نعم يا استاذة ملكة سبأ
فرحنا قعادك إنتي قاعدي هنا..الدار دارك ونحنا الضيفان..مرحب بالأستاذة صاحبة القلم الرفيع الطاعم الذي ينقل لنا الواقع وكأنه ماثل أمامنا.. وقلمها الذي يذكرنا.طين الجروف وأحاجي ابنعوف( يا مسيكة الكتلو أبنعوف
أممن الحامداب من الخوف
ضربو بين الدوش والصفوف
ضربو بالمرتين أب ظروف
عاشة للعميان إنتي شوف
وا حلاتا لبينة الضيوف
.......................
أو ان يقول
تمساح دار جروف............ يا بلالي أنا
دا ما بيعرف الخوف............. يا بلالي انا
الغللب اب نعوف..... يا بلالي انا
...................
ما نقص تموك....يا بلالي انا
وما رووح جابوك يا بلالي انا
يتمك خير ابوك......... يا بلالي
........... سيد الفي الحفير
........... وسيد شتيل البير
...........ما مسوي الغفير.... يا بلالي انا ترا العشمان يشيل..يا بلالي انا
.........
لي ( قوشابي) صاح
سيد الفي المراح
...............
........... إتفضلي لا جوة يا استاذة ملكة سبأ.. أشربي معانا( شاي المغرب الصاموتي..مغلي فيهو حرجل جروف الحامداب) وشوية محريب اخضر محشور في الكفتيره... ما إنتي ست الجلد والراس..عايزين منك كم مساهمة من بيت الكلاوي.. ما عندي كلام معاكي غير كدة.( أمسك لى واقطع ليك).ما إنتي خلاص حششيتي تمرك..( حش التمر) ذلك البوست الرائع منك.الذي قد كان بحق كما وصفه القراء هو بوست الموسم...شايفة الأمثال السودانية دي كيف( ست الجلد والراس) أو ( بيت الكلاوي)... او ( أمسك لى واقطع لك)أو اقطع ليك بلهجة ناس العاصمة لمان كانت عاصمة...شايفة الأمثال السودانية دي كيف كلها ما فاتت الخروف.......المهم كدة كدة يا استاذة مطلوب منك رد الجميل.ما بعرف مشغوليه.. ما بعرف غيرو...شوفي لينا حاجة.من قش الجروف.. أو من حش الصيافي.. أو النقح والحفر والبوغة..أو الدميري..أو دق العيش.أو النوريق....أو طلليقة الغنم البدرانيي.خلاص عيد الضحيي قررب عندنا خرفان مدوعلنهن.من زمن عيد الفطر.ونحسب ونعد في الشهور..الكرامات إتنين.الضحايا إتنين.الوحيد سايق الضحايا.قصيير..وتراها شهورنا نعدها كدي.التمر طبعاً حشيناهو عرسنا بيهو لى حسن اخوكي.. أما الخرفان المدوعلات ديل عايزين نعرس بيهن في العيد الكبير لى سيد احمد.. عايزين نشحن لوارينا بالشرق وحس طنابيرنا على مسجلات اللواري والبكاسي تعططر عقبة الجابريي.. الجابرية.. بالغرب لغاية سوق بلالة في نوري
وبالشرق نشحن خرفانا للعيد الكبير نقطع بيها عقبة الكاسنجر لى سوق كريمي او كريمة. السوق عطشان باقي.. عندنا اخونا سرالختم دا عندو ميتين خروف مدوعلن.. قبل ما يغررق جروفو الخزان.. ويرحل الملتقي.عايز يبيع خرفانو ديل..أما نحنا ترانا بعاد للليلي مافي غراق..
شوفي لينا حاجة طالبنك جميل يا استاذة.ما بيغلبك الحجا والحكاوي..وتراني هنا انا قاعد...( يلاحظ اني اضععف الحرف المشدد لتوصيل المعني للقارئ فقط.وذلك لتعذر التشديد بالحركة.آسف لذلك)
(عدل بواسطة منصوري on 01-06-2004, 08:45 PM)
(عدل بواسطة منصوري on 01-06-2004, 08:48 PM)
(عدل بواسطة منصوري on 01-06-2004, 08:51 PM)