بها سنقشر بها
انسى بس
يا مسطول
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
| Quote: أهل العوض وشنتير دي حنكشة جات على كبر واللا نعتبروا خرف ما عارفين يعني شنو ضهب؟؟؟ |
بش قشّيم شلام عليش (السنون وقعن يا بنيتي)
المسعلة مي حكنشة .. وي مي حنكشوووووو. وحات سيدي الحسن قبل شرحك ده ما كنت عارف معنى لكلمة ضهب غير دهب .. أها شفتي الوَدْرة دي؟. أخيراً اكتشفت انو اختلاف اللهجات في شبه القارة الهندية هو سبب هذه الودرة (روحة يعني) لانو نحن في بنغلاديش كلمة ضهب الشرحتيها دي هي كلمة ضِهاب (بفجْخ الضاد وشنق الهاء) في إقليم البنغال وتورا بورا .. والفلوجة.
يعني بالله ضهب هو ضهاب؟ ربنا يجزيك خير على هذا الدرس الخسوسي .. ويطوّل لسانك يوصلو محل عينك ما تشوف
دعيني انزوي قليلاً لأجغم السبارس المعلومة .. وأكان الله جابني راجع بجي تب
وتصبحون على خيرين ونيكولا زيادة
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
بت قضيم
قايلانى بنسى انا ؟
قلتى لى بمشى واجيك راجعة ومن ديك وعيك لحدى ما بكرى
لحق البوست امات طه يعنى وداهو الارشفة بتاعة 2003 م
بعدين عندى سعال مخسوس يعنى
امات طه ديل هن مشن وين ؟
ملحوظة
كتبت ليك بوست استلابى من كلمة مسطول ميكانيكى
شفتى توارد الافكار دة كيف
الله يخليك لينا يا بت قوقو
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
عمو شنتير
Quote: دعيني انزوي قليلاً لأجغم السبارس المعلومة .. وأكان الله جابني راجع بجي تب
|
يعني نفهم من كده أنك بطلت السعوط؟؟!! والله الحنكشة تب ما تختاك
عفارم عليش
منتظريتك
الفاتح
والله هم بكونوا مشوا مشوار وما جوا تاني راجعين،، لأنهم مساخيط كطه أبنهم الذي لديه بدل الأم الواحدة مجموعة أمهات ودي ما حصلت إلا في تاريخ الأمثال السودانية.
لو تركوا لي التفسير، أقول أن طه ده كان (غلاوي) ولدوه التسعة وتسعين سرية، كما تقول القصة الشهيرة (قصر هندية) لو بتعرفها يعني ولو ما بتعرفها أحسن باقي قصة أي كلام.
وين البوست الاستلابي؟؟؟
معليش ما شفته والعتب على الحوص
ثم ويخليك لينا انت كمان مليون مرة
رجاء مرة واحدة رافعة لي البوست؟؟؟
كتر خيرك يا ذوق،، بس عايزنك تشاركينا بكم سطلة شعر شكلك بتكوني مدكنة أكيد مدكنة أو أقول ليك ،، ما اتعبك معايا،، ادينا واحد من الجماعة الستة وخلي الباقي عشانك،، وما مشكلة الشعر ملحوق إن شاء الله يطير الشعر يطير يعني شنو؟!
تسلميلي يا صديقة
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
يا بت قضيم
ما ضهبت اقول لقيتك ...اقول لقيتك
انت في كل.......
والمغنين المطاليق
دا غنوها لي خيمتك دي....فتشت ليها البورد ...بي ساق فار
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
بدأت بسم الله في أول الخبر
وأحمده حمداً يزيد لمن شكر
ثم الصلاة تترى على الذي
له المنصب الأسمى على سائر البشر
وتتلى بتسليم يفوق على البها
ويزكوا على صفوف البهائم والوبر
وآل وأصحاب كذا كل تابع
وتابعهم حتى نقوم من الحفر
وبعد
بركة الجاكم سالم يا شنتير ويا أهل العوض
بااااااالغتوا
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
من أغاني الثلاثينات برضو وانتشرت الآن قريباً
أنت عارف أنا بحبك وبحلف بك ولا ماك عارف بالمرة
إنت صارف عني مدة
وأنا خايف تتحدى
أنا خايف
متى نبدأ التعارف
والتآلف والمودة
يا حبيبي من فضلك
جاملني وطاوعني
لا تخالف واحدة مرة
أنا شايف
أنا شايف المحاسن .. الطرائف
في صمتك في كلامك
في عيونك في ابتسامك
في خدودك في قوامك
إنت جالس .. إنت ماشي
إنت واقف .. إنت نايم
صغير غرير الطرف حالم
ماك عالم .. ماك عارف
أنا طرفي جفا المنام
آلف الحب والهيام
مع الجمال بالعواطف
في هواكم استمر
إن رأيتك بالقرب مني
يسعد أظني... هل تدري إني
أحس بعظمة وشان كبير
أكاد أطير من الفرح
والأمل أحيا وأخالف المسرة..
متين أصادف
رضاك عليّ وعلي توالف
هواي مناي حياتي حبك بالمحبة
بلاك أشوف النور ظلام
وأذوق طعم كل حاجة مرة
زورني مرة
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
إنصاف
عوض جبريل
غناء للتاج مصطفى
يا روحي انصفني فى حكمك
لانو قاسى على انا يا حبيب ظلمك
تنصفني والايام قد تنصف الانسان
تشاهد المحبوب عفوا عيان وبيان
بالنسبة للطفك والرقة يا فتان
ما كنت تظلم من قد اضحى بيك ولهان
تتركنى للماضي مع انو في الامكان
تجدد الذكرى وتنسى كل الكان
هيامي بيك يا فاتن مصدرو الانصاف
انصفت حسنك حب وانصفت طهري عفاف
ذوبت نفسي معاني دقيقة الانصاف
هومت نفسي خيال في معبد الطواف
سكبت روحي على كأس المحبة سلاف
هل بعد ذلك اكون لسهام عينيك أهداف
أنا يا حبيبي غرامي تركته للايام
تركت حب ودموع تركت شوق وهيام
عودت نفسي اذاما اشتدت الالام
اصبر على الهجران واضحي بالاحلام
جنة هوانا العذري ندية الانسام
تخلى نار الشوق بردا على وسلام
يا روحي أنصفني
الله يرحم التاج مصطفى وعوض جبريل
| |
|
|
|
|
|
|
|
|
|
Re: خيمة الضهب الجميل (Re: بت قضيم)
|
والله يا شنتير ... تقول شنو ؟؟ الملافاة دايما بترمي سيدا في الغلت ... نقلتها بي ضبانتها .. من بكان ما .. الكبر يطير ... والشفقة تابعاه .
| |
|
|
|
|
|
|
|
|
|
Re: خيمة الضهب الجميل (Re: Ahlalawad)
|
أم القَـمَّـد الحِيل وانهَمَر وانْهَضَّ
رّقّ حَشَاهٌ .. واصبح زي سُوار الفَضّة
هَبَرولْها الفَجُر حِسْ الحَوَرَّن جَضّ
فاقْراً حاوَش اللّذّان بعد ما اتوضّا
خلي قضاضيمو تجي تشرح الكلام ده. قالت حنكشة!! يحنكش راسك.
| |
|
|
|
|
|
|
|
|
|
Re: خيمة الضهب الجميل (Re: Shinteer)
|
بسم الله ابدا مستعينا
وتسليما على ابن الصالحينا
سلام عدده مائتين وألفا
ومضروب بمثله أربعينا
وبعد
يحنكش راسك انت
هسه ده ما كلام واضح ذي الشمس
قال ليها
أم القَـمَّـد الحِيل وانهَمَر وانْهَضَّ
عادي،،قال ليه يا أم القمد الحيل تعمل شنو؟؟ انهمر مش كده وبس كمان انهض
ثم
رّقّ حَشَاهٌ .. واصبح زي سُوار الفَضّة
ضعف واتعولق وانسلت روحه
ف
هَبَرولْها الفَجُر حِسْ الحَوَرَّن جَضّ
هبرولها الفجر لكن ذي حس الحورن جض
ثم
فاقْراً حاوَش اللّذّان بعد ما اتوضّا
قوم اقرا
هسه دي ميشكلة نعم انه؟؟؟!!!
هاك النونية دي
ياالجبرة المازجة العجن
جبينك ذي فلق الدجن
وجسمك بالطيب انعجن
إذا النسمات بيك عرجن
طباق الجو يتأرجحن
والأنفس يتهيجن
يحنكش راسك انت
هسه ده ما كلام واضح ذي الشمس
| |
|
|
|
|
|
|
| |
بت قضيم
الجندرية
Shinteer
alfatih
فتحي الصديق
سجيمان
tmbis
Raja
فيس بوك
تويتر
انستقرام
يوتيوب
بنتيريست