إتَّ والحكومة دي وناس كُتار عقلياتُم امنية سخروك إتَّ وغيرك دايرين تعرفوا الحِراك دة بقودو منو لي سبب بسيط وواضِح وجلي عشان ما نلِف وندوِر علي بَعض !!
عشان تأشروا بأياديكم اها شفتوا داك فلان من ناس عبد الواحِد ، وشفتوا اهو داك عِلان شيوعي ، وداك من ناس الحركات ، وبيها بتفتكروا إنو كِدا ممكن تحاصروا السودان دة الخرج كولو ضِد الحكومة دي في اشخاص وأحزاب ، دة مسعي خايب ومفضوح والعالَم دي مِفَتِحة ومُدرِكة لي مسعي زي دة ، واهو الليلة دي كُل اساتذة جامِعة الخرطوم اكبر جامعة سودانية ورؤوس سهم التطور والمعرفة في السودان خرجوا عليكم ، وإتَّ قاعِد تِتمَحرك في محطتك دي الصادِق المهدي ، ورشا عوض كَتبت ورشا قالت !!! نحنا يالطاهِر التوم ما أقصينا الصادق دة ومقالات رشا عوض في دفاعا عن الصادِق ما حُجَة علينا وما بِهِم دمانا السالت دي كان كانت رشا بتاعتَك دي حِزب أمة ول من بيت انصار ، !!! نِحنا كُلَّ العملناه إنو نِحنا عَرَينا انتِهازية الصادِق وقلنا الصادِق دة خيار المؤتمر الوطني عشان يلقي ليهم مَخرَج من ضغط الشارِع الطلع دة ، وعمروا كلوا الصادِق دة يا حبيب ما شفنا منو خير عَدَّاهَا لينا كلها تفلحون، تقومون ، وترتدون، وتلبسون، وتأكلون قروش المؤتمر الوطني !!!! وتَمسِكون مَظَاريف عوض الجاز !!!
بتو برة معاهُ وولدو مع الجلاد في كرسي واحِد مِخَمِسِنو ، والتاني مع صلاح قوش ونحنا نِتلَفَتَّ ...!!!
فتحنا خشمنا قولنا لا ، فَقَعُونا بالرصاص زي الطير وصادقك دة ورشا عوض دي ساكتين سِتة والجوكر ، وعادي بالذبادي ، في دي بوخة مرقة ، ودي حِنة عَزَبا ، ودة وجع ولادة .. ودمنا دة سايل جرررررررررر في واطاة الله دي ..!!!
واصدِقك القول والله انا لغاية الليلة دي ما عارِف حكومة السجم والرماد دي مشكِلتا شنو مع اخوانا ناس دارفور ..
وَتَساؤل مَن وراء الثورة دي ؟ دة خلط ساذِج وسطحي ، وقراءة فذلكة ساكِت وفيها تجاوُز وقُصرِ نظار في تقديري ..
لانو إتَّ دة ساعة تركب طيران الإمارات وماشي دبي وغيرك ماشين ماليزيا وسويسرا بي -دِلالاتا - ما اظِنك بتسأل كابتن الطائرة دة منو ؟ وحتي كان قالك انا كابتِن جون شنو يعني ؟ حينفَعَك بي شِنو !!
ول إتا عايزو يقول ليك انا الصادق ود ود الفَحَل مثلا ؟ عشان تقول كِدا تمام !!
يالطاهِر بتشيل تذكرتك وتقرأ نمرة كرسيك تخت شنطتك الفي ضهرك في الرف وتِتْرَزِع في كرسيك لغاية ما تصل وُجهتَك !!!
عُمُرنا دة كلو بنسافِر ، ما سِمِعنالنا محاضرة في طيارة وسفسطة وكلام كتير !!!
في كرسيك دة .. تِترَزِع بس .. وتسقط بس ..
هِنا نفس الشي ..دة كُل السودان خرج عليكم .. ونحنا راكبين القطر دة ومانا سائلين منو السايقو طالما نهاية محطتنا هي ..
دولة مؤسسات !!
يُقَدَم فيها اهل الكفاءة من ابناء وبنات السودان بس ، بدون لون ، عِرق، طائفة، ارضاءات دينية او عرقية ، ولاءآت جهوية وغيرا من صنوف التبعيض والإزاحة والإقصاء ، أوتَمكين فِئة علي حِساب اخري ..
ودة في دولتَك البتدافِع عنها دي هسة مافي مَكَّنوا لي ناسُم فقط ...
دولة القانون ...
دولة تعلو فيها سُوح العدالة والقانون من غير تَغَوُل من اي جِهةٍ كانت ولا سنتي واحِد .. دة برضو في دولة الأبارتيدِ بتاعتَك دي مافي.
الكُل سواسية امام القانون ، سواسية في الحقوق والواجِبات ..
حرية صحافة وحرية تعبير وحرية كَلِمة منضبطة بالقانون ، ظلمتَّ زول بالكلمة ، بالتجريح ، بالإشانة ، ظاهِراً او ضِمناً يفصِل فيها قانون وقاضي نزيه يراعي الحقوق من غير منقصة ، ينصِف فيها اهل المظلمة إن كانت هنالك مظلمة ..ودي هسة إتَّ دة يالطاهِر التوم قاعِد في سودانية ٢٤ دي تَكَلِم في نفسك براك ، في السودان دة كلو زول واقِع ليه كلامَك دة مافي والله ،
ياخي بدل ما تجيب ليك عربي سوري يتكلم عن قضية دارفور ياخي جيب ناس دارفور يورونا مشكِلتُم شنو اجدي ؟
في برنامجَك بتجيب الرزيقي والهندي وتقعدوا تكلموا في روحكم ،!! ياخي جيبوا واحِد من الوليدات الخرجوا مظاهرات ديل خلي السودان دة يعرِف مشكِلتُم شنو! بدل رصاصكم دة .. بعدين ياخي ما تخاف ؟ والله نحنا ما بنسمِح بي زول يَمِس فيك شَعَرة ، إتَّ قول الداير تقولوا في محطتَك دي ذاتا ، بس كَلِم ناسك ديل البتدافِع عنهم بي حق بي باطِل انو يسمحوا لينا نتكلَم نقول كلامنا الما راكِب عدلو دة في تقديرك في نفس البرنامِج نرد علي كلامَك دة ، ودة طلب انا شايفو عادِل جداً بالمناسبة !!
أوتوماتِكالي إتَّ حَتَقفِل دكان عَطَّار النِظام الشمولي الإرهابي الفاشيستي دة وحتي لو أداك المؤتَمر الوطني مال قاروون وادوك ال CNN ، حتلقي نفسَك قاعِد إتَّ ورشا دي والرزيقي والهِندي ، الناس دي خرجَت خلاص وماها راجعا ..
نعم ..
حرية كامِلة غير منقوصة ولا ميلي واحِد ..
توزيع عادِل للثروات ، شفافية ، تبادُل سلمي للسلطة ..
الجيش فيها ضامِن وليس شريك في القرار السياسي ..
حرية التعبير تُكفَل لي اي سوداني و سودانية ، يقيفوا قدام القصر ، في راس البيت ، في الشارع افراد وجماعات ، يقولوا الدايرنو ، كسروا خربوا ، يحاكموا محاكمة عادلة ، مافي خراطيش ومِحيط في الضهر ، مافي بمبان ، مافي رصاص ، اعتِقالات ، تاتشرات وزفت الطين ، طالما حلاقيم صوتم ورايم ..
الفوق دة محطتنا الأخيرة ، وصلنا ليها نقوم ننزل من القطر دة ، ما وِصلنا ليها مانا نازلين .. !! دة بالعربي الفصيح ..
بعد نصل للفوق دة تجي إتَّ يالطاهِر التوم ، يجي صاحبك الصادق ، تجي رشا عوض ، يجي سعيد ود الشول !!! ما عندنا مانِع .. 👆
دة قولي ليك .. اها إت قولك شنو .. ؟
إنتهي ...
انا غايتو راكِب القطر الفوق دة ، ما بعرف مهنيين ، ما بعرِف بتيخ ، بس مع الزول البوصلني وجهتي 👆
مِهنيين غيرُم المُهِم نصل بس .. وتسقط بس .
تقع في الواطة دي تِتْكَسَّر تتدَشّدَش حِتة حِتا اريتا ما قامَت .. و ما يلقولا زولاً يلِمها انشاء الله .. نكُبها نجيب غيرا ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة