نقلت الأنباء تعرض الطالبة عبير ضحية عنف قاسم بدري لمحاولات اخضاع وتلاهيب كيزانية في جامعة الأحفاد ( الشهادة ادنى هذه النوتة) مما يجعلنا نبحث عن مقاربة فكرية لآليات الإخضاع الإجتماعي في جامعة الأحفاد وصلتها بالعلاقات المريضة التي تسود هناك. وفي الحقيقة تشكل قضية الأحفاد نموذجا كلاسيكيا لاساءة استغلال السلطة ولقلب حقائق الاشياء راسا على عقب : فالمجرم والمعتدي يتم تصويره كبطل رغم غروره وتبجحه وجهله المفرط الذي دلقه على صفحات الصحف ؛ والطالبات المتضررات يتم حصارهن كما يتم حصار اي شخص يرفع هذه القضية وتمارس ضده اسؤا اشكال الارهاب والعنف اللفظي- هذا شكل من أشكال القهر الإجتماعي لن يمر ولا ينبغي له أن يمر . فجامعة الاحفاد التي اريد لها ان تكون منارة للدفاع عن حقوق المرأة وواحة للوعي الجديد تحولت بفضل قاسم بدري وتخلفه وذكوريته وعنفه تجاه المرأة ( وما خفي كان أعظم) الى وكر لممارسة العنف تجاه المراة والقهر الاجتماعي واساءة استغلال السلطة والهستيريا التي تمجد المعتدي وتنشد عنه الاناشيد وتطلق المظاهرات للاعتذار له . هذا يذكرنا بسيكلوجية الانسان المقهور التي تحدث عنها مصطفى حجازي او سايكلوجية الجماهير التي تحدث عنها غوستاف لوبون : نذكر هنا انه عندما توفى ستالين انتحر بعض الناس وهسترت الملايين رغم ان الرجل كان سفاحا قاتلا - اكثر من ذلك : بعض الشيوعيين ممن كانوا يذهبون للاعدام بأمر من ستالين وتم تعذيبهم وتعذيب اسرهم باوامر مباشرة كانوا يذهبوت للموت وهم يهتفون : عاش الرفيق ستالين ! يذكرنا هذا أيضا بتجربة سجن ستانفورد . ففي عام 1971 قام استاذ جامعي بعمل تجربة استمرت 6 ايام فقط ؛ وزع فيها الطلبة للعب دور سجانين ومساجين في سجن ستانفورد. بعد ايام قليلة من ”لعب الادوار“ تمت انتهاكات فظيعة من قبل الطلبة - السجانين تجاه الطلبة المساجين. ما كان غريبا وصادما هو تقبل الطلبة - المساجين لدورهم الاجتماعي ولكل الانتهاكات التي تمت بحقهم ؛ رغم انهم يعرفون انهم ليسوا مساجين حقيقيين. تم ايقاف التجربة خوفا من حدوث جرائم. هذا يوضح كيف تعمل ميكانيزمات العنف والاخضاع الإجتماعي في المجتمعات السلطوية المغلقة حتى وسط الطلاب في مجتمع متقدم ؛ وهذا يفسر كيف تتقبل بعض الضحايا للعنف الممارس تجاهها وتبحث عن مبرر له . في تقديري إن تحويل العلاقة التعليمية ما بين رئيس الجامعة من جهة والاستاف والطالبات من جهة أخرى من علاقة رسمية تحكمها اللوائح والقوانين؛ الى علاقة اجتماعية مريضة تسمى بالباباوية (بابا قاسم) هي واحدة من المداخل التي دخل بها الشر الى جامعة الاحفاد. في مجتمع بطريركي بدلا من ان تقوم الاحفاد باستعدال العلاقات الجندرية في داخلها وارسائها على اسس الندية والاحترام المتبادل والمؤسسية ؛ خلقت نموذجا منحطا لعلاقات بطريركية يحتل فيها ( ذكر الألفا ) مكانا خاصا بحيث يتجرأ على القول انه يفعل ما يريد ولا احد يستطيع ان يقول له عينك في رأسك؛ وحيث يشكل النقد له هجوما على (القطيع) كله الذي يتصدى للدفاع بجنون وهستيريا عن الذكوري المعتدي. في جامعة الاحفاد والتي هي مجتمع نسوي بامتياز يلعب قاسم بدري دور ذكر الألفا . في مجتمعات القرود وخصوصا الشمبانزي نجد ان الذكر الألفا – Alpha Male - يحتكر السلطة والجنس وسط أناث قبيلة القرود ، ويحرم على بقية الذكور الاقتراب منهن كما يمارس العنف تجاههن ويكون العنف واحدة من وسائل الاخضاع . منع قاسم بدري للطالبات من ممارسة العمل السياسي هو شكل من اشكال الاخضاع؛ عنفه تجاههن يعبر عن عقلية ذكر الألفا. ملامسته لاجزائهن الحساسة والحضن المذكور كثيرا والقريص هو واحدة من ايات اثبات السلطة الذكورية . لقد تأملت في طريقة مشي قاسم بدري بين الطالبات في الفيديوهات التي انتشرت واختياره للطالبات المضروبات ثم هجومه المفاجيء عليهن ؛ ولم ار لهذا السلوك شبيها ً الا سلوك ذكر الألفا وسط اناث القرود. في الفيديوهات المنتشرة التي توثق عنف قاسم بدري فضلا عن البنات الهاربات من امام ذكر الألفا نجد بعض الرجال الذين لم نر لهم موقفا بل كانوا منكسرين تماما لممارسات قاسم بدري الشمبانزية . هؤلاء هم بقية القرود الذكور الذين لا يملكون لانفسهم حولا ولا طولا امام ذكر الألفا ؛ فهو لا يتورع عن ممارسة العنف تجاههم هم ايضا اذا ما ابدوا أي شكل من أشكال المقاومة. ايضا نجد سلوكا للقرد الذكر الخاضع ضمن القطيع في البيان الذي اصدره رئيس مجلس أمناء جامعة الاحفاد ؛ والذي يسلم فيه بالخضوع التام لذكر الألفا قاسم بدري - باباهم الذي في الأحفاد . في الشهادة ادناه عن محاولات اخضاع الطالبة عبير نجد كل وسائل السلطة القاهرة تستخدم ضد الإنسان الفرد : استخدام الترغيب والترهيب ؛ التهديد بالفصل من الدراسة ؛ الحجر الاجتماعي والعداء الاجتماعي؛ استدعاء المخيلة الاسرية والعاطفية ( انتي ابوك حي ؟) ( اولادك حيكونوا عاقين) - قلب الحقائق وفرض سرد جديد للاحداث ( البت الضربت بابا قاسم ) . هذه كلها اساليب تستخدمها الأنظمة القهرية وأجهزة الأمن في العالم كله. نذكر كلنا كيف برر النظام قتله لمتظاهري سبتمبر بأنهم مخربون اعتدوا على محطات البنزين وكيف جمع سواطيرا وسكاكينا نسبها للمتظاهرين ليبرر جريمة قتلهم وضربهم بالرصاص الحي في رؤوسهم. قبل اسابيع ذهبت لاستعلامات جهاز الامن ووجدت موظفا صلفا في الاستقبال قال لي انه لا يحق لي السؤال عن رضان داؤؤد لأني لست قريبه . لما سالته عن التبرير القانوني لرفضه وبعد مجابدة قال : ساي - سألته ان كان يمكنني تسجيل شهادته هذه انه يتكلم ساي ؟ انفجر بالغضب وهدد بتكسير تلفوني وعند مواجهتي له بذكر سبب للتكسير قال لاني اريد التصوير! . عادة يختلق الجاني سببا خرافيا للتغطية على عنفه هو . ادارة جامعة الاحفاد للاسف تستخدم اساليب وآليات الانظمة القهرية والاجهزة الامنية من الكي جي بي مرورا بالسافاك وانتهاء بجهاز امن ومخابرات النظام . إن كل المنظمات النسوية وفي اولها مبادرة لا لقهر النساء وكل خريجات وطالبات الاحفاد الشريفات وافراد الطاقم التعليمي والاداري الشريف مطالبات وكلنا مطالبون باتخاذ مواقف واضحة وقوية تجاه ما يحدث من انتهاكات في جامعة الاحفاد. اليوم اكثر من اي وقت مضي نحن مطالبون باقالة الذكوري ضارب النساء قاسم بدري من قيادة هذه المؤسسة والنظر في لوائحها وقوانينها لاصلاحها اصلاحا جذريا حتى لا تتحول من واحة لحقوق المرأة الى وكر لممارسة الإخضاع الإجتماعي للنساء . ألا هل بلغت ؟ اللهم شعبي فأشهد . عادل عبد العاطي 15/1/20198
اشارات مرجعية : اختيار سجن ستانفورد ذكر الألفا
#عبير البوست اقصر من امبارح بس أهم منو بالنسبة لي. يوم الخميس11يناير اتصلوا شؤون الطالبات انهم عايزين عبير تمشي ليهم (دا أول استدعاء اداري)،لاقيتا و الصحبات جمب المالية ووقفنا نتكلم في المفروض يحصل و مفروض تتصرف كيف ،و بسبب خلفيتنا عن الجامعة و لأنو بعض الاصطاف استغل الصاحبات ديل عشان يوصلو تهديداتهم لعبير و اللي هي: انهم مبدئيا فصلوها من معهد دراسات الجندر و النوع (المقر بتاعو في الجامعة و اعتقد تابع ليها)و انهم حيسعوا انو يفصلوها من كل نشاطاتا في الجامعة و انو عقابا لازم يكون صارم ،و إنو بدوا يبحثوا في سجلها الاكاديمي و انو و انو ، عشان كدا كانوا الصحبات بوصوها تتمسكن عشان مستقبلا الأكاديمي و انو تستحمل بس عشان تتخرج بسلام في الجامعة دي. بعد الوصايا دي عبير دخلت لناس شؤن الطالبات و كنا راجينها برا جمب مكاتب الادارة القديمة بالتحديد و للصدفة قعدنا في مصطبة قريبة من شباك مكتب البروف ، بعد مضي دقايق قليلة في تلاتة بنات بعرف اتنين منهم جو على الادارة عايزين البروف،حتى انهم ما دخلو بس وقفو في شباك مكتبو و نادو اذا البروف قاعد او لا، جاهم صوت من جوا المكتب انو البروف ماف ،فقامت واحداة منهم اتساءلت نمش ليهو بيتو و لا كيف يا ربي؟ الصوت دا زاتو قال ليهم ماف في بيتو ، البت دي زاتا علقت و قالت" حي ي ربي مافيه في بيتو هربوهو و لا شنو" تانية معاها قالت ليها "يخس عليك" بعدين بقوا بيتناقشوا مع الزول الجوا دا من الشباك حول انو الناس خلت كل مشاكل البلد و خلت الغلاء و غيرو غيرو و بقوا مركزين مع البروف و انهم لازم يتصرفوا حيال الحاجة دي و هم محتارين هل يكتبو بوستات طويلة يشيروها و لا يحشدو بنات يعملوا هيلمانة كدا بتاعة اعتذار و يصوروها و لا كيف! و انهم جو للبروف عشان كدا، (و طبعا هو حكاية الاعتذار دي كان في بوست لف واتساب و فيسبوك من مساء الاربعاء بناشدو البنات انو يخلو الاجواء تهدى و يعملوا حملة اعتذار للبروف) قمت طوالي من مكاني مستاءة من البحصل دا ،لما رجعت و جيت لقيتهم مشوا و عبير طلعت سألتها عن الحصل قالت انهم اتهموها بإنها ضربت البروف و انو دا عمل مشين و كدا و هي قالت ليهم انها ما ضربتو بس استنكرت ضربو ليها و كانت بتحاول تحرر ايديها بس هم قالوا ليها انو في عدد مقدر من الاصطاف كانوا شاهدين و قالو انها ضربتو و انو البروف تعب بعد الحصل و كان برجف و ما ادراك فقامت عبير شرحت ليهم الحصل بالضبط و قالوا ليها خلاص لحد م نشوف ،و لاحظت انو في ورقة فيها بياناتا كانت في المكتب . بعدو انا مشيت عندي لاب في اولد سايكولوجي ،بعد جيت منو فتحت فيسبوك لقيتهم في الفترة الكنت فيها في اللاب كانو حشدو بنات و كتبو بوسترات و بقو يهتفو" عذرا عذرا بابا قاسم" لاقتني الحاجة دي في الفيسبوك فجاة و اتخلعت كيف عملوا كدا في اقل من ساعتين و اختفوا (فاجأني النهار والله بس ما شديد خالص). لما لاقيت عبير كلمتني بإنو ناس عمادة الكلية (كلية علوم صحية) استدعوها، و لاقتهم في مباني الجندر بسبب انو كان عندهم اجتماع هناك ، في جزو من اصطاف الجندر كانت معرفة معاهم بسبب شغلا في الجندر و كانوا بظهرو ليها محبة سابقا، المرة دي كانو بعاينو ليها بغضب و حقارة و سلام بصورة سيئة، جات واحدة من اصطاف الكلية"علوم صحية" سلمت عليها سلام حار بعد عرفت انو دي عبير قالت ليها "لو كنت عارفة انك عبير م كنت سلمت عليك أصلا" . المهم الكلام معاها برضو بخصوص اتهاما بضرب البروف و لما بتشرح انها ما ضربتو ، في واحدة تانية من اصطاف الكلية اعرضت عنها ، و واحدة سمعتا و بعداك قالوا ليها، انو الاصطاف شافوك ضربتيه، و انو البنات الضربوهم اشمعن م قاوموا الا انتي؟ اشمعن انتي الوحيدة الما شفنا ليك فيديو ؟ (في حين انو البت الاتشلتت ما ظهر ليها فيدو نهائي) ، و قالوا ليها انو مبدئيا انتي اتفصلتي من معهد الجندر و حنسعى انك تتفصلي من كل النشاطات و الجهات الانتي مشاركة فيها في اطار الجامعة بسبب سلوكك ، غير انو مفروض تمشي للبروف بيتو و تعتذري ليهو و كمان تجي تكتبي بوست بالاعتذار دا و يتنشر ، دا طبعا مبدئيا قبل ما تجيبي فيديو يثبت بإنك ما ضربتيه (أنى لها؟ أوليست البينة على من ادعى) و انو تجيبي لينا البت البيقولوا عليها عجوز "دي كانت يوم الاربعاء لما عبير جات مارة بعد الحادثة دي ،كانت بتلفت الحرس و بتقول ليهم دي البت الضربت بابا قاسم و اكيد هي تاني ماشة الادارة عشان تسوي مشكلة / و البت دي زاتا يوم الاربعاء جات ادت عبير نصيحة طويلة عريضة عشان عبير قاومت" ،، الحارس لما جا كان موافق على اتهام عبير قال لأنو يوم الأربعاء طلب منها بطاقتا الجامعية و هي رفضت و بكدا خلاص معناه هي مدانة بضرب البروف. في الاوقات دي كانت الاستاذة( بتاعة منشور امبارح ) قريبة من عبير و بتشرح لواحدة من الاصطاف انو عبير كانت بتهيج في البنات في الوقت الكانو هم كإصطاف و مدير بيهدو فيهم ، و انها كانت بتحرض البنات و انو البنات كانوا عايزين يطلعوا مظاهرة برة و ما تعرف (في حين انو الاحتجاج كان اصلا على غلاء و ارتفاع اسعار أكل كافتيريا السنتر ،و اللي هي اصلا في قلب الجامعة).3
يوم الجمعة كنت عرفت من واحدة عن طريق الصدفة ،الحاجة الأنا ما كنت مستغرباها ابدا و اساسا بقيت اتوقع اي شي ،و هي انو البوسترات المكتوب فيها شعارات الاعتذار و الحب للبروف طلعت من مكتب شؤون الطالبات زااتو، و انو الاصطاف عملوا الحاجة دي مع بعض الطالبات و جمعوا بنات للاعتذار دا عشان يصوروا الحاجة دي الزولة دي أكدت انها كانت حاضرة و شاهدة لي دا كلو ،،(عموما الكلام دا انا صدقتو بنسبة 95% بسبب المشهد الفوق القدام الادارة )، نفس اليوم دا اتكلمت مع عبير انو تشوف أ.ستاذة هادية حسب الله ( بس لاني بثق فيها اكتر من اي زول تاني من اصطاف الجامعة) . اليوم رابطة الكلية استدعوا عبير و قالوا انهم استدعوها عشان عمادة الكلية طلبت انو الرابطة تمشي مع عبير للبروف و يقدموا اعتذارهم بإسم الكلية 📷😪 عم عبير جا الجامعة و اثناء م احنا واقفين مروا استاذتين من الكلية و نادوا عبير بنهرة،سألوها اذا كانت اعتذرت و لا لا و لما قالت ليهم لا ، كانوا غضبانين جدا ،واحدة قالت ليها" انتي ابوك حي؟" ردت عبير" آيوة حي" قالت ليها طيب اذا فصلناك مثلا ابوك حتقولي ليه شنو؟ و امشي اعتذري هسي قبل م تمشي البيت و نزلي بوست بالاعتذار دا و بعداك مشوا ، بعديها انا اتحركت على سايكولوجي اشوف أ.هادية بس اتأخرت في الطريق فلحقتني عبير و قالت انو لما انا مشيت واحدة من الاستاذتين رجعت و قالت ليها" انتي بعدين حيكون عندك اولاد عاقين على فكرة ،لما عبير سألتا ليه ،قالت ليها لأني بتضربي أبوك فأولادك حيضربوك مستقبلا، عبير سألتا ليها القال ليك منو اني ضربت ابوي؟ قالت ليها يعني بابا قاسم ما أبوك؟ عبير ردت لا و بت تانية واقفة قالت ليها على فكرة هو ما أبوي برضو و عمري ما اعتبرتو ابو اصلا، هنا الاستاذة مشت خلتهم." كلمونا انو أ.هادية في مباني الجندر و عبير مشت ليها و اتكلموا بعداك أ.هادية ساقتا هي و عمها ل د.بلقيس بدري و نفيسة بدري ،و انهم اعتذروا ليها هي و عمها و قالو انو البروف طلع بيان اعتذار "بيان الاعتذار ما ليها هي و لا بأسمها أصلا "، و أما بخصوص العداء الموجه من قبل الاصطاف و حكاية الأكاديميات ،قالوا ليها انهم حيقيفوا على الحاجة دي و انو ما حيحصل ليها شي. المهم بعد البوست دا بقول (اذا مت إبحثوا لي عن زوج و أخبروه بأني كنت أحبه جدا📷😂📷💔) يعني شنو ؟ متوقعة العراقيل و التهديدات الممكن تجيني من اللمطبلاتية من اصطاف الجامعة و قادرة اتحمل النتيجة و اذا ما حصل شي زي دا يكون خيرا فعلوا وفي الحالتين (الله يهديكم) . البوست لعناية المطبلاتية اصطاف او طالبات،لعناية الناس العمتهم محبتهم للبروف(مع انو المحبة أنبل من انو تخلينا نأيد الغلط،المحبة بتتحمل حدود الحق و الحقيقة )، لعناية الناس الما هاماهم سوى مصالحهم مع مطبلاتية الاصطاف في الجامعة دي(و الأنا ما عارفاها شنو) و بيطبلوا للبروف بحماقة زايدة و بدون وعي (دمع الحن بقيف و دمع النفع سريف). * سجلي الاكاديمي ربيت سنة و المالي منحة "و هذا منا للعلم" البوست كان على هذا الرابط : https://www.facebook.com/permalink.php؟story_fbid=219428028818500andid=100022539127529https://www.facebook.com/permalink.php؟story_fbid=219428028818500andid=100022539127529
01-15-2018, 04:06 PM
nour tawir nour tawir
تاريخ التسجيل: 08-16-2004
مجموع المشاركات: 17638
قضية قاسم بدرى و ما حدث فى كلية الاحفاد.. أمر يتوافق مع ما وصل اليه التعليم فى السودان .... وهو يعكس حال المؤسسة التعليمية فى زمن الانقاذ.. و منذ أن فقد التعليم استقلاليته.. و اصبح مسّيسا لخدمة المؤتمر الوطنى.. انتفت صفة التعليم فى البلاد.. و اصبح العلم هو مجرد حلم يتمسك به الطلاب لانه لا يوجد سواه.. قاسم بدرى حينما يضرب طالباته.. فهو يعبر عن رأى الحكومة فى المرأة.. هل نسيت النساء اللائى تضربهن الشرطة فى وسط الشارع.. و الكل يتفرج على هذه القسوة ؟ و هل نسيت عمر البشير حينما قال (البنّية وضربناها.أها يعنى شنو)؟ و هل نسيت تصريح الغرباوية التى يجب ان تفتخر بالاعتداء الجنسى اذا حدث من جعلى ؟ هذه بعض تصريحات رئيس الدولة عن المرأة.. و هل تذكر رجال الآمن الذىن خلعوا ملابسهم ولم يبق غير الملابس الداخلية.. و جلسوا فى استقبال نفس كلية الاحفاد قائلين( يا الله العايزة تطلع مظاهرة تجى)! وهو تهديد بالاعتداء الجنسى.. حدث ذلك قبل بضعة سنوات حينما همت الطالبات فى خروج فى مظاهرة ضد أمر من أمور فساد الانقاذ.. القضية هنا قضية المؤسسة التعليمية بالكامل يا عادل.. فهل نستغرب ما فعله قاسم بدرى كما لو أنه قد أتى بأمر يحدث و لاول مرة فى التاريخ ؟ تخريمة.. ميزانية التعليم فى الانقاذ 5% بعد الموازنة لعام 2018 تقلصت الى 3% و كسر.. وقس على ذلك مستوى التعليم فى البلاد..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عادل عبد العاطي
nour tawir
فيس بوك
تويتر
انستقرام
يوتيوب
بنتيريست