الفاتح جبرا .. في ذمة الله
نعى اليم ...... سودانيز اون لاين دوت كم تحتسب د. الفاتح يوسف جبرا فى رحمه الله
|
|
 Re: الجـرى دا مـا حـقّى (Re: Ali Alhalawi)
|
حبــاب الأصـدقاء هنا..
زايدين ماني ناقصين .. ( و هذى دعوة العيد عند أهلنا .. يتمنون أن تزيد الأمة و ما تنقص تب .. و في بعض الشروحات .. تذهب الى زيادة و رجحان في البصيرة .. و الله اعلم .. لكن الشاهد انها دعوة حميمة)..
و بعد ..
خلوا بالكم يا جماعة .. اخينا بدر ده من من ناس قبيل ( و ما اندر ناس قبيل) ..
بخصوص المشية من بيتها لبيت جارتها التي قال بها صديقي المــلا ..
زمان ايام الجامعة(و احسب أن الملاعمر يذكر ذلك جيدا) .. كان عندنا شارعين في السنتر .. المين رود ..و شارع النشاط .. لمن تجي ماشي في شارع النشاط العجاج ما يديك الدرب .. طرابيش .. خرابيش .. و ما خفي ما بينهما من سجون الكفل اياها .. و معروف أن رواد شارع النشاط .. لا يغشون شارع المين روود الإ في جنح الليل البهيم .. حتى قال احدهم ( جني جن المين روود وكتين يبقى مرتع للدواب السابلة و هايمة في اخر الليل) .. و كان يقصد المتسللين من شارع النشاط..ولا يجوز المتسللات .. و ذلك لحكم
the late permission .. حيث ينعدم وجود المتسللات في ذلك الوقت .. الإ اذا فضل عليهن المزاج بحفلة لعركي ولا زيدان ..ولا عثمان حسين .. و لا بواقي اسبوع ثقافي..
اما المين روود ( و أنا كنت من الذين ييقطعونه ركضا خوفا من تشويه المنظر العام فيه) .. فلقد كان مرتع للنواعم الملس ( يعني زي بنات تلس السمحات و ملس و اكتر شوية كمان).. ما ان تأتيه من البوابة .. و الإ تملأ خياشيمك النسمات الرقيقة من شــاكلة ( مع النسيم العليل ..زادي وجدي ) .. أو كما قال .. و في الحتة ديك يا بدر مافيش سجن الكفل .. غابة من السيقان اللامعة .. تماما مثل ما غنى بابكر ود السافل باٍخلاص ما بعده اٍخلاص ..حين قال شفتا عيوني في سيقانها .. ما شفتوها يا خلاني)..
مرت قلت لصديقي جبريل المجنوني .. و كان فيلسوف .. في كل سفة يرميها تسقط نظرية .. و في كل اخرى يكورها تقوم نظرية جديدة .. قلت لجبريل هذا ( خلى بالك الطبيعةذاتها بتعرف تعمل تممييز عنصري .. و الإ ماهو السبب لأن تجيب النسيم العليل في المين روود .. و تجيب العجاجة في شارع النشاط) .. صمت جبريل قليلا ( كصمت الفلاسفة ) و قال ( الوساخة بتجر الوساخة .. تماما زي فكرة الدم للدم بيحن .. و لمن تلحقوا تعملوا جزم زي الناس .. ما ح يكون هنالك سبب لإثارة الكتاحة ) .. ثم أطرق و قال ( و لمن بناتكم .. بنات شارع النشاط يعرفن كيف يمشن ..مشية ترقص الطبيعة على ايقاعها المنضبط .. ح ينتهي دهر الكتاحة بلا رجعة)..
و كان رواد المين روود يعرفون بالحناكيش .. و رواد شارع النشاط بالخناشير .. و الله اعلم ..
اللحظة الوحيدة التي يختلط فيها الحابل بالنابل و تحصل شكة بين رواد الشارعين .. حينما تحدث كعة كاربة و السيخ يمــلأ الجامعة ( و السيخ من أردأ العادات التي مارسها طلاب جامعة الخرطوم على مر تاريخها العريق)..في تلك اللحظة .. يبقى الجري ده ما حقي ..
لكن الشاهد ايضا .. و هو ماثبت بالوقائع و الممارسة .. أن الحناكيش ليهم انف تشم العنف في جحره .. و عادة ما يتخارجون بسرعة .. و قلت لجبريل ( ناسك ديل فزر ساكت.. قولة احم ساكت .. تلقاهم اخلوا الجامعة حفاظا على ارواحهم و سلامة ممتلكاتهم .. و ما تبقي من خلطاتهم ) .. فيقول جبريل رضي الله عنه ( ده حقد طبقي .. الناس ديل على بالحرام فايتننا ضحوتين في الفهم و اٍستشعار الخطر .. ثم ثانيا .. ليه يموتوا الحناكيش ولا يتعوقوا.. انت اللـه سواكم لي شنو ؟ .. اها يا كبر .. باقي ليك نفسك بترضى ليك تتعوق حنكوشة بدرب عنفكم البلا فهم ده ؟ ) .. صنقعت و دنقرتا وقلت لجبريل ( افو أنا اخوك يا يالسمحة .. و يسمعن بنات ياتو داك ما بعرفو .. حرم حنكوشة ما تتعوق اٍلإ فوق اجسادنا .. الحنكوشات ملح الحياة .. و الله يخليهم لينا .. يسون لينا الدنيا دي طاعمة و مليحة ).. و الوكت داك يا الحلاوي .. كنا من ناس (وروني العدو .. و اقعدوا فراج ) .. عشان شنو؟ .. عشان نقنعو ليكم لمن يعرف حاجة .. أو نوريهو المكشن بلا بصل .. أو حتى نجوم القايلة ذاتها ..
غايتو جنس فياقة ..
يوم في واحدة من تلك الكعات .. الجماعة بقوا رقاق .. و أسلمو سيقانهم للريح .. بوابة المين روود بقدرة قادر من المدافسة انطرحت أرضا .. و هي تنوء بما تحمل من السواعد المفسحة دربا للنجاة .. و الوكت داك ..لا جرداق ..لا دوبيت .. و لا شعر حماسة ما نفع .. أها قامت واحدة نجيضة ( يتخيل لي من بنات كلية الآداب) .. و فكت ليك الزغرودة .. على اليمين يا الحلاوي .. العالم دي رجعت رجعة تيران الجواميس ام رقاد جخ .. و كرت ليك في الكيزان كرة عدوك ..
بعد ما الأحوال هدأت .. قال جبريل ( و اللــه يا طلبة الجامعة حيرتونا و حيرتو العلم ذاتو .. يا خي زغرودة من واحدة فايقة .. تجيب أجلكم؟) .. الغريبة انا اتحمقت و قلت ليهو ( فايقة كيف يعني؟ .. انت الزاغراد ما بيأثر فيك ولا شنو؟ ).. و لغاية الليلة .. كن حصلت جرية .. و جابت جنبها زغراد .. يانا المتنا كرديس .. ربطة جرجير عدييل..
و الجري يا ســادة ، كما البشرية ، أنواع ..
شيخي و استاذي المــلاعمر كتب:
| Quote: وأقصد في ذلك أن يكون للرجال كروش تحد من حركتهم ولا يستطيعون معها الجري لا بل المشي وببطء سلحفاي. |
و تقول كده تجيك واحدة حكامة نجيضة و تقطع فيك الغنا و تقول :
بطنك كرشت .. جلدك خرش مافي
دقنك حمست .. و غية البنات مابي ..
و الحكامات يا صديقي ، كما تعلم ، لهين عين شـــوافة خلاص .. و هن ترومترات مجتمعات بعينها ..
غايتو نحن(في باقي ايامنا مع فلسفة عندو شفع بربي فيهم) مالين الدنيا فزرة و جري دقاق .. و عزاؤنا .. أن لا حكامات في ديار عيال جون .. و الواحد لغاية هسع ما قادر يتخيل حالو كيف .. لو صدف يوم جات (جرية طايرة كده لا قدر اللــه) و قدامك حكامة من اياهن .. و في بلد الغربة طبعا أي ســوداينة حكامة..
و نشوفكم في ضي المسامرة من تاني
كبر
|
|
 
|
|
|
|
|
| العنوان |
الكاتب |
Date |
 الجـرى دا مـا حـقّى | Ali Alhalawi | 07-26-05, 03:41 AM |
| Re: الجـرى دا مـا حـقّى | المعتمد | 07-26-05, 10:15 PM |
| Re: الجـرى دا مـا حـقّى | Kabar | 07-26-05, 10:38 PM |
| Re: الجـرى دا مـا حـقّى | almulaomar | 07-27-05, 01:05 AM |
| Re: الجـرى دا مـا حـقّى | سجيمان | 07-27-05, 02:49 AM |
| Re: الجـرى دا مـا حـقّى | almulaomar | 07-27-05, 08:32 AM |
| Re: الجـرى دا مـا حـقّى | بدرالدين شنا | 07-27-05, 10:59 PM |
| Re: الجـرى دا مـا حـقّى | Ali Alhalawi | 07-28-05, 03:03 AM |
| Re: الجـرى دا مـا حـقّى | بدرالدين شنا | 07-28-05, 05:18 AM |
| Re: الجـرى دا مـا حـقّى | Ali Alhalawi | 07-28-05, 06:07 AM |
| Re: الجـرى دا مـا حـقّى | almulaomar | 07-28-05, 05:43 AM |
 Re: الجـرى دا مـا حـقّى | Ali Alhalawi | 07-30-05, 04:44 AM |
| Re: الجـرى دا مـا حـقّى | Kabar | 07-28-05, 03:29 PM |
 Re: الجـرى دا مـا حـقّى | Ali Alhalawi | 07-30-05, 06:07 AM |
|
| |
Kabar
فيس بوك
تويتر
انستقرام
يوتيوب
بنتيريست